(1)

De bhun Airteagal 73(2) de Bhearta Cur Chun Feidhme le haghaidh Reacht Fheisirí Pharlaimint na hEorpa (2) (‘na Bearta Cur Chun Feidhme’), beidh uasmhéid na gcostas cúnaimh pharlaimintigh is iníoctha i leith na foirne pearsanta dá dtagraítear in Airteagal 29(4) díobh, i gcás inarb iomchuí, le hinnéacsnascadh go bliantúil ag an mBiúró ar bhonn an Innéacs Chomhpháirtigh arna bhunú ag Eurostat chun an t-athrú ar an gcostas maireachtála d’oifigigh AE a thomhas de bhun Airteagal 65 de Rialacháin Foirne Oifigigh an Aontais Eorpaigh agus Coinníollacha Fostaíochta Sheirbhísigh Eile an Aontais Eorpaigh, agus i gcomhréir le hIarscríbhinn XI a ghabhann leo, a leagtar síos i Rialachán (CEE, Euratom, CEGC) Uimh. 259/68 (3) ón gComhairle (‘Rialacháin Foirne’).

(2)

Is gnách gurb é an Biúró a chinneann an t-innéacsnascadh sin i mí na Nollag, agus go dtagann sé i bhfeidhm go haisghníomhach amhail ó mhí Iúil na bliana i dtrácht. Mar sin féin, ós rud é gur socraíodh an tInnéacs Comhpháirteach arna bhunú ag Eurostat don tréimhse ón 1 Iúil 2023 go dtí an 1 Eanáir 2024 ag 103,0 (+ 3,0 %), agus dá bhrí sin go raibh sé cothrom leis an tairseach de 3 % arna bunú leis na Rialacháin Foirne chun nuashonrú idirmheánach a spreagadh sa luach saothair, bhí gá le nuashonrú idirmheánach ar speansais cúnaimh pharlaimintigh.

(3)

Dá réir sin, ag an gcruinniú a bhí aige an 24 Meitheamh 2024, chinn an Biúró, i bhfianaise an ráta coigeartaithe 3,0 % arna shocrú ag an gCoimisiún don chéad leath de 2024, an t-uasmhéid míosúil iníoctha i leith speansais cúnaimh pharlaimintigh a mhéadú go EUR 29 557, le héifeacht ón 1 Eanáir 2024.

(4)

Don dara leath de 2024, tá an ráta coigeartaithe is infheidhme socraithe ag an gCoimisiún ag 4,1 %. Ba cheart, dá bhrí sin, an t-uasmhéid míosúil is iníoctha i leith speansais um chúnamh parlaiminteach a mhéadú go EUR 30 769 le héifeacht ón 1 Iúil 2024 agus ba cheart na Bearta Cur Chun Feidhme a leasú dá réir.