17.8.2021   

GA

Iris Oifigiúil an Aontais Eorpaigh

L 294/8

RIALACHÁN CUR CHUN FEIDHME (AE) 2021/1369 ÓN gCOIMISIÚN

an 6 Lúnasa 2021

maidir le haicmiú earraí áirithe san Ainmníocht Chomhcheangailte

TÁ AN COIMISIÚN EORPACH,

Ag féachaint don Chonradh ar Fheidhmiú an Aontais Eorpaigh,

Ag féachaint do Rialachán (AE) Uimh. 952/2013 ó Pharlaimint na hEorpa agus ón gComhairle an 9 Deireadh Fómhair 2013 lena leagtar síos Cód Custaim an Aontais (1), agus go háirithe Airteagal 57(4) agus Airteagal 58(2) de,

De bharr an mhéid seo a leanas:

(1)

Chun a áirithiú go gcuirtear an Ainmníocht Chomhcheangailte atá i gceangal le Rialachán (CEE) Uimh. 2658/87 ón gComhairle (2) i bhfeidhm go haonfhoirmeach, is gá bearta a ghlacadh maidir le haicmiú na n-earraí dá dtagraítear san Iarscríbhinn a ghabhann leis an Rialachán seo.

(2)

Le Rialachán (CEE) Uimh. 2658/87, leagadh síos na rialacha ginearálta maidir le léirmhíniú na hAinmníochta Comhcheangailte. Tá feidhm ag na rialacha sin freisin maidir le haon ainmníocht eile atá bunaithe go hiomlán uirthi nó a bhfuil cuid di bunaithe uirthi nó a chuireann aon fhoroinn bhreise léi agus a bhunaítear le forálacha sonracha de chuid an Aontais, d’fhonn bearta taraife agus bearta eile i ndáil le trádáil in earraí a chur i bhfeidhm.

(3)

De bhun na rialacha ginearálta sin, na hearraí a bhfuil tuairisc orthu i gcolún (1) den tábla a leagtar amach san Iarscríbhinn, is earraí iad ba cheart a aicmiú faoin gcód AC a luaitear i gcolún (2), de bhua na gcúiseanna a leagtar amach i gcolún (3) den tábla sin.

(4)

Maidir le faisnéis taraife cheangailteach arna heisiúint i leith na n-earraí a bhaineann leis an Rialachán seo, ar faisnéis í nach bhfuil i gcomhréir leis an Rialachán seo, is iomchuí a fhoráil go bhféadfaidh an sealbhóir, ar feadh tréimhse áirithe, leanúint air ag agairt na faisnéise sin i gcomhréir le hAirteagal 34(9) de Rialachán (AE) Uimh. 952/2013. Is tréimhse 3 mhí ba cheart a bheith sa tréimhse sin.

(5)

Na bearta dá bhforáiltear sa Rialachán seo, is bearta iad atá i gcomhréir le tuairim an Choiste um an gCód Custaim,

TAR ÉIS AN RIALACHÁN SEO A GHLACADH:

Airteagal 1

Na hearraí a bhfuil tuairisc orthu i gcolún (1) den tábla a leagtar amach san Iarscríbhinn, aicmeofar iad faoi chuimsiú na hAinmníochta Comhcheangailte faoin gcód AC a luaitear i gcolún (2) den tábla sin.

Airteagal 2

Faisnéis taraife cheangailteach nach bhfuil i gcomhréir leis an Rialachán seo, féadfar í a agairt fós i gcomhréir le hAirteagal 34(9) de Rialachán (AE) Uimh. 952/2013 go ceann tréimhse 3 mhí ó dháta theacht i bhfeidhm an Rialacháin seo.

Airteagal 3

Tiocfaidh an Rialachán seo i bhfeidhm an fichiú lá tar éis lá a fhoilsithe in Iris Oifigiúil an Aontais Eorpaigh.

Beidh an Rialachán seo ina cheangal go huile agus go hiomlán agus beidh sé infheidhme go díreach i ngach Ballstát.

Arna dhéanamh sa Bhruiséil, 6 Lúnasa 2021.

Thar ceann an Choimisiúin

Gerassimos THOMAS

An tArd-Stiúrthóir

Ard-Stiúrthóireacht an Chánachais agus an Aontais Custaim

(1)   IO L 269, 10.10.2013, lch. 1.

(2)  Rialachán (CEE) Uimh. 2658/87 ón gComhairle an 23 Iúil 1987 maidir leis an ainmníocht taraife agus staidrimh agus leis an gComhtharaif Chustaim (IO L 256, 7.9.1987, lch. 1).

IARSCRÍBHINN

Tuairisc ar na hearraí

Aicmiú (Cód AC)

Cúiseanna

(1)

(2)

(3)

Téip atá déanta d’fhabraic teicstíle leaistí, í tuairim is 5 cm ar leithead, í clúdaithe ar thaobh amháin le hábhar greamaitheach atá déanta de rubar sintéiseach, agus meáchan nach mó ná 1 500 g/m2 inti.

Téip is ea í atá rollta mórthimpeall ar fheadán taca agus cuirtear ar fáil í i mboscaí cairtchláir ina gcuimsítear 16 rolla nó 24 rolla, agus trastomhas tuairim is 7,5 cm i ngach ceann. Ní hann d’aon tásc ar an bpacáistiú gur chun críoch míochaine iad na téipeanna.

Cuirtear i láthair í mar théip arb é úsáid atá beartaithe di na hailt a chosaint le linn gníomhaíochtaí spóirt.

Féach na híomhánna  (*1)

5906 10 00

Is le rialacha ginearálta 1 agus 6 maidir le léirmhíniú na hAinmníochta Comhcheangailte, le nóta 4(a) a ghabhann le Caibidil 59 agus le foclaíocht chóid AC 5906 agus 5906 10 00 a chinntear an t-aicmiú.

Níl an t-earra tuilithe ná brataithe le substaintí cógaisíochta. Ina theannta sin, níl aon saintréith oibiachtúil aige a thabharfadh le tuiscint gur saindearadh é chun críoch míochaine, máinliachta, déidliachta nó tréidliachta. Ina theannta sin, ní hann d’aon tásc ar an bpacáistiú gur le haghaidh úsáid mhíochaine é. Dá bhrí sin, eisiatar an t-earra ó aicmiú faoi cheannteideal 3005 (féach freisin Nótaí Míniúcháin an Chórais Chomhchuibhithe a ghabhann le ceannteideal 3005 , an tríú mír). Dá thoradh sin, is de réir an ábhair as a bhfuil sé déanta atá sé le haicmiú.

Dá bhrí sin, is faoi chód AC 5906 10 00 , mar théip ghreamaitheach nach bhfuil níos mó ná 20 cm ar leithead, atá an t-earra le haicmiú.

Image 1

(*1)  Is le faisnéis a thabhairt, agus lena aghaidh sin amháin, atá na híomhánna ann.