(1)

Le Rialachán (CE) Uimh. 1831/2003 foráiltear maidir le húdarú breiseán lena n-úsáid i gcothú ainmhithe agus maidir leis na forais agus na nósanna imeachta chun údarú den sórt sin a dheonú. Le hAirteagal 10(2) den Rialachán sin foráiltear maidir le hathmheastóireacht a dhéanamh ar bhreiseáin a údaraíodh de bhun Threoir 70/524/CEE ón gComhairle (2).

(2)

Le Rialachán (CE) Uimh. 1443/2006 ón gCoimisiún (3) údaraíodh ullmhóid de shóidiam seamdúraimicine (Aviax 5 %) ar feadh 10 mbliana mar bhreiseán beathaithe le haghaidh sicíní lena ramhrú.

(3)

I gcomhréir le hAirteagal 10(2) de Rialachán (CE) Uimh. 1831/2003 i gcomhar le hAirteagal 7 de, cuireadh isteach iarratas ar údarú na hullmhóide de shóidiam seamdúraimicine (Aviax 5 %) mar bhreiseán beathaithe le haghaidh sicíní lena ramhrú. D’iarr an t-iarratasóir go n-aicmeofaí an breiseán sin i gcatagóir na mbreiseán ‘coicideastait agus histeamonastait’. Sa chomhthéacs sin, d’iarr an t-iarratasóir freisin modhnú ar choinníollacha áirithe a bhaineann leis an údarú atá ann cheana, is é sin seamdúraimicin i bhfoirm mhíchéiliam a chur in ionad seamdúraimicin i bhfoirm chriostalta i gcomhdhéanamh an bhreiseáin, agus laghdú a dhéanamh ar an tréimhse idir an tráth a stoptar den bhreiseán a thabhairt agus an marú (dá ngairtear ‘an tréimhse aistarraingthe’ anseo feasta). Measfar an modhnú sin a bheith laistigh de chomhthéacs na hathmheastóireachta ar an ullmhóid. Bhí na sonraí agus na doiciméid a cheanglaítear faoi Airteagal 7(3) de Rialachán (CE) Uimh. 1831/2003 ag gabháil leis an iarratas.

(4)

Tháinig an tÚdarás Eorpach um Shábháilteacht Bia (‘an tÚdarás’) ar an gconclúid sna tuairimí uaidh an 14 Meitheamh 2018 (4), an 29 Meitheamh 2022 (5) agus an 14 Samhain 2023 (6) go bhfuil an ullmhóid de shóidiam seamdúraimicine (Aviax 5 %) sábháilte do shicíní lena ramhrú suas leis an uasleibhéal molta (25 mg/kg d’ábhar beatha iomlán), agus don chomhshaol, faoi na coinníollacha úsáide atá beartaithe. Tháinig an tÚdarás ar an gconclúid freisin go bhfuil úsáid sóidiam seamdúraimicine (Aviax 5 %) ar uasleibhéal 25 mg/kg d’ábhar beatha iomlán gan aon tréimhse aistarraingthe sábháilte do thomhaltóirí agus, dá bhrí sin, nach gá uasteorainneacha iarmhar a shocrú le haghaidh sóidiam seamdúraimicine in earraí bia a dhíorthaítear ó shicíní a bheathaítear leis an ullmhóid. Ní raibh an tÚdarás in ann conclúid a tharraingt maidir le greannachas na hullmhóide sóidiam seamdúraimicine (Aviax 5 %) don chraiceann agus don tsúil ná maidir leis an íogrú deirmeach agus riospráide a d’fhéadfadh an ullmhóid a dhéanamh. I ndáil leis an méid sin, thuairiscigh an tÚdarás go raibh riosca tromchúiseach curtha in iúl sna ríomhanna samhaltaithe ar an nochtadh ionanálaithe i gcás daoine a láimhseálann an breiseán. Tháinig an tÚdarás ar an gconclúid thairis sin go bhféadfadh an ullmhóid de shóidiam seamdúraimicine (Aviax 5 %) coiciodóis i sicíní lena ramhrú a rialú go héifeachtach. Mheas sé go bhfuil gá le ceanglais shonracha maidir le faireachán iarmhargaidh agus mhol sé go ndéanfaí faireachán allamuigh ar fhrithsheasmhacht Eimeria spp. in aghaidh sóidiam seamdúraimicine i sicíní lena ramhrú, le linn na coda deireanaí den tréimhse údaraithe más féidir. D’fhíoraigh sé freisin an tuarascáil maidir leis na modhanna a úsáidtear chun anailís a dhéanamh ar an mbreiseán beathaithe in ábhar beatha agus i bhfíocháin arna cur isteach ag an tSaotharlann Tagartha a bunaíodh le Rialachán (CE) Uimh. 1831/2003.

(5)

I bhfianaise an mhéid thuas, measann an Coimisiún go gcomhlíonann an ullmhóid de sóidiam seamdúraimicine (Aviax 5 %) na coinníollacha maidir le húdarú dá bhforáiltear in Airteagal 5 de Rialachán (CE) Uimh. 1831/2003. Dá réir sin, ba cheart úsáid na hullmhóide sin a údarú le haghaidh sicíní lena ramhrú. Is iomchuí foráil a dhéanamh maidir le faireachán iarmhargaidh ar fhrithsheasmhacht Eimeria spp in aghaidh sóidiam seamdúraimicine. Ina theannta sin, measann an Coimisiún gur cheart bearta cosanta iomchuí a dhéanamh chun éifeachtaí díobhálacha ar shláinte úsáideoirí an bhreiseáin a chosc.

(6)

Ós rud é nach gá na modhnuithe ar choinníollacha údaraithe na hullmhóide lena mbaineann a chur i bhfeidhm láithreach ar chúiseanna sábháilteachta, is iomchuí foráil a dhéanamh maidir le hidirthréimhse do na páirtithe leasmhara chun iad féin a ullmhú chun na ceanglais nua a eascraíonn as an údarú a chomhlíonadh.

(7)

Mar thoradh ar an ullmhóid de shóidiam seamdúraimicine (Aviax 5 %) a údarú le haghaidh sicíní lena ramhrú, ba cheart Rialachán (CE) Uimh. 1443/2006 a aisghairm.

(8)

Tá na bearta dá bhforáiltear sa Rialachán seo i gcomhréir leis an tuairim ón mBuanchoiste um Plandaí, Ainmhithe, Bia agus Beatha,