I.

Il-fatti li wasslu għall-kawża

1

Ir-rikorrenti, Marine Harvest ASA, hija kumpannija stabbilita skont id-dritt Norveġiż elenkata fil-Borża ta’ Oslo (in-Norveġja) u fil-Borża ta’ New York (l-Istati Uniti), li tipprattika t-trobbija u t-trasformazzjoni primarja tas-salamun fil-Kanada, fiċ-Chili, fl-Iskozja, fil-gżejjer Faeroe, fl-Irlanda, u fin-Norveġja kif ukoll it-trobbija u t-trasformazzjoni primarja tal-ħalibatt abjad fin-Norveġja. Ir-rikorrenti twettaq ukoll attivitajiet ta’ trasformazzjoni sekondarja fil-Belġju, fiċ-Chili, fl-Istati Uniti, fi Franza, fl-Irlanda, fil-Ġappun, fin-Norveġja, fil-Pajjiżi l-Baxxi, fil-Polonja, u fir-Repubblika Ċeka.

A.

Akkwist mir-rikorrenti ta’ Morpol

2

Fl-14 ta’ Diċembru 2012, ir-rikorrenti kkonkludiet kuntratt ta’ akkwist ta’ azzjonijiet (“Share Purchase Agreement”, iktar ’il quddiem “SPA”) ma’ Friendmall Ltd. u Bazmonta Holding Ltd. li kien jirrigwarda t-trasferiment tal-azzjonijiet li dawn il-kumpanniji kellhom fil-kapital ta’ Morpol ASA.

3

Morpol hija produttriċi u trasformatriċi Norveġiża tas-salamun. Hija tipproduċi salamun għat-trobbija u toffri gamma wiesa’ ta’ prodotti b’valur miżjud derivati mis-salamun. Hija tipprattika t-trobbija u t-trasformazzjoni primarja tas-salamun fl-Iskozja u fin-Norveġja. Hija twettaq ukoll attivitajiet ta’ trasformazzjoni sekondarja fil-Polonja, fir-Renju Unit u fil-Vjetnam. Qabel ma ġiet akkwistata mir-rikorrenti, Morpol kienet elenkata fil-Borża ta’ Oslo.

4

Friendmall u Bazmonta Holding kienu kumpanniji privati b’responsabbiltà limitata kkostitwiti u rreġistrati f’Ċipru. Iż-żewġ kumpanniji kienu kkontrollati minn persuna waħda, M., fundatur u ex president-direttur ġenerali ta’ Morpol.

5

Permezz ta’ SPA, ir-rikorrenti akkwistat sehem f’Morpol li jammonta għal madwar 48.5 % mill-kapital azzjonist ta’ Morpol. Dan l-akkwist (iktar ’il quddiem l-“akkwist ta’ Diċembru 2012”) ġie konkluż fit-18 ta’ Diċembru 2012.

6

Fis-17 ta’ Diċembru 2012, ir-rikorrenti nediet, permezz ta’ komunikazzjoni tal-Borża, li hija kienet sejra tvara offerta pubblika ta’ xiri tal-azzjonijiet rimanenti ta’ Morpol. Fil-15 ta’ Jannar 2013, ir-rikorrenti ppreżentat, skont il-liġi Norveġiża dwar in-negozju tat-titoli, tali offerta pubblika obbligatorja ta’ xiri azzjonijiet rimanenti ta’ Morpol, rappreżentanti 51.5 % tal-azzjonijiet tal-kumpannija. Skont id-dispożizzjonijiet tal-liġi Norveġiża, l-akkwirent ta’ iktar minn terz tal-azzjonijiet ta’ kumpannija kkwotata fil-Borża huwa obbligat li jippreżenta offerta obbligatorja għall-azzjonijiet rimanenti ta’ din il-kumpannija.

7

Fit-23 ta’ Jannar 2013, il-bord tad-diretturi ta’ Morpol ħatar president-direttur ġenerali ġdid li jissostitwixxi lil M., peress li dan tal-aħħar fil-frattemp tneħħa mill-kariga b’effett mill-1 ta’ Marzu 2013, sabiex jiġi ssodisfatt obbligu għal dan l-iskop li kien ġie inkluż fi SPA.

8

Wara l-ħlas u l-eżekuzzjoni tal-offerta pubblika ta’ xiri fit-12 ta’ Marzu 2013, ir-rikorrenti kellu total ta’ 87.1 % mill-azzjonijiet ta’ Morpol. Konsegwentement, permezz tal-offerta pubblika ta’ xiri, ir-rikorrenti akkwistat azzjonijiet rappreżentanti madwar 38.6 % tal-kapital ta’ Morpol, minbarra l-azzjonijiet rappreżentanti 48.5 % tal-kapital ta’ Morpol, li hija kienet diġà akkwistat bl-akkwist ta’ Diċembru 2012.

9

L-akkwist tal-azzjonijiet rimanenti ta’ Morpol seħħ fit-12 ta’ Novembru 2013. Fil-15 ta’ Novembru 2013, waqt laqgħa ġenerali straordinarja ġie deċiż li ssir talba sabiex l-azzjonijiet ma jibqgħux ikkwotati fil-Borża ta’ Oslo, li jitnaqqas in-numru ta’ membri tal-bord tad-diretturi, u li jitħassar il-kumitat tal-ħatra. Fit-28 ta’ Novembru 2013, Morpol ma baqgħetx ikkwotata fil-Borża ta’ Oslo.

B.

Stadju ta’ qabel in-notifika

10

Fil-21 ta’ Diċembru 2012, ir-rikorrenti bagħtet lill-Kummissjoni Ewropea talba għall-ħatra ta’ grupp inkarigat sabiex jipproċessa l-fajl tagħha dwar l-akkwist tal-kontroll esklużiv ta’ Morpol. F’din it-talba, ir-rikorrenti informat lill-Kummissjoni li l-akkwist ta’ Diċembru 2012 kien ġie konkluż u li hija ma kinitx sejra teżerċita d-drittijiet tal-vot tagħha qabel l-adozzjoni tad-deċiżjoni tal-Kummissjoni.

11

Il-Kummissjoni talbet li tiġi organizzata telekonferenza mar-rikorrenti, li saret fil-25 ta’ Jannar 2013. Matul it-telekonferenza, il-Kummissjoni talbet informazzjoni dwar l-istruttura tat-tranżazzjoni u kjarifiki fuq il-kwistjoni dwar jekk l-akkwist ta’ Diċembru 2012 setgħax kien jagħti diġà lir-rikorrenti l-kontroll ta’ Morpol.

12

Fit-12 ta’ Frar 2013, il-Kummissjoni bagħtet lir-rikorrenti talba għal informazzjoni dwar l-akkwist possibbli ta’ kontroll effettiv ta’ Morpol wara l-akkwist ta’ Diċembru 2012. Hija talbet ukoll li hija tiġi pprovduta bl-aġenda u bil-minuti tal-laqgħat ġenerali ta’ Morpol u tal-laqgħat tal-bord tad-diretturi ta’ Morpol tal-aħħar tliet snin. Ir-rikorrenti wieġbet parzjalment għal din it-talba fid-19 ta’ Frar 2013 u pproduċiet risposta sħiħa għal din tal-aħħar fil-25 ta’ Frar 2013.

13

Fil-5 ta’ Marzu 2013, ir-rikorrenti ppreżentat l-ewwel abbozz tal-formularju ta’ notifika, kif jinsab fl-Anness I tar-Regolament tal-Kummissjoni (KE) Nru 802/2004, tal-21 ta’ April 2004, li jimplementa r-Regolament tal-Kunsill (KE) Nru 139/2004 dwar il-kontroll tal-konċentrazzjonijiet bejn l-impriżi (ĠU Edizzjoni Speċjali bil-Malti, Kapitolu 8, Vol. 3, p. 88) (iktar ’il quddiem l-“ewwel abbozz tal-formularju CO”). L-ewwel abbozz tal-formularju CO kien jirrigwarda essenzjalment is-suq globali li jinkludi fih it-trobbija kif ukoll it-trasformazzjoni primarja u t-trasformazzjoni sekondarja tas-salamun ta’ kull oriġini.

14

Fl-14 ta’ Marzu 2013, il-Kummissjoni bagħtet lir-rikorrenti talba għal informazzjoni addizzjonali dwar l-ewwel abbozz tal-formularju CO. Fis-16 ta’ April 2013, ir-rikorrenti wieġbet għal din it-talba għal informazzjoni. Il-Kummissjoni qieset li din it-tweġiba kienet inkompleta u bagħtet talbiet oħra għal informazzjoni fit-3 ta’ Mejju, fl-14 ta’ Ġunju u fl-10 ta’ Lulju 2013. Ir-rikorrenti wieġbet għal dawn it-talbiet, rispettivament, fis-6 ta’ Ġunju, fit-3 u fis-26 ta’ Lulju 2013.

C.

Notifika u deċiżjoni li tawtorizza l-konċentrazzjoni b’riżerva għall-osservanza ta’ ċerti impenji

15

Fid-9 ta’ Awwissu 2013, it-tranżazzjoni ġiet innotifikata uffiċjalment lill-Kummissjoni.

16

Waqt il-laqgħa ta’ aġġornament tat-3 ta’ Settembru 2013, il-Kummissjoni informat lir-rikorrenti u lil Morpol bil-fatt li hija kellha dubji serji dwar il-kompatibbiltà tat-tranżazzjoni mas-suq intern sa fejn din kienet tikkonċerna suq potenzjali tas-salamun Skoċċiż.

17

Bil-għan li jiġu eliminati d-dubji serji identifikati mill-Kummissjoni, ir-rikorrenti pproponiet, fid-9 ta’ Settembru 2013, obbligi skont l-Artikolu 6(2) tar-Regolament tal-Kunsill (KE) Nru 139/2004, tal-20 ta’ Jannar 2004, dwar il-kontroll ta’ konċentrazzjonijiet bejn impriżi (ĠU Edizzjoni Speċjali bil-Malti, Kapitolu 8, Vol. 3, p. 40). Il-Kummissjoni ssuġġettat dawn l-obbligi inizjali għal konsultazzjoni tas-suq. Wara ċerti emendi, ġiet ippreżentata serje ta’ obbligi finali fil-25 ta’ Settembru 2013. Ir-rikorrenti obbligat ruħha li ċċedi madwar tliet kwarti tal-kapaċità ta’ trobbija tas-salamun Skoċċiż li kienet kondiviża mill-partijiet fil-konċentrazzjoni, biex b’hekk tmewwet id-dubji identifikati mill-Kummissjoni.

18

Fit-30 ta’ Settembru 2013, il-Kummissjoni adottat id-Deċiżjoni C(2013) 6449 (Każ COMP/M.6850 – Marine Harvest/Morpol) (iktar ’il quddiem id-“deċiżjoni ta’ awtorizzazzjoni”), skont l-Artikolu 6(1)(b) u (2) tar-Regolament Nru 139/2004, li tawtorizza l-konċentrazzjoni b’riżerva għall-osservanza sħiħa tal-obbligi proposti.

19

Fid-deċiżjoni ta’ awtorizzazzjoni, il-Kummissjoni kkonstatat li l-akkwist ta’ Diċembru 2012 kien diġà kkonferixxa lir-rikorrenti l-kontroll esklużiv effettiv ta’ Morpol. Hija kkonfermat li ma setgħax jiġi eskluż ksur tal-obbligu ta’ status quo previst fl-Artikolu 7(1) tar-Regolament Nru 139/2004, u tal-obbligu ta’ notifika, previst fl-Artikolu 4(1) tal-imsemmi regolament. Hija rrilevat ukoll li hija setgħet teżamina, fil-kuntest ta’ proċedura separata, jekk jeħtieġx li tiġi applikata sanzjoni skont l-Artikolu 14(2) tar-Regolament Nru 139/2004.

D.

Id-deċiżjoni kkontestata u l-proċedura li wasslet għall-adozzjoni tagħha

20

F’ittra tat-30 ta’ Jannar 2014, il-Kummissjoni informat lir-rikorrenti li kien hemm pendenti investigazzjoni dwar il-ksur possibbli tal-Artikolu 7(1) u tal-Artikolu 4(1) tar-Regolament Nru 139/2004.

21

Fil-31 ta’ Marzu 2014, il-Kummissjoni bagħtet dikjarazzjoni tal-oġġezzjonijiet lir-rikorrenti, skont l-Artikolu 18 tar-Regolament Nru 139/2004 (iktar ’il quddiem id-“dikjarazzjoni tal-oġġezzjonijiet”). Fid-dikjarazzjoni tal-oġġezzjonijiet, il-Kummissjoni waslet għal konklużjoni preliminari li r-rikorrenti kienet kisret b’mod intenzjonat, jew tal-inqas b’negliġenza, l-Artikolu 4(1) u l-Artikolu 7(1) tar-Regolament Nru 139/2004.

22

Fit-30 ta’ April 2014, ir-rikorrenti ppreżentat ir-risposta tagħha għad-dikjarazzjoni tal-oġġezzjonijiet. Fis-6 ta’ Mejju 2014, ir-rikorrenti ppreżentat l-argumenti inklużi fir-risposta tagħha matul seduta. Fis-7 ta’ Lulju 2014, inżammet laqgħa tal-kumitat konsultattiv fil-qasam tal-konċentrazzjonijiet bejn impriżi.

23

Fit-23 ta’ Lulju 2014, il-Kummissjoni adottat id-Deċiżjoni C(2014) 5089 finali li timponi multa għat-twettiq ta’ konċentrazzjoni bi ksur tal-Artikolu 4(1), u tal-Artikolu 7(1) tar-Regolament Nru 139/2004 (Każ COMP/M.7184 – Marine Harvest/Morpol) (iktar ’il quddiem id-“deċiżjoni kkontestata”).

24

L-ewwel tliet artikoli tad-dispożittiv tad-Deċiżjoni 2008/344 huma redatti kif ġej:

25

Fid-deċiżjoni kkontestata, il-Kummissjoni, qabel xejn, qieset li r-rikorrenti kienet akkwistat il-kontroll esklużiv effettiv ta’ Morpol wara l-konklużjoni tal-akkwist ta’ Diċembru 2012, peress li r-rikorrenti kellha l-kważi ċertezza li tikseb maġġoranza fil-laqgħat ġenerali, b’kont meħud tan-numru ta’ azzjonijiet tagħha (48.5 %) u tar-rata ta’ preżenza ta’ azzjonisti oħra fil-laqgħat ġenerali matul is-snin preċedenti.

26

Sussegwentement, il-Kummissjoni qieset li l-akkwist ta’ Diċembru 2012 ma kienx jibbenefika mill-eżenzjoni prevista fl-Artikolu 7(2) tar-Regolament Nru 139/2004. F’dan ir-rigward, hija rrilevat li l-Artikolu 7(2) tar-Regolament Nru 139/2004 kien japplika biss għal offerti pubbliċi ta’ xiri jew ta’ skambju jew għal tranżazzjonijiet li bihom il-kontroll fis-sens tal-Artikolu 3 tar-Regolament Nru 139/2004 kien akkwistat “minn diversi bejjiegħa” permezz ta’ serje ta’ tranżazzjonijiet fuq titoli. Skont il-Kummissjoni, f’dan il-każ, is-sehem ta’ kontroll ġie akkwistat mingħand bejjiegħ wieħed, jiġifieri M., permezz ta’ Friendmall u Bazmonta Holding, bil-forza tal-akkwist ta’ Diċembru 2012.

27

Skont il-Kummissjoni, l-Artikolu 7(2) tar-Regolament Nru 139/2004 ma huwiex maħsub sabiex japplika għal sitwazzjonijiet li fihom l-akkwist ta’ volum kbir ta’ azzjonijiet jitwettaq minn bejjiegħ wieħed u li fihom huwa faċli li jiġi stabbilit, abbażi tal-voti espressi waqt laqgħat ġenerali ordinarji u straordinarji preċedenti, dment li dan il-volum ta’ azzjonijiet ma jikkonferixxix kontroll esklużiv effettiv fuq il-kumpannija fil-mira.

28

Barra minn hekk, il-Kummissjoni rrilevat li l-akkwist ta’ Diċembru 2012, li ġie konkluż fit-18 ta’ Diċembru 2012, ma kienx jifforma parti mill-materjalizzazzjoni tal-offerta pubblika ta’ xiri, li saret bejn il-15 ta’ Jannar u s-26 ta’ Frar 2013. Hija kkunsidrat li l-fatt li l-akkwist ta’ Diċembru 2012 kien kapaċi jiskatta l-obbligu tar-rikorrenti li jvara l-offerta pubblika ta’ xiri għall-azzjonijiet rimanenti ta’ Morpol kien irrilevanti, peress li l-kontroll effettiv kien diġà ġie akkwistat minn bejjiegħ wieħed.

29

Barra minn hekk, il-Kummissjoni qieset li r-riferimenti, mir-rikorrenti, ta’ sorsi legali li skonthom “diversi passi unitarji” għandhom jitqiesu bħala li jikkostitwixxu konċentrazzjoni waħda meta dawn ikunu, b’mod legali jew fattwali, is-suġġett ta’ rabta kundizzjonali, jidhru li huma barra minn posthom. Hija tenfasizza li r-rikorrenti akkwistat il-kontroll ta’ Morpol permezz ta’ xirja waħda ta’ 48.5 % tal-azzjonijiet ta’ Morpol, u mhux permezz ta’ tranżazzjonijiet parzjali multipli marbuta ma’ elementi ta’ attivi li jikkostitwixxu, fl-aħħar mill-aħħar, entità ekonomika waħda.

30

Il-Kummissjoni rrilevat li, skont l-Artikolu 14(3) tar-Regolament Nru 139/2004, sabiex jiġi ddeterminat l-ammont tal-multa, għandhom jittieħdu inkunsiderazzjoni in-natura, is-serjetà u t-tul tal-ksur.

31

Hija qieset li kull ksur tal-Artikolu 4(1) u tal-Artikolu 7(1) tar-Regolament Nru 139/2004, min-natura tiegħu, jikkostitwixxi ksur serju.

32

Fil-kuntest tal-evalwazzjoni tas-serjetà tal-ksur, il-Kummissjoni ħadet inkunsiderazzjoni l-fatt li, fl-opinjoni tagħha, il-ksur imwettaq mir-rikorrenti twettaq b’negliġenza, li l-konċentrazzjoni inkwistjoni kienet tqajjem dubji serji dwar il-kompatibbiltà tagħha mas-suq intern, kif ukoll il-fatt li kienu jeżistu każijiet preċedenti ta’ ksur proċedurali li jikkonċernaw lir-rikorrenti kif ukoll lil kumpanniji oħra.

33

Fir-rigward tat-tul tal-ksur, il-Kummissjoni rrilevat li l-ksur tal-Artikolu 4(1) tar-Regolament Nru 139/2004 kien ksur instantanju u li f’dan il-każ kien twettaq fit-18 ta’ Diċembru 2012, jiġifieri fid-data li fiha twettqet il-konċentrazzjoni. Barra minn hekk hija qieset li l-ksur tal-Artikolu 7(1) tar-Regolament Nru 139/2004 kien ksur kontinwu u li f’dan il-każ, kien twettaq, mit-18 ta’ Diċembru 2012 sat-30 ta’ Settembru 2013, jiġifieri mid-data li fiha sar l-akkwist ta’ Diċembru 2012 sad-data tal-awtorizzazzjoni tiegħu. Skont il-Kummissjoni, it-tul ta’ disa’ xhur u tnax il-ġurnata kien partikolarment twil.

34

Il-Kummissjoni ħaddnet, bħala ċirkustanza attenwanti, il-fatt li r-rikorrenti ma kinitx eżerċitat id-drittijiet tal-vot tagħha fi ħdan Morpol u li żammitha bħala entità separata tar-rikorrenti matul il-proċedura ta’ kontroll tal-konċentrazzjoni.

35

Barra minn hekk hija ħaddnet ukoll bħala ċirkustanza attenwanti l-fatt li r-rikorrenti kienet ippreżentat talba għall-ħatra ta’ grupp xi jiem wara l-konklużjoni tal-akkwist ta’ Diċembru 2012.

36

Għall-kuntrarju, il-Kummissjoni ma kkonstatatx l-eżistenza ta’ ċirkustanzi aggravanti.

37

Il-Kummissjoni qieset li, fil-każ ta’ impriża tad-daqs tar-rikorrenti, l-ammont tas-sanzjoni kellu jkun sostanzjali sabiex ikollu effett dissważiv. Dan iktar u iktar meta l-konċentrazzjoni inkwistjoni qajmet dubji serji il-kompatibbiltà tagħha mas-suq intern.

II.

Il-proċedura u t-talbiet tal-partijiet

38

Permezz ta’ rikors ippreżentat fir-reġistru tal-Qorti Ġenerali fit-3 ta’ Ottubru 2014, ir-rikorrenti ppreżentat dan ir-rikors.

39

Permezz ta’ att separat, li ġie ppreżentat fl-istess jum quddiem il-Qorti Ġenerali, ir-rikorrenti talbet lill-Qorti Ġenerali, skont l-Artikolu 76a tar-Regoli tal-Proċedura tal-Qorti Ġenerali tat-2 ta’ Mejju 1991, li tiddeċiedi skont il-proċedura mgħaġġla. Permezz ta’ ittra tas-17 ta’ Ottubru 2014, il-Kummissjoni ressqet l-osservazzjonijiet tagħha dwar din it-talba. Permezz ta’ deċiżjoni tat-23 ta’ Ottubru 2014, il-Qorti Ġenerali ċaħdet it-talba għal ipproċessar mgħaġġel.

40

Fuq rakkomandazzjoni tal-Imħallef Relatur, il-Qorti Ġenerali ddeċidiet li tiftaħ il-fażi orali tal-proċedura. Fil-kuntest tal-miżuri ta’ organizzazzjoni tal-proċedura previsti fl-Artikolu 89 tar-Regoli tal-Proċedura tagħha, il-Qorti Ġenerali għamlet mistoqsijiet bil-miktub lill-partijiet u talbet lill-Kummissjoni sabiex tipprovdilha ċerti dokumenti. Il-partijiet wieġbu għall-mistoqsijiet bil-miktub u l-Kummissjoni pproduċiet il-dokumenti mitluba.

41

Ir-rikorrenti titlob li l-Qorti Ġenerali jogħġobha:

–

tannulla d-deċiżjoni kkontestata;

–

sussidjarjament, tannulla l-multi imposti fuq ir-rikorrenti skont id-deċiżjoni kkontestata;

–

ferm sussidjarjament, tnaqqas b’mod sostanzjali l-multi imposti fuq ir-rikorrenti skont id-deċiżjoni kkontestata;

–

fi kwalunkwe każ, tikkundanna lill-Kummissjoni għall-ispejjeż;

–

tadotta kwalunkwe miżura oħra li l-Qorti Ġenerali tqis xierqa.

42

Il-Kummissjoni titlob li l-Qorti tal-Ġustizzja jogħġobha:

–

tiċħad ir-rikors fl-intier tiegħu;

–

tikkundanna lir-rikorrenti għall-ispejjeż.

III.

Id-dritt

43

Insostenn tar-rikors, ir-rikorrenti tinvoka ħames motivi. L-ewwel motiv huwa bbażat fuq żball manifest ta’ liġi u ta’ fatt, sa fejn id-deċiżjoni kkontestata ċaħdet l-applikabbiltà tal-Artikolu 7(2) tar-Regolament Nru 139/2004. It-tieni huwa bbażat fuq żball manifest ta’ liġi u ta’ fatt sa fejn id-deċiżjoni kkontestata kkonkludiet li r-rikorrenti kienet negliġenti. It-tielet motiv huwa bbażat fuq ksur tal-prinċipju ġenerali ta’ ne bis in idem. Ir-raba’ motiv huwa bbażat fuq żball manifest ta’ liġi u ta’ fatt imwettaq bl-impożizzjoni tal-multi fuq ir-rikorrenti. Fl-aħħar, il-ħames motiv huwa bbażat fuq żball manifest ta’ liġi u ta’ fatt u fuq assenza ta’ motivazzjoni fir-rigward tal-istabbiliment tal-livelli tal-multi.

A.

Fuq l-ewwel motiv, ibbażat fuq żball manifest ta’ liġi u ta’ fatt, sa fejn id-deċiżjoni kkontestata ċaħdet l-applikabbiltà tal-Artikolu 7(2) tar-Regolament Nru 139/2004

44

L-ewwel motiv huwa maqsum f’erba’ partijiet. L-ewwel parti hija bbażata fuq l-allegazzjoni li d-deċiżjoni kkontestata hija żbaljata fid-dritt u fil-fatt sa fejn din ċaħdet il-kunċett ta’ konċentrazzjoni unika fil-kuntest tal-interpretazzjoni tagħha tal-Artikolu 7(2) tar-Regolament Nru 139/2004. It-tieni parti hija bbażata fuq interpretazzjoni żbaljata, fil-fatt u fid-dritt, tal-kliem tal-Artikolu 7(2) tar-Regolament Nru 139/2004. It-tielet parti hija bbażata fuq interpretazzjoni żbaljata tar-raġuni għall-eżistenza tal-Artikolu 7(2) tar-Regolament Nru 139/2004. Fl-aħħar, ir-raba’ parti hija bbażata fuq l-allegazzjoni li r-rikorrenti kkonformat ruħha mal-Artikolu 7(2) tar-Regolament Nru 139/2004.

45

F’dan il-każ, jeħtieġ li jiġu eżaminati flimkien l-ewwel tliet partijiet tal-ewwel motiv, li huma kollha marbuta mal-kwistjoni tal-interpretazzjoni tal-Artikolu 7(2) tar-Regolament Nru 139/2004.

1.

Fuq l-ewwel tliet partijiet tal-ewwel motiv

a)

Osservazzjonijiet preliminari

46

Jeħtieġ li jitfakkar, qabel xejn, li l-Artikolu 14(2)(a) u (b) tar-Regolament Nru 139/2004 jipprovdu kif ġej:

47

Skont l-ewwel subparagrafu tal-Artikolu 4(1) tar-Regolament Nru 139/2004, “[k]onċentrazzjoni[jiet] b’dimensjoni Komunitarja definiti f’dan ir-Regolament għandhom ikunu notifikati lill-Kummissjoni qabel ma jiġu implimentati u wara l-konklużjoni tal-ftehim, id-dikjarazzjoni ta’ l-offerta pubblika, jew l-akkwist ta’ interess li għandu kontroll.”

48

Skont l-Artikolu 7(1) tal-istess Regolament, “[k]onċentrazzjoni b’dimensjoni Komunitarja […] ma għandhiex tkun implimentata qabel tkun notifikata jew qabel ma tkun dikjarata kompatibbli mas-suq [intern] permezz ta’ deċiżjoni skond l-Artikoli 6(1)(b), 8(1) jew 8(2), jew a bażi ta’ preżunzjoni skond l-Artikolu 10(6)”.

49

Barra minn hekk, skont l-Artikolu 3(1) tar-Regolament Nru 139/2004:

50

Fl-aħħar, skont l-Artikolu 3(2) tar-Regolament Nru 139/2004, “[k]ontroll għandu jkun permezz ta’ drittijiet, kuntratti, jew permezz ta’ kull mezz ieħor li, separatament jew flimkien, fil-kuntest tal-fatti u tal-liġijiet involuti, jikkonferixxu l-possibbiltà li tkun eżerċitata influwenza deċiżiva fuq l-impriża”.

51

F’dan il-każ, hemm lok li jiġi kkonstatat qabel xejn li, permezz tal-akkwist ta’ Diċembru 2012, ir-rikorrenti akkwistat sehem f’Morpol li jammonta għal li jammonta għal madwar 48.5 % tal-kapital azzjonist ta’ Morpol.

52

Kif ikkonstatat il-Kummissjoni fil-punt 55 tad-deċiżjoni kkontestata, mingħajr ebda kontradizzjoni dwar dan il-punt mir-rikorrenti, fil-mument tal-akkwist ta’ Diċembru 2012, Morpol kienet kumpannija pubblika b’responsabbiltà limitata [“public limited company”] Norveġiża u, abbażi ta’ dan, id-drittijiet tal-vot kienu attribwiti skont il-prinċipju “azzjoni tagħti dritt għal vuċi”. Għaldaqstant, maġġoranza sempliċi tal-azzjonijiet preżenti u votanti waqt laqgħat ġenerali kienet suffiċjenti sabiex tiġi adottata mozzjoni, b’riżerva għal xi tranżazzjonijiet li kienu jirrikjedu maġġoranza kkwalifikata ta’ żewġ terzi.

53

Barra minn hekk, il-Kummissjoni ġustament rrilevat, fil-punt 57 tad-deċiżjoni kkontestata, li azzjonist minoritarju jista’ jitqies bħala li jiddetjeni kontroll esklużiv effettiv, b’mod partikolari meta dan tal-aħħar ikollu l-kważi-ċertezza li ser jikseb maġġoranza fil-laqgħat ġenerali, fid-dawl tar-rata tas-sehem tiegħu u tar-rata ta’ preżenza ta’ azzjonisti oħra fil-laqgħat ġenerali matul is-snin preċedenti (ara, f’dan is-sens, sentenza tat-12 ta’ Diċembru 2012, Electrabel vs Il-Kummissjoni, T-332/09, EU:T:2012:672, punti 45 sa 48).

54

Sussegwentement, il-Kummissjoni rrilevat li M. (permezz ta’ Friendmall u Bazmonta Holding) dejjem irrappreżenta maġġoranza netta ta’ voti espressi waqt il-laqgħat ġenerali u li l-kapital rimanenti ta’ Morpol kien imferrex ħafna, fatt li jimplika li l-azzjonisti rimanenti ma kinux kapaċi li jifformaw minoranza li tibblokka li kapaċi tiddomina s-setgħa deċiżiva ta’ M., b’mod partikolari minħabba n-numru dgħajjef fosthom ta’ assistenti fil-laqgħat ġenerali.

55

Għaldaqstant, il-Kummissjoni kkonkludiet, mingħajr ebda kontradizzjoni dwar dan il-punt mir-rikorrenti, li qabel l-akkwist ta’ Diċembru 2012, M. Kien jeżerċita kontroll esklużiv effettiv fuq Morpol permezz tal-azzjonijiet tiegħu fi Friendmall u Bazmonta Holding.

56

Fl-aħħar, il-Kummissjoni kkonkludiet ġustament li l-akkwist ta’ Diċembru 2012 kien ikkonferixxa lir-rikorrenti l-istess drittijiet u l-istess possibbiltajiet li teżerċita influwenza determinanti fuq Morpol bħal dawk li kien jibbenefika minnhom M. preċedentement permezz ta’ Friendmall u Bazmonta Holding.

57

Minn dak li ntqal jirriżulta li kien b’mod ġust li l-Kummissjoni kkonstatat, fil-punt 68 tad-deċiżjoni kkontestata, li r-rikorrenti kien akkwista l-kontroll ta’ Morpol wara l-konklużjoni tal-akkwist ta’ Diċembru 2012.

58

Ir-rikorrenti tenfasizza diversi drabi, minkejja li f’kuntesti oħra, li hija ma eżerċitatx id-drittijiet tagħha tal-vot qabel l-awtorizzazzjoni tal-konċentrazzjoni mill-Kummissjoni. F’dan ir-rigward, hemm lok li jiġi kkonstatat li, skont l-Artikolu 3(2) tar-Regolament Nru 139/2004, il-kontroll jirriżulta b’mod partikolari minn drittijiet li jikkonferixxu l-“possibbiltà” li tiġi eżerċitata influwenza determinanti fuq l-attività ta’ impriża. B’hekk, il-fatt determinanti huwa l-akkwist ta’ dan il-kontroll fis-sens formali u mhux l-eżerċizzju effettiv ta’ tali kontroll (ara, b’analoġija, is-sentenza tat-12 ta’ Diċembru 2012, Electrabel vs Il-Kummissjoni, T-332/09, EU:T:2012:672, punt 189). Il-fatt li d-detenzjoni tad-drittijiet tal-vot kienet tikkonferixxi lir-rikorrenti l-kontroll effettiv ta’ Morpol ma huwiex ikkontestat miċ-ċirkustanza li r-rikorrenti ma eżerċitatx id-drittijiet tagħha tal-vot qabel l-awtorizzazzjoni tal-konċentrazzjoni.

59

Kif irrilevat il-Kummissjoni fil-punti 72 u 73 tad-deċiżjoni kkontestata, ċerti Artikoli ta’ SPA jidhru li jimplikaw li r-rikorrenti eżerċitat id-drittijiet tagħha tal-vot f’Morpol biss wara li kisbet l-awtorizzazzjoni tal-awtoritajiet tal-kompetizzjoni. Madankollu SPA ma jinkludi l-ebda dispożizzjoni li tipprekludi lir-rikorrenti milli teżerċita id-drittijiet tagħha tal-vot qabel ma tirċievi l-awtorizzazzjoni. Għaldaqstant, ir-rikorrenti kienet libera li teżerċita d-drittijiet tagħha tal-vot f’Morpol f’kull mument wara l-konklużjoni tal-akkwist ta’ Diċembru 2012.

60

Barra minn hekk, b’risposta għal mistoqsija tal-Qorti Ġenerali magħmula waqt is-seduta, ir-rikorrenti kkonfermat li hija ma kinitx tikkontesta li l-akkwist tas-sehem ta’ 48.5 % ta’ Morpol kien ipprovdielha l-kontroll ta’ Morpol fis-sens tar-Regolament Nru 139/2004.

61

Kif irrilevat il-Kummissjoni, fil-punti 8, 13 u 66 tad-deċiżjoni kkontestata, il-konklużjoni tal-akkwist ta’ Diċembru 2012 seħħet fit-18 ta’ Diċembru 2012. Ir-rikorrenti tiddikjara, fil-punt 13 tar-rikors, li, fit-18 ta’ Diċembru 2012, is-SPA kien ġie konkluż u l-azzjonijiet li kellu M. f’Morpol ġew ittrasferiti lir-rikorrenti.

62

Ir-rikorrenti ma tikkontestax il-fatt li l-konċentrazzjoni inkwistjoni kienet konċentrazzjoni ta’ dimensjoni Komunitarja.

63

Peress li r-rikorrenti kisbet il-kontroll ta’ Morpol bis-saħħa tal-akkwist ta’ Diċembru 2012, bħala prinċipju, hija kellha, skont l-ewwel paragrafu tal-Artikolu 4(1) u tal-ewwel paragrafu tal-Artikolu 7(1) tar-Regolament Nru 139/2004, tinnotifika din il-konċentrazzjoni lill-Kummissjoni qabel it-twettiq tagħha u li ma twettaqhiex qabel ma din tiġi ddikjarata kompatibbli mas-suq intern mill-Kummissjoni.

64

Minn dawn il-konstatazzjonijiet preċedenti jirriżulta li l-kwistjoni rilevanti għall-finijiet tal-eżami tal-ewwel tliet partijiet tal-ewwel motiv hija dik dwar jekk kinitx applikabbli għal dan il-każ, l-eċċezzjoni prevista fl-Artikolu 7(2) tar-Regolament Nru 139/2004.

b)

Dwar l-applikabbiltà tal-Artikolu 7(2) tar-Regolament Nru 139/2004

65

L-Artikolu 7(2) tar-Regolament Nru 139/2004 jipprovdi kif ġej:

66

Għaldaqstant, l-Artikolu 7(2) tar-Regolament Nru 139/2004 jipprovdi għal żewġ każijiet: każ minnhom huwa marbut ma’ offerta pubblika ta’ xiri jew ta’ skambju (l-ewwel każ) u l-ieħor huwa marbut ma’ serje ta’ tranżazzjonijiet fuq it-titoli (it-tieni każ).

67

B’risposta għal mistoqsija f’dan ir-rigward waqt is-seduta, ir-rikorrenti tispeċifika li hija kienet tibbaża r-raġunament tagħha fuq l-ewwel każ prevista mill-Artikolu 7(2) tar-Regolament Nru 139/2004, u ta’ dan kollu ġie nnotat fil-proċess verbali tas-seduta.

1)

Fuq il-fatt li l-konċentrazzjoni inkwistjoni ma hijiex koperta mill-kliem tal-Artikolu 7(2) tar-Regolament Nru 139/2004

68

Jeħtieġ li jitfakkar li, skont l-ewwel każ previst fl-Artikolu 7(2) tar-Regolament Nru 139/2004, “[i]l-paragrafu 1 ma għandux ifixkel l-implimentazzjoni ta’ offerta pubblika [ta’ xiri jew ta’ skambju]”, dment li l-konċentrazzjoni tiġi nnotifikata bla dewmien u li l-akkwirent ma jeżerċitax id-drittijiet tiegħu tal-vot qabel l-awtorizzazzjoni tal-konċentrazzjoni.

69

F’dan il-każ, hemm lok li jiġi rrilevat li l-Kummissjoni ma kkonstatatx li r-rikorrenti kienet kisret l-Artikolu 7(1) tar-Regolament Nru 139/2004 billi wettqet l-offerta pubblika ta’ xiri. Hija kkonstatat li r-rikorrenti kienet kisret l-Artikolu 7(1) u l-Artikolu 4(1) tar-Regolament Nru 139/2004 bl-akkwist ta’ Diċembru 2012. Jeħtieġ li jitfakkar li l-offerta pubblika ta’ xiri ġiet ppreżentata biss fil-15 ta’ Jannar 2013, jiġifieri wara l-konklużjoni tal-akkwist ta’ Diċembru 2012.

70

Għaldaqstant, il-fatt li, skont l-Artikolu 7(2) tar-Regolament Nru 139/2004, il-paragrafu 1 ta’ dan l-istess artikolu ma għandux jostakola t-twettiq ta’ offerta pubblika ta’ xiri, bħala prinċipju, huwa irrilevanti fil-kawża odjerna.

71

L-ewwel każ previst mill-Artikolu 7(2) tar-Regolament Nru 139/2004 jippermetti, f’ċerti ċirkustanzi, it-twettiq ta’ offerta pubblika qabel ma din tiġi nnotifikata u awtorizzata, anki jekk din tikkostitwixxi konċentrazzjoni ta’ dimensjoni Komunitarja. Madankollu, skont il-kliem tagħha, din id-dispożizzjoni ma tippermettix li jitwettaq akkwist privat.

72

Għaldaqstant, hemm lok li jiġi kkonstatat li, skont il-kliem tiegħu, l-ewwel każ previst mill-Artikolu 7(2) tar-Regolament Nru 139/2004 ma huwiex applikabbli għall-każ odjern.

73

Minkejja li r-rikorrenti indikat, waqt is-seduta, li hija kienet tibbaża ruħha fuq l-ewwel każ previst mill-Artikolu 7(2) tar-Regolament Nru 139/2004, jeħtieġ li jiġi rrilevat li l-konċentrazzjoni inkwistjoni lanqas ma hija koperta mill-kliem tat-tieni każ previst mill-Artikolu 7(2) tar-Regolament Nru 139/2004.

74

Skont it-tieni każ previst mill-Artikolu 7(2) tar-Regolament Nru 139/2004, “[i]l-paragrafu 1 ma għandux ifixkel l-implimentazzjoni ta’ […] transazzjonijiet f’titoli inklużi dawk li jistgħu jinbidlu f’titoli oħra u li tħallew jiġu negozjati f’suq bħal ma huwa [B]orża u li permezz tagħhom kien akkwistat il-kontroll, fis-sens ta’ l-Artikolu 3, minn diversi bejjiegħa”, dment li jiġu ssodisfatti ċerti kundizzjonijiet.

75

Hemm lok li jiġi kkonstatat li, f’dan il-każ, ir-rikorrenti akkwista l-kontroll ta’ Morpol permezz ta’ bejjiegħ wieħed bis-saħħa ta’ tranżazzjoni waħda ta’ titoli, jiġifieri l-akkwist ta’ Diċembru 2012, u dan kif ġie rrilevat mill-Kummissjoni fil-punt 101 tad-deċiżjoni kkontestata.

76

Fil-fatt, peress li M. kien jikkontrolla, dak iż-żmien, lil Friendmall u Bazmonta Holding, M. kien l-unika bejjiegħ tal-azzjonijiet ta’ Morpol.

77

F’dan ir-rigward, ir-rikorrenti sostniet, waqt is-seduta, li, fid-deċiżjoni tagħha tas-26 ta’ Frar 2007 (Każ LGI/Telenet – COMP/M.4521) (iktar ’il quddiem id-“deċiżjoni LGI/Telenet”), il-Kummissjoni ma għamlitx il-mistoqsija dwar minn kien jikkontrolla b’mod definittiv l-entitajiet li biegħu l-azzjonijiet tal-kumpannija Telenet. Skont ir-rikorrenti, dawn l-entitajiet, jiġifieri entitajiet interkomunali, kienu kkontrollati b’mod definittiv mir-reġjun Fjamming. Ir-rikorrenti enfasizzat li, f’dan il-każ, il-Kummissjoni kienet ibbażat ruħha fuq iċ-ċirkustanza li Friendmall u Bazmonta Holding kienu t-tnejn ikkontrollati minn M., b’tali mod li r-rikorrenti ma kinitx, skont il-Kummissjoni, akkwistat il-kontroll permezz ta’ diversi bejjiegħa, iżda li hija ma kinitx għamlet l-istess mistoqsija fil-kawża li tat lok għad-deċiżjoni LGI/Telenet.

78

Fl-ewwel lok, jeħtieġ li jiġi rrilevat li l-Qorti Ġenerali ma hijiex marbuta bil-prassi deċiżjonali tal-Kummissjoni. Fit-tieni lok, mit-tabella marbuta mal-parteċipazzjoni fil-laqgħat ġenerali tal-azzjonisti, inkluża fil-punt 59 tad-deċiżjoni kkontestata, jirriżulta li Friendmall kellha waħedha maġġoranza ċara ħafna tal-vuċijiet matul dawn il-laqgħat ġenerali kollha. Għaldaqstant, ir-rikorrenti akkwistat il-kontroll esklużiv effettiv ta’ Morpol anki permezz tal-akkwist tal-azzjonijiet waħedhom li kienu jappartjenu lil Friendmall. Barra minn hekk, kif ikkonstatat il-Kummissjoni fil-punt 63 tad-deċiżjoni kkontestata, ir-rikorrenti rrikonoxxiet, b’risposta għat-talba għal informazzjoni tal-Kummissjoni tat-12 ta’ Frar 2013, li Morpol reġgħet sabet ruħha taħt il-kontroll esklużiv ta’ Friendmall, fid-dawl tal-azzjonijiet irrappreżentati fil-laqgħat ġenerali annwali u straordinarji. Għaldaqstant, f’dan il-kuntest, jeħtieġ li jiġu analizzati fid-dettall, il-fatti li servew bħala bażi għad-deċiżjoni LGI/Telenet (ara l-punt 77 iktar ’il-fuq).

79

Kif ikkonstatat il-Kummissjoni fil-punt 66 tad-deċiżjoni kkontestata, l-akkwist ta’ Diċembru 2012 ġie konkluż fit-18 ta’ Diċembru 2012.

80

L-offerta pubblika ta’ xiri ġiet ippreżentata biss fil-15 ta’ Jannar 2013, jiġifieri f’data li fiha r-rikorrenti diġà kellha il-kontroll esklużiv effettiv ta’ Morpol.

81

Għalkemm huwa minnu li x-xiri mill-ġdid totali ta’ Morpol mir-rikorrenti twettaq f’diversi stadji u permezz ta’ diversi bejjiegħa, l-akkwist tal-kontroll twettaq bis-saħħa ta’ tranżazzjoni waħda u minn bejjiegħ wieħed. Għaldaqstant, il-kontroll la nkiseb permezz ta’ diversi bejjiegħa u lanqas bis-saħħa ta’ serje ta’ tranżazzjonijiet.

82

Minn dan isegwi li, skont il-kliem tiegħu, it-tieni każ previst mill-Artikolu 7(2) tar-Regolament Nru 139/2004 lanqas ma huwa applikabbli għall-każ odjern.

83

Għaldaqstant, hemm lok li jiġi kkonstatat li, skont il-kliem tal-Artikolu 7(2) tar-Regolament Nru 139/2004, l-akkwist ta’ Diċembru 2012 ma huwiex kopert minn din id-dispożizzjoni.

84

Ir-raġunament tar-rikorrenti huwa bbażat fuq l-eżistenza ta’ konċentrazzjoni waħda, fis-sens li l-akkwist ta’ Diċembru 2012 u l-offerta pubblika ta’ xiri ulterjuri kienet tikkostitwixxi unità. Għaldaqstant, jeħtieġ li tiġi eżaminata l-fondatezza ta’ dan l-argument.

2)

Fuq l-argument tar-rikorrenti bbażat fuq l-allegata eżistenza ta’ konċentrazzjoni unika

i)

Osservazzjonijiet preliminari

85

Ir-rikorrenti ssostni li d-deċiżjoni kkontestata tinjora r-rabta legali essenzjali u l-kundizzjonalità bejn l-akkwist ta’ Diċembru 2012 u l-offerta pubblika, u li din tippreżenta raġunament li jikkontradixxi r-Regolament Nru 139/2004, il-ġurisprudenza tal-Qorti Ġenerali, l-Avviż ġurisdizzjonali kkonsolidat tal-Kummissjoni taħt ir-Regolament Nru 139/2004 (ĠU C 95, p. 1), il-prassi deċiżjonali tal-Kummissjoni kif ukoll il-prassi fl-Istati Membri.

86

Skont ir-rikorrenti, il-Kummissjoni kellha tikkonkludi li l-akkwist ta’ Diċembru 2012 u l-offerta pubblika ta’ xiri ulterjuri kienu jikkostitwixxi stadji ta’ konċentrazzjoni unika.

87

F’dan il-każ, jeħtieġ li jitfakkar li r-rikorrenti speċifikat, waqt is-seduta, li hija kienet tibbaża r-raġunament tagħha fuq l-ewwel każ previst mill-Artikolu 7(2) tar-Regolament Nru 139/2004. Minn dan jirriżulta li r-rikorrenti essenzjalment issostni li l-akkwist ta’ Diċembru 2012, għalkemm qabel it-tnedija tal-offerta pubblika ta’ xiri, kien jifforma parti minn din tal-aħħar, b’tali mod li l-Kummissjoni, skont ir-rikorrenti, essenzjalment ikkonstatat ksur li jikkonsisti fit-twettiq ta’ offerta pubblika ta’ xiri, u dan minkejja li jirriżulta mill-ewwel każ previst mill-Artikolu7(2) tar-Regolament Nru 139/2004 kif ukoll mill-Artikolu 7(1) ta’ dan ir-regolament, li dan ma kienx jostakola tali implementazzjoni.

88

Hemm lok li jiġi eżaminat jekk l-akkwist ta’ Diċembru 2012 u l-offerta pubblika ta’ xiri jistgħux jew le jitqiesu bħala konċentrazzjoni unika.

89

Jeħtieġ li jiġi speċifikat, qabel xejn, li l-kunċett ta’ “konċentrazzjoni unika” ma hijiex inkluża fir-Regolament tal-Kunsill (KEE) Nru 4064/89, tal-21 ta’ Diċembru 1989, dwar il-kontroll ta’ konċentrazzjonijiet bejn impriżi (ĠU Edizzjoni Speċjali bil-Malti, Kapitolu 8, Vol. 1, p. 31) li huwa l-predeċessur tar-Regolament Nru 139/2004.

90

F’diversi deċiżjonijiet, il-Kummissjoni bbażat ruħha fuq il-kunċett ta’ “konċentrazzjoni unika” u l-Qorti Ġenerali kkonfermat dan il-kunċett, b’mod partikolari fis-sentenza tat-23 ta’ Frar 2006, Cementbouw Handel & Industrie vs Il-Kummissjoni (T-282/02, EU:T:2006:64).

91

Fir-rigward tar-Regolament Nru 139/2004, hemm lok li jiġi kkonstatat li l-kunċett ta’ “konċentrazzjoni unika” huwa inkluż biss fil-premessa 20, u mhux fl-artikoli ta’ dan ir-regolament.

92

It-tielet sentenza tal-premessa 20 tar-Regolament Nru 139/2004 hija redatta kif ġej:

93

Fil-prassi tagħha, il-Kummissjoni bbażat ruħha fuq il-kunċett ta’ konċentrazzjoni unika f’żewġ każijiet.

94

F’dan ir-rigward, l-avviż ġurisdizzjonali kkonsolidat, fil-punt 44 tiegħu, jistabbilixxi:

95

Għaldaqstant jeżistu żewġ każijiet, jiġifieri, l-ewwel, l-akkwist ta’ attività jew ta’ impriża individwali permezz ta’ diversi tranżazzjonijiet legali u, it-tieni, it-teħid tal-kontroll ta’ diversi impriżi li, bħala tali, jista’ jiġi assimilat ma’ konċentrazzjonijiet distinti.

96

Barra minn hekk, it-tielet sentenza tal-premessa 20 tar-Regolament Nru 139/2004, issemmi żewġ possibbiltajiet bil-għan li tiġi stabbilita l-eżistenza ta’ konċentrazzjoni unika. It-tranżazzjonijiet għandhom ikunu marbuta mill-qrib sa fejn ikunu jew suġġetti għal rabta kundizzjonali, jew, li jkunu fil-forma ta’ serje ta’ tranżazzjonijiet ta’ titoli mwettqa f’terminu raġonevolment qasir.

97

B’risposta għal mistoqsija magħmula f’dan ir-rigward waqt is-seduta, ir-rikorrenti kkonfermat li hija kienet tibbaża ruħha fuq l-ewwel possibbiltà msemmija fit-tielet sentenza tal-premessa 20 tar-Regolament Nru 139/2004, dwar it-tranżazzjonijiet li huma suġġetti għal rabta kundizzjonali, u ta’ dan ittieħdet nota fil-proċess verbali tas-seduta.

98

Jeħtieġ li tiġi eżaminata l-kwistjoni dwar jekk, f’dan il-każ, l-eżistenza ta’ konċentrazzjoni unika tistax tiġi stabbilita abbażi tal-ewwel possibbiltà msemmija fit-tielet sentenza tal-premessa 20 tar-Regolament Nru 139/2004.

99

F’dan il-każ, il-konċentrazzjoni inkwistjoni ma taqax b’mod ċar taħt it-tieni ipoteżi kif iddefinita fil-punt 95 iktar ’il fuq, jiġifieri taħt dik tat-teħid ta’ kontroll ta’ diversi impriżi.

100

Għaldaqstant, hemm lok li jiġi eżaminat jekk il-konċentrazzjoni inkwistjoni taqax taħt l-ewwel ipoteżi kif iddefinita fil-punt 95 iktar ’il fuq, jiġifieri dik tal-akkwist ta’ impriża individwali permezz ta’ diversi tranżazzjonijiet legali.

101

Ir-rikorrenti tqis li diversi tranżazzjonijiet jikkostitwixxu konċentrazzjoni unika jekk dawn it-tranżazzjonijiet ikunu interdipendenti b’tali mod li waħda ma kinitx titwettaq mingħajr l-oħrajn. Essenzjalment, hija tqis li l-fatt waħdu li diversi tranżazzjonijiet jkunu suġġetti għal rabta kundizzjonali huwa suffiċjenti sabiex jiġi kkunsidrat li dawn jifformaw parti minn konċentrazzjoni unika. B’hekk, hija tirrileva li l-Kummissjoni kellha tqis li l-akkwist ta’ Diċembru 2012 u l-offerta pubblika kienu “ta’ natura unitarja”, kemm fid-dritt kif ukoll fil-fatt, liema fatt jobbligaha li teżaminahom u li tevalwahom flimkien, bħala elementi ta’ konċentrazzjoni unika.

102

Għall-kuntrarju, il-Kummissjoni rrilevat, fil-punt 105 tad-deċiżjoni kkontestata, li hija kienet tqis “bħala irrilevanti l-fatt li [ir-rikorrenti] [kienet] forsi ipperċiviet l-akkwist ta’ Diċembru 2012 u l-istadju sussegwenti tat-teħid lura tagħha ta’ Morpol bħala li jifformaw parti ekonomikament mill-istess tranżazzjoni”. Barra minn hekk, il-Kummissjoni rrilevat, fil-punt 113 tad-deċiżjoni kkontestata, li “r-riferimenti, mir-[rikorrenti], għal sorsi legali li skonthom ‘diversi stadji unitarji’ għandhom jitqiesu bħala li jikkostitwixxu konċentrazzjoni unika meta dawn ikunu, fattwalment u legalment, suġġetti għal rabta kundizzjonali, jidhru li ma humiex f’lokhom”, liema teżi ġiet spjegata iktar fid-dettall fil-punti 114 sa 117 tad-deċiżjoni kkontestata. Il-Kummissjoni ma esprimietx ruħha, fid-deċiżjoni kkontestata, fuq il-kwistjoni dwar jekk kinitx teżisti jew le kundizzjonalità legali jew fattwali bejn l-akkwist ta’ Diċembru 2012 u l-offerta pubblika ta’ xiri ulterjuri.

103

Għaldaqstant, jeħtieġ li tiġi eżaminata il-kwistjoni dwar jekk, fil-kuntest tal-ewwel ipoteżi, jiġifieri dik tal-akkwist ta’ impriża individwali permezz ta’ diversi tranżazzjonijiet legali, l-eżistenza waħedha ta’ kundizzjonalità legali jew fattwali hijiex suffiċjenti sabiex tiġi kkonstatata l-eżistenza ta’ konċentrazzjoni unika, u dan anki meta l-kontroll tal-impriża immirata jiġi akkwistat permezz ta’ tranżazzjoni privata waħda qabel it-tnedija ta’ offerta pubblika ta’ xiri.

104

F’dan il-kuntest, jeħtieġ li jiġu eżaminati, fl-ewwel lok, l-argumenti tar-rikorrenti li l-pożizzjoni tal-Kummissjoni tikkontradixxi l-avviż ġurisdizzjonali kkonsolidat, fit-tieni lok, l-argumenti tar-rikorrenti li l-pożizzjoni tal-Kummissjoni tikkontradixxi l-ġurisprudenza tal-Qorti Ġenerali u l-prassi deċiżjonali tal-Kummissjoni, fit-tielet lok, l-argumenti tar-rikorrenti li pożizzjoni tal-Kummissjoni tikkontradixxi l-premessa 20 tar-Regolament Nru 139/2004, fir-raba’ lok, l-argumenti tar-rikorrenti li l-pożizzjoni tal-Kummissjoni tikkontradixxi l-prassi fl-Istati Membri u, fil-ħames lok, l-argumenti tar-rikorrenti li l-Kummissjoni interpretat b’mod żbaljat ir-raġuni għall-eżistenza tal-Artikolu 7(2) tar-Regolament Nru 139/2004.

ii)

Fuq l-argumenti tar-rikorrenti li l-pożizzjoni tal-Kummissjoni tikkontradixxi l-avviż ġurisdizzjonali kkonsolidat

105

Ir-rikorrenti tqis li l-pożizzjoni adottata mill-Kummissjoni fid-deċiżjoni kkontestata tikkontradixxi l-avviż ġurisdizzjonali kkonsolidat. Ir-rikorrenti tikkonferma li l-avviż ġurisdizzjonali kkonsolidat jindika, fil-punt 43, li “żewġ jew diversi tranżazzjonijiet jikkostitwixxu konċentrazzjoni unika meta jkunu marbutin legalment, jiġifieri li l-ftehimiet stess ikunu marbutin b’‘kundizzjonalità reċiproka’, jew marbutin fattwalment, […]”.

106

Madankollu, dan l-argument tar-rikorrenti huwa bbażat fuq qari żbaljat tal-punt 43 tal-avviż ġurisdizzjonali kkonsolidat. Dan il-punt huwa redatt kif ġej:

107

Fir-rigward tal-kunċett ta’ “konċentrazzjoni unika”, dan il-punt jinkludi biss il-konstatazzjoni li kundizzjonalità fattwali “tista’” wkoll tkun suffiċjenti sabiex tippermetti li t-tranżazzjonijiet jitqiesu bħala konċentrazzjoni unika. Minn din il-formulazzjoni ma jirriżultax li kundizzjonalità hija dejjem suffiċjenti sabiex tranżazzjonijiet multipli jkunu jistgħu jiġu assimilati ma’ konċentrazzjoni unika.

108

Jeħtieġ li jiġi rrilevat li l-ewwel sentenza tal-punt 45 tal-avviż ġurisdizzjonali kkonsolidat huwa redatt kif ġej:

109

Dan il-punt jikkonċerna, kif jindika t-titolu tiegħu, l-“[a]kkwist ta’ impriża unika” (jiġifieri l-ewwel ipoteżi kif iddefinita fil-punt 95 iktar ’il fuq). Skont il-punt 45 tal-avviż ġurisdizzjonali kkonsolidat, sabiex tkun tista’ teżisti konċentrazzjoni unika fl-ewwel ipoteżi, huwa neċessarju li t-teħid ta’ kontroll iseħħ permezz ta’ diversi tranżazzjonijiet legali. Madankollu, f’dan il-każ, it-teħid tal-kontroll avvera ruħu unikament permezz tal-akkwist ta’ Diċembru 2012, li ġie konkluż qabel it-tnedija tal-offerta pubblika ta’ xiri għall-azzjonijiet rimanenti ta’ Morpol.

110

Barra minn hekk, ir-rikorrenti tibbaża ruħha fuq il-punt 40 tal-avviż ġurisdizzjonali kkonsolidat, li jiddikjara, fl-ewwel sentenza tiegħu, li, “fil-kuntest tar-Regolament [Nru 139/2004], it-tranżazzjonijiet li huma validi jew jaqgħu flimkien skond l-għanijiet ekonomiċi mfittxija mill-partijiet għandhom ukoll jiġu analizzati fi proċedura waħda”. Madankollu hemm lok li jiġi rrilevat li t-tieni sentenza tal-punt 40 tal-avviż ġurisdizzjonali kkonsolidat jispeċifika li, “[f’] dawn iċ-ċirkostanzi, it-tibdil ta’ l-istruttura tas-suq huwa kkawżat minn dawn it-tranżazzjonijiet flimkien”. Għaldaqstant, il-punt 40 tal-avviż ġurisdizzjonali kkonsolidat jikkonċerna s-sitwazzjonijiet li fihom it-tibdil tal-istruttura tas-suq tkun tirriżulta minn għadd ta’ tranżazzjonijiet, u mhux dawk is-sitwazzjonijiet li fihom it-tibdil tal-istruttura tas-suq, jiġifieri t-teħid tal-kontroll ta’ impriża mmirata individwali, jitwettaq bis-saħħa ta’ tranżazzjoni waħda.

111

Skont l-avviż ġurisdizzjonali kkonsolidat, meta l-kontroll ta’ impriża unika jinkiseb bis-saħħa ta’ diversi tranżazzjonijiet, huwa possibbli, taħt ċerti kundizzjonijiet, li dawn it-tranżazzjonijiet jitqiesu bħala konċentrazzjoni unika. Għaldaqstant, it-teħid ta’ kontroll bis-saħħa ta’ diversi tranżazzjonijiet, skont l-avviż ġurisdizzjonali kkonsolidat, jikkostitwixxi kundizzjoni sabiex ikun jista’ jiġi applikat il-kunċett ta’ konċentrazzjoni unika fl-ewwel ipoteżi kif iddefinit fil-punt 95 iktar ’il fuq, jiġifieri dak tal-akkwist ta’ attività jew ta’ impriża individwali permezz ta’ diversi tranżazzjonijiet legali.

112

Essenzjalment, ir-rikorrenti ssostni li, peress li l-akkwist ta’ Diċembru 2012 u l-offerta pubblika ta’ xiri ulterjuri huma marbuta b’kundizzjonalità, dawn jikkostitwixxu konċentrazzjoni unika, u minn dan hija tikkonkludi li hija akkwista il-kontroll ta’ Morpol bis-saħħa ta’ diversi tranżazzjonijiet.

113

Madankollu, it-teħid ta’ kontroll ta’ impriża individwali bis-saħħa ta’ diversi tranżazzjonijiet jikkostitwixxi, skont l-avviż ġurisdizzjonali kkonsolidat, kundizzjoni sabiex diversi tranżazzjonijiet ikunu jistgħu jitqiesu bħala konċentrazzjoni unika, u mhux konsegwenza tal-fatt li dawn it-tranżazzjonijiet jikkostitwixxu konċentrazzjoni unika.

114

F’dan il-każ, din il-kundizzjoni ma hijiex issodisfatta, peress li l-kontroll ta’ Morpol ma ġiex akkwistat bis-saħħa ta’ diversi tranżazzjonijiet.

115

Waqt is-seduta, ir-rikorrenti bbażat ruħha wkoll fuq il-punt 38 tal-avviż ġurisdizzjonali kkonsolidat. Hija enfasizzat li minn dan il-punt jirriżulta li l-mistoqsija deċiżiva sabiex tiġi evalwata l-kwistjoni dwar jekk diversi tranżazzjonijiet jikkostitwixxux konċentrazzjoni unika kienet dik dwar jekk ir-“riżultat finali” kienx iwassal għal konċentrazzjoni unika. Skont ir-rikorrenti, ir-“riżultat finali” għandu jitqies bħala l-akkwist ta’ 100 % tal-azzjonijiet ta’ Morpol li kien ġie previst mir-rikorrenti sa mill-bidu.

116

F’dan ir-rigward, jeħtieġ li jiġi enfasizzat li l-punt 38 tal-avviż ġurisdizzjonali kkonsolidat jikkostitwixxi essenzjalment sinteżi tal-punti 104 sa 109 tas-sentenza tat-23 ta’ Frar 2006, Cementbouw Handel & Industrie vs Il-Kummissjoni (T-282/02, EU:T:2006:64), li hemm riferenza għaliha fin-nota ta’ qiegħ il-paġna Nru 43 ta’ dak l-avviż. Kif jirriżulta mill-punt 128 iktar ’il quddiem, mill-punt 104 ta’ din is-sentenza jirriżulta li l-kwistjoni rilevanti ma hijiex dik tal-mument li fih twettaq l-akkwist tal-azzjonijiet kollha ta’ impriża mmirata, iżda dik tal-mument li fih twettaq l-akkwist tal-kontroll. Il-punt 38 tal-avviż ġurisdizzjonali kkonsolidat ma jinkludi l-ebda element li jippermetti li jiġi kkunsidrat li, meta impriża jkollha mil-bidu l-intenzjoni li takkwista l-azzjonijiet kollha ta’ impriża mmirata, ir-“riżultat finali” għandu jiġi ddefinit fid-dawl tal-akkwist tal-azzjonijiet kollha u mhux fid-dawl tal-akkwist tal-kontroll.

117

Għall-kuntrarju, l-ewwel sentenza tal-punt 38 tal-avviż ġurisdizzjonali kkonsolidat, bl-istess mod bħall-punt 104 tas-sentenza tat-23 ta’ Frar 2006, Cementbouw Handel & Industrie vs Il-Kummissjoni (T-282/02, EU:T:2006:64), b’mod ċar tagħmel riferiment għad-definizzjoni ta’ konċentrazzjoni li tinsab fl-Artikolu 3(1) tar-Regolament Nru 139/2004, u r-riżultat ta’ dan huwa “l-akkwist tal-kontroll” ta’ impriża waħda jew ta’ diversi impriżi. Barra minn hekk, skont it-tielet sentenza tal-punt 38 tal-avviż ġurisdizzjonali kkonsolidat, “[g]ħalhekk għandu jiġi determinat jekk ir-riżultat iwassalx biex jingħata lil impriża waħda jew aktar il-kontroll dirett jew indirett fuq l-attivitajiet ta’ impriża waħda jew aktar”. Din is-sentenza tikkonferma li r-“riżultat” għandu jiġi ddefinit fid-dawl tat-teħid tal-kontroll tal-impriża mmirata.

118

F’dan il-każ, dan ir-riżultat, jiġifieri l-akkwist tal-kontroll, inkiseb wara l-akkwist uniku ta’ Diċembru 2012.

119

Għaldaqstant u għall-kuntrarju ta’ dak li kkonfermat ir-rikorrenti, id-deċiżjoni kkontestata hija konformi mal-avviż ġurisdizzjonali kkonsolidat.

iii)

Fuq l-argumenti tar-rikorrenti li l-pożizzjoni tal-Kummissjoni tikkontradixxi l-ġurisprudenza tal-Qorti Ġenerali u l-prassi deċiżjonali tal-Kummissjoni

120

Barra minn hekk, ir-rikorrenti tikkonferma li r-raġunament tal-Kummissjoni fid-deċiżjoni kkontestata jikkontradixxi l-ġurisprudenza tal-Qorti Ġenerali u l-prassi deċiżjonali tal-Kummissjoni.

121

F’dan ir-rigward, jeħtieġ li jiġi rrilevat dan li ġej.

122

Ir-rikorrenti tibbaża ruħha, fl-ewwel lok, fuq is-sentenza tat-23 ta’ Frar 2006, Cementbouw Handel & Industrie vs Il-Kummissjoni (T-282/02, EU:T:2006:64).

123

Fil-kawża li tat lok għal dik is-sentenza sentenza, kienet qamet il-kwistjoni dwar jekk diversi gruppi ta’ tranżazzjonijiet jikkostitwixxux diversi konċentrazzjonijiet distinti jew konċentrazzjoni waħda (sentenza tat-23 ta’ Frar 2006, Cementbouw Handel & Industrie vs Il-Kummissjoni, T-282/02, EU:T:2006:64, punti 8, 45 u 91). Għaldaqstant, din il-kawża taqa’ taħt it-tieni ipoteżi kif iddefinita fil-punt 95 iktar ’il fuq, jiġifieri taħt dik tat-teħid ta’ kontroll ta’ diversi impriżi li, bħala tali, jistgħu jiġu assimilati ma’ konċentrazzjonijiet distinti. F’dan ir-rigward, jeħtieġ li jitfakkar li l-kawża odjerna ma taqax taħt din it-tieni ipoteżi (ara l-punt 99 iktar ’il fuq).

124

Il-Qorti Ġenerali kkonstatat li kienet il-Kummissjoni li kellha tevalwa jekk diversi tranżazzjonijiet “[kinux] ta’ natura unitarja b’tali mod li jikkostitwixxu konċentrazzjoni waħda fis-sens ta’ l-Artikolu 3 tar-Regolament Nru 4064/89” (sentenza tat-23 ta’ Frar 2006, Cementbouw Handel & Industrie vs Il-Kummissjoni, T-282/02, EU:T:2006:64, punt 105). Barra minn hekk, hija rrilevat li, “sabiex tiġi stabbilita n-natura unitarja tat-tranżazzjonijiet in kwistjoni, f’kull każ in kwistjoni [kellu] jiġi evalwat jekk dawn l-operazzjonijiet [kinux] interdipendenti b’mod li waħda ma [setgħetx] titwettaq mingħajr l-oħra” (sentenza tat-23 ta’ Frar 2006, Cementbouw Handel & Industrie vs Il-Kummissjoni, T-282/02, EU:T:2006:64, punt 107).

125

Ir-rikorrenti tibbaża ruħha fuq il-punt 107 tas-sentenza tat-23 ta’ Frar 2006, Cementbouw Handel & Industrie vs Il-Kummissjoni (T-282/02, EU:T:2006:64), u tikkonferma li minnu jirriżulta li diversi tranżazzjonijiet legalment distinti jkunu ta’ natura unitarja u b’hekk, jikkostitwixxu konċentrazzjoni unika skont ir-Regolament Nru 139/2004 jekk “jekk dawn [it-tranżazzjonijiet ikunu] interdipendenti b’mod li waħda ma tistax titwettaq mingħajr l-oħra”.

126

Madankollu, mis-sentenza tat-23 ta’ Frar 2006, Cementbouw Handel & Industrie vs Il-Kummissjoni (T-282/02, EU:T:2006:64) ma jistax jiġi dedott li, kull darba li diversi tranżazzjonijiet ikunu interdipendenti, allura neċessarjament dawn ikunu jikkostitwixxu konċentrazzjoni unika.

127

Hemm lok li jiġi rrilevat li, fil-punt 104 tas-sentenza tat-23 ta’ Frar 2006, Cementbouw Handel & Industrie vs Il-Kummissjoni (T-282/02, EU:T:2006:64), il-Qorti Ġenerali kkonstatat dan li ġej:

128

L-argument tar-rikorrenti, imqajjem waqt is-seduta, li mill-punt 104 tas-sentenza tat-23 ta’ Frar 2006, Cementbouw Handel & Industrie vs Il-Kummissjoni (T-282/02, EU:T:2006:64) jirriżulta li l-kwistjoni rilevanti hija dik dwar jekk il-kontroll jiġix akkwistat fi tmiem tas-serje ta’ tranżazzjonijiet, irrispettivament mill-mument li fih jiġi akkwistat il-kontroll, għandu jiġi miċħud. F’dan ir-rigward, hemm lok li jiġi enfasizzat li l-punt 104 ta’ din is-sentenza ma jsemmix l-akkwist tal-impriża mmirata li jista’ jitwettaq f’salt wieħed jew f’diversi stadji, iżda l-akkwist tal-kontroll li jista’ jitwettaq f’salt wieħed jew f’diversi stadji. Għaldaqstant, il-kwistjoni rilevanti ma hijiex dik tal-mument li fih jitwettaq l-akkwist tal-azzjonijiet kollha ta’ impriża mmirata, iżda dik tal-mument li fih jitwettaq l-akkwist. Jeħtieġ li jiġi rrilevat li meta, bħal f’dan il-każ, l-akkwist tal-kontroll esklużiv effettiv tal-unika impriża mmirata jkun twettaq permezz ta’ operazzjoni inizjali waħda, it-tranżazzjonijiet ulterjuri li bihom l-akkwirent jikseb partijiet addizzjonali minn din l-impriża ma jibqgħux rilevanti sabiex jinkiseb il-kontroll u b’hekk sabiex titwettaq il-konċentrazzjoni.

129

Fil-punt 108 tas-sentenza tat-23 ta’ Frar 2006, Cementbouw Handel & Industrie vs Il-Kummissjoni (T-282/02, EU:T:2006:64), il-Qorti Ġenerali kkonstatat li l-proċess li jikkonsisti fl-evalwazzjoni dwar jekk ir-tranżazzjonijiet kinux interdipendenti huwa intiż b’mod partikolari “sabiex tiggarantixxi lill-impriżi li jinnotifikaw operazzjoni ta’ konċentrazzjoni l-benefiċċju taċ-ċertezza legali għat-tranżazzjonijiet kollha li jagħmlu l-konċentrazzjoni”.

130

F’dan il-każ, ma jeżistux għadd ta’ tranżazzjonijiet “li jagħmlu [l-]operazzjoni [ta’ konċentrazzjoni]”, peress li l-konċentrazzjoni twettqet bl-akkwist uniku ta’ Diċembru 2012.

131

Fl-aħħar, il-Qorti Ġenerali rrilevat, fil-punt 109 tas-sentenza tat-23 ta’ Frar 2006, Cementbouw Handel & Industrie vs Il-Kummissjoni (T-282/02, EU:T:2006:64), li konċentrazzjoni setgħet “titwettaq ukoll fil-preżenza ta’ pluralità ta’ tranżazzjonijiet ġuridiċi formalment distinti meta dawk it-tranżazzjonijiet [kienu] interdipendenti b’tali mod li ma jitwettqux mingħajr l-oħrajn u li r-riżultat tagħhom [kien] jikkonsisti fl-għoti lil impriża waħda jew iżjed tal-kontroll ekonomiku, dirett jew indirett, fuq l-attività ta’ impriża waħda jew iżjed differenti” (korsiv miżjud)

132

Dan il-punt tas-sentenza tat-23 ta’ Frar 2006, Cementbouw Handel & Industrie vs Il-Kummissjoni (T-282/02, EU:T:2006:64), jikkonferma li r-riżultat ta’ “pluralità ta’ tranżazzjonijiet ġuridiċi formalment distinti” għandu jikkonsisti fl-għoti tal-kontroll ekonomiku fuq l-attività ta’ impriża waħda jew iktar. F’dan il-każ, l-akkwist tal-kontroll huwa r-riżultat ta’ tranżazzjoni waħda, jiġifieri tal-akkwist ta’ Diċembru 2012, u mhux ta’ diversi tranżazzjonijiet.

133

Minn dan li ntqal jirriżulta li mis-sentenza tat-23 ta’ Frar 2006, Cementbouw Handel & Industrie vs Il-Kummissjoni (T-282/02, EU:T:2006:64), ma jistax jiġi dedott li, f’sitwazzjoni li fiha l-akkwist tal-kontroll ta’ impriża waħda mmirata jkun twettaq permezz ta’ tranżazzjoni waħda, huwa neċessarju li din it-tranżazzjoni titqies bħala li tifforma parti minn konċentrazzjoni unika, meta x-xiri mill-ġdid ta’ azzjonijiet li jkun wassal għat-teħid tal-kontroll u offerta pubblika ta’ xiri obbligatorju ulterjuri jkunu interdipendenti.

134

Fit-tieni lok, ir-rikorrenti tibbaża ruħha fuq is-sentenza tas-6 ta’ Lulju 2010, Aer Lingus Group vs Il-Kummissjoni (T-411/07, EU:T:2010:281), u fuq id-deċiżjoni tal-Kummissjoni inkwistjoni fil-kawża li tat lok għal dik is-sentenza. Hija tirrileva li, f’din il-kawża, Ryanair Holdings plc (iktar ’il quddiem “Ryanair”) kienet akkwistat madwar 19 % tal-azzjonijiet ta’ Aer Lingus Group plc u ta’ Aer Lingus Ltd (iktar ’il quddiem, flimkien, “Aer Lingus”) u kienet, sussegwentement, nediet offerta pubblika, u li l-Kummissjoni, segwita f’dan mill-Qorti Ġenerali, qieset iż-żewġ tranżazzjonijiet bħala li jikkostitwixxu konċentrazzjoni unika. Skont ir-rikorrenti, minn dan jirriżulta li akkwist ta’ azzjonijiet qabel offerta pubblika u l-offerta pubblika stess għandhom jitqiesu bħala konċentrazzjoni unika.

135

Jeħtieġ li jiġi rrilevat li mill-punt 16 tas-sentenza tas-6 ta’ Lulju 2010, Aer Lingus Group vs Il-Kummissjoni (T-411/07, EU:T:2010:281), jirriżulta li l-Kummissjoni kienet qieset, fid-deċiżjoni tagħha li tiddikjara l-konċentrazzjoni prevista bħala inkompatibbli mas-suq intern, dan li ġej:

136

F’din il-kawża, Ryanair ma kinitx kisbet il-kontroll ta’ Aer Lingus bis-saħħa ta’ tranżazzjoni waħda qabel it-tnedija tal-offerta pubblika ta’ xiri. Kif irrilevat il-Kummissjoni, kienu l-akkwist tal-ewwel 19 % tal-kapital azzjonist ta’ Aer Lingus, magħqud flimkien mal-akkwist tal-azzjonijiet li Ryanair kienet tispera li tikseb bis-saħħa tal-offerta pubblika ta’ xiri, li tat lil Ryanair il-kontroll ta’ Aer Lingus. Finalment, Ryanair qatt ma akkwistat il-kontroll ta’ Aer Lingus, peress li l-offerta pubblika skadiet wara d-deċiżjoni tal-Kummissjoni li tiftaħ il-proċedura prevista fl-Artikolu 6(1)(c) tar-Regolament Nru 139/2004.

137

Għaldaqstant ma jistax jiġi konkluż minn din id-deċiżjoni tal-Kummissjoni li din tal-aħħar qieset li l-akkwist ta’ parti mill-kapital ta’ impriża bis-saħħa ta’ tranżazzjoni privata u offerta pubblika ta’ xiri għall-partijiet rimanenti kellhom dejjem jitqiesu bħala konċentrazzjoni unika, anki meta l-akkwist tal-parti mill-kapital bis-saħħa ta’ tranżazzjoni privata jkun ikkonferixxa lix-xerrej il-kontroll esklużiv tal-impriża mmirata qabel it-tnedija tal-offerta pubblika ta’ xiri.

138

Fis-sentenza tas-6 ta’ Lulju 2010, Aer Lingus Group vs Il-Kummissjoni (T-411/07, EU:T:2010:281), il-Qorti Ġenerali lanqas ma esprimiet ruħha fuq il-kwistjoni dwar jekk l-akkwist tal-kontroll esklużiv permezz ta’ tranżazzjoni privata waħda u offerta pubblika obbligatorja ulterjuri għandux jitqies bħala konċentrazzjoni unika.

139

Ir-rikorrenti tqis li, għalkemm il-Kummissjoni kienet applikat ir-raġunament segwit fil-punt 101 tad-deċiżjoni kkontestata fil-kawża li tat lok għas-sentenza tas-6 ta’ Lulju 2010, Aer Lingus Group vs Il-Kummissjoni (T-411/07, EU:T:2010:281), hija ma ħadet l-ebda kont tal-akkwisti tal-azzjonijiet ta’ Ryanair li twettqu bis-saħħa ta’ ftehim privat qabel it-tnedija tal-offerta pubblika, partikolarment peress li tali akkwisti privati ma wasslux għall-akkwist tal-kontroll tal-impriża mmirata.

140

Dan l-argument ma huwiex konvinċenti. Fil-fatt, kien ġustament il-fatt li, fil-kawża li tat lok għas-sentenza tas-6 ta’ Lulju 2010, Aer Lingus Group vs Il-Kummissjoni (T-411/07, EU:T:2010:281), l-akkwist privat ma wassalx għall-akkwist tal-kontroll tal-impriża mmirata li kellu l-konsegwenza li l-kontroll, li kieku nkiseb, kien ikun permezz ta’ diversi tranżazzjonijiet.

141

Fit-tielet lok, ir-rikorrenti tibbaża ruħha fuq id-deċiżjoni LGI/Telenet.

142

Madankollu, din il-kawża ma kinitx tikkonċerna l-każ ta’ operazzjoni inizjali waħda li biha x-xerrej ikun diġà akkwista l-kontroll ta’ impriża mmirata, segwita mit-tieni operazzjoni li biha dan l-istess xerrej ikun akkwista partijiet addizzjonali minn din l-istess impriża mmirata.

143

Fil-kawża li tat lok għad-deċiżjoni LGI/Telenet, l-ewwel operazzjoni kienet it-“tranżazzjoni Telenet”, li biha Telenet akkwistat lil UPC Belgium. Din l-ewwel operazzjoni ma kinitx tirrikjedi notifika, peress li ma kinitx tilħaq il-livelli minimi (ara l-punt 6 tad-deċiżjoni LGI/Telenet). It-tieni operazzjoni kienet it-“tranżazzjoni LGE”, li biha LGE akkwistat il-kontroll esklużiv ta’ Telenet, inkluż ta’ UPC Belgium (ara l-punt 7 tad-deċiżjoni LGI/Telenet). Il-Kummissjoni kkonkludiet li dawn it-tranżazzjonijiet, li kienu marbuta minn kundizzjonalità fattwali, kienu jikkostitwixxu konċentrazzjoni unika.

144

Għaldaqstant, il-fatti li taw lok għall-kawża li wasslet għad-deċiżjoni LGI/Telenet kienu kompletament differenti minn dawk li taw lok għas-sentenza odjerna. Għaldaqstant, ir-rikorrenti ma tistax tipprevalixxi ruħha b’suċċess mil-fatt li, fil-kawża li tat lok għad-deċiżjoni LGI/Telenet, il-Kummissjoni kkonkludiet favur l-eżistenza ta’ konċentrazzjoni unika, u lanqas li tislet minnha konklużjonijiet għall-kawża odjerna.

145

Fir-raba’ lok, ir-rikorrenti tinvoka d-deċiżjoni tal-Kummissjoni tal-20 ta’ Ottubru 2011 (Każ COMP/M.6263, Aelia/Aéroports de Paris/JV). Ir-rikorrenti tenfasizza li, f’din il-kawża, il-Kummissjoni qieset bħala konċentrazzjoni unika ż-żewġ l-ewwel stadji tat-tranżazzjoni.

146

F’dan ir-rigward, hemm lok li jiġi kkonstatat li din il-kawża ma kinitx tikkonċerna sitwazzjoni li fiha l-ewwel waħda mit-tranżazzjonijiet kienet suffiċjenti sabiex twassal għal tibdil fil-kontroll ta’ impriża mmirata u li t-tranżazzjonijiet ulterjuri kienu jikkonsistu sempliċiment fl-akkwist ta’ partijiet addizzjonali minn din l-istess impriża mmirata. Il-fatt li l-Kummissjoni qieset, f’din il-kawża, li l-ewwel żewġ tranżazzjonijiet kienu jikkostitwixxu konċentrazzjoni unika ma jfissirx għaldaqstant li hija qieset li t-teħid tal-kontroll esklużiv ta’ impriża mmirata permezz ta’ tranżazzjoni waħda ta’ akkwist ta’ azzjonijiet mingħand bejjiegħ wieħed, minn naħa, u t-tranżazzjonijiet ulterjuri ta’ xiri ta’ partijiet addizzjonali tal-impriża mmirata, min-naħa l-oħra, setgħu jikkostitwixxu konċentrazzjoni unika.

147

Jeħtieġ li jiġi enfasizzat li r-rikorrenti ma tidentifika l-ebda eżempju fil-prassi deċiżjonali tal-Kummissjoni jew fil-ġurisprudenza tal-qrati tal-Unjoni Ewropea li fiha ġie kkonstatat li tranżazzjoni ta’ akkwist privat minn bejjiegħ wieħed li tikkonferixxi lilu biss il-kontroll esklużiv ta’ impriża mmirata, minn naħa, u offerta pubblika ta’ xiri ulterjuri għall-azzjonijiet rimanenti ta’ din l-impriża mmirata, min-naħa l-oħra, jikkostitwixxu konċentrazzjoni unika. B’mod iktar ġenerali, hija ma tipprovdi l-ebda eżempju li fih diversi tranżazzjonijiet ta’ xiri marbuta ma’ partijiet minn impriża mmirata waħda ġew meqjusa bħala li jikkostitwixxu konċentrazzjoni unika meta l-kontroll esklużiv tal-impriża mmirata kien ġie akkwistat bis-saħħa tal-ewwel operazzjoni ta’ xiri.

iv)

Fuq l-argumenti tar-rikorrenti li l-pożizzjoni tal-Kummissjoni tikkontradixxi l-premessa 20 tar-Regolament Nru 139/2004

148

Barra minn hekk, ir-rikorrenti tikkonferma li r-raġunament segwit mill-Kummissjoni fid-deċiżjoni kkontestata tikkontradixxi l-premessa 20 tar-Regolament Nru 139/2004. Hija tenfasizza li din il-premessa tindika li “[j]eħtieġ, barra minn hekk, li jitqiesu bħala konċentrazzjoni unika tranżazzjonijiet li huma marbuta flimkien mill-qrib sa fejn dawn huma suġġetti għal rabta kundizzjonali jew huma fil-forma ta’ serje ta’ tranżazzjonijiet f’titoli mwettqa f’terminu raġonevolment qasir”. Skont ir-rikorrenti, din il-premessa tikkonferma l-intenzjoni tal-leġiżlatur li l-Kummissjoni għandha tieħu inkunsiderazzjoni r-rabta sostanzjali bejn id-diversi stadji li jikkostitwixxu tranżazzjoni, iktar mill-istruttura formali ta’ din tal-aħħar.

149

Jeħtieġ li jitfakkar li r-rikorrenti bbażat ruħha fuq l-ewwel possibbiltà msemmija fit-tielet sentenza tal-premessa 20 tar-Regolament Nru 139/2004, dwar tranżazzjonijiet li huma suġġetti għal rabta kundizzjonali (ara l-punt 97 iktar ’il fuq).

150

Hemm lok li jiġi kkonstatat li l-unika sentenza, qasira ħafna, ċċitata fil-punt 148 iktar ’il fuq, ma hijiex definizzjoni eżawrjenti tal-kundizzjonijiet li fihom żewġ tranżazzjonijiet jikkostitwixxu konċentrazzjoni unika. F’dan ir-rigward, jeħtieġ li jiġi rrilevat li premessa ta’ regolament, għalkemm tista’ tippermetti li tiġi ċċarata l-interpretazzjoni li għandha tingħata lil regola legali, ma tistax tikkostitwixxi hija stess tali regola (ara s-sentenza tal-11 ta’ Ġunju 2009, X, C-429/07, EU:C:2009:359, punt 31 u l-ġurisprudenza ċċitata). Il-preambolu ta’ att tal-Unjoni ma għandux valur legali vinkolanti (ara s-sentenza tad-19 ta’ Ġunju 2014, Karen Millen Fashions, C-345/13, EU:C:2014:2013, punt 31 u l-ġurisprudenza ċċitata).

151

Barra minn hekk, jekk is-sentenza ċċitata fil-punt 148 iktar ’il fuq titqies bħala definizzjoni eżawrjenti tal-kundizzjonijiet li fihom żewġ tranżazzjonijiet jikkostitwixxu konċentrazzjoni unika, dan iwassal sabiex it-tranżazzjonijiet kollha li jkunu suġġetti għal rabta kundizzjonali jew li jkunu fil-forma ta’ serje ta’ tranżazzjonijiet f’titoli f’terminu raġonevolment qasir ikollhom jiġu ttrattati bħala konċentrazzjoni unika, u dan anki meta dawn ir-tranżazzjonijiet, meħudin flimkien, ma jkunux suffiċjenti sabiex jittrasferixxu l-kontroll tal-impriża mmirata, riżultat li ma jkun jagħmel l-ebda sens.

152

Mill-premessa 20 tar-Regolament Nru 139/2004 jirriżulta li l-leġiżlatur kellu l-intenzjoni li jikkonferma l-kunċett ta’ konċentrazzjoni unika. Madankollu minn din il-premessa ma jirriżultax li l-leġiżlatur xtaq jestendi dan il-kunċett.

153

Għaldaqstant l-argumenti tar-rikorrenti li l-pożizzjoni tal-Kummissjoni tikkontradixxi l-premessa 20 tar-Regolament Nru 139/2004 għandhom jiġu miċħuda.

v)

Fuq l-argumenti tar-rikorrenti li l-pożizzjoni tal-Kummissjoni tikkontradixxi l-prassi fl-Istati Membri

154

Ir-rikorrenti tqis li r-raġunament segwit mill-Kummissjoni fid-deċiżjoni kkontestata jikkontradixxi “il-prassi fl-Istati Membri”. F’dan ir-rigward, ir-rikorrenti tiddikjara li “[i]d-drittijiet nazzjonali jirriflettu wkoll il-prinċipju li akkwist privat ta’ sehem ta’ kontroll, segwit minn offerta pubblika għall-azzjonijiet rimanenti, għandu jitqies bħala konċentrazzjoni unika”.

155

Madankollu, l-unika dritt nazzjonali li b’mod konkret tagħmel riferiment għalih ir-rikorrenti huwa d-dritt Franċiż. Hija tirrileva li, skont ittra tal-ministru tal-ekonomija, tal-finanzi u tal-industrija Franċiż tat-18 ta’ Novembru 2002 lill-kunsill tal-kumpannija Atria Capital Partenaires, dwar konċentrazzjoni fis-settur tal-parrukkerija domiċiljari (Kawża C2002-39), “l-akkwist permezz ta’ ftehim reċiproku ta’ parteċipazzjoni msejjaħ ‘ta’ kontroll’ segwit bl-obbligu li ssir [offerta pubblika ta’ xiri] fuq il-kapital rimanenti” jikkostitwixxu żewġ stadji tal-istess konċentrazzjoni.

156

F’dan ir-rigward, il-Kummissjoni tenfasizza li l-awtoritajiet Franċiżi jikkummentaw fuq il-portata tal-Artikolu 6 tad-Digriet Nru 2002-689, tat-30 ta’ April 2002, li jistabbilixxi l-kundizzjonijiet għall-applikazzjoni tal-ktieb IV tal-kodiċi tal-kummerċ marbut mal-libertà tal-prezz u mal-kompetizzjoni (JORF tat-3 ta’ Mejju 2002, p. 8055) (iktar ’il quddiem id-“digriet”), li għandu portata materjalment iktar wiesgħa mill-Artikolu 7(2) tar-Regolament Nru 139/2004. B’hekk, il-fatt li l-awtoritajiet Franċiżi kienu qiesu li l-Artikolu 6 tad-digriet kien japplika għall-akkwist ta’ azzjonijiet f’suq irregolat minn ftehim privat li jiskatta offerta pubblika ma jinċidix fuq l-interpretazzjoni tal-Artikolu 7(2) tar-Regolament Nru 139/2004.

157

Ir-rikorrenti tirrifjuta li, fl-ittra tal-ministru tal-ekonomija, tal-finanzi u tal-industrija Franċiż tat-18 ta’ Novembru 2002, dan tal-aħħar qabel xejn stabbilixxa li l-akkwist inizjali u l-offerta pubblika obbligatorja li segwietu kienu jikkostitwixxu konċentrazzjoni unika, u li kien biss fit-tieni lok li sar eżami tal-Artikolu 6 tad-digriet.

158

Barra minn hekk, hija ssostni li, skont il-ġurisprudenza, u b’mod partikolari, is-sentenza tas-7 ta’ Novembru 2013, Romeo (C-313/12, EU:C:2013:718, punt 22), “il-kunċetti meħuda mid-dritt tal-Unjoni jingħataw interpretazzjoni uniformi, meta leġiżlazzjoni nazzjonali tikkonforma ruħha, fir-rigward tas-soluzzjonijiet li hija tadotta fir-rigward ta’ sitwazzjonijiet li ma jaqgħux taħt il-kamp ta’ applikazzjoni tal-att tal-Unjoni kkonċernat, ma’ dawk stabbiliti mill-imsemmi att” u li l-ġustifikazzjoni sottostanti hija li “sabiex jiżguraw li s-sitwazzjonijiet interni u s-sitwazzjonijiet irregolati mid-dritt tal-Unjoni jingħataw trattament identiku, indipendentement mill-kundizzjonijiet li fihom għandhom jiġu applikati d-dispożizzjonijiet jew il-kunċetti msemmija fid-dritt tal-Unjoni”.

159

F’dan ir-rigward, hemm lok li jiġi rrilevat li l-punt 22 tas-sentenza tas-7 ta’ Novembru 2013, Romeo (C-313/12, EU:C:2013:718), għandu jinqara’ fid-dawl tal-punt 23 ta’ din l-istess sentenza, li jiddikjara li “[d]an huwa l-każ meta d-dispożizzjonijiet tad-dritt tal-Unjoni inkwistjoni jkunu saru applikabbli għal tali sitwazzjonijiet permezz tad-dritt nazzjonali b’mod dirett u mhux kundizzjonali”.

160

Ir-rikorrenti ma tippreżenta l-ebda element li jippermetti li jitqies li dan huwa l-każ fil-kawża odjerna. Hija tirreferi biss, fil-punt 19 tar-replika, għal ċerti sforzi mil-leġiżlatur Franċiż u mill-awtoritajiet Franċiżi tal-kompetizzjoni bil-għan li jiġu allinjati ċerti kunċetti marbuta mal-kontroll tal-konċentrazzjonijiet użati fil-kodiċi tal-kummerċ Franċiż ma’ dawk użati fir-Regolament Nru 139/2004 u fl-avviżi differenti ppubblikati mill-Kummissjoni. Tali sforzi ta’ allinjament ma jimplikawx li d-dispożizzjonijiet tad-dritt tal-Unjoni saru applikabbli b’mod dirett u mhux kundizzjonali.

161

Fi kwalunkwe każ, id-dritt nazzjonali jew il-prassi deċiżjonali ta’ Stat Membru ma jistgħux jorbtu lill-Kummissjoni jew lill-qrati tal-Unjoni. Skont il-ġurisprudenza, l-ordinament ġuridiku tal-Unjoni ma huwiex intiż bħala prinċipju li jiddefinixxi l-kunċetti tiegħu billi jispira ruħu minn ordinament ġuridiku nazzjonali wieħed jew iktar dment li dan ma jkunx speċifikat b’mod espress (ara s-sentenza tat-22 ta’ Mejju 2003, Il-Kummissjoni vs Il-Ġermanja, C-103/01, EU:C:2003:301, punt 33 u l-ġurisprudenza ċċitata).

162

Barra minn hekk, f’dan il-każ, jeħtieġ li jiġi rrilevat, li l-kuntest legali eżistenti fi Franza huwa differenti minn dak tad-dritt tal-Unjoni.

163

Fil-fatt, l-Artikolu 6 tad-digriet huwa redatt kif ġej:

164

B’hekk, id-dritt Franċiż huwa sinjifikattivament differenti dwar dan il-punt mid-dritt tal-Unjoni. Fil-fatt, skont id-dritt tal-Unjoni, it-trasferiment tat-titoli huwa suffiċjenti sabiex titwettaq konċentrazzjoni (ara l-punt 58 iktar ’il fuq), filwaqt li, skont id-dritt Franċiż, it-twettiq isir biss fil-mument li jiġu eżerċitati d-drittijiet marbuta ma’ dawn it-titoli.

165

Għaldaqstant, il-pożizzjoni adottata fl-ittra tal-ministru tal-ekonomija, tal-finanzi u tal-industrija Franċiż tat-18 ta’ Novembru 2002 ma twassalx sabiex, permezz tal-applikazzjoni tal-kunċett ta’ konċentrazzjoni unika, ikun permess li operatur jakkwista l-kontroll ta’ impriża mmirata mingħajr awtorizzazzjoni minn qabel. Fil-fatt, minn din l-ittra, jirriżulta b’mod ċar li “is-sospensjoni tat-twettiq effettiv tal-operazzjoni fis-sens tal-Artikolu 6 […] tapplika kemm għall-eżerċizzju tad-drittijiet marbuta mat-titoli akkwistati mhux minn fuq is-suq kif ukoll għall-dak tad-drittijiet marbuta mat-titoli suġġetti għall-offerta pubblika”.

166

Madankollu, f’dan il-każ, ir-rikorrenti tibbaża ruħha fuq il-kunċett ta’ “konċentrazzjoni unika” speċifikament sabiex issostni li hija kellha dritt li twettaq l-akkwist ta’ Diċembru 2012 mingħajr notifika jew awtorizzazzjoni minn qabel.

167

Għaldaqstant ir-rikorrenti ma tistax tinvoka b’suċċess il-prassi segwita fi Franza.

vi)

Fuq l-argumenti tar-rikorrenti li l-Kummissjoni interpretat b’mod żbaljat ir-raġuni għall-eżistenza tal-Artikolu 7(2) tar-Regolament Nru 139/2004

168

Ir-rikorrenti tikkonferma li kien b’mod żbaljat li l-Kummissjoni qieset, fil-punt 103 tad-deċiżjoni kkontestata, li l-Artikolu 7(2) tar-Regolament Nru 139/2004 ma kienx maħsub li japplika għal sitwazzjonijiet li fihom kien sempliċi li jinkiseb il-kontroll effettiv.

169

F’dan ir-rigward, jeħtieġ li jiġi rrilevat li l-punt 103 tad-deċiżjoni kkontestata huwa redatt kif ġej:

170

Għaldaqstant, il-Kummissjoni ma kkonfermatx li l-fatt waħdieni li huwa faċli li jiġi stabbilit l-akkwist tal-kontroll jeskludi, b’mod ġenerali, l-applikazzjoni tal-Artikolu 7(2) tar-Regolament Nru 139/2004. Fil-punt 103 tad-deċiżjoni kkontestata, il-Kummissjoni bbażat ruħha wkoll fuq il-fatt li l-akkwist ta’ volum kbir ta’ azzjonijiet li jikkonferixxi kontroll esklużiv effettiv fuq il-kumpannija mmirata kien ipprovjena minn bejjiegħ wieħed.

171

Barra minn hekk, jeħtieġ li jiġi kkonstatat li, fil-punt 102 tad-deċiżjoni kkontestata, il-Kummissjoni rrilevat li l-Artikolu 7(2) tar-Regolament Nru 139/2004 kien maħsub “li jkopri sitwazzjonijiet li fihom huwa diffiċli li jiġi ddeterminat liema azzjonijiet jew liema volumi ta’ azzjonijiet speċifiċi akkwistati permezz ta’ diversi azzjonisti preċedenti ipoġġu lill-akkwirent f’sitwazzjoni ta’ kontroll fattwali tal-kumpannija mmirata” u li dan kien intiż “li jipprovdi livell suffiċjenti ta’ ċertezza legali f’każ li l-offerti pubbliċi ta’ xiri jew ta’ skambju jew ta’ teħid gradwali, billi tiġi ppreżervata b’dan il-mod, il-likwidità tal-[B]oroż fis-swieq tal-azzjonijiet, billi jiġu protetti l-offerenti minn ksur involontarju u imprevist tal-obbligu ta’ status quo”.

172

Madankollu, hemm lok li jitqies li, permezz ta’ dan, il-Kummissjoni ma kkonfermatx li kien hemm lok li tiġi limitata l-applikazzjoni tal-Artikolu 7(2) tar-Regolament Nru 139/2004 għal sitwazzjonijiet li fihom jeżistu diffikultajiet konkreti sabiex jiġi stabbilit liema azzjonijiet akkwistati permezz ta’ diversi azzjonisti preċedenti jpoġġu lill-akkwirent f’sitwazzjoni ta’ kontroll fattwali tal-kumpannija mmirata. Fid-deċiżjoni kkontestata, il-Kummissjoni ma bbażatx ruħha fuq iċ-ċirkustanza ewlenija li kien faċli li jiġi stabbilit li l-akkwist ta’ Diċembru 2012 kien jikkonferixxi lir-rikorrenti l-kontroll esklużiv effettiv ta’ Morpol bil-għan li teskludi l-applikazzjoni tal-Artikolu 7(2) tar-Regolament Nru 139/2004.

173

Ir-rikorrenti tipprovdi diversi eżempji sabiex turi li, anki f’sitwazzjonijiet li fihom l-Artikolu 7(2) tar-Regolament Nru 139/2004 huwa applikabbli, jista’ jkun faċli li jiġi stabbilit l-akkwist tal-kontroll. Madankollu, peress li l-Kummissjoni ma kkonfermatx, fid-deċiżjoni kkontestata, li l-fatt waħdieni li jkun faċli li jiġi stabbilit l-akkwist tal-kontroll jeskludi l-applikazzjoni applikazzjoni tal-Artikolu 7(2) tar-Regolament Nru 139/2004, l-argumenti mqajma mir-rikorrenti f’dan ir-rigward ma jistgħux juru l-eżistenza ta’ żball imwettaq mill-Kummissjoni fid-deċiżjoni kkontestata.

174

Barra minn hekk, ir-rikorrenti ssostni li r-raġuni vera għall-eżistenza tal-Artikolu 7(2) tar-Regolament Nru 139/2004 tikkorrispondi għal dak li ġie mtenni espressament mill-Kummissjoni fil-punt 66 tal-espożizzjoni tal-motivi tal-proposta tagħha għal-Regolament tal-Kunsill dwar il-kontroll tal-konċentrazzjonijiet bejn impriżi [COM(2002) 711 finali] (ĠU C 20, p. 4) (iktar ’il quddiem il-“proposta għal regolament”). Fih hemm indikat:

175

Minn din il-proposta jirriżulta li l-Kummissjoni tissuġġerixxi li testendi l-kamp ta’ applikazzjoni tal-Artikolu 7(2) tar-Regolament Nru 139/2004 għat-“teħid gradwali”. Madankollu, f’dan il-każ, it-teħid ta’ Morpol mir-rikorrenti ma kienx “gradwali”. Fil-fatt, l-akkwist tal-kontroll ta’ Morpol ma sarx f’diversi stadji. Għall-kuntrarju, it-teħid tal-kontroll twettaq bis-saħħa ta’ tranżazzjoni waħda ta’ xiri privata mingħand bejjiegħ wieħed, li ġiet konkluża qabel it-tnedija tal-offerta pubblika ta’ xiri għall-azzjonijiet rimanenti ta’ Morpol.

176

Barra minn hekk, jeħtieġ li jitfakkar li r-rikorrenti speċifikat li hija kienet tibbaża r-raġunament tagħha fuq l-ewwel każ previst mill-Artikolu 7(2) tar-Regolament Nru 139/2004, jiġifieri dak marbut ma’ offerta pubblika ta’ xiri jew ta’ skambju (ara l-punti 66 u 67 iktar ’il fuq). Għall-kuntrarju, mill-punt 66 tal-espożizzjoni tal-motivi tal-proposta għal regolament jirriżulta li l-Kummissjoni kienet tipproponi li żżid it-tieni alternattiva li hija issa prevista fl-Artikolu 7(2) tar-Regolament Nru 139/2004, marbuta ma’ serji ta’ tranżazzjonijiet fit-titoli, bil-għan li tiġi eliminata kull inċertezza legali. Fid-dawl tal-fatt li l-konċentrazzjoni inkwistjoni taqa’, skont ir-rikorrenti, taħt il-kamp ta’ applikazzjoni tal-ewwel każ previst mill-Artikolu 7(2) tar-Regolament Nru 139/2004, ma huwiex ċar liema argument ir-rikorrenti tixtieq tislet mill-fatt li l-Kummissjoni pproponiet li żżid it-tieni alternattiva bil-għan li telimina kull inċertezza legali.

177

Ir-rikorrenti tibbaża ruħha wkoll fuq il-punt 134 tal-ktieb l-aħdar dwar ir-reviżjoni tar-Regolament Nru 4064/89 (COM/2001/0745 finali) (iktar ’il quddiem il-“Ktieb l-aħdar”), li huwa redatt kif ġej:

178

F’dan ir-rigward, qabel xejn, hemm lok li jiġi osservat li dokument tat-tip tal-ktieb l-aħdar huwa biss dokument li l-għan tiegħu huwa li jistimula riflessjoni fil-livell Ewropew fuq suġġett partikolari.

179

Barra minn hekk jeħtieġ li jiġi rrilevat li mill-ewwel sentenza tal-punt 134 tal-ktieb l-aħdar jirriżulta li dan il-punt jikkonċerna l-istanzi ta’ teħid “gradwali”, li jikkostitwixxu “eżempju ta’ konċentrazzjoni li tinvolvi tranżazzjonijiet multipli”. Madankollu, hemm lok li jitfakkar li, f’dan il-każ, il-konċentrazzjoni ma kinitx “gradwali” u li l-kontroll ta’ Morpol ġie akkwistat bis-saħħa ta’ tranżazzjoni waħda u mhux permezz ta’ tranżazzjonijiet multipli.

180

Barra minn hekk, il-punt 134 tal-ktieb l-aħdar isemmi “l-intenzjoni li jittieħed il-kontroll tal-kumpannija mmirata” inkonnessjoni ma’ “ċertu numru ta’ akkwist[i] ta’ drittijiet, legalment distinti”. F’dan il-każ, l-unika akkwist ta’ Diċembru 2012 twettaq bl-intenzjoni li jittieħed il-kontroll ta’ Morpol. Ċertament, ir-rikorrenti ipproċedew bix-xiri totali ta’ Morpol u, sabiex jaslu għal dan, kienu neċessarji diversi tranżazzjonijiet ta’ xiri, jiġifieri b’mod partikolari, l-akkwist ta’ Diċembru 2012 u x-xiri mingħand diversi azzjonisti ta’ Morpol fil-kuntest tal-offerta pubblika ta’ xiri. Madankollu, peress li r-rikorrenti kellha l-kontroll esklużiv ta’ Morpol mit-twettiq tal-akkwist ta’ Diċembru 2012, it-tranżazzjonijiet ta’ xiri ulterjuri ma twettqux bl-intenzjoni li jittieħed il-kontroll tal-kumpannija mmirata.

181

Barra minn hekk, jeħtieġ ukoll li jiġi kkonstatat ġustament li l-ktieb l-aħdar jirrileva li “[f]ix-xenarji ta’ dan it-tip, ikun ftit li xejn prattiku u artifiċjali li jitqies li l-konċentrazzjoni sseħħ max-xiri tal-azzjoni jew tal-grupp ta’ azzjonijiet li jikkonferixxu lill-akkwirent il-kontroll (fattwali) tal-impriża mmirata”. Madankollu, din id-dikjarazzjoni tikkonċerna biss ix-xenarju ta’ teħid “gradwali”. Effettivament, meta jkunu neċessarji diversi akkwisti ta’ azzjonijiet jew ta’ gruppi ta’ azzjonijiet sabiex jinkiseb il-kontroll tal-impriża mmirata, ikun artifiċjali li jitqies, b’mod iżolat, ix-xiri tal-azzjoni jew tal-grupp ta’ azzjonijiet “deċiżiv” bħala konċentrazzjoni.

182

Madankollu, f’sitwazzjoni bħal dik f’dan il-każ, li fih il-kontroll esklużiv tal-unika impriża mmirata inkiseb mingħand bejjiegħ wieħed permezz ta’ operazzjoni inizjali waħda, ma huwa bl-ebda mod artifiċjali li din it-tranżazzjoni titqies bħala li tikkostitwixxi, waħedha, konċentrazzjoni.

183

Barra minn hekk, ir-rikorrenti tenfasizza li l-għan tal-estensjoni tad-deroga prevista fl-Artikolu 7(2) tar-Regolament Nru 139/2004 kien li tiġi eliminata kull inċertezza legali (ara l-punt 174 iktar ’il fuq). Fl-opinjoni tagħha, mill-punt 134 tal-ktieb l-aħdar jirriżulta li l-Artikolu 7(2) tar-Regolament Nru 139/2004 għandu japplika anki għal struttura ta’ tranżazzjonijiet sempliċi sabiex tiffaċilita l-offerti pubbliċi u t-teħid gradwali.

184

F’dan ir-rigward, jeħtieġ li jiġi rrilevat li, ċertament, l-Artikolu 7(2) tar-Regolament Nru 139/2004 jista’ japplika anki fil-każ ta’ struttura ta’ tranżazzjonijiet sempliċi. Madankollu, F’dan il-każ, ma hijiex is-sempliċità tat-tranżazzjoni bħala tali li teskludi l-applikabbiltà tal-Artikolu 7(2) tar-Regolament Nru 139/2004, iżda l-fatt li l-kontroll diġà ġie akkwistat mingħand bejjiegħ wieħed permezz tal-ewwel operazzjoni.

185

Barra minn hekk, hemm lok li jiġi enfasizzat li, skont l-Artikolu 5 tad-Direttiva 2004/25/KE tal-Parlament Ewropew u tal-Kunsill, tal-21 ta’ April 2004, fuq offerti ta’ xiri (ĠU Edizzjoni Speċjali bil-Malti, Kapitolu 17, Vol. 2, p. 20), l-Istati Membri huma obbligati li jiżguraw li persuna li tkun kisbet il-kontroll ta’ kumpannija, bis-saħħa ta’ akkwist ta’ titoli, tkun obbligata li tagħmel offerta bil-għan li jiġu protetti l-azzjonisti minoritarji ta’ din il-kumpannija. Din l-offerta għandha tkun indirizzata lid-detenturi kollha ta’ dawn it-titoli u tkun tirrigwarda l-azzjonijiet kollha tagħhom. Minn dan isegwi li l-obbligu ta’ impriża, li tkun kisbet titoli li jagħtuha l-kontroll ta’ impriża mmirata bis-saħħa ta’ akkwist privat, li tippreżenta offerta pubblika li tirrigwarda l-azzjonijiet rimanenti tal-impriża mmirata, tikkonċerna l-Istati Membri kollha tal-Unjoni.

186

Jekk jiġi segwit ir-raġunament tar-rikorrenti, li akkwist tal-kontroll permezz ta’ tranżazzjoni waħda privata, segwit minn offerta pubblika obbligatorja, jikkostitwixxu konċentrazzjoni unika, dan ikollu l-konsegwenza li, f’każ ta’ konċentrazzjonijiet li jinvolvu kumpanniji elenkati f’borża li tinsab fl-Istati Membri, l-akkwist privat ta’ titoli li jikkonferixxu l-kontroll ikun dejjem kopert mill-eċċezzjoni prevista fl-Artikolu 7(2) tar-Regolament Nru 139/2004. Fil-fatt, jeżisti dejjem l-obbligu li tiġi ppreżentata offerta pubblika ta’ xiri li, skont ir-raġunament tar-rikorrenti, tifforma parti minn konċentrazzjoni unika li tiġbor fiha x-xiri li jikkonferixxi l-kontroll kif ukoll l-offerta pubblika. Dan ikollu l-konsegwenza li jestendi wisq il-kamp ta’ applikazzjoni tal-eċċezzjoni prevista fl-Artikolu 7(2) tar-Regolament Nru 139/2004.

187

Fir-rigward tal-argument tar-rikorrenti li r-raġuni għall-eżistenza tal-Artikolu 7(2) tar-Regolament Nru 139/2004 hija li jiġu ffaċilitati l-offerti pubbliċi u t-teħid gradwali, fl-ewwel lok, jeħtieġ li jitfakkar li l-Kummissjoni ma mponietx fuqha multa minħabba t-twettiq tal-offerta pubblika ta’ xiri, iżda minħabba t-twettiq tal-akkwist ta’ Diċembru 2012. Fit-tieni lok, jeħtieġ li jitfakkar li, kif ġie kkonstatat fil-punt 175 iktar ’il fuq, f’dan il-każ, it-teħid ma kienx “gradwali”.

188

Ma jidhirx li l-pożizzjoni adottata mill-Kummissjoni fid-deċiżjoni kkontestata tmur kontra prinċipju ta’ ċertezza legali. Hemm lok li jitfakkar li s-sitwazzjoni ineżami ma hijiex koperta mill-kliem tal-Artikolu 7(2) tar-Regolament Nru 139/2004 (ara l-punti 68 sa 83 iktar ’il fuq). Il-fatt li l-Kummissjoni ma estendietx il-kamp ta’ applikazzjoni tal-kunċett ta’ “konċentrazzjoni unika” bil-għan li tkopri sitwazzjonijiet li fihom il-kontroll ta’ impriża mmirata waħda jiġi akkwistat bis-saħħa ta’ operazzjoni inizjali waħda ma jmurx kontra l-prinċipju ta’ ċertezza legali.

189

Anki jekk isir riferiment għall-ktieb l-aħdar sabiex tiġi ddeterminata r-raġuni għall-eżistenza tal-Artikolu 7(2) tar-Regolament Nru 139/2004, kif propost mir-rikorrenti, ma jidhirx li tmur kontra r-raġuni għall-eżistenza ta’ din id-dispożizzjoni l-esklużjoni mill-kamp ta’ applikazzjoni tagħha, sitwazzjoni li fiha impriża takkwista l-kontroll esklużiv tal-impriża mmirata waħda bis-saħħa ta’ operazzjoni inizjali ta’ xiri ta’ azzjonijiet mingħand bejjiegħ wieħed, anki jekk dan jiġi segwit minn offerta pubblika obbligatorja.

190

Barra minn hekk, ir-rikorrenti tikkonferma li l-interpretazzjoni mogħtija mill-Kummissjoni, fil-punti 102 u 103 tad-deċiżjoni kkontestata, tar-raġuni għall-eżistenza tal-Artikolu 7(2) tar-Regolament Nru 139/2004 hija kompatibbli mal-interpretazzjoni mogħtija mill-Qorti Ġenerali fis-sentenza tas-6 ta’ Lulju 2010, Aer Lingus Group vs Il-Kummissjoni (T-411/07, EU:T:2010:281, punt 83). Ir-rikorrenti tirrileva li, f’din is-sentenza, il-Qorti Ġenerali “ikkonfermat l-approċċ tal-Kummissjoni li jikkonsisti fl-applikazzjoni tal-Artikolu 7(2) tar-Regolament [Nru 139/2004] għall-akkwist ta’ sehem minoritarju ta’ 19 % f’Aer Lingus li seħħ qabel it-tnedija ta’ offerta pubblika, liema akkwist hija qisitu bħala li huwa ta’ natura unitarja u li jikkostitwixxi konċentrazzjoni unika, minkejja li kien bla dubju sempliċi li jiġi konkluż li tali sehem minoritarju ma kienx jikkonferixxi l-kontroll”.

191

F’dan ir-rigward, jeħtieġ li jiġi rrilevat li, fis-sentenza tas-6 ta’ Lulju 2010, Aer Lingus Group vs Il-Kummissjoni (T-411/07, EU:T:2010:281, punt 83), il-Qorti Ġenerali rrilevat li “l-akkwist ta’ holding li fih innifsu ma jagħtix il-kontroll fis-sens tal-Artikolu 3 tar-Regolament [Nru 139/2004] jista’ jaqa’ taħt il-kamp ta’ applikazzjoni tal-Artikolu 7 ta’ dan ir-Regolament”. Minn din is-sentenza jirriżulta li huwa possibbli li l-akkwist ta’ sehem minoritarju, li ma jikkonferixxix il-kontroll tal-impriża mmirata, segwit minn offerta pubblika ta’ xiri, jista’ jkun jifforma parti minn konċentrazzjoni unika li taqa’ fil-kamp ta’ applikazzjoni tal-Artikolu 7(2) tar-Regolament Nru 139/2004. Madankollu, il-Qorti Ġenerali ma esprimietx ruħha fuq sitwazzjoni li fiha l-ewwel operazzjoni kienet diġà tikkonferixxi l-kontroll tal-impriża mmirata (ara l-punt 138 iktar ’il fuq).

192

Hemm lok li jiġi kkonstatat li, fil-każ ta’ akkwist ta’ sehem minoritarju, li ma jikkonferixxix il-kontroll tal-impriża mmirata u li huwa segwit minn offerta pubblika ta’ xiri, iż-żewġ tranżazzjonijiet jistgħu jiġu implementati bl-intenzjoni li jinkiseb il-kontroll tal-impriża mmirata. Madankollu, f’dan il-każ, peress li l-operazzjoni inizjali kienet diġà kkonferixxiet lir-rikorrenti, il-kontroll esklużiv effettiv ta’ Morpol, huwa eskluż li l-offerta pubblika ta’ xiri ġiet mnedija bl-intenzjoni li jinkiseb il-kontroll ta’ Morpol (ara l-punt 180 iktar ’il fuq).

193

Għaldaqstant hemm lok li jiġi miċħud l-argument tar-rikorrenti bbażat fuq is-sentenza tas-6 ta’ Lulju 2010, Aer Lingus Group vs Il-Kummissjoni (T-411/07, EU:T:2010:281).

194

Barra minn hekk, ir-rikorrenti tikkonferma li l-Artikolu 7(2) tar-Regolament Nru 139/2004 għandu jiġi interpretat favur tagħha minħabba n-natura penali tal-multa, fis-sens tal-Artikolu 6 tal-Konvenzjoni Ewropea għall-Protezzjoni tad-Drittijiet tal-Bniedem u tal-Libertajiet Fundamentali, iffirmata f’Ruma fl-4 ta’ Novembru 1950 (iktar ’il quddiem il-“KEDB”). Fl-opinjoni tagħha, id-deċiżjoni kkontestata kienet tikser il-prinċipju li ma tistax tiġi applikata b’mod estensiv għad-detriment tal-persuna mixlija. L-interpretazzjoni tal-Artikolu 7(2) tar-Regolament Nru 139/2004, kif mogħtija fid-deċiżjoni kkontestata, timplika l-użu ta’ kunċetti tant wiesgħa u ta’ kriterji tant vagi li d-dispożizzjoni penali inkwistjoni ma tissodisfax ir-rekwiżiti tal-KEDB inkonnessjoni maċ-ċarezza u l-prevedibbiltà l-effetti tagħha.

195

Il-Kummissjoni tenfasizza li, skont l-Artikolu 14(4) tar-Regolament Nru 139/2004, il-multi imposti skont dan l-artikolu ma humiex ta’ natura penali.

196

Jeħtieġ li jiġi rrilevat, anki jekk jiġi preżunt li s-sanzjonijiet previsti fl-Artikolu 14(2) tar-Regolament Nru 139/2004 kienu ta’ natura penali, xorta hemm lok li jiġi miċħud l-argument tar-rikorrenti.

197

Fl-ewwel lok, fir-rigward tal-argument tar-rikorrenti li d-dispożizzjoni inkwistjoni ma kinitx tissodisfa r-rekwiżiti tal-KEDB inkonnessjoni maċ-ċarezza u l-prevedibbiltà l-effetti tagħha, dan jikkonċerna essenzjalment l-allegat ksur tal-prinċipju ta’ legalità tar-reati u tal-pieni, invokat mir-rikorrenti fil-kuntest tal-ewwel parti tar-raba’ motiv, li ser tiġi eżaminata fil-punti 376 sa 394 iktar ’il quddiem.

198

Fit-tieni lok, fir-rigward tal-argument tar-rikorrenti li d-deċiżjoni kkontestata tikser il-prinċipju li ma għandhiex tiġi applikata l-liġi penali b’mod estensiv b’detriment għall-persuna mixlija, għandu jiġi rrilevat dan li ġej.

199

Kif irrilevat ġustament il-Kummissjoni, ir-rikorrenti ma ġietx immultata minħabba li kisret l-Artikolu 7(2) tar-Regolament Nru 139/2004. Hija ġiet immultata, skont l-Artikolu 14(2)(a) u (b), tar-Regolament Nru 139/2004, peress li kisret l-Artikolu 4(1) u l-Artikolu 7(1) tar-Regolament Nru 139/2004.

200

Barra minn hekk, jeħtieġ li jitfakkar li l-Artikolu 7(2) tar-Regolament Nru 139/2004 jistabbilixxi eċċezzjoni għall-Artikolu 7(1) tar-Regolament Nru 139/2004.

201

Il-Kummissjoni tenfasizza ġustament li skont ġurisprudenza stabbilita l-eċċezzjonijiet għandhom jiġu interpretati b’mod ristrett (ara, f’dan is-sens, is-sentenzi tas-17 ta’ Ġunju 2010, Il-Kummissjoni vs Franza, C-492/08, EU:C:2010:348, punt 35, u tat-23 ta’ Ottubru 2014, flyLAL-Lithuanian Airlines, C-302/13, EU:C:2014:2319, punt 27). Fir-rigward b’mod iktar partikolari tad-dritt tal-kompetizzjoni, u b’mod partikolari l-interpretazzjoni mogħtija lid-dispożizzjonijiet tar-regolamenti ta’ eżenzjonijiet skont il-kategorija, il-Qorti Ġenerali kkonfermat, fil-punt 48 tas-sentenza tat-8 ta’ Ottubru 1996, Compagnie maritime belge transports et vs Il-Kummissjoni (T-24/93 sa T-26/93 u T-28/93, EU:T:1996:139), li, fid-dawl tal-prinċipju ġenerali ta’ projbizzjoni tal-akkordji ta’ kontra l-kompetizzjoni, id-dispożizzjonijiet ta’ natura derogatorja inseriti fir-regolament ta’ eżenzjoni għandhom, min-natura tagħhom, jingħataw interpretazzjoni restrittiva. Għaldaqstant il-fatt waħdu li l-Kummissjoni tista’ timponi sanzjonijiet kiefra għall-ksur ta’ dispożizzjoni li taqa’ taħt id-dritt tal-kompetizzjoni jikkontesta l-fatt li d-dispożizzjonijiet ta’ natura derogatorja għandhom jingħataw interpretazzjoni restrittiva. Barra minn hekk, fis-sentenza tat-22 ta’ Marzu 1984, Paterson et (90/83, EU:C:1984:123), li kienet tikkonċerna domandi preliminari magħmula fil-kuntest tal-investigazzjonijiet penali (ara l-punt 2 ta’ din is-sentenza), il-Qorti tal-Ġustizzja kkonstatat, fil-punt 16, li artikolu, sa fejn jipprovdi għal derogi mill-applikazzjoni ta’ regoli ġenerali ta’ regolament, ma jistax jiġi interpretat b’mod li l-effetti tiegħu jiġu estiżi lil hinn minn kemm huwa neċessarju għall-protezzjoni tal-interessi li huwa intiż li jiggarantixxi. Din is-sentenza tikkonferma li l-prinċipju li l-eċċezzjonijiet għandhom jiġu interpretati b’mod ristrett japplika wkoll għall-qasam penali.

202

Fi kwalunkwe każ, jeħtieġ li jiġi rrilevat li, skont il-kliem tiegħu, l-Artikolu 7(2) tar-Regolament Nru 139/2004 ma huwiex applikabbli għal sitwazzjonijiet bħal dawk inkwistjoni fil-kawża odjerna (ara l-punti 68 sa 83 iktar ’il fuq).

203

Ir-rikorrenti essenzjalment tipprova testendi l-kamp ta’ applikazzjoni tal-kunċett ta’ “konċentrazzjoni unika” bil-għan li testendi l-kamp ta’ applikazzjoni tal-eċċezzjoni prevista fl-Artikolu 7(2) tar-Regolament Nru 139/2004.

204

Anki jekk jiġi preżunt li l-multi imposti skont l-Artikolu 14 tar-Regolament Nru 139/2004 kienu ta’ natura penali, ma jistax jitqies f’dan il-każ li l-Kummissjoni applikat il-liġi penali b’mod estensiv għad-detriment tal-persuna mixlija. Fil-fatt, il-Kummissjoni sempliċiment irrifjutat li testendi l-kamp ta’ applikazzjoni tal-eċċezzjoni prevista fl-Artikolu 7(2) tar-Regolament Nru 139/2004 lil hinn mill-kliem tiegħu u li tapplika l-kunċett ta’ “konċentrazzjoni unika” għal sitwazzjoni li fiha l-kontroll esklużiv tal-unika impriża mmirata ġie akkwistat bis-saħħa ta’ tranżazzjoni waħda privata ta’ xiri mingħand bejjiegħ wieħed, qabel it-tnedija ta’ offerta pubblika ta’ xiri obbligatorja.

205

L-argument tar-rikorrenti għandu, għaldaqstant, jiġi miċħud.

206

Barra minn hekk, ir-rikorrenti tikkonferma li d-deċiżjoni kkontestata hija inkompatibbli mal-għan tal-Artikolu 7(2) tar-Regolament Nru 139/2004 “li huwa li jiġu ffaċilitati l-akkwisti u li tiġi żgurata l-likwidità fis-swieq tal-azzjonijiet”. Id-deċiżjoni kkontestata ma għandha effett negattiv biss fuq il-kumpanniji li għandhom mudell ta’ tmexxija ta’ impriża ġeneralment użat mill-kumpanniji stabbiliti fl-Ewropa kontinentali u fl-Iskandinavja, fatt li joħloq diskriminazzjoni bejn il-kumpanniji stabbiliti f’dawn ir-reġjuni meta mqabbla mal-kumpanniji stabbiliti fir-Renju Unit u fl-Istati Uniti, billi jirrendi iktar diffiċli; l-akkwist u, konsegwentement, billi jostakola l-investiment f’kumpanniji stabbiliti fl-Ewropa kontinentali u fl-Iskandinavja, u billi għandu effett negattiv fuq is-swieq tal-kapitali u l-kumpanniji li huma stabbiliti f’dawn ir-reġjuni. Ir-raġuni hija li l-kumpanniji stabbiliti fl-Ewropa kontinentali u fl-Iskandinavja huma ġeneralment kkaratterizzati minn azzjonisti importanti u kkonċentrati, b’differenza mill-kumpanniji stabbiliti fir-Renju Unit u fl-Istati Uniti, li għandhom it-tendenza li jkollhom struttura ta’ azzjonisti mifruxa. Ir-rifjut, fid-deċiżjoni kkontestata, li tiġi applikata l-eżenzjoni ta’ offerta pubblika abbażi tal-Artikolu 7(2) tar-Regolament Nru 139/2004 għall-akkwist inizjali ta’ sehem ta’ kontroll kif ukoll għall-offerta pubblika obbligatorja li tirriżulta minnu huma rilevanti biss għall-kumpanniji li għandhom azzjonisti “kkonċentrati”.

207

Jeħtieġ li jiġi rrilevat li, billi tinvoka diskriminazzjoni bejn il-kumpanniji stabbiliti fl-Ewropa kontinentali u fl-Iskandinavja u l-kumpanniji stabbiliti fir-Renju Unit u fl-Istati Uniti, ir-rikorrenti bbażaw ruħhom, essenzjalment, fuq il-prinċipju ta’ ugwaljanza fit-trattament. Skont ġurisprudenza stabbilita, il-prinċipju ta’ ugwaljanza fit-trattament u ta’ nondiskriminazzjoni jirrikjedi li, fl-assenza ta’ ġustifikazzjoni oġġettiva, sitwazzjonijiet komparabbli ma għandhomx ikunu ttrattati b’mod differenti (ara s-sentenza tal-11 ta’ Lulju 2007, Centeno Mediavilla et vs Il-Kummissjoni, T-58/05, EU:T:2007:218, punt 75, u l-ġurisprudenza ċċitata).

208

F’dan il-każ, hemm lok li jiġi rrilevat li ż-żewġ sitwazzjonijiet, jiġifieri, minn naħa, dik tat-teħid tal-kontroll tal-unika impriża mmirata bis-saħħa ta’ tranżazzjoni waħda ta’ akkwist ta’ azzjonijiet mingħand bejjiegħ wieħed, segwit minn offerta pubblika ta’ xiri obbligatorja u, min-naħa l-oħra, dik ta’ teħid ta’ kontroll bis-saħħa ta’ offerta pubblika ta’ xiri jew permezz ta’ diversi bejjiegħa bis-saħħa ta’ serje ta’ tranżazzjonijiet, ma humiex paragunabbli, b’tali mod li xejn ma jipprekludi trattament differenti. Fil-fatt, f’sitwazzjoni fejn il-kontroll esklużiv ta’ impriża mmirata waħda jiġi akkwistat bis-saħħa ta’ operazzjoni inizjali waħda, bl-ebda mod ma huwa artifiċjali li din it-tranżazzjoni titqies bħala li tikkostitwixxi, waħedha, konċentrazzjoni (ara l-punt 182 iktar ’il fuq). Il-fatt waħdu li huwa possibbli li, fl-Ewropa kontinentali u fl-Iskandinavja, l-ewwel sitwazzjoni hija iktar komuni milli fir-Renju Unit jew fl-Istati Uniti ma jimplikax li dawn is-sitwazzjonijiet għandhom jiġu ttrattati b’mod identiku.

209

Barra minn hekk, il-fatt waħdu li l-Artikolu 7(2) tar-Regolament Nru 139/2004 huwa maħsub li jiffaċilita l-akkwisti u li jiżgura l-likwidità tas-swieq tal-azzjonijiet, kif issostni r-rikorrenti, ma jimplikax li huwa neċessarju li l-kamp ta’ applikazzjoni ta’ din id-dispożizzjoni jiġi estiż lil hinn mill-kliem bil-għan li jiġu ffaċilitati iktar l-akkwisti.

210

Fid-deċiżjoni kkontestata kif ukoll fir-risposta, il-Kummissjoni tindika diversi rimedji li r-rikorrenti setgħet issegwi sabiex timplementa l-konċentrazzjoni inkwistjoni mingħajr ma tikser l-Artikolu 4(1) u l-Artikolu 7(1) tar-Regolament Nru 139/2004. B’hekk, hija tirrileva, fil-punt 106 tad-deċiżjoni kkontestata, li r-rikorrenti setgħet tniedi l-offerta pubblika ta’ xiri mingħajr ma tkun għadha akkwistat minn qabel l-azzjonijiet ta’ M. (l-ewwel possibbiltà) u li r-rikorrenti setgħet tiffirma ftehim ma’ M. dwar ix-xiri tal-azzjonijiet qabel ma tniedi l-offerta pubblika ta’ xiri, filwaqt li tipposponi madankollu l-konklużjoni sal-kisba tal-awtorizzazzjoni mill-awtoritajiet tal-kompetizzjoni (it-tieni possibbiltà).

211

F’dan ir-rigward, ir-rikorrenti ssostni li dawn il-possibbiltajiet jistgħu jippreġudikaw l-azzjonisti minoritarji tal-kumpannija mmirata, jiffaċilitaw l-abbużi mis-suq u jimminaw l-għanijiet tad-Direttiva 2004/25. Fir-rigward tal-ewwel possibbiltà, hija tenfasizza li l-linja politika tal-Kummissjoni hija intiża li tipprekludi lill-akkwirent milli jissostitwixxi struttura ta’ offerta obbligatorja b’offerta volontarja peress li din tkun tippermetti lill-offerenti li jevitaw li jkollhom iniedu offerta obbligatorja bi prezz ġust. Barra minn hekk, fil-każ ta’ Morpol, it-tnedija ta’ offerta volontarja ma kinitx implementabbli fil-prattika peress li l-akkwist ta’ Morpol kien kummerċjalment marbut mal-akkwist ta’ kumpanniji awżiljarji kkontrollati minn M., u li dawn l-entitajiet legali ma setgħux jiġu ttrasferiti fil-kuntest ta’ offerta volontarja. Fir-rigward tat-tieni possibbiltà, ir-rikorrenti ssostni li din tal-aħħar kienet toħloq prezz minimu rregolat li jista’ jiġi mmanipulat u miżjud artifiċjalment, li jmur kontra l-għan tad-Direttiva 2004/25 li kienet intiża li tipprekludi r-riskju ta’ abbuż mis-suq.

212

F’dan ir-rigward, jeħtieġ li jiġi rrilevat li kienet ir-rikorrenti li kellha tistruttura l-konċentrazzjoni b’mod li hija tqis li jikkorrispondi l-iktar mal-ħtiġijiet tagħha, filwaqt li tosserva l-obbligi tagħha previsti fl-Artikolu 4(1) u fl-Artikolu 7(1) tar-Regolament Nru 139/2004. Kif tirrileva l-Kummissjoni, hija li tirrakkomanda, u lanqas b’xi mod tippreskrivi, mod partikolari kif ir-rikorrenti għandha tistruttura t-tranżazzjoni tagħha.

213

Barra minn hekk, fir-rigward tat-tieni possibbiltà kif iddefinita fil-punt 210 iktar ’il fuq, jeħtieġ li jiġi rrilevat dan li ġej fir-rigward tal-argument tar-rikorrenti bbażat fuq l-eżistenza ta’ riskju ta’ manipulazzjoni tal-prezz tal-azzjonijiet.

214

L-approċċ segwit fid-deċiżjoni kkontestata ma jqajjem l-ebda problema fir-rigward tal-protezzjoni tad-drittijiet tal-azzjonisti minoritarji. Fil-fatt, kif tenfasizza r-rikorrenti, skont ir-regoli Norveġjani dwar l-akkwisti, l-offerent għandu jħallas għall-azzjonijiet rimanenti prezz li huwa dak li huwa l-ogħla miż-żewġ prezzijiet li ġejjin: il-prezz li l-offerent ħallas jew li ftiehem fuqu matul perijodu ta’ sitt xhur qabel il-mument li fih ġiet skattata l-offerta obbligatorja (jiġifieri, l-prezz miftiehem fis-SPA) jew il-prezz tas-suq fil-mument li fih jiġi skattat l-obbligu ta’ offerta obbligatorja. Għaldaqstant huwa ċert li l-azzjonisti minoritarji jistgħu jiksbu prezz ġust għall-azzjonijiet tagħhom.

215

Madankollu, ir-rikorrenti ssostni li, kieku ma kienx applikabbli l-Artikolu 7(2) tar-Regolament Nru 139/2004, l-offerent kien ikollu jipposponi l-offerta pubblika sa meta jirċievi l-awtorizzazzjoni tal-konċentrazzjoni tal-Kummissjoni, għal mument li fih il-prezz minimu rregolat jaf ikun żdied b’konsegwenza tal-fatt li l-prezz elenkat fuq is-suq kien jeċċedi l-prezz miftiehem fis-SPA. Għaldaqstant, il-prezz minimu rregolat jiġi ssuġġettat għal manipulazzjonijiet u għal żieda, li jkunu potenzjalment jobbligaw lill-offerent jakkwista l-azzjonijiet rimanenti bi prezz li jeċċedi l-prezz miftiehem fis-SPA, jiġifieri l-prezz ġust.

216

F’dan ir-rigward, hemm lok li jiġi hemm lok li jiġi kkonstatat li, bħala prinċipju, jista’ jkun li jeżisti riskju ta’ manipulazzjoni tal-prezz tal-azzjonijiet sabiex dan jiżdied. Madankollu, kieku r-rikorrenti qieset li, f’dan il-każ, kien jeżisti dan ir-riskju, hija setgħet titlob lill-Kummissjoni li tikkonċedilha deroga skont l-Artikolu 7(3) tar-Regolament Nru 139/2004. Skont din id-dispożizzjoni, il-Kummissjoni tista’, fuq talba, tikkonċedi deroga mill-obbligi previsti fl-Artikolu 7(1) u (2) tar-Regolament Nru 139/2004.

217

F’dan ir-rigward, il-Kummissjoni tenfasizza li hija diġà kkonċediet fil-passat derogi skont l-Artikolu 7(3) tar-Regolament Nru 139/2004 speċifikament f’sitwazzjonijiet li fihom dewmien fit-tnedija ta’ offerta pubblika seta’ jwassal għal manipulazzjonijiet tas-suq. Bħala eżempju, hija tippreżenta d-deċiżjoni tagħha tal-20 ta’ Jannar 2005 (Każ Orkla/Elkem – COMP/M.3709) (iktar ’il quddiem if-“deċiżjoni Orkla/Elkem”), adottata abbażi tal-Artikolu 7(3) tar-Regolament Nru 139/2004. Fil-kawża li tat lok għal din id-deċiżjoni, Orkla, li kellha diġà 39.85 % tal-azzjonijiet ta’ Elkem, ikkonkludiet ftehimiet individwali ma’ tliet azzjonisti ta’ Elkem. Skont dawn il-ftehimiet, Orkla kellha takkwista l-kontroll esklużiv ta’ Elkem. L-implementazzjoni tat-tranżazzjoni ġiegħlet lil Orkla tniedi offerta pubblika obbligatorja għall-azzjonijiet rimanenti ta’ Elkem skont id-dritt Norveġiż.

218

Qabel ma eżegwiet kull wieħed minn dawn il-ftehimiet, Orkla talbet lill-Kummissjoni għal deroga skont l-Artikolu 7(3) tar-Regolament Nru 139/2004. Hija enfasizzat li, minħabba l-volum baxx ta’ azzjonijiet ta’ Elkem li kien liberament aċċessibbli, ma kienx diffiċli li jiġi mmanipulat il-prezz ta’ dawn l-azzjonijiet sabiex dan jogħla. Sitt ijiem wara li rċeviet it-talba ta’ Orkla, il-Kummissjoni kkonċediet deroga filwaqt li rrilevat li “is-sospensjoni tat-tranżazzjoni [se]tgħet ikollha l-effett fuq Orkla li, jekk hija tosserva l-leġiżlazzjoni Norveġiża dwar l-azzjonijiet applikabbli, Orkla kienet tesponi ruħha għal riskju kunsiderevoli li jkollha tagħmel offerta għall-azzjonijiet rimanenti ta’ Elkem bi prezz nettament ogħla wara li t-tranżazzjoni tkun ġiet ddikjarata kompatibbli mas-suq [intern]”. Il-Kummissjoni wettqet ibbilanċjar tal-interessi u rrilevat li l-obbligu ta’ sospensjoni seta’ jaffettwa b’mod serju l-interessi finanzjarji ta’ Orkla, li t-tranżazzjoni ma kinitx tidher li tqajjem problemi għall-kompetizzjoni u li deroga ma kinitx taffettwa d-drittijiet leġittimi ta’ parti terza.

219

Għaldaqstant, il-kawża li tat lok għad-deċiżjoni Orkla/Elkem turi li l-possibbiltà li tintalab deroga skont l-Artikolu 7(3) tar-Regolament Nru 139/2004 tikkostitwixxi mezz effikaċi sabiex jiġu ndirizzati sitwazzjonijiet li fihom jeżisti riskju ta’ manipulazzjoni tal-prezz tal-azzjonijiet.

220

Essenzjalment, ir-rikorrenti ssostni li l-eżistenza (teoretika) ta’ riskji ta’ manipulazzjoni għaż-żieda tal-prezz tal-azzjonijiet tobbliga lill-Kummissjoni tinterpreta l-Artikolu 7(2) tar-Regolament Nru 139/2004 b’mod estensiv. Madankollu, tali argument għandu jiġi miċħud, peress li l-Artikolu 7(3) tar-Regolament Nru 139/2004, jippermetti soluzzjoni sodisfaċenti għal sitwazzjoni li fiha jkun jeżisti tali riskju.

221

L-Artikolu 7(3) tar-Regolament Nru 139/2004 jipprevedi l-possibbiltà li l-Kummissjoni tidderoga mill-obbligu ta’ sospensjoni f’każ partikolari, wara li tkun ibbilanċjat l-interessi inkwistjoni. Tali deroga f’każ partikolari hija strument iktar adegwat sabiex jiġu indirizzati riskji possibbli ta’ manipulazzjoni mill-applikazzjoni estensiva tal-Artikolu 7(2) tar-Regolament Nru 139/2004, li tkun timplika applikazzjoni awtomatika tal-eċċezzjoni mingħajr il-possibbiltà li jsir ibbilanċjar tal-interessi.

222

Waqt is-seduta, ir-rikorrenti sostniet li, fid-deċiżjoni Orkla/Elkem, il-Kummissjoni rrikonoxxiet l-eżistenza ta’ bżonn ta’ ċelerità u tan-neċessità li jiġu evitati manipulazzjonijiet fis-suq f’ċirkustanzi li jixbhu lil dawk tal-każ ineżami.

223

Madankollu, iċ-ċirkustanza li, f’din il-kawża, il-Kummissjoni ħadet inkunsiderazzjoni l-bżonn ta’ ċelerità u tan-neċessità li jiġu evitati manipulazzjonijiet fis-suq bil-għan li tikkonċedi deroga skont l-Artikolu 7(3) tar-Regolament Nru 139/2004 ma timplikax li hemm lok ta’ interpretazzjoni estensiva tal-Artikolu 7(2) tar-Regolament Nru 139/2004.

224

Fl-aħħar, ir-rikorrenti sostniet, waqt is-seduta, li skont l-Artikolu 7(3) tar-Regolament Nru 4064/89, li kien jippreċedi l-Artikolu 7(2) tar-Regolament Nru 139/2004, kien neċessarju li tiġi nnotifikata l-offerta pubblika ta’ xiri jew ta’ skambju fit-terminu previst fl-Artikolu 4(1) tar-Regolament Nru 4064/89, jiġifieri fit-terminu ta’ ġimgħa, u li, skont l-Artikolu 7(2) tar-Regolament Nru 139/2004, huwa biss neċessarju li l-konċentrazzjoni tiġi nnotifikata “mingħajr dewmien” lill-Kummissjoni. Skont ir-rikorrenti, dan it-tibdil jixhed l-intenzjoni tal-leġiżlatur li jagħti prijorità lill-proċess ta’ akkwisti pubbliċi meta mqabbla mal-proċedura ta’ kontroll tal-konċentrazzjonijiet.

225

F’dan ir-rigward, jeħtieġ li jiġi rrilevat li l-Artikolu 4(1) tar-Regolament Nru 139/2004 ma għadux jipprevedi, għan-notifika ta’ konċentrazzjonijiet, it-terminu ta’ ġimgħa dekorribbli mill-konklużjoni tal-ftehim jew mill-pubblikazzjoni tal-offerta ta’ xiri li kien previst fl-Artikolu 4(1) tar-Regolament Nru 4064/89.

226

Ir-raġunijiet għat-tħassir ta’ dan it-terminu jirriżultaw mill-punti 61 sa 64 tal-motivazzjoni tal-proposta għal regolament. Fihom il-Kummissjoni rrilevat b’mod partikolari li “[i]l-prattika tal-aħħar tnax-il sena juru li applikazzjoni stretta ta’ terminu ta’ ġimgħa sabiex jiġu ppreżentati n-notifiki […] la kienet realistika u lanqas neċessarja” u li, “[f]id-dawl tal-effett ta’ sospensjoni tal-Artikolu 7(1), [kien] fl-interess kummerċjali tal-impriżi stess li jiksbu l-awtorizzazzjoni regolatorja tal-Kummissjoni kemm jista’ jkun malajr sabiex ikunu jistgħu jimplementaw il-konċentrazzjoni tagħhom”.

227

Għall-kuntrarju ta’ dak li ssostni r-rikorrenti, għaldaqstant, ir-raġunijiet għat-tħassir ta’ dan it-terminu ma kinux marbuta mal-intenzjoni tal-leġiżlatur li jagħti prijorità lill-proċess ta’ akkwisti pubbliċi meta mqabbla mal-proċedura ta’ kontroll tal-konċentrazzjonijiet.

228

Għaldaqstant, l-argumenti tar-rikorrenti maħsuba sabiex jiġi stabbilit li l-interpretazzjoni mogħtija mill-Kummissjoni tal-Artikolu 7(2) tar-Regolament Nru 139/2004 tmur kontra r-raġuni għall-eżistenza ta’ din id-dispożizzjoni għandhom jiġu miċħuda.

229

Fid-dawl ta’ dak li ntqal, jeħtieġ li jiġi miċħud l-argument tar-rikorrenti li l-akkwist ta’ Diċembru 2012 u l-offerta pubblika ta’ xiri kienu jikkostitwixxu konċentrazzjoni unika. Fil-fatt, il-kunċett ta’ konċentrazzjoni unika ma huwiex intiż li japplika f’każ li fih il-kontroll esklużiv effettiv ta’ kumpannija mmirata waħda jinkiseb mingħand bejjiegħ wieħed permezz ta’ tranżazzjoni inizjali privata waħda, anki meta din tal-aħħar tiġi segwita minn offerta pubblika obbligatorja.

230

Għaldaqstant ma huwiex neċessarju li jiġu eżaminati l-argumenti tal-partijiet marbuta mal-eżistenza jew le ta’ kundizzjonalità legali jew fattwali bejn l-akkwist ta’ Diċembru 2012 u l-offerta pubblika ta’ xiri.

2.

Fuq ir-raba’ parti tal-ewwel motiv, ibbażata fuq il-fatt li r-rikorrenti kkonformat ruħha mal-Artikolu 7(2) tar-Regolament Nru 139/2004

231

Fil-kuntest tar-raba’ parti tal-ewwel motiv, ir-rikorrenti ssostni li hija osservat il-kundizzjonijiet previsti fl-Artikolu 7(2)(a) u (b) tar-Regolament Nru 139/2004, billi nnotifikat il-konċentrazzjoni mingħajr dewmien lill-Kummissjoni u billi ma eżerċitatx id-drittijiet tagħha tal-vot f’Morpol qabel l-awtorizzazzjoni tal-konċentrazzjoni mill-Kummissjoni.

232

F’dan ir-rigward, huwa suffiċjenti li jiġi kkonstatat li l-Artikolu 7(2) tar-Regolament Nru 139/2004 ma huwiex applikabbli f’dan il-każ, kif jirriżulta mill-eżami tal-ewwel tliet partijiet tal-ewwel motiv. Għaldaqstant, il-kwistjoni dwar jekk ir-rikorrenti osservatx il-kundizzjonijiet previsti fl-Artikolu 7(2)(a) u (b) tar-Regolament Nru 139/2004, hija rrilevanti.

233

Minn dak kollu li ntqal, jirriżulta li hemm lok li jiġi miċħud l-ewwel motiv fl-intier tiegħu.

B.

Fuq it-tieni motiv, ibbażat fuq żball manifest ta’ liġi u ta’ fatt sa fejn id-deċiżjoni kkontestata tikkonkludi li r-rikorrenti kienet negliġenti

234

Ir-rikorrenti ssostni li kien b’mod żbaljat li l-Kummissjoni qieset, fid-deċiżjoni kkontestata, li hija kienet negliġenti. Fl-opinjoni tagħha, l-ebda kumpannija normalment avżata u suffiċjentement attenta ma setgħet raġonevolment tipprevedi li l-akkwist ta’ Diċembru 2012 kellu jiġi nnotifikat u li s-sehem korrispondenti ma setgħax jiġi ttrasferit lir-rikorrenti qabel l-awtorizzazzjoni. L-interpretazzjoni mogħtija mir-rikorrenti fl-Artikolu 7(2) tar-Regolament Nru 139/2004 kienet raġonevoli, fatt li ġie kkonfermat mill-opinjoni legali mill-konsulent legali estern tar-rikorrenti.

235

Il-Kummissjoni tikkontesta l-argumenti tar-rikorrenti.

236

Jeħtieġ li jitfakkar li, skont l-Artikolu 14(2) tar-Regolament Nru 139/2004, il-Kummissjoni jista’ jimponi multi biss għal ksur li jkun twettaq “b’intenzjoni jew b’negliġenza”.

237

Fir-rigward, tal-kwistjoni dwar jekk ksur ġiex imwettaq b’mod intenzjonat jew b’negliġenza, mill-ġurisprudenza jirriżulta li din il-kundizzjoni tiġi ssodisfatta ġaladarba l-impriża inkwistjoni ma tkunx tista’ ma tkunx konxja min-natura antikompetittiva tal-aġir tagħha, irrispettivament minn jekk kinitx konxja li qiegħda tikser ir-regoli tal-kompetizzjoni [ara, fir-rigward tal-ksur li jista’ jiġi ssanzjonat b’multa skont l-ewwel paragrafu tal-Artikolu 23(2) tar-Regolament tal-Kunsill (KE) Nru 1/2003, tas-16 ta’ Diċembru 2002, fuq l-implementazzjoni tar-regoli tal-kompetizzjoni mniżżlin fl-Artikoli [101 u 102 TFUE] (ĠU Edizzjoni Speċjali bil-Malti, Kapitolu 8, Vol. 2, p. 205), sentenza tat-18 ta’ Ġunju 2013, Schenker & Co. et, C-681/11, EU:C:2013:404, punt 37 u l-ġurisprudenza ċċitata].

238

Il-fatt li l-impriża kkonċernata kienet ikklassifikat b’mod ġuridikament żbaljat l-aġir tagħha li fuqu hija bbażata l-konstatazzjoni tal-ksur ma jistax ikollu bħala effett li jeżentaha mill-impożizzjoni ta’ multa sa fejn din ma setgħetx ma tkunx konxja min-natura antikompetittiva tal-imsemmi aġir (ara b’analoġija, is-sentenza tat-18 ta’ Ġunju 2013, Schenker & Co. et, C-681/11, EU:C:2013:404, punt 38). Impriża ma tistax taħrab mill-impożizzjoni ta’ multa meta l-ksur tar-regoli tal-kompetizzjoni jkun joriġina minn żball ta’ din l-impriża dwar il-legalità tal-aġir tagħha minħabba abbażi ta’ parir legali ta’ avukat (ara, b’analoġija, is-sentenza tat-18 ta’ Ġunju 2013, Schenker & Co. et, C-681/11, EU:C:2013:404, punt 43).

239

Huwa fid-dawl ta’ dawn il-kunsiderazzjonijiet li hemm lok li jiġi eżaminat jekk kienx b’mod ġust li l-Kummissjoni kkonkludiet, fid-deċiżjoni kkontestata, li r-rikorrenti aġixxiet b’negliġenza billi implementat l-akkwist ta’ Diċembru 2012 bi ksur tal-Artikolu 4(1) u tal-Artikolu 7(1) tar-Regolament Nru 139/2004.

240

Qabel xejn, jeħtieġ li jiġi rrilevat li l-Kummissjoni ħadet inkunsiderazzjoni l-eżistenza ta’ pariri legali sabiex tikkonstata, fil-punt 142 tad-deċiżjoni kkontestata, li r-rikorrenti wettqet il-ksur b’negliġenza u mhux b’mod intenzjonat.

241

Fil-punti 144 sa 148 tad-deċiżjoni kkontestata, il-Kummissjoni bbażat ruħha fuq l-elementi li ġejjin sabiex tikkonkludi li r-rikorrenti kienet negliġenti:

–

ir-rikorrenti hija kumpannija Ewropea kbira li għandha esperjenza solida tal-proċeduri ta’ kontroll tal-konċentrazzjonijiet u tan-notifika lill-Kummissjoni u lill-awtoritajiet tal-kompetizzjoni nazzjonali;

–

ir-rikorrenti kienet taf, jew kellha tkun taf, li, bl-akkwist ta’ sehem ta’ 48.5 % mill-kapital ta’ Morpol, hija kienet qiegħda takkwista l-kontroll fattwali ta’ din tal-aħħar;

–

ir-rikorrenti ma pprovatx li hija kienet irċeviet mill-konsulenti legali tagħha evalwazzjoni dwar l-applikabbiltà tal-Artikolu 7(2) tar-Regolament Nru 139/2004 qabel it-18 ta’ Diċembru 2012, data li fiha ġie konkluż l-akkwist ta’ Diċembru 2012;

–

l-eżistenza ta’ preċedent dwar l-interpretazzjoni tal-Artikolu 7(2) tar-Regolament Nru 139/2004 [deċiżjoni tal-Kummissjoni tal-21 ta’ Settembru 2007 (Każ COMP/M.4730 – Yara/Kemira GrowHow) (iktar ’il quddiem “id-deċiżjoni Yara/Kemira GrowHow”)] kellha twassal lir-rikorrenti sabiex tikkonkludi li t-twettiq tal-akkwist ta’ Diċembru 2012 kien probabbilment iwassal għal ksur tal-Artikolu 4(1) u tal-Artikolu 7(1) tar-Regolament Nru 139/2004, jew tal-inqas li l-applikabbiltà tal-Artikolu 7(2) ma kinitx sempliċi f’dan il-każ, u ir-rikorrenti setgħet, jew kellha, tirrikorri għand il-Kummissjoni permezz tal-proċedura ta’ konsultazzjoni dwar l-applikabbiltà tal-Artikolu 7(2) tar-Regolament Nru 139/2004 sabiex titlob deroga mill-obbligu ta’ status quo bis-saħħa tal-Artikolu 7(3) tar-Regolament Nru 139/2004;

–

ir-rikorrenti diġà ġiet immultata fil-livell nazzjonali għall-implementazzjoni prematura ta’ konċentrazzjoni fil-kuntest tal-akkwist tagħha tal-kumpannija Fjord Seafood, b’tali mod li kien hemm lok li jiġi mistenni minnha livell għoli ta’ diliġenza.

242

Ir-rikorrenti tikkontesta r-rilevanza ta’ dawn l-elementi kollha.

243

Jeħtieġ li jiġi rrilevat li, f’dan il-każ, ir-rikorrenti setgħet faċilment tipprevedi li, bl-akkwist ta’ 48.5 % tal-azzjonijiet ta’ Morpol, hija kienet qiegħda takkwista l-kontroll esklużiv effettiv ta’ din il-kumpannija. Ir-rikorrenti ma tikkonfermax li hija ma kellhiex konoxxenza ta’ ċerti elementi fattwali u li minħabba dan ma kienx possibbli li hija tifhem li, bit-twettiq tal-akkwist ta’ Diċembru 2012, hija kienet qiegħda timplementa konċentrazzjoni ta’ daqs Komunitarju.

244

Barra minn hekk, jirriżulta mill-komunikazzjoni tal-Borża tas-17 ta’ Diċembru 2012, imsemmija fil-punt 6 iktar ’il fuq, li r-rikorrenti kienet konxja mill-fatt li xiri ta’ Morpol kien jikkostitwixxi konċentrazzjoni ta’ daqs Komunitarju. Fil-fatt, fih tirrileva dan li ġej:

245

Il-fatt li r-rikorrenti kkunsidrat b’mod żbaljat li l-obbligi tagħha kienu biss limitazzjoni fl-eżerċizzju tad-drittijiet tagħha tal-vot qabel l-awtorizzazzjoni ma jpoġġix f’dubju l-fatt li hija kienet konxja miċ-ċirkustanza li din kienet konċentrazzjoni ta’ daqs Komunitarju.

246

Jeħtieġ li jitfakkar li mill-kliem tal-Artikolu 4(1) u tal-Artikolu 7(1) tar-Regolament Nru 139/2004 jirriżulta li konċentrazzjoni ta’ daqs Komunitarju għandha tiġi nnotifikata qabel it-twettiq tagħha u li hija ma għandhiex tiġi implementata mingħajr notifika u awtorizzazzjoni minn qabel.

247

Ir-rikorrenti ma setgħetx ma tkunx konxja minn dawn id-dispożizzjonijiet u barra minn dan hija ma tiddikjarax li ma kinitx konxja minnhom.

248

Barra minn hekk, jeħtieġ li jitfakkar li, skont il-kliem tiegħu, l-Artikolu 7(2) tar-Regolament Nru 139/2004 ma huwiex applikabbli għal sitwazzjonijiet bħal dik inkwistjoni f’dan il-każ (ara l-punti 68 sa 83 iktar ’il fuq).

249

Ir-rikorrenti tiddikjara li l-interpretazzjoni tagħha tal-Artikolu 7(2) tar-Regolament Nru 139/2004 kienet tal-inqas raġonevoli, b’tali mod li hija ma aġixxietx b’mod negliġenti.

250

F’dan ir-rigward, jeħtieġ li jitfakkar li, bir-raġunament segwit fil-kuntest tal-ewwel motiv, ir-rikorrenti essenzjalment tipprova testendi l-kamp ta’ applikazzjoni tal-kunċett ta’ “konċentrazzjoni unika” bil-għan li testendi l-kamp ta’ applikazzjoni tal-eċċezzjoni prevista fl-Artikolu 7(2) tar-Regolament Nru 139/2004 (ara l-punt 203 iktar ’il fuq). Barra minn hekk, jeħtieġ li jitfakkar li r-rikorrenti ma tidentifika l-ebda eżempju fil-prassi deċiżjonali tal-Kummissjoni jew fil-ġurisprudenza tal-qrati tal-Unjoni Ewropea li fih diversi tranżazzjonijiet ta’ xiri marbuta ma’ partijiet minn impriża mmirata waħda ġew meqjusa bħala li jikkostitwixxu konċentrazzjoni unika meta l-kontroll esklużiv tal-impriża mmirata kien ġie akkwistat bis-saħħa tal-ewwel operazzjoni ta’ xiri (ara l-punt 147 iktar ’il fuq).

251

Għall-kuntrarju, kienet teżisti deċiżjoni tal-Kummissjoni, jiġifieri d-deċiżjoni Yara/Kemira GrowHow, li fiha din tal-aħħar kkonstatat, fil-punti 6 u 7, dan li ġej:

252

Ċertament huwa minnu li, kif tenfasizza r-rikorrenti, il-konstatazzjoni li ksur tal-Artikolu 4(1) u tal-Artikolu 7(1) tar-Regolament Nru 139/2004 ma setgħax jiġi eskluż tikkostitwixxi obiter dictum tad-deċiżjoni Yara/Kemira GrowHow, li hija deċiżjoni li tawtorizza konċentrazzjoni b’riżerva għall-osservanza ta’ ċerti obbligi. Finalment, il-Kummissjoni ma fetħitx proċedura bil-ħsieb li timponi multa abbażi tal-Artikolu 14(2) tar-Regolament Nru 139/2004. Ir-rikorrenti ġustament tenfasizza li tali obiter dictum ma għandux effetti legali obbligatorji u ma jistax jkun is-suġġett ta’ stħarriġ mill-qrati tal-Unjoni.

253

Xorta jibqa’ l-fatt li tali obiter dictum jista’ jagħti lill-operaturi indikazzjonijiet fuq il-mod kif il-Kummissjoni tinterpreta l-Artikolu 7(2) tar-Regolament Nru 139/2004. L-eżistenza tad-deċiżjoni Yara/Kemira GrowHow, li kienet tikkonċerna sitwazzjoni paragunabbli ma’ dik ineżami u li fiha l-Kummissjoni rrilevat li hija kienet tqis li l-eċċezzjoni prevista fl-Artikolu 7(2) tar-Regolament Nru 139/2004 ma kinitx applikabbli, huwa element li jirrendi iktar diffiċli għall-impriżi sabiex jiġġustifikaw il-fatt li żball imwettaq dwar l-interpretazzjoni tal-Artikolu 7(2) tar-Regolament Nru 139/2004 ma jammontax għal aġir negliġenti.

254

Ċertament huwa minnu li, kif tenfasizza r-rikorrenti fil-kuntest tar-raba’ motiv, li d-deċiżjoni Yara/Kemira GrowHow ma ġietx ippubblikata fil-Ġurnal Uffiċjali tal-Unjoni Ewropea u li l-verżjoni sħiħa hija biss disponibbli bl-Ingliż.

255

Madankollu, ġiet ippubblikata opinjoni fil-Ġurnal Uffiċjali tal-Unjoni (ĠU 2007, C 245, p. 7) fil-lingwi uffiċjali kollha, li tindika katina tal-internet sabiex jinkiseb l-aċċess għad-deċiżjoni sħiħa tad-deċiżjoni fil-lingwa Ingliża. Barra minn hekk, il-Kummissjoni ġustament tenfasizza li d-deċiżjoni Yara/Kemira GrowHow, u b’mod partikolari l-interpretazzjoni mogħtija fl-Artikolu 7(2) tar-Regolament Nru 139/2004 f’din id-deċiżjoni, ġiet iċċitata f’xogħlijiet ta’ prattikanti. Għaldaqstant, operatur diliġenti seta’ jkollu konoxxenza ta’ din id-deċiżjoni u tal-interpretazzjoni mogħtija lill-Artikolu 7(2) tar-Regolament Nru 139/2004 mill-Kummissjoni.

256

Barra minn hekk, jeħtieġ li jittieħed inkunsiderazzjoni l-fatt li r-rikorrenti setgħu jikkonsultaw mal-Kummissjoni fuq il-kwistjoni tal-interpretazzjoni tal-Artikolu 7(2) tar-Regolament Nru 139/2004. F’każ ta’ dubju dwar l-obbligi tagħha skont ir-Regolament Nru 139/2004, l-aġir adegwat ta’ impriża huwa li tirrikorri għall-Kummissjoni (ara, f’dan is-sens, is-sentenza tat-12 ta’ Diċembru 2012, Electrabel vs Il-Kummissjoni, T-332/09, EU:T:2012:672, punt 255). Ir-rikorrenti ma tiddikjarax li ma kinitx taf b’din il-possibbiltà.

257

Il-Kummissjoni kellha wkoll dritt li tieħu inkunsiderazzjoni, kif għamlet fil-punt 144 tad-deċiżjoni kkontestata, il-fatt li r-rikorrenti kienet kumpannija Ewropea kbira li kellha esperjenza solida tal-proċeduri ta’ kontroll tal-konċentrazzjonijiet u tan-notifika lill-Kummissjoni u lill-awtoritajiet tal-kompetizzjoni nazzjonali. Għalhekk, mill-punt 252 tas-sentenza tat-12 ta’ Diċembru 2012, Electrabel vs Il-Kummissjoni (T-332/09, EU:T:2012:672), jirriżulta li l-esperjenza ta’ impriża fil-qasam tal-konċentrazzjonijiet u fil-qasam tal-proċeduri ta’ notifika hija element rilevanti fil-kuntest tal-evalwazzjoni tan-negliġenza.

258

Barra minn hekk, il-Kummissjoni kellha dritt li tieħu inkunsiderazzjoni, kif għamlet fil-punt 148 tad-deċiżjoni kkontestata, il-fatt li r-rikorrenti (dak iż-żmien Pan Fish) kienet diġà ġiet immultata fil-livell nazzjonali għat-twettiq prematur ta’ konċentrazzjoni fil-kuntest tal-akkwist tagħha tal-kumpannija Fjord Seafood. Ċertament huwa minnu li d-deċiżjoni tal-ministru tal-ekonomija Franċiż tat-8 ta’ Diċembru 2007 (Każ Pan Fish/Fjord Seafood) (iktar ’il quddiem id-“deċiżjoni Pan Fish/Fjord Seafood”) ma kinitx tirrigwarda l-interpretazzjoni tal-Artikolu 7(2) tar-Regolament Nru 139/2004. Xorta jibqa’ l-fatt li hemm lok li tiġi mistennija diliġenza partikolari min-naħa ta’ impriża Ewropea ta’ daqs kbir li diġà ġiet immultata, minkejja li dan seħħ fil-livell nazzjonali, għat-twettiq prematur ta’ konċentrazzjoni.

259

F’dan il-każ, hemm lok li jiġi kkonstatat li r-rikorrenti aġixxiet b’mod negliġenti meta tat interpretazzjoni tal-Artikolu 7(2) tar-Regolament Nru 139/2004 li la hija koperta mill-kliem tiegħu u lanqas mill-prassi deċiżjonali tal-Kummissjoni jew mill-ġurisprudenza tal-qrati tal-Unjoni u li ma hijiex konformi ma’ dak li kkonstatat il-Kummissjoni, f’obiter dictum, fid-deċiżjoni Yara/Kemira GrowHow, u dan kollu mingħajr ma rrikorriet minn qabel għand il-Kummissjoni bil-għan li tivverifika l-korrettezza tal-interpretazzjoni tagħha. B’dan il-komportament, ir-rikorrenti aġixxiet billi ħadet riskju għaliha u ma tistax validament tibbaża ruħha fuq in-natura allegatament “raġonevoli” tal-interpretazzjoni tagħha.

260

Għaldaqstant hemm lok li jiġi miċħud l-argument tar-rikorrenti li “l-ebda kumpannija normalment avżata u suffiċjentement attenta ma setgħet raġonevolment tipprevedi li l-akkwist ta’ Diċembru 2012 kellu jiġi nnotifikat u li s-sehem korrispondenti ma setgħax jiġi ttrasferit [lir-rikorrenti] qabel l-awtorizzazzjoni”.

261

Fir-rigward tal-argumenti tar-rikorrenti bbażati fuq l-evalwazzjoni tal-konsulenti legali esterni tagħha, jeħtieġ li jiġi rrilevat dan li ġej.

262

Minn naħa, ir-rikorrenti tiddikjara li l-konsulenti legali esterni tagħha, li għandhom esperjenza kbira fil-kwistjonijiet tad-dritt tal-kompetizzjoni, kienu jaqblu li għandu jitqies li l-akkwist ta’ Diċembru 2012 u l-offerta pubblika kienu jikkostitwixxu konċentrazzjoni unika li taqa’ taħt l-Artikolu 7(2) tar-Regolament Nru 139/2004, fatt li jikkonferma n-natura raġonevoli tal-interpretazzjoni tagħha. Min-naħa l-oħra hija tikkonferma li l-esperjenza tagħha marbuta mat-tranżazzjoni li tat lok għad-deċiżjoni Pan Fish/Fjord Seafood hija waħda mill-fatturi li wassluha titlob u tikseb assigurazzjonijiet, f’diversi okkażjonijiet, dwar il-fatt li l-akkwist ta’ sehem ta’ 48.5 % f’Morpol kien jaqa’ taħt l-Artikolu 7(2) tar-Regolament Nru 139/2004. Fl-aħħar, ir-rikorrenti tiddikjara li kien b’mod żbaljat li l-Kummissjoni qieset, fil-punt 146 tad-deċiżjoni kkontestata, li hija ma kinitx fittxet li tikseb, u ma kinitx irċeviet, parir dwar il-portata tal-Artikolu 7(2) tar-Regolament Nru 139/2004 qabel it-18 ta’ Diċembru 2012.

263

Għaldaqstant hemm lok li jiġi eżaminat il-kontenut tal-parir mogħti mill-konsulenti legali esterni tagħha.

264

Ir-rikorrenti tibbaża ruħha fuq li kien bagħtilha l-konsulent legali Norveġiż tad-29 ta’ Novembru 2012. Din irrilevat dan li ġej:

265

Minn din l-ittra, jirriżulta b’mod ċar li l-konsulent legali Norveġiż tar-rikorrenti ma kellux l-informazzjoni neċessarja dwar id-dħul mill-bejgħ tal-impriżi kkonċernati u b’hekk ma kienx f’pożizzjoni li janalizza l-kwistjoni dwar quddiem liema awtoritajiet tal-kompetizzjoni kellha tiġi nnotifikata t-tranżazzjoni. Ir-rikorrenti ma setgħetx tistenna lill-konsulent legali Norveġiż tagħha jwettaq analiżi eżawrjenti tal-implikazzjonijiet tal-konċentrazzjoni mill-perspettiva tad-dritt tal-Unjoni qabel ma jikseb pussess tal-elementi li jippermettulu jiddeċiedi l-kwistjoni dwar jekk din kinitx konċentrazzjoni ta’ daqs Komunitarju.

266

Barra minn hekk, jeħtieġ li jiġi rrilevat li xi paragrafi minn din l-ittra ddedikati għad-dritt tal-kompetizzjoni, kif iċċitati fil-punt 264 iktar ’il fuq, ma jistgħux jitqiesu bħala analiżi veru tal-obbligi tar-rikorrenti fir-rigward tan-notifiki u tal-obbligi possibbli ta’ status quo. Għall-kuntrarju, ir-rikorrenti ma setgħetx tiddeduċi mis-sentenza waħda li “[k]if issemma qabel, [Marine Harvest] ma hija sejra tkun kapaċi teżerċita l-ebda dritt bħala azzjonist f’[Morpol] marbuta mal-azzjonijiet akkwistati qabel ma intom tkunu ksibtu l-awtorizzazzjonijiet kollha abbażi tad-dritt tal-kompetizzjoni” li hija kellha dritt tikkonkludi l-akkwist ta’ Diċembru 2012 mingħajr notifika u mingħajr awtorizzazzjoni minn qabel.

267

L-eżistenza ta’ din l-ittra tal-konsulent legali Norveġiż bl-ebda mod ma tista’ teżenta lir-rikorrenti mir-responsabbiltà tagħha.

268

Fl-14 ta’ Diċembru 2012 fl-10.02, dan l-istess konsulent legali, bagħat ittra lil konsulent legali tal-uffiċċju ta’ avukati F. li kienet redatta kif ġej:

269

Din l-ittra turi b’mod ċar li r-rikorrenti ma aġixxietx bħalma kien jaġixxi operatur diliġenti. Fil-fatt, minnha jirriżulta li “ħadd ma [kien i]ffoka wisq” fuq l-aspett tad-dritt tal-kompetizzjoni sal-jum li fiha ntbagħtet din l-ittra, jiġifieri l-istess jum tal-iffirmar tas-SPA. Operatur diliġenti kieku kien jikkonċentra fuq l-implikazzjonijiet tat-tranżazzjoni mill-perspettiva tad-dritt tal-kompetizzjoni fi stadju iktar bikri.

270

Meta ġiet mistoqsija f’dan ir-rigward waqt is-seduta, ir-rikorrenti rrilevat li l-awtur tal-ittra tal-14 ta’ Diċembru 2012 kien l-istess wieħed tal-ittra tad-29 ta’ Novembru 2012 u li din l-aħħar imsemmija ittra kienet turi li dan kien irrifletta fuq is-suġġett tad-dritt tal-kompetizzjoni diġà f’dan l-istadju. Barra minn hekk, hija rrilevat li l-konsulent legali Norveġiż tar-rikorrenti kien avukat speċjalizzat fid-dritt tal-kumpanniji u mhux avukat speċjalizzat fil-qasam tad-dritt tal-kompetizzjoni u li dan kien talab il-parir ta’ speċjalista fl-uffiċċju ta’ avukati F. fl-14 ta’ Diċembru 2012.

271

F’dan ir-rigward, jeħtieġ li jitfakkar li l-ittra tad-29 ta’ Novembru 2012 ma tinkludix analiżi vera tal-obbligi tar-rikorrenti fir-rigward tan-notifiki u tal-obbligi ta’ status quo (ara l-punt 266 iktar ’il fuq). Għalkemm huwa veru li l-konsulent legali Norveġiż irrifletta fuq l-aspett tad-dritt tal-kompetizzjoni, jeħtieġ li jiġi rrilevat li, fuq ammissjoni tiegħu stess fl-ittra tal-14 ta’ Diċembru 2012, ħadd ma kien “iffoka wisq” fuq dan l-aspett sa dik id-data.

272

Barra minn hekk, jeħtieġ li jiġi kkonstatat li, billi rrilevat, waqt is-seduta, li l-konsulent legali Norveġiż tar-rikorrenti kien avukat speċjalizzat fid-dritt tal-kumpanniji u mhux avukat speċjalizzat fil-qasam tad-dritt tal-kompetizzjoni, ir-rikorrenti, fir-rigward ta’ dan il-konsulent legali, tal-inqas biddlet id-dikjarazzjoni, inkluża fil-punt 71 tar-rikors, li l-konsulenti legali esterni tagħha kellhom esperjenza kbira fi kwistjonijiet tad-dritt tal-kompetizzjoni.

273

Fl-14 ta’ Diċembru 2012 fl-22.36, il-konsulent legali tal-uffiċċju ta’ avukati F. wieġeb għall-ittra ċċitata fil-punt 268 iktar ’il fuq billi rrileva b’mod partikolari kif ġej:

274

Din l-ittra, li ġiet skambjata bejn żewġ konsulenti legali esterni tar-rikorrenti, ma tistax titqies bħala analiżi veru tal-implikazzjonijiet tal-konċentrazzjoni mill-perspettiva tad-dritt tal-kompetizzjoni, u barra minn hekk, il-konsulent legali tal-uffiċċju ta’ avukati F. ma kellux għad-dispożizzjoni tiegħu biżżejjed ħin sabiex iwettaq tali analiżi.

275

Barra minn hekk, jeħtieġ li jiġi kkonstatat li la l-ittra tad-29 ta’ Novembru 2012 u lanqas dawk tal-14 ta’ Diċembru 2012 ma jsemmu l-Artikolu 7(2) tar-Regolament Nru 139/2004.

276

L-ewwel dokument li jsemmi b’mod espliċitu l-Artikolu 7(2) tar-Regolament Nru 139/2004 huwa memorandum tal-konsulent legali Norveġiż tar-rikorrenti datat it-18 ta’ Diċembru 2012.

277

F’dan il-memorandum, wara li ċċita l-kliem tal-Artikolu 7(1) u (2) tar-Regolament Nru 139/2004, dan il-konsulent legali rrileva dan li ġej:

278

Madankollu, dan il-memorandum ma jinkludix analiżi veru tal-applikabbiltà tal-Artikolu 7(2) tar-Regolament Nru 139/2004. Is-sempliċi ċitazzjoni tal-kliem tal-Artikolu 7(1) u (2) tar-Regolament Nru 139/2004, u d-dikjarazzjoni li r-rikorrenti setgħet tikseb l-azzjonijiet ta’ Morpol jekk ma teżerċitax id-drittijiet tal-vot ma jistgħux jiġu assimilati ma’ tali analiżi, b’mod partikolari fid-dawl taċ-ċirkustanza li, skont il-kliem tiegħu, l-Artikolu 7(2) tar-Regolament Nru 139/2004 ma huwiex applikabbli. F’dan il-memorandum, il-konsulent legali Norveġiż tar-rikorrenti b’mod partikolari ma bbażax ruħu fuq l-eżistenza ta’ konċentrazzjoni unika sabiex tiġġustifika l-allegata applikabbiltà tal-Artikolu 7(2) tar-Regolament Nru 139/2004.

279

Barra minn hekk, jeħtieġ li jitfakkar li s-SPA kien diġà ġie ffirmat fl-14 ta’ Diċembru 2012. Is-SPA kien jipprevedi, fl-Artikolu 7.1 tiegħu, li l-konklużjoni għandha sseħħ kemm jista’ jkun malajr u mhux iktar tard minn tlett ijiem ta’ xogħol wara l-iffirmar. Barra minn hekk, san kien jipprevedi, fl-Artikolu 7.2 tiegħu, li, fid-data tal-konklużjoni, ir-rikorrenti kellha turi li kienet ħallset il-prezz tal-bejgħ. Fl-aħħar, is-SPA kien jipprevedi fl-Artikolu 7.3 tiegħu, li, f’din id-data, il-bejjiegħa kellhom juru li kienu ttrasferixxew l-azzjonijiet lir-rikorrenti.

280

Għaldaqstant, il-memorandum tat-18 ta’ Diċembru 2012 ġie redatt f’mument li fih ir-rikorrenti kienet diġà marbuta li tagħlaq l-akkwist mhux iktar tard minn tlett ijiem ta’ xogħol wara l-iffirmar tas-SPA.

281

Fir-rigward tal-konstatazzjoni tal-Kummissjoni, inkluża fil-punt 146 tad-deċiżjoni kkontestata, li r-rikorrenti ma pproduċietx elementi li jipprovaw li hija kienet irċeviet mill-konsulenti legali tagħha evalwazzjoni marbuta mal-applikabbiltà tal-Artikolu 7(2) tar-Regolament Nru 139/2004 qabel it-18 ta’ Diċembru 2012, li hija kkontestata mir-rikorrenti, jeħtieġ li jiġi rrilevat dan li ġej.

282

Ċertament huwa veru li r-rikorrenti kienet indikat impliċitament, fil-paġna 14 tar-risposta tagħha tat-30 ta’ April 2014 għad-dikjarazzjoni tal-oġġezzjonijiet, li hija kienet irċeviet mingħand il-konsulent legali Norveġiż tagħha, qabel it-18 ta’ Diċembru 2012, l-informazzjoni li l-kundizzjonijiet għall-applikazzjoni tal-Artikolu 7(2) tar-Regolament Nru 139/2004 kienu ssodisfatti. Fil-fatt, ir-rikorrenti indikat li din l-informazzjoni kienet ġiet “imtennija bil-miktub” fil-memorandum ta’ dan il-konsulent tat-18 ta’ Diċembru 2012.

283

Madankollu, il-konstatazzjoni tal-Kummissjoni, li r-rikorrenti “ma pproduċietx elementi li jipprovaw” li hija kienet irċeviet tali evalwazzjoni qabel it-18 ta’ Diċembru 2012, hija korretta. Fil-fatt, għalkemm ir-rikorrenti impliċitament ikkonfermat, fir-risposta tagħha għad-dikjarazzjoni tal-oġġezzjonijiet, li hija rċeviet mill-konsulent legali Norveġiż tagħha, qabel it-18 ta’ Diċembru 2012, l-informazzjoni li l-kundizzjonijiet għall-applikazzjoni tal-Artikolu 7(2) tar-Regolament Nru 139/2004 kienu ssodisfatti, hija ma pproduċiet l-ebda prova f’dan ir-rigward. B’mod partikolari hija ma pproduċietx, fl-anness tar-risposta tagħha għad-dikjarazzjoni tal-oġġezzjonijiet, l-ittri tad-29 ta’ Novembru u tal-14 ta’ Diċembru 2012, iċċitati fil-punti 264, 268 u 273 iktar ’il fuq, li hija pproduċiet fl-anness tar-rikors.

284

Fi kwalunkwe każ, dawn l-ittri ma jpoġġux f’dubju in-negliġenza tar-rikorrenti. Fir-rigward tal-ittra tad-29 ta’ Novembru 2012, prodotta quddiem il-Qorti Ġenerali, jeħtieġ li jitfakkar li din tal-aħħar ma ssemmix l-Artikolu 7(2) tar-Regolament Nru 139/2004 u li ma tinkludix analiżi vera tal-obbligi tar-rikorrenti (ara l-punti 264 sa 266 iktar ’il fuq). Dan jgħodd ukoll għall-ittra tal-konsulent legali tal-uffiċċju ta’ avukati F. tal-14 ta’ Diċembru 2012 (ara l-punti 273 sa 275 iktar ’il fuq).

285

Fi kwalunkwe każ, anki jekk jiġi preżunt li r-rikorrenti kienet kisbet, qabel it-18 ta’ Diċembru 2012, min-naħa tal-konsulenti legali l-informazzjoni li l-Artikolu 7(2) tar-Regolament Nru 139/2004 kien applikabbli, dan ma jpoġġix f’dubju l-konstatazzjoni li l-aġir tar-rikorrenti kien negliġenti.

286

Min-naħa, jeħtieġ li jitfakkar li impriża ma tistax taħrab mill-impożizzjoni ta’ multa meta l-ksur tar-regoli tal-kompetizzjoni jkun joriġina minn żball ta’ din l-impriża dwar il-legalità tal-aġir tagħha minħabba l-kontenut tal-parir legali ta’ avukat (ara l-punt 238 iktar ’il fuq).

287

Min-naħa l-oħra, l-ittra tal-konsulent legali Norveġiż tar-rikorrenti tal-14 ta’ Diċembru 2012, li tibbaża ruħha fuqha r-rikorrenti, mhux talli ma tikkonfermax li r-rikorrenti tat prova ta’ diliġenza, iżda tirrileva n-negliġenza tagħha, peress li minnha jirriżulta li “ħadd ma [kien i]ffoka wisq” fuq l-aspett tad-dritt tal-kompetizzjoni sal-jum stess tal-iffirmar tas-SPA.

288

Kieku r-rikorrenti aġixxiet bħala operatur diliġenti, hija kienet tiżgura ruħha li kien twettaq analiżi sħiħ tal-implikazzjonijiet tas-SPA mill-perspettiva tad-dritt tal-kompetizzjoni qabel l-iffirmar tas-SPA, iktar u iktar meta is-SPA kien jipprovdi li l-konklużjoni tal-akkwist kellha sseħħ mhux iktar tard minn tlett ijiem ta’ xogħol wara l-iffirmar tiegħu.

289

Ir-rikorrenti tibbaża ruħha wkoll fuq ittra mibgħuta lilha mill-avukat tal-kumpannija F. fis-27 ta’ Jannar 2013. F’dan ir-rigward, jeħtieġ li jiġi kkonstatat li din l-ittra ntbagħtet wara l-konklużjoni tal-akkwist ta’ Diċembru 2012 u li għaldaqstant bl-ebda mod ma tista’ teżenta lir-rikorrenti mir-responsabbiltà tagħha. Barra minn hekk, dan l-ittra ma tinkludix analiżi veru tal-kundizzjonijiet previsti fl-Artikolu 7(2) tar-Regolament Nru 139/2004, iżda sempliċiment u essenzjalment tirriproduċi l-kliem ta’ din id-dispożizzjoni. B’mod partikolari, din l-ittra ma ssemmix il-kunċett ta’ “konċentrazzjoni unika”.

290

Minn dan li ntqal jirriżulta li kien b’mod ġust li l-Kummissjoni kkonstatat li l-ksur tal-Artikolu 4(1) u tal-Artikolu 7(1) tar-Regolament Nru 139/2004 kien twettaq b’negliġenza.

291

Għaldaqstant hemm lok li jiġi miċħud it-tieni motiv.

C.

Fuq it-tielet motiv, ibbażat fuq ksur tal-prinċipju ġenerali ta’ ne bis in idem

292

Ir-rikorrenti ssostni li l-Kummissjoni imponiet fuqha, fid-deċiżjoni kkontestata, żewġ multi għall-istess u uniku aġir, bi ksur tal-prinċipju ġenerali ta’ ne bis in idem. Hija tirrileva li ksur tal-obbligu ta’ notifika, previst fl-Artikolu 4(1), tar-Regolament Nru 139/2004 iwassal neċessarjament għal ksur tal-obbligu ta’ status quo, previst fl-Artikolu 7(1) ta’ dan l-istess regolament. Fl-opinjoni tagħha, il-ksur tal-Artikolu 4(1) tar-Regolament Nru 139/2004 huwa l-ksur l-iktar speċifiku, filwaqt li l-ksur tal-Artikolu 7(1) ta’ dan l-istess regolament huwa ksur iktar ġenerali, b’tali mod li l-ksur tal-Artikolu 4(1) tar-Regolament Nru 139/2004 jiġbor fih il-ksur tal-Artikolu 7(1) ta’ dan l-istess regolament jew jipprekludi, tal-inqas, lill-Kummissjoni milli timponi multa distinta għal dan tal-aħħar.

293

Il-Kummissjoni tikkontesta l-argumenti tar-rikorrenti.

1.

Osservazzjonijiet preliminari fuq ir-relazzjoni bejn l-Artikolu 4(1), l-Artikolu 7(1) u l-Artikolu 14(2)(a) u (b) tar-Regolament Nru 139/2004

294

Jeħtieġ li jiġi rrilevat li, kif issostni r-rikorrenti u kif tikkonċedi l-Kummissjoni, ksur tal-Artikolu 4(1) tar-Regolament Nru 139/2004 iwassal awtomatikament għal ksur tal-Artikolu 7(1) tar-Regolament Nru 139/2004. Fil-fatt, jekk impriża tikser l-obbligu, previst fl-Artikolu 4(1), tar-Regolament Nru 139/2004, li tinnotifika konċentrazzjoni qabel it-twettiq tagħha, dan ikollu bħala konsegwenza l-ksur tal-projbizzjoni li twettaq konċentrazzjoni qabel in-notifika u l-awtorizzazzjoni tagħha.

295

Madankollu, il-kuntrarju ta’ dan ma huwiex minnu. Fil-fatt, meta impriża tinnotifika konċentrazzjoni qabel it-twettiq tagħha, iżda twettaqha qabel ma din tiġi ddikjarata kompatibbli mas-suq intern, hija tikser l-Artikolu 7(1) iżda mhux l-Artikolu 4(1), tar-Regolament Nru 139/2004.

296

Barra minn hekk, hemm lok li jitfakkar li l-Artikolu 14(2)(a) u (b) tar-Regolament Nru 139/2004 jipprevedi l-possibbiltà tal-impożizzjoni ta’ multi, minn naħa, għal ksur tal-obbligu ta’ notifika prevista fl-Artikolu 4 tar-Regolament Nru 139/2004 u, min-naħa l-oħra, għal twettiq ta’ konċentrazzjoni bi ksur tal-Artikolu 7 tal-istess regolament.

297

Minn dak li ntqal jirriżulta li, meta impriża tikser l-Artikolu 4(1), tar-Regolament Nru 139/2004, hija tikser awtomatikament l-Artikolu 7(1) ta’ dan l-istess regolament, li, skont il-kliem ta’ dan ir-regolament, iwassal għall-possibbiltà li l-Kummissjoni timponi multi kemm skont l-Artikolu 14(2)(a) tar-Regolament Nru 139/2004 kif ukoll tal-Artikolu 14(2)(b) ta’ dan l-istess regolament.

298

Jeħtieġ li jiġi osservat li din hija sitwazzjoni li ilha teżisti biss sa mid-dħul fis-seħħ tar-Regolament Nru 139/2004. F’dan ir-rigward, jeħtieġ li jitfakkar li l-Artikolu 4(1) tar-Regolament Nru 139/2004 ma għadux jipprevedi, għan-notifika ta’ konċentrazzjonijiet, it-terminu ta’ ġimgħa dekorribbli mill-konklużjoni tal-ftehim jew tal-pubblikazzjoni tal-offerta ta’ xiri, li kien previst fl-Artikolu 4(1) tar-Regolament Nru 4064/89 (ara l-punt 225 iktar ’il fuq).

299

Skont ir-Regolament Nru 4064/89 kien possibbli li jinkiser l-Artikolu 4(1) ta’ dan ir-Regolament, mingħajr ma jinkiser l-Artikolu 7(1) ta’ dan l-istess regolament. Fil-fatt, impriża li kienet tkun innotifikat konċentrazzjoni iktar minn ġimgħa wara l-konklużjoni tal-ftehim, iżda li kienet tistenna l-awtorizzazzjoni tal-Kummissjoni qabel ma twettaqha, kienet tikser l-Artikolu 4(1) tar-Regolament Nru 4064/89, iżda mhux l-Artikolu 7(1) ta’ dan l-istess regolament.

300

Fir-rigward tas-sanzjonijiet previsti, jeħtieġ li jiġi rrilevat li, skont l-Artikolu 14(1)(a) tar-Regolament Nru 4064/89, l-assenza ta’ notifika skont l-Artikolu 4 tal-istess regolament kienet issanzjonata b’multi li jammontaw biss għal ECU 1 000 sa 50 000. It-twettiq ta’ konċentrazzjoni bi ksur tal-Artikolu 7(1) tar-Regolament Nru 4064/89 kien, skont l-Artikolu 14(2)(b) ta’ dan ir-regolament, issanzjonat b’multi li jistgħu jilħqu 10 % tad-dħul mill-bejgħ totali mwettaq mill-impriżi kkonċernati.

301

Għall-kuntrarju, fir-Regolament Nru 139/2004, il-ksur tal-obbligu ta’ notifika prevista fl-Artikolu 4 ma għadux iktar ikkontemplat fl-Artikolu 14(1) iżda jinsab fl-Artikolu 14(2) ta’ dan l-istess regolament, fatt li jimplika li l-iskali tal-pieni għall-ksur tal-Artikolu 4(1) u għall-ksur tal-Artikolu 7(1) ta’ dan ir-regolament huma issa identiċi u jikkorrispondu għall-possibbiltà tal-impożizzjoni ta’ li jistgħu jilħqu 10 % tad-dħul mill-bejgħ totali mwettaq mill-impriżi kkonċernati.

302

Minkejja li l-Artikolu 4(1) tar-Regolament Nru 139/2004 jipprevedi obbligu li ssir azzjoni (li tiġi nnotifikata konċentrazzjoni qabel it-twettiq tagħha) u li l-Artikolu 7(1) ta’ dan l-istess regolament jipprevedi obbligu li ma ssirx azzjoni (li ma titwettaqx konċentrazzjoni qabel in-notifika u l-awtorizzazzjoni tagħha), ksur tal-obbligu li ssir azzjoni twassal awtomatikament għal ksur tal-obbligu li ma ssirx azzjoni previst fl-Artikolu 7(1) tar-Regolament Nru 139/2004. Fil-fatt, skont il-kuntest legali attwali, huwa biss fil-mument tat-twettiq ta’ konċentrazzjoni li huwa possibbli li jiġi magħruf b’mod definittiv jekk impriża nnotifikatx il-konċentrazzjoni qabel it-twettiq tagħha.

303

Minn dan isegwi li, fil-mument li fih impriża tikser l-Artikolu 4(1) tar-Regolament Nru 139/2004, awtomatikament jiġi skattat ksur tal-Artikolu 7(1) tar-Regolament Nru 139/2004. Fil-fatt, fil-mument tat-twettiq tal-konċentrazzjoni, l-impriża kkonċernata tikser l-obbligu li tinnotifika l-konċentrazzjoni qabel it-twettiq tagħha, previst fl-Artikolu 4(1) tar-Regolament Nru 139/2004 u l-projbizzjoni korrispondenti li titwettaq konċentrazzjoni qabel ma tiġi nnotifika, prevista fl-Artikolu 7(1), l-ewwel alternattiva tar-Regolament Nru 139/2004. Fl-istess ħin, hija tikser il-projbizzjoni li titwettaq konċentrazzjoni qabel ma tiġi awtorizzata, prevista fl-Artikolu 7(1), it-tieni alternattiva tar-Regolament Nru 139/2004, peress li konċentrazzjoni li ma ġietx innotifikata ma tistax tiġi ddikjarata kompatibbli mas-suq intern.

304

F’dan il-kuntest, jeħtieġ li jiġi rrilevat li ma huwiex ikkontestat, f’dan il-każ, li ksur tal-Artikolu 4(1) tar-Regolament Nru 139/2004 jikkostitwixxi ksur instantanju. Madankollu, ksur tal-Artikolu 7(1) tar-Regolament Nru 139/2004 huwa ksur kontinwu li jipperdura sakemm l-operazzjoni ma tiġix iddikjarata kompatibbli mas-suq intern mill-Kummissjoni, kif ikkonstatat il-Kummissjoni fil-punti 128, 165 u 166 tad-deċiżjoni kkontestata [ara, fir-rigward tal-Artikolu 7(1) tar-Regolament Nru 4064/89, is-sentenza tat-12 ta’ Diċembru 2012, Electrabel vs Il-Kummissjoni, T-332/09, EU:T:2012:672, punt 212].

305

F’dan il-każ, il-Kummissjoni rrilevat, fil-punt 127 tad-deċiżjoni kkontestata, li l-aġir li ta lok għall-ksur tal-Artikolu 4(1) tar-Regolament Nru 139/2004 u għall-ksur tal-Artikolu 7(1) ta’ dan l-istess regolament kien wieħed u l-istess aġir, jiġifieri t-twettiq ta’ konċentrazzjoni ta’ daqs Komunitarju qabel in-notifika u l-awtorizzazzjoni tagħha. B’risposta għal mistoqsija bil-miktub magħmula f’dan ir-rigward mill-Qorti Ġenerali, il-Kummissjoni kkonfermat li hija ma tikkontestax li l-fatti li wasslu għall-ksur ta’ dawn iż-żewġ dispożizzjonijiet kienu f’dan il-każ identiċi.

306

Hemm lok li jiġi kkonstatat li l-kuntest legali attwali ma huwiex wieħed tas-soltu, sa fejn jeżistu żewġ artikoli fir-Regolament Nru 139/2004, li skonthom il-ksur huwa ssanzjonat b’multi fl-istess skala ta’ pieni, iżda li għalihom ksur tal-ewwel artikolu jwassal neċessarjament għal ksur tat-tieni. Madankollu jeħtieġ li jiġi rrilevat li dan huwa l-kuntest legali li kellha tapplika l-Kummissjoni u li r-rikorrenti ma tqajjem l-ebda eċċezzjoni ta’ illegalità fir-rigward ta’ ċerti dispożizzjonijiet tar-Regolament Nru 139/2004.

2.

Fuq l-applikabbiltà tal-prinċipju ta’ ne bis in idem għall-każ odjern

307

Skont ġurisprudenza stabbilita, il-prinċipju ta’ ne bis in idem għandu jiġi osservat fil-proċeduri intiżi għall-impożizzjoni ta’ multi li jaqgħu taħt id-dritt tal-kompetizzjoni. Dan il-prinċipju jipprekludi, fil-qasam tal-kompetizzjoni, li impriża tiġi kkundannata jew imħarrka darba oħra minħabba aġir antikompetittiv li abbażi tiegħu ġiet issanzjonata jew li fir-rigward tiegħu ġiet iddikjarata li ma hijiex responsabbli b’deċiżjoni preċedenti li ma tistax tiġi appellata (ara s-sentenza tal-14 ta’ Frar 2012, Toshiba Corporation et, C-17/10, EU:C:2012:72, punt 94 u l-ġurisprudenza ċċitata).

308

Il-Qorti tal-Ġustizzja qieset, fil-kawżi dwar il-kompetizzjoni, li l-applikazzjoni tal-prinċipju ta’ ne bis in idem kienet suġġetta għall-kundizzjoni tripla tal-identità tal-fatti, ta’ min wettaq il-ksur u tal-interess ġuridiku protett (ara s-sentenza tal-14 ta’ Frar 2012, Toshiba Corporation et, C-17/10, EU:C:2012:72, punt 97 u l-ġurisprudenza ċċitata).

309

Mill-ġurisprudenza ċċitata fil-punt 307 iktar ’il fuq jirriżulta li l-prinċipju ta’ ne bis in idem għandu żewġ partijiet. Dan tal-aħħar jipprojbixxi kemm li impriża tiġi “ipproċessata” għal darba oħra li kif ukoll li din l-impriża tiġi “kkundannata” għal darba oħra. Madankollu, skont il-formulazzjoni riprodotta fil-punt 307 iktar ’il fuq, iż-żewġ partijiet jippreżumu li l-impriża inkwistjoni tkun ġiet issanzjonata jew iddikjarata mhux responsabbli “b’deċiżjoni preċedenti li ma tistax tiġi appellata”.

310

Barra minn hekk, jeħtieġ li jitfakkar li l-Artikolu 50 tal-Karta tad-Drittijiet Fundamentali tal-Unjoni Ewropea huwa redatt kif ġej:

311

Dan l-artikolu wkoll jinkludi ż-żewġ partijiet, jiġifieri l-projbizzjoni ta’ ipproċessar doppju u dik ta’ issanzjonar doppju (ipproċessat jew issanzjonat). Barra minn hekk jeħtieġ li jiġi rrilevat li dan l-artikolu jsemmi b’mod ċar sentenza “li daħlet f’ġudikat”, mingħajr ma jiddistingwi bejn iż-żewġ partijiet. Barra minn hekk, dan l-artikolu jsemmi l-fatt li l-persuna kkonċernata “diġà” instabet mhux ħatja jew ikkundannata permezz ta’ sentenza, fatt li jikkonferma ċ-ċirkustanza li dan għandu jkun seħħ permezz ta’ sentenza preċedenti.

312

Ċertament, il-prinċipju ta’ ne bis in idem japplika fil-proċeduri intiżi għall-impożizzjoni ta’ multi, li jaqgħu taħt id-dritt tal-kompetizzjoni, u dan indipendentement mill-klassifikazzjoni ta’ dawn il-multi bħala li huma ta’ natura penali jew le. Barra minn hekk, fil-qasam tad-dritt tal-kompetizzjoni, li fih il-multi jiġu imposti mill-Kummissjoni, l-eżistenza ta’ “sentenza” li timponi multa ma hijiex neċessarja. Kif inhu rifless fil-formulazzjoni riprodotta fil-punt 307 iktar ’il fuq, huwa biżżejjed li tkun teżisti “deċiżjoni” preċedenti li ma għadhiex tista’ tiġi appellata. B’hekk il-mera eżistenza ta’ deċiżjoni tal-Kummissjoni li timponi multa, li ma tkunx ġiet ikkontestata fit-termini u li għaldaqstant ma tistax tiġi appellata, hija biżżejjed sabiex ikun jista’ japplika l-prinċipju ta’ ne bis in idem. Madankollu, l-element “definittiv” li jirriżulta mill-Artikolu 50 tal-Karta tad-Drittijiet Fundamentali japplika wkoll fid-dritt tal-kompetizzjoni, u dan kif jirriżulta mill-formulazzjoni “deċiżjoni preċedenti li ma tistax tiġi appellata”.

313

Sussegwentement, l-Artikolu 4(1) tal-Protokoll Nru 7 tal-KEDB huwa fformulat kif ġej:

314

Din id-dispożizzjoni tinkludi wkoll iż-żewġ partijiet, jiġifieri l-projbizzjoni ta’ ipproċessar doppju u ta’ sanzjoni doppja (ipproċessat jew issanzjonat), u tippreżumi wkoll l-eżistenza ta’ sentenza “definittiva”. Barra minn hekk, din issemmi l-fatt li l-persuna kkonċernata “diġà” ġiet meħlusa jew ikkundannata b’sentenza, fatt li jikkonferma ċ-ċirkustanza li dan għandu jkun seħħ permezz ta’ sentenza preċedenti.

315

Għaldaqstant, il-kliem ta’ dawn id-dispożizzjonijiet ma jkoprux sitwazzjoni li fiha awtorità timponi żewġ sanzjonijiet f’waħda u l-istess deċiżjoni, kif inhuwa l-każ fil-kawża odjerna.

316

Dan kollu huwa konformi mar-raġuni għall-eżistenza tal-prinċipju ta’ ne bis in idem. Fil-fatt, skont dan il-prinċipju, meta l-awtur tal-ksur hija pproċessat u kkundannat, dan għandu jkun jaf li, bl-eżekuzzjoni tal-piena, huwa ħallas għan-nuqqas tiegħu, u m’għandux jibqa’ jibża’ li tiġi imposta fuqu sanzjoni ġdida (Konklużjonijiet tal-Avukat Ġenerali Ruiz-Jarabo Colomer fil-Kawżi Gözütok u Brügge, C-187/01 u C-385/01, EU:C:2002:516, punt 49).

317

L-impożizzjoni ta’ żewġ sanzjonijiet f’waħda u l-istess deċiżjoni ma tmurx kontra dan l-għan. Fil-fatt, kif irrilevat il-Kummissjoni, b’risposta għal mistoqsija magħmula f’dan ir-rigward lill-partijiet, meta jiġu imposti żewġ sanzjonijiet f’waħda u l-istess u deċiżjoni, il-persuna kkonċernata tista’ taċċerta ruħha li ma hijiex sejra tiġi ssanzjonata mill-ġdid għall-istess ksur.

318

Ċertament huwa minnu li, fir-rikors, ir-rikorrenti ma invokax b’mod espliċitu l-prinċipju ta’ ne bis in idem, iżda l-prinċipju nemo debet bis puniri pro uno delicto. Madankollu, ir-rikorrenti tikkonferma, b’risposta għal mistoqsija bil-miktub magħmula f’dan ir-rigward mill-Qorti Ġenerali, li l-prinċipju invokat minnha kien jikkorrispondi għat-tieni parti tal-prinċipju ta’ ne bis in idem, jiġifieri l-projbizzjoni ta’ sanzjoni doppja, u li hija ma kinitx qiegħda tinvoka prinċipju distint mill-prinċipju ta’ ne bis in idem. Il-Kummissjoni kkonfermat ukoll, b’risposta għal mistoqsijiet bil-miktub magħmula mill-Qorti Ġenerali, li l-prinċipju nemo debet bis puniri pro uno delicto kien jikkorrispondi għat-tieni parti tal-prinċipju ta’ ne bis in idem.

319

Hemm lok li jiġi kkonstatat li l-prinċipju ta’ ne bis in idem ma japplikax f’dan il-każ, peress li s-sanzjonijiet ġew imposti mill-istess awtorità f’waħda u fl-istess deċiżjoni.

320

Dan ir-riżultat la huwa kkontestat mill-argumenti tar-rikorrenti u lanqas mill-ġurisprudenza tal-qrati tal-Unjoni jew tal-Qorti Ewropea tad-Drittijiet tal-Bniedem (iktar ’il quddiem il-“Qorti EDB”).

321

Ir-rikorrenti kkonfermat, b’risposta għal mistoqsijiet bil-miktub magħmula mill-Qorti Ġenerali, li l-ġurisprudenza ferm stabbilta tal-qrati tal-Unjoni fil-qasam tad-dritt tal-kompetizzjoni tat diversi eżempji li fihom il-prinċipju ta’ ne bis in idem ġie applikat meta kienu ġew imposti diversi multi f’waħda u fl-istess deċiżjoni.

322

F’dan ir-rigward, fl-ewwel lok, ir-rikorrenti tibbaża ruħha fuq is-sentenza tal-21 ta’ Lulju 2011, Beneo-Orafti (C-150/10, EU:C:2011:507). Hija tikkonferma li mill-punt 68 ta’ din is-sentenza jirriżulta li l-Qorti tal-Ġustizzja applikat il-prinċipju ta’ ne bis in idem billi eżaminat il-kwistjoni dwar jekk il-prinċipju ta’ ne bis in idem jipprekludix applikazzjoni kumulattiva tal-miżuri previsti fl-Artikolu 26 (1) u fl-Artikolu 27 tar-Regolament Nru 968/2006 tal-Kummissjoni, tas-27 ta’ Ġunju 2006, li jistipula regoli ddettaljati għall-implementazzjoni tar-Regolament tal-Kunsill (KE) Nru 320/2006 li jistabbilixxi skema temporanja għar-ristrutturar tal-industrija taz-zokkor fil-Komunità (ĠU L 176, p. 32).

323

Madankollu jeħtieġ li jiġi rrilevat li, f’dik il-kawża, il-Qorti tal-Ġustizzja kkonstatat li l-prinċipju ta’ ne bis in idem ma kienx intiż li jiġi applikat minħabba l-fatt li waħda biss mit-tliet miżuri inkwistjoni f’dik il-kawża setgħet tiġi kklassifikata bħala sanzjoni (sentenza tal-21 ta’ Lulju 2011, Beneo-Orafti, C-150/10, EU:C:2011:507, punt 74). Peress li l-Qorti tal-Ġustizzja ċaħdet l-applikabbiltà tal-prinċipju ta’ ne bis in idem għal raġuni oħra, hija sempliċiment ma tatx deċiżjoni fuq il-kwistjoni dwar jekk dan il-prinċipju japplikax f’sitwazzjoni li fiha jiġu imposti diversi sanzjonijiet f’waħda u l-istess deċiżjoni, jew li fiha tiġi imposta t-tieni sanzjoni meta d-deċiżjoni li timponi l-ewwel sanzjoni tkun għadha ma saritx definittiva.

324

Sa fejn ir-rikorrenti tibbaża ruħha fuq il-konklużjonijiet tal-Avukat Ġenerali Bot fil-Kawża Beneo-Orafti (C-150/10, EU:C:2011:164), huwa suffiċjenti li jiġi kkonstatat li l-Qorti tal-Ġustizzja ma segwietx dawn il-konklużjonijiet fir-rigward tal-applikabbiltà tal-prinċipju ne bis in idem.

325

Fit-tieni lok, ir-rikorrenti tinvoka s-sentenza tat-13 ta’ Diċembru 2006, FNCBV et vs Il-Kummissjoni (T-217/03 u T-245/03, EU:T:2006:391). Il-partijiet rikorrenti fil-kawża li tat lok għal dik is-sentenza sostnew li l-Kummissjoni kienet kisret il-prinċipju ta’ ne bis in idem billi imponiet, f’deċiżjoni waħda, multi fuq diversi assoċjazzjonijiet, li l-membri tagħhom kellhom fihom partijiet identiċi. Skont dawn ir-rikorrenti, għaldaqstant dawn il-membri ġarrbu indirettament diversi multi.

326

Il-Qorti Ġenerali sempliċiment ikkonstatat, fil-punt 344 tas-sentenza tat-13 ta’ Diċembru 2006, FNCBV et vs Il-Kummissjoni (T-217/03 u T-245/03, EU:T:2006:391), li l-persuni li kisru r-regoli ma kinux identiċi, sa fejn id-deċiżjoni kkontestata ma kinitx tissanzjona diversi drabi l-istess entitajiet jew l-istess persuni għall-istess fatti, b’tali mod li kinitx kisret il-prinċipju ta’ ne bis in idem. Għaldaqstant hija ma tatx deċiżjoni fuq il-kwistjoni dwar jekk il-prinċipju ta’ ne bis in idem jistax japplika fil-każ li fih ikunu ġew imposti diversi sanzjonijiet f’waħda u fl-istess deċiżjoni.

327

Fis-sentenza li tiddeċiedi l-appell mill-aħħar imsemmija sentenza, jiġifieri s-sentenza tat-18 ta’ Diċembru 2008, Coop de France bétail et viande et vs Il-Kummissjoni (C-101/07 P u C-110/07 P, EU:C:2008:741, punt 130), li hija wkoll iċċitata mir-rikorrenti, il-Qorti tal-Ġustizzja sempliċiment ikkonfermat l-approċċ tal-Qorti Ġenerali.

328

Fit-tielet lok, ir-rikorrenti tibbaża ruħha fuq is-sentenza tal-5 ta’ Ottubru 2011, Transcatab vs Il-Kummissjoni (T-39/06, EU:T:2011:562). F’dik is-sentenza, il-Qorti Ġenerali ma sabitx ksur tal-prinċipju ta’ ne bis in idem peress li kien hemm fatti identiċi u lanqas persuni responsabbli identiċi (ara l-punti 255 sa 259 ta’ dik is-sentenza). Il-Qorti Ġenerali ma tatx deċiżjoni fuq il-kwistjoni dwar jekk japplikax il-prinċipju ta’ ne bis in idem f’sitwazzjoni li fiha jkunu ġew imposti diversi multi f’waħda u fl-istess deċiżjoni.

329

Fl-aħħar, ir-rikorrenti tibbaża ruħha fuq is-sentenza tal-14 ta’ Frar 2012, Toshiba Corporation et (C-17/10, EU:C:2012:72). Hija ssostni li, f’din is-sentenza, il-prinċipju ta’ ne bis in idem ġie applikat għal deċiżjoni tal-Kummissjoni tal-24 ta’ Jannar 2007 li kienet għadha ma saritx definittiva, tal-inqas fir-rigward ta’ Toshiba u destinatarji prinċipali oħrajn, anki fid-data tal-għoti tas-sentenza tal-Qorti tal-Ġustizzja, fl-14 ta’ Frar 2012.

330

Madankollu, jeħtieġ li jiġi rrilevat li, fis-sentenza tal-14 ta’ Frar 2012, Toshiba Corporation et (C-17/10, EU:C:2012:72, punti 98 sa 103), il-Qorti tal-Ġustizzja ċaħdet l-applikabbiltà tal-prinċipju ta’ ne bis in idem għal raġuni oħra, dik li l-fatti ma kinux identiċi.

331

Barra minn hekk, ir-rikorrenti tiddikjara li, fis-sentenza tal-14 ta’ Frar 2012, Toshiba Corporation et (C-17/10, EU:C:2012:72), il-Qorti tal-Ġustizzja applikat il-prinċipju ta’ ne bis in idem sa mill-“adozzjoni tad-deċiżjoni [tal-Kummissjoni]”. Hemm lok li jiġi kkonstatat li huwa ċertament minnu li, fil-punt 103 ta’ din is-sentenza, il-Qorti tal-Ġustizzja ssemmi “deċiżjoni tal-Kummissjoni adottata qabel id-deċiżjoni tal-imsemmija awtorità nazzjonali tal-kompetizzjoni” u mhux deċiżjoni “li saret definittiva” qabel din id-data. Xorta jibqa’ l-fatt li, fil-punt 94 ta’ din is-sentenza, il-Qorti tal-Ġustizzja tirrileva b’mod ċar li l-prinċipju ta’ ne bis in idem jipprekludi “li impriża tiġi kkundannata jew imħarrka darba oħra minħabba aġir antikompetittiv li abbażi tiegħu ġiet issanzjonata jew li fir-rigward tiegħu ġiet iddikjarata li ma hijiex responsabbli b’deċiżjoni preċedenti li ma tistax tiġi appellata”. Għaldaqstant minn dik is-sentenza jirriżulta b’mod ċar li l-prinċipju ta’ ne bis in idem ma japplikax fl-assenza ta’ deċiżjoni preċedenti definittiva.

332

Hemm lok li jiġi kkonstatat li r-rikorrenti ma tidentifika l-ebda sentenza tal-qrati tal-Unjoni li fiha ġie kkonstatat ksur tal-prinċipju ta’ ne bis in idem f’sitwazzjoni li fiha ġew imposti diversi sanzjonijiet f’waħda u fl-istess deċiżjoni, jew li fiha ġiet imposta t-tieni sanzjoni qabel ma saret definittiva d-deċiżjoni li timponi l-ewwel sanzjoni.

333

Fir-rigward tal-ġurisprudenza tal-Qorti tal-Ġustizzja EDB, minn din tal-aħħar jirriżulta b’mod ċar li l-prinċipju ta’ ne bis in idem ma japplikax f’sitwazzjoni li fiha jiġu imposti diversi sanzjonijiet f’waħda u fl-istess deċiżjoni.

334

B’hekk, mis-sentenza tal-Qorti EDB tas-7 ta’ Diċembru 2006, Hauser-Sporn vs L-Awstrija (CE:ECHR:2006:1207JUD003730103), jirriżulta li l-fatt waħdu li att ikun jikkostitwixxi iktar minn ksur wieħed ma jmurx kontra l-Artikolu 4 tal-Protokoll Nru 7 tal-KEDB. Skont din l-istess sentenza, huwa biss meta diversi istanzi ta’ ksur ibbażati fuq l-istess fatti jiġu pproċessati b’mod konsekuttiv, waħda wara deċiżjoni finali li tikkonċerna l-istanza l-oħra ta’ ksur, li hemm lok li, skont il-Qorti tal-Ġustizzja EDB, li jiġi eżaminat jekk l-istanzi ta’ ksur jikkondividux l-istess elementi essenzjali.

335

Barra minn hekk, fis-sentenza tal-Qorti tal-Ġustizzja EDB tas-17 ta’ Frar 2015, Boman vs Il-Finlandja (CE:ECHR:2015:0217JUD004160411), din tal-aħħar rrilevat li:

336

Ir-rikorrenti ammettiet, b’risposta għall-mistoqsijiet bil-miktub magħmula mill-Qorti Ġenerali, li, f’każ ta’ sanzjonijiet suċċessivi, il-Qorti tal-Ġustizzja EDB tapplika l-prinċipju ta’ ne bis in idem jekk id-deċiżjoni li timponi l-ewwel sanzjoni tkun saret definittiva.

337

Madankollu, hija tikkonferma li l-ġurisprudenza tal-qrati tal-Unjoni toffri protezzjoni iktar estiża mill-piena doppja, billi tapplika dan il-prinċipju sa mill-adozzjoni ta’ deċiżjoni, anki jekk din tal-aħħar tkun għadha ma saritx definittiva.

338

Dan l-argument ma jistax jintlaqa’. Fil-fatt, mill-ġurisprudenza ċċitata fil-punt 307 iktar ’il fuq jirriżulta b’mod ċar li l-prinċipju ta’ ne bis in idem “jipprekludi, fil-qasam tal-kompetizzjoni, li impriża tiġi kkundannata jew imħarrka darba oħra minħabba aġir antikompetittiv li abbażi tiegħu ġiet issanzjonata jew li fir-rigward tiegħu ġiet iddikjarata li ma hijiex responsabbli b’deċiżjoni preċedenti li ma tistax tiġi appellata”. Kif jirriżulta mill-punti 322 sa 332 iktar ’il fuq, dan il-prinċipju ma huwiex impoġġi f’dubju mill-ġurisprudenza li tibbaża ruħha fuqha r-rikorrenti.

339

Fl-aħħar, hemm lok li jiġi osservat li, fir-rikors, ir-rikorrenti semmiet ukoll il-prinċipju ta’ imputazzjoni (Anrechnungsprinzip). B’risposta għal mistoqsijiet bil-miktub magħmula mill-Qorti Ġenerali, ir-rikorrenti speċifikat li t-tielet motiv kien ibbażat fuq ksur tal-prinċipju ta’ ne bis in idem, li l-prinċipju ta’ imputazzjoni kien jikkostitwixxi prinċipju distint, iżda marbut mal-prinċipju ta’ ne bis in idem, u li l-prinċipju ta’ imputazzjoni kien ġie applikat f’każijiet li fihom il-prinċipju ta’ ne bis in idem ma kienx japplika b’mod sħiħ. Barra minn hekk, ir-rikorrenti speċifikat li, fl-opinjoni tagħha, il-prinċipju ta’ imputazzjoni ma kellux japplika għal dan il-każ, peress li kellu japplika l-prinċipju ta’ ne bis in idem. Hija ssostni li, fi kwalunkwe każ, anki jekk il-Qorti Ġenerali kellha tiddeċiedi li kienu jeżisti raġunijiet għall-applikazzjoni tal-prinċipju ta’ imputazzjoni f’dan il-każ, ir-riżultat kellu bla dubju jkun l-istess, jiġifieri li l-ammont tal-ewwel multa kellu jitnaqqas minn dak tat-tieni.

340

Jeħtieġ li jiġi rrilevat li l-prinċipju ta’ imputazzjoni ġie diskuss, fil-qasam tad-dritt tal-kompetizzjoni, f’sitwazzjonijiet li jikkonċernaw multi imposti fi Stat Membru jew fi stat terz.

341

Fis-sentenza tat-13 ta’ Frar 1969, Wilhelm et (14/68, EU:C:1969:4), li ngħatat f’mument li fih ir-Regolament Nru 1/2003 kien għadu mhux fis-seħħ (ara, fir-rigward tas-sitwazzjoni wara l-ħolqien tal-netwerk Ewropew tal-kompetizzjoni, sentenza tat-13 ta’ Lulju 2011, ThyssenKrupp Liften Ascenseurs vs Il-Kummissjoni, T-144/07, T-147/07 sa T-150/07 u T-154/07, EU:T:2011:364, punt 187), il-Qorti tal-Ġustizzja ddikjarat dan li ġej. L-awtoritajiet tal-kompetizzjoni tal-Istati Membri jistgħu, bħala prinċipju, jintervjenu kontra akkordju, b’applikazzjoni tad-dritt intern tagħhom, anki meta tkun pendenti proċedura parallela li tikkonċerna dan l-akkordju quddiem il-Kummissjoni. Hija rrilevat ukoll, fil-punt 11 ta’ din is-sentenza, li, jekk il-possibbiltà ta’ proċedura doppja kellha twassal għal kumulazzjoni ta’ sanzjonijiet, rekwiżit ġenerali ta’ ekwità kien jitlob li għandu jittieħed kont ta’ kull “deċiżjoni repressiva preċedenti” fid-determinazzjoni ta’ sanzjoni possibbli (ara wkoll, f’dan is-sens, is-sentenza tas-6 ta’ April 1995, Sotralentz vs Il-Kummissjoni, T-149/89, EU:T:1995:69, punt 29). Barra minn hekk, il-Qorti tal-Ġustizzja rrilevat, fil-punt 3 tas-sentenza tal-14 ta’ Diċembru 1972, Boehringer Mannheim vs Il-Kummissjoni (7/72, EU:C:1972:125), li, fl-istabbiliment tal-ammont tal-multa, il-Kummissjoni kienet obbligata li tieħu inkunsiderazzjoni sanzjonijiet “diġà” subiti mill-istess impriża għall-istess fatt, meta dawn ikunu sanzjonijiet imposti għall-ksur tad-dritt tal-akkordji ta’ Stat Membru.

342

Għaldaqstant dan huwa prinċipju li japplika meta tkun teżisti “deċiżjoni repressiva preċedenti” jew, fi kliem ieħor, fil-każ ta’ sanzjonijiet għal ksur tad-dritt tal-akkordji ta’ Stat Membru li jkunu “diġà” ġew subiti mill-istess impriża għall-istess fatt, u mhux fil-każ ta’ impożizzjoni ta’ żewġ multi mill-istess awtorità f’waħda u l-istess deċiżjoni. Barra minn hekk huwa għal kollox adegwat li dawn it-tipi ta’ sitwazzjonijiet jiġu ttrattati b’mod differenti. Fil-fatt, meta l-Kummissjoni u l-awtorità ta’ Stat Membru jimponu sanzjonijiet għall-istess akkordju, jeżisti riskju li kull multa, meqjusa b’mod iżolat, tkun proporzjonata, iżda li ż-żewġ multi, meqjusa flimkien, ikunu sproporzjonati, jekk l-eżistenza tal-ewwel multa ma titteħidx inkunsiderazzjoni waqt l-istabbiliment tat-tieni multa. Madankollu, waqt l-istabbiliment ta’ diversi multi f’waħda u l-istess deċiżjoni, il-Kummissjoni tista’ tiżgura ruħha li dawn il-multi, meqjusa flimkien, huma proporzjonati, u li l-Qorti Ġenerali tista’ wkoll teżamina din il-kwistjoni.

343

Fl-aħħar, ir-rikorrenti ssostni, b’risposta għal mistoqsijiet bil-miktub magħmula mill-Qorti Ġenerali, li, fid-dawl tal-prinċipji ta’ ugwaljanza fit-trattament u ta’ proporzjonalità, l-impożizzjoni ta’ piena doppja għall-istess aġir kienet inġusta kemm fi proċeduri paralleli kif ukoll fi proċeduri suċċessivi. Dan l-argument ma jistax jintlaqa’. Fil-fatt, waqt l-impożizzjoni ta’ żewġ sanzjonijiet mill-istess awtorità f’waħda u l-istess deċiżjoni, din tal-aħħar tista’ tiżgura ruħha li s-sanzjonijiet, meqjusa flimkien, ikunu proporzjonati, u l-qorti tista’ wkoll tivverifika l-proporzjonalità tas-sanzjonijiet, meqjusa flimkien (ara l-punt 342 iktar ’il fuq). Għaldaqstant, l-impożizzjoni ta’ żewġ sanzjonijiet għall-istess aġir, mill-istess awtorità f’waħda u l-istess deċiżjoni, ma tistax titqies, bħala tali, li tmur kontra l-prinċipji ta’ ugwaljanza fit-trattament u ta’ proporzjonalità.

344

Fid-dawl ta’ dak li ntqal, il-prinċipju ta’ ne bis in idem u l-prinċipju ta’ imputazzjoni ma japplikawx għal sitwazzjoni li fiha jiġu imposti diversi sanzjonijiet f’waħda u l-istess deċiżjoni, anki jekk dawn is-sanzjonijiet jiġu imposti għall-istess fatti. Fil-verità, meta l-istess aġir jikser diversi dispożizzjonijiet sanzjonati b’multi, il-kwistjoni dwar jekk diversi multi jistgħux jiġu imposti f’waħda u l-istess deċiżjoni ma taqax taħt il-prinċipju ta’ ne bis in idem, iżda taħt il-prinċipji li jirregolaw il-konkors ta’ istanzi differenti ta’ ksur (ara, fir-rigward tal-problemi marbuta mal-konkors ta’ istanzi differenti ta’ ksur, il-punti 345 sa 373 iktar ’il quddiem).

3.

Fuq l-argumenti tar-rikorrenti dwar il-konkors ta’ istanzi differenti ta’ ksur

345

Ir-rikorrenti ssostni li, skont id-dritt internazzjonali u d-dritt Ġermaniż, il-prinċipju ta’ “kunflitt apparenti” jew “kunflitt falz” (unechte Konkurrenz) ifisser li, meta att ikun jidher li jaqa’ taħt żewġ dispożizzjonijiet legali, id-dispożizzjoni applikabbli prinċipalment għandha teskludi d-dispożizzjonijiet l-oħra abbażi tal-prinċipji ta’ sussidjarjetà, ta’ konsum jew ta’ speċjalità, li diversi Stati Membri oħra japplikaw il-prinċipju ta’ kunflitt apparenti f’forma jew oħra. Fl-opinjoni tagħha, ċertu numru ta’ Stati Membri ma jagħmlux riferiment b’mod espliċitu għall-kunċett ta’ kunflitt apparenti jew ta’ kunflitt falz, iżda jipprojbixxu wkoll l-impożizzjoni ta’ sanzjonijiet doppji għal ksur iktar serju u ksur eħfef inkluż fl-ewwel ksur.

346

Fir-rigward tad-dispożizzjonijiet inkwistjoni f’dan il-każ, ir-rikorrenti ssostni, b’mod partikolari, li l-ksur tal-Artikolu 4(1) tar-Regolament Nru 139/2004 huwa l-ksur l-iktar speċifiku, filwaqt li l-ksur tal-Artikolu 7(1) ta’ dan l-istess regolament huwa l-ksur l-iktar ġenerali, b’tali mod li l-ksur tal-Artikolu 4(1) tar-Regolament Nru 139/2004 jiġbor fih il-ksur tal-Artikolu 7(1) ta’ dan l-istess regolament jew tal-inqas, jipprekludi lill-Kummissjoni milli timponi multa distinta għal dan tal-aħħar.

347

Il-Kummissjoni tikkontesta l-argumenti tar-rikorrenti.

348

Hemm lok li jiġi kkonstatat li, fid-dritt tal-kompetizzjoni tal-Unjoni, ma jeżistux regoli speċifiċi dwar il-konkors ta’ istanzi differenti ta’ ksur. Għaldaqstant jeħtieġ li jiġu eżaminati l-argumenti tar-rikorrenti bbażati fuq prinċipji tad-dritt internazzjonali u fuq l-ordinamenti ġuridiċi tal-Istati Membri.

349

Jeħtieġ li jitfakkar li, skont l-argument tar-rikorrenti (ara l-punt 345 iktar ’il fuq), id-“dispożizzjoni applikabbli prinċipalment” għandha teskludi id-dispożizzjonijiet l-oħra kollha.

350

F’dan ir-rigward, il-Kummissjoni tenfasizza ġustament li l-leġiżlatur ma ddefinixxiex ksur bħala li wieħed huwa iktar serju mill-ieħor, it-tnejn huma suġġetti għall-livell massimu skont l-Artikolu 14(2)(a) u (b) tar-Regolament Nru 139/2004. Għaldaqstant ma hemm lok li jitqies li waħda minn dawn id-dispożizzjonijiet hija “applikabbli prinċipalment”.

351

Fir-rigward tal-argument tar-rikorrenti, li l-ksur tal-Artikolu 4(1) huwa l-ksur l-iktar speċifiku li jiġbor fih il-ksur tal-Artikolu 7(1) tar-Regolament Nru 139/2004, jeħtieġ, barra minn hekk, li jiġi rrilevat dan li ġej.

352

Hemm lok li jitfakkar li ksur tal-Artikolu 4(1) tar-Regolament Nru 139/2004 huwa ksur instantanju, filwaqt li ksur tal-Artikolu 7(1) tar-Regolament Nru 139/2004 huwa ksur kontinwu li jibda mill-mument li fih jitwettaq il-ksur tal-Artikolu 4(1) tar-Regolament Nru 139/2004 (ara l-punt 304 iktar ’il fuq).

353

Barra minn hekk, hemm lok li jiġi rrilevat li, skont l-Artikolu 1(1)(a) tar-Regolament tal-Kunsill (KEE) Nru 2988/74, tas-26 ta’ Novembru 1974, li jikkonċerna l-perijodi ta’ limitazzjoni fil-proċedimenti u l-infurzar tas-sanzjonijiet taħt ir-regoli tal-Komunità Ekonomika Ewropea dwar it-trasport u l-kompetizzjoni (ĠU Edizzjoni Speċjali bil-Malti, Kapitolu 7, Vol. 1, p. 61), it-terminu ta’ preskrizzjoni huwa ta’ tliet snin fir-rigward tal-ksur tad-dispożizzjonijiet marbut man-notifiki tal-impriżi. Minn dan isegwi li t-terminu ta’ preskrizzjoni huwa ta’ tliet snin għall-ksur tal-Artikolu 4(1) tar-Regolament Nru 139/2004. Għall-kuntrarju, għall-ksur tal-Artikolu 7(1) tar-Regolament Nru 139/2004, skont l-Artikolu 1(1)(b) tar-Regolament Nru 2988/74, it-terminu ta’ preskrizzjoni huwa ta’ ħames snin (ara, b’analoġija, is-sentenza tat-12 ta’ Diċembru 2012, Electrabel vs Il-Kummissjoni, T-332/09, EU:T:2012:672, punt 209).

354

Jekk jiġi segwit ir-raġunament tar-rikorrenti, konsegwentement impriża li tikser kemm l-obbligu tan-notifika kif ukoll il-projbizzjoni milli twettaq konċentrazzjoni qabel l-awtorizzazzjoni tagħha tkun f’pożizzjoni iktar vantaġġata meta mqabbla ma’ impriża li tikser biss il-projbizzjoni milli twettaq konċentrazzjoni qabel l-awtorizzazzjoni tagħha.

355

Fil-fatt, impriża li tinnotifika konċentrazzjoni qabel it-twettiq tagħha, iżda li twettaqha qabel ma tkun kisbet l-awtorizzazzjoni, tiġi ssanzjonata b’multi skont l-Artikolu 14(2)(b) tar-Regolament Nru 139/2004, moqri flimkien mal-Artikolu 7(1) ta’ dan l-istess regolament. Għaldaqstant hija tista’ tiġi ssanzjonata għal ksur kontinwu, li jipperdura sal-mument li fih it-tranżazzjoni tiġi ddikjarata kompatibbli mas-suq intern mill-Kummissjoni, u li għalih huwa applikabbli terminu ta’ preskrizzjoni ta’ ħames snin.

356

Għalkemm din l-istess impriża lanqas ma kienet innotifikat il-konċentrazzjoni qabel it-twettiq tagħha, il-Kummissjoni tista’, skont ir-raġunament segwit mir-rikorrenti, timponi biss multa skont l-Artikolu 14(2)(a) tar-Regolament Nru 139/2004, moqri flimkien mal-Artikolu 4(1) ta’ dan l-istess regolament. Għaldaqstant, l-impriża tista’ tiġi ssanzjonata biss għal ksur instantanju, li għalih japplika terminu ta’ preskrizzjoni ta’ tliet snin biss. Dan ifisser li impriża tkun vantaġġata billi, minbarra l-projbizzjoni milli twettaq konċentrazzjoni qabel l-awtorizzazzjoni tagħha, tikser ukoll l-obbligu li tinnotifikaha.

357

Madankollu hija eskluża interpretazzjoni tar-Regolament Nru 139/2004 li tkun twassal għal tali riżultat assurd.

358

Għaldaqstant, l-argument tar-rikorrenti, li l-ksur tal-Artikolu 4(1) tar-Regolament Nru 139/2004 huwa l-ksur l-iktar speċifiku li jiġbor fih il-ksur tal-Artikolu 7(1) tar-Regolament Nru 139/2004, ma jistax jintlaqa’.

359

Dan ir-riżultat ma huwiex impoġġi f’dubju mill-argumenti tar-rikorrenti, imqajma waqt is-seduta, maħsuba sabiex ipoġġu f’dubju l-fatt li l-istanzi ta’ ksur tal-Artikolu 4(1) tar-Regolament Nru 139/2004 huma suġġetti għal terminu ta’ preskrizzjoni ta’ tliet snin biss. Fil-fatt, skont il-kliem ċar ħafna tal-Artikolu 1(1)(a) tar-Regolament Nru 2988/74, it-terminu ta’ preskrizzjoni huwa ta’ tliet snin fir-rigward tal-ksur tad-dispożizzjonijiet marbuta man-notifika tal-impriżi.

360

Iċ-ċirkustanza, enfasizzata mir-rikorrenti, li l-leġiżlatur żied il-livell massimu tal-multi previsti għall-ksur tal-obbligu ta’ notifika, billi pprovda, fl-Artikolu 14(2) tar-Regolament Nru 139/2004 għal livell massimu ta’ 10 % tad-dħul mill-bejgħ totali mwettaq mill-impriżi kkonċernati, kontra livell massimu ta’ ECU 50 000 li kien previst fl-Artikolu 14(1)(a) tar-Regolament Nru 4064/89 (ara l-punt 300 iktar ’il fuq), ma hijiex ta’ natura li tbiddel it-terminu ta’ preskrizzjoni li huwa dejjem irregolat mill-Artikolu 1(1)(a) tar-Regolament Nru 2988/74.

361

Fi kwalunkwe każ, anki jekk jiġi preżunt li t-terminu ta’ preskrizzjoni għall-ksur tal-Artikolu 4(1) tar-Regolament Nru 139/2004 u dak għall-ksur tal-Artikolu 7(1) ta’ dan l-istess regolament huma identiċi, dan ma jpoġġix f’dubju ċ-ċirkustanza, barra minn hekk, mhux ikkontestata mir-rikorrenti, li ksur tal-Artikolu 4(1) tar-Regolament Nru 139/2004 huwa ksur instantanju, filwaqt li ksur tal-Artikolu 7(1) tar-Regolament Nru 139/2004 huwa ksur kontinwat. Għaldaqstant, anki f’din l-ipoteżi, il-fatt li l-ksur tal-Artikolu 4(1) tar-Regolament Nru 139/2004 jitqies bħala ksur iktar speċifiku li jiġbor fih il-ksur tal-Artikolu 7(1) ta’ dan l-istess regolament, iwassal għall-konsegwenza li impriża tkun vantaġġata meta tikser ukoll l-obbligu tan-notifika minbarra l-projbizzjoni milli twettaq konċentrazzjoni qabel l-awtorizzazzjoni tagħha. Fil-fatt, jekk jiġi segwit ir-raġunament tar-rikorrenti, impriża li tikser biss il-projbizzjoni milli twettaq konċentrazzjoni qabel ma tikseb l-awtorizzazzjoni tagħha tista’ tiġi ssanzjonata għal ksur kontinwu, li jipperdura sakemm it-tranżazzjoni tiġi ddikjarata kompatibbli mas-suq intern, filwaqt li impriża li tikser ukoll l-obbligu li tinnotifika l-konċentrazzjoni qabel it-twettiq tagħha tista’ tiġi ssanzjonata biss għal ksur instantanju. Għaldaqstant, din l-aħħar imsemmija impriża tkun vantaġġata meta mqabbla ma’ dik tal-ewwel, min-naħa, fir-rigward tat-tul tal-ksur u, min-naħa l-oħra, fir-rigward tal-punt tat-tluq tat-terminu ta’ preskrizzjoni. Għaldaqstant, l-argument tar-rikorrenti ma jistax jintlaqa’.

362

Għaldaqstant, hemm lok li jiġi kkonstatat li kien b’mod ġust li l-Kummissjoni ssanzjonat lir-rikorrenti għall-ksur taż-żewġ dispożizzjonijiet.

363

Dan ir-riżultat ma huwiex impoġġi f’dubju mill-argumenti l-oħra mqajma mir-rikorrenti.

364

Ir-rikorrenti tikkonferma li “l-ġurisprudenza stabbilita tal-qrati internazzjonali tipprojbixxi s-sanzjoni doppja ta’ persuna minħabba li din tkun kisret dispożizzjoni li ma tistax tiġi miksura biss jekk ma tiġix miksura wkoll dispożizzjoni oħra”. Hija tiċċita, f’dan ir-rigward, is-sentenzi tat-Tribunal Kriminali Internazzjonali għall-ex-Yugoslavja (iktar ’il quddiem it-“TPIY”) u tat-Tribunal Kriminali Internazzjonali għar-Rwanda.

365

Ir-rikorrenti tibbaża ruħha b’mod partikolari fuq is-sentenza tat-TPIY, Il-Prokuratur vs Vidoje Blagojević & Dragan Jokić, Kawża Nru IT-02-60-T, tas-17 ta’ Jannar 2005, paragrafu 799, li tistabbilixxi dan li ġej:

366

Mis-sentenza tat-TPIY, Il-Prosekutur vs Dragoljub Kunarac, Radomir Kovač u Zoran Vuković, Kawża Nru IT-96-23 & IT-96-23/1-A, tat-12 ta’ Ġunju 2002, paragrafu 168, jirriżulta li dan l-approċċ huwa ispirat ħafna mis-sentenza tas-Supreme Court of the United States (qorti suprema tal-Istati Uniti) fil-Kawża Blockburger vs United States, 284 U.S. 299 (1932).

367

Barra minn hekk, jeħtieġ li jiġi rrilevat li, fis-sentenza Alfred Musema vs Il-Prosekutur, Kawża Nru ICTR-96-13-A, tas-16 ta’ Novembru 2001, paragrafu 360, it-Tribunal Kriminali Internazzjonali għar-Rwanda kkonstata li l-approċċi nazzjonali li jikkonċernaw il-kwistjoni ta’ kundanni multipli abbażi tal-istess fatti kienu diverġenti.

368

Hemm lok li jiġi rrilevat li l-fatt waħdu li t-TPIY japplika, għall-finijiet tas-sentenzi tiegħu li jimponu sanzjonijiet kriminali, ċertu kriterju ta’ eżami, li joriġina mid-dritt tal-Istati Uniti, bl-ebda mod ma jimplika li l-Kummissjoni jew il-qrati tal-Unjoni huma obbligati li japplikaw dan l-istess kriterju. Jeħtieġ li jiġi enfasizzat li t-TPIY ma jeżaminax il-konformità mad-drittijiet fundamentali tad-deċiżjonijiet meħuda jew tas-sentenzi mogħtija fil-livell nazzjonali. Huwa jillimita ruħu għall-istabbiliment, għall-finijiet tas-sanzjonijiet kriminali li jimponi huwa stess, prinċipji li huwa japplika fil-każ li l-istess att ikun jikser diversi dispożizzjonijiet kriminali. Għaldaqstant it-TPIY sempliċement jiddetermina, għall-finijiet tas-sentenzi tiegħu stess, l-approċċ li huwa jqis bħala l-iktar adatt. Dan bl-ebda mod ma jimplika li t-TPIY stabbilixxa prinċipju ġenerali tad-dritt internazzjonali li għandu jiġi segwit mill-Istati kollha jew mill-Unjoni. Dan jgħodd ukoll għall-ġurisprudenza tat-Tribunal Kriminali Internazzjonali għar-Rwanda.

369

Għaldaqstant, l-argumenti tar-rikorrenti bbażati fuq il-ġurisprudenza tat-TPIY u tat-Tribunal Kriminali Internazzjonali għar-Rwanda għandhom jiġu miċħuda.

370

Barra minn hekk, ir-rikorrenti tiddikjara li l-għan stess tal-prinċipju ta’ ne bis in idem huwa “li tiġi prekluża il-kumulazzjoni tas-sanzjonijiet għal aġir li, bħal f’dan il-każ, jikser simultanjament dispożizzjonijiet legali distinti”.

371

F’dan ir-rigward, jeħtieġ li jitfakkar li din ma hijiex kwistjoni li taqa’ taħt il-prinċipju ta’ ne bis in idem. Barra minn hekk, ir-regoli marbuta mal-konkors ta’ istanzi differenti ta’ ksur ma jipprojbixxux b’mod ġenerali li impriża tiġi ssanzjonata għal ksur ta’ diversi dispożizzjonijiet legali distinti anki jekk dawn id-dispożizzjonijiet ikunu ġew miksura permezz tal-istess aġir.

372

Ir-rikorrenti sempliċiment jagħmlu riferiment għall-prinċipju ta’ “kunflitt apparenti” jew “kunflitt falz” li jfisser li meta att ikun jidher li jaqa’ taħt żewġ dispożizzjonijiet legali, id-dispożizzjoni applikabbli prinċipalment għandha teskludi id-dispożizzjonijiet l-oħra kollha (ara l-punt 345 iktar ’il fuq). Madankollu l-applikazzjoni ta’ dan il-prinċipju tippreżumi li tkun teżisti “dispożizzjoni applikabbli prinċipalment”. Jekk ma tkunx teżisti tali dispożizzjoni, kif ġara fil-każ ineżami, il-ksur simultanju ta’ dispożizzjonijiet legali distinti jikkostitwixxi konkors ideali ta’ istanzi differenti ta’ ksur.

373

Peress li f’dan il-każ ma teżistix dispożizzjoni applikabbli prinċipalment, hemm lok li jiġi miċħud l-argument tar-rikorrenti.

374

Minn dak kollu li ntqal preċedentement hemm lok li t-tielet motiv jiġi miċħud.

D.

Fuq ir-raba’ motiv, ibbażat fuq żball manifest ta’ liġi u ta’ fatt imwettaq bl-impożizzjoni ta’ multi fuq ir-rikorrenti

375

Ir-raba’ motiv huwa maqsum f’żewġ partijiet, ibbażati, l-ewwel waħda, fuq ksur tal-prinċipji ta’ ċertezza legali u ta’ nullum crimen, nulla poena sine lege u, it-tieni, fuq ksur tal-prinċipju ġenerali ta’ ugwaljanza fit-trattament.

1.

Fuq l-ewwel parti, ibbażata fuq ksur tal-prinċipji ta’ ċertezza legali u ta’ nullum crimen, nulla poena sine lege

376

Ir-rikorrenti ssostni li l-impożizzjoni ta’ multa f’dan il-każ tikser l-Artikolu 49(1) tal-Karta tad-Drittijiet Fundamentali u l-Artikolu 7(1) tal-KEDB, li jipprovdi li l-liġi għandha tiddefinixxi b’mod ċar il-ksur u l-pieni li bihom jiġi punit. Fl-opinjoni tagħha, l-interpretazzjoni tal-Artikolu 7(2) tar-Regolament Nru 139/2004, li ngħatat fid-deċiżjoni kkontestata, timplika l-użu ta’ kunċetti tant wiesa’ u ta’ kriterji tant vagi li d-dispożizzjoni kriminali inkwistjoni ma għandhiex il-kwalità rikjesta skont il-KEDB f’termini ta’ ċarezza ta’ prevedibbiltà tal-effetti tagħha.

377

Qabel xejn, jeħtieġ li jitfakkar li skont il-ġurisprudenza, il-prinċipju ta’ legalità tar-reati u tal-pieni (nullum crimen, nulla poena sine lege) jirrikjedi li l-liġi tiddefinixxi b’mod ċar il-ksur u l-pieni li bihom dan jiġi punit. Dan ir-rekwiżit ikun sodisfatt meta l-individwu jista’ jkun jaf, mill-kliem tad-dispożizzjoni rilevanti u jekk meħtieġ bl-għajnuna tal-interpretazzjoni li l-qrati taw ta’ din id-dispożizzjoni, liema atti jew ommissjonijiet jagħtu lok għar-responsabbiltà kriminali tiegħu (ara s-sentenza tat-22 ta’ Ottubru 2015, AC-Treuhand vs Il-Kummissjoni, C-194/14 P, EU:C:2015:717, punt 40 u l-ġurisprudenza ċċitata).

378

Bl-istess mod, mill-ġurisprudenza jirriżulta li l-prinċipju ta’ legalità japplika kemm għal-liġijiet ta’ natura kriminali kif ukoll għal strumenti amministrattivi speċifiċi li jimponu jew jippermettu l-impożizzjoni ta’ sanzjonijiet amministrattivi u li japplika mhux biss għal-liġijiet li jistabbilixxu l-elementi li jikkostitwixxu ksur, iżda wkoll għal dawk li jiddefinixxu l-konsegwenzi li jirriżultaw minn ksur tal-ewwel imsemmija liġijiet (ara s-sentenza tas-27 ta’ Settembru 2006, Jungbunzlauer vs Il-Kummissjoni, T-43/02, EU:T:2006:270, punt 72 u l-ġurisprudenza ċċitata).

379

F’dan il-każ, jeħtieġ li jitfakkar li r-rikorrenti ġiet immultata, skont l-Artikolu 14(2)(a) u (b) tar-Regolament Nru 139/2004, peress li kisret l-Artikolu 4(1) u l-Artikolu 7(1) tar-Regolament Nru 139/2004 (ara l-punt 199 iktar ’il fuq). Il-kliem ta’ dawn id-dispożizzjonijiet huwa ċar. L-ebda minn dawn id-dispożizzjonijiet ma tinkludi kunċetti wiesa’, u lanqas kriterji vagi.

380

Essenzjalment, ir-rikorrenti tinvoka l-assenza ta’ ċarezza tal-Artikolu 7(2) tar-Regolament Nru 139/2004, li tipprovdi għal eċċezzjoni.

381

F’dan ir-rigward, jeħtieġ li jiġi rrilevat li, anki jekk jiġi preżunt li r-rekwiżit ta’ ċarezza li jirriżulta mill-prinċipju ta’ legalità tal-pieni japplika għad-dispożizzjonijiet li jipprovdu għal eċċezzjoni minn projbizzjoni li l-ksur tagħha huwa punit b’multi, l-Artikolu 7(2) tar-Regolament Nru 139/2004, skont il-kliem tiegħu, ma huwiex applikabbli għal sitwazzjonijiet bħal dak inkwistjoni f’dan il-każ (ara l-punti 68 sa 83 iktar ’il fuq).

382

Għaldaqstant, ir-rikorrenti setgħet tkun taf, mill-kliem tad-dispożizzjonijiet rilevanti, li t-twettiq tal-akkwist ta’ Diċembru 2012 mingħajr notifika u awtorizzazzjoni minn qabel kien punit b’multi.

383

Peress li r-rikorrenti setgħet tkun taf, mill-kliem tad-dispożizzjonijiet rilevanti, ma kienx neċessarju li dawn jiġu suġġetti għal interpretazzjoni mill-qrati. Fil-fatt, skont il-formulazzjoni ċċitata fil-punt 377 iktar ’il fuq, għandu jkun li s-suġġett jista’ jsir jaf, mill-kliem tad-dispożizzjoni rilevanti u “jekk meħtieġ” bl-għajnuna tal-interpretazzjoni li din tingħata mill-qrati, liema atti u ommissjonijiet jistgħu jwasslu għar-responsabbiltà kriminali tiegħu.

384

Ċertament huwa minnu li l-obiter dictum fid-deċiżjoni Yara/Kemira GrowHow ma jikkorrispondix ma’ interpretazzjoni minn qrati, u inqas u inqas ma’ “ġurisprudenza stabbilita u ppubblikata”. F’dan ir-rigward, jeħtieġ li jiġi rrilevat li, minbarra t-test tal-liġi stess, hemm lok li jittieħed kont tal-kwistjoni dwar jekk il-kunċetti indeterminati użati ġewx speċifikati minn ġurisprudenza stabbilita u ppubblikata (ara s-sentenza tat-28 ta’ April 2010, Amann & Söhne u Cousin Filterie vs Il-Kummissjoni, T-446/05, EU:T:2010:165, punt 129 u l-ġurisprudenza ċċitata).

385

Madankollu, l-argumenti tar-rikorrenti f’dan ir-rigward huma ineffettivi, peress li speċifikazzjoni mill-ġurisprudenza ma hijiex neċessarja meta l-kliem tad-dispożizzjonijiet inkwistjoni huwa ċar u ma jinkludi l-ebda kunċett indeterminat li jirrikjedi li jiġi speċifikat.

386

F’dan il-kuntest, jeħtieġ li jitfakkar li r-rikorrenti essenzjalment tipprova twessa’ l-kamp ta’ applikazzjoni tal-kunċett ta’ “konċentrazzjoni unika” u li b’hekk twessa l-kamp ta’ applikazzjoni tal-eċċezzjoni prevista fl-Artikolu 7(2) tar-Regolament Nru 139/2004 (ara l-punt 203 iktar ’il fuq).

387

Il-prinċipju ta’ legalità tar-reati u tal-pieni ma jimplikax li huwa neċessarju li tingħata interpretazzjoni wiesa’ tal-kamp ta’ applikazzjoni ta’ kunċett li ma huwiex inkluż fil-kliem ta’ dispożizzjoni li tipprovdi għal eċċezzjoni minn projbizzjoni li l-ksur tagħha huwa punit b’multi, bil-għan li jiġi estiż kamp ta’ applikazzjoni ta’ din l-eċċezzjoni lil hinn mill-kliem tiegħu.

388

L-eżistenza ta’ ksur u l-impożizzjoni ta’ multi kienu prevedibbli għar-rikorrenti. Jeħtieġ li jitfakkar li, fil-kuntest tal-eżami tat-tieni motiv, in-natura negliġenti tal-aġir tar-rikorrenti kienet diġà ġiet ikkonstatata.

389

Barra minn hekk, il-fatt waħdu li, fil-mument li fih twettaq il-ksur, il-qrati tal-Unjoni kien għad ma kellhomx l-opportunità li jesprimu ruħhom speċifikament dwar aġir preċiż ma jeskludix, bħala tali, li impriża, jekk ikun xieraq, jaf taffaċċja sitwazzjoni li fiha l-aġir tagħha jista’ jiġi ddikjarat inkompatibbli mar-regoli tal-kompetizzjoni tad-dritt tal-Unjoni (ara, f’dan is-sens, is-sentenza tat-22 ta’ Ottubru 2015, AC-Treuhand vs Il-Kummissjoni, C-194/14 P, EU:C:2015:717, punt 43).

390

Mill-ġurisprudenza tal-Qorti EDB jirriżulta wkoll li n-novità, fid-dawl b’mod partikolari tal-ġurisprudenza, tal-kwistjoni legali mqajma ma tikkostitwixxix fiha nnifisha ksur tar-rekwiżiti ta’ aċċessibbiltà u ta’ prevedibbiltà tal-liġi, peress li s-soluzzjoni adottata kienet tifforma parti minn interpretazzjonijiet possibbli u raġonevolment prevedibbli (Qorti EDB, 1 ta’ Settembru 2016, X u Y vs Franza, CE:ECHR:2016:0901JUD004815811). Barra minn hekk, mill-paragrafu 60 ta’ din l-istess sentenza jirriżulta li, anki fil-każ li l-artikulazzjoni tad-dispożizzjonijiet inkwistjoni f’każ partikolari tista’ tikkostitwixxi diffikultà serja ta’ interpretazzjoni, dan ma jfissirx li l-awtorità kompetenti hija inkapaċi li tikklassifika legalment in-nuqqasijiet imwettaqa f’każ partikolari.

391

L-argument tar-rikorrenti li l-approċċ tal-Kummissjoni fil-kawża odjerna kien jikkontradixxi l-approċċ li hija segwiet fil-kawża li tat lok għad-deċiżjoni LGI/Telenet, diġà ġie miċħud fil-punti 141 sa 144 iktar ’il fuq.

392

Fir-rigward tad-dikjarazzjoni tar-rikorrenti li, fl-assenza ta’ preċedenti rilevanti, il-prassi tal-qrati tal-Unjoni u tal-Kummissjoni, stabbilita għal żmien twil, kienet li tastjeni milli timponi ebda multa, jew li timponi biss multa simbolika, hemm lok li jiġi rrilevat li ma teżisti l-ebda prassi stabbilita f’dan is-sens. Ċertament, jeżistu każijiet li fihom il-Kummissjoni ma imponiet ebda multa jew imponiet biss multa simbolika fl-assenza ta’ preċedenti. Madankollu, f’każijiet oħra, il-Kummissjoni imponiet multi għoljin anki f’sitwazzjonijiet li fihom ma kinux jeżistu preċedenti marbuta ma’ aġir li jippreżenta l-istess karatteristiċi.

393

Mill-ġurisprudenza jirriżulta l-fatt li jkun għadu ma ġiex eżaminat aġir li jippreżenta l-istess karatteristiċi f’deċiżjonijiet preċedenti ma jeżentax lil impriża mir-responsabbiltà tagħha (sentenzi tad-9 ta’ Novembru 1983, Nederlandsche Banden-Industrie-Michelin vs Il-Kummissjoni, 322/81, EU:C:1983:313, punt 107 u tal-1 ta’ Lulju 2010, AstraZeneca vs Il-Kummissjoni, T-321/05, EU:T:2010:266, punt 901). Fil-kawżi li taw lok għal dawn is-sentenzi, il-Kummissjoni imponiet multi li ma kinux ta’ ammont simboliku.

394

Għaldaqstant, l-ewwel parti tar-raba’ motiv għandha tiġi miċħuda.

2.

Fuq it-tieni parti, ibbażata fuq ksur tal-prinċipju ta’ ugwaljanza fit-trattament

395

Fil-kuntest tat-tieni parti tar-raba’ motiv, ir-rikorrenti essenzjalment tinvoka, tliet każijiet preċedenti u titlob l-istess trattament. Fl-ewwel tinvoka l-kawża li tat lok għad-deċiżjoni Yara/Kemira GrowHow, fit-tieni lok, tinvoka s-sentenza tat-28 ta’ Frar 2002, Compagnie générale maritime et vs Il-Kummissjoni (T-86/95, EU:T:2002:50), u, fit-tielet lok, is-sentenza tat-30 ta’ Settembru 2003, Atlantic Container Line et vs Il-Kummissjoni (T-191/98 u T-212/98 sa T-214/98, EU:T:2003:245).

396

Kif tenfasizza r-rikorrenti, il-kawża odjerna u dik li tat lok għad-deċiżjoni Yara/Kemira GrowHow it-tnejn jikkonċernaw l-akkwist ta’ sehem inizjali “tal-bidu” mingħand azzjonist prinċipali tal-kumpannija mmirata, li ta lok għal obbligu li tiġi mnedija offerta pubblika. L-offerta pubblika ġiet imnedija ftit wara t-twettiq tal-akkwist inizjali, u l-akkwirenti informaw lill-Kummissjoni bil-konċentrazzjoni ftit wara dan tal-aħħar u astjenew milli jeżerċitaw id-drittijiet tal-vot.

397

Fil-kawża li tat lok għad-deċiżjoni Yara/Kemira GrowHow, il-Kummissjoni ma fetħitx investigazzjoni u ma imponietx multi. Skont ir-rikorrenti, l-ebda differenza oġġettiva ma tiġġustifika t-trattament differenti tal-kumpannija Yara u tar-rikorrenti. Ir-rikorrenti tistieden lill-Qorti Ġenerali tadotta l-approċċ segwit fis-sentenza tagħha tat-28 ta’ Frar 2002, Compagnie générale maritime et vs Il-Kummissjoni (T-86/95, EU:T:2002:50, punt 487), li fiha hija kkonstatat li multa ma kinitx iġġustifikata peress li l-Kummissjoni ma kinitx imponiet multa f’deċiżjoni preċedenti marbuta ma’ aġir simili.

398

F’dan ir-rigward, jeħtieġ li jiġi rrilevat li ċ-ċirkustanza li l-Kummissjoni ma imponietx multa lill-awtur ta’ ksur tar-regoli tal-kompetizzjoni ma tistax, fih nnifisha, tipprekludi li tiġi imposta multa lill-awtur ta’ ksur tal-istess natura (sentenza tat-28 ta’ Frar 2002, Compagnie générale maritime et vs Il-Kummissjoni, T-86/95, EU:T:2002:50, punt 487). Barra minn hekk, ġaladarba impriża tkun, permezz tal-aġir tagħha stess, wettqet ksur tar-regoli tal-kompetizzjoni, hija ma tistax taħrab minn kull sanzjoni peress li operaturi ekonomiċi oħra ma ġewx immultati, meta, bħal f’dan il-każ, il-qorti tal-Unjoni ma tkunx adita bis-sitwazzjoni ta’ dawn tal-aħħar (ara, f’dan is-sens, is-sentenza tal-11 ta’ Lulju 2014, Sasol et vs Il-Kummissjoni, T-541/08, EU:T:2014:628, punt 194).

399

Barra minn hekk, jeħtieġ li jiġi rrilevat li, fis-sentenza tat-28 ta’ Frar 2002, Compagnie générale maritime et vs Il-Kummissjoni (T-86/95, EU:T:2002:50), il-Qorti Ġenerali ma llimitatx ruħha sempliċement għall-konstatazzjoni li l-Kummissjoni ma kinitx imponiet multa f’deċiżjoni preċedenti marbuta ma’ aġir simili bil-għan li tiġġustifika l-annullament tal-multa. B’mod partikolari il-Qorti Ġenerali kkonstatat li “it-trattament legali li jeħtieġ li jiġi ddedikat għal dan it-tip ta’ ftehim, b’mod partikolari minħabba r-rabtiet mill-qrib tiegħu mat-trasport marittimu li huwa suġġett għal leġiżlazzjoni speċifika u eċċezzjonali ħafna fid-dritt tal-kompetizzjoni, ma huwiex wieħed evidenti u jqajjem, b’mod partikolari, kwistjonijiet kumplessi ta’ natura kemm ekonomika kif ukoll legali” (sentenza tat-28 ta’ Frar 2002, Compagnie générale maritime et vs Il-Kummissjoni, T-86/95, EU:T:2002:50, punt 484), li “diversi elementi setgħu jistiednu lir-rikorrenti jemmnu fil-legalità tal-ftehim inkwistjoni” (sentenza tat-28 ta’ Frar 2002, Compagnie générale maritime et vs Il-Kummissjoni, T-86/95, EU:T:2002:50, punt 485) u li, “fid-deċiżjoni tagħha 94/980, il-Kummissjoni ma imponietx multa fuq il-kumpanniji li kienu partijiet f’dan il-ftehim, u dan meta l-ftehim inkwistjoni kien mhux biss jipprevedi l-istabbiliment tal-prezzijiet tas-settur tat-trasport multimodali bl-art, iżda, barra minn hekk, kien jinkludi fih istanzi ta’ ksur serju tar-regoli tal-kompetizzjoni” (sentenza tat-28 ta’ Frar 2002, Compagnie générale maritime et vs Il-Kummissjoni, T-86/95, EU:T:2002:50, punt 487). Fir-rigward tad-Deċiżjoni tal-Kummissjoni 94/980/KE, tad-19 ta’ Ottubru 1994, dwar proċedura skont l-Artikolu 85 tat-Trattat KE (IV/34.446 - Trans Atlantic Agreement) (ĠU L 376, p. 1), il-Qorti Ġenerali kkonstatat li din kienet deċiżjoni “mogħtija ftit taż-żmien qabel id-deċiżjoni kkontestata” (sentenza tat-28 ta’ Frar 2002, Compagnie générale maritime et vs Il-Kummissjoni, T-86/95, EU:T:2002:50, punt 487).

400

Jeħtieġ li jiġi rrilevat li d-Deċiżjoni 94/980 hija ddatata d-19 ta’ Ottubru 1994 u li, fil-kawża li tat lok għas-sentenza tat-28 ta’ Frar 2002, Compagnie générale maritime et vs Il-Kummissjoni (T-86/95, EU:T:2002:50), id-dikjarazzjoni tal-oġġezzjonijiet kienet ġiet innotifikata b’ittra tal-21 ta’ Diċembru 1992 u d-deċiżjoni kkontestata kienet tal-21 ta’ Diċembru 1994, kif jirriżulta mill-punti 20 u 22 ta’ dik is-sentenza.

401

Minn dan isegwi li l-operaturi inkwistjoni fil-kawża li tat lok għas-sentenza tat-28 ta’ Frar 2002, Compagnie générale maritime et vs Il-Kummissjoni (T-86/95, EU:T:2002:50) ma kellhomx il-possibbiltà li jieħdu inkunsiderazzjoni l-kjarifiki pprovduti mill-Kummissjoni fid-deċiżjoni tagħha 94/980 bil-għan li tevita ksur tar-regoli tal-kompetizzjoni. Fil-fatt, meta dawn setgħu jiksbu konjizzjoni tad-deċiżjoni tal-Kummissjoni tad-19 ta’ Ottubru 1994, dawn ma kinux f’pożizzjoni li jbiddlu b’mod retroattiv l-aġir tagħhom li ta lok għad-dikjarazzjoni tal-oġġezzjonijiet li ġiet innotifikata b’ittra tal-21 ta’ Diċembru 1992.

402

Madankollu, f’dan il-każ, id-deċiżjoni Yara/Kemira GrowHow kienet ilha teżisti ħames snin meta r-rikorrenti wettqu l-ksur tal-Artikolu 4(1) u tal-Artikolu 7(1) tar-Regolament Nru 139/2004, kif ġustament enfasizzat il-Kummissjoni. Għaldaqstant, ir-rikorrenti setgħet tieħu inkunsiderazzjoni l-interpretazzjoni mogħtija mill-Kummissjoni fir-rigward tal-Artikolu 7(2) tar-Regolament Nru 139/2004 f’din id-deċiżjoni, minkejja li f’obiter dictum, u, jekk xieraq, tidħol f’kuntatt mal-Kummissjoni dwar l-interpretazzjoni li għandha tingħata lil din id-dispożizzjoni.

403

F’dan ir-rigward, ir-rikorrenti tiddikjara li l-Kummissjoni injorat element essenzjali tal-kawża li tat lok għas-sentenza tat-28 ta’ Frar 2002, Compagnie générale maritime et vs Il-Kummissjoni (T-86/95, EU:T:2002:50), li jirrendi d-differenza fil-ħin irrilevanti, jew tal-inqas insinjifikattiv. Din l-aħħar imsemmija kawża kienet tinvolvi deċiżjoni dwar ksur abbażi tal-Artikolu 101 TFUE, b’paragun ma’ sempliċi obiter dictum fid-deċiżjoni Yara/Kemira GrowHow, jiġifieri deċiżjoni ta’ awtorizzazzjoni ta’ konċentrazzjoni.

404

Dan l-argument tar-rikorrenti ma jistax jintlaqa’. Fil-fatt, il-fatt waħdu li d-Deċiżjoni 94/980 kienet tikkostitwixxi deċiżjoni li tikkonstata ksur ma seta’ jkun ta’ ebda għajnuna għall-operaturi bil-għan li jiġu evitati istanzi ta’ ksur infrazzjonijiet li kienu diġà twettqu fid-data ta’ dik id-deċiżjoni. Madankollu, f’dan il-każ, l-eżistenza tal-obiter dictum fid-deċiżjoni Yara/Kemira GrowHow setgħet tagħti indikazzjonijiet fuq il-mod kif għandu jiġi interpretat l-Artikolu 7(2) tar-Regolament Nru 139/2004 u għaldaqstant tgħin lir-rikorrenti jevita li jwettaq il-ksur inkwistjoni.

405

Barra minn hekk, jeħtieġ li jiġi osservat li r-rikorrenti tibbaża ruħha, minn naħa, fuq l-allegata prassi tal-qrati tal-Unjoni u tal-Kummissjoni li tikkonsisti fl-astensjoni mill-impożizzjoni ta’ ebda multa, jew fl-impożizzjoni ta’ multa simbolika fl-assenza ta’ preċedenti rilevanti (ara l-punt 392 iktar ’il fuq) u, min-naħa l-oħra, fuq il-prinċipju ta’ ugwaljanza fit-trattament meta mqabbla ma’ impriża oħra li ma ġietx immultata.

406

Jekk tiġi segwita l-loġika tar-raġunament, il-Kummissjoni qatt ma tkun tista’ timponi multi li jeċċedu ammont simboliku. Fil-fatt, fl-ewwel deċiżjoni li tikkonċerna aġir partikolari, hija tkun obbligata li ma timponix multi li jeċċedu ammont simboliku, fl-assenza ta’ preċedenti rilevanti. Fil-kawżi sussegwenti, hija tkun obbligata li ma timponix multi li jeċċedu ammont simboliku minħabba l-prinċipju ta’ ugwaljanza fit-trattament.

407

Hemm lok li jitqies li l-prinċipju ta’ ugwaljanza fit-trattament, inkonnessjoni ma’ impriża li fir-rigward tagħha ma ġiet imposta l-ebda multa f’deċiżjoni preċedenti għall-istess tip ta’ aġir, bħala prinċipju, jista’ jiġi invokat utilment minn operaturi li ma kellhomx il-possibbiltà li jieħdu inkunsiderazzjoni il-kjarifiki pprovduti fid-deċiżjoni preċedenti, sabiex jevitaw li jiksru r-regoli tal-kompetizzjoni, peress li din id-deċiżjoni ngħatat f’mument li fih il-ksur kien diġà twettaq.

408

Barra minn hekk, f’dan il-każ, ma kienx hemm ħafna elementi li setgħu jistiednu lir-rikorrenti jemmnu fil-legalità tal-aġir tagħhom, għall-kuntrarju ta’ dak li kkonstatat il-Qorti Ġenerali fis-sentenza tat-28 ta’ Frar 2002, Compagnie générale maritime et vs Il-Kummissjoni (T-86/95, EU:T:2002:50, punt 485).

409

Minn dak li ntqal jirriżulta li, f’dan il-każ, ma hemmx lok jiġi segwit l-istess approċċ segwit fis-sentenza tat-28 ta’ Frar 2002, Compagnie générale maritime et vs Il-Kummissjoni (T-86/95, EU:T:2002:50), u li r-rikorrenti ma tistax tinvoka utilment din is-sentenza bil-għan li ssejjes l-argument tagħha bbażat fuq l-allegat ksur tal-prinċipju ta’ ugwaljanza fit-trattament.

410

Fir-rigward tas-sentenza tat-30 ta’ Settembru 2003, Atlantic Container Line et vs Il-Kummissjoni (T-191/98 u T-212/98 sa T-214/98, EU:T:2003:245), jeħtieġ li jiġi rrilevat li, f’din is-sentenza, il-Qorti Ġenerali kkonkludiet li kien iġġustifikat li ma tiġix imposta (punt 1633 tas-sentenza). Ir-rikorrenti titlob lill-Qorti Ġenerali jogħġobha tadotta l-istess konklużjoni fil-kawża odjerna.

411

Fis-sentenza tat-30 ta’ Settembru 2003, Atlantic Container Line et vs Il-Kummissjoni (T-191/98 u T-212/98 sa T-214/98, EU:T:2003:245), il-Qorti Ġenerali adottat l-elementi li ġejjin bħala ġustifikazzjoni sabiex ma timponix multa:

–

fl-ewwel lok, ir-rikorrenti fil-kawża li tat lok għal din is-sentenza kienu kixfu, b’inizjattiva tagħhom, il-prattiki li ġew meqjusa mill-Kummissjoni bħala li jikkostitwixxu prattiċi abbużivi (punti 1603 sa 1610 tas-sentenza);

–

fit-tieni lok, id-deċiżjoni inkwistjoni fil-kawża li tat lok għas-sentenza kienet tikkostitwixxi l-ewwel deċiżjoni li fiha l-Kummissjoni kienet evalwat direttament il-legalità tal-prattiċi adottati mill-konferenzi marittimi fil-qasam tal-kuntratti ta’ servizz fid-dawl tar-regoli tal-kompetizzjoni (punti 1611 sa 1614 tas-sentenza);

–

fit-tielet lok, it-trattament legali li kellu jiġi ddedikat għall-prattiċi inkwistjoni ma huwiex wieħed evidenti u jqajjem, b’mod partikolari, kwistjonijiet kumplessi fil-livell legali (punti 1615 u 1616 tas-sentenza);

–

fir-raba’ lok, l-abbuż li jirriżulta mill-prattiċi fil-qasam tal-kuntratti ta’ servizz ma kienx jikkostitwixxi forma klassika ta’ prattika abbużiva (punti 1617 sa 1621 tas-sentenza);

–

fil-ħames lok, ir-rikorrenti fil-kawża li tat lok għas-sentenza kellhom ir-raġunijiet kollha sabiex jemmnu, matul il-proċedura amministrattiva, li l-Kummissjoni ma kinitx ser timmultahom minħabba l-prattiki tagħhom fil-qasam tal-kuntratti ta’ servizz (punti 1622 sa 1632 tas-sentenza).

412

Jeħtieġ li jiġu eżaminata l-argumenti mqajma mir-rikorrenti insostenn tad-dikjarazzjoni tagħha li s-sitwazzjoni li fuqha ngħatat is-sentenza tat-30 ta’ Settembru 2003, Atlantic Container Line et vs Il-Kummissjoni (T-191/98 u T-212/98 sa T-214/98, EU:T:2003:245), hija paragunabbli ma’ dik li fuqha hija msejsa l-kawża odjerna.

413

Ir-rikorrenti tiddikjara, fl-ewwel lok, li, bl-istess mod bħar-rikorrenti fil-kawża li tat lok għas-sentenza tat-30 ta’ Settembru 2003, Atlantic Container Line et vs Il-Kummissjoni (T-191/98 u T-212/98 sa T-214/98, EU:T:2003:245), hija rrilevat l-allegat ksur b’inizjattiva tagħha, billi informant lill-Kummissjoni immedjatament bil-konċentrazzjoni.

414

F’dan ir-rigward, jeħtieġ li jiġi rrilevat li ċ-ċirkustanzi tal-kawża odjerna ma huma bl-ebda mod paragunabbli ma’ dawk li fuqhom ngħatat is-sentenza tat-30 ta’ Settembru 2003, Atlantic Container Line et vs Il-Kummissjoni (T-191/98 u T-212/98 sa T-214/98, EU:T:2003:245).

415

Fil-Kawża li tat lok għas-sentenza tat-30 ta’ Settembru 2003, Atlantic Container Line et vs Il-Kummissjoni (T-191/98 u T-212/98 sa T-214/98, EU:T:2003:245), in-notifika tal-ftehim inkwistjoni saret fuq bażi volontarja. F’dan ir-rigward, il-Qorti Ġenerali kkonstatat li l-ebda wieħed mir-regolamenti inkwistjoni ma kien jipprevedi sistema ta’ notifika obbligatorja għall-għoti ta’ eżenzjoni individwali, b’tali mod li n-notifika tal-ftehim TACA, jiġifieri l-ftehim inkwistjoni f’dik il-kawża kien sar mir-rikorrenti fuq bażi volontarja (sentenza tat-30 ta’ Settembru 2003, Atlantic Container Line et vs Il-Kummissjoni, T-191/98 u T-212/98 sa T-214/98, EU:T:2003:245, punt 1606).

416

F’dan il-każ, ir-rikorrenti kienet obbligata li tinnotifika l-konċentrazzjoni inkwistjoni, li kienet tikkostitwixxi konċentrazzjoni ta’ daqs Komunitarju, u barra minn hekk hija qieset li kienet obbligata li tinnotifikaha skont l-Artikolu 7(2)(a) tar-Regolament Nru 139/2004, moqri flimkien mal-Artikolu 4 ta’ dan l-istess regolament.

417

Barra minn hekk, f’dan il-każ, in-notifika saret wara li twettqet il-konċentrazzjoni, filwaqt li, fil-kawża li tat lok għas-sentenza tat-30 ta’ Settembru 2003, Atlantic Container Line et vs Il-Kummissjoni (T-191/98 u T-212/98 sa T-214/98, EU:T:2003:245), l-impriżi inkwistjoni kienu nnotifikaw il-ftehim inkwistjoni qabel id-dħul fis-seħħ tiegħu. Kif jirriżulta mill-punti 34 u 37 tas-sentenza tat-30 ta’ Settembru 2003, Atlantic Container Line et vs Il-Kummissjoni (T-191/98 u T-212/98 sa T-214/98, EU:T:2003:245), il-ftehim inkwistjoni fil-kawża li tat lok għal dik is-sentenza kien ġie nnotifikat fil-5 ta’ Lulju 1994 u daħal fis-seħħ fl-24 ta’ Ottubru 1994.

418

Fit-tieni lok, ir-rikorrenti tiddikjara li deċiżjoni f’dan il-każ tikkostitwixxi l-ewwel deċiżjoni li fiha l-Kummissjoni evalwat il-portata tal-Artikolu 7(2) tar-Regolament Nru 139/2004 bil-mod kif għamlet dan. Bl-istess mod bħal fil-kawża li tat lok għas-sentenza tat-30 ta’ Settembru 2003, Atlantic Container Line et vs Il-Kummissjoni (T-191/98 u T-212/98 sa T-214/98, EU:T:2003:245), id-deċiżjoni kkontestata hija b’hekk l-ewwel deċiżjoni li fiha l-Kummissjoni evalwat direttament il-legalità tal-prattiki inkwistjoni.

419

F’dan ir-rigward, jeħtieġ li jiġi rrilevat li, fid-deċiżjoni Yara/Kemira GrowHow, il-Kummissjoni kienet diġà esprimiet ruħha, minkejja li permezz ta’ obiter dictum, dwar l-interpretazzjoni li jeħtieġ li tingħata lill-Artikolu 7(2) tar-Regolament Nru 139/2004. Għaldaqstant, is-sitwazzjoni fil-kawża odjerna ma hijiex paragunabbli ma dik li tat lok għas-sentenza tat-30 ta’ Settembru 2003, Atlantic Container Line et vs Il-Kummissjoni (T-191/98 u T-212/98 sa T-214/98, EU:T:2003:245).

420

Barra minn hekk, ir-rikorrenti tibbaża ruħha fuq il-punt 1614 tas-sentenza tat-30 ta’ Settembru 2003, Atlantic Container Line et vs Il-Kummissjoni (T-191/98 u T-212/98 sa T-214/98, EU:T:2003:245). F’dan il-punt, il-Qorti Ġenerali kkonstatat:

421

Ir-rikorrenti tqis li, b’analoġija, fl-assenza ta’ azzjoni tal-Kummissjoni fir-rigward tal-kumpannija Yara, hija setgħet temmen li l-Kummissjoni kienet irtirat l-ilmenti tagħha dwar l-applikazzjoni tal-eżenzjoni prevista fl-Artikolu 7(2) tar-Regolament Nru 139/2004.

422

Madankollu, dawn is-sitwazzjonijiet ma humiex paragunabbli. Dikjarazzjoni tal-oġġezzjonijiet tikkostitwixxi biss dokument preparatorju li barra minn hekk ma huwiex ippubblikat. Barra minn hekk, fil-Kawża TAA, imsemmija fil-punt 1614 tas-sentenza tat-30 ta’ Settembru 2003, Atlantic Container Line et vs Il-Kummissjoni (T-191/98 u T-212/98 sa T-214/98, EU:T:2003:245), il-Kummissjoni kienet adottat deċiżjoni, iżda hija ma kinitx ikkonstatat l-eżistenza ta’ ksur li jikkonsisti f’abbuż minn pożizzjoni dominanti fil-qasam tal-kuntratti ta’ servizz f’din id-deċiżjoni. Kien f’dawn iċ-ċirkustanzi li l-Qorti Ġenerali kienet ikkonstatat li r-rikorrenti f’din il-kawża setgħu jemmnu li l-Kummissjoni kienet irtirat parti mill-ilmenti tagħha.

423

Għall-kuntrarju, l-obiter dictum fid-deċiżjoni Yara/Kemira GrowHow kien kapaċi jagħti lill-impriżi indikazzjoni dwar il-mod kif il-Kummissjoni tinterpreta l-Artikolu 7(2) tar-Regolament Nru 139/2004. Il-fatt li hija ma bdietx il-proċedura fil-konfront tal-kumpannija Yara ma tippermettix lill-operaturi jqisu li l-Kummissjoni kienet biddlet ħsiebha dwar din l-interpretazzjoni. Fil-fatt, il-Kummissjoni għandha marġni ta’ diskrezzjoni fir-rigward tal-kwistjoni dwar jekk jeħtieġx jew li jiġi investigat ksur tar-regoli tal-kompetizzjoni, u hija tista’ tiddefinixxi il-prijoritajiet tagħha. Bl-ebda mod ma huwa permess li jiġi konkluż li l-Kummissjoni tqis li aġir huwa legali peress li hija ma tkun iddeċidiet li ma tiftaħx investigazzjoni f’dan ir-rigward.

424

Sussegwentement, ir-rikorrenti tibbaża ruħha fuq il-punt 1615 tas-sentenza tat-30 ta’ Settembru 2003, Atlantic Container Line et vs Il-Kummissjoni (T-191/98 u T-212/98 sa T-214/98, EU:T:2003:245). F’dan il-punt, il-Qorti Ġenerali rrilevat li “ma jistax jiġi serjament ikkontestat li t-trattament legali li jeħtieġ li jingħataw il-prattiki tal-konferenzi marittimi dwar il-kuntratti ta’ servizzi ma kinux jippreżentaw, b’mod partikolari minħabba r-rabta mill-qrib tagħhom mal-ftehimiet suġġetti għall-eżenzjoni skont il-kategorija prevista mil-leġiżlazzjoni għal kollox speċifika u eċċezzjonali fid-dritt tal-kompetizzjoni, evidenti u kienu jqajjmu, b’mod partikolari, kwistjonijiet kumplessi fuq il-livell legali”. Ir-rikorrenti tqis li l-interpretazzjoni mogħtija fid-deċiżjoni kkontestata fir-rigward tal-eżenzjoni prevista fl-Artikolu 7(2) tar-Regolament Nru 139/2004 kienet, bl-istess mod, altru mhux evidenti.

425

Madankollu hemm lok li jiġi rrilevat li, fil-punt 1615 tas-sentenza tat-30 ta’ Settembru 2003, Atlantic Container Line et vs Il-Kummissjoni (T-191/98 u T-212/98 sa T-214/98, EU:T:2003:245), il-Qorti Ġenerali bbażat ruħha b’mod partikolari fuq ir-rabtiet mill-qrib eżistenti bejn il-prattiki inkwistjoni u “l-ftehimiet suġġetti għall-eżenzjoni skont il-kategorija prevista mil-leġiżlazzjoni għal kollox speċifika u eċċezzjonali fid-dritt tal-kompetizzjoni”. Għaldaqstant dawn kienu ċirkustanzi għal kollox partikolari, li ma jeżistux fil-kawża odjerna.

426

Barra minn hekk, ir-rikorrenti tirrileva li l-Qorti Ġenerali kkonstatat, fil-punt 1617 tas-sentenza tat-30 ta’ Settembru 2003, Atlantic Container Line et vs Il-Kummissjoni (T-191/98 u T-212/98 sa T-214/98, EU:T:2003:245), li “l-abbuż li jirriżulta mill-prattiki fil-qasam tal-kuntratti ta’ servizzi ma [kienx jikkostitwixxi] forma klassika ta’ prattika abbużiva fis-sens tal-Artikolu 86 tat-Trattat”. Fl-opinjoni tagħha, il-kawża odjerna tikkostitwixxi, l-iktar l-iktar, kawża ta’ interpretazzjoni żbaljata ta’ eżenzjoni, iktar milli ksur klassiku ċar tal-obbligu ta’ status quo.

427

F’dan ir-rigward, huwa suffiċjenti li jitfakkar li l-obbligu tan-notifikazzjoni tal-konċentrazzjoni inkwistjoni u li l-impriża tistenna l-awtorizzazzjoni tagħha qabel it-twettiq tagħha jirriżulta b’mod ċar mill-kliem tal-Artikolu 4(1) u tal-Artikolu 7(1) tar-Regolament Nru 139/2004. Il-fatt li r-rikorrenti setgħet tinterpreta b’mod żbaljat l-eċċezzjoni prevista fl-Artikolu 7(2) tar-Regolament Nru 139/2004 ma jistax jeżentaha mir-responsabbiltà tagħha.

428

Fl-aħħar, ir-rikorrenti tenfasizza li l-Qorti Ġenerali rrilevat, fil-punti 1626 u 1627 tas-sentenza tat-30 ta’ Settembru 2003, Atlantic Container Line et vs Il-Kummissjoni (T-191/98 u T-212/98 sa T-214/98, EU:T:2003:245), li, “minkejja skambju kontinwu ta’ korrispondenza mal-partijiet fit-TACA matul il-proċedura amministrattiva fil-kawża odjerna, il-Kummissjoni, sal-ħruġ tad-dikjarazzjoni tal-oġġezzjonijiet, ma informatx lill-imsemmija partijiet li hija kellha l-intenzjoni li tikklassifika l-prattiki inkwistjoni mhux biss bħala restrizzjonijiet tal-kompetizzjoni fis-sens tal-Artikolu 85 tat-Trattat, iżda wkoll bħala abbuż minn pożizzjoni dominanti fis-sens tal-Artikolu 86 tat-Trattat”, u li “kien [jeħtieġ] li jitfakkar li l-multi kollha imposti permezz tad-deċiżjoni kkontestata kienu [ġew] hekk imposti għall-perijodu ta’ bejn in-notifika tal-ftehim TACA u l-ħruġ tad-dikjarazzjoni tal-oġġezzjonijiet”.

429

Ir-rikorrenti tiddikjara, b’analoġija, li minkejja skambju kontinwu ta’ korrispondenza bejnha u l-Kummissjoni dwar il-portata tal-eżenzjoni prevista fl-Artikolu 7(2) tar-Regolament Nru 139/2004, il-Kummissjoni, ma ntbagħtet id-deċiżjoni ta’ awtorizzazzjoni, ma informatx lir-rikorrenti li hija kellha l-intenzjoni li tikklassifika t-tranżazzjoni bħala ksur tal-obbligu ta’ status quo. Barra minn hekk, skont ir-rikorrenti, “il-multi kollha imposti permezz tad-[deċiżjoni] ġew hekk imposti għall-perijodu ta’ bejn in-notifika tal-[operazzjoni] u l-[awtorizzazzjoni] tagħha”.

430

F’dan ir-rigward, jeħtieġ li jiġi enfasizzat li s-sitwazzjoni fil-kawża li tat lok għas-sentenza tat-30 ta’ Settembru 2003, Atlantic Container Line et vs Il-Kummissjoni (T-191/98 u T-212/98 sa T-214/98, EU:T:2003:245) ma hija bl-ebda mod paragunabbli ma’ dik inkwistjoni fil-kawża odjerna.

431

Qabel xejn, hemm lok li jiġi rrilevat li d-dikjarazzjoni tar-rikorrenti li, b’analoġija mal-kawża li tat lok għas-sentenza tat-30 ta’ Settembru 2003, Atlantic Container Line et vs Il-Kummissjoni (T-191/98 u T-212/98 sa T-214/98, EU:T:2003:245), f’dan il-każ, “il-multi kollha imposti permezz tad-[deċiżjoni] ġew hekk imposti għall-perijodu ta’ bejn in-notifika tal-[operazzjoni] u l-[awtorizzazzjoni] tagħha”, hija totalment infondata.

432

Fid-deċiżjoni kkontestata, il-Kummissjoni kkonstatat ksur tal-Artikolu 4(1) tar-Regolament Nru 139/2004, li twettaq fit-18 ta’ Diċembru 2012, u ksur tal-Artikolu 7(1) tar-Regolament Nru 139/2004, li twettaq fil-perijodu ta’ bejn it-18 ta’ Diċembru 2012 u t-30 ta’ Settembru 2013.

433

L-ewwel kuntatt tar-rikorrenti mal-Kummissjoni, jiġifieri t-talba għall-ħatra ta’ grupp inkarigat sabiex jipproċessa l-fajl tagħha li jikkonċerna l-akkwist tal-kontroll esklużiv ta’ Morpol, sar fil-21 ta’ Diċembru 2012.

434

Anki meta sar l-ewwel kuntatt tar-rikorrenti mal-Kummissjoni, il-ksur tal-Artikolu 4(1) tar-Regolament Nru 139/2004 kien b’hekk ġie tterminat u dak tal-Artikolu 7(1) tar-Regolament Nru 139/2004 kien beda. Is-sitwazzjoni kienet identika, għal raġunijiet iktar qawwija, meta saret in-notifika formali, jiġifieri fid-9 ta’ Awwissu 2013.

435

Peress li r-rikorrenti daħlet f’kuntatt mal-Kummissjoni unikament wara li wettqet il-ksur, hija bl-ebda mod ma tista’ titlob l-istess trattament bħal dak mogħti lir-rikorrenti fis-sentenza tat-30 ta’ Settembru 2003, Atlantic Container Line et vs Il-Kummissjoni (T-191/98 u T-212/98 sa T-214/98, EU:T:2003:245), li kienu nnotifikaw il-ftehim TACA, fuq bażi volontarja, qabel id-dħul fis-seħħ tiegħu (ara l-punti 415 u 417 iktar ’il fuq).

436

Barra minn hekk, mill-punt 1620 tas-sentenza tat-30 ta’ Settembru 2003, Atlantic Container Line et vs Il-Kummissjoni (T-191/98 u T-212/98 sa T-214/98, EU:T:2003:245) jirriżulta li, f’din il-kawża li tat lok għal din is-sentenza, “[kien] biss fid-dikjarazzjoni tal-oġġezzjonijiet, wara tliet snin ta’ eżami tal-prattiki inkwistjoni, li l-Kummissjoni [kienet] indikat għall-ewwel darba lill-partjiet f’TACA li hija kienet tipprevedi li tapplika l-Artikolu 86 tat-Trattat għall-imsemmija prattiki, u dan minkejja li kien jirriżulta mill-korrispondenza skambjata matul il-proċedura amministrattiva li hija kienet diġà eżaminat dawn il-prattiki fid-dettall fl-aħħar tal-1994 u fil-bidu tal-1995”, u li, “madankollu [f’]dan l-istadju, il-Kummissjoni fl-ebda mument ma kienet alludiet għal applikazzjoni possibbli tal-Artikolu 86 tat-Trattat”.

437

F’dan il-każ, jeħtieġ li jitfakkar li l-ewwel kuntatt tar-rikorrenti mal-Kummissjoni, jiġifieri t-talba għall-ħatra ta’ grupp inkarigat mill-ipproċessar tal-fajl tagħha dwar l-akkwist tal-kontroll esklużiv ta’ Morpol, kien fil-21 ta’ Diċembru 2012. Kif jirriżulta mill-punt 21 tad-deċiżjoni kkontestata, fl-assenza ta’ kull kuntratt mir-rikorrenti wara l-preżentazzjoni tat-talba għall-ħatra ta’ grupp, il-Kummissjoni talbet li tiġi organizzata telekonferenza, li saret fil-25 ta’ Jannar 2013. Matul it-telekonferenza, il-Kummissjoni talbet informazzjoni dwar l-istruttura tat-tranżazzjoni u kjarifiki fuq il-kwistjoni dwar jekk l-akkwist ta’ Diċembru 2012 setax diġà kkonferixxa lir-rikorrenti il-kontroll ta’ Morpol.

438

Il-fatt li l-Kummissjoni mill-bidu wriet interess dwar ksur possibbli tal-obbligu ta’ status quo huwa kkonfermat minn ittra mibgħuta lir-rikorrenti mill-konsulent legali tal-uffiċċju ta’ avukati F. tas-27 ta’ Jannar 2013. F’din l-ittra, dan il-konsulent legali kiteb li, “[f]uq talba tal-grupp inkarigat mill-kawża, aħna spjegajna fil-qosor l-istruttura tal-operazzjoni” u li, “f’dan il-kuntest, il-Kummissjoni mmanifestat interess partikolari fir-rigward tal-ħin tal-operazzjoni inkonnessjoni mat-twettiq tagħha”.

439

Barra minn hekk, fit-12 ta’ Frar 2013, il-Kummissjoni bagħtet lir-rikorrenti talba għal informazzjoni dwar l-akkwist possibbli ta’ kontroll fattwali ta’ Morpol wara l-akkwist ta’ Diċembru 2012. F’din it-talba għal informazzjoni, il-Kummissjoni b’mod partikolari għamlet il-mistoqsija li ġejja:

440

Għaldaqstant, il-Kummissjoni, ftit taż-żmien wara l-ewwel kuntatt tar-rikorrenti, esprimiet it-tħassib tagħha marbut ma’ ksur possibbli tal-obbligu ta’ status quo. Din is-sitwazzjoni bl-ebda mod ma hija paragunabbli ma’ dik inkwistjoni fil-kawża li tat lok għas-sentenza tat-30 ta’ Settembru 2003, Atlantic Container Line et vs Il-Kummissjoni (T-191/98 u T-212/98 sa T-214/98, EU:T:2003:245), li fiha kien biss “wara tliet snin ta’ eżami tal-prattiki inkwistjoni, li l-Kummissjoni [kienet] indikat għall-ewwel darba lill-partijiet fit-TACA li hija kienet tipprevedi li tapplika l-Artikolu 86 tat-Trattat għall-imsemmija prattiki” (ara l-punt 436 iktar ’il fuq).

441

Minn dak li ntqal jirriżulta li l-analoġiji li tipprova tagħmel ir-rikorrenti bejn il-kawża odjerna u l-kawża li tat lok għas-sentenza tat-30 ta’ Settembru 2003, Atlantic Container Line et vs Il-Kummissjoni (T-191/98 u T-212/98 sa T-214/98, EU:T:2003:245) ma humiex konvinċenti.

442

Għaldaqstant hemm lok li tiġi miċħuda wkoll it-tieni parti tar-raba’ motiv u, konsegwentement, ir-raba’ motiv fl-intier tiegħu.

E.

Fuq il-ħames motiv, ibbażat fuq żball manifest ta’ liġi u ta’ fatt u fuq assenza ta’ motivazzjoni fir-rigward tal-istabbiliment tal-livelli tal-multi

443

Il-ħames motiv huwa maqsum f’ħames partijiet, ibbażati, l-ewwel waħda fuq assenza ta’ motivazzjoni fir-rigward tal-istabbiliment tal-ammont tal-multa, it-tieni, fuq evalwazzjoni żbaljata tas-serjetà tal-ksur allegat, it-tielet, fuq evalwazzjoni żbaljata tat-tul tal-ksur allegat, ir-raba’, fuq l-allegazzjoni li l-multa hija sproporzjonata u, l-ħames, fuq l-allegazzjoni li d-deċiżjoni kkontestata b’mod żbaljat ma tirrikonoxxix l-eżistenza ta’ ċirkustanzi attenwanti.

1.

Fuq l-ewwel parti, ibbażata fuq l-assenza ta’ motivazzjoni fir-rigward tal-istabbiliment tal-ammont tal-multa

444

Ir-rikorrenti ssostni li l-motivazzjoni tad-deċiżjoni kkontestata fir-rigward tal-ammont tal-multa hija limitata għal żewġ punti konċiżi (punti 206 u 207 tad-deċiżjoni kkontestata) li tinkludi biss kunsiderazzjonijiet ġenerali. Fl-opinjoni tagħha, il-multa imposta hija għaldaqstant vvizzjata b’assenza ta’ motivazzjoni adegwata u għandha tiġi annullata.

445

Il-Kummissjoni tikkontesta l-argumenti tar-rikorrenti.

446

Skont ġurisprudenza stabbilita, il-motivazzjoni meħtieġa mit-tieni subparagrafu tal-Artikolu 296 TFUE għandha tiġi adattata għan-natura tal-att inkwistjoni u għandha tagħmel ċar u inekwivoku r-raġunament tal-istituzzjoni, li tadotta l-att, b’mod li tippermetti lill-partijiet ikkonċernati jkunu jafu bil-ġustifikazzjoni tal-miżura li tiġi adottata u lill-qorti kompetenti teżerċita l-istħarriġ tagħha (ara s-sentenza tal-15 ta’ April 1997, Irish Farmers Association et, C-22/94, EU:C:1997:187, punt 39 u l-ġurisprudenza ċċitata). Il-motivazzjoni ma għandhiex bilfors tispeċifika l-punti kollha ta’ fatt u ta’ liġi rilevanti, sa fejn il-kwistjoni dwar jekk il-motivazzjoni ta’ att tissodisfax ir-rekwiżiti tat-tieni paragrafu tal-Artikolu 296 TFUE għandha tiġi evalwata mhux biss fid-dawl tal-kliem tagħha, iżda wkoll f’dak tal-kuntest tagħha u tar-regoli kollha tad-dritt li jirregolaw is-suġġett ikkonċernat (ara s-sentenza tas-6 ta’ Marzu 2003, Interporc vs Il-Kummissjoni, C-41/00 P, EU:C:2003:125, punt 55 u l-ġurisprudenza ċċitata).

447

Fir-rigward tal-multi imposti skont l-Artikolu 14 tar-Regolament Nru 139/2004, jeħtieġ li jitfakkar li, skont il-paragrafu 3 tal-istess artikolu, “[m] Meta jkun qiegħed jiġi stabbilit l-ammont tal-multa, għandhom ikunu kunsidrati n-natura, l-gravità u t-tul tal-ksur”.

448

Barra minn hekk, skont l-Artikolu 14(2) tar-Regolament Nru 139/2004, il-Kummissjoni tista’ timponi multi li jilħqu 10 % tad-dħul mill-bejgħ totali mwettaq mill-impriżi kkonċernati fis-sens tal-Artikolu 5 ta’ dan l-istess regolament għal ksur tal-obbligu ta’ notifika prevista fl-Artikolu 4 tar-Regolament Nru 139/2004 u għal twettiq ta’ konċentrazzjoni bi ksur tal-Artikolu 7 ta’ dan l-istess regolament.

449

Barra minn hekk, hemm lok li jiġi rrilevat li l-Kummissjoni ma adottatx linji gwida li jistabbilixxu l-metodu tal-kalkolu li hija kellha tosserva fil-kuntest tal-istabbiliment tal-ammont tal-multi skont l-Artikolu 14 tar-Regolament Nru 139/2004, fatt li huwa barra minn dan irrikonoxxut mir-rikorrenti.

450

Fl-assenza ta’ tali linji gwida, il-kuntest tal-analiżi tal-Kummissjoni għandu jkun dak tal-Artikolu 14(3) tar-Regolament Nru 139/2004 (ara, b’analoġija, is-sentenza tat-12 ta’ Diċembru 2012, Electrabel vs Il-Kummissjoni, T-332/09, EU:T:2012:672, punt 228). Madankollu hija obbligata li turi b’mod ċar u inekwivoku fid-deċiżjoni kkontestata l-elementi meħuda inkunsiderazzjoni fid-determinazzjoni tal-ammont tal-multa (sentenza tat-12 ta’ Diċembru 2012, Electrabel vs Il-Kummissjoni, T-332/09, EU:T:2012:672, punt 228).

451

F’dan il-każ, it-taqsima “5. Ammont tal-multi”, tad-deċiżjoni kkontestata kienet tinkludi biss żewġ punti, jiġifieri l-punti 206 u 207. F’dawn il-punti, il-Kummissjoni sempliċiment u essenzjalment tikkonstata li, fil-każ ta’ impriża tad-daqs tar-rikorrenti, l-ammont tas-sanzjoni għandu jkun għoli sabiex ikollu effett dissważiv, li dan huwa iktar u iktar minnu meta t-tranżazzjoni li twettqet qabel ma ġiet awtorizzata qajmet dubji serji dwar il-kompatibbiltà tagħha mas-suq intern u li, “[s]sabiex timponi multa għall-ksur u sabiex dan ma jiġix ripetut, u fid-dawl taċ-ċirkustanzi speċifiċi tal-każ”, kien meħtieġ li tiġi imposta, skont l-Artikolu 14(2) tar-Regolament Nru 139/2004, multa ta’ EUR 10 000 000 għall-ksur tal-Artikolu 4(1) tar-Regolament Nru 139/2004, u multa ta’ EUR 10 000 000 għall-ksur tal-Artikolu 7(1) tal-imsemmi regolament.

452

Madankollu, kif tenfasizza l-Kummissjoni, mir-riferiment għaċ-“ċirkustanzi speċifiċi tal-każ”, li jsir fil-punt 207 tad-deċiżjoni kkontestata, hemm lok li jittieħed kont ukoll tal-iżviluppi li jinsabu fit-taqsima “4. Id-deċiżjoni li jiġu imposti multi”, tal-imsemmija deċiżjoni jiġifieri l-punti 124 sa 205.

453

F’dawn il-punti, il-Kummissjoni eżaminat il-fatturi fl-Artikolu 14(3) tar-Regolament Nru 139/2004, jiġifieri n-natura, is-serjetà u t-tul tal-ksur (ara, f’dan ir-rigward, is-sinteżi inkluż fil-punti 31 sa 33 iktar ’il fuq). F’dan il-kuntest, hija wriet b’mod ċar u inekwivoku l-elementi meħuda inkunsiderazzjoni għad-determinazzjoni tal-ammont tal-multa, u b’hekk ippermettiet lir-rikorrenti li tiddefendi ruħha u lill-Qorti Ġenerali li teżerċita l-istħarriġ tagħha. Barra minn hekk, fil-kuntest tat-tieni u t-tielet parti tal-ħames motiv, ir-rikorrenti tikkontesta fid-dettall l-evalwazzjonijiet tal-Kummissjoni dwar is-serjetà u t-tul tal-ksur, fatt li jikkonferma li l-eżami ta’ dawn il-fatturi fid-deċiżjoni kkontestata huwa suffiċjentement preċiż sabiex jippermetti lir-rikorrenti tiddefendi ruħha.

454

Ir-rikorrenti tenfasizza li l-Kummissjoni la semmiet l-ammont inizjali tal-multa u la l-approċċ segwit għall-istabbiliment tiegħu, u lanqas il-piż attribwit lill-fatturi li jinċidu fuq il-multa.

455

F’dan ir-rigward, hemm lok li jiġi rrilevat li, meta l-Kummissjoni ma tkunx adottat linji gwida li jistabbilixxu l-metodu tal-kalkolu li hija għandha ssegwi fil-kuntest tal-istabbiliment tal-ammont tal-multi skont dispożizzjoni ddeterminata u meta r-raġunament tal-Kummissjoni jkun jidher b’mod ċar u inekwivoku fid-deċiżjoni kkontestata, din tal-aħħar ma tkunx tesprimi f’figuri, b’mod assolut jew f’perċentwali, l-ammont bażiku tal-multa u ċ-ċirkustanzi aggravanti jew attenwanti li jkunu possibbli (sentenzi tal-15 ta’ Diċembru 2010, E.ON Energie vs Il-Kummissjoni, T-141/08, EU:T:2010:516, punt 284, u tas-26 ta’ Novembru 2014, Energetický a průmyslový u EP Investment Advisors vs Il-Kummissjoni, T-272/12, EU:T:2014:995, punt 101).

456

Għaldaqstant, l-argument tar-rikorrenti li l-Kummissjoni kellha tispeċifika l-ammont bażiku tal-multa kif ukoll il-piż attribwit lid-diversi fatturi għandu jiġi miċħud.

457

Dan ir-riżultat ma huwiex ikkontestat mill-ġurisprudenza ċċitata mir-rikorrenti.

458

Fir-rigward tas-sentenzi tat-8 ta’ Diċembru 2011, Chalkor vs Il-Kummissjoni (C-386/10 P, EU:C:2011:815), u tal-10 ta’ Lulju 2014, Telefónica u Telefónica de España vs Il-Kummissjoni (C-295/12 P, EU:C:2014:2062), jeħtieġ li jiġi rrilevat li dawn kienu sentenzi li jikkonċerna ksur tal-Artikoli 101 jew 102 TFUE u li, fil-kawżi li taw lok għal dawn is-sentenzi, kienu applikabbli linji gwida għall-kalkolu tal-multi.

459

Ċertament huwa minnu li l-Qorti Ġenerali rrilevat, fil-punt 142 tas-sentenza tas-6 ta’ April 1995, TrefilUnjoni vs Il-Kummissjoni (T-148/89, EU:T:1995:68), li kien “mixtieq li l-impriżi – bil-għan li jkunu jistgħu jadottaw il-pożizzjoni tagħhom b’mod informat – jkunu jistgħu jifhmu fid-dettall, bis-saħħa ta’ kull sistema li l-Kummissjoni tqis bħala xierqa, il-metodu tal-kalkolu tal-multa li tiġi imposta fuqhom, mingħajr ma jkunu obbligati, sabiex jaslu għal dan, li jippreżentaw rikors ġudizzjarju kontra d-deċiżjoni tal-Kummissjoni”.

460

Madankollu, hemm lok li jiġi rrilevat li, fil-kawża li tat lok għal din is-sentenza, ir-rikorrenti kienet sostniet li l-Kummissjoni ma kinitx speċifikat jekk kinitx ħadet bħala l-bażi tal-kalkolu tal-multa d-dħul mill-bejgħ globali tal-impriża jew unikament dak li jikkonċerna lil Franza jew lill-Benelux. F’dik il-kawża, kien biss matul il-proċedura quddiem il-Qorti Ġenerali li l-Kummissjoni speċifikat li hija kienet użat bħala l-bażi tal-kalkolu tal-multa d-dħul mill-bejgħ ta’ xbiek tal-ħadid imwettaq mill-impriżi fis-suq ġeografiku inkwistjoni (ara, f’dan is-sens, is-sentenza tas-6 ta’ April 1995, TrefilUnjoni vs Il-Kummissjoni, T-148/89, EU:T:1995:68, punti 135, 136 u 142).

461

Għaldaqstant, f’din il-kawża, il-Kummissjoni kienet wettqet kalkolu bbażat fuq dħul mill-bejgħ imwettaq f’suq speċifiku, iżda hija dan ma kinitx speċifikatu fid-deċiżjoni kkontestata. Huwa f’dan il-kuntest li jeħtieġ li jinftiehem il-kliem iċċitat riprodott fil-punt 459 iktar ’il fuq. Barra minn hekk, fis-sentenza tas-6 ta’ April 1995, TrefilUnjoni vs Il-Kummissjoni (T-148/89, EU:T:1995:68, punti 140 sa 144), il-Qorti Ġenerali ċaħdet il-motiv ibbażat fuq ksur tal-obbligu ta’ motivazzjoni.

462

Barra minn hekk, ir-rikorrenti ssostni, fil-punt 104 ta’ dan ir-rikors, li “d-deċiżjoni [kkontestata] ma tispjegax kif id-dħul mill-bejgħ [tar-rikorrenti] u l-profitt, fejn applikabbli, li [r-rikorrenti] tista’ tislet mill-ksur allegat fl-Artikolu 4(1) u fl-Artikolu 7(1) tar-Regolament [Nru 139/2004] kellhom effett fuq il-livell tal-multa”. Barra minn hekk, fil-punt 104 tar-rikors, hija tiddikjara, li “[m]ulta għandha tkun speċifika għall-awtur tal-ksur u għall-ksur u għandha tiġi ddeterminata billi jittieħdu inkunsiderazzjoni, fost oħrajn, id-dħul mill-bejgħ jew il-kapital tal-impriża u l-profitt derivat mill-ksur allegat”. Skont ir-rikorrenti, hija ma dderivat l-ebda profitt mill-ksur allegat.

463

B’risposta għal mistoqsija magħmula waqt is-seduta marbuta mal-kwistjoni dwar jekk il-punt 104 tar-rikors kienx jikkonċerna l-motivazzjoni tad-deċiżjoni kkontestata jew inkella żball materjali fid-deċiżjoni kkontestata, ir-rikorrenti kkonfermat li dan il-punt kien jikkonċerna l-motivazzjoni tad-deċiżjoni kkontestata, u ta’ dan ittieħdet nota fil-proċess verbali tas-seduta.

464

Fir-rigward tal-argument tar-rikorrenti li d-deċiżjoni kkontestata ma tispjegax kif id-dħul mill-bejgħ tar-rikorrenti inċida fuq il-livell tal-multa, jeħtieġ li jiġi rrilevat li l-Kummissjoni indikat, fin-nota ta’ qiegħ il-paġna Nru 5 tad-deċiżjoni kkontestata, id-dħul mill-bejgħ dinji tar-rikorrenti.

465

Barra minn hekk, jeħtieġ li jiġi rrilevat li, fil-kuntest tal-eżami tal-elementi rilevanti għad-determinazzjoni tal-multa, il-Kummissjoni għamlet diversi drabi riferiment għad-daqs tar-rikorrenti. Għalhekk, hija rrilevat, fil-punt 144 tad-deċiżjoni kkontestata, fil-kuntest tal-evalwazzjoni tas-serjetà tal-ksur, li r-rikorrenti kienet “kumpannija Ewropea kbira”. Barra minn hekk, hija rrilevat, fil-punt 150 tad-deċiżjoni kkontestata, ukoll fil-kuntest tal-evalwazzjoni tas-serjetà tal-ksur, li “l-operazzjoni kienet tgħaqqad f’[is-]suq potenzjali [tas-salamun Skoċċiż] tnejn mill-ikbar elevaturi u trasformaturi primarji fiż-ŻEE”. Din l-aħħar konstatazzjoni ġiet ripetuta fil-punt 172 tad-deċiżjoni kkontestata, fil-kuntest tal-evalwazzjoni tat-tul tal-ksur. Fl-aħħar, il-Kummissjoni rrilevat, fil-punt 206 tad-deċiżjoni kkontestata, li hija ħadet inkunsiderazzjoni d-daqs tar-rikorrenti għall-istabbiliment tal-ammont tal-multa.

466

Għaldaqstant, jirriżulta b’mod ċar mill-motivazzjoni tad-deċiżjoni kkontestata li l-Kummissjoni ħadet inkunsiderazzjoni d-daqs tar-rikorrenti fil-kuntest tal-istabbiliment tal-ammont tal-multa.

467

Fir-rigward tal-argument tar-rikorrenti li d-deċiżjoni kkontestata ma tispjegax kif il-profitt, jekk applikabbli, li r-rikorrenti tista’ tislet mill-ksur allegat fl-Artikolu 4(1) u fl-Artikolu 7(1) tar-Regolament Nru 139/2004 inċida fuq il-livell tal-multa, jeħtieġ li jiġi kkonstatat li l-Kummissjoni ma eżaminatx, fid-deċiżjoni kkontestata, l-eżistenza possibbli ta’ profitt li r-rikorrenti setgħet kisbet mill-ksur. Minn dan isegwi b’mod ċar li l-Kummissjoni ma ħaditx inkunsiderazzjoni l-profitt possibbli jew l-assenza ta’ profitt possibbli li r-rikorrenti setgħet tikseb mill-ksur sabiex tistabbilixxi l-ammont tal-multa. Għaldaqstant ma hemmx nuqqas ta’ motivazzjoni minn dan il-lat.

468

Barra minn hekk, anki jekk jiġi preżunt li l-argument imqajjem fil-punt 104 tar-rikors kellu jiġi interpretat, bħall-kuntrarju tad-dikjarazzjoni magħmula mir-rikorrenti waqt is-seduta, fis-sens li r-rikorrenti tinvoka wkoll żball materjali sa fejn il-Kummissjoni naqset milli tieħu inkunsiderazzjoni l-assenza ta’ profitt miksub mill-ksur, tali argument għandu jiġi miċħud bħala infondat.

469

Mill-ġurisprudenza jirriżulta li ma teżistix lista vinkolanti jew eżawrjenti ta’ kriterji li għandhom jittieħdu inkunsiderazzjoni b’mod obbligatorju fil-kuntest tal-evalwazzjoni tas-serjetà tal-ksur (ara, fir-rigward tal-ksur tal-Artikolu 101 TFUE, is-sentenza tas-17 ta’ Lulju 1997, Ferriere Nord vs Il-Kummissjoni, C-219/95 P, EU:C:1997:375, punt 33, u l-ksur tal-Artikolu 102 TFUE, sentenza tad-19 ta’ April 2012, Tomra Systems et vs Il-Kummissjoni, C-549/10 P, EU:C:2012:221, punt 107).

470

B’mod partikolari il-Kummissjoni ma hijiex obbligata li teżamina il-kwistjoni dwar jekk rikorrent kisibx profitt minn ksur tal-Artikolu 4(1) u tal-Artikolu 7(1) tar-Regolament Nru 139/2004. F’dan il-kuntest, jeħtieġ li jiġi rrilevat li dan ma huwiex element li jikkostitwixxi ksur tal-Artikolu 4(1) jew tal-Artikolu 7(1) tar-Regolament Nru 139/2004 u li ma jkunx dejjem possibbli li jiġi ddeterminat, iva jew le, jekk ir-rikorrent kisibx jew le profitt mit-twettiq ta’ konċentrazzjoni qabel in-notifika u l-awtorizzazzjoni tagħha u inqas u inqas li jiġi kkwantifikat dan il-profitt.

471

Ir-rikorrenti tiċċita diversi sentenzi insostenn tad-dikjarazzjoni tagħha li l-multa għandha tiġi ddeterminata billi jittieħed inkunsiderazzjoni, fost affarijiet oħra, il-profitt miksub mill-ksur allegat. Jeħtieġ li jiġi rrilevat li l-ġurisprudenza ċċitata mir-rikorrenti f’dan il-kuntest tikkonċerna kawżi marbuta ma’ ksur tal-Artikolu 101 TFUE (sentenzi tas-7 ta’ Ġunju 1983, Musique Diffusion française et vs Il-Kummissjoni, 100/80 sa 103/80, EU:C:1983:158, punt 129; tat-28 ta’ Ġunju 2005, Dansk Rørindustri et vs Il-Kummissjoni, C-189/02 P, C-202/02 P, C-205/02 P sa C-208/02 P u C-213/02 P, EU:C:2005:408, punt 242; tat-3 ta’ Settembru 2009, Prym u Prym Consumer vs Il-Kummissjoni, C-534/07 P, EU:C:2009:505, punt 96, u tat-8 ta’ Diċembru 2011, Chalkor vs Il-Kummissjoni, C-386/10 P, EU:C:2011:815, punt 56) jew fl-Artikolu 102 TFUE (konklużjonijiet tal-Avukat Ġenerali Wathelet fil-Kawża Telefónica u Telefónica de España vs Il-Kummissjoni, C-295/12 P, EU:C:2013:619, punt 117).

472

Huma biss il-konklużjonijiet tal-Avukat Ġenerali Bot fil-Kawża E.ON Energie vs Il-Kummissjoni (C-89/11 P, EU:C:2012:375), ċċitati mir-rikorrenti f’dan il-kuntest, li kienu jikkonċernaw tip ieħor ta’ ksur, jiġifieri l-ksur ta’ siġill. F’dan ir-rigward, hemm lok li jiġi kkonstatat li l-Qorti tal-Ġustizzja ma segwietx il-konklużjonijiet tal-Avukat Ġenerali Bot u ċaħdet l-appell bis-sentenza tat-22 ta’ Novembru 2012, E.ON Energie vs Il-Kummissjoni (C-89/11 P, EU:C:2012:738), b’mod kuntrarju għal dak li kien ippropona l-Avukat Ġenerali. Barra minn hekk, mill-konklużjonijiet tal-Avukat Ġenerali Bot f’din il-kawża ma jirriżultax li dan tal-aħħar ikkunsidra li l-Kummissjoni hija obbligata li teżamina fil-każijiet kollha l-profitt miksub mill-ksur imwettaq. Huwa sempliċement irrileva, fil-punt 114 tal-konklużjonijiet, li kien hemm lok li jittieħdu inkunsiderazzjoni l-elementi kollha li jikkaratterizzaw il-kawża, “bħal”, fost oħrajn, il-profitt li l-impriża kkonċernat setgħet tikseb mill-ksur imwettaq. Għaldaqstant huwa sempliċement elenka eżempji ta’ kriterji li jistgħu jittieħdu inkunsiderazzjoni, filwaqt li fakkar, fil-punt 113 tal-konklużjonijiet tiegħu, il-ġurisprudenza li skontha ma teżisti l-ebda lista vinkolanti jew eżawrjenti ta’ kriterji li għandhom jittieħdu inkunsiderazzjoni b’mod obbligatorju.

473

Barra minn hekk, jeħtieġ li jiġi rrilevat li minn ġurisprudenza stabbilita jirriżulta li, anki fil-kuntest ta’ ksur tal-Artikolu 101 TFUE, il-fatt li impriża ma ħadet l-ebda vantaġġ mill-ksur ma huwiex ta’ ostakolu sabiex multa tiġi imposta, bir-riskju li din tal-aħħar titlef il-karattru dissważiv tagħha (ara s-sentenza tat-8 ta’ Lulju 2008, BPB vs Il-Kummissjoni, T-53/03, EU:T:2008:254, punt 441 u l-ġurisprudenza ċċitata). Il-Kummissjoni ma hijiex marbuta, sabiex tiffissa l-ammont tal-multi, li tieħu inkunsiderazzjoni l-assenza ta’ benefiċċju mill-ksur inkwistjoni (ara s-sentenza tad-29 ta’ Novembru 2005, SNCZ vs il-Kummissjoni, T-52/02, EU:T:2005:429, punt 90 u l-ġurisprudenza ċċitata). Il-Kummissjoni ma hijiex obbligata li tistabbilixxi, f’kull każ, għall-finijiet tad-determinazzjoni tal-ammont tal-multa, l-vantaġġ finanzjarju marbut mal-ksur ikkonstatat. L-assenza ta’ tali vantaġġ ma tistax titqies bħala ċirkustanza attenwanti (ara s-sentenza tat-8 ta’ Lulju 2008, BPB vs Il-Kummissjoni, T-53/03, EU:T:2008:254, punt 442 u l-ġurisprudenza ċċitata).

474

Bl-istess mod, il-Kummissjoni ma hijiex obbligata tieħu inkunsiderazzjoni, bil-għan li tistabbilixxi l-ammont tal-multi, l-assenza possibbli ta’ profitt miksub mit-twettiq ta’ konċentrazzjoni qabel in-notifika u l-awtorizzazzjoni tagħha.

475

L-evalwazzjoni tal-profitt okkażjonat bil-ksur tista’, ċertament, tkun rilevanti jekk il-Kummissjoni tibbaża ruħha speċifikament fuq tali profitt sabiex tevalwa s-serjetà ta’ dan il-ksur u/jew sabiex tikkalkula l-multi (sentenza tal-15 ta’ Marzu 2000, Cimenteries CBR et vs Il-Kummissjoni, T-25/95, T-26/95, T-30/95 sa T-32/95, T-34/95 sa T-39/95, T-42/95 sa T-46/95, T-48/95, T-50/95 sa T-65/95, T-68/95 sa T-71/95, T-87/95, T-88/95, T-103/95 u T-104/95, EU:T:2000:77, punt 4882). Madankollu, dan ma huwiex il-każ fil-kawża odjerna.

476

Barra minn hekk, jeħtieġ li jiġi rrilevat li, bil-għan li tiġi sostnuta ċ-ċirkustanza li hija ma kisbet l-ebda profitt mill-ksur allegat, ir-rikorrenti tibbaża ruħha, fil-punt 71 tar-replika, b’mod partikolari fuq il-fatt li hija ma eżerċitatx id-drittijiet tagħha tal-vot f’Morpol sal-awtorizzazzjoni tal-konċentrazzjoni. Dan l-element ittieħed inkunsiderazzjoni mill-Kummissjoni bħala ċirkustanza attenwanti (punti 196 u 198 tad-deċiżjoni kkontestata).

477

Minn dak li ntqal jirriżulta li l-Kummissjoni la kisret l-obbligu tagħha ta’ motivazzjoni u lanqas wettqet żball materjali billi astjeniet milli tiddetermina u li tieħu inkunsiderazzjoni l-profitt possibbli jew in-nuqqas tiegħu mill-ksur.

2.

Fuq it-tieni parti, ibbażata fuq evalwazzjoni żbaljata tas-serjetà tal-ksur allegat

478

Ir-rikorrenti tiddikjara li ma huwa rilevanti l-ebda wieħed mill-fatturi li ttieħdu inkunsiderazzjoni fid-deċiżjoni kkontestata għall-finijiet tal-evalwazzjoni tas-serjetà, jiġifieri n-negliġenza, id-dubji serji dwar il-kompatibbiltà tal-operazzjoni mas-suq intern u l-eżistenza ta’ preċedenti li jikkonċernaw lir-rikorrenti u lil kumpanniji oħra.

479

Il-Kummissjoni tikkontesta l-argumenti tar-rikorrenti.

480

Qabel xejn, jeħtieġ li jiġi rrilevat li r-rikorrenti ma tikkontestax il-kunsiderazzjonijiet li jinsabu fil-punti 131 sa 136 tad-deċiżjoni kkontestata marbuta man-natura tal-ksur. F’dawn il-punti, il-Kummissjoni qieset li kull ksur tal-Artikolu 4(1) u tal-Artikolu 7(1) tar-Regolament Nru 139/2004 kien, min-natura tiegħu, ksur gravi. Din l-evalwazzjoni, li għandha tiġi kkonfermata, hija bbażata b’mod partikolari fuq il-punt 235 tas-sentenza tat-12 ta’ Diċembru 2012, Electrabel vs Il-Kummissjoni (T-332/09, EU:T:2012:672). F’dan il-punt, il-Qorti Ġenerali kienet ikkonstatat li kien b’mod ġust li l-Kummissjoni kienet irrilevat li, “[m]eta l-leġiżlatur Komunitarju ssuġġetta għal notifikazzjoni u għal awtorizzazzjoni minn qabel il-konċentrazzjonijiet b’dimensjoni Komunitarja, huwa kellu l-ħsieb li jiżgura ruħu mill-effettività tal-kontroll tal-konċentrazzjonijiet b’dimensjoni Komunitarja tal-Kummissjoni, billi jippermetti li din tal-aħħar, jekk ikun il-każ, li timpedixxi l-implementazzjoni ta’ dawn il-konċentrazzjonijiet qabel ma tiġi adottata deċiżjoni finali u b’hekk li tipprevjeni effetti ħżiena irreparabbli u permanenti fuq il-kompetizzjoni” [traduzzjoni mhux uffiċjali].

481

Madankollu, ir-rikorrenti tikkontesta r-rilevanza tal-fatturi meħuda inkunsiderazzjoni mill-Kummissjoni fil-kuntest tal-evalwazzjoni konkreta tas-serjetà tal-ksur inkwistjoni f’dan il-każ.

482

Preliminarjament, hemm lok li jitfakkar, li s-serjetà tal-ksur għandha tkun stabbilita abbażi ta’ numru kbir ta’ elementi, bħaċ-ċirkustanzi partikolari tal-kawża, il-kuntest tagħha u l-portata dissważiva tal-multi, u dan mingħajr ma tkun ġiet stabbilita lista vinkolanti jew eżawrjenti ta’ kriterji li għandhom obbligatorjament jittieħdu inkunsiderazzjoni (sentenza tat-28 ta’ Ġunju 2005, Dansk Rørindustri et vs Il-Kummissjoni, C-189/02 P, C-202/02 P, C-205/02 P sa C-208/02 P u C-213/02 P, EU:C:2005:408, punt 241).

a)

Fuq it-teħid inkunsiderazzjoni tan-negliġenza tar-rikorrenti

483

Fir-rigward tal-argument tar-rikorrenti li l-aġir tagħha ma kienx negliġenti, huwa suffiċjenti li jitfakkar li dan l-argument ġie miċħud fil-kuntest tal-eżami tat-tieni motiv.

484

Għall-kuntrarju ta’ dak li tiddikjara r-rikorrenti, ma kien jeżisti l-ebda żball skużabbli min-naħa tagħha. Il-kunċett ta’ żball skużabbli, li joriġina direttament mill-ħsieb li jiġu osservati l-prinċipji ta’ ċertezza legali u ta’ protezzjoni tal-aspettattivi leġittimi, skont ġurisprudenza stabbilita, jista’ jkun jikkonċerna biss ċirkustanzi eċċezzjonali fejn, b’mod partikolari, l-istituzzjoni kkonċernata tkun adottat imġieba li, waħedha jew b’mod determinanti, hija tali li toħloq konfużjoni ammissibbli fil-moħħ ta’ individwu li jaġixxi in bona fide u li jeżerċita d-diliġenza kollha meħtieġa minn persuna normalment informata (ara s-sentenza tal-15 ta’ Settembru 2011, CMB u Christof vs Il-Kummissjoni, T-407/07, mhux ippubblikata, EU:T:2011:477, punt 99 u l-ġurisprudenza ċċitata). F’dan il-każ, ir-rikorrenti ma pproduċietx prova tad-diliġenza sħiħa rikjesta minn persuna normalment informata, fatt li jeskludi l-eżistenza ta’ żball skużabbli min-naħa tagħha.

b)

Fuq it-teħid inkunsiderazzjoni tal-eżistenza ta’ dubji serji dwar il-kompatibbiltà tal-operazzjoni mas-suq intern

485

Fir-rigward tat-teħid inkunsiderazzjoni mill-Kummissjoni tal-eżistenza ta’ dubji serji dwar il-kompatibbiltà tal-operazzjoni mas-suq intern, jeħtieġ li jiġi rrilevat dan li ġej.

486

Fil-punt 150 tad-deċiżjoni kkontestata, il-Kummissjoni fakkret li l-akkwist ta’ Morpol mir-rikorrenti ġie awtorizzat wara l-preżentazzjoni, mir-rikorrenti, ta’ firxa wiesa’ ta’ miżuri korrettivi sabiex jiġu ċċarati dubji serji mqajma mill-Kummissjoni fir-rigward tas-suq potenzjali tas-salamun Skoċċiż. Barra minn hekk, hija rrilevat li l-konċentrazzjoni kienet tgħaqqad f’dan is-suq potenzjali tnejn mill-ikbar elevaturi u trasformaturi primarji fiż-Żona Ekonomika Ewropea (ŻEE).

487

Il-Kummissjoni qieset li l-konċentrazzjoni mwettqa seta’ jkollha effett negattiv fuq il-kompetizzjoni fis-suq potenzjali tas-salamun Skoċċiż matul il-perijodu kollu tal-ksur. Skont il-Kummissjoni, minkejja li r-rikorrenti ma eżerċitatx id-drittijiet tagħha tal-vot f’Morpol, kien tal-inqas possibbli li ġiet affettwata r-relazzjoni kompetittiva bejn ir-rikorrenti u Morpol b’konsegwenza tal-akkwist ta’ Diċembru 2012.

488

Jeħtieġ li jiġi rrilevat li r-rikorrenti ma tqajjem l-ebda argument li jista’ jpoġġi f’dubju l-evalwazzjoni tal-Kummissjoni li l-konċentrazzjoni inkwistjoni kienet tqajjem dubji serji dwar il-kompatibbiltà tagħha mas-suq intern. Madankollu, hija tikkontesta t-teħid inkunsiderazzjoni ta’ dan il-fattur bħala element li jirrendi l-ksur iktar serju. Hija tqis li d-dikjarazzjoni inkluża fil-punt 157 tad-deċiżjoni kkontestata, li “l-fatt waħdu li l-operazzjoni qajmet dubji serji dwar il-kompatibbiltà tagħha mas-suq intern huwa fih innifsu fattur li jirrendi l-ksur iktar serju”, żnaturat ir-raġunament adottat mill-Qorti Ġenerali fis-sentenza tagħha tat-12 ta’ Diċembru 2012, Electrabel vs Il-Kummissjoni (T-332/09, EU:T:2012:672, punt 247), li “l-preżenza ta’ dannu għall-kompetizzjoni tagħmel il-ksur iktar serju”.

489

Fir-rigward tal-interpretazzjoni li għandha tingħata lis-sentenza tat-12 ta’ Diċembru 2012, Electrabel vs Il-Kummissjoni (T-332/09, EU:T:2012:672), jeħtieġ li jiġi rrilevat dan li ġej.

490

Il-kawża li tat lok għal din is-sentenza kienet tikkonċerna konċentrazzjoni li fir-rigward tagħha l-Kummissjoni kienet ikkonstatat li din ma kinitx tqajjem problemi ta’ kompetizzjoni. Il-Kummissjoni rrilevat, fil-punt 194 tad-Deċiżjoni C(2009) 4416 finali, tal-10 ta’ Ġunju 2009 (Kawża COMP/M.4994 – Electrabel vs Compagnie nationale du Rhône) (iktar ’il quddiem id-“deċiżjoni Electrabel”), li “l-preżenza ta’ dannu kompetittiv kien effettivament jirrendi l-ksur iktar serju” u li “l-assenza ta’ tali dannu kompetittiv fil-kawża preżenti [kienet] element important li għandu jittieħed inkunsiderazzjoni fl-istabbiliment tal-ammont tal-multa”, iżda li, “[m]adankollu, il-fatt li l-operazzjoni ma qajmitx problemi tal-kompetizzjoni ma [kienx] ta’ natura li jaffettwa n-natura serja tal-ksur”. Din id-dikjarazzjoni għandha tiġi moqrija fid-dawl tal-fatt li l-Kummissjoni kienet ikkonstatat, fil-punt 191 ta’ din l-istess deċiżjoni, li kull ksur tal-Artikolu 7(1) tar-Regolament Nru 4064/89 kien min-natura tiegħu ksur serju.

491

Għaldaqstant, il-Kummissjoni kkonstatat li l-ksur tal-Artikolu 7(1) tar-Regolament Nru 4064/89 jibqa’, min-natura tiegħu, ksur serju, u dan minkejja li l-konċentrazzjoni ma tkunx qajmet problemi ta’ kompetizzjoni. Għall-kuntrarju, ma huwiex permess li minn dan jiġi konkluż, kif tipprova tagħmel ir-rikorrenti, li l-eżistenza ta’ problemi ta’ kompetizzjoni ma jiżdidux mas-serjetà tal-ksur allegat. Fil-fatt, il-Kummissjoni ma kkonstatatx li l-eżistenza jew le ta’ problemi ta’ kompetizzjoni kienet irrilevanti għall-evalwazzjoni tas-serjetà tal-ksur, iżda biss li l-ksur jibqa’ min-natura tiegħu ksur serju, anki fl-assenza ta’ kull problema ta’ kompetizzjoni mqajma mill-konċentrazzjoni.

492

Fis-sentenza tat-12 ta’ Diċembru 2012, Electrabel vs Il-Kummissjoni (T-332/09, EU:T:2012:672), il-Qorti Ġenerali kkonfermat l-approċċ tal-Kummissjoni. B’mod partikolari hija rrilevat, fil-punt 246 tas-sentenza, li “il-Kummissjoni ġustament [kienet] issostni li l-analiżi ex post tan-nuqqas ta’ effett ta’ konċentrazzjoni fuq is-suq raġonevolment ma tistax tkun fattur determinanti sabiex tiġi kklassifikata s-serjetà tal-effett ħażin fuq is-sistema ta’ kontroll ex ante”. Barra minn hekk, hija kkonstatat dan li ġej, fil-punt 247 tas-sentenza:

493

Hemm lok li jiġi rrilevat li d-dikjarazzjoni inkluża fil-punt 246 tas-sentenza tat-12 ta’ Diċembru 2012, Electrabel vs Il-Kummissjoni (T-332/09, EU:T:2012:672), li “l-analiżi ex post tan-nuqqas ta’ effett ta’ konċentrazzjoni fuq is-suq raġonevolment ma tistax tkun fattur determinanti sabiex tiġi kklassifikata s-serjetà tal-effett ħażin fuq is-sistema ta’ kontroll ex ante” ma tistax tiġi interpretata fis-sens li l-eżistenza jew le tad-dannu kompetittiv ma għandu l-ebda rwol fl-evalwazzjoni tas-serjetà tal-ksur. Dan jirriżulta mill-punt 247 ta’ din is-sentenza, li fiha l-Qorti Ġenerali kkonstatat li “l-preżenza ta’ dannu għall-kompetizzjoni tagħmel il-ksur iktar serju”. Id-dikjarazzjoni inkluża fil-punt 246 ta’ din is-sentenza għandha tinqara’ fid-dawl taċ-ċirkustanza li l-Qorti Ġenerali kienet qiegħda twieġeb għall-argument ta’ Electrabel li l-ksur ma setgħax ikun ta’ natura serja, peress li dan ma kienx ippreġudika l-kompetizzjoni.

494

Fil-kawża li tat lok għad-deċiżjoni Electrabel, il-Kummissjoni u l-Qorti Ġenerali esprimew ruħhom fuq żewġ każijiet. Fl-ewwel lok, huma kkonstataw li l-assenza ta’ effett dannuż fuq il-kompetizzjoni, sitwazzjoni li tirriżulta meta konċentrazzjoni mwettqa b’mod prematur ma tqajjimx problema ta’ kompetizzjoni, bl-ebda mod ma tbiddel in-natura serja (min-natura tiegħu) tal-ksur. Fit-tieni lok, huma rrilevaw, bħala illustrazzjoni, li l-preżenza ta’ effetti dannużi kienu jrendu l-ksur iktar u iktar serju.

495

Madankollu jeżisti t-tielet każ li dwaru l-Kummissjoni u l-Qorti Ġenerali ma adottawx pożizzjoni fil-kawża li tat lok għad-deċiżjoni Electrabel. Din hija s-“sitwazzjoni intermedjarja”, li fiha l-konċentrazzjoni, kif imwettqa b’mod prematur, tqajjem dubji serji dwar il-kompatibbiltà tagħha mas-suq intern, iżda li fiha ma jistax jiġi ddeterminat jekk, iva jew le, it-twettiq tagħha fil-forma inizjalment prevista u mhux awtorizzata mill-Kummissjoni kellux jew le effetti dannużi fuq il-kompetizzjoni.

496

Għaldaqstant tqum il-kwistjoni dwar jekk, f’dan it-tielet każ, il-Kummissjoni tistax tqis li ċ-ċirkustanza li l-konċentrazzjoni tqajjem dubji serji dwar il-kompatibbiltà tagħha mas-suq intern bħala fattur jirrendi l-ksur iktar serju.

497

Hemm lok li tingħata risposta affermattiva. Fil-fatt, ma jkunx adegwat li jiġu trattati bl-istess mod, it-twettiq prematur ta’ konċentrazzjonijiet li jqajmu dubji serji dwar il-kompatibbiltà tagħhom mas-suq intern u t-twettiq prematur ta’ konċentrazzjonijiet li ma jqajmu l-ebda problema ta’ kompetizzjoni.

498

F’dan ir-rigward, jeħtieġ li jiġi rrilevat li l-għan tal-Artikolu 4(1) u tal-Artikolu 7(1) tar-Regolament Nru 139/2004 huwa li jiżgura l-effikaċja tas-sistema ta’ kontroll ex ante tal-effetti ta’ operazzjonijiet ta’ konċentrazzjonijiet ta’ daqs Komunitarju (ara, f’dan is-sens u b’analoġija, is-sentenza tat-12 ta’ Diċembru 2012, Electrabel vs Il-Kummissjoni, T-332/09, EU:T:2012:672, punt 246). Barra minn hekk, jeħtieġ li jiġi rrilevat li l-għan tal-leġiżlazzjoni tal-Unjoni fil-qasam tal-kontroll tal-konċentrazzjonijiet huwa l-prevenzjoni ta’ danni irreparabbli u permanenti lill-kompetizzjoni (sentenza tat-12 ta’ Diċembru 2012, Electrabel vs Il-Kummissjoni, T-332/09, EU:T:2012:672, punt 245). Is-sistema ta’ kontroll tal-konċentrazzjonijiet hija intiża li tippermetti lill-Kummissjoni li teżerċita “kontroll effettiv tal-konċentrazzjonijiet kollha skond l-effett tagħhom fuq l-istruttura tal-kompetizzjoni” (premessa 6 tar-Regolament Nru 139/2004).

499

Fil-każ ta’ konċentrazzjonijiet li jqajmu dubji serji dwar il-kompatibbiltà tagħhom mas-suq intern, ir-riskji possibbli għall-kompetizzjoni marbuta ma’ twettiq prematur ma humiex l-istess bħal dawk fil-każ ta’ konċentrazzjonijiet li ma jqajmu problemi ta’ kompetizzjoni.

500

Għaldaqstant, il-fatt li konċentrazzjoni tqajjem dubji serji dwar il-kompatibbiltà tagħha mas-suq intern jirrendi t-twettiq prematur ta’ din il-konċentrazzjoni iktar serju mit-twettiq prematur ta’ konċentrazzjoni li ma tqajjimx problemi ta’ kompetizzjoni, ħlief jekk, minkejja l-fatt li din tqajjem tali dubji serji, ikun jista’ jiġi eskluż f’każ partikolari li t-twettiq tagħha fil-forma prevista inizjalment u mhux awtorizzata mill-Kummissjoni seta’ kellu effetti dannużi fuq il-kompetizzjoni.

501

Għaldaqstant kien b’mod ġust li l-Kummissjoni kkonstatat, fil-punt 157 tad-deċiżjoni kkontestata, li “l-fatt waħda li l-operazzjoni [kienet] qajmet dubji serji dwar il-kompatibbiltà tagħha mas-suq intern [kien] fih innifsu fattur li [jirrendi] l-ksur iktar serju”, u dan wara li kkonstatat b’mod espliċitu, fil-punt 151 tad-deċiżjoni kkontestata, li l-konċentrazzjoni mwettqa seta’ jkollha effett negattiv fuq il-kompetizzjoni fuq is-suq potenzjali tas-salamun Skoċċiż matul il-perijodu kollu tal-ksur u li kien tal-inqas possibbli li ġiet affettwata r-relazzjoni kompetittiva bejn ir-rikorrenti u Morpol b’konsegwenza tal-akkwist ta’ Diċembru 2012.

502

Għall-kuntrarju, ma huwiex permess li jiġi konkluż mill-konstatazzjoni mogħtija fis-sentenza tat-12 ta’ Diċembru 2012, Electrabel vs Il-Kummissjoni (T-332/09, EU:T:2012:672, punt 247), li “l-preżenza ta’ dannu għall-kompetizzjoni tagħmel il-ksur iktar serju”, li huwa biss meta jkunu jistgħu jintwerew effetti dannużi effettivi li din tkun ta’ natura li tirrendi l-ksur iktar serju. Fil-fatt, il-fatt li l-Qorti Ġenerali rrilevat, bħala illustrazzjoni, li l-preżenza ta’ effetti dannużi kienet tirrendi l-ksur iktar serju, ma jippermettix li jiġi konkluż li din kienet l-unika ipoteżi li tirrendi l-ksur iktar serju. Fil-kawża li tat lok għad-deċiżjoni Electrabel, il-Kummissjoni u l-Qorti Ġenerali sempliċiment esprimew ruħhom fuq is-“sitwazzjoni intermedjarja”, kif iddefinita fil-punt 495 iktar ’il fuq.

503

Ir-rikorrenti ssostni li, fil-punti 156 u 157 tad-deċiżjoni kkontestata, il-Kummissjoni spjegat paradossalment li “l-preżenza ta’ dannu għall-kompetizzjoni tagħmel il-ksur iktar serju”, anki meta “analiżi ex post tal-effett ta’ konċentrazzjoni fuq is-suq raġonevolment ma tistax tkun fattur determinanti sabiex tiġi kklassifikata s-serjetà tal-effett ħażin fuq is-sistema ta’ kontroll ex ante”.

504

F’dan ir-rigward, jeħtieġ li jiġi rrilevat li l-Kummissjoni rriproduċiet il-kontenut tad-dikjarazzjonijiet tal-Qorti Ġenerali fis-sentenza tat-12 ta’ Diċembru 2012, Electrabel vs Il-Kummissjoni (T-332/09, EU:T:2012:672, punti 246 u 247), kif iċċitati fil-punt 492 iktar ’il fuq. Huwa suffiċjenti li jitfakkru l-osservazzjonijiet dwar l-interpretazzjoni li għandhom jingħataw dawn il-punti tal-imsemmija sentenza (punt 493 iktar ’il fuq).

505

Jeħtieġ li tiġi eżaminata il-kwistjoni dwar jekk kienx b’mod ġust li l-Kummissjoni qieset, fil-punt 151 tad-deċiżjoni kkontestata, li l-konċentrazzjoni mwettqa setgħet taffettwa b’mod negattiv fuq il-kompetizzjoni fis-suq potenzjali tas-salamun Skoċċiż matul il-perijodu kollu tal-ksur u li “[kien] tal-inqas possibbli li ġiet affettwata r-relazzjoni kompetittiva bejn ir-rikorrenti u Morpol b’konsegwenza tal-akkwist ta’ Diċembru 2012”.

506

F’dan ir-rigward, fl-ewwel lok, il-Kummissjoni rrilevat, fil-punt 151 tad-deċiżjoni kkontestata, li l-ex president-direttur ġenerali ta’ Morpol, M., kien irriżenja b’effett mill-1 ta’ Marzu 2013 wara li ġiet inkluża dispożizzjoni fis-SPA li kien ġie ffirmat mar-rikorrenti. Skont il-Kummissjoni, l-akkwist mir-rikorrenti ta’ sehem ta’ 48.5 % mill-kapital ta’ Morpol għaldaqstant kien jidher li seta’ jinfluwenza d-deċiżjonijiet strateġiċi fi ħdan Morpol, bħas-sostituzzjoni tal-president-direttur ġenerali, indipendentement mill-eżerċizzju effettiv tad-drittijiet tal-vot waqt il-laqgħat ġenerali tal-azzjonisti.

507

F’dan ir-rigward, ir-rikorrenti ssostni li l-akkwist ta’ Diċembru 2012 ma kienx fattur deċiżiv fid-deċiżjoni ta’ M. li jirriżenja mill-funzjonijiet tiegħu. Għall-kuntrarju, fl-opinjoni tagħha, l-istruttura ta’ tmexxija tal-impriża ta’ Morpol, inkluża r-riżenja ta’ M., kienet is-suġġett ta’ diskussjonijiet intensi fi ħdan il-bord tad-diretturi ta’ Morpol għal iktar minn sena.

508

F’dan il-każ, ma huwiex possibbli li jiġi ddeterminat b’ċertezza jekk id-deċiżjoni ta’ M. li biha rrinunzja għall-funzjonijiet tiegħu, kinitx jew le influwenzata mill-akkwist ta’ Diċembru 2012.

509

Ċertament, ir-rikorrenti turi li riżenja possibbli ta’ M. kienet is-suġġett ta’ diskussjonijiet qabel l-istess akkwist ta’ Diċembru 2012, billi tippreżenta b’mod partikolari l-minuti tal-laqgħat tal-bord ta’ Morpol tat-12 u l-15 ta’ Settembru 2011. Ir-rikorrenti rrilevat ukoll li Morpol kienet affaċċjat problemi kbar ta’ tmexxija, li l-ikbar bank kreditur ta’ Morpol ried li jnaqqas l-espożizzjoni tiegħu għad-djun ta’ Morpol, u li dawn l-avvenimenti kienu wasslu għal tnaqqis tal-prezz tal-azzjoni ta’ Morpol, li għaddiet minn bejn wieħed u ieħor 21 kroni Norveġiżi (NOK) fil-mument li fiha kienet elenkata fil-Borża ta’ Oslo fl-2010 għal inqas minn NOK 8 f’Novembru 2012. Il-Kummissjoni ma tikkontestax dawn iċ-ċirkustanzi.

510

Madankollu, dan ma jeskludix li l-konklużjoni tal-akkwist ta’ Diċembru 2012, u b’mod partikolari l-klawżola inkluża fis-SPA għal dan l-għan, setgħet tinfluwenza d-deċiżjoni ta’ M. li jirriżenja. Skont l-Artikolu 12.1.1. tas-SPA, M. obbliga ruħu li jirriżenja mill-kariga tiegħu ta’ president-direttur ġenerali ta’ Morpol sa mhux iktar tard mill-1 ta’ Marzu 2013. Barra minn hekk, jidher pjuttost probabbli li d-deċiżjoni tar-riżenja speċifikament b’effett mill-1 ta’ Marzu 2013 kienet influwenzata mill-eżekuzzjoni tas-SPA. Kif ġustament tenfasizza l-Kummissjoni, kieku r-rikorrenti ssospendiet l-eżekuzzjoni tas-SPA sakemm tingħata l-awtorizzazzjoni, M. ma kienx ikun obbligat li jikkonforma ruħu mal-Artikolu 12.1.1. tas-SPA qabel it-tlestija tat-tranżazzjoni.

511

Fit-tieni lok, il-Kummissjoni rrilevat, fil-punt 151 tad-deċiżjoni kkontestata, li r-rikorrenti kienet “integrat parti kbira mill-benefiċċji miksuba minn Morpol permezz tal-akkwist ta’ Diċembru 2012”. Hija qieset li, konsegwentement, “l-effetti finanzjarji probabbli tal-akkwist ta’ Diċembru 2012, li [kienu] eliminaw l-inċentivi għa[r-rikorrenti] sabiex iżżomm il-limitazzjoni kompetittiva eżerċitata fuq Morpol qabel l-akkwist, [kienu] meqjusa bħala suffiċjenti sabiex jagħtu lok għal preġudizzju potenzjali għall-kompetizzjoni”.

512

Ir-rikorrenti ssostni li d-dikjarazzjoni tal-Kummissjoni, li l-integrazzjoni mir-rikorrenti ta’ parti kbira mill-benefiċċji ta’ Morpol eliminat il-fatturi li kienu jinċentivawha li żżomm il-pressjoni kompetittiva, hija infondata u li, fi kwalunkwe każ, ma hijiex speċifika għall-ksur. Fl-opinjoni tagħha, dan jgħodd ukoll għal kull konċentrazzjoni li ma twettqitx peress li wara l-awtorizzazzjoni, il-kumpanniji akkwirenti spiss jirkupraw retroattivament il-benefiċċji naxxenti mill-attivitajiet bejn l-iffirmar tal-ftehim u l-konklużjoni.

513

F’dan ir-rigward, hemm lok li jiġi rrilevat li s-sitwazzjonijiet ma humiex l-istess. Fil-fatt, f’dan il-każ, ir-rikorrenti integrat parti kbira mill-benefiċċji miksuba minn Morpol qabel ma rċeviet l-awtorizzazzjoni tal-konċentrazzjoni. Għaldaqstant, l-inċentivi sabiex tinżamm il-limitazzjoni kompetittiva eżerċitata fuq Morpol setgħu jkunu inqas qawwija meta mqabbla ma’ dawk ta’ kumpannija li jkollha biss il-ħsieb li tirkupra retroattivament il-benefiċċji naxxenti mill-attivitajiet imwettqa wara l-iffirmar tal-ftehim, ladarba tkun inkisbet l-awtorizzazzjoni tal-konċentrazzjoni.

514

Iż-żewġ elementi eżaminati fil-punti 506 sa 513 iktar ’il fuq kienu waħedhom suffiċjenti bil-għan li tiġi ġġustifikata l-konstatazzjoni, imwettqa fil-punt 151 tad-deċiżjoni kkontestata, li skontha kien possibbli effett negattiv fuq il-kompetizzjoni fis-suq potenzjali tas-salamun Skoċċiż matul il-perijodu kollu tal-ksur.

515

Għaldaqstant ma huwiex neċessarju li tiġi eżaminata r-rilevanza tat-tielet element li bbażat ruħha fuqu l-Kummissjoni, fil-punt 151 tad-deċiżjoni kkontestata, jiġifieri li ma setgħax jiġi eskluż, skont il-Kummissjoni, li r-rikorrenti, bħala l-ikbar azzjonista ta’ Morpol, kienet akkwistat aċċess ipprivileġġat għad-data kummerċjali ta’ Morpol matul il-perijodu ta’ bejn il-konklużjoni tal-akkwist ta’ Diċembru 2012 u l-adozzjoni tad-deċiżjoni ta’ awtorizzazzjoni.

516

Għaldaqstant hemm lok li jiġi kkonstatat li l-miżuri adottati mir-rikorrenti, jiġifieri n-nuqqas ta’ eżerċizzju tad-drittijiet tal-vot u s-separazzjoni tal-entitajiet sal-awtorizzazzjoni tal-konċentrazzjoni, ma setgħux iħassru r-riskju ta’ dannu kompetittiv kkawżat mit-twettiq tal-konċentrazzjoni inkwistjoni fil-forma prevista inizjalment u mhux awtorizzata mill-Kummissjoni, anki jekk dawn il-miżuri setgħu jnaqqsu l-effett antikompetittiv possibbli.

517

Minn dak li ntqal jirriżulta li s-sitwazzjoni odjerna taqa’ taħt is-“sitwazzjoni intermedjarja” kif iddefinita fil-punt 495 iktar ’il fuq, jiġifieri taħt sitwazzjoni li fiha l-konċentrazzjoni, kif imwettqa b’mod prematur, kienet tqajjem dubji serji dwar il-kompatibbiltà tagħha mas-suq intern, iżda li fir-rigward tagħha ma setgħax jiġi ddeterminat jekk it-twettiq tagħha fil-forma prevista inizjalment u mhux awtorizzata mill-Kummissjoni kellux jew le effetti dannużi fuq il-kompetizzjoni.

518

L-argument tar-rikorrenti, imqajjem waqt is-seduta, li l-Kummissjoni bbażat ruħha fuq l-elementi msemmija fil-punti 506, 511 u 515 iktar ’il fuq biss fl-istadju tar-risposta, ma huwiex ibbażat fuq il-fatti. Fil-fatt, dawn l-elementi huma inklużi fil-punt 138 tad-dikjarazzjoni tal-oġġezzjonijiet kif ukoll fil-punt 151 tad-deċiżjoni kkontestata.

519

Barra minn hekk, ir-rikorrenti tikkonferma li, meta l-Kummissjoni tibbaża ruħha fuq l-impatt allegat fuq is-suq ta’ ksur allegat sabiex tistabbilixxi s-serjetà ta’ din tal-aħħar, hija għandha tipprova d-dikjarazzjonijiet tagħha sal-grad rikjest mil-liġi, jiġifieri billi tipproduċi indizji konkreti u kredibbli li jindikaw l-impatt bi probabbiltà raġonevoli. Insostenn ta’ din id-dikjarazzjoni, ir-rikorrenti tiċċita s-sentenzi tas-27 ta’ Settembru 2006, Roquette Frères vs Il-Kummissjoni (T-322/01, EU:T:2006:267, punt 75), tas-27 ta’ Settembru 2006, Jungbunzlauer vs Il-Kummissjoni (T-43/02, EU:T:2006:270), tas-27 ta’ Settembru 2006, Archer Daniels Midland vs Il-Kummissjoni (T-59/02, EU:T:2006:272, punt 161), u tas-6 ta’ Mejju 2009, KME Germany et vs Il-Kummissjoni (T-127/04, EU:T:2009:142, punt 68).

520

F’dan ir-rigward, hemm lok li jiġi rrilevat li l-ġurisprudenza ċċitata mir-rikorrenti tikkonċerna l-akkordji. Pereżempju, il-Qorti Ġenerali rrilevat, fil-punt 68 tas-sentenza tas-6 ta’ Mejju 2009, KME Germany et vs Il-Kummissjoni (T-127/04, EU:T:2009:142), li “il-Qorti tal-Prim’Istanza ddeċidiet f’diversi okkażjonijiet li l-impatt konkret ta’ akkordju fuq is-suq għandu jitqies bħala suffiċjentement ipprovat jekk il-Kummissjoni hija f’pożizzjoni li tipproduċi provi konkreti u kredibbli li jindikaw, bi probabbiltà raġonevoli, li l-akkordju kellu impatt fuq is-suq”.

521

Barra minn hekk, jeħtieġ li jiġi rrilevat li, skont il-kliem tal-ewwel paragrafu tal-punt 1 A tal-Linji ta’ gwida dwar il-metodi tal-kalkoli tal-multi imposti skont l-Artikolu 15(2) tar-Regolament Nru 17 u l-Artikolu 65(5) tat-Trattat KEFA (ĠU Edizzjoni Speċjali bil-Malti, Kapitolu 8, Vol. 1, p. 171), li kienu applikabbli fis-sentenzi tal-Qorti Ġenerali li fuqhom tibbaża ruħha r-rikorrenti u li huma ċċitati fil-punt 519 iktar ’il fuq, għall-kalkolu tal-multa skont is-serjetà tal-ksur, il-Kummissjoni kienet obbligata tieħu inkunsiderazzjoni b’mod partikolari “l-impatt reali [tal-ksur] fuq is-suq, fejn dan [seta’] jkun ikkalkolat”.

522

Għaldaqstant, il-ġurisprudenza ċċitata mir-rikorrenti ma tistax tpoġġi f’dubju l-kunsiderazzjonijiet li jinsabu fil-punti 495 sa 501 iktar ’il fuq. B’mod partikolari jeħtieġ li jitfakkar li l-għan tal-leġiżlazzjoni tal-Unjoni fil-qasam tal-kontroll tal-konċentrazzjonijiet huwa li jiġu pprevenuti effetti ħżiena rreparabbli u permanenti fuq il-kompetizzjoni (ara l-punt 498 iktar ’il fuq).

523

Hemm lok li jiġi rrilevat li, fir-rigward tal-ksur tal-Artikolu 4(1) u tal-Artikolu 7(1) tar-Regolament Nru 139/2004, il-fatt waħdu li jkunu possibbli effetti dannużi fuq il-kompetizzjoni, peress li l-konċentrazzjoni mwettqa fil-forma prevista inizjalment u mhux awtorizzata mill-Kummissjoni kienet tqajjem dubji serji dwar il-kompatibbiltà tagħha mas-suq intern, jista’ jittieħed inkunsiderazzjoni fl-evalwazzjoni tas-serjetà tal-ksur, anki jekk il-Kummissjoni ma turix “probabbiltà raġonevoli” tal-eżistenza ta’ tali effetti.

524

Ċertament, meta tkun tista’ tintwera’ l-eżistenza tal-effetti dannużi għall-kompetizzjoni naxxenti mit-twettiq ta’ konċentrazzjoni fil-forma prevista inizjalment u mhux awtorizzata mill-Kummissjoni, dan jista’ jirrendi l-ksur iktar serju minn ksur li jaqa’ taħt is-“sitwazzjoni intermedjarja”. Dan ma jipprekludix il-fatt waħdu li ma jistax jiġi eskluż li effetti dannużi għall-kompetizzjoni jistgħu jrendu l-ksur iktar serju mit-twettiq prematur ta’ konċentrazzjoni li ma tqajjem l-ebda problema ta’ kompetizzjoni.

525

Fl-aħħar, ir-rikorrenti tenfasizza li hija qatt ma kisbet u lanqas stenniet li tikseb xi benefiċċju minn dak li l-Kummissjoni tqis bħala ksur tar-regoli dwar il-kontroll tal-konċentrazzjonijiet, peress li hija kkonformat ruħha mar-rekwiżiti tal-Artikolu 7(2) tar-Regolament Nru 139/2004, billi astjeniet milli teżerċita d-drittijiet tagħha tal-vot f’Morpol.

526

F’dan ir-rigward, jeħtieġ li jitfakkar li l-fatt li impriża ma tkun kisbet l-ebda benefiċċju mill-ksur ma jistax jostakola l-impożizzjoni ta’ multa, u dan sabiex din tal-aħħar ma titlifx in-natura dissważiva tagħha (ara l-punt 473 iktar ’il fuq).

527

Barra minn hekk, jeħtieġ li jitfakkar li l-fatt li r-rikorrenti ma eżerċitatx id-drittijiet tagħha tal-vot f’Morpol sal-awtorizzazzjoni tal-konċentrazzjoni ttieħed inkunsiderazzjoni mill-Kummissjoni bħala ċirkustanza attenwanti (ara l-punt 476 iktar ’il fuq).

528

Minn dak li ntqal jirriżulta li kien b’mod ġust li l-Kummissjoni f’dan il-każ, ħadet inkunsiderazzjoni, iċ-ċirkustanza li l-konċentrazzjoni kienet tqajjem dubji serji dwar il-kompatibbiltà tagħha mas-suq intern bħala fattur li jirrendi l-ksur iktar serju.

c)

Fuq it-teħid inkunsiderazzjoni tal-preċedenti li jikkonċernaw lir-rikorrenti u lil kumpanniji oħra

529

Il-Kummissjoni rrilevat, fil-punt 159 tad-deċiżjoni kkontestata, li r-rikorrenti (dak iż-żmien Pan Fish) kienet diġà ġiet immultata fl-2007 mill-awtoritajiet tal-kompetizzjoni Franċiżi talli kisret l-obbligu ta’ status quo waqt l-akkwist tagħha ta’ Fjord Seafood. Barra minn hekk, hija rrilevat li “[d]an kien ifisser li ma [kinitx] l-ewwel darba li [ir-rikorrenti] [kisret] l-obbligu ta’ status quo fil-kuntest ta’ proċedura ta’ kontroll ta’ konċentrazzjoni”.

530

Il-Kummissjoni kkunsidrat, fil-punt 163 tad-deċiżjoni kkontestata, li “s-sanzjoni preċedenti kellha twassal [lir-rikorrenti] sabiex tevalwa b’reqqa partikolari l-obbligi tagħha fir-rigward tal-kontroll tal-operazzjonijiet tal-konċentrazzjoni fil-mument tal-akkwist ta’ Diċembru 2012” u li, “[f’]dan ir-rigward, l-eżistenza ta’ ksur tal-obbligu ta’ status quo fil-livell nazzjonali kienet tirrendi l-ksur iktar serju”.

531

Barra minn hekk, il-Kummissjoni tenfasizza, fil-punt 160 tad-deċiżjoni kkontestata, li r-Regolament Nru 139/2004 kien diġà ilu fis-seħħ għal iktar minn għaxar snin u li kienu jeżistu dispożizzjonijiet simili li jikkonċernaw l-obbligu ta’ status quo fir-Regolament Nru 4064/89, li baqa’ fis-seħħ għal iktar minn tlettax-il sena. Barra minn hekk, hija rrilevat li kienet diġà bdiet investigazzjonijiet kontra kumpanniji oħra, u kienet imponiet fuqhom multi għall-ksur tal-Artikolu 7(1) tar-Regolament Nru 4064/89 u li hija kienet ukoll adottat deċiżjonijiet oħra abbażi tal-Artikolu 14 tar-Regolament Nru 4064/89. Skont il-Kummissjoni, ir-rikorrenti konsegwentement “kellha tkun konxja b’mod sħiħ mill-kuntest legali u l-applikazzjoni ta’ dawn ir-regoli mill-Kummissjoni”.

1)

Fuq it-teħid inkunsiderazzjoni tal-kawża li tat lok għad-deċiżjoni Pan Fish/Fjord Seafood

532

Ir-rikorrenti ssostni li l-fatt li hija tiġi punita b’mod iktar sever għall-allegata raġuni li hija kienet reċidiva peress li kienet ġiet issanzjonata fi Franza fid-deċiżjoni Pan Fish/Fjord Seafood, ma huwiex konformi mal-ġurisprudenza li skontha r-reċidiva timplika li persuna wettqet istanzi ġodda ta’ ksur wara li tkun ġiet issanzjonata għal ksur simili.

533

Madankollu, kif enfasizzat il-Kummissjoni, hija ma qisitx l-eżistenza ta’ ksur proċedurali preċedenti mwettaq mir-rikorrenti bħala ċirkustanza aggravanti. Hija qieset b’mod espliċitu, fil-punt 201 tad-deċiżjoni kkontestata, li f’dan il-każ ma kinux jeżistu ċirkustanzi aggravanti.

534

Barra minn hekk, jeħtieġ li jiġi rrilevat li, fid-deċiżjoni kkontestata, il-Kummissjoni ma użatx il-kliem “reċidiva” jew “reċidiv”. Ċertament, hija iktar is-sustanza tad-deċiżjoni kkontestata milli t-terminoloġija li jeħtieġ li jsir riferiment għaliha bil-għan li jiġi eżaminat jekk il-Kummissjoni ddeċidietx li r-rikorrenti kienet reċidiva.

535

F’dan ir-rigward, hemm lok li jiġi rrilevat li t-teħid inkunsiderazzjoni tar-reċidiva “huwa intiż sabiex iħeġġeġ lill-impriżi, li jkunu wrew inklinazzjoni li jiksru r-regoli tal-kompetizzjoni, ibiddlu l-aġir tagħhom” (sentenza tat-12 ta’ Diċembru 2007, BASF u UCB vs Il-Kummissjoni, T-101/05 u T-111/05, EU:T:2007:380, punt 67). F’dan il-każ, il-Kummissjoni ma kkonstatatx, lanqas b’mod impliċitu, fid-deċiżjoni kkontestata li kien neċessarju li tiġi imposta sanzjoni ogħla peress li s-sanzjoni imposta fid-deċiżjoni Pan Fish/Fjord Seafood ma kinitx biżżejjed sabiex tiddiswadi lir-rikorrenti milli twettaq ksur ieħor. Fil-punti ddedikati għall-effett dissważiv neċessarju tal-multa, jiġifieri fil-punti 157, 172 u 206 tad-deċiżjoni kkontestata, il-Kummissjoni għamlet riferiment biss għad-daqs tar-rikorrenti, għaċ-ċirkustanza li l-operazzjoni inkwistjoni kienet qajmet dubji serji dwar il-kompatibbiltà tagħha mas-suq intern u għall-fatt li ma setgħetx tiġi eskluża ħsara lill-kompetizzjoni. Għaldaqstant, għall-kuntrarju ta’ dak li qieset ir-rikorrenti, il-Kummissjoni ma ħaditx inkunsiderazzjoni l-allegata reċidiva tar-rikorrenti. Għaldaqstant l-argument tar-rikorrenti huwa bbażat fuq premessa żbaljata.

536

Kif jirriżulta mill-punt 163 tad-deċiżjoni kkontestata, il-Kummissjoni qieset li “is-sanzjoni preċedenti kellha twassal lir-[rikorrenti] sabiex tevalwa b’reqqa partikolari l-obbligi tagħha fir-rigward tal-kontroll tal-operazzjonijiet tal-konċentrazzjoni fil-mument tal-akkwist ta’ Diċembru 2012Diċembru”. Kien “[f’]dan ir-rigward” li l-Kummissjoni kkonstatat li l-eżistenza ta’ ksur tal-obbligu ta’ status quo fil-livell nazzjonali kienet tirrendi l-ksur iktar serju.

537

F’dan ir-rigward, jeħtieġ li jitfakkar li huwa kkonstatat fil-punt 258 iktar ’il fuq li l-Kummissjoni kellha dritt tieħu inkunsiderazzjoni l-fatt li r-rikorrenti diġà kienet ingħatat multa fil-livell nazzjonali għat-twettiq prematur ta’ konċentrazzjoni, u li hemm lok li tiġi mistennija diliġenza partikolari minn naħa ta’ impriża Ewropea ta’ daqs kbir li diġà ngħatat multa, għalkemm fil-livell nazzjonali, għat-twettiq prematur ta’ konċentrazzjoni.

538

Dan huwa element li jista’ jittieħed inkunsiderazzjoni waqt l-evalwazzjoni, minn naħa, tal-eżistenza ta’ negliġenza minn naħa tar-rikorrenti u, min-naħa l-oħra, tal-livell ta’ din in-negliġenza.

539

Fil-punti 159 u 163 tad-deċiżjoni kkontestata, il-Kummissjoni ħadet inkunsiderazzjoni l-eżistenza ta’ preċedent fil-kawża li tat lok għad-deċiżjoni Pan Fish/Fjord Seafood bħala element li jżid il-livell ta’ negliġenza tar-rikorrenti u li abbażi ta’ dan, “[kien] jirrendi l-ksur iktar serju”. Fil-fatt, il-konstatazzjoni, inkluża fil-punt 163 tad-deċiżjoni kkontestata, li s-sanzjoni preċedenti kellha twassal lir-rikorrenti sabiex tevalwa b’reqqa partikolari l-obbligi tagħha fir-rigward tal-kontroll tal-operazzjonijiet ta’ konċentrazzjoni, tikkonċerna, essenzjalment il-livell ta’ negliġenza. Waqt is-seduta, il-Kummissjoni kkonfermat li kienet ibbażat ruħha, fid-deċiżjoni kkontestata, fuq il-kawża li tat lok għad-deċiżjoni Pan Fish/Fjord Seafood unikament bħala fattur li jikkonċerna l-livell ta’ negliġenza tar-rikorrenti.

540

Waqt is-seduta, ir-rikorrenti qablet li l-Kummissjoni kienet ħadet inkunsiderazzjoni l-kawża li tat lok għad-deċiżjoni Pan Fish/Fjord Seafood fil-kuntest tal-evalwazzjoni tan-negliġenza. Madankollu, ir-rikorrenti sostniet li din il-kawża ma kinitx rilevanti fil-kuntest tal-evalwazzjoni tal-eżistenza jew tal-livell tan-negliġenza, peress li l-fatti li taw lok għal dik il-kawża kienu kompletament differenti minn dawk li taw lok għall-kawża odjerna, b’tali mod li hija ma setgħet tislet l-ebda konklużjoni utli għall-kawża odjerna.

541

F’dan ir-rigward, jeħtieġ li jitfakkar li kien ċertament minnu li d-deċiżjoni Pan Fish/Fjord Seafood ma kinitx tirrigwarda l-interpretazzjoni tal-Artikolu 7(2) tar-Regolament Nru 139/2004 (ara l-punt 258 iktar ’il fuq). Madankollu, il-fatt li r-rikorrenti kienet diġà ngħatat multa, minkejja li fil-livell nazzjonali, għat-twettiq prematur ta’ konċentrazzjoni, jimplika li kien hemm lok li tiġi mistennija diliġenza partikolari min-naħa tar-rikorrenti (ara l-punt 258 iktar ’il fuq). F’dan ir-rigward, l-eżistenza ta’ dan il-preċedent kienet iżżid il-livell ta’ negliġenza tar-rikorrenti, fatt li jikkostitwixxi fattur li jirrendi l-ksur iktar serju.

542

Għaldaqstant, il-Kummissjoni ma wettqet l-ebda żball billi ħadet inkunsiderazzjoni l-kawża li tat lok għad-deċiżjoni Pan Fish/Fjord Seafood fil-kuntest tal-evalwazzjoni tas-serjetà tal-ksur.

2)

Fuq it-teħid inkunsiderazzjoni tal-kawżi li jikkonċernaw kumpanniji oħra

543

Ir-rikorrenti ssostni li d-dikjarazzjoni inkluża fil-punt 160 tad-deċiżjoni kkontestata li “il-Kummissjoni kienet diġà bdiet investigazzjonijiet kontra kumpanniji oħra u kienet imponiet fuqhom multi għall-ksur tal-Artikolu 7(1) tar-Regolament [Nru 4064/89]” ma tiħux inkunsiderazzjoni l-problema essenzjali li l-ebda waħda minn dawn il-kawżi ma kienet tikkonċerna l-portata tal-Artikolu 7(2) Regolament Nru 139/2004 jew tal-Artikolu 7(3) tar-Regolament Nru 4064/89.

544

F’dan ir-rigward, hemm lok li jiġi kkonstatat li, fil-punt 160 tad-deċiżjoni kkontestata, il-Kummissjoni rrilevat li r-Regolament Nru 139/2004 kien diġà ilu fis-seħħ għal iktar minn għaxar snin u li kienu jeżistu dispożizzjonijiet simili li jikkonċernaw l-obbligu ta’ status quo fir-Regolament Nru 4064/89, li baqa’ fis-seħħ għal iktar minn tlettax-il sena. Barra minn hekk, hija rrilevat li kienet diġà bdiet investigazzjonijiet kontra kumpanniji oħra, u kienet imponiet fuqhom multi għall-ksur tal-Artikolu 7(1) tar-Regolament Nru 4064/89 u li hija kienet ukoll adottat deċiżjonijiet oħra abbażi tal-Artikolu 14 tar-Regolament Nru 4064/89.

545

B’dan, il-Kummissjoni, essenzjalment iġġustifikat il-fatt li hija ma kellhiex iktar raġuni li tkun “klementi” fl-istabbiliment tal-multi abbażi tal-Artikolu 14 tar-Regolament Nru 139/2004.

546

F’dan ir-rigward, jeħtieġ li jiġi rrilevat li, ċertament, il-Kummissjoni tista’ tagħżel li timponi multi f’ammont baxx meta tkun qiegħda tapplika għall-ewwel darba jew l-ewwel drabi dispożizzjoni li tippermettilha li timponi multa. Madankollu, il-Kummissjoni tista’ legalment tikkunsidra li ma għadx għandha raġuni sabiex taġixxi b’dan il-mod meta hija tkun diġà imponiet diversi drabi multi b’applikazzjoni ta’ din id-dispożizzjoni.

547

L-argument tar-rikorrenti li l-preċedenti ma kinux jikkonċernaw l-Artikolu 7(2) tar-Regolament Nru 139/2004 jew l-Artikolu 7(3) tar-Regolament Nru 4064/89 huwa, f’dan il-kuntest, irrilevanti. Fil-fatt, l-eżistenza ta’ preċedenti, li fihom ġew imposti multi abbażi tal-Artikolu 14 tar-Regolament Nru 4064/89, setgħet twissi lir-rikorrenti li hija kienet tirriskja l-impożizzjoni ta’ sanzjonijiet kbar f’każ ta’ ksur tal-Artikolu 4(1) u tal-Artikolu 7(1) tar-Regolament Nru 139/2004. B’mod partikolari, il-fatt li l-Kummissjoni kienet diġà imponiet sanzjoni kbira, jiġifieri multa ta’ EUR 20 miljun, fid-deċiżjoni Electrabel seta’ jagħti indikazzjoni lir-rikorrenti tal-fatt li hija kienet qiegħda tirriskja li tingħata sanzjonijiet kbar f’każ ta’ twettiq prematur tal-konċentrazzjoni inkwistjoni.

548

Fir-rigward tal-argument tar-rikorrenti li l-Kummissjoni ma bdietx investigazzjoni u ma imponiet l-ebda multa fil-kawża li tat lok għad-deċiżjoni Yara/Kemira GrowHow, huwa suffiċjenti li jiġi kkonstatat li, fil-punt 160 tad-deċiżjoni kkontestata u fin-noti ta’ qiegħ il-paġna Nri 64 u 65 ta’ din tal-aħħar, il-Kummissjoni ma bbażatx ruħha fuq din il-kawża.

549

Fl-aħħar, ir-rikorrenti ssostni li l-konklużjoni, fil-punt 163 tad-deċiżjoni kkontestata, li l-eżistenza ta’ kawżi preċedenti ta’ istanzi ta’ ksur proċedurali li jikkonċernaw lir-rikorrenti kif ukoll lil kumpanniji oħra tirrendi l-ksur tar-rikorrenti iktar serju, hija manifestament ivvizzjata bi żbalji ta’ liġi u ta’ fatt.

550

Madankollu, fil-punt 163 tad-deċiżjoni kkontestata, il-Kummissjoni rrilevat li “is-sanzjoni preċedenti”, jiġifieri s-sanzjoni imposta fid-deċiżjoni Pan Fish/Fjord Seafood, kellha twassal lir-rikorrenti sabiex tevalwa b’reqqa partikolari l-obbligi tagħha u li, “[f’]dan ir-rigward, l-eżistenza ta’ ksur tal-obbligu ta’ status quo fil-livell nazzjonali [kienet] tirrendi l-ksur iktar gravi”. Għaldaqstant, il-Kummissjoni kkonstatat biss, fil-punt 163 tad-deċiżjoni kkontestata, li l-eżistenza ta’ ksur preċedenti mwettaq mir-rikorrenti fil-kawża li tat lok għad-deċiżjoni Pan Fish/Fjord Seafood kienet tirrendi l-ksur iktar serju. Madankollu hija ma kkonstatatx li l-eżistenza ta’ kawżi preċedenti ta’ ksur proċedurali li tikkonċerna kumpanniji oħra kienet tirrendi l-ksur tar-rikorrenti iktar serju.

551

Minn dak li ntqal jirriżulta li hemm lok li tiġi miċħuda t-tieni parti tal-ħames motiv.

3.

Fuq it-tielet parti, ibbażata fuq evalwazzjoni żbaljata tat-tul tal-ksur allegat

552

Ir-rikorrenti tikkonferma li, sabiex tiġġustifika r-rifjut tagħha li teskludi l-perijodu ta’ qabel in-notifika mit-tul tal-ksur, il-Kummissjoni kkonfermat b’mod żbaljat, fil-punt 173 tad-deċiżjoni kkontestata, li r-rikorrenti ma wrietx disponibbiltà suffiċjenti sabiex tikkomunika informazzjoni matul il-fażi ta’ qabel in-notifika. Skont ir-rikorrenti, il-Kummissjoni ma osservatx, fid-deċiżjoni kkontestata, il-prinċipju ta’ ugwaljanza fit-trattament fl-evalwazzjoni tagħha tat-tul tal-ksur, billi ma adottatx l-istess approċċ bħal dak segwit fid-deċiżjoni tagħha Electrabel, li kien jikkonsisti fl-esklużjoni tal-perijodi ta’ qabel in-notifika u dak tal-eżami tal-konċentrazzjoni mit-tul tal-ksur.

553

Il-Kummissjoni tikkontesta l-argumenti tar-rikorrenti.

554

Qabel xejn, jeħtieġ li jitfakkar li, fil-punti 128 u 165 tad-deċiżjoni kkontestata, il-Kummissjoni kkonstatat li ksur tal-Artikolu 4(1) tar-Regolament Nru 139/2004 kien ksur instantanju u li dan il-ksur kien twettaq f’dan il-każ fit-18 ta’ Diċembru 2012, jiġifieri fil-jum tal-konklużjoni tal-akkwist ta’ Diċembru 2012.

555

Barra minn hekk, il-Kummissjoni rrilevat, fil-punti 128 u 166 tad-deċiżjoni kkontestata, li ksur tal-Artikolu 7(1) tar-Regolament Nru 139/2004 kien ksur kontinwu li jipperdura sakemm it-tranżazzjoni ma tiġix ddikjarata kompatibbli mas-suq intern mill-Kummissjoni skont ir-Regolament Nru 139/2004. Skont il-Kummissjoni, f’dan il-każ, il-ksur tal-Artikolu 7(1) tar-Regolament Nru 139/2004 beda fit-18 ta’ Diċembru 2012 u spiċċa fid-data tal-adozzjoni tad-deċiżjoni ta’ awtorizzazzjoni, jiġifieri fit-30 ta’ Settembru 2013.

556

Konsegwentement, il-Kummissjoni qieset li l-ksur tal-Artikolu 7(1) tar-Regolament Nru 139/2004 kien ta’ disa’ xhur u tnax-il jum. Hija qieset li dan il-perijodu seta’ jitqies bħala partikolarment twil, b’mod partikolari fir-rigward ta’ konċentrazzjoni li tippreżenta effetti antikompetittivi potenzjali.

557

Fl-aħħar, il-Kummissjoni tqis li kienet “iġġustifikata, fl-eżerċizzju tas-setgħa diskrezzjonali tagħha, li tieħu inkunsiderazzjoni l-perijodu ta’ qabel in-notifika kif ukoll tal-investigazzjoni approfondita tal-fażi I, għall-finijiet tal-kalkolu tat-tul tal-ksur tal-Artikolu 7(1) [tar-Regolament Nru 139/2004]”. Fl-ewwel lok, f’dan ir-rigward, il-Kummissjoni fakkret li l-operazzjoni prevista kienet qajmet dubji serji fis-suq potenzjali tas-salamun Skoċċiż u li ma setax jiġi eskluż li din għamlet ħsara lill-kompetizzjoni. F’dawn iċ-ċirkustanzi, multa kellha, skont il-Kummissjoni, teżerċita effett dissważiv l-iktar qawwi possibbli. Fit-tieni lok, il-Kummissjoni rrilevat li r-rikorrenti ma kinitx disposta suffiċjentement li tikkomunika informazzjoni matul il-fażi ta’ qabel in-notifika sabiex tiġġustifika l-esklużjoni ta’ dan il-perijodu mit-tul totali tal-ksur, għar-raġunijiet spjegati f’iktar dettall fil-punti 174 sa 194 tad-deċiżjoni kkontestata.

558

Ir-rikorrenti ma tikkontestax il-fatt li l-ksur tal-Artikolu 4(1) tar-Regolament Nru 139/2004 ma kienx jikkostitwixxi ksur instantanju. It-tielet parti tal-ħames motiv tikkonċerna unikament l-evalwazzjoni mill-Kummissjoni tat-tul tal-ksur tal-Artikolu 7(1) tar-Regolament Nru 139/2004.

559

Fir-rigward tat-tul tal-ksur tal-Artikolu 7(1) tar-Regolament Nru 139/2004, hemm lok li jitfakkar li l-Qorti Ġenerali kkonstatat, fil-punt 212 tas-sentenza tat-12 ta’ Diċembru 2012, Electrabel vs Il-Kummissjoni (T-332/09, EU:T:2012:672), li “il-kapaċità li tiġi eżerċitata influwenza determinanti fuq l-attività tal-impriża kkontrollata [kienet] tagħmel bilfors parti miż-żmien li għandu jibda jiddekorri mid-data meta jinkiseb il-kontroll u sakemm dan jintemm” u li “l-entità li tkun kisbet il-kontroll tal-impriża tkompli teżerċitah bi ksur tal-obbligu ta’ sospensjoni li jirriżulta mill-Artikolu 7(1) tar-Regolament Nru 4064/89 sal-mument meta din iġġibu fi tmiemu, billi tikseb l-awtorizzazzjoni tal-Kummissjoni jew tħalli l-kontroll”. Barra minn hekk, il-Qorti Ġenerali speċifikat, fil-punt 212 ta’ dik is-sentenza, li “il-ksur jippersisti sakemm jibqa’ l-kontroll miksub bi ksur tal-Artikolu 7(1) u sakemm il-konċentrazzjoni ma tiġix awtorizzata mill-Kummissjoni” u li “għaldaqstant, il-Kummissjoni kellha raġun li tikklassifika l-ksur bħala wieħed kontinwu sad-data tal-awtorizzazzjoni tal-konċentrazzjoni jew, jekk ikun il-każ, sa data preċedenti meħuda inkunsiderazzjoni fid-dawl taċ-ċirkustanzi tal-każ”.

560

Dawn il-kunsiderazzjonijiet, li kienu jikkonċernaw l-Artikolu 7(1) tar-Regolament Nru 4064/89, japplikaw b’analoġija għall-Artikolu 7(1) tar-Regolament Nru 139/2004.

561

B’applikazzjoni ta’ dawn il-prinċipji, il-punt tat-tluq tal-ksur tal-Artikolu 7(1) tar-Regolament Nru 139/2004 kien it-18 ta’ Diċembru2012, jiġifieri d-data tat-twettiq tal-konċentrazzjoni inkwistjoni, u dan kif ukoll ġie kkonstatat b’mod ġust mill-Kummissjoni. Barra minn hekk, ir-rikorrenti ma tikkontestax il-punt tat-tluq adottat mill-Kummissjoni għall-ksur tal-Artikolu 7(1) tar-Regolament Nru 139/2004.

562

Fir-rigward tad-data li fiha ġie tterminat il-ksur, mill-premessi li jinsabu fil-punt 559 iktar ’il fuq jirriżulta li ksur tal-Artikolu 7(1) tar-Regolament Nru 139/2004 jieqaf fil-mument li fih il-Kummissjoni tawtorizza l-konċentrazzjoni jew fil-mument li fih l-impriża inkwistjoni tabbanduna l-kontroll. Ksur tal-Artikolu 7(1) tar-Regolament Nru 139/2004 jieqaf ukoll fil-mument li fih tingħata deroga possibbli mill-obbligu ta’ sospensjoni mill-Kummissjoni, abbażi tal-Artikolu 7(3) tar-Regolament Nru 139/2004.

563

F’dan il-każ, kien għalhekk b’mod ġust li l-Kummissjoni kkonstatat li l-ksur kien ġiet twaqqaf fid-data li fiha kienet ġiet awtorizzata l-konċentrazzjoni mill-Kummissjoni, jiġifieri fit-30 ta’ Settembru 2013. Fil-fatt, ma kienet ngħatat l-ebda deroga mill-obbligu ta’ sospensjoni mill-Kummissjoni, u din lanqas ma ntalbet mir-rikorrenti, u din tal-aħħar fl-ebda mument ma abbandunat il-kontroll ta’ Morpol. Għaldaqstant, il-ksur tal-Artikolu 7(1) tar-Regolament Nru 139/2004 ipperdura mit-18 ta’ Diċembru 2012 sat-30 ta’ Settembru 2013, jiġifieri perijodu ta’ disa’ xhur u tnax-il jum, kif ikkonstatat mill-Kummissjoni.

564

Fil-punti 172 sa 195 tad-deċiżjoni kkontestata, il-Kummissjoni mmotivat fid-dettall id-deċiżjoni tagħha li ma teskludix la l-perijodu ta’ qabel in-notifika u lanqas il-perijodu tal-investigazzjoni approfondita tal-fażi I, sabiex tiddetermina t-tul tal-ksur tal-Artikolu 7(1) tar-Regolament Nru 139/2004.

565

Ir-rikorrenti tqis li l-Kummissjoni kellha teskludi l-perijodu ta’ qabel in-notifika mit-tul tal-ksur, u hija tikkontesta diversi premessi li jinsabu fil-punti 172 sa 195 tad-deċiżjoni kkontestata.

566

F’dan ir-rigward, hemm lok li jiġi rrilevat li, ladarba l-Kummissjoni kkonstatat ksur ta’ perijodu ta’ disa’ xhur u tnax-il jum, huwa għal kollox normali li hija tieħu inkunsiderazzjoni dan il-perijodu għall-finijiet tal-istabbiliment tal-multa. Ċertament, il-Kummissjoni tista’ tiddeċiedi, skont is-setgħa diskrezzjonali tagħha, li ma tiħux inkunsiderazzjoni parti mill-perijodu ta’ ksur, bl-istess mod bħalma għandha dritt li tiddeċiedi li ma tinvestigax ksur. Madankollu, bħala prinċipju il-Kummissjoni ma hija bl-ebda mod obbligata li tieħu inkunsiderazzjoni parti mill-perijodu ta’ ksur.

567

Meta ġiet mistoqsija, waqt is-seduta, dwar il-kwistjoni dwar għaliex fl-opinjoni tagħha kien jeżisti obbligu ta’ esklużjoni tal-perijodu ta’ qabel in-notifika mill-perijodu tal-ksur, ir-rikorrenti speċifikat li dan l-argument kien ibbażat biss fuq il-prinċipju ta’ ugwaljanza fit-trattament u li r-rikorrenti kienet qiegħda titlob l-istess trattament li ngħata lill-kumpannija Electrabel fid-deċiżjoni Electrabel.

568

F’dan ir-rigward, jeħtieġ li jiġi rrilevat li, fil-punt 215 ta’ din id-deċiżjoni Electrabel, il-Kummissjoni qieset, “fil-kuntest tad-diskrezzjoni tagħha u bla ħsara għall-pożizzjoni bħala prinċipju tagħha”, li ma tiħux inkunsiderazzjoni l-perijodu li ta’ qabel in-notifika u tal-eżami tal-konċentrazzjoni u li tikkonstata l-eżistenza ta’ ksur biss sal-mument li fih Electrabel kienet informat lill-Kummissjoni dwar il-konċentrazzjoni.

569

Madankollu, il-Kummissjoni kkonstatat ukoll, fil-punt 211 tad-deċiżjoni tagħha Electrabel, li ksur tal-Artikolu 7 tar-Regolament Nru 4064/89 ma setgħax biss jieqaf meta l-Kummissjoni tawtorizza l-konċentrazzjoni jew, fejn xieraq, tagħti deroga.

570

Hemm lok li jiġi kkonstatat li l-fatt innifsu li l-Kummissjoni ddeċidiet, f’dan il-każ, li ma tiħux inkunsiderazzjoni parti mill-perijodu tal-ksur, u dan espressament “fil-kuntest tad-diskrezzjoni tagħha u bla ħsara għall-pożizzjoni bħala prinċipju tagħha”, ma huwiex ta’ natura li jbiddel il-kuntest legali applikabbli.

571

Ir-riferiment, fil-punt 212 tas-sentenza tat-12 ta’ Diċembru 2012, Electrabel vs Il-Kummissjoni (T-332/09, EU:T:2012:672), għal “data preċedenti [għad-data ta’ awtorizzazzjoni tal-konċentrazzjoni] meħuda inkunsiderazzjoni fid-dawl taċ-ċirkustanzi tal-każ” għandu jinftiehem bħala riferiment għall-fakultà tal-Kummissjoni, fil-kuntest tas-setgħa diskrezzjonali tagħha, li ma tiħux inkunsiderazzjoni perijodu mill-ksur sabiex tistabbilixxi t-tul tiegħu. Minn dan kollu ma jirriżultax obbligu fuq il-Kummissjoni li tadotta, bħala data tat-tmiem tal-ksur, data preċedenti għal dik tad-data tal-awtorizzazzjoni tal-konċentrazzjoni mill-Kummissjoni.

572

Bil-għan li tiġġustifika d-deċiżjoni tagħha li la teskludi l-fażi ta’ qabel in-notifika u lanqas il-fażi tal-eżami tal-konċentrazzjoni mill-perijodu tal-ksur tal-Artikolu 7(1) tar-Regolament Nru 139/2004, il-Kummissjoni rrilevat, fil-punt 172 tad-deċiżjoni kkontestata, li t-tranżazzjoni prevista kienet qajmet dubji serji dwar il-kompatibbiltà tagħha mas-suq intern, u li ma setax jiġi eskluż li din għamlet ħsara lill-kompetizzjoni, tal-inqas sa ċertu punt, wara t-twettiq tal-operazzjoni prevista u qabel l-awtorizzazzjoni tagħha.

573

Din il-kunsiderazzjoni hija waħedha suffiċjenti sabiex tiġġustifika l-fatt li l-Kummissjoni ma adottatx l-istess approċċ li ġie segwit fid-deċiżjoni tagħha Electrabel, li jikkonsisti fl-esklużjoni tal-perijodu ta’ qabel in-notifika u tal-eżami tal-konċentrazzjoni mit-tul tal-ksur.

574

F’dan il-kuntest, jeħtieġ li jitfakkar li, fil-kawża li tat lok għad-deċiżjoni Electrabel, il-Kummissjoni kkonstatat li l-konċentrazzjoni ma kinitx qajmet l-ebda problema ta’ kompetizzjoni. Dan jimplika li t-twettiq prematur ta’ din il-konċentrazzjoni ma kellu l-ebda effett dannuż fuq il-kompetizzjoni.

575

Madankollu, f’dan il-każ, il-preżenza ta’ effetti dannużi fuq il-kompetizzjoni minħabba t-twettiq prematur tal-konċentrazzjoni ma jistax jiġi eskluż (ara l-punti 505 sa 517 iktar ’il fuq). F’dawn iċ-ċirkustanzi, ma jkunx f’loku li l-Kummissjoni teskludi l-perijodu ta’ qabel in-notifika u tal-eżami tal-konċentrazzjoni mit-tul tal-ksur. Fil-fatt, ir-riskju ta’ effetti dannużi fuq il-kompetizzjoni jiżdied, f’tali każ, mat-tul tal-ksur. Għaldaqstant, is-sitwazzjoni tar-rikorrenti u dik tal-kumpannija Electrabel fil-kawża li tat lok għad-deċiżjoni Electrabel ma humiex paragunabbli, b’tali mod li r-rikorrenti ma tistax tinvoka b’mod utli l-prinċipju ta’ ugwaljanza fit-trattament.

576

Minn dawn isegwi li ma huwiex neċessarju li jiġu eżaminati l-argumenti tar-rikorrenti maħsuba sabiex tiġi kkontestata l-evalwazzjoni tal-Kummissjoni, fid-deċiżjoni kkontestata, li tistabbilixxi li r-rikorrenti ma kinitx faċilment disposta li tipprovdi lill-Kummissjoni d-data rilevanti kollha li tikkonċerna s-suq. Anki jekk jiġi preżunt li r-rikorrenti tat prova ta’ atitudni kooperattiva waqt il-proċedura ta’ notifika tal-konċentrazzjoni, kif hija ssostni, dan ma jkunx jiġġustifika l-applikazzjoni tal-istess approċċ bħal dak segwit fid-deċiżjoni Electrabel u l-esklużjoni tal-perijodu ta’ qabel in-notifika u tal-eżami tal-konċentrazzjoni mit-tul tal-ksur tal-Artikolu 7(1) tar-Regolament Nru 139/2004.

577

Minn dak li ntqal jirriżulta li l-Kummissjoni evalwat b’mod korrett it-tul tal-ksur tal-Artikolu 7(1) tar-Regolament Nru 139/2004 u li kien b’mod ġust li hija la eskludiet il-perijodu ta’ qabel in-notifika u tal-eżami tal-konċentrazzjoni mit-tul tal-ksur.

578

Għaldaqstant hemm lok li t-tielet parti tal-ħames motiv jiġi miċħud.

4.

Fuq ir-raba’ parti, ibbażata fuq il-fatt li l-multa hija sproporzjonata

579

Ir-raba’ parti tal-ħames motiv hija maqsuma fi tliet ilmenti, ibbażati, l-ewwel wieħed, fuq l-allegazzjoni li l-multa teċċedi dak li huwa neċessarju sabiex tilħaq l-għan segwit, it-tieni, fuq l-allegazzjoni li l-multa hija sproporzjonata meta mqabbla mat-tul u mas-serjetà tal-ksur allegat u, it-tielet, fuq l-allegazzjoni li l-multa hija eċċessiva u għandha titnaqqas.

580

Qabel xejn, jeħtieġ li jitfakkar, li l-prinċipju ta’ proporzjonalità jeżiġi li l-atti tal-istituzzjonijiet Komunitarji ma għandhomx jaqbżu l-limiti ta’ dak li huwa idoneju u meħtieġ sabiex jintlaħqu l-għanijiet leġittimi tal-leġiżlazzjoni inkwistjoni, bil-kundizzjoni li, meta tkun possibbli għażla bejn diversi miżuri idoneji, għandha tintgħażel dik l-inqas restrittiva, u li l-inkonvenjenti kkawżati ma għandhomx ikunu sproporzjonati meta pparagunati mal-għanijiet li għandhom jintlaħqu. B’hekk jirriżulta li l-multi ma għandhomx ikunu sproporzjonati fir-rigward tal-għanijiet previsti, jiġifieri fir-rigward tar-rispett tar-regoli tal-kompetizzjoni, u li l-ammont tal-multa imposta fuq impriża għall-ksur fil-qasam tal-kompetizzjoni għandu jkun proporzjonat għall-ksur, evalwat kollu kemm hu, b’kunsiderazzjoni b’mod partikolari, tas-serjetà ta’ dan tal-aħħar (ara s-sentenza tat-12 ta’ Diċembru 2012, Electrabel vs Il-Kummissjoni, T-332/09, EU:T:2012:672, punt 279 u l-ġurisprudenza ċċitata).

581

Barra minn hekk, hemm lok li jitfakkar li, skont l-Artikolu 16 tar-Regolament Nru 139/2004, il-Qorti tal-Ġustizzja tal-Unjoni Ewropea għandha tiddeċiedi b’ġurisdizzjoni sħiħa dwar ir-rikorsi ppreżentati kontra deċiżjonijiet li bihom il-Kummissjoni tkun iffissat multa jew pagament ta’ penalità perjodiku; din tista’ tħassar, tnaqqas jew iżżid il-multa jew il-pagament ta’ penalità perjodiku impost. Din il-ġurisdizzjoni tagħti s-setgħa lill-qorti, lil hinn mis-sempliċi stħarriġ ta’ legalità tas-sanzjoni, li tissostitwixxi bl-evalwazzjoni tagħha dik tal-Kummissjoni, u konsegwentement, li tħassar, tnaqqas jew iżżid il-multa jew il-pagamenti ta’ penalità imposti (ara s-sentenza tat-8 ta’ Diċembru 2011, KME Germany et vs Il-Kummissjoni, C-272/09 P, EU:C:2011:810, punt 103 u l-ġurisprudenza ċċitata; ara wkoll, f’dan is-sens, is-sentenza tal-5 ta’ Ottubru 2011, Romana Tabacchi vs Il-Kummissjoni, T-11/06, EU:T:2011:560, punt 265).

a)

Fuq l-ewwel ilment, ibbażat fuq l-allegazzjoni li l-multa teċċedi dak li huwa neċessarju sabiex jintlaħaq l-għan segwit

582

Ir-rikorrenti tfakkar li l-Kummissjoni qieset, fil-punt 206 tad-deċiżjoni kkontestata, li multa kbira kienet neċessarja sabiex jiġi żgurat effett dissważiv suffiċjenti. Ir-rikorrenti tammetti li, skont is-sentenza tat-12 ta’ Diċembru 2012, Electrabel vs Il-Kummissjoni (T-332/09, EU:T:2012:672, punt 282), il-Kummissjoni “għandha raġun li tieħu inkunsiderazzjoni n-neċessità li tiggarantixxi li dawn [il-multi] ikollhom effett suffiċjentement dissważiv” Madankollu, skont ir-rikorrenti, dan waħdu ma jirrendix il-multa “neċessarja” għat-twettiq tal-għan segwit f’dan il-każ. Fl-opinjoni tagħha, deċiżjoni li tikkonstata ksur u li tiċċara l-portata tal-Artikolu 7(2) tar-Regolament Nru 139/2004 kienet tkun suffiċjenti f’dan il-każ sabiex tiġi żgurata ċ-ċertezza legali u kienet tikkostitwixxi l-miżura l-inqas ristrettiva.

583

F’dan ir-rigward, hemm lok li jitfakkar li diversi argumenti tar-rikorrenti maħsuba sabiex jistabbilixxu li l-Kummissjoni wettqet żball billi imponiet multa li tmur lil hinn minn multa simbolika diġà ġew miċħuda fil-kuntest tal-eżami tar-raba’ motiv.

584

Fir-rigward, b’mod iktar partikolari, tal-effett dissważiv tal-multa, jeħtieġ li jiġi rrilevat li sempliċi deċiżjoni li tikkonstata ksur u tiċċara l-portata tal-Artikolu 7(2) tar-Regolament Nru 139/2004 ma kienx ikollha l-istess effett dissważiv bħad-deċiżjoni kkontestata, li timponi multa ta’ EUR 20 miljun (ara, f’dan is-sens, is-sentenza tat-12 ta’ Diċembru 2012, Electrabel vs Il-Kummissjoni, T-332/09, EU:T:2012:672, punt 295). Għaldaqstant kien neċessarju li tiġi imposta multa kbira bil-għan li jintlaħaq l-għan li tiġi żgurata, fil-futur, l-osservanza tar-regoli tal-kompetizzjoni.

585

Il-fatt waħdu li l-ksur twettaq b’negliġenza ma jimplikax li ma kienx neċessarju li jiġu imposti multi f’ammont suffiċjentement dissważiv. F’dan ir-rigward, jeħtieġ li jiġi rrilevat li l-kawża li tat lok għad-deċiżjoni Electrabel kienet hija wkoll tikkonċerna ksur imwettaq b’negliġenza (ara, f’dan is-sens, is-sentenza tat-12 ta’ Diċembru 2012, Electrabel vs Il-Kummissjoni, T-332/09, EU:T:2012:672, punt 276).

586

Fir-rigward tal-argument tar-rikorrenti li l-kawża odjerna tikkonċerna ksur possibbli mwettaq minħabba interpretazzjoni żbaljata, skużabbli, tal-Artikolu 7(2) tar-Regolament Nru 139/2004, huwa suffiċjenti li jitfakkar li l-aġir tar-rikorrenti kien negliġenti u li ma kienx jeżisti żball skużabbli min-naħa tagħha (ara l-eżami tat-tieni motiv kif ukoll il-punt 484 iktar ’il fuq).

587

Għaldaqstant, ir-rikorrenti ma qajjem l-ebda argument, fil-kuntest tal-ewwel ilment tar-raba’ parti tal-ħames motiv, li jista’ jpoġġi f’dubju l-proporzjonalità tal-multa imposta.

b)

Fuq it-tieni ilment, ibbażat fuq l-allegazzjoni li l-multa hija sproporzjonata meta mqabbla mat-tul u mas-serjetà tal-ksur allegat

588

Ir-rikorrenti ssostni li, minħabba żbalji ta’ liġi u ta’ fatt imwettqa fl-evalwazzjoni tas-serjetà u tat-tul tal-ksur allegat, il-multa hija manifestament sproporzjonata meta mqabbla mat-tul u mas-serjetà tal-ksur allegat.

589

F’dan ir-rigward, huwa suffiċjenti li jitfakkar li l-argumenti tar-rikorrenti marbuta mal-allegati żbalji mwettqa mill-Kummissjoni fl-evalwazzjoni tas-serjetà u tat-tul tal-ksur ġew miċħuda fil-kuntest tal-eżami tat-tieni u t-tielet parti tal-ħames motiv.

590

Għaldaqstant hemm lok li jiġi miċħud it-tieni ilment tar-raba’ parti tal-ħames motiv.

c)

Fuq it-tielet ilment, ibbażat fuq l-allegazzjoni li l-multa hija eċċessiva u għandha titnaqqas

591

Ir-rikorrenti tirrileva li, fid-deċiżjoni kkontestata, il-Kummissjoni imponiet multa identika għal dik imposta fid-deċiżjoni Electrabel, minkejja li kienu jeżistu differenzi sinjifikattivi bejn iż-żewġ kawżi, b’mod partikolari inkwantu tat-tul tal-ksur allegat u tad-dħul mill-bejgħ global tal-impriżi. Hija tenfasizza li t-tul tal-ksur fil-kawża li tat lok għad-deċiżjoni Electrabel kien ta’ iktar minn 4.5 darbiet iktar minn dak tal-ksur tal-Artikolu 7(1) tar-Regolament Nru 139/2004 f’dan il-każ. Barra minn hekk, ir-rikorrenti rrilevat li l-multa imposta fid-deċiżjoni Electrabel kienet ekwivalenti għal 0.04 % tad-dħul globali tal-awtur tal-ksur, kontra 1 % f’dan il-każ. Barra minn hekk, hija tenfasizza li l-multa imposta fid-deċiżjoni Electrabel kienet tekwivali biss għal 0.42 % tal-multa massima awtorizzata, kontra 10 % f’dan il-każ. Barra minn hekk, il-multa imposta fuq Electrabel kienet tekwivali għal madwar 1/13 tal-valur tat-tranżazzjoni, filwaqt li din kienet tekwivali għal madwar 1/6 tal-valur tat-tranżazzjoni fil-kawża odjerna.

592

F’dan ir-rigward, jeħtieġ li jitfakkar li, kif tammetti r-rikorrenti, il-prassi deċiżjonali preċedenti tal-Kummissjoni ma sservix fiha nnifisha bħala kuntest ġuridiku għall-multi fil-qasam tal-kompetizzjoni (ara s-sentenza tat-12 ta’ Diċembru 2012, Electrabel vs Il-Kummissjoni, T-332/09, EU:T:2012:672, punt 259 u l-ġurisprudenza ċċitata).

593

F’dan ir-rigward, ir-rikorrenti tenfasizza li ma hijiex titlob lill-Qorti Ġenerali tapplika l-istess formula matematika bħal dik applikata fid-deċiżjoni Electrabel, li twassal għal tnaqqis tal-multa imposta fuq ir-rikorrenti skont koeffiċjent ta’ 25. Madankollu hija titlob lill-Qorti Ġenerali jogħġobha, fl-eżerċizzju tal-ġurisdizzjoni sħiħa tagħha, li tieħu inkunsiderazzjoni d-differenza fit-trattament bejn Electrabel u r-rikorrenti, li hija skjaċċanti, u li tieħu kont debitu taċ-ċirkustanzi tal-każ.

594

Jeħtieġ li jiġi rrilevat li, ċertament, il-multa f’dan il-każ hija ħafna ikbar, fid-dawl tad-dħul mill-bejgħ tar-rikorrenti, meta mqabbla ma’ dik imposta fid-deċiżjoni Electrabel, minkejja li dawn iż-żewġ multi huma identiċi f’termini assoluti (EUR 20 miljun fiż-żewġ kawżi). Madankollu, jeħtieġ li jitfakkar li d-deċiżjonijiet preċedenti tal-Kummissjoni fil-qasam tal-multi jistgħu jkunu rilevanti fir-rigward tal-osservanza tal-prinċipju ta’ ugwaljanza fit-trattament biss jekk jintwera li d-data ċirkustanzjali tal-kawżi relattivi għal dawn id-deċiżjonijiet l-oħra hija paragunabbli ma’ dawk tal-kawża odjerna (ara f’dan is-sens, is-sentenza tad-29 ta’ Ġunju 2012, E.ON Ruhrgas u E.ON vs il-Kummissjoni, T-360/09, EU:T:2012:332, punt 262 u l-ġurisprudenza ċċitata).

595

F’dan il-każ, fl-ewwel lok, hemm lok li jittieħed kont tal-fatt li, fid-deċiżjoni Electrabel, il-Kummissjoni imponiet biss multa għall-ksur tal-Artikolu 7(1) tar-Regolament Nru 4064/89. F’dan il-każ, il-Kummissjoni setgħet ġustament timponi żewġ multi għall-ksur tal-Artikolu 4(1) u tal-Artikolu 7(1) tar-Regolament Nru 139/2004.

596

Fit-tieni lok, hemm lok li jittieħed kont tal-fatt li, f’dan il-każ, it-tranżazzjoni prevista kienet tqajjem dubji serji dwar il-kompatibbiltà tagħha mas-suq intern u li t-twettiq prematur tal-konċentrazzjoni seta’ jkollu effetti negattivi fuq il-kompetizzjoni, għall-kuntrarju ta’ kif kienet is-sitwazzjoni fil-kawża li tat lok għad-deċiżjoni Electrabel. Dan il-fatt waħdu jiġġustifika l-impożizzjoni ta’ multa ħafna ikbar minn dik imposta fid-deċiżjoni Electrabel.

597

F’dan ir-rigward, ir-rikorrenti ssostni li l-Kummissjoni kienet enfasizzat, fid-deċiżjoni tagħha Electrabel, li l-fatt li t-tranżazzjoni ma kinitx qajmet problemi ta’ kompetizzjoni ma kienx ta’ natura li jinċidi fuq in-natura serja ta’ ksur u li l-preżenza ta’ dannu lill-kompetizzjoni kien jirrendi l-ksur iktar serju. Skont ir-rikorrenti, la l-kawża li tat lok għad-deċiżjoni Electrabel u lanqas il-kawża odjerna ma kienu jinvolvu xi dannu effettiv lill-kompetizzjoni.

598

F’dan ir-rigward, huwa suffiċjenti li jitfakkar, minn naħa, li l-fatt li konċentrazzjoni tqajjem dubji serji dwar il-kompatibbiltà tagħha mas-suq intern jirrendi t-twettiq prematur ta’ din il-konċentrazzjoni iktar serju mit-twettiq prematur ta’ konċentrazzjoni li ma tqajjimx problemi ta’ kompetizzjoni, dment li ma jkunx jista’ jiġi eskluż f’każ partikolari li t-twettiq tagħha fil-forma prevista inizjalment u mhux awtorizzata mill-Kummissjoni seta’ jkollu effetti dannużi fuq il-kompetizzjoni (ara l-punt 500 iktar ’il fuq) u, min-naħa l-oħra, li, f’dan il-każ, ma jistax jiġi eskluż effett negattiv tat-twettiq prematur tal-konċentrazzjoni fuq il-kompetizzjoni (ara l-punt 514 iktar ’il fuq).

599

Barra minn hekk, ir-rikorrenti ssostni li l-kuntest tal-kawża odjerna, jiġifieri fl-ewwel lok, ir-rikors għall-eżenzjoni prevista fl-Artikolu 7(2) tar-Regolament Nru 139/2004, fit-tieni lok, l-osservanza simultanja tal-kundizzjonijiet previsti fl-Artikolu 7(2) tar-Regolament Nru 139/2004 u, fit-tielet lok, il-kooperazzjoni sħiħa mal-Kummissjoni waqt l-elaborazzjoni ta’ assjem ta’ miżuri korrettivi adegwati, jirrendi insinjifikattiva kull differenza fattwali possibbli bejn il-kawża li tat lok għad-deċiżjoni Electrabel.

600

Fir-rigward tal-ewwel element, hemm lok li jitfakkar li l-kawża odjerna tikkonċerna ksur imwettaq b’negliġenza, bħall-ksur inkwistjoni fil-kawża li tat lok għad-deċiżjoni Electrabel. Iċ-ċirkustanza li l-iżball tar-rikorrenti seta’ kien jikkonċerna l-portata tal-eċċezzjoni prevista fl-Artikolu 7(2) tar-Regolament Nru 139/2004, ma tirrendix il-ksur inqas gravi.

601

Fir-rigward tat-tieni element, hemm lok li jiġi rrilevat li l-Kummissjoni ħadet inkunsiderazzjoni ċ-ċirkustanzi li r-rikorrenti ma kinitx eżerċitat id-drittijiet tagħha tal-vot fi ħdan Morpol u li hija kienet żammet lil Morpol bħala entità separata tar-rikorrenti matul il-proċedura ta’ kontroll tal-konċentrazzjoni bħala ċirkustanzi attenwanti (punti 196 u 198 tad-deċiżjoni kkontestata). Madankollu hemm lok li jitfakkar li dawn il-miżuri ma jeskludux li t-twettiq prematur tal-konċentrazzjoni seta’ kellu effetti negattivi fuq il-kompetizzjoni (ara l-punt 516 iktar ’il fuq).

602

Fir-rigward tat-tielet element, il-Kummissjoni tenfasizza ġustament li kien fl-interess kummerċjali tar-rikorrenti stess li tipproponi miżuri korrettivi. Li kieku r-rikorrenti ma kinitx ipproponiet tali miżuri, il-Kummissjoni kienet tibda l-proċeduri tat-tieni fażi, li kienu jtawlu l-ksur u li fl-aħħar mill-aħħar setgħu jwasslu għall-projbizzjoni tal-konċentrazzjoni. Għaldaqstant, il-fatt li r-rikorrenti pproponiet miżuri korrettivi adegwati ma jirrendix il-ksur inqas gravi.

603

Barra minn hekk, hemm lok li jiġi rrilevat, fir-rigward tal-paragun bejn il-kawża odjerna u l-kawża li tat lok għad-deċiżjoni Electrabel, li l-fatt li l-Kummissjoni applikat, fil-passat, multi ta’ ċertu livell għal ċerti tipi ta’ ksur ma jistax iċaħħadha mill-possibbiltà li żżid dan il-livell fil-limiti indikati fil-leġiżlazzjoni inkwistjoni, jekk dan ikun neċessarju sabiex tiġi żgurata l-implementazzjoni tal-politika tal-kompetizzjoni tal-Unjoni. Fil-fatt, l-applikazzjoni effikaċi tar-regoli tal-kompetizzjoni tal-Unjoni titlob li l-Kummissjoni tkun tista’ f’kull mument taġġusta l-livell tal-multi skont il-ħtiġijiet ta’ din il-politika (ara s-sentenza tat-12 ta’ Diċembru 2012, Electrabel vs Il-Kummissjoni, T-332/09, EU:T:2012:672, punt 286 u l-ġurisprudenza ċċitata).

604

F’dan ir-rigward, ir-rikorrenti ssostni li l-kawża odjerna ma tikkonċernax ksur ċar tal-obbligu ta’ status quo u li kienet l-iktar l-iktar tikkonċerna interpretazzjoni żbaljata tal-Artikolu 7(2) tar-Regolament Nru 139/2004 dovuta għal żball skużabbli. Għaldaqstant, skont ir-rikorrenti, l-ebda argument tal-politika tal-kompetizzjoni ma jista’ jiġġustifika l-livell tal-multa f’dan il-każ.

605

Fir-rigward ta’ dan l-argument tar-rikorrenti, huwa suffiċjenti li jitfakkar li l-aġir tar-rikorrenti kien negliġenti u li ma kien jeżisti l-ebda żball skużabbli min-naħa tagħha (ara l-eżami tat-tieni motiv kif ukoll il-punt 484 iktar ’il fuq).

606

Barra minn hekk, hemm lok li jiġi rrilevat li l-ammont globali taż-żewġ multi imposti f’dan il-każ jikkorrispondi għal madwar 1 % tad-dħul mill-bejgħ tar-rikorrenti. Il-Kummissjoni tindika f’dan ir-rigward li dan l-ammont jikkorrispondi għal 10 % tal-ammont massimu awtorizzat.

607

Il-Kummissjoni ġustament tenfasizza, fir-risposta tagħha, li l-għażla li tistabbilixxi l-multa f’ammont li jkun fil-parti inferjuri tal-iskala awtorizzata tirrifletti l-bilanċ imfittex mill-Kummissjoni bejn, minn naħa, is-serjetà tal-ksur imwettaq, l-effetti negattivi potenzjali fuq il-kompetizzjoni li setgħet tikkawża l-konċentrazzjoni, id-daqs u l-kumplessità tal-istruttura tar-rikorrenti u n-neċessità li tiġi applikata sanzjoni suffiċjentement dissważiva, u min-naħa l-oħra, ċerti ċirkustanzi attenwanti bħall-atitudni negliġenti u mhux intenzjonata tar-rikorrenti, il-fatt li hija talbet pariri legali, il-fatt li hija ma eżerċitatx id-drittijiet tal-vot li kien jikkonferilha s-sehem tagħha fil-kapital, u s-separazzjoni taż-żewġ attivitajiet sal-awtorizzazzjoni tat-tranżazzjoni.

608

Fid-dawl tal-elementi msemmija fil-punt 607 iktar ’il fuq, l-ammont tal-multi ma jistax jitqies bħala sproporzjonat. Effettivament, l-ammont tal-multi, anki jekk jitqiesu flimkien, jinsab fil-parti inferjuri tal-iskala awtorizzata, fatt li jirrifletti bilanċ ġust bejn il-fatturi li għandhom jittieħdu inkunsiderazzjoni u dak li huwa proporzjonat fid-dawl taċ-ċirkustanzi tal-każ. Għal dawn ir-raġunijiet, hemm lok li jitqies li l-ammont tal-multi imposti huwa adegwat fid-dawl taċ-ċirkustanzi tal-każ.

609

L-ebda wieħed mill-argumenti u mill-provi invokati mir-rikorrenti ma jippermettu lill-Qorti Ġenerali, fil-kuntest tal-eżerċizzju tal-ġurisdizzjoni sħiħa tagħha, li tikkonstata li l-multi imposti ma humiex adegwati.

610

Fir-rigward tal-argument tar-rikorrenti li l-qrati tal-Unjoni naqqsu b’mod sinjifikattiv il-multi imposti mill-Kummissjoni f’ċirkustanzi simili għal dawk fil-kawża odjerna, jeħtieġ li jiġi kkonstatat li, kif tenfasizza l-Kummissjoni, il-fatti li taw lok għal dawn il-kawżi ma kinux paragunabbli ma’ dawk li taw lok għall-kawża odjerna.

611

Fl-ewwel lok, fir-rigward tas-sentenza tat-28 ta’ Marzu 1984, Officine Bertoli vs Il-Kummissjoni (8/83, EU:C:1984:129), jeħtieġ li jiġi rrilevat li l-Qorti tal-Ġustizzja naqqset b’75 % il-multa imposta mir-rikorrenti għal ksur tal-Artikolu 60 KEFA. Fil-punt 29 ta’ din is-sentenza hija rrilevat dan li ġej:

612

F’dan ir-rigward, ir-rikorrenti tikkonferma li, “[b’] mod simili, l-eżenzjoni mill-obbligu ta’ status quo ġiet introdotta xi 25 sena qabel id-deċiżjoni” u li “qatt ma ġiet imposta xi sanzjoni minħabba applikazzjoni żbaljata tal-eżenzjoni”.

613

F’dan ir-rigward, hemm lok li jiġi rrilevat li l-Kummissjoni ma imponietx multa għal applikazzjoni żbaljata tal-eċċezzjoni prevista fl-Artikolu 7(2) tar-Regolament Nru 139/2004, iżda għall-ksur tal-Artikolu 4(1) u tal-Artikolu 7(1) tar-Regolament Nru 139/2004. Din ma hijiex l-ewwel kawża li fiha l-Kummissjoni imponiet multi għat-twettiq ta’ konċentrazzjoni qabel in-notifika u l-awtorizzazzjoni tagħha.

614

Barra minn hekk, il-premessi li jinsabu fil-punt 29 tas-sentenza tat-28 ta’ Marzu 1984, Officine Bertoli vs Il-Kummissjoni (8/83, EU:C:1984:129), kienu jikkonċernaw is-sitwazzjoni ta’ waħda u l-istess impriża li ma ngħatat l-ebda multa, minkejja li sarulha diversi kontrolli. Dawn il-premessi ma jistgħux jiġu trasposti għas-sitwazzjoni tal-impriżi kollha, meta ma ġiet imposta l-ebda multa fuq l-ebda impriża.

615

Barra minn hekk, fir-rigward tal-osservanza tar-regoli tal-kompetizzjoni, ma teżisti l-ebda sistema ta’ kontrolli regolari, għall-kuntrarju tas-sitwazzjoni fis-sentenza tat-28 ta’ Marzu 1984, Officine Bertoli vs Il-Kummissjoni (8/83, EU:C:1984:129).

616

Fit-tieni lok, fir-rigward tas-sentenza tad-19 ta’ Ottubru 1983, Lucchini Siderurgica vs Il-Kummissjoni (179/82, EU:C:1983:280), ir-rikorrenti tenfasizza li l-Qorti tal-Ġustizzja naqqset b’50 % il-multa li kienet ġiet imposta talli ġiet oltrepassata l-kwota ta’ produzzjoni tal-ħadid.

617

Il-Qorti tal-Ġustizzja kkonstatat li “ċirkustanzi eċċezzjonali” kienu jiġġustifikaw li titwarrab ir-rata normali imposta mill-Kummissjoni. F’dan ir-rigward, hija rrilevat li, fit-trimestru inkwistjoni, ir-rikorrenti fil-kawża li tat lok għas-sentenza kienet affaċċjat diffikultajiet eċċezzjonali sabiex tosserva l-kwota attribwita u li hija kienet sussegwentement naqqset il-produzzjoni tagħha. Barra minn hekk, il-Qorti tal-Ġustizzja kkonstatat li r-rikorrenti f’dik il-kawża kienet offriet minn qabel, b’faks, il-kumpens għall-oltrepassar tal-kwota permezz ta’ tnaqqis tal-produzzjoni sussegwenti tagħha, u li l-Kummissjoni ma kinitx wieġbet għal din il-faks, bi ksur tar-regoli ta’ amministrazzjoni tajba, u billi ħalliet lir-rikorrenti fl-inċertezza dwar il-kwistjoni dwar jekk hija kinitx aċċettat l-offerta tagħha (sentenza tad-19 ta’ Ottubru 1983, Lucchini Siderurgica vs Il-Kummissjoni, 179/82, EU:C:1983:280, punti 25 sa 27).

618

Ir-rikorrenti tikkonferma li hija mminimizzat ukoll kull konsegwenza negattiva tal-ksur possibbli tagħha billi astjeniet milli teżerċita d-drittijiet tagħha tal-vot u billi żammet lil Morpol bħala entità separata matul il-proċedura ta’ awtorizzazzjoni tal-Kummissjoni. Barra minn hekk, skont ir-rikorrenti, il-Kummissjoni lir-rikorrenti fl-inċertezza fuq il-kwistjoni dwar jekk l-eżenzjoni prevista fl-Artikolu 7(2) tar-Regolament Nru 139/2004 kinitx tapplika sal-konklużjoni minnha tal-proċess ta’ kontroll tal-konċentrazzjoni.

619

Madankollu, f’dan il-każ, b’differenza mis-sitwazzjoni li tat lok għas-sentenza tad-19 ta’ Ottubru 1983, Lucchini Siderurgica vs Il-Kummissjoni (179/82, EU:C:1983:280), ma teżistix rata normali għall-impożizzjoni ta’ multa għal ksur tal-Artikolu 4(1) u tal-Artikolu 7(1) tar-Regolament Nru 139/2004. Kif jirriżulta mill-punt 25 tas-sentenza tad-19 ta’ Ottubru 1983, Lucchini Siderurgica vs Il-Kummissjoni (179/82, EU:C:1983:280), il-multa kellha tiġi stabbilita, skont deċiżjoni ġenerali, f’ammont ta’ ECU 75 għal kull tunnellata li tiżboq il-limitu, bla ħsara għal każijiet eċċezzjonali li jiġġustifikaw li titwarrab ir-rata normali.

620

F’dan il-każ, il-fatt li r-rikorrenti naqqset ir-riskju ta’ effetti negattivi fuq il-kompetizzjoni, billi astjeniet milli teżerċita id-drittijiet tagħha tal-vot u billi żammet lil Morpol bħala entità separata matul il-perijodu ta’ eżami tal-konċentrazzjoni, ittieħed debitament inkunsiderazzjoni mill-Kummissjoni, fil-punti 196 u 198 tad-deċiżjoni kkontestata bħala ċirkustanzi attenwanti. Għaldaqstant ma jkunx f’loku li din iċ-ċirkustanza tittieħed inkunsiderazzjoni għat-tieni darba, billi jitnaqqas l-ammont tal-multi imposti mill-Kummissjoni.

621

Fir-rigward tal-argument tar-rikorrenti li l-Kummissjoni ħalliet lir-rikorrenti fl-inċertezza fuq il-kwistjoni dwar jekk kinitx tapplika l-eżenzjoni prevista fl-Artikolu 7(2) tar-Regolament Nru 139/2004, huwa suffiċjenti li jiġi kkonstatat li, peress li r-rikorrenti ma kinitx ikkuntattjat lill-Kummissjoni bil-għan li tikseb kjarifiki dwar l-applikabbiltà tal-Artikolu 7(2) tar-Regolament Nru 139/2004 f’dan il-każ, hija ma tistax tallega li l-Kummissjoni ħallietha fl-inċertezza dwar dan is-suġġett. B’differenza mill-kawża li tat lok għas-sentenza tad-19 ta’ Ottubru 1983, Lucchini Siderurgica vs Il-Kummissjoni (179/82, EU:C:1983:280), fil-każ odjern ma kienx hemm kuntatt mir-rikorrenti li ma ġiex imwieġeb mill-Kummissjoni.

622

Fit-tielet lok, ir-rikorrenti tibbaża ruħha fuq is-sentenza tas-16 ta’ Mejju 1984, Eisen und Metall vs Il-Kummissjoni (9/83, EU:C:1984:177), li fiha l-Qorti tal-Ġustizzja naqqset b’50 % l-ammont tal-multa imposta mill-Kummissjoni fuq ir-rikorrenti, fil-kummerċ tal-azzar, peress li wettqet tnaqqis tal-prezzijiet ippubblikati tagħha u peress li għaldaqstant applikat kundizzjonijiet mhux ugwali fil-kuntest ta’ tranżazzjonijiet paragunabbli (ara l-punti 27 u 41 sa 46 tas-sentenza).

623

F’din is-sentenza, il-Qorti tal-Ġustizzja kkonstatat li, meta ksur ikun twettaq minn kummerċjant, l-influwenza iktar limitata li dan jista’ jeżerċita fuq is-sitwazzjoni tas-suq tikkostitwixxi ċirkustanza li żżid is-serjetà tal-ksur u li, f’dawn iċ-ċirkustanzi, l-applikazzjoni ta’ multa kbira ħafna tista’ tiġi ġġustifikata biss minn ċirkustanzi li juru serjetà partikolari tal-ksur imwettaq minn kummerċjant (sentenza tas-16 ta’ Mejju 1984, Eisen und Metall vs Il-Kummissjoni, 9/83, EU:C:1984:177, punti 43 u 44). Kien f’dawn iċ-ċirkustanzi li l-Qorti tal-Ġustizzja kkonstatat, fil-punt 45 ta’ din is-sentenza, li multa ekwivalenti għal 110 % tat-tnaqqis tal-prezzijiet ma kinitx iġġustifikata, peress li l-unika ġustifikazzjoni tal-Kummissjoni tal-ammont tal-multa kienet fil-forma ta’ riferiment għall-fatt li l-ammont tal-multa kellu jkun f’livell suffiċjenti sabiex jiddisswadi lill-impriża milli twettaq tnaqqis ġdid.

624

Għaldaqstant jirriżulta biss mis-sentenza tas-16 ta’ Mejju 1984, Eisen und Metall vs Il-Kummissjoni (9/83, EU:C:1984:177), li r-riferiment għan-neċessità ta’ effett suffiċjentement dissważiv ma huwiex biżżejjed sabiex tintwera’ serjetà partikolari ta’ ksur imwettaq minn kummerċjant.

625

F’dan il-każ, il-Kummissjoni ma kinitx obbligata turi serjetà partikolari tal-ksur bil-għan li tiġġustifika l-impożizzjoni ta’ multa għolja. Fil-fatt, ma jistax jiġi ddikjarat li r-rikorrenti setgħet biss teżerċita influwenza limitata fuq is-suq.

626

Sa fejn ir-rikorrenti tibbaża ruħha fuq żball skużabbli fl-interpretazzjoni tal-Artikolu 7(2) tar-Regolament Nru 139/2004, huwa suffiċjenti li jitfakkar li dan l-argument diġà ġie miċħud fil-punt 484 iktar ’il fuq.

627

Fir-raba’ lok, ir-rikorrenti tibbaża ruħha fuq is-sentenza tal-14 ta’ Lulju 1994, Parker Pen vs Il-Kummissjoni (T-77/92, EU:T:1994:85). Fil-punt 94 ta’ din is-sentenza, il-Qorti Ġenerali rrilevat li “il-Kummissjoni ma [kinitx] ħadet inkunsiderazzjoni l-fatt li d-dħul mill-bejgħ mwettaq mill-prodotti kkonċernati mill-ksur kien relattivament dgħajjef meta mqabbel ma’ dak li rriżulta mill-bejgħ kollu mwettaq minn Parker” u li “l-istabbiliment ta’ multa adegwata ma [setgħax] ikun ir-riżultat ta’ sempliċi kalkolu bbażat fuq id-dħul mill-bejgħ globali”. Għaldaqstant, il-Qorti Ġenerali naqqset il-multa b’madwar 43 %, billi biddlitha minn ECU 700 000 għal ECU 400 000 (punt 95 tas-sentenza).

628

Ir-rikorrenti ssostni li, b’mod simili, li l-bejgħ tas-salamun Skoċċiż tat-trobbija mwettaq fl-2012 minn Morpol, settur li fih il-Kummissjoni identifikat problemi ta’ kompetizzjoni, kien relattivament dgħajjef meta mqabbel mal-bejgħ kollu tagħha, jiġifieri 5 %.

629

F’dan ir-rigward, jeħtieġ li jiġi rrilevat li s-sentenza tal-14 ta’ Lulju 1994, Parker Pen vs Il-Kummissjoni (T-77/92, EU:T:1994:85), kienet tikkonċerna ksur tal-Artikolu [101 TFUE]. Fir-rigward tal-ksur tal-Artikolu 4(1) u tal-Artikolu 7(1) tar-Regolament Nru 139/2004, ma huwiex f’loku li l-ammont tal-multa jiġi kkalkolat abbażi tal-valuri tal-bejgħ fis-settur milqut minn problemi possibbli tal-kompetizzjoni. Fil-fatt, it-twettiq ta’ konċentrazzjoni qabel in-notifika u l-awtorizzazzjoni tagħha ma jikkonċernax esklużivament is-settur tas-suq li fir-rigward tiegħu jistgħu jiġu identifikati problemi ta’ kompetizzjoni mill-Kummissjoni. Inkella, l-multa, bħala prinċipju, kellha tkun ta’ EUR 0 fil-każ ta’ konċentrazzjoni li ma tkun qajmet l-ebda problema ta’ kompetizzjoni.

630

Barra minn hekk, f’dan il-każ, il-Kummissjoni ma wettqitx “sempliċi kalkolu bbażat fuq id-dħul mill-bejgħ globali”, iżda ħadet inkunsiderazzjoni assjem ta’ elementi fil-kuntest tal-evalwazzjoni tan-natura, tas-serjetà u tat-tul tal-ksur.

631

Għalhekk, hemm lok li r-raba’ parti tal-ħames motiv tiġi miċħuda.

5.

Fuq il-ħames parti, ibbażata fuq l-allegazzjoni li d-deċiżjoni kkontestata, b’mod żbaljat, ma tirrikonoxxix ċirkustanzi attenwanti

632

Ir-rikorrenti ssostni li l-Kummissjoni kellha tirrikonoxxi s-segwenti elementi bħala ċirkustanzi attenwanti:

–

il-kooperazzjoni tar-rikorrenti fil-kuntest tal-proċedura ta’ kontroll tal-konċentrazzjonijiet;

–

l-assenza ta’ preċedenti rilevanti;

–

l-eżistenza ta’ żball skużabbli li ta lok għall-ksur allegat.

633

Il-Kummissjoni tikkontesta l-argumenti tar-rikorrenti.

634

Fl-ewwel lok, fir-rigward tal-allegata kooperazzjoni tar-rikorrenti fil-kuntest tal-proċedura ta’ kontroll tal-konċentrazzjonijiet, anki jekk tiġi preżunta, jeħtieġ li jiġi rrilevat li din ma hijiex ċirkustanza attenwanti fil-kuntest ta’ proċedura marbuta ma’ ksur tal-Artikolu 4(1) u tal-Artikolu 7(1) tar-Regolament Nru 139/2004.

635

Huwa ċertament minnu li, fil-proċeduri marbuta mal-ksur tal-Artikoli 101 jew 102 TFUE, il-kooperazzjoni ta’ rikorrent fil-kuntest tal-proċedura amministrattiva tista’, fejn xieraq, tittieħed inkunsiderazzjoni bħala ċirkustanza attenwanti. F’tali kawżi, li fihom il-Kummissjoni tkun tipprevedi li tistabbilixxi ksur, bl-ebda mod ma huwa ovvju li l-impriżi suġġetti għall-investigazzjoni juru atitudni kooperattiva u li tgħin b’mod attiv lill-Kummissjoni tistabbilixxi l-ksur.

636

Madankollu, f’dan il-każ, ir-rikorrenti ma tibbażax ruħha fuq allegata kooperazzjoni waqt il-proċedura amministrattiva intiża li tistabbilixxi l-ksur tal-Artikolu 4(1) u tal-Artikolu 7(1) tar-Regolament Nru 139/2004.

637

Hija tiddikjara sempliċiment li hija kkooperat matul il-proċedura ta’ kontroll tal-konċentrazzjonijiet. F’dan ir-rigward, jeħtieġ li jiġi enfasizzat li huwa għal kollox loġiku li impriża li tkun tixtieq li tikseb l-awtorizzazzjoni ta’ konċentrazzjoni tikkoopera mal-Kummissjoni sabiex taċċellera l-proċedura, li huwa fl-interess proprju tagħha (ara, fir-rigward tal-proposta għal miżuri korrettivi mir-rikorrenti, il-punt 602 iktar ’il fuq).

638

Għaldaqstant ma jistax jiġi allegat li l-Kummissjoni ma ħaditx inkunsiderazzjoni tali kooperazzjoni bħala ċirkustanza attenwanti.

639

Fit-tieni lok, ir-rikorrenti tiddikjara li l-Kummissjoni kellha tatiha l-benefiċċju ta’ ċirkustanza attenwanti marbuta mal-assenza ta’ preċedenti rilevanti li jistabbilixxu ksur tal-obbligu ta’ status quo inkonnessjoni mal-Artikolu 7(2) tar-Regolament Nru 139/2004. F’dan ir-rigward, ir-rikorrenti tenfasizza li, fid-deċiżjoni tagħha tat-18 ta’ Frar 1998 (Każ Nru IV/M.920 – Samsung/AST) (iktar ’il quddiem id-“deċiżjoni Samsung/AST”) kif ukoll fid-deċiżjoni tagħha tal-10 ta’ Frar 1999 (Każ Nru IV/M.969 – A. P. Møller) (iktar ’il quddiem “id-deċiżjoni A. P. Møller”), il-Kummissjoni rrikonoxxiet bħala fattur attenwanti l-fatt li l-aġir inkwistjoni seħħ fil-mument li fih hija kienet għadha ma adottatx deċiżjoni li tikkonstata ksur fir-rigward tal-aġir inkwistjoni.

640

F’dan ir-rigward, hemm lok li jiġi rrilevat li l-Kummissjoni ma hija bl-ebda mod obbligata li tieħu inkunsiderazzjoni, bħala ċirkustanza attenwanti, il-fatt li aġir li għandu eżattament l-istess karatteristiċi bħal dawk ta’ dak inkwistjoni għadu ma tax lok għall-impożizzjoni ta’ multa. Barra minn hekk, fl-ewwel lok, jeħtieġ li jitfakkar li, fid-deċiżjoni Yara/Kemira GrowHow, il-Kummissjoni kienet diġà esprimiet ruħha dwar l-interpretazzjoni li teħtieġ li tingħata lill-Artikolu 7(2) tar-Regolament Nru 139/2004, minkejja li dan għamlitu f’obiter dictum (ara l-punt 419 iktar ’il fuq). Fit-tieni lok, il-Kummissjoni, f’diversi każijiet, imponiet multa abbażi tal-Artikolu 14 tar-Regolament Nru 4064/89, anki jekk dawn il-każijiet ma kinux jikkonċernaw l-interpretazzjoni tal-eċċezzjoni prevista fl-Artikolu 7(2) tar-Regolament Nru 139/2004.

641

Fir-rigward tad-deċiżjoni Samsung/AST, jeħtieġ li jiġi rrilevat li l-Kummissjoni kkonstatat, fil-punt 5 tal-premessa 28, li din id-deċiżjoni kienet “l-ewwel [li hija kienet] ħadet […] skont l-applikazzjoni tal-Artikolu 14 tar-Regolament [Nru 4064/89]”. Fil-premessa 21 tad-deċiżjoni A.P. Møller, il-Kummissjoni kkonstatat li “l-ksur [kien] twettaq fl-istess ħin bħal dak li kien is-suġġett tad-deċiżjoni Samsung, meta l-Kummissjoni kienet għadha ma adottatx deċiżjoni skont […] l-Artikolu 14 tar-Regolament [Nru 4064/89]”, li “[d]an il-fatt [kien] tqies bħala ċirkustanza attenwanti fid-deċiżjoni Samsung” u li “l-istess raġunament [kien] applikabbli f’dan il-każ.”

642

Għaldaqstant, f’dawn id-deċiżjonijiet, il-Kummissjoni ma llimitatx ruħha sabiex tikkonstata li hija kienet għadha ma imponietx multa għal aġir li kellu eżattament l-istess karatteristiċi, iżda hija rrilevat li ma kienet ttieħdet l-ebda deċiżjoni skont l-Artikolu 14 tar-Regolament Nru 4064/89. Għaldaqstant, is-sitwazzjoni f’dan il-każ ma hijiex paragunabbli ma’ dawk li taw lok għad-deċiżjonijiet Samsung/AST u A.P. Møller.

643

Fit-tielet lok, ir-rikorrenti ssostni li, anki jekk jiġi preżunt li d-deċiżjoni kkontestata tista’, ġustament, tikklassifika bħala negliġenti l-allegati ksur mir-rikorrenti tal-Artikolu 4(1) u tal-Artikolu 7(1) tar-Regolament Nru 139/2004, id-deċiżjoni ma ħallietx lir-rikorrenti tibbenefika miċ-ċirkustanza attenwanti li tirriżulta mill-fatt l-ksur allegat kien ikkawżat minn żball skużabbli u li ma kienx intiż sabiex jiġi evitat il-kontroll tal-Kummissjoni.

644

F’dan ir-rigward, huwa suffiċjenti li jiġi kkonstatat li l-eżistenza ta’ żball skużabbli jippreżumi li l-persuna kkonċernata tat prova ta’ kull diliġenza meħtieġa minn persuna normalment avżata (ara l-punt 484 iktar ’il fuq). Għaldaqstant il-konstatazzjoni ta’ negliġenza min-naħa tar-rikorrenti neċessarjament teskludi l-eżistenza ta’ żball skużabbli min-naħa tagħha.

645

Għaldaqstant jeħtieġ li tiġi miċħuda wkoll il-ħames parti tal-ħames motiv, kif ukoll il-ħames motiv fl-intier tiegħu.

646

Fid-dawl tal-kunsiderazzjonijiet preċedenti, ir-rikors għandu jiġi miċħud fl-intier tiegħu.

Fuq l-ispejjeż

647

Skont l-Artikolu 134(1) tar-Regoli tal-Proċedura, il-parti li titlef il-kawża għandha tiġi kkundannata għall-ispejjeż, jekk dawn ikunu ntalbu. Peress li r-rikorrenti tilfet, hemm lok li din tiġi kkundannati għall-ispejjeż, kif mitlub mill-Kummissjoni.

1)

Ir-rikors huwa miċħud.

2)

Marine Harvest ASA hija kkundannata għall-ispejjeż.