European flag

Il-Ġurnal Uffiċjali
ta'l-Unjoni Ewropea

MT

Is-serje L


2025/2363

21.11.2025

DIRETTIVA DELEGATA TAL-KUMMISSJONI (UE) 2025/2363

tat-8 ta’ Settembru 2025

li temenda d-Direttiva 2011/65/UE tal-Parlament Ewropew u tal-Kunsill fir-rigward ta’ eżenzjoni għaċ-ċomb f’komponenti tal-ħġieġ jew taċ-ċeramika

(Test b’rilevanza għaż-ŻEE)

IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea,

Wara li kkunsidrat id-Direttiva 2011/65/UE tal-Parlament Ewropew u tal-Kunsill tat-8 ta’ Ġunju 2011 dwar ir-restrizzjoni tal-użu ta’ ċerti sustanzi perikolużi fit-tagħmir elettriku u elettroniku (1), u b’mod partikolari l-Artikolu 5(1), il-punt (a) tagħha,

Billi:

(1)

L-Artikolu 4(1) tad-Direttiva 2011/65/UE jirrikjedi li l-Istati Membri jiżguraw li t-tagħmir elettriku u elettroniku mqiegħed fis-suq ma jkunx fih is-sustanzi perikolużi elenkati fl-Anness II ta’ dik id-Direttiva. Dik ir-restrizzjoni ma tapplikax għal ċerti applikazzjonijiet eżentati li huma elenkati fl-Anness III ta’ dik id-Direttiva.

(2)

Il-kategoriji tat-tagħmir elettriku u elettroniku li għalihom tapplika d-Direttiva 2011/65/UE huma elenkati fl-Anness I ta’ dik id-Direttiva.

(3)

Iċ-ċomb huwa sustanza ristretta elenkata fl-Anness II tad-Direttiva 2011/65/UE. Il-valur tal-konċentrazzjoni ttollerat massimu huwa ta’ 0,1 % skont il-piż taċ-ċomb f’materjali omoġenji.

(4)

Id-Direttiva Delegata tal-Kummissjoni (UE) 2018/736 (2) tat eżenzjoni għall-komponenti elettriċi u elettroniċi li jkun fihom iċ-ċomb fil-ħġieġ jew fiċ-ċeramika jew fil-kompost b’matriċi tal-ħġieġ jew taċ-ċeramika, kif stabbilit fl-entrata 7(c)-I tal-Anness III tad-Direttiva 2011/65/UE. L-eżenzjoni kellha tiskadi fil-21 ta’ Lulju 2021, fil-21 ta’ Lulju 2023 u fil-21 ta’ Lulju 2024, rispettivament għal kull kategorija ta’ tagħmir elettriku u elettroniku rilevanti.

(5)

Id-Direttiva Delegata tal-Kummissjoni (UE) 2019/169 (3) tat eżenzjoni għaċ-ċomb fiċ-ċeramika dielettrika f’kapaċitaturi għal vultaġġ attribwit ta’ 125 V AC jew 250 V DC jew ogħla, kif stabbilit fl-entrata 7(c)-II tal-Anness III tad-Direttiva 2011/65/UE. L-eżenzjoni kellha tiskadi fil-21 ta’ Lulju 2021, fil-21 ta’ Lulju 2023 u fil-21 ta’ Lulju 2024, rispettivament għal kull kategorija ta’ tagħmir elettriku u elettroniku rilevanti.

(6)

B’kollox, il-Kummissjoni rċeviet tmien talbiet ta’ tiġdid għall-eżenzjoni msemmija fil-premessa 4, li jkopru l-kategoriji ta’ tagħmir elettriku u elettroniku kollha. Għall-eżenzjoni msemmija fil-premessa 5, il-Kummissjoni rċeviet talba ta’ tiġdid waħda. It-talbiet kollha waslu fil-perjodu ta’ żmien għat-tiġdid stabbilit fl-Artikolu 5(5) tad-Direttiva 2011/65/UE. F’konformità mal-Artikolu 5(5), it-tieni subparagrafu, tad-Direttiva 2011/65/UE, l-eżenzjoni eżistenti tibqa’ valida sakemm tittieħed deċiżjoni dwar l-applikazzjoni għat-tiġdid mill-Kummissjoni.

(7)

Sabiex jiġu evalwati l-applikazzjonijiet riċevuti, twettaq studju ta’ valutazzjoni teknika u xjentifika, li ġie ffinalizzat fl-2022 (4). Sar u ġie ffinalizzat studju ieħor li jiffoka fuq il-kategoriji ta’ tagħmir elettriku u elettroniku li għalihom intalab tiġdid fi stadju aktar tard fl-2024 (5). L-evalwazzjoni kienet tinkludi konsultazzjonijiet mal-partijiet ikkonċernati f’konformità mal-Artikolu 5(7) tad-Direttiva 2011/65/UE.

(8)

L-evalwazzjoni tat-tiġdid tal-eżenzjoni mitlub ikkonkludiet li fiċ-ċeramika, iċ-ċomb jipprovdi karatteristiċi dielettriċi, pjeżoelettriċi, piroelettriċi, ferroelettriċi, semikondutturi, manjetiċi fuq firxa wiesgħa ta’ użi f’termini ta’ temperaturi, ta’ vultaġġi jew ta’ frekwenzi. Fil-ħġieġ, iċ-ċomb jipprovdi proprjetajiet kruċjali bħal pereżempju jbaxxi l-punti ta’ tidwib jew ta’ trattib, itejjeb il-kapaċità ta’ tħaddim, il-kapaċità ta’ mmaxinjar, u l-istabbiltà kimika u oħrajn.

(9)

Is-sostituti għaċ-ċeramika u għall-ħġieġ li fihom iċ-ċomb jew ma humiex teknikament prattikabbli għall-applikazzjonijiet kollha jew is-sostituti ma humiex affidabbli biżżejjed għal applikazzjonijiet speċifiċi. Għalhekk, it-tiġdid mitlub jissodisfa l-kriterji stabbiliti fl-Artikolu 5(1), il-punt (a), l-ewwel u t-tieni inċiż, tad-Direttiva 2011/65/UE, jiġifieri, li l-eliminazzjoni jew is-sostituzzjoni permezz tal-bidliet fid-disinn jew materjali u komponenti li ma jirrikjedu l-ebda wieħed mill-materjali jew mis-sustanzi elenkati fl-Anness II ma hijiex prattikabbli mil-lat xjentifiku jew tekniku u li l-affidabbiltà tas-sostituti ma hijiex żgurata.

(10)

Sabiex fil-futur tkun tista’ ssir valutazzjoni teknika aktar iffukata, l-eżenzjoni kurrenti stabbilita fl-entrata 7(c)-I tal-Anness III tad-Direttiva 2011/65/UE jenħtieġ li tinqasam f’żewġ punti, jiġifieri 7(c)-V għaċ-ċomb f’applikazzjonijiet tal-ħġieġ u 7(c)-VI għaċ-ċomb f’applikazzjonijiet taċ-ċeramika. Huwa xieraq li jiġu speċifikati l-applikazzjonijiet tekniċi f’dawk l-entrati.

(11)

L-evalwazzjoni msemmija fil-premessa 7 ikkonkludiet li għalkemm huwa xjentifikament possibbli li ċ-ċomb jiġi sostitwit fid-dielettriki taċ-ċeramika għal kapaċitaturi b’vultaġġ għoli għal xi applikazzjonijiet skont l-eżenzjoni stabbilita fil-punt 7(c)-II tal-Anness III tad-Direttiva 2011/65/UE, ma huwiex teknikament prattikabbli għall-biċċa l-kbira tal-applikazzjonijiet. Barra minn hekk, tali kapaċitaturi mingħajr ċomb ma għandhomx biżżejjed affidabbiltà fil-prattika. Għalhekk, it-tiġdid mitlub jissodisfa l-kriterji stabbiliti fl-Artikolu 5(1), il-punt (a), l-ewwel u t-tieni inċiż, tad-Direttiva 2011/65/UE.

(12)

L-eżenzjonijiet imġedda jenħtieġ li jingħataw b’perjodi ta’ validità li jqisu l-konklużjonijiet tekniċi tal-evalwazzjoni msemmija fil-premessa 7. L-eżenzjoni stabbilita fil-punt 7(c)-I tal-Anness III tad-Direttiva 2011/65/UE jenħtieġ li tiġġedded għal perjodu ta’ validità għal żmien qasir f’konformità mal-Artikolu 5(2), l-ewwel subparagrafu, tad-Direttiva 2011/65/UE. Id-dati ta’ skadenza tal-eżenzjoni stabbiliti fil-punti 7(c)-II u l-eżenzjonijiet li għandhom jiġu stabbiliti fil-punti 7(c)-V u 7(c)-VI tal-Anness III ta’ dik id-Direttiva jenħtieġ li jqisu l-perjodu minimu ta’ 18-il xahar qabel id-data ta’ skadenza, li fih it-talbiet ta’ tiġdid jeħtieġ li jiġu sottomessi f’konformità mal-Artikolu 5(5), l-ewwel subparagrafu, tad-Direttiva 2011/65/UE.

(13)

Minħabba t-tiġdid għal perjodu ta’ żmien qasir li jifdal tal-eżenzjoni stabbilita fil-punt 7(c)-I tal-Anness III tad-Direttiva 2011/65/UE, huwa xieraq li tiġi stabbilita data ta’ skadenza waħda għall-kategoriji kollha ta’ tagħmir elettriku u elettroniku stabbiliti fl-Anness I tad-Direttiva 2011/65/UE.

(14)

It-tiġdid tal-eżenzjonijiet ma jdgħajjifx il-protezzjoni ambjentali u tas-saħħa li jagħti r-Regolament (KE) Nru 1907/2006 tal-Parlament Ewropew u tal-Kunsill (6).

(15)

Għaldaqstant, jenħtieġ li d-Direttiva 2011/65/UE tiġi emendata kif xieraq,

ADOTTAT DIN ID-DIRETTIVA:

Artikolu 1

L-Anness III tad-Direttiva 2011/65/UE huwa emendat f’konformità mal-Anness ta’ din id-Direttiva.

Artikolu 2

1.   L-Istati Membri għandhom jadottaw u jippubblikaw, sa mhux aktar tard minn 30 Ġunju 2026, il-liġijiet, ir-regolamenti u d-dispożizzjonijiet amministrattivi neċessarji biex jikkonformaw ma’ din id-Direttiva. Huma għandhom jikkomunikaw minnufih it-test ta’ dawk id-dispożizzjonijiet lill-Kummissjoni.

Huma għandhom japplikaw dawk id-dispożizzjonijiet minn 1 Lulju 2026.

Meta l-Istati Membri jadottaw dawk id-dispożizzjonijiet, fihom għandu jkun hemm referenza għal din id-Direttiva jew għandhom ikunu akkumpanjati minn dik ir-referenza meta ssir il-pubblikazzjoni uffiċjali tagħhom. Huma l-Istati Membri li għandhom jiddeċiedu kif issir dik ir-referenza.

2.   L-Istati Membri għandhom jikkomunikaw lill-Kummissjoni t-test tad-dispożizzjonijiet ewlenin tal-liġi nazzjonali li jadottaw fil-qasam kopert minn din id-Direttiva.

Artikolu 3

Din id-Direttiva għandha tidħol fis-seħħ fl-għoxrin jum wara dak tal-pubblikazzjoni tagħha f’Il-Ġurnal Uffiċjali tal-Unjoni Ewropea.

Artikolu 4

Din id-Direttiva hija indirizzata lill-Istati Membri.

Magħmul fi Brussell, it-8 ta’ Settembru 2025.

Għall-Kummissjoni

Il-President

Ursula VON DER LEYEN


(1)   ĠU L 174, 1.7.2011, p. 88, ELI: http://data.europa.eu/eli/dir/2011/65/oj.

(2)  Id-Direttiva Delegata tal-Kummissjoni (UE) 2018/736 tas-27 ta’ Frar 2018 li temenda, għall-finijiet ta’ adattament għall-progress xjentifiku u tekniku, l-Anness III tad-Direttiva 2011/65/UE tal-Parlament Ewropew u tal-Kunsill fir-rigward ta’ eżenzjoni għal ċerti komponenti elettriċi u elettroniċi li jkun fihom iċ-ċomb fi ħġieġa jew ċeramika (ĠU L 123, 18.5.2018, p. 94, ELI: http://data.europa.eu/eli/dir_del/2018/736/oj).

(3)  Id-Direttiva Delegata tal-Kummissjoni (UE) 2019/169 tas-16 ta’ Novembru 2018 li temenda, għall-finijiet ta’ adattament għall-progress xjentifiku u tekniku, l-Anness III tad-Direttiva 2011/65/UE tal-Parlament Ewropew u tal-Kunsill fir-rigward ta’ eżenzjoni għaċ-ċomb fiċ-ċeramika dielettrika f’ċerti kapaċitaturi (ĠU L 33, 5.2.2019, p. 5, ELI: http://data.europa.eu/eli/dir_del/2019/169/oj).

(4)  Ir-Rapport finali (il-Pakkett 22) tal-istudju huwa disponibbli fuq https://op.europa.eu/mt/publication-detail/-/publication/c774eb67-7cc6-11ec-8c40-01aa75ed71a1/language-mt.

(5)  Ir-Rapport finali (Pakkett 27) tal-istudju huwa disponibbli fuq https://op.europa.eu/mt/publication-detail/-/publication/708d9a2a-26e1-11ef-a195-01aa75ed71a1/language-mt/format-PDF/source-327348441.

(6)  Ir-Regolament (KE) Nru 1907/2006 tal-Parlament Ewropew u tal-Kunsill tat-18 ta’ Diċembru 2006 dwar ir-reġistrazzjoni, il-valutazzjoni, l-awtorizzazzjoni u r-restrizzjoni ta’ sustanzi kimiċi (REACH), li jistabbilixxi Aġenzija Ewropea għas-Sustanzi Kimiċi, li jemenda d-Direttiva 1999/45/KE u li jħassar ir-Regolament (KEE) Nru 793/93 tal-Kunsill u r-Regolament (KE) Nru 1488/94 tal-Kummissjoni kif ukoll id-Direttiva 76/769/KEE tal-Kunsill u d-Direttivi 91/155/KEE, 93/67/KEE, 93/105/KE u 2000/21/KE tal-Kummissjoni (ĠU L 396, 30.12.2006, p. 1, ELI: http://data.europa.eu/eli/reg/2006/1907/oj).


ANNESS

L-Anness III tad-Direttiva 2011/65/UE huwa emendat kif ġej:

(1)

il-punti 7(c)-I u 7(c)-II huma sostitwiti b’dan li ġej:

“7(c)-I

Komponenti elettriċi u elettroniċi li jkun fihom iċ-ċomb fi ħġieġa jew ċeramika għajr iċ-ċeramika dielettrika fil-kapaċitaturi, eż. apparat pjeżoelettroniku, jew f’kompost b’matriċi tal-ħġieġ jew taċ-ċeramika

Tapplika għall-kategoriji kollha u tiskadi fit-30 ta’ Ġunju 2027.

7(c)-II

Iċ-ċomb f’ċeramika dielettrika f’kapaċitaturi għal vultaġġ attribwit ta’ 125 V AC jew 250 V DC jew ogħla

Tapplika għall-kategoriji kollha (ħlief l-applikazzjonijiet koperti mill-punt 7(c)-I jew 7(c)-IV) u tiskadi fil-31 ta’ Diċembru 2027.”

(2)

jiżdiedu l-punti 7(c)-V u 7(c)-VI li ġejjin:

“7(c)-V

Il-komponenti elettriċi u elettroniċi li jkun fihom iċ-ċomb fi ħġieġa jew f’kompost b’matriċi tal-ħġieġ li jissodisfa kwalunkwe waħda mill-funzjonijiet li ġejjin:

(1)

għall-protezzjoni u għall-iżolazzjoni elettrika fil-bċejjeċ tal-ħġieġ ta’ dijodi b’vultaġġ għoli u saffi tal-ħġieġ għall-wafers;

(2)

għall-issiġillar ermetiku bejn il-partijiet taċ-ċeramika, tal-metall u/jew tal-ħġieġ;

(3)

għall-finijiet ta’ twaħħil f’tieqa tal-parametru tal-proċess għal < 500 °C flimkien ma’ viskożità ta’ 1 013,3 dPas (“temperatura tat-tranżizzjoni tal-ħġieġ”);

(4)

għall-użu bħala materjal ta’ reżistenza bħal-linka, b’firxa ta’ reżistività minn 1 ohm/kwadru għal 100 megohm/kwadru, esklużi l-potenzjometri trimmer;

(5)

għall-użu f’uċuħ tal-ħġieġ modifikati kimikament għall-plakki ta’ mikrokanali (MCPs, Microchannel Plates), għall-multiplikaturi tal-elettroni b’kanal (CEMS, Channel Electron Multipliers) u għall-prodotti tal-ħġieġ ta’ reżistenza (RGPs, Resistive Glass Products).

Tapplika għall-kategoriji kollha u tiskadi fil-31 ta’ Diċembru 2027.

7(c)-VI

Il-komponenti elettriċi u elettroniċi li jkun fihom iċ-ċomb f’ċeramika li tissodisfa kwalunkwe waħda mill-funzjonijiet li ġejjin:

(1)

għall-użu f’ċeramika tat-titanat taż-żirkonju taċ-ċomb pjeżoelettriku (PZT, Piezoelectric Lead Zirconium Titanate);

(2)

sabiex iċ-ċeramika tiġi pprovduta koeffiċjent tat-temperatura pożittiv (PTC, Positive Temperature Coefficient).

Tapplika għall-kategoriji kollha (ħlief l-applikazzjonijiet koperti mill-punti 7(c)-II, 7(c)-III u 7(c)-IV ta’ dan l-Anness kif ukoll il-punt 14 tal-Anness IV) u tiskadi fil-31 ta’ Diċembru 2027.”


ELI: http://data.europa.eu/eli/dir_del/2025/2363/oj

ISSN 1977-074X (electronic edition)