(1)

Le Rialachán (CE) Uimh. 1831/2003 foráiltear maidir le húdarú breiseán lena n-úsáid i gcothú ainmhithe agus maidir leis na forais agus na nósanna imeachta chun údarú den sórt sin a dheonú.

(2)

I gcomhréir le hAirteagal 7 de Rialachán (CE) Uimh. 1831/2003, cuireadh isteach iarratas maidir le húdarú crágaigh tirisín fheirigh. Bhí na sonraí agus na doiciméid a cheanglaítear faoi Airteagal 7(3) de Rialachán (CE) Uimh. 1831/2003 ag gabháil leis an iarratas sin.

(3)

Baineann an t-iarratas le húdarú crágaigh tirisín fheirigh mar bhreiseán beathaithe le haghaidh sicíní lena ramhrú, sicíní a thógtar le bheith ina mbéaróga, mionspeicis éanlaithe clóis lena ramhrú, mionspeicis éanlaithe clóis go dtí an pointe breithe, turcaithe lena ramhrú agus lena dtógáil go dtí an pointe breithe, agus iarrtar ann go n-aicmeofaí an breiseán sin sa chatagóir ‘breiseáin zóiteicniúla’ agus sna feidhmghrúpaí ‘cobhsaitheoirí fhlóra na stéige’ agus ‘breiseáin zóiteicniúla eile’.

(4)

Tháinig an tÚdarás Eorpach um Shábháilteacht Bia (‘an tÚdarás’) ar an gconclúid sa tuairim uaidh an 23 Eanáir 2019 (2) agus an 14 Márta 2024 (3) go bhfuil crágach tirisín fheirigh sábháilte don spriocspeiceas, do na tomhaltóirí agus don chomhshaol faoi na coinníollacha úsáide atá beartaithe. Chinn sé freisin go bhfuil riosca d’úsáideoirí ag baint leis an mbreiseán a ionanálú, agus gur cheart é a mheas mar ghreannaitheoir don chraiceann, do na súile agus do sheicní múcasacha. Ós rud é go bhfuil nicil ann, ba cheart crágach tirisín fheirigh a mheas freisin mar íogróir deirmeach agus riospráide. Ina theannta sin, tháinig an tÚdarás ar an gconclúid, faoi na coinníollacha úsáide atá beartaithe, go bhféadfadh crágach tirisín fheirigh feabhas a chur ar pharaiméadair zóiteicniúla éan agus ualach caochach Campylobacter spp. a laghdú le 1 aonad log10 ar a laghad sa spriocspeiceas, rud a d’fhéadfadh tionchar a imirt ar an riosca a bhaineann le campalabaictéaróis dhaonna a laghdú. Mhol an tÚdarás sonraíocht maidir le huaschion litiam a áireamh in údarú féideartha an bhreiseáin, cé nár mheas sé go bhfuil gá le ceanglais shonracha maidir le faireachán iarmhargaidh. D’fhíoraigh an tÚdarás freisin an tuarascáil ar na modhanna anailíse ar an mbreiseán beathaithe i mbeatha agus in uisce arna cur isteach ag an tSaotharlann Tagartha a bunaíodh le Rialachán (CE) Uimh. 1831/2003.

(5)

An 24 Iúil 2024 chuir an t-iarratasóir in iúl don Choimisiún go bhfuil an t-uaschion nicile sa bhreiseán socraithe anois ag 20 mg de nicil/kg de bhreiseán beathaithe in ionad 50 mg/kg, agus go bhfuil an t-uaschion litiam sa bhreiseán socraithe anois ag 50 mg de litiam/kg de bhreiseán beathaithe in ionad 1 200 mg/kg. Ina theannta sin, an 10 Iúil 2024, tharraing an t-iarratasóir siar an t-iarratas a mhéid a bhaineann le húdarú crágaigh tirisín fheirigh san fheidhmghrúpa ‘cobhsaitheoirí fhlóra na stéige’.

(6)

I bhfianaise an mhéid thuas, measann an Coimisiún go gcomhlíonann crágach tirisín fheirigh na coinníollacha dá bhforáiltear in Airteagal 5 de Rialachán (CE) Uimh. 1831/2003. Dá réir sin, ba cheart úsáid crágaigh tirisín fheirigh a údarú. Ina theannta sin, measann an Coimisiún gur cheart bearta cosanta iomchuí a dhéanamh chun éifeachtaí díobhálacha ar shláinte úsáideoirí an bhreiseáin a chosc.

(7)

Tá na bearta dá bhforáiltear sa Rialachán seo i gcomhréir leis an tuairim ón mBuanchoiste um Plandaí, Ainmhithe, Bia agus Beatha,