(1)

Skond id-Deċiżjoni tal-Kummissjoni 2006/133/KE tat-13 ta’ Frar 2006 li teħtieġ li l-Istati Membri temporanjament jieħdu miżuri addizzjonali kontra t-tixrid tal-Bursaphelenchus xylophilus (Steiner et Buhrer) Nickle et al. (in-nematodu tal-injam tal-arżnu - PWN) f’dak li jikkonċerna żoni fil-Portugall, għajr dawk li fihom huwa magħruf li ma jeżistix (2), il-Portugall qed jimplimenta pjan ta’ qerda kontra t-tixrid tan-nematodu tal-injam tal-arżnu.

(2)

Id-Deċiżjoni 2006/133/KE kienet emendata l-aħħar mid-Deċiżjoni tal-Kummissjoni 2008/684/KE (3), sabiex tikkonferma l-miżuri temporanji stabbiliti mid-Deċiżjoni tal-Kummissjoni 2008/489/KE (4). Dawn il-miżuri jassiguraw il-ġarr ta’ materjal suxxettibbli barra miż-żona demarkata.

(3)

Waqt il-laqgħa tal-Kumitat Permanenti dwar is-Saħħa tal-Pjanti nhar it-3 ta’ Lulju 2008, il-Portugall informa lill-Kummissjoni li kien eżamina 2 145 sit fil-Portugall, li ttieħdu kampjuni kif xieraq u li totalment kien hemm 50 sejba ta’ PWN, mifruxa f’diversi siti madwar it-territorju tiegħu, bħala riżultat tal-kampanja straordinarja ta’ monitoraġġ li kienet organizzata fl-ewwel semestru tal-2008.

(4)

Fid-dawl ta’ dawn is-sejbiet ġodda, huwa neċessarju li tiġi rinfurzata il-protezzjoni taż-żona buffer madwar iż-żona infestata taż-żona demarkata bl-applikazzjoni tal-istess rekwiżiti għall-ġarr ta’ materjal suxxettibbli miż-żona infestata għaż-żona buffer kif diġà applikabbli għall-ġarr miż-żona demarkata għal żoni oħra.

(5)

Sabiex jitkabbar l-effett tar-riżorsi disponibbli għall-ittestjar, il-bżonnijiet għall-ittestjar ta’ pjanti suxxettibbli li huma identifikati bħala infestati mill-PWN, jew li qed juru xi sintomi ta’ nuqqas ta’ saħħa jew li jinsabu f’żoni ta’ salvataġġ għandhom ikunu limitati għaż-żona buffer biss.

(6)

F’kaz illi il-PWN jinsab ripettitivamant fl-istess parti tal-Portugall qrib il-fruntiera Spanjola, iż-żona demarkata għandha tiġi estiża fi Spanja u Spanja għandha timplimenta l-istess rekwiżiti għall-ġarr t’injam suxxettibbli, qxur tas-siġar u pjanti minn u lejn iż-żona demarkata fit-territorju tagħha u twettaq stħarriġ addizzjonali f’dik iż-żona.

(7)

F’dak li jirrigwardja materjal għall-ippakkjar tal-injam li huwa suxxettibbli u oġġetti simili, ir-rekwiżiti ta’ ġarr għandhom ikunu limitati għal materjal ġdid ta’ oriġini Portugiża għaliex ir-risku fitosanitarju ta’ materjal tal-ippakkjar antik huwa żgħir.

(8)

Id-Deċiżjoni 2006/133/KE għandha għalhekk tiġi emendata skond dan.

(9)

Il-miżuri previsti f’din id-Deċiżjoni huma konformi mal-opinjoni tal-Kumitat Permanenti dwar is-Saħħa tal-Pjanti,

(1)

Fl-Artikolu 2, l-ewwel subparagrafu għandu jiġi mibdul bit-test li ġej:

“Sal-31 ta’ Marzu 2012, il-Portugall, u jekk ikun hemm bżonn, Spanja, għandhom jassiguraw li jintlaħqu l-kundizzjonijiet stabbiliti fl-Anness fir-rigward t’injam, qxur tas-siġar u pjanti suxxettibbli li jinġarru fi ħdan jew minn żoni demarkati definiti skont l-Artikolu 5, lejn żoni oħra, minbarra żoni demarkati oħra fl-Istati Membri jew pajjiżi terzi.”

(2)

Fl-Artikolu 4, l-ewwel subparagrafu tal-paragrafu 2 għandu jiġi mibdul bit-test li ġej:

“Flimkien mal-istħarriġ imsemmi fil-paragrafu 1, il-Portugall, u jekk ikun hemm bżonn, Spanja, għandhom annwalment iħejju pjan ta’ stħarriġ għaż-żoni demarkati u jressquh lill-Kummissjoni għall-approvazzjoni. Il-pjan għandu jkun imsejjes fuq valutazzjoni tar-riskji u jqis it-tqassim ta’ pjanti suxxettibbli fi ħdan it-territorju tagħhom.”

(3)

Fl-Artikolu 5, għandu jiddaħħal il-paragrafu li ġej wara l-ewwel paragrafu:

“F’każ illi r-riżultati tal-istħarriġ msemmi fl-Artikolu 4 (2) jindikaw il-preżenza ta’ PWN f’inqas minn 20 km mill-fruntiera Spanjola, il-Portugall għandu immedjatament jinforma lil Spanja bil-każ. Jekk il-preżenza tkun ikkonfermata f’inqas minn 3 km mill-fruntiera Spanjola jew jekk preżenza oħra tkun osservata fil-viċinanzi tal-ewwel preżenza f’inqas minn sena, Spanja għandha twaqqaf żona demarkata fit-territorju tagħha bħala estenzjoni taż-żona demarkata Portugiża sabiex tinkludi żona buffer ta’ wisa’ ta’ 20 km madwar is-sit fejn il-preżenza kienet osservata.”

(4)

L-Anness tad-Deċiżjoni 2006/133/KE għandu jkun emendat skond l-Anness ta’ din id-Deċiżjoni.