(1)

An 9 Deireadh Fómhair 2025 rinneadh iarraidh ar chlárú tionscnaimh Eorpaigh ó na saoránaigh dar teideal ‘Ná bíodh caighdeáin dhúbailte ann a thuilleadh maidir le cearta an duine’ a chur faoi bhráid an Choimisiúin.

(2)

Is é is aidhm don tionscnamh, mar a chuir na heagraithe in iúl é, a iarraidh ar an gCoimisiún ‘rialachán a mholadh lena mbunófar maoirseacht chaighdeánaithe ar chearta an duine ar fud a réimsí inniúlachta ina ghníomhaíocht sheachtrach le tríú tíortha’. De réir na n-eagraithe, ‘ba cheart a chinntiú leis an rialachán go ndéanfaidh an Coimisiún monatóireacht, meastóireacht agus freagairt ar sháruithe ar chearta an duine ar bhealach trédhearcach comhsheasmhach éifeachtach comhréireach tráthúil’. Molann na heagraithe creat dlíthiúil a chuirfidh ar chumas an Aontais a chur chuige maidir le cearta an duine a fheabhsú agus a chreidiúnacht ar fud an domhain a threisiú tríd an dlí idirnáisiúnta um chearta an duine a chosaint ar bhealach níos fearr. Iarscríbhinn a ghabhann leis an tionscnamh agus doiciméad breise arna thíolacadh ag na heagraithe mar chuid dá n-iarratas ar chlárú, tugann siad tuilleadh sonraí maidir le cúlra, ábhar agus cuspóirí an tionscnaimh.

(3)

Measann an Coimisiún go bhféadfadh sé togra a ghlacadh le haghaidh gníomh dlí lena mbunófaí creat cothrománach lena gcuirfí le cur chun feidhme na coinníollachta maidir le cearta an duine i gcomhaontuithe trádála, sa bheartas maidir le comhar um fhorbairt agus sa bheartas maidir le comhar eacnamaíoch, airgeadais agus teicniúil ar bhonn Airteagal 207, Airteagal 209 agus Airteagal 212 den Chonradh ar Fheidhmiú an Aontais Eorpaigh.

(4)

Ar an gcúis sin, measann an Coimisiún nach bhfuil aon chuid den tionscnamh ann ar follas nach dtagann sí faoi chreat chumhachtaí an Choimisiúin togra a thíolacadh le haghaidh gníomh dlí de chuid an Aontais chun na Conarthaí a chur chun feidhme.

(5)

Is conclúid é sin nach ndéanann difear don mheasúnú ar cé acu a chomhlíonfaí nó nach gcomhlíonfaí, sa chás seo, na coinníollacha coincréiteacha substainteacha ba ghá chun go ngníomhódh an Coimisiún, coinníollacha lena n-áirítear comhlíonadh phrionsabail na comhréireachta agus na coimhdeachta, sin agus comhoiriúnacht do chearta bunúsacha.

(6)

Tá fianaise iomchuí curtha ar fáil ag an ngrúpa d’eagraithe go gcomhlíontar na ceanglais a leagtar síos in Airteagal 5(1) agus (2) de Rialachán (AE) 2019/788, agus go bhfuil na daoine teagmhála ainmnithe aige i gcomhréir le hAirteagal 5(3), an chéad fhomhír, den Rialachán sin.

(7)

Ní tionscnamh é ar follas é a bheith míchuí, suaibhreosach ná cráiteach, ná ní follas go bhfuil sé contrártha do luachanna an Aontais mar a leagtar amach in Airteagal 2 den Chonradh ar an Aontas Eorpach iad ná do na cearta a chumhdaítear i gCairt um Chearta Bunúsacha an Aontais Eorpaigh.

(8)

Dá bhrí sin, ba cheart an tionscnamh dar teideal ‘Ná bíodh caighdeáin dhúbailte ann a thuilleadh maidir le cearta an duine’ a chlárú.

(9)

An chonclúid go gcomhlíontar na coinníollacha maidir le clárú faoi Airteagal 6(3) de Rialachán (AE) 2019/788, ní thugann sí le tuiscint go ndearbhaíonn an Coimisiún ar bhealach ar bith go bhfuil inneachar an tionscnaimh cruinn fíorasach, agus is iad an grúpa d’eagraithe atá i mbun an tionscnaimh, agus iadsan amháin, atá freagrach as an méid sin. Ní chuireann inneachar an tionscnaimh in iúl ach tuairimí an ghrúpa d’eagraithe, agus ní féidir a dhéanamh amach ar aon bhealach gurb iad tuairimí an Choimisiúin a léiríonn sé,