Il-Ġurnal Uffiċjali
ta'l-Unjoni Ewropea
MT
Is-serje L
|
|
Il-Ġurnal Uffiċjali |
MT Is-serje L |
|
2026/254 |
29.1.2026 |
DEĊIŻJONI TAL-KUNSILL (PESK) 2026/254
tad-29 ta’ Jannar 2026
li temenda d-Deċiżjoni (PESK) 2023/2135 dwar miżuri restrittivi fid-dawl ta’ attivitajiet li jdgħajfu l-istabbiltà u t-tranżizzjoni politika tas-Sudan
IL-KUNSILL TAL-UNJONI EWROPEA,
Wara li kkunsidra t-Trattat dwar l-Unjoni Ewropea, u b'mod partikolari l-Artikolu 29 tiegħu,
Wara li kkunsidra l-proposta tar-Rappreżentant Għoli tal-Unjoni għall-Affarijiet Barranin u l-Politika ta' Sigurtà,
Billi:
|
(1) |
Fid-9 ta' Ottubru 2023, il-Kunsill adotta d-Deċiżjoni (PESK) 2023/2135 (1). |
|
(2) |
Fis-27 ta' Novembru 2023, ir-Rappreżentant Għoli tal-Unjoni għall-Affarijiet Barranin u l-Politika ta' Sigurtà (ir-“Rappreżentant Għoli”) ħareġ dikjarazzjoni f'isem l-Unjoni, li fiha l-Unjoni u l-Istati Membri tagħha tennew il-kundanna qawwija tagħhom tal-ġlied kontinwu bejn il-Forzi Armati Sudaniżi (SAF) u l-Forzi ta' Appoġġ Rapidu (RSF) u l-milizzji affiljati rispettivi tagħhom. Id-dikjarazzjoni ddeplorat ukoll l-eskalazzjoni drammatika tal-vjolenza u d-dannu irreparabbli li sar għall-ħajja tan-nies f’Darfur u fil-pajjiż kollu, kif ukoll il-ksur tal-liġi internazzjonali dwar id-drittijiet tal-bniedem u tal-liġi umanitarja internazzjonali. |
|
(3) |
Fit-28 ta' Ottubru 2025, ir-Rappreżentant Għoli ħareġ dikjarazzjoni konġunta mal-Kummissarju Lahbib dwar il-qbid ta' El Fasher. Id-dikjarazzjoni ssottolinjat li s-sekwestru tal-kapitali ta’ Darfur mill-RSF jimmarka punt ta' bidla perikoluż fil-gwerra u jhedded li jkompli jaggrava s-sitwazzjoni umanitarja diġà mwiegħra. Barra minn hekk, id-dikjarazzjoni żiedet li l-fatt li persuni ċivili qegħdin fil-mira abbażi tal-etniċità tagħhom jenfasizza l-brutalità tal-RSF. |
|
(4) |
Fid-dawl tal-gravità tas-sitwazzjoni, jenħtieġ li seba' individwi addizzjonali jiġu inklużi fil-lista ta' persuni fiżiċi u ġuridiċi, entitajiet jew korpi stipulata fl-Anness tad-Deċiżjoni (PESK) 2023/2135. |
|
(5) |
Għalhekk, id-Deċiżjoni (PESK) 2023/2135 jenħtieġ li tiġi emendata skont dan, |
ADOTTA DIN ID-DEĊIŻJONI:
Artikolu 1
L-Anness tad-Deċiżjoni (PESK) 2023/2135 huwa emendat f'konformità mal-Anness ta' din id-Deċiżjoni.
Artikolu 2
Din id-Deċiżjoni għandha tidħol fis-seħħ fid-data tal-pubblikazzjoni tagħha f'Il-Ġurnal Uffiċjali tal-Unjoni Ewropea.
Magħmul fi Brussell, id-29 ta’ Jannar 2026.
Għall-Kunsill
Il-President
K. KALLAS
(1) Id-Deċiżjoni tal-Kunsill (PESK) 2023/2135 tad-9 ta’ Ottubru 2023 dwar miżuri restrittivi fid-dawl ta’ attivitajiet li jdgħajfu l-istabbiltà u t-tranżizzjoni politika tas-Sudan (ĠU L, 2023/2135, 11.10.2023, ELI: http://data.europa.eu/eli/dec/2023/2135/oj).
ANNESS
Fl-Anness tad-Deċiżjoni (PESK) 2023/2135, taħt l-intestatura “A. Lista ta’ persuni fiżiċi msemmija fl-Artikolu 1(1) u fl-Artikolu 2(1)”, jiżdiedu l-entrati li ġejjin:
Persuni
|
|
Isem |
Informazzjoni ta’ identifikazzjoni |
Raġunijiet |
Data tal-elenkar |
|
“14. |
Algony Hamdan DAGALO MUSA magħruf ukoll bħala Algoney Hamdan Daglo Musa Musa Ahmed |
Post tat-twelid: Nayala North, Sudan Data tat-twelid: 9.8.1990 Nazzjonalità: Sudaniża Sess: raġel Funzjoni: Major in the RSF Entitajiet assoċjati: RSF; Tradive General Trading Co; GSK ADVANCE COMPANY LTD Numru tal-passaport: B00017334 (Sudan); Passaport alternattiv: B00024943 (Sudan) li jiskadi fis-27 ta’ Settembru 2031 (individwali) [SUDAN-EO14098] |
Algoney Hamdan Dagalo Musa huwa maġġur fl-RSF u ħu Mohammad Hamdan Dagalo (Hemedti), li huwa l-kap tal-RSF. Algoney Hamdan Dagalo Musa huwa involut fl-akkwist ta’ armi għall-RSF. Algoney Hamdan Dagalo Musa stabbilixxa l-kumpaniji Tradive General Trading Co u GSK ADVANCE COMPANY LTD , żewġ entitajiet soġġetti għal miżuri restrittivi mill-Unjoni talli huma involuti fil-proċessi tal-akkwist tal-RSF. Għalhekk, huwa assoċjat ma’ entitajiet responsabbli għall-appoġġ tal-azzjonijiet tal-RSF li jheddu l-paċi, l-istabbiltà jew is-sigurtà tas-Sudan. Algoney Hamdan Dagalo Musa huwa għalhekk responsabbli għall-ippjanar ta’ atti fis-Sudan li jikkostitwixxu ksur jew abbużi serji tad-drittijiet tal-bniedem jew ksur tad-dritt umanitarju internazzjonali. Huwa responsabbli wkoll għal azzjonijiet li jheddu l-paċi, l-istabbiltà jew is-sigurtà tas-Sudan. |
29.1.2026 |
|
15. |
Elfateh Abdullah Idris ADAM magħruf ukoll bħala Abu Lulu |
Nazzjonalità: Sudaniża Sess: raġel Funzjoni: Brigadier General/Commander of the RSF Entitajiet assoċjati: RSF |
Elfateh Abdullah Idris Adam huwa Brigadier Ġeneral u Kmandant tal-RSF. Huwa ġie identifikat bħala awtur ewlieni tal-atroċitajiet imwettqa mill-RSF f’El Fasher f’Ottubru 2025. F’dak l-inċident, huwa qatel persuni ċivili u ordna l-qtil ta’ diversi persuni innoċenti, inkluż tfal. Elfateh Abdullah Idris Adam huwa għalhekk responsabbli għat-tmexxija u t-twettiq ta’ atti fis-Sudan li jikkostitwixxu ksur jew abbużi serji tad-drittijiet tal-bniedem, kif ukoll ksur tad-dritt umanitarju internazzjonali. Huwa responsabbli wkoll għal azzjonijiet li jheddu l-paċi, l-istabbiltà jew is-sigurtà tas-Sudan. |
29.1.2026 |
|
16. |
Edris KAFUTI |
Nazzjonalità: Sudaniża Sess: raġel Funzjoni: Field Commander of the RSF Entitajiet assoċjati: RSF |
Edris Kafuti huwa kmandant ta’ operazzjonijiet militari tal-RSF. Huwa ġie identifikat bħala awtur ewlieni tal-atroċitajiet imwettqa mill-RSF f'El Fasher f’Ottubru 2025. F’dak l-inċident, huwa ffastidja individwi detenuti. Edris Kafuti huwa għalhekk responsabbli għat-twettiq ta’ atti fis-Sudan li jikkostitwixxu ksur jew abbużi serji tad-drittijiet tal-bniedem, kif ukoll ksur tad-dritt umanitarju internazzjonali. Huwa responsabbli wkoll għal azzjonijiet li jheddu l-paċi, l-istabbiltà jew is-sigurtà tas-Sudan. |
29.1.2026 |
|
17. |
Tijani Ibrahim Moussa MOHAMED |
Nazzjonalità: Sudaniża Sess: raġel Funzjoni: Field Commander of the RSF Entitajiet assoċjati: RSF |
Tijani Ibrahim Moussa Mohamed huwa kmandant ta’ operazzjonijiet militari tal-RSF. Huwa ġie identifikat bħala awtur ewlieni tal-atroċitajiet imwettqa mill-RSF f’El Fasher f’Ottubru 2025. F’dak l-inċident, huwa ffastidja individwi detenuti. Tijani Ibrahim Moussa Mohamed huwa għalhekk responsabbli għat-twettiq ta’ atti fis-Sudan li jikkostitwixxu ksur jew abbużi serji tad-drittijiet tal-bniedem, kif ukoll ksur tad-dritt umanitarju internazzjonali. Huwa responsabbli wkoll għal azzjonijiet li jheddu l-paċi, l-istabbiltà jew is-sigurtà tas-Sudan. |
29.1.2026 |
|
18. |
Gedo HAMDAN magħruf ukoll bħala Abu Nushuk Gedo Hamdan Ahmed Abnashuk Jido Hamdan Ahmed Abunshuk Jadu Hamdan |
Nazzjonalità: Sudaniża Sess: raġel Funzjoni: Regional Commander for North Darfur Section, Brigadier General of the RSF Entitajiet assoċjati: RSF |
Gedo Hamdan huwa Kmandant Reġjonali għat-Taqsima tat-Tramuntana tad-Darfur u Brigadier Ġeneral tal-RSF. Huwa ġie identifikat bħala awtur ewlieni tal-atroċitajiet imwettqa mill-RSF f’El Fasher f’Ottubru 2025. Gelo Hamdan huwa għalhekk responsabbli għat-twettiq ta’ atti fis-Sudan li jikkostitwixxu ksur jew abbużi serji tad-drittijiet tal-bniedem, kif ukoll ksur tad-dritt umanitarju internazzjonali. Huwa responsabbli wkoll għal azzjonijiet li jheddu l-paċi, l-istabbiltà jew is-sigurtà tas-Sudan. |
29.1.2026 |
|
19. |
Abu Zaid Talha AL-MISBAH |
Nazzjonalità: Sudaniża Sess: raġel Funzjoni: Commander of the Baraa bin Malik Battalion (BBMB) Entitajiet assoċjati: SAF; Baraa bin Malik Battalion (BBMB) |
Abu Zaid Talha Al-Misbah huwa l-Kmandant tal-Battaljun Baraa bin Malik (BBMB), milizzja Iżlamista li qed tiġġieled flimkien mal-Forzi Armati Sudaniżi (SAF) fil-kunflitt bejn l-SAF, il-Forzi ta’ Appoġġ Rapidu (RSF) u l-gruppi armati alleati tagħhom, li ilu għaddej mill-15 ta’ April 2023. Abu Zaid Talha Al-Misbah ħa sehem fid-difiża tal-bażi tal-Korp Armored fin-Nofsinhar ta’ Khartoum bejn Ġunju u Awwissu 2023. Huwa mexxa wkoll il-ġellieda tal-Battaljun Baraa bin Malik li ħakmu l-palazz Repubblikan f’Khartoum bil-kotra f’Marzu 2025. Abu Zaid Talha Al-Misbah għalhekk qed jipparteċipa b’mod attiv fl-isforzi tal-gwerra mmexxija mill-SAF, li qed jostakolaw u jimminaw l-isforzi biex tissokta t-tranżizzjoni politika fis-Sudan. Abu Zaid Talha Al-Misbah għandu r-responsabbiltà ta’ kmand għall-eżekuzzjonijiet sommarji ta’ ċivili mwettqa mill-Battaljun Baraa bin Malik fit-Tramuntana ta’ Khartoum f’Settembru 2024 u f’Gezirah f’Jannar 2025, li jikkostitwixxu ksur serju tad-drittijiet tal-bniedem, kif dokumentat, fost oħrajn, fir-rapport ta’ Diċembru 2025 tal-Missjoni Internazzjonali Indipendenti ta’ Ġbir ta’ Informazzjoni għas-Sudan tal-Kunsill tad-Drittijiet tal-Bniedem tan-Nazzjonijiet Uniti u r-rapport ta’ Frar 2025 tal-Human Rights Watch. Abu Zaid Talha Al-Misbah għalhekk kien involut direttament fit-twettiq ta’ atti mill-Battaljun Baraa bin Malik li jikkostitwixxu ksur serju tad-drittijiet tal-bniedem, u huwa responsabbli wkoll għad-dgħajfien tal-isforzi biex tissokta t-tranżizzjoni politika fis-Sudan. |
29.1.2026 |
|
20. |
Al-Tayyib AL-IMAM JODA |
Nazzjonalità: Sudaniża Sess: raġel Funzjoni: Emir of the Nafeidiya clan of the Kawahla tribe from the Sarhan area west of Gezirah Entitajiet assoċjati: SAF; Sudan Shield Forces; it-tribù Kawahla; ik-klann Nafeidiya |
Al-Tayyib Al-Imam Joda huwa l-Emir tal-klann Nafeidiya tat-tribù Kawahla miż-żona ta’ Sarhan fil-Punent tal-Istat ta’ Gezirah. Kien fost il-mexxejja tal-komunità li għenu lill-Forzi Armati Sudaniżi (SAF) u l-milizzji alleati, b’mod partikolari s-Sudan Shield Forces, fir-reklutaġġ u l-organizzazzjoni tal-kampanja ta’ mmirar sistematiku tal-komunitajiet tal-biedja ta’ Kanabi fl-Istati ta’ Gezirah u Sennar, li kienet tinkludi arresti tal-massa, qtil tal-massa, oqbra tal-massa u rħula maħruqa, b’mod partikolari qabel u wara l-qbid mill-ġdid ta’ Wad Madani mill-SAF u l-alleati tagħhom f’Jannar 2025. Al-Tayyib Al-Imam Joda esprima l-appoġġ sħiħ tiegħu għall-Forzi tat-Tarka tas-Sudan (Sudan Shield Forces), grupp paramilitari alleat mal-SAF, immexxi minn Abu Aqla Mohamed Kaikal, li wettaq ksur serju tad-drittijiet tal-bniedem fl-Istat ta’ Gezirah. Al-Tayyib Al-Imam Joda ripetutament appella għat-tisħiħ bl-armi tal-popolazzjoni ċivili, irrekluta ġellieda f'isem l-SAF u l-Forzi tat-Tarka tas-Sudan (Sudan Shield Forces), u inċita l-vjolenza kontra l-poplu Kanabi billi akkużahom li huma affiljati mal-Forzi ta' Appoġġ Rapidu (RSF). Al-Tayyib Al-Imam Joda kien għalhekk involut fl-ippjanar, it-tmexxija u t-twettiq ta’ atti fis-Sudan li jikkostitwixxu ksur serju tad-drittijiet tal-bniedem u li jimminaw direttament l-isforzi biex tissokta t-tranżizzjoni politika fis-Sudan. |
29.1.2026”. |
ELI: http://data.europa.eu/eli/dec/2026/254/oj
ISSN 1977-074X (electronic edition)