AN COIMISIÚN EORPACH
An Bhruiséil,23.9.2021
COM(2021) 595 final
IARSCRÍBHINNÍ
a ghabhann leis an
Togra le haghaidh Cinneadh ón gComhairle
maidir leis an seasamh atá le glacadh thar ceann an Aontais sna comhairliúcháin bhliantúla leis an Ríocht Aontaithe chun teacht ar chomhaontú maidir le gabhálacha iomlána incheadaithe
IARSCRÍBHINN I
An seasamh atá le glacadh thar ceann an Aontais
sna comhairliúcháin bhliantúla leis an Ríocht Aontaithe chun teacht ar chomhaontú maidir le gabhálacha iomlána incheadaithe
1.PRIONSABAIL
Faoi chuimsiú na gcomhairliúchán bliantúil leis an Ríocht Aontaithe, déanfaidh an tAontas na nithe seo a leanas:
(a)Féachfaidh sé lena áirithiú go mbeidh na deiseanna iascaireachta a chomhaontófar comhsheasmhach leis an dlí idirnáisiúnta, go háirithe le forálacha Choinbhinsiún na Náisiún Aontaithe (‘NA’) maidir le Dlí na Farraige 1982 agus le Comhaontú na Náisiún Aontaithe maidir le Caomhnú agus Bainistiú Stoc Éisc Traslimistéir agus Stoc Éisc Mór-imirceach 1995.
(b)Féachfaidh sé lena áirithiú go mbítear á n‑urramú gealltanais idirnáisiúnta an Aontais.
(c)Féachfaidh sé le comhsheasmhacht agus sineirge a chur ar fáil ann maidir leis na beartais atá á saothrú ag an Aontas mar chuid dá chaidreamh déthaobhach iascaigh le tríú tíortha eile agus laistigh d’eagraíochtaí réigiúnacha bainistithe iascaigh, agus áiritheoidh sé comhleanúnachas lena bheartais eile, go sonrach i réimse an chaidrimh sheachtraigh, na fostaíochta, an chomhshaoil, na trádála, na forbartha, an taighde agus na nuálaíochta.
(d)Féachfaidh sé lena áirithiú go gcinnfear na TACanna go comhpháirteach i gcomhréir le cuspóir an Chomhbheartais Iascaigh (‘CBI’) na hiascaigh a bheith inbhuanaithe san fhadtéarma ó thaobh an chomhshaoil de agus iad a bheith á mbainistiú ar bhealach a bheith comhsheasmhach leis na cuspóirí tairbhí eacnamaíocha, sóisialta agus fostaíochta a bhaint amach, lena n‑áirítear croíchuspóir caomhnaithe an CBI, an uastáirgeacht inbhuanaithe agus na pleananna ilbhliantúla is infheidhme.
(e)Féachfaidh sé le bheith i gcomhréir leis na conclúidí ón gComhairle an 19 Márta 2012 maidir le Teachtaireacht ón gCoimisiún i ndáil le gné sheachtrach an Chomhbheartais Iascaigh.
(f)Féachfaidh sé le rialacha neamh‑idirdhealaitheacha a áirithiú le haghaidh chabhlach an Aontais agus na rialacha sin a bhunú ar na prionsabail agus na caighdeáin chéanna atá infheidhme faoi dhlí an Aontais.
(g)Féachfaidh sé le hamlínte a bhunú le haghaidh na gcomhairliúchán bliantúil maidir le deiseanna iascaireachta.
(h)Féachfaidh sé le comhleanúnachas a áirithiú le reachtaíocht chomhshaoil an Aontais, go háirithe Treoir 2008/56/CE, chomh maith le beartais eile de chuid an Aontais.
2.TREOIRLÍNTE
Tá an tAontas le gach iarracht a dhéanamh chun teacht ar chomhaontú leis an Ríocht Aontaithe maidir le deiseanna iascaireachta (TACanna agus na bearta lena bhfuil baint fheidhmiúil acu), agus é sin a bhunú ar an gcur chuige a leagtar amach thíos.
Ar an gcaoi sin, oibreoidh an Coimisiún go dlúth leis an gComhairle le linn na gcomhairliúchán bliantúil, chun na nithe seo a leanas a dhéanamh:
(a)Féachaint leis na TACanna a bhunú de réir na comhairle eolaíche is fearr dá bhfuil ar fáil, chun ráta saothraithe na huastáirgeachta inbhuanaithe a bhaint amach.
(b)Féachaint leis na TACanna a bhunú faoi chur chuige an réamhchúraim maidir le hiascaigh i gcás nach bhfuil an chomhairle eolaíoch sin maidir le rátaí saothraithe na huastáirgeachta inbhuanaithe ar fáil.
(c)Féachaint le cosc a chur ar róshaothrú na stoc éisc ábhartha tríd na TACanna uile a shocrú ag leibhéal a bheidh ar aon dul leis an leibhéal a socraíodh sna blianta roimhe sin i gcás nach bhfuil comhairle eolaíoch ar fáil.
(d)Féachaint le meascán de chineálach éagsúla comhairle eolaíche a fháil maidir leis na TACanna a shocrú, lena n‑áirítear comhairle ina n‑áirítear an uastáirgeacht inbhuanaithe agus comhairle réamhchúraim, maidir leis na TACanna lena mbaineann neamhréir idir an limistéar comhairle agus na limistéir bhainistíochta, nó i gcás ina mbeidh cumasc de speicis éagsúla sna TACanna.
(e)Féachaint le TACanna a bhunú trí mheasúnú uastáirgeachta inbhuanaithe agus comhairle FMSY i gcomhréir le cuspóir na huastáirgeachta inbhuanaithe atá ag CBI agus na pleananna ilbhliantúla is infheidhme. I gcás ina gceadaítear sna pleananna ilbhliantúla úsáid a bhaint as na raonta FMSY a chuireann ICES ar fáil, ba cheart don Aontas féachaint le leas a bhaint as na forálacha sin, má chomhlíontar na coinníollacha a leagtar amach sna pleananna ilbhliantúla.
(f)Féachaint leis na TACanna a shocrú dé réir chur chuige an réamhchúraim i gcomhréir leis an bpríomhchomhairle atá i mbileog chomhairle eolaíche ICES ina bhfuil comhairle réamhchúraim maidir leis na nithe seo a leanas: (i) stoic fhoghabhála (faoi phleananna ilbhliantúla); (ii) spriocstoic (faoi phleananna ilbhliantúla) i gcás nach gcuireann ICES ach comhairle réamhchúraim ar fáil; agus (iii) TACanna le comhairle réamhchúraim ilbhliantúil, arae sna cásanna sin bá cheart cobhsaíocht a shaothrú.
(g)Féachaint lena chur san áireamh go ngabhann deacrachtaí le hiascaireacht gach uile stoc éisc, ar leibhéal na huastáirgeachta inbhuanaithe, ag an tráth céanna, in iascach measctha, agus go háirithe i gcás inar deacair feiniméan an tachtspeicis a sheachaint, lena n‑áirítear na TACanna a gcomhairlítear gabháil nialasach ina leith maidir le TACanna spriocghabhála nó TACanna foghabhála. Ba cheart don Aontas, i gcás inarb ábhartha faoi na pleananna ilbhliantúla, féachaint le bearta ceartaitheacha a leagan síos chomh maith leis an leibhéal TAC a shocrú.
(h)Féachaint leis na TACanna a shocrú chun críoch eolaíoch nó faireacháin i gcomhréir leis an gcomhairle eolaíoch.
(i)Féachaint le comhsheasmhacht a chur ar fáil leis an reachtaíocht is infheidhme de chuid an Aontais i ndáil le speicis shonracha agus le stoic shonracha.
(j)Féachaint le cóineasú dearcaidh a chur chun cinn maidir leis na speicis a dtoirmiscfear iad a iascach, agus an toirmeasc sin arna bhunú ar chomhairle eolaíoch, lena n‑áirítear toirmeasc ginearálta maidir le hiascaigh siorcanna domhainfharraige.
(k)Féachaint le cuir chuige comhaontaithe a bheith ann maidir le modh agus cur i bhfeidhm na gcoigeartuithe ar na TACanna comhaontaithe i ndiaidh chur i bhfeidhm na ndíolúintí ón oibleagáid gabhálacha a thabhairt i dtír (díolúintí de minimis agus inmharthanachta ón oibleagáid na gabhálacha uile a thabhairt i dtír). Ba cheart don Aontas féachaint leis an leibhéal is airde is féidir de chuir chuige comhaontuithe a bhaint amach maidir leis na díolúintí sin atá comhsheasmhach le hAirteagal 15 de Rialachán (AE) Uimh. 1380/2013.
(l)Féachaint le teacht ar chomhaontú maidir leis an gcur chuige chun an doingean mara Eorpach a chaomhnú, bunaithe ar chomhairle eolaíoch ICES.
(m)Féachaint le teacht ar chomhaontú maidir le bearta eile a bhfuil baint fheidhmiúil acu i ndáil le TACanna, go háirithe i dtaca le coinníollacha speisialta agus solúbthachtaí idirlimistéir, i gcomhréir le Rialachán (AE) Uimh. 1380/2013, go háirithe Airteagail 15(8) agus 15(9) de.
(n)Féachaint leis na stoic a measfar mar ‘stoic speisialta’ a shainaithint chun TACanna sealadacha a shocrú i gcás nach féidir na comhairliúcháin bhliantúla a thabhairt i gcrích go tráthúil i gcomhréir le hAirteagal 498(2) den Chomhaontú, bunaithe ar an gcomhairle eolaíoch is fearr dá bhfuil ar fáil, agus i gcomhréir le hAirteagal 499(4) den Chomhaontú.
IARSCRÍBHINN II
Sonrú ‘ó bhliain go bliain’ sheasamh an Aontais atá le glacadh le linn na gcomhairliúchán bliantúil leis an Ríocht Aontaithe chun teacht ar chomhaontú maidir le gabhálacha iomlána incheadaithe
Sula dtosóidh na comhairliúcháin bhliantúla leis an Ríocht Aontaithe, agus lena linn, déanfaidh an Coimisiún gach beart is gá chun go gcuirfear an chomhairle eolaíoch is déanaí agus aon fhaisnéis ábhartha eile atá ar fáil san áireamh sa seasamh atá le glacadh thar ceann an Aontais, i gcomhréir leis na prionsabail agus na treoirlínte a leagtar amach in Iarscríbhinn I. Léireofar an seasamh sa taifead i scríbhinn ina ndéantar doiciméadú ar na socruithe arna ndéanamh idir an tAontas agus an Ríocht Aontaithe mar thoradh ar na comhairliúcháin faoi Airteagal 498 den Chomhaontú sin.
Chuige sin, agus bunaithe ar an gcomhairle agus ar an bhfaisnéis sin, déanfaidh an Coimisiún, in am trátha roimh na comhairliúcháin bhliantúla, doiciméad i scríbhinn a tharchur chuig an gComhairle ina mbeidh an tsonraíocht atá beartaithe le haghaidh sheasamh an Aontais agus a úsáidfear chun mionsonraí an tseasaimh atá le léiriú thar ceann an Aontais a phlé agus a fhormhuiniú. Go háirithe, déanfaidh an Coimisiún, in am trátha sula síneofar an taifead i scríbhinn dá dtagraítear thuas, seasamh an Aontais a tharchur chuig an gComhairle chun mionsonraí na gcomhairliúchán bliantúil a fhormhuiniú.
Áireofar sa phróiseas sin cruinnithe comhordúcháin in situ, cuir i láthair, glacadh cuntas agus pléití, agus rannpháirtíocht iomlán na dtoscaireachtaí náisiúnta sna comhairliúcháin bhliantúla, lena n‑áirítear a rannpháirtíocht mar chuid de thoscaireacht an Aontais, agus, nuair is gá, sna cruinnithe teicniúla.
Mura féidir leis an Aontas, le linn na gcomhairliúchán, teacht ar chomhaontú leis an Ríocht Aontaithe, agus chun go gcuirfidh seasamh an Aontais gnéithe nua san áireamh, cuirfidh an Coimisiún an t‑ábhar faoi bhráid na Comhairle, i gcomhréir leis an nós imeachta a leagtar amach sa dara mír thuas.
Más iomchuí, i ndiaidh thabhairt i gcrích na gcomhairliúchán, na TACanna a leasú sa bhliain nó sna blianta ar tugadh iad i gcrích ina leith, déanfaidh an Coimisiún, in am trátha agus ar bhonn na faisnéise eolaíche is déanaí agus ar bhonn faisnéise ábhartha eile agus i gcomhréir leis na prionsabail agus na treoirlínte a leagtar amach in Iarscríbhinn I, doiciméad nua i scríbhinn a chur faoi bhráid na Comhairle ina leagtar amach an tsonraíocht atá beartaithe maidir le seasamh an Aontais i dtaobh an leasaithe sin, chun mionsonraí an tseasaimh atá le léiriú thar ceann an Aontais a phlé agus a fhormhuiniú.