(1)

Skont l-Artikolu 73(2) tal-Miżuri ta’ Implimentazzjoni tal-Istatut tal-Membri tal-Parlament Ewropew (2) (“il-Miżuri ta’ Implimentazzjoni”), l-ammont massimu tal-ispejjeż għall-assistenza parlamentari li jistgħu jitħallsu fir-rigward tal-persunal personali msemmi fl-Artikolu 29(4) tagħhom għandu, fejn xieraq, jiġi indiċizzat kull sena mill-Bureau abbażi tal-Indiċi Konġunt stabbilit mill-Eurostat biex titkejjel il-bidla fl-għoli tal-ħajja għall-uffiċjali tal-UE skont l-Artikolu 65 tar-Regolamenti tal-Persunal għall-Uffiċjali tal-Unjoni Ewropea u l-Kundizzjonijiet tal-Impjieg ta’ Aġenti Oħra tal-Unjoni Ewropea, u f’konformità mal-Anness XI tagħhom, stabbiliti fir-Regolament tal-Kunsill (KEE, Euratom, KEFA) Nru 259/68 (3) (“ir-Regolamenti tal-Persunal”).

(2)

Dak l-indiċjar normalment jiġi deċiż mill-Bureau f’Diċembru, u jieħu effett b’mod retroattiv minn Lulju tas-sena inkwistjoni. Madankollu, minħabba l-fatt li l-Indiċi Konġunt stabbilit mill-Eurostat għall-perjodu mill-1 ta’ Lulju 2023 sal-1 ta’ Jannar 2024 ġie stabbilit għal 103,0 (+3,0 %), u b’hekk ekwivalenti għal-limitu speċifiku ta’ 3 % stabbilit mir-Regolamenti tal-Persunal biex jiġi skattat aġġornament intermedju fir-remunerazzjoni, kien meħtieġ aġġornament intermedju tal-ispejjeż tal-assistenza parlamentari.

(3)

Għalhekk, fil-laqgħa tiegħu tal-24 ta’ Ġunju 2024, il-Bureau ddeċieda li, fid-dawl tar-rata ta’ aġġustament ta’ 3,0 % stabbilita mill-Kummissjoni għall-ewwel nofs tal-2024, iżid l-ammont massimu li jista’ jitħallas fix-xahar fir-rigward tal-ispejjeż tal-assistenza parlamentari għal EUR 29 557, b’effett mill-1 ta’ Jannar 2024.

(4)

Għat-tieni nofs tal-2024, il-Kummissjoni stabbiliet ir-rata ta’ aġġustament applikabbli għal 4,1 %. L-ammont massimu ta’ kull xahar li jista’ jitħallas fir-rigward tal-ispejjeż għall-assistenza parlamentari għandu għalhekk jiżdied għal EUR 30 769 b’effett mill-1 ta’ Lulju 2024 u l-Miżuri ta’ Implimentazzjoni jenħtieġ li jiġu emendati kif xieraq.