(1)

Le Rialachán Tarmligthe (AE) 2019/625 ón gCoimisiún (3) leagtar amach na ceanglais maidir le coinsíneachtaí d’ainmhithe áirithe agus d’earraí áirithe a bheartaítear lena gcaitheamh ag an duine ó thríú tíortha nó ó réigiúin sna tíortha sin a theacht isteach san Aontas, lena áirithiú go gcomhlíonann siad na ceanglais is infheidhme a leagtar síos sna rialacha maidir le sábháilteacht bia dá dtagraítear in Airteagal 1(2)(a) de Rialachán (AE) 2017/625 nó na ceanglais a aithnítear a bheith ar a laghad coibhéiseach leo. Go háirithe, maidir leis na hearraí sin agus na hainmhithe sin a theacht isteach san Aontas, tá sé faoi réir an cheanglais maidir le teacht ó thríú tír nó ó réigiún de thríú tír atá san áireamh ar liosta i gcomhréir le hAirteagal 126(2)(a) de Rialachán (AE) 2017/625.

(2)

Le Rialachán Cur Chun Feidhme (AE) 2021/405 ón gCoimisiún (4), leagtar síos na liostaí de thríú tíortha agus réigiúin sna tíortha sin a údaraítear i dtaobh ainmhithe agus earraí áirithe a bheartaítear lena gcaitheamh ag an duine i gcomhréir le hAirteagal 126(2)(a) de Rialachán (AE) 2017/625 a theacht isteach san Aontas.

(3)

Chun go gcuirfear ar an liosta iad, ní mór do thríú tír nó do réigiún i dtríú tír na ceanglais a leagtar síos in Airteagal 127 de Rialachán (AE) 2017/625 agus na rialacha a leagtar síos in Airteagal 4 de Rialachán Tarmligthe (AE) 2019/625 a chomhlíonadh.

(4)

Foráiltear le hAirteagal 4, pointe (f), de Rialachán Tarmligthe (AE) 2019/625 gur réamhriachtanas é, ó thaobh tríú tíortha nó réigiúin de thríú tír a áireamh ar an liosta dá dtagraítear in Airteagal 126(2)(a) de Rialachán (AE) 2017/625, clár rialaithe iarmhar a bheith ann, é a bheith á chur chun feidhme agus é a bheith á chur in iúl, ar clár é a d’fhormheas an Coimisiún, i gcás inarb infheidhme. Le Cinneadh 2011/163/AE ón gCoimisiún (5) formheasadh na pleananna chun faireachán a dhéanamh ar iarmhar a chuir tríú tíortha áirithe isteach maidir le hainmhithe sonracha agus le táirgí ainmhithe sonracha a liostaítear san Iarscríbhinn a ghabhann leis an gCinneadh sin.

(5)

Le Cinneadh Cur Chun Feidhme (AE) 2021/2315 ón gCoimisiún (6), baineadh formheas phlean na Túinéise chun faireachán a dhéanamh ar iarmhar maidir le géim fhiáin. Dá bhrí sin, ba cheart an Túinéis a bhaint den liosta de thríú tíortha a údaraítear i dtaobh éin ghéim fhiáin áirithe a bheartaítear lena gcaitheamh ag an duine a theacht isteach san Aontas, rud a leagtar amach in Iarscríbhinn III a ghabhann le Rialachán Cur Chun Feidhme (AE) 2021/405. Cuireadh an Túinéis ar an eolas dá réir.

(6)

Le Cinneadh Cur Chun Feidhme (AE) 2021/2315, formheasadh plean na hÚcráine chun faireachán a dhéanamh maidir le gastrapóid mhuirí lena mbaineann an fhochatagóir “moilisc”. Ós rud é gur chuir an Úcráin fianaise agus ráthaíochtaí iomchuí ar fáil go gcomhlíonann sí ceanglais reachtaíocht an Aontais maidir le coinsíneachtaí de ghastrapóid mhuirí ón dobharshaothrú a theacht isteach san Aontas, ba cheart an tríú tír sin a chur leis an liosta de thríú tíortha nó réigiúin sna tíortha sin a údaraítear i dtaobh coinsíneachtaí de mhoilisc dhébhlaoscacha áirithe, eicínideirmigh, túinicigh agus gastrapóid mhuirí a theacht isteach san Aontas, rud a leagtar amach in Iarscríbhinn VIII a ghabhann le Rialachán Cur Chun Feidhme (AE) 2021/405. Cuireadh an Úcráin ar an eolas dá réir.

(7)

Le Cinneadh Cur Chun Feidhme (AE) 2021/2315, roinneadh an chatagóir “táirgí dobharshaothraithe” san Iarscríbhinn a ghabhann le Cinneadh 2011/163/AE ina ceithre fhochatagóir “iasc eite”, “táirgí éisc eite”, e.g. caibheár, “crústaigh” agus “moilisc”. Ar chúiseanna comhsheasmhachta agus soiléireachta, is iomchuí Iarscríbhinn IX a ghabhann le Rialachán Cur Chun Feidhme (AE) 2021/405 a leasú, chun na fochatagóirí de tháirgí dobharshaothraithe a bhfuil na tríú tíortha údaraithe ina leith a shonrú, i gcás inarb ábhartha.

(8)

Le Cinneadh Cur Chun Feidhme (AE) 2021/2315, formheasadh pleananna chun faireachán a dhéanamh ar iarmhar maidir le táirgí dobharshaothraithe ón Albáin, ón Airgintín, ón mBealarúis, ón mBoisnia agus an Heirseagaivéin, ón tSile, ó Oileáin Fháclainne, ó Oileáin Fharó, ó Oileán Mhanann, ó Iosrael, ón tSeapáin, ón gCéinia, ó Oileán Mhuirís, ón Moldóiv, ó Mhontainéagró, ón Nua-Shéalainn, ón Macadóin Thuaidh, ón tSeirbia, ó Shingeapór, ón Eilvéis, ón Túinéis, ón Tuirc, ó Uganda, ón Ríocht Aontaithe agus ó Uragua i gcás inarb infheidhme maidir leis an bhfochatagóir “iasc eite”, i measc rudaí eile. Dá bhrí sin, is iomchuí Iarscríbhinn IX a ghabhann le Rialachán Cur Chun Feidhme (AE) 2021/405 a leasú chun an formheas sin a léiriú. Cuireadh na tríú tíortha sin ar an eolas dá réir.

(9)

Le Cinneadh Cur Chun Feidhme (AE) 2021/2315, formheasadh pleananna chun faireachán a dhéanamh ar iarmhar maidir le táirgí dobharshaothraithe ón mBanglaidéis, ón mBrasaíl, ó Cheanada, ón tSín, ón gColóim, ó Chósta Ríce, ó Eacuadór, ó Hondúras, ón India, ón Indinéis, ón Malaeisia, ó Mheicsiceo, ó Mharacó, ó Mhaenmar/Burma, ó Phanama, ó Pheiriú, ó na hOileáin Fhilipíneacha, ón Araib Shádach, ón gCóiré Theas, ó Shrí Lanca, ón Téaváin, ón Téalainn, ó na Stáit Aontaithe agus ó Vítneam i gcás inarb infheidhme maidir leis an bhfochatagóir “iasc eite” agus “crústaigh”, i measc rudaí eile. Dá bhrí sin, is iomchuí Iarscríbhinn IX a ghabhann le Rialachán Cur Chun Feidhme (AE) 2021/405 a leasú chun an formheas sin a léiriú. Cuireadh na tríú tíortha sin ar an eolas dá réir.

(10)

Le Cinneadh Cur Chun Feidhme (AE) 2021/2315, formheasadh pleananna chun faireachán a dhéanamh ar iarmhar maidir le táirgí dobharshaothraithe ón mBeilís, ó Bhrúiné, ó Chúba, ó Ghuatamala, ó Mhósaimbíc, ón Nua-Chaladóin, ó Nicearagua, ón Tansáin agus ó Veiniséala maidir leis an bhfochatagóir “crústaigh”. Dá bhrí sin, is iomchuí Iarscríbhinn IX a ghabhann le Rialachán Cur Chun Feidhme (AE) 2021/405 a leasú chun an formheas sin a léiriú. Cuireadh na tríú tíortha sin ar an eolas dá réir.

(11)

Le Cinneadh Cur Chun Feidhme (AE) 2021/2315, formheasadh plean na hIaráine chun faireachán a dhéanamh ar iarmhar maidir leis na fochatagóirí “táirgí éisc eite (caibheár)” agus “crústaigh”. Ós rud é gur chuir an Iaráin fianaise agus ráthaíochtaí leordhóthanacha ar fáil go gcomhlíonann sí ceanglais reachtaíocht an Aontais maidir le coinsíneachtaí de tháirgí éisc eite (caibheár) agus de chrústaigh ón dobharshaothrú a theacht isteach san Aontas, is iomchuí leasú a dhéanamh ar an iontráil atá aici sa liosta de thríú tíortha nó réigiúin sna tíortha sin a údaraítear chun coinsíneachtaí de tháirgí iascaigh áirithe a theacht isteach san Aontas, rud a leagtar amach in Iarscríbhinn IX a ghabhann le Rialachán Cur Chun Feidhme (AE) 2021/405. Cuireadh an Iaráin ar an eolas dá réir.

(12)

Le Cinneadh Cur Chun Feidhme (AE) 2021/2315, tarraingíodh siar formheas phlean Óman chun faireachán a dhéanamh ar iarmhar maidir le hiasc eite. Dá bhrí sin, ba cheart Óman a bhaint den liosta de thríú tíortha nó de réigiúin sna tíortha sin a údaraítear chun coinsíneachtaí de tháirgí iascaigh áirithe a theacht isteach san Aontas, rud a leagtar amach in Iarscríbhinn IX a ghabhann le Rialachán Cur Chun Feidhme (AE) 2021/405. Cuireadh Óman ar an eolas dá réir.

(13)

Le hIarscríbhinn XI a ghabhann le Rialachán Cur Chun Feidhme (AE) 2021/405, bunaítear an liosta de thríú tíortha nó réigiúin sna tíortha sin a údaraítear chun coinsíneachtaí de chosa froganna agus coinsíneachtaí seilidí a theacht isteach san Aontas. Ba cheart an tSeoirsia agus an Rúis a chur leis an liosta sin maidir le seilidí ós rud é gur chuir siad fianaise agus ráthaíochtaí iomchuí ar fáil go gcomhlíonann siad ceanglais reachtaíocht an Aontais maidir le coinsíneachtaí de na hearraí sin a theacht isteach san Aontas.

(14)

Le Cinneadh 2007/82/CE ón gCoimisiún (7), ceanglaítear ar na Ballstáit cosc a chur ar gach táirge iascaigh a bheartaítear lena chaitheamh ag an duine a allmhairiú ón nGuine. Rinne an Coimisiún iniúchadh sa Ghuine in 2019 chun meastóireacht a dhéanamh ar na córais rialaithe atá i bhfeidhm agus lena rialaítear táirgí iascaigh a bheartaítear lena gcaitheamh ag an duine agus lena n-onnmhairiú chuig an Aontas. An 7 Bealtaine 2021, chuir an Coimisiún an Ghuine ar an eolas go raibh an fhaisnéis a cuireadh ar fáil sásúil agus gur dúnadh iniúchadh 2019 go rathúil. Dá bhrí sin, ba cheart Cinneadh 2007/82/CE a aisghairm. I bhfianaise thoradh an iniúchta, is iomchuí leanúint den Ghuine a liostú in Iarscríbhinn IX a ghabhann le Rialachán Cur Chun Feidhme (AE) 2021/405 mar thríú tír a údaraítear i dtaobh coinsíneachtaí éisc a ghabhtar go fiáin agus nach ndearnadh aon oibríocht phróiseála ná ullmhúcháin orthu seachas dícheannadh, dí-inniú, fuarú nó reo a theacht isteach san Aontas.

(15)

Dá bhrí sin, ba cheart Iarscríbhinní III, VIII, IX agus XI a ghabhann le Rialachán Cur Chun Feidhme (AE) 2021/405 a leasú dá réir.

(16)

Ar mhaithe le comhsheasmhacht le Cinneadh 2011/163/AE agus ar mhaithe le deimhneacht dhlíthiúil, ba cheart an Rialachán seo a theacht i bhfeidhm mar ábhar práinne.

(17)

Tá na bearta dá bhforáiltear sa Rialachán seo i gcomhréir leis an tuairim ón mBuanchoiste um Plandaí, Ainmhithe, Bia agus Beatha,