IMMC.COM%282025%2916%20final.MLT.xhtml.1_MT_ACT_part1

Introduzzjoni

L-Artikolu 8(2) tad-Deċiżjoni tal-Kunsill (UE) 2021/689 1 jirrikjedi li l-Kummissjoni tirrapporta lill-Parlament Ewropew u lill-Kunsill dwar l-abbozz tal-ftehimiet jew tal-arranġamenti nnegozjati bejn l-Istati Membri tal-UE u r-Renju Unit, relatati mal-kooperazzjoni amministrattiva fil-qasam tal-VAT jew tal-assistenza għall-irkupru għat-taxxi jew tad-dazji.

Il-kooperazzjoni amministrattiva għall-VAT u d-dazji doganali u l-assistenza għall-irkupru tal-VAT, għad-dazji tas-sisa u d-dazji doganali huma koperti mill-Ftehim dwar il-Kummerċ u l-Kooperazzjoni bejn l-Unjoni Ewropea u l-Komunità Ewropea tal-Enerġija Atomika, minn naħa waħda, u r-Renju Unit tal-Gran Brittanja u l-Irlanda ta’ Fuq, min-naħa l-oħra, (minn hawn ’il quddiem imsejjaħ il-“Ftehim dwar il-Kummerċ u l-Kooperazzjoni”), u b’mod partikolari mill-Protokoll dwar il-kooperazzjoni amministrattiva u l-ġlieda kontra l-frodi fil-qasam tal-VAT u dwar l-assistenza reċiproka għall-irkupru tal-pretensjonijiet relatati mat-taxxi u d-dazji (minn hawn ’il quddiem imsejjaħ il- “Protokoll”), mehmuż ma’ dan il-Ftehim dwar il-Kummerċ u l-Kooperazzjoni.

Meta l-Istati Membri jkollhom il-ħsieb li jinnegozjaw kwalunkwe ftehim jew arranġament bilaterali mar-Renju Unit fil-qasam tal-kooperazzjoni amministrattiva tal-VAT jew tal-assistenza għall-irkupru ta’ kwalunkwe taxxa jew dazju, jeħtieġ li jikkonsultaw lill-Kummissjoni. Huma jistgħu jiffirmaw u jikkonkludu dan l-arranġament jew ftehim mar-Renju Unit biss ladarba li l-Kummissjoni tkun ikkonfermat il-validità tal-arranġament jew tal-ftehim ikkonċernat mad-dritt tal-UE.

Bl-istess mod, meta jinnegozjaw memorandum ta’ qbil li jimplimenta ftehim internazzjonali ieħor li jipprevedi l-assistenza għall-irkupru, l-awtoritajiet nazzjonali jridu jiżguraw li l-memorandum ta’ qbil ma jkun fih l-ebda dispożizzjoni li timmina l-funzjonament tal-Ftehim dwar il-Kummerċ u l-Kooperazzjoni jew tas-suq intern u li tpoġġi f’riskju l-kisba ta’ objettiv tal-azzjoni esterna tal-Unjoni fil-qasam tal-assistenza għall-irkupru, jew li b’xi mod ieħor tippreġudika l-interessi tal-Unjoni 2 .

Dan ifisser li t-taxxi u d-dazji koperti mid-dispożizzjonijiet dwar il-kooperazzjoni amministrattiva u l-assistenza għall-irkupru tal-Ftehim dwar il-Kummerċ u l-Kooperazzjoni ma għandhomx jkunu koperti mid-dispożizzjonijiet korrispondenti tal-ftehimiet u tal-memoranda ta’ fehim li l-Istati Membri jinnegozjaw mar-Renju Unit. Sempliċi dikjarazzjoni li d-dritt tal-UE jieħu preċedenza mhijiex biżżejjed.

Barra minn hekk, in-negozjati bilaterali dwar l-elementi speċifiċi — eż. kwalunkwe bidla tal-limitu fl-Artikolu 33(4) tal-Protokoll — ma jistgħux jiġu previsti, peress li d-dispożizzjonijiet ikkonċernati huma parti mill-Ftehim globali dwar il-Kummerċ u l-Kooperazzjoni, li huwa r-riżultat ta’ negozjati multisettorjali. Għalhekk, il-modifika ta’ dan l-eżitu f’qasam wieħed qatt ma tista’ ssir mingħajr ma jitqies il-ftehim kollu, speċjalment f’oqsma marbuta mal-parti kummerċjali tal-ftehim li tolqot għadd kbir ħafna ta’ attivitajiet ekonomiċi. F’dak il-kuntest, in-negozjar unilaterali ta’ Stat Membru dwar dan l-element speċifiku jmur kontra l-prinċipju tal-kooperazzjoni leali, stabbilit fl-Artikolu 4(3) tat-Trattat dwar l-Unjoni Ewropea.

Barra minn hekk, il-kooperazzjoni amministrattiva u l-assistenza għall-irkupru skont kwalunkwe ftehim internazzjonali bejn Stat Membru u r-Renju Unit huma naturalment esklużi wkoll f’sitwazzjonijiet fejn din il-kooperazzjoni amministrattiva u l-assistenza għall-irkupru jkunu koperti mill-Ftehim dwar il-Ħruġ tar-Renju Unit 3 u l-Protokoll tiegħu dwar l-Irlanda/l-Irlanda ta’ Fuq, u mill-Protokoll dwar l-assistenza amministrattiva reċiproka fi kwistjonijiet doganali, mehmuż mal-Ftehim dwar il-Kummerċ u l-Kooperazzjoni.

Fir-rigward tal-assistenza għall-irkupru għat-taxxi mhux koperti mill-ftehimiet tal-UE, il-Kummissjoni fakkret lill-Istati Membri li għandhom l-għażla li jnaqqsu l-piż amministrattiv u baġitarju marbut mal-ħtiġijiet tat-traduzzjoni billi jagħżlu l-użu tan-network tal-komunikazzjoni elettronika u l-formoli standard adottati għall-implimentazzjoni tal-Protokoll, f’konformità mal-Artikolu 38(4) ta’ dan il-protokoll. L-Artikolu PVAT.38(4) tal-Protokoll jipprevedi li “in-network tal-komunikazzjoni elettronika u l-formoli standard adottati għall-implimentazzjoni ta’ dan il-Protokoll jistgħu jintużaw ukoll għall-assistenza għall-irkupru fir-rigward ta’ pretensjonijiet oħra għajr il-pretensjonijiet imsemmija fil-punt (b) tal-Artikolu PVAT.2(1), jekk tali assistenza għall-irkupru tkun possibbli taħt strumenti bilaterali jew multilaterali oħra legalment vinkolanti dwar il-kooperazzjoni amministrattiva bejn l-Istati”. Huwa fl-interess tal-Istati Membri tal-UE — u tal-awtoritajiet tar-Renju Unit — li japplikaw b’mod effettiv dawn il-formoli standard (formoli ta’ talba u Formola uniformi ta’ notifika (UNF) u Strument uniformi li jippermetti l-infurzar fl-Istat rikjest (UIPE)) adottati skont dan il-Protokoll għall-assistenza għall-irkupru li tikkonċerna taxxi oħra, bil-vantaġġi relatati tat-traduzzjoni awtomatizzata, b’effett legali dirett tal-UNF u tal-UIPE (mingħajr ebda ħtieġa ta’ rikonoxximent fl-Istat rikjest) u l-possibbiltà li tintbagħat talba kkombinata f’każijiet ta’ pretensjonijiet multipli li jaqgħu fil-kamp ta’ applikazzjoni tal-ftehimiet bejn l-UE u r-Renju Unit rispettivament u l-ftehimiet internazzjonali l-oħra li japplikaw bejn l-Istati Membri tal-UE u r-Renju Unit.

Il-fatt li memorandum ta’ qbil għandu biss l-ħsieb li jiddeskrivi l-interpretazzjoni ta’ ftehim multilaterali eżistenti 4 mill-awtoritajiet kompetenti ma jiġġustifika l-ebda deroga mir-regoli ta’ hawn fuq.

Mit-tweġiba pprovduta mill-Istati Membri tal-UE, jidher li l-awtoritajiet tar-Renju Unit avviċinaw diversi Stati Membri biex jikkonkludu konvenzjoni kontra t-tassazzjoni doppja, li fiha dispożizzjonijiet dwar il-kooperazzjoni amministrattiva u l-assistenza għall-irkupru tat-taxxa, jew memorandum ta’ qbil dwar l-applikazzjoni ta’ ftehimiet bilaterali li jipprevedu assistenza għall-irkupru tat-taxxa jew dwar l-applikazzjoni tal-konvenzjoni multilaterali dwar l-assistenza amministrattiva reċiproka fi kwistjonijiet tat-taxxa.

It-tabella ta’ hawn taħt tiġbor fil-qosor il-każijiet li tressqu għall-attenzjoni tal-Kummissjoni s’issa.

Stat Membru	Tip ta’ ftehim	Status	Azzjonijiet meħuda/previsti
L-Awstrija	MtQ dwar l-assistenza għall-irkupru tat-taxxa	Iffirmat	Dikjarazzjoni interpretattiva ppubblikata mill-Istat Membru 5 . L-impenn tal-Istat Membru li jemenda l-konvenzjoni kontra t-taxxa doppja u l-MtQ fl-okkażjoni li jmiss.
Il-Lussemburgu	Konvenzjoni kontra t-taxxa doppja	Iffirmata	Dikjarazzjoni interpretattiva ppubblikata mill-Istat Membru 6 . L-impenn tal-Istati Membru li jemenda l-konvenzjoni kontra t-taxxa doppja fl-okkażjoni li jmiss.
Il-Litwanja	MtQ dwar l-assistenza għall-irkupru tat-taxxa	Għaddej attwalment	Il-Kummissjoni ma rċeviet l-ebda abbozz.
Spanja	MtQ dwar l-assistenza għall-irkupru tat-taxxa	Għaddej attwalment	Il-Kummissjoni ma rċeviet l-ebda abbozz.
Il-Polonja	MtQ dwar l-assistenza għall-irkupru tat-taxxa	Għaddej attwalment	Il-kummenti ġew ipprovduti mill-Kummissjoni.
L-Iżvezja	MtQ dwar l-assistenza għall-irkupru tat-taxxa	Għaddej attwalment	Il-kummenti ġew ipprovduti mill-Kummissjoni.
Iċ-Ċekja	MtQ dwar l-assistenza għall-irkupru tat-taxxa	Għaddej attwalment	Il-kummenti ġew ipprovduti mill-Kummissjoni.
Il-Belġju	MtQ dwar l-assistenza għall-irkupru tat-taxxa	Għaddej attwalment	Il-kummenti ġew ipprovduti mill-Kummissjoni.
Il-Portugall	MtQ dwar l-assistenza għall-irkupru tat-taxxa	Għaddej attwalment	Il-kummenti ġew ipprovduti mill-Kummissjoni.
Iċ-Ċekja	Konvenzjoni kontra t-taxxa doppja	Għaddeja attwalment	Iċ-Ċekja għandha tippreżenta t-test lill-Kummissjoni.
Il-Portugall	Konvenzjoni kontra t-taxxa doppja	Għaddeja attwalment	Il-kummenti ġew ipprovduti mill-Kummissjoni.
In-Netherlands	MtQ dwar l-assistenza għall-irkupru tat-taxxa	Għaddej attwalment	Il-kummenti ġew ipprovduti mill-Kummissjoni.
Il-Ġermanja	MtQ dwar l-assistenza għall-irkupru tat-taxxa	Għaddej attwalment	Il-kummenti ġew ipprovduti mill-Kummissjoni.
Ir-Rumanija	Konvenzjoni kontra t-taxxa doppja	Għaddeja attwalment	Il-kummenti ġew ipprovduti mill-Kummissjoni.

Il-Kummissjoni tintrabat li tissokta tipprovdi lill-Istati Membri l-parir xieraq biex tiżgura li t-testi bilaterali li jinnegozjaw ikunu kompatibbli mal-Ftehim dwar il-Kummerċ u l-Kooperazzjoni u l-Protokoll u se tieħu l-azzjonijiet xierqa kollha biex twettaq dak l-objettiv.