Eagrán sealadach
BREITHIÚNAS NA CÚIRTE (an Dara Dlísheomra)
22 Bealtaine 2025 (*)
(Tarchur chun réamhrialú – Iompar ar iarnród – Treoir 2012/34/AE – Táillí a ghearradh as úsáid bonneagair iarnróid – Táillí a bhunú agus a bhailiú – Airteagal 29 – Eisceachtaí ó phrionsabail maidir le táillí – Airteagal 32 – Méaduithe margaidh – Módúlachtaí i gcomhair ríomh agus foilsiú – Airteagal 56 – Cúraimí an chomhlachta rialála – Nós imeachta chun méaduithe margaidh a údarú faoin dlí náisiúnta – Coinníollacha)
I gCás C‑538/23,
IARRAIDH ar réamhrialú de bhun Airteagal 267 CFAE, ón Bundesverwaltungsgericht (an Chúirt Chónaidhme Riaracháin, an Ostair), trí bhreith an 21 Lúnasa 2023, a fuarthas ag an gCúirt an 22 Lúnasa 2023, sna himeachtaí
ÖBB-Infrastruktur AG,
WESTbahn Management GmbH
v
Schienen‑Control Kommission,
tugann AN CHÚIRT (an Dara Dlísheomra),
agus í comhdhéanta mar seo a leanas: K. Jürimäe, Uachtarán Dlísheomra, K. Lenaerts, Uachtarán na Cúirte, ag feidhmiú mar Bhreitheamh den Dara Dlísheomra, M. Gavalec, Z. Csehi (Rapóirtéir) agus F. Schalin, Breithiúna,
Abhcóide Ginearálta: T. Ćapeta,
Cláraitheoir: A. Calot Escobar,
ag féachaint don nós imeachta i scríbhinn,
tar éis breithniú a dhéanamh ar na barúlacha arna dtíolacadh thar ceann na bpáirtithe seo a leanas:
– ÖBB-Infrastruktur AG, ag K. Retter, Rechtsanwalt,
– WESTbahn Management GmbH, ag E. Lichtenberger, Rechtsanwalt,
– Schienen‑Control Kommission, ag R. Streller, Uachtarán,
– Rialtas na hOstaire, ag A. Posch, J. Schmoll agus G. Kunnert, i gcáil Gníomhairí,
– Rialtas na hÍsiltíre, ag E. M. M. Besselink agus K. Bulterman, i gcáil Gníomhairí,
– Rialtas na Polainne, ag B. Majczyna, i gcáil Gníomhaire,
– Rialtas na hIorua, ag T. Aalia agus G. G. Mostuen, i gcáil Gníomhairí,
– an Coimisiún Eorpach, ag P. Messina agus E. Schmidt, i gcáil Gníomhairí,
–
tar éis éisteacht leis an Tuairim ón Abhcóide Ginearálta ag an suí an 7 Samhain 2024,
an Breithiúnas seo a leanas:
Breithiúnas
1 Baineann an iarraidh seo ar réamhrialú le léiriú ar Airteagal 8(4) agus ar Airteagal 27(2) agus (4) de Threoir 2012/34/AE ó Pharlaimint na hEorpa agus ón gComhairle an 21 Samhain 2012 lena mbunaítear limistéar Eorpach aonair iarnróid (IO 2012 L 343, lch. 32 agus ceartúchán IO 2020 L 351, lch. 64), arna leasú le Treoir (AE) 2016/2370 ó Pharlaimint na hEorpa agus ón gComhairle an 14 Nollaig 2016 (IO 2016 L 352, lch. 1) (‘Treoir 2012/34’), arna léamh i gcomhar le hIarscríbhinn IV a ghabhann leis an Treoir sin, le hAirteagal 31(3) agus Airteagal 32 den Treoir sin agus le hAirteagal 2(1) de Rialachán Cur Chun Feidhme (AE) 2015/909 ón gCoimisiún an 12 Meitheamh 2015 maidir leis na módúlachtaí chun costas a ríomh a tabhaíodh go díreach de thoradh an tseirbhís traenach a oibriú (IO 2015 L 148, lch. 17).
2 Rinneadh an iarraidh seo in imeachtaí idir ÖBB-Infrastruktur AG (‘ÖBB-Infra’), príomhbhainisteoir bonneagair iarnróid na hOstaire, agus WESTbahn Management GmbH (‘WESTbahn’), gnóthas iarnróid, agus Schienen‑Control Kommission (an Coimisiún um Rialú Iarnróid, an Ostair) (‘SCK’) maidir le méaduithe ar tháillí bonneagair a údarú.
An dlí lena mbaineann
Dlí an Aontais Eorpaigh
Treoir 2012/34
3 Foráiltear le haithrisí 34, 43 agus 70 de Threoir 2012/34:
‘(34) Chun trédhearcacht agus rochtain neamh-idirdhealaitheach ar bhonneagar iarnróid, agus ar sheirbhísí i saoráidí seirbhíse a áirithiú do gach gnóthas iarnróid, ba cheart an fhaisnéis go léir is gá chun cearta rochtana a úsáid a fhoilsiú i ráiteas gréasáin. Ba cheart an ráiteas gréasáin sin a fhoilsiú in dhá theanga oifigiúla de chuid an Aontais [Eorpaigh] ar a laghad , i gcomhréir leis an gcleachtas idirnáisiúnta atá ann cheana.
[...]
(43) Laistigh den chreat arna shainmhíniú ag na Ballstáit, ba cheart do chórais um tháillí a ghearradh agus córais leithdháilte toillte dreasacht a chur ar fáil do bhainisteoirí bonneagair iarnróid chun an úsáid is fearr is féidir a bhaint as a mbonneagar.
[...]
(70) Déanann leibhéal foriomlán an ghnóthaithe costas trí tháillí bonneagair difear don leibhéal ranníocaíochta rialtais is gá. Féadfaidh na Ballstáit leibhéil éagsúla de ghnóthú foriomlán costas a éileamh. Mar sin féin, le haon chóras um tháillí bonneagair, ba cheart trácht a cheadú atá in ann íoc as an gcostas breise a fhorchuireann sé chun an gréasán iarnróid a úsáid ar a laghad.’
[Aistriúchán neamhoifigiúil]
4 Foráiltear le hAirteagal 3 den Treoir sin, dar teideal ‘Sainmhínithe’:
‘Chun críocha na Treorach seo, tá feidhm ag na sainmhínithe seo a leanas:
1) ciallaíonn “gnóthas iarnróid” aon ghnóthas príobháideach nó poiblí atá ceadúnaithe i gcomhréir leis an Treoir seo a sholáthraíonn seirbhísí iompair earraí agus/nó paisinéirí d’iarnród mar phríomhghníomhaíocht le ceanglas go n‑áirithíonn an gnóthas tarraingt; áirítear ann seo freisin gnóthais nach soláthraíonn ach tarraingt;
2) ciallaíonn “bainisteoir bonneagair” aon eintiteas nó gnóthas atá freagrach as bonneagar iarnróid ar ghréasán a oibriú, a chothabháil agus a athnuachan agus as páirt a ghlacadh i bhforbairt an bhonneagair sin, i gcomhréir leis na rialacha arna mbunú ag an mBallstát mar chuid dá beartas maidir le bonneagar a fhorbairt agus a mhaoiniú;
[...]
19) ciallaíonn “iarratasóir” aon ghnóthas iarnróid nó grúpa idirnáisiúnta de ghnóthais iarnróid nó daoine nó eintitis dlítheanacha eile, amhail údaráis inniúla faoi Rialachán (CE) Uimh. 1370/2007 [ó Pharlaimint agus ón gComhairle an 23 Deireadh Fómhair 2007 maidir le seirbhísí poiblí iompair do phaisinéirí d’iarnród agus de bhóthar agus lena n‑aisghairtear Rialachán (CEE) Uimh. 1191/69 agus Rialachán (CEE) Uimh. 1107/70 ón gComhairle (IO 2007 L 315, lch. 1)] agus seoladóirí, seoltóirí lasta agus oibreoirí iompair traschórais a bhfuil cúiseanna tráchtála nó seirbhíse poiblí aige chun toilleadh bonneagair a fháil;
[...]
26) ciallaíonn “ráiteas gréasáin” ráiteas ina mionsonraítear na rialacha ginearálta, na spriocanna ama, na nósanna imeachta agus na critéir maidir le córais um tháillí a ghearradh agus córais leithdháilte toillte, lena n‑áirítear gach faisnéis eile is gá chun iarratais ar thoilleadh bonneagair a thionscnamh;
[...]’
[Aistriúchán neamhoifigiúil]
5 Foráiltear le hAirteagal 4 den Treoir sin, dar teideal ‘Neamhspleáchas gnóthas iarnróid agus bainisteoirí bonneagair’:
‘1. Áiritheoidh na Ballstáit, maidir le bainistiú, riarachán agus rialú inmheánach ar ábhair riaracháin, eacnamaíoch agus chuntasaíochta, go bhfuil stádas neamhspleách ag gnóthais iarnróid a bhfuil faoi úinéireacht dhíreach nó indíreach Ballstát nó faoi smacht Ballstát agus i gcomhréir leis an stádas sin beidh sócmhainní, buiséid agus cuntais ar leith ó iad siúd den Stát i seilbh acu.
2. Agus an creat gearrtha agus leithdháilte agus na rialacha sonracha arna mbunú ag na Ballstáit á n‑urramú, beidh an bainisteoir bonneagair freagrach as a bhainistiú, riarachán agus rialú inmheánach féin. ’
[Aistriúchán neamhoifigiúil]
6 Is mar seo a leanas atá an fhoclaíocht sa chéad fhomhír d’Airteagal 8(4) den Treoir chéanna, dar teideal ‘Maoiniú an bhainisteora bonneagair’:
‘Áiritheoidh na Ballstáit, faoi ghnáthchoinníollacha gnó agus thar thréimhse réasúnta nach faide ná tréimhse 5 bliana, go ndéanfaidh cuntas brabúis agus caillteanais bainisteora bonneagair comhardú ar a laghad ar ioncam ó tháillí bonneagair, barrachais ó ghníomhaíochtaí tráchtála eile, ioncaim neamh-inaisíoctha ó fhoinsí príobháideacha agus cistiú Stáit, ar thaobh amháin, lena n‑áirítear réamhíocaíochtaí ón Stát, i gcás inarb iomchuí, agus caiteachas bonneagair, ar an taobh eile.’
[Aistriúchán neamhoifigiúil]
7 Foráiltear le hAirteagal 27(2) agus (4) de Threoir 2012/34, dar teideal ‘Ráiteas gréasáin’:
‘2. Leagfar amach sa ráiteas gréasáin cineál an bhonneagair atá ar fáil do ghnóthais iarnróid, agus beidh faisnéis ann lena leagtar amach na coinníollacha chun rochtain a fháil ar an mbonneagar iarnróid ábhartha. Beidh faisnéis sa ráiteas gréasáin freisin lena leagtar amach na coinníollacha chun rochtain a fháil ar shaoráidí seirbhíse atá ceangailte le gréasán an bhainisteora bonneagair agus ar sholáthar seirbhísí sna saoráidí sin nó cuirfidh sé suíomh gréasáin in iúl ina gcuirtear faisnéis amhail ar fáil saor in aisce i bhformáid leictreonach. Leagtar síos ábhar an ráitis gréasáin in Iarscríbhinn IV.
[...]
4. Foilseofar an ráiteas gréasáin ar a laghad 4 mhí roimh an spriocdháta le haghaidh iarrataí ar toilleadh bonneagair.’
[Aistriúchán neamhoifigiúil]
8 Foráiltear in Airteagal 29(1) den Treoir sin, dar teideal ‘Táillí a bhunú agus a bhailiú’:
‘Bunóidh na Ballstáit creat gearrtha agus an neamhspleáchas bainisteoireachta arna leagan síos in Airteagal 4 á urramú.
Faoi réir an choinníll sin, bunóidh na Ballstáit freisin rialacha sonracha gearrtha nó tiomnóidh siad cumhachtaí amhail don bhainisteoir bonneagair.
Cinnteoidh na Ballstáit go bhfuil an creat gearrtha agus rialacha gearrtha nó suíomh gréasáin ar a bhfoilsítear an creat gearrtha agus na rialacha gearrtha sa ráiteas gréasáin.
Cinnfidh agus baileoidh an bainisteoir bonneagair an táille ar úsáid bonneagair i gcomhréir leis an gcreat gearrtha bunaithe agus leis na rialacha gearrtha.
[...]’
[Aistriúchán neamhoifigiúil]
9 Foráiltear le hAirteagal 31(3) den Treoir sin, dar teideal ‘Prionsabail maidir le táillí’:
‘Gan dochar do mhír 4 nó 5 den Airteagal seo nó d’Airteagal 32, socrófar na táillí don phacáiste íosrochtana agus do rochtain ar bhonneagar lena nasctar saoráidí seirbhíse ag an gcostas a thabhaítear go díreach mar thoradh ar an tseirbhís traenach a oibriú.
Roimh an 16 Meitheamh 2015, glacfaidh an Coimisiún [Eorpach] bearta lena leagtar amach na módúlachtaí chun an costas a thabhaítear go díreach mar thoradh ar an traein a oibriú a ríomh. Glacfar na gníomhartha cur chun feidhme sin i gcomhréir leis an nós imeachta scrúdúcháin dá dtagraítear in Airteagal 62(3).
Féadfaidh an bainisteoir bonneagair a chinneadh dul in oiriúint do na módúlachtaí sin diaidh ar ndiaidh le linn tréimhse nach faide ná 4 bliana i ndiaidh theacht i bhfeidhm na ngníomhartha cur chun feidhme sin. ’
[Aistriúchán neamhoifigiúil]
10 Is mar seo a leanas atá an fhoclaíocht in Airteagal 32(1) agus (6) den Treoir chéanna, dar teideal ‘Eisceachtaí ó phrionsabail maidir le táillí’:
‘1. D’fhonn aisghabháil iomlán na gcostas arna dtabhú ag an mbainisteoir bonneagair a fháil féadfaidh Ballstát, más féidir leis an margadh an méid seo a sheasamh, méaduithe margaidh a ghearradh ar bhonn prionsabal éifeachtúlachta, trédhearcach agus neamh-idirdhealaitheach, agus iomaíochas optamach deighleoga margaidh iarnróid á ráthú. Urramóidh an córas gearrtha na méaduithe ó thaobh táirgiúlachta de a bhainfidh gnóthais iarnróid amach.
Ní choiscfidh leibhéal na dtáillí, áfach, úsáid an bhonneagair ag deighleoga margaidh ar féidir leo ar a laghad an costas a thabhaítear go díreach mar thoradh ar an tseirbhís iarnróid a oibriú a íoc, móide ráta fillte ar féidir leis an margadh a sheasamh.
Roimh ghearradh méaduithe margaidh amhail a fhormheas, cinnteoidh na Ballstáit go ndéanfaidh na bainisteoirí bonneagair a n‑ábharthacht do dheighleoga margaidh sonracha a mheas, agus na péirí a liostaítear i bpointe 1 d’Iarscríbhinn VI á meas ar a laghad agus na cinn ábhartha a choimeád. Beidh sa liosta de dheighleoga margaidh arna sainiú ag bainisteoirí bonneagair ar a laghad an trí dheighleog seo a leanas: seirbhísí lastais, seirbhísí paisinéirí laistigh de chreat conartha seirbhíse poiblí agus seirbhísí paisinéirí eile.
Féadfaidh bainisteoirí bonneagair idirdhealú a dhéanamh thairis sin idir deighleoga margaidh de réir an tráchtearra nó na bpaisinéirí a iompraítear.
Saineofar freisin deighleoga margaidh nach bhfuil gnóthais iarnróid ag oibriú iontu faoi láthair ach a bhféadfadh seirbhísí a sholáthar le linn tréimhse bhailíochta an chórais gearrtha. Ní áireoidh an bainisteoir bonneagair méadú margaidh sa chóras gearrtha do na deighleoga margaidh sin.
Foilseofar an liosta de dheighleoga margaidh sa ráiteas gréasáin agus déanfar athbhreithniú air ar a laghad gach 5 bliana. Beidh smacht ag an gcomhlacht rialála dá dtagraítear in Airteagal 55 ar an liosta sin i gcomhréir le hAirteagal 56.
[...]
6. Má tá sé ar intinn ag bainisteoir bonneagair na buntréithe den chóras gearrtha dá dtagraítear i mír 1 den Airteagal seo a athrú, déanfaidh sé poiblí iad ar a laghad 3 mhí roimh an spriocdháta d’fhoilsiú an ráitis gréasáin de réir Airteagal 27(4).’
[Aistriúchán neamhoifigiúil]
11 Foráiltear le hAirteagal 56(1), (2), (6), (9) agus (10) de Threoir 2012/34, dar teideal ‘Cúraimí an chomhlachta rialála’:
‘1. Gan dochar d’Airteagal 46(6), féadfaidh an t‑iarratasóir achomharc a dhéanamh os comhair an chomhlachta rialála, trí chaingean a thionscnamh i gcoinne na gcinntí arna nglacadh ag an mbainisteoir bonneagair go háirithe, má mheasann sé nó sí gur chaith an gnóthas iarnróid nó, de réir mar a bheidh, an t‑oibreoir saoráide seirbhíse i gceist leis nó léi go míchothrom, go ndearna sé idirdhealú ina leith, nó go ndearna sé aon dochar eile do:
(a) an ráiteas gréasáin ina leaganacha sealadacha agus deireanacha;
(b) na critéir a leagtar amach ann;
(c) an próiseas leithdháilte agus a thorthaí;
(d) an córas gearrtha;
(e) leibhéal nó struchtúr na dtáillí ar úsáid bonneagair a cheanglaítear air a íoc nó a d’fhéadfaí a íoc;
(f) na forálacha maidir le rochtain i gcomhréir le hAirteagail 10 go 13;
(g) rochtain ar sheirbhísí agus táillí a ghearradh orthu i gcomhréir le hAirteagal 13;
(h) trácht a bhainistiú;
(i) pleanáil athnuachana agus cothabháil sceidealta nó neamhsceidealta;
(j) na ceanglais a leagtar amach in Airteagal 2(13) agus in Airteagail 7, 7a, 7b, 7c agus 7d, lena n‑áirítear iad siúd a bhaineann le coimhlint leasa, a chomhlíonadh.
2. Gan dochar do chumhachtaí na n‑údarás iomaíochta náisiúnta chun iomaíocht i margadh na seirbhísí iarnróid a áirithiú, beidh sé de chumhacht ag an gcomhlacht rialála faireachán a dhéanamh ar staid na hiomaíochta i margaí na seirbhísí iarnróid, lena n‑áirítear go háirithe i margadh na seirbhísí iompair ardluais do phaisinéirí, agus ar gníomhaíochtaí na mbainisteoirí bonneagair dá dtagraítear i mír 1(a) go (j). Fíoróidh an comhlacht rialála, go háirithe, go gcomhlíontar mír 1(a) go (j) ar a thionscnamh féin d’fhonn aon idirdhealú in aghaidh iarratasóirí a chosc. Fíoróidh sé, go háirithe, an bhfuil clásail idirdhealaitheacha sa ráiteas gréasáin nó an gcruthaíonn sé cumhachtaí lánroghnacha don bhainisteoir bonneagair a d’fhéadfaí a úsáid chun idirdhealú a dhéanamh i gcoinne iarratasóirí.
[...]
6. Áiritheoidh an comhlacht rialála go bhfuil na táillí arna socrú ag an mbainisteoir bonneagair i gcomhréir le Roinn 2 de Chaibidil IV agus go bhfuil siad neamh-idirdhealaitheach. Ní cheadófar idirbheartaíocht idir iarratasóirí agus bainisteoir bonneagair maidir le leibhéal na dtáillí bonneagair ach amháin má dhéantar iad faoi choimirce an chomhlachta rialála. Déanfaidh an comhlacht rialála idirghabháil láithreach bonn más dócha go sárófar forálacha na Caibidle seo leis an idirbheartaíocht.
[...]
9. Déanfaidh an comhlacht rialála gach gearán a scrúdú agus, de réir mar is iomchuí, iarrfaidh sé an fhaisnéis ábhartha agus tionscnóidh sé comhairliúcháin leis na páirtithe ábhartha go léir, laistigh de mhí amháin ón ngearán a fháil. Déanfaidh sé cinneadh maidir leis na gearáin go léir agus glacfaidh sé na bearta go léir is gá chun an cás a leigheas agus cuirfidh sé a chinneadh réasúnaithe in iúl do na páirtithe lena mbaineann laistigh de thréimhse ama réasúnta réamhchinntithe agus, in aon chás, laistigh de 6 seachtaine ón bhfaisnéis ábhartha go léir a fháil. Gan dochar do chumhachtaí na n‑údarás iomaíochta náisiúnta iomaíocht a áirithiú sa mhargadh do sheirbhísí iarnróid, déanfaidh an comhlacht athbhreithnithe, na bearta iomchuí a ghlacadh ar a thionscnamh féin, i gcás inarb iomchuí, chun aon idirdhealú i gcoinne iarratasóirí, saobhadh margaidh agus forbairtí neamh-inmhianaithe eile sna margaí sin a chur ina gceart, go háirithe ag féachaint do mhír 1(a) go (j).
Beidh cinneadh an chomhlachta rialála ina cheangal ar na páirtithe go léir a chumhdaítear leis an gcinneadh sin, agus ní bheidh sé faoi réir aon athbhreithniú ag comhlacht riaracháin eile. Féadfaidh an comhlacht rialála pionóis iomchuí a fhorchur, lena n‑áirítear fíneálacha, chun na hiarrataí sin a fhorfheidhmiú.
I gcás ina dtaiscfear caingean in aghaidh diúltú toilleadh bonneagair a dheonú nó i gcoinne téarmaí togra maidir le toilleadh, deimhneoidh an comhlacht rialála nach gá an cinneadh a rinne an bainisteoir bonneagair a leasú nó éileoidh sé go leasófar an cinneadh atá faoi chonspóid i gcomhréir leis na treoirlínte arna leagan síos ag an gcomhlacht rialála.
10. Áiritheoidh na Ballstáit go mbeidh na cinntí a dhéanfaidh an comhlacht rialála faoi réir athbhreithniú breithiúnach. Ní fhéadfaidh éifeacht fionraíochta a bheith ag an athbhreithniú sin ar chinneadh an chomhlachta rialála ach amháin i gcás ina bhféadfaí damáistí do-leigheasta nó damáistí ar léir go bhfuil siad iomarcach a dhéanamh don achomharcóir mar thoradh láithreach ar chinneadh an chomhlachta rialála. Tá an fhoráil seo gan dochar don dlínse a dheonaítear leis an dlí bunreachtúil, i gcás inarb infheidhme, don chúirt a thugtar an cás os a comhair.’
[Aistriúchán neamhoifigiúil]
12 Leagtar amach in Iarscríbhinn IV a ghabhann le Treoir 2012/34 an fhaisnéis atá sa ráiteas gréasáin dá dtagraítear in Airteagal 27 den Treoir sin.
Rialachán Cur Chun Feidhme 2015/909
13 Foráiltear in Airteagal 2 de Rialachán Cur Chun Feidhme 2015/909, dar teideal ‘Sainmhínithe’:
‘Chun críocha an Rialacháin seo, tá feidhm ag na sainmhínithe seo a leanas:
(1) ciallaíonn “costas díreach” an costas arna tabhú go díreach mar thoradh ar an tseirbhís traenach a oibriú;
(2) ciallaíonn “costas díreach aonaid” an costas díreach in aghaidh an chiliméadair traenach, an chiliméadair feithicle, an chiliméadair torainn‑tona traenach, nó teaglaim díobh sin;
[...]’
[Aistriúchán neamhoifigiúil]
14 Leagtar síos in Airteagail 3 agus 4 den Rialachán Cur Chun Feidhme sin, chun críocha costais dhíreacha a ríomh, ‘Costais dhíreacha ar fud an ghréasáin’ agus ‘costais neamh-incháilithe’ faoi seach.
15 Foráiltear le hAirteagal 3(1) den Rialachán Cur Chun Feidhme sin:
‘Ríomhfar costais dhíreacha ar leibhéal an ghréasáin mar an difríocht idir, ar thaobh amháin, na costais a bhaineann le soláthar na seirbhísí a chumhdaítear leis an bpacáiste íosrochtana agus rochtain ar bhonneagar lena nasctar saoráidí seirbhíse agus, ar an taobh eile, na costais neamh-incháilithe dá dtagraítear in Airteagal 4.’
Dlí na hOstaire
16 Foráiltear le hAirteagal 67d(1) agus (6) den Bundesgesetz über Eisenbahnen, Schienenfahrzeuge auf Eisenbahnen und den Verkehr auf Eisenbahnen (Eisenbahngesetz) (Dlí na Cónaidhme maidir le hiarnróid, rothstoc agus trácht iarnróid) an 7 Márta 1957 (BGBl., 60/1957), sa leagan a foilsíodh an 27 Samhain 2015 (BGBl. I, 137/2015):
‘1. I gcás nach leor táillí bonneagair agus ioncaim eile ó bhainistiú an bhonneagair iarnróid chun na costais iomlána a chumhdach, féadfar méaduithe margaidh breise a shocrú ar bhonn prionsabail éifeachtúla, thrédhearcacha agus neamh-idirdhealaitheacha, agus iomaíochas optamach dheighleoga an mhargaidh iarnróid á áirithiú ag an am céanna. Mar sin féin, ní gá go gcuirfear leibhéal na dtáillí cosc ar úsáid an bhonneagair ag deighleoga margaidh ar féidir leo ar a laghad an costas a thabhaítear go díreach mar thoradh ar an tseirbhís iarnróid a oibriú a íoc, móide ráta fillte i gcomhréir leis an margadh.
[...]
6. Beidh socrú méaduithe margaidh breise faoi réir údarú ó [SCK], a thabharfaidh a thoiliú má chomhlíontar na coinníollacha a leagtar síos i mír 1. [...]’
17 Foráiltear le hAirteagal 42(1) den Bundesgesetz zur Neuordnung der Rechtsverhältnisse der Österreichischen Bundesbahnen (Bundesbahngesetz) (Dlí na Cónaidhme maidir le caidrimh dhlíthiúla iarnród chónaidhmeacha na hOstaire) an 29 Nollaig 1992 (BGBl. I, 825/1992), sa leagan a foilsíodh an 19 Lúnasa 2009 (BGBl. I, 95/2009):
‘Iompróidh [ÖBB-Infra] an costas a bhaineann lena chúram a chur i gcrích. Tar éis iarrata ó [ÖBB-Infra], íocfaidh an Stát Cónaidhme fóirdheontas leis, go háirithe chun an bonneagar iarnróid a oibriú agus an bonneagar sin a sholáthar d’úsáideoirí mura gcumhdaíonn agus fad nach gcumhdaíonn an t‑ioncam is féidir a fháil ó úsáideoirí an bhonneagair iarnróid faoi choinníollacha an mhargaidh lena mbaineann caiteachas arna thabhú i gcomhthéacs na bainistíochta barainneacha agus éifeachtúla. ’
An díospóid sna príomhimeachtaí agus na ceisteanna a tharchuirtear i gcomhair réamhrialú
18 Is é ÖBB-Infra an príomhbhainisteoir bonneagair iarnróid san Ostair. Déanfaidh sé na táillí ar úsáid an bhonneagair sin a chinneadh agus a bhailiú agus foilseoidh sé an fhaisnéis ábhartha sa ráiteas gréasáin. Is éard a bheidh sna táillí sin, inter alia, táillí ar chostais dhíreacha úsáid an bhonneagair agus méaduithe margaidh a ghearrtar ar na táillí sin. Ní mór méaduithe den sórt sin, faoi Airteagal 67d den Dlí Cónaidhme maidir le hiarnród, rothstoc iarnróid agus trácht iarnróid, sa leagan a foilsíodh an 27 Samhain 2015, a chur faoi bhráid SCK lena n‑údarú.
19 An 12 Lúnasa 2016, d’iarr ÖBB-Infra ar SCK údarú a thabhairt dó na táillí bonneagair a mhéadú do thréimhse bhailíochta oibre 2018, eadhon an tréimhse ón 10 Nollaig 2017 go dtí an 8 Nollaig 2018. Ba é sin an chéad iarraidh ó ÖBB-Infra.
20 Le cinneadh an 12 Nollaig 2016, d’údaraigh SCK na méaduithe margaidh sin. Thug WESTbahn caingean i gcoinne an chinnidh sin os comhair an Bundesverwaltungsgericht (an Chúirt Chónaidhme Riaracháin, an Ostair), an chúirt a rinne an tarchur. Le breithiúnas an 5 Iúil 2017, chuir an chúirt sin an cinneadh sin ar neamhní agus tharchuir sí an cás ar ais chuig SCK le haghaidh cinneadh nua.
21 An 18 Lúnasa 2017, d’iarr ÖBB-Infra ar SCK údarú a thabhairt dó na táillí bonneagair a mhéadú do thréimhse bhailíochta oibre 2019, eadhon an tréimhse ón 9 Nollaig 2018 go dtí an 7 Nollaig 2019. Chuir SCK an iarraidh sin, dá ngairtear SCK-17-009, i gceangal le himeachtaí SCK-16-012 maidir le húdarú méaduithe do thréimhse bhailíochta oibre 2018.
22 Thionscain SCK imeachtaí freisin, leis an tagairt SCK-18-010, chun costais dhíreacha ÖBB-Infra a rialú agus chuir sé iad i gceangal freisin le himeachtaí SCK-16-012 agus SCK-17-009.
23 I ráiteas gréasáin 2018, le haghaidh gach deighleog den mhargadh, níor léiríodh ach an táille iomlán a bhí le híoc in aghaidh an chiliméadair thraenaigh a taistealaíodh. Os a choinne sin, i ráiteas gréasáin 2019, liostaíodh na táillí le haghaidh costais dhíreacha agus méaduithe margaidh le haghaidh gach ciliméadair thraenaigh a taistealaíodh le haghaidh gach deighleog den mhargadh ar leithligh agus liostaíodh an táille iomlán a bhí le híoc in aghaidh an chiliméadair thraenaigh, a fuarthas trí tháillí agus méaduithe a chur leis.
24 Maidir leis na méaduithe margaidh, rinneadh tagairt sna ráitis gréasáin do 2018 agus 2019 don fhíoras go raibh a nós imeachta um údarú fós ar siúl. I ráiteas gréasáin 2019, luadh freisin, mura ndéanfaí an cinneadh críochnaitheach lena bhfoirceanntar an nós imeachta sin go dtí tús thréimhse bhailíochta an tráthchláir oibre, go ndéanfaí na táillí a thoibhítear, faoi seach, a aisíoc nó a aisghabháil le méid atá ró-ard nó ró-íseal, i gcás inarb iomchuí.
25 An 24 Meitheamh 2019, d’iarr ÖBB-Infra ar leasuithe maidir lena iarratais ar na méaduithe le haghaidh na mblianta 2018 agus 2019 ar an bhforas, dá socródh SCK, i gcomhthéacs nós imeachta SCK-18-010, na costais dhíreacha ar leibhéal níos ísle ná an leibhéal a bhí beartaithe ag SCK é féin, go gcaithfí na méaduithe sin a shocrú ar leibhéal níos airde chun an sprioc ioncaim a leagtar síos leis an Verkehrsministerium (an Aireacht Iompair, an Ostair) a bhaint amach.
26 Sa chomhthéacs sin, tugann an chúirt a rinne an tarchur faoi deara go bhfuair ÖBB-Infra fóirdheontais Stáit le haghaidh 2018 agus 2019, agus go gcuireann an Aireacht Iompair ÖBB-Infra ar an eolas, le haghaidh gach tréimhse den tráthchlár oibre, faoi mhéid iomlán na táillí nach mór do ÖBB-Infra a ghiniúint ó na táillí bonneagair, móide méaduithe margaidh. Bunaíonn SCK a ríomh ar na méaduithe margaidh ar an sprioc ioncaim sin.
27 Is le cinneadh an 17 Nollaig 2020 amháin a shocraigh SCK, le haghaidh thréimhsí uaireanta oibre 2018 agus 2019, na táillí ar chostais dhíreacha agus méaduithe margaidh agus an táille iomlán a bhí le híoc in aghaidh an chiliméadair thraenaigh a thaistealaítear.
28 Thug ÖBB-Infra agus WESTbahn caingne i gcoinne an chinnidh sin os comhair na cúirte a rinne an tarchur. Cuireann ÖBB-Infra i gcoinne an chinnidh sin, ag iarraidh, go bunúsach, méaduithe margaidh níos airde ná iad siúd a foilsíodh i ráitis gréasáin 2018 agus 2019.
29 Sa chomhthéacs sin, fiafraíonn an chúirt a rinne an tarchur, ar an gcéad dul síos, an féidir na méaduithe ar tháillí a fhormheas tar éis dhul in éag thréimhse bhailíochta an tráthchláir oibre lena mbaineann. Ar an dara dul síos, tá amhras uirthi faoin ord nach mór na méaduithe sin a fhoilsiú sa ráiteas gréasáin agus faoi fhormheas na méaduithe sin agus, ar an tríú dul síos, maidir le méid an fhoilsithe is gá. Ar an gceathrú dul síos, féachann sí lena fháil amach an bhfuil an Ballstát faoi cheangal ag méid na méaduithe ar na táillí atá faoi réir a fhormheasta. Ar an gcúigiú dul síos, is mian léi soiléiriú a dhéanamh ar an tionchar a d’fhéadfadh a bheith ag ‘sprioc ioncaim’ arna leagan síos ag an mBallstát ar ríomh na méaduithe sin.
30 Sna himthosca sin, chinn an Bundesverwaltungsgericht (an Chúirt Chónaidhme Riaracháin) bac a chur ar na himeachtaí agus na ceisteanna seo a leanas a tharchur chuig an gCúirt Bhreithiúnais i gcomhair réamhrialú:
‘(1) An gcaithfear dlí an Aontais, agus Airteagal 32 de Threoir 2012/34 go sonrach, a léiriú sa chaoi go bhfuil formheas ón mBallstát le tabhairt ex ante, roimh thús (nó roimh dhul in éag ar a laghad) thréimhse bhailíochta an tráthchláir oibre, dár iarradh na méaduithe margaidh? Nó an féidir leis an mBallstát méaduithe margaidh a fhormheas ex post freisin tar éis dhul in éag thréimhse bhailíochta an tráthchláir oibre (a d’fhéadfadh a bheith blianta níos déanaí)? An gcaithfear formheas ar mhéaduithe margaidh arna thabhairt ag an mBallstát i gcomhréir le hAirteagal 32 de Threoir 2012/34 a thuiscint mar chinneadh críochnaitheach?
(2) An gcaithfear dlí an Aontais, agus Airteagal 32(1) agus (6) de Threoir 2012/34 go sonrach, arna léamh i gcomhar le hAirteagal 27(4) di, a léiriú sa chaoi go gcaithfear - in ord croineolaíoch - na méaduithe margaidh (má athraítear na buntréithe) a fhoilsiú sa ráiteas gréasáin ar dtús (faoi réir údarú, más iomchuí) agus go bhfuil siad le húdarú ag an mBallstát i ndiadh a bhfoilsithe? An ndéantar athrú ar na buntréithe, de réir Airteagal 32(6) de Threoir 2012/34, i gcás nach n‑athraítear “ach” leibhéal na méaduithe margaidh i dtaca le tréimhse bhailíochta an tráthchláir oibre ón mbliain roimhe sin?
(3) (Más freagra dearfach a thabharfar ar an [dara] ceist): An gcaithfear dlí an Aontais, go háirithe Airteagal 32(1) agus (6) de Threoir 2012/34/AE, arna léamh i gcomhar le hAirteagal 27(2) agus (4) di agus i gcomhar le hIarscríbhinn II, pointe 2 de Threoir 2012/34/AE – arna léamh i bhfianaise an riachtanais trédhearcachta agus slándála pleanála a leagtar amach in aithris 34 den Treoir sin – a léiriú sa chaoi nach féidir leis an mBallstát méaduithe margaidh a fhormheas, i gcás nár foilsíodh leibhéil na méaduithe féin sa ráiteas gréasáin do thréimhse bhailíochta an tráthchláir oibre lena mbaineann (dár iarradh formheas ar na méaduithe margaidh), ach seachas sin, nár foilsíodh sa ráiteas gréasáin, ach táille iomlán in aghaidh an chiliméadair iarnróid (mar shuim na dtáillí le haghaidh costais arna dtabhú go díreach mar thoradh ar an tseirbhís traenach a oibriú i gcomhréir le hAirteagal 31(3) de Threoir 2012/34/AE agus na méaduithe margaidh i gcomhréir le hAirteagal 32 de Threoir 2012/34/AE) le haghaidh gach deighleoige margaidh?
Dá bhrí sin, ní fhéadfadh gnóthais iarnróid na táillí le haghaidh “costais dhíreacha” (de réir bhrí Airteagal 31(3) de Threoir 2012/34/AE, arna léamh i gcomhair le pointe 1 d’Airteagal 2 de Rialachán Cur Chun Feidhme 2015/909) ná na méaduithe margaidh i gcomhréir le hAirteagal 32 de Threoir 2012/34/AE in aghaidh na deighleoige margaidh, a fhíorú.
(4) (Más freagra dearfach a thabharfar ar an [dara] ceist): An gcaithfear dlí an Aontais, agus Airteagal 32(1) agus (6) de Threoir 2012/34/AE go sonrach, arna léamh i gcomhar le hAirteagal 27(4) den Treoir sin – a léiriú sa chaoi go bhfuil éifeacht cheangailteach ag na méaduithe margaidh arna bhfoilsiú sa ráiteas gréasáin do thréimhse bhailíochta an tráthchláir oibre ábhartha ar fhormheas arna thabhairt ag an mBallstát? An leanann sé ón éifeacht cheangailteach nach bhféadfaidh an Ballstát méaduithe margaidh in aghaidh na deighleoige margaidh atá níos airde ná iad siúd a fhoilsítear sa ráiteas gréasáin lena mbaineann? Nó an amhlaidh nach bhfuil éifeacht cheangailteach ann ach a mhéid nach bhféadfaidh na táillí iomlána arna bhformheas (dá réir sin, táillí le haghaidh “costais dhíreacha” i gcomhréir le hAirteagal 31(3) de Threoir 2012/34/AE i gcomhar le pointe 1 d’Airteagal 2 de Rialachán Cur Chun Feidhme 2015/909 agus méaduithe margaidh i gcomhréir le hAirteagal 32 de Threoir 2012/34/AE) a bheith níos airde ná iad siúd a fhoilsítear sa ráiteas gréasáin, ach gur féidir na méaduithe margaidh féin a fhormheas ar leibhéal atá níos airde ná an leibhéal a fhoilsítear sa ráiteas gréasáin? An bhfuil éifeacht cheangailteach i gceist freisin i dtaca le leibhéal an iarratais ar fhormheas a cuireadh isteach chuig an mBallstát i dtaca leis na méaduithe margaidh? Más amhlaidh, cén treo atá i gceist (ní cheadaítear méadú, ní cheadaítear tuilleadh laghdaithe)? An bhfuil aon chineál eile d’éifeacht cheangailteach ann?
(5) An gcaithfear dlí an Aontais, agus Airteagal 32(1) de Threoir 2012/34/AE go sonrach, a léiriú sa chaoi, chun críocha a chinneadh an bhfuil méaduithe margaidh incheadaithe i bprionsabal (seachas inmharthanacht margaidh atá le deimhniú) – dá réir sin, chun críocha aisghabháil iomlán chostais bhainisteoir an bhonneagair – nach gá a ghlacadh mar bhunús an t‑ioncam iomlán a chaithfidh an Ballstát a fháil ón mbainisteoir bonneagair iarnróid (“an sprioc-ioncaim”), arb é suim na dtáillí le haghaidh na gcostas arna dtabhú go díreach mar thoradh ar an tseirbhís traenach a oibriú i gcomhréir le hAirteagal 31(3) de Threoir 2012/34/AE agus na méaduithe margaidh i gcomhréir le hAirteagal 32(1) de Threoir 2012/34/AE? Seachas sin, an gcaithfear na costais, chun aisghabháil iomlán a fháil, a chinneadh agus a bhunú sa chaoi gur féidir a chinneadh ar an mbonn sin cé acu an féidir aon mhéadú margaidh a fhormheas, agus a mhéid is féidir sin? Agus cinneadh á dhéanamh an bhfuil méadú margaigh incheadaithe i bprionsabal (seachas inmharthanacht margaidh atá le deimhniú) an gcaithfear fóirdheontais Stáit ón mBallstát don ghnóthas bonneagair iarnróid a chur san áireamh freisin? Más gá, conas ba chóir é sin a dhéanamh? An gcaithfear na fóirdheontais Stáit, más iomchuí, a dhealú ó na costais riachtanacha d’aisghabháil iomlán (de bhreis ar na táillí le haghaidh costais arna dtabhú go díreach mar gheall ar an tseirbhís traenach a oibriú)? Sa chomhthéacs sin, an gcaithfear dlí an Aontais, go háirithe Airteagal 32(1) de Threoir 2012/34/AE, arna léamh i gcomhar le hAirteagal 8(4) di, a léiriú sa chaoi, i dteannta na dtáillí le haghaidh costais arna dtabhú go díreach mar thoradh ar an tseirbhís traenach a oibriú agus aon fhóirdheontais Stáit atá le cur san áireamh, go gcaithfidh an Ballstát gach brabús eile den ghnóthas bonneagair iarnróid in earnálacha eile den gheilleagar agus an t‑ioncam neamh-inaisíoctha go léir a fuair an gnóthas sin ó fhoinsí príobháideacha a chinneadh – agus a áireamh sa mheasúnú i dtaobh an bhfuil méaduithe margaidh incheadaithe? Más amhlaidh, ar chóir iad a dhealú freisin ó na costais riachtanacha le haghaidh aisghabháil iomlán? An gcaithfear táillí eile arna ngearradh ag an ngnóthas bonneagair iarnróid – amhail táillí le haghaidh ardáin paisinéara a úsáid (“táillí stáisiúin”) agus táillí as úsáid trealaimh soláthair leictreachais le haghaidh sruth tarraingthe – chomh maith le ítimí eile buiséid an ghnóthais bonneagair iarnróid a áireamh sa mheasúnú sin? ’
Na ceisteanna le haghaidh réamhrialú
An chéad cheist
31 Lena céad cheist, fiafraíonn an chúirt a rinne an tarchur, go bunúsach, an gá Treoir 2012/34, go háirithe Airteagal 32 di, a léiriú sa chaoi nach gcuirtear cosc leis an Treoir sin ar Bhallstát formhuirir a ghearradh ar tháillí ar úsáid bonneagair iarnróid arna gcinneadh ag an mbainisteoir bonneagair faoi réir nós imeachta um údarú agus, más gá, an gá an cinneadh arna ghlacadh ag deireadh an nós imeachta sin a ghlacadh roimh thús thréimhse bhailíochta an amchláir oibre ar iarradh na méaduithe margaidh sin ina leith. Ba mhaith leis an gcúirt a rinne an tarchur a fháil amach freisin an gá a mheas go bhfuil cineál críochnaitheach ag an údarú sin.
32 I gcomhréir leis an gcéad fhomhír d’Airteagal 32(1) de Threoir 2012/34, d’fhonn aisghabháil iomlán na gcostas arna dtabhú ag an mbainisteoir bonneagair a fháil féadfaidh Ballstát, más féidir leis an margadh an méid seo a sheasamh, méaduithe margaidh a ghearradh ar bhonn prionsabail éifeachtúlachta, thrédhearcacha agus neamh-idirdhealaitheacha, agus iomaíochas optamach deighleoga margaidh iarnróid á ráthú. Foráiltear leis an tríú fomhír d’Airteagal 32(1), roimh ghearradh méaduithe margaidh amhail a fhormheas, go gcinnteoidh an Ballstát go ndéanfaidh an bainisteoir bonneagair a n‑ábharthacht do dheighleoga margaidh sonracha a mheas, agus na péirí a liostaítear i bpointe 1 d’Iarscríbhinn VI a ghabhann leis an Treoir sin á meas ar a laghad agus na cinn ábhartha a choimeád.
33 Tá na méaduithe margaidh sin sa bhreis ar na táillí ar úsáid bonneagair agus saoráidí seirbhíse, ar gné bhunúsach iad den chóras gearrtha ar bhonneagar iarnróid, mar a rialaítear le Roinn 2 de Chaibidil IV de Threoir 2012/34.
34 Mar chuid de Roinn 2, ceanglaítear leis an gcéad fhomhír d’Airteagal 29(1) de Threoir 2012/34 nach mór do na Ballstáit, ar mhaithe le feidhmiú cuí an chórais gearrtha bonneagair, ‘creat gearrtha’ a bhunú, agus neamhspleáchas bainistíochta an bhainisteora bonneagair iarnróid dá bhforáiltear in Airteagal 4 den Treoir sin á urramú ag an am céanna. Soiléirítear leis an gceathrú fomhír d’Airteagal 29(1) den Treoir sin go gcinnfidh agus baileoidh an bainisteoir bonneagair sin an táille ar úsáid bonneagair i gcomhréir leis an gcreat gearrtha bunaithe agus leis na rialacha gearrtha.
35 Dá bhrí sin, bunaítear le hAirteagal 29(1) de Threoir 2012/34 roinnt na gcumhachtaí idir na Ballstáit agus an bainisteoir bonneagair maidir le córais gearrtha. Is faoi na Ballstáit atá sé creat gearrtha a bhunú, cé gur faoin mbainisteoir bonneagair atá sé, i bprionsabal, an táille a chinneadh agus a bhailiú (breithiúnas an 9 Meán Fómhair 2021, LatRailNet agus Latvijas dzelzcede š, C‑144/20, EU:C:2021:717, mír 44 agus an cásdlí dá dtagraítear).
36 Ós rud é go bhfuil Airteagal 32 den Treoir sin mar chuid den roinn chéanna de Chaibidil IV de Threoir 2012/34 agus atá Airteagal 29 den Treoir sin, ní féidir é a úsáid ar shlí eile chun méaduithe margaidh a chinneadh, in ainneoin gur fhormheas an Ballstát tobhach na méaduithe sin sa tríú fomhír d’Airteagal 32(1) den Treoir sin, go háirithe ós rud é go bhfuil roinnt na gcumhachtaí a bhunaítear leis an bhforáil dheireanach sin ar aon dul le hAirteagal 4 den Treoir sin.
37 Mar sin féin, is léir ó fhoclaíocht Airteagal 56(1)(d) agus (e) de Threoir 2012/34 go bhfuil cinntí a rinne an bainisteoir bonneagair iarnróid maidir leis an gcóras gearrtha agus leibhéal nó struchtúr na táillí bonneagair faoi réir mhaoirseacht an chomhlachta rialála.
38 I ndáil leis sin, tá comhthuiscint ann, ar an gcéad dul síos, faoi Airteagal 56(1) agus (2) de Threoir 2012/34, go ngníomhóidh an comhlacht sin ar iarraidh ó iarratasóir, de réir bhrí Airteagal 3(19) den Treoir sin, nó ar a thionscnamh féin. Ina theannta sin, i gcomhréir le hAirteagal 56(6) den Treoir sin, áiritheoidh an comhlacht sin go gcomhlíonfaidh na táillí arna socrú ag an mbainisteoir bonneagair forálacha Chaibidil IV, Roinn 2, den Treoir chéanna agus go mbeidh siad neamh-idirdhealaitheach.
39 Ar an dara dul síos, i gcomhréir leis an dara fomhír d’Airteagal 56(9) agus Airteagal 56(10) de Threoir 2012/34, tá cinntí an chomhlachta rialála ceangailteach ar gach páirtí lena mbaineann, níl siad faoi réir athbhreithniú ag aon chomhlacht riaracháin eile agus is féidir athbhreithniú breithiúnach a dhéanamh orthu.
40 Ar an tríú dul síos, ní bhraitheann inniúlacht an chomhlachta rialála athbhreithniú a dhéanamh ar dhlíthiúlacht na dtáillí bonneagair ar an bhfíoras gur urghabhadh é roimh dhul in éag na dtréimhsí faoi seach ina gcuirtear na táillí sin i bhfeidhm nó ina dhiaidh sin. Ní hamháin nach féidir leis an gcomhlacht sin diúltú go bailí dá inniúlacht chun rialú a dhéanamh ar dhlíthiúlacht na dtáillí bonneagair a gearradh roimhe seo, ach, thairis sin, tugann inniúlacht den sórt sin le tuiscint go bhféadfadh an comhlacht sin a chinneadh, i gcás inarb iomchuí, go bhfuil na táillí sin neamhbhailí le héifeacht ex tunc (féach, chuige sin, breithiúnais an 27 Deireadh Fómhair 2022, DB Station & Service, C‑721/20, EU:C:2022:832, mír 87, agus an 7 Márta 2024, Die Länderbahn agus páirtithe eile, C‑582/22, EU:C:2024:213, míreanna 49 agus 55).
41 Leanann sé ón méid sin roimhe seo go bhfuil an córas gearrtha a bunaíodh le Treoir 2012/34 bunaithe ar an bprionsabal gur faoin mBallstát atá sé creat gearrtha a bhunú lena gcumhdaítear, go háirithe, na rialacha ginearálta gearrtha, gur faoin mbainisteoir bonneagair iarnróid atá sé an creat sin a chur chun feidhme trí na táillí ar úsáid an bhonneagair agus na saoráidí seirbhíse sin agus aon mhéaduithe margaidh ar na táillí sin a chinneadh agus a bhailiú, agus go bhfuil na cinntí a dhéanann an bainisteoir sin faoi réir athbhreithniú ag an gcomhlacht rialála, a dhéanann idirghabháil ex post agus a bhféadfadh éifeacht chúlghabhálach a bheith ag a chinntí.
42 Os a choinne sin, ní leagtar síos le Treoir 2012/34, agus go háirithe le Caibidil IV di, aon nós imeachta réamhúdaraithe maidir le táillí ar úsáid bonneagair agus saoráidí seirbhíse nó maidir le haon mhéadú orthu.
43 Go sonrach, is léir ó fhoclaíocht Airteagal 56 de Threoir 2012/34, agus ó fhoclaíocht Airteagal 30 de Threoir 2001/14/CE ó Pharlaimint na hEorpa agus ón gComhairle an 26 Feabhra 2001 maidir le toilleadh bonneagair iarnróid a leithdháileadh agus táillí ar úsáid bonneagair iarnróid agus deimhniú sábháilteachta a ghearradh (IO 2001 L 75, lch. 29), a tháinig roimhe, nach bhforáiltear le hAirteagal 56 do nós imeachta chun táillí bonneagair a réamhúdarú. Ní cheanglaítear le hAirteagal 56 ar bhainisteoirí bonneagair na táillí bonneagair atá beartaithe acu a thobhach ná na hathróga lenar féidir iad a ríomh a chur faoi bhráid an chomhlachta rialála lena n‑údarú. Os a choinne sin, ní fhoráiltear le hAirteagal 56 ach d’athbhreithniú ar na táillí a socraíodh cheana, rud is léir, go háirithe, ó mhír 1 agus ón gcéad abairt de mhír 6 den Airteagal sin. Is é an comhlacht rialála atá freagrach as an athbhreithniú sin a dhéanann cinneadh, ar achomharc nó as a stuaim féin (féach, chuige sin, breithiúnas an 24 Feabhra 2022, ORLEN KolTrans, C‑563/20, EU:C:2022:113, míreanna 43 agus 50).
44 Ós rud é, mar is léir ó na breithnithe roimhe seo, nach leagtar síos le Treoir 2012/34 nós imeachta maidir le réamhúdarú táille nó athróg bonneagair lena bhféadfar na táillí sin a chinneadh, ní féidir léi na rialacha mionsonraithe maidir le nós imeachta den sórt sin a chinneadh ach an oiread (féach, de réir analaí, breithiúnas an 24 Feabhra 2022, ORLEN KolTrans, C‑563/20, EU:C:2022:113, mír 54).
45 É sin ráite, ós rud é, i gcomhréir le hAirteagal 56 de Threoir 2012/34, go bhféadfaidh an comhlacht rialála gníomhú ar a thionscnamh féin agus go n‑áirithíonn sé, i gcomhréir le mír 6 d’Airteagal 56, go gcomhlíonann na táillí arna socrú ag an mbainisteoir bonneagair forálacha Chaibidil IV, Roinn 2, den Treoir sin, ní féidir an Treoir sin a léiriú sa chaoi go gcuirtear cosc léi ar Bhallstát a cheangal ar an gcomhlacht rialála scrúdú a dhéanamh, uaidh féin, i ngach cás, ar chinntí arna nglacadh ag bainisteoir bonneagair iarnróid maidir le táillí a ghearradh.
46 Ar an gcúis sin, ní chuirtear cosc léi ar Bhallstát, i gcomhthéacs thrasuí Threoir 2012/34 ina dhlí náisiúnta, foráil a dhéanamh go ndéanfar faireachán córasach den sórt sin a luaithe a chuirfidh an bainisteoir bonneagair an comhlacht rialála ar an eolas go bhfuil sé beartaithe aige táillí a thobhach nó athruithe a dhéanamh ar na táillí sin.
47 Mar sin féin, ní féidir le nós imeachta um údarú den sórt sin an bonn a bhaint de chur chun feidhme éifeachtach an chórais gearrtha a bhunaítear le Caibidil IV de Threoir 2012/34 ná d’fhorálacha eile na Treorach sin, dá comhsheasmhacht ná de na cuspóirí a shaothraítear léi.
48 I ndáil leis sin, ar an gcéad dul síos, ba cheart a mheabhrú go bhféachtar leis an gcóras a bunaíodh le Treoir 2012/34 le neamhspleáchas bainistíochta an bhainisteora bonneagair a áirithiú. Chun neamhspleáchas den chineál sin a áirithiú, ní mór go mbeidh ag an mbainisteoir bonneagair, laistigh den chreat gearrtha arna bhunú ag na Ballstáit, rogha ar leith chun méid na dtáillí a chinneadh d’fhonn a cheadú dó an solúbthacht sin a úsáid mar uirlis bhainistíochta (féach, chuige sin, breithiúnas an 9 Meán Fómhair 2021, LatRailNet agus Latvijas dzelzceļš, C‑144/20, EU:C:2021:717, mír 41 agus an cásdlí dá dtagraítear).
49 Dá bhrí sin, ní mór an t‑athbhreithniú a dhéanann an comhlacht rialála i gcomhthéacs nós imeachta um údarú a theorannú do chásanna neamh-chomhoiriúnachta a leigheas i bhfianaise Roinn 2 de Chaibidil IV de Threoir 2012/34 nó phrionsabal an neamh-idirdhealaithe. Dá bhrí sin, níl an comhlacht rialála sin i dteideal iallach a chur ar an mbainisteoir bonneagair iarnróid géilleadh dá mheasúnú ar oiriúnacht, ós rud é, agus é sin á dhéanamh aige, go mbainfeadh an comhlacht rialála an bonn den rogha nach mór a bheith ag an mbainisteoir sin (féach, chuige sin, breithiúnas an 9 Meán Fómhair 2021, LatRailNet agus Latvijas dzelzceļš, C‑144/20, EU:C:2021:717, míreanna 46 agus 47).
50 Ar an dara dul síos, fiú más rud é, mar is léir ó mhír 44 den bhreithiúnas seo, nach gcinntear mionsonraí aon nós imeachta um údarú le Treoir 2012/34, ní féidir le socruithe den sórt sin cur isteach ar shainchumais na ngníomhaithe lena mbaineann agus, go háirithe, cosc a chur ar an mbainisteoir bonneagair iarnróid an teorainn ama a leagtar síos in Airteagal 27(4) de Threoir 2012/34 maidir le foilsiú an ráitis gréasáin a chomhlíonadh.
51 Ina theannta sin, níor cheart go gcuirfeadh nós imeachta um údarú teorainn leis an bhféidearthacht atá ag na daoine dá dtagraítear in Airteagal 56(1) de Threoir 2012/34 a gcearta a dhearbhú i gcás ina measann siad gur íospartaigh iad féin de chóir éagórach, d’idirdhealú nó d’aon díobháil eile, go háirithe trí chaingean a thionscnamh i gcoinne cinntí arna ndéanamh ag an mbainisteoir bonneagair nó, i gcás inarb iomchuí, ag an ngnóthas iarnróid nó ag oibreoir saoráide seirbhíse.
52 Ar an tríú dul síos, ní cheart go gcuirfí nós imeachta um údarú bac leis an gcomhlacht rialála a chúraimí a fheidhmiú i gcomhréir le hAirteagal 56 de Threoir 2012/34, nó go mbainfí sé den chosaint a thugtar dá réir sin d’iarratasóirí.
53 I ndáil leis sin, ba cheart a mheabhrú, i gcomhréir le hAirteagal 56(10) den Treoir sin, nach mór cinntí arna nglacadh ag an gcomhlacht rialála a bheith faoi réir athbhreithniú breithiúnach.
54 Dá réir sin, ní féidir cinneadh arna ghlacadh ag an gcomhlacht rialála i gcomhthéacs nós imeachta um údarú a bheith críochnaitheach ach ó thaobh riaracháin amháin agus ní féidir é a dhíolmhú ó athbhreithniú breithiúnach.
55 Dá bhrí sin, is é an freagra ar an gcéad cheist nach mór Airteagal 29(1) agus Airteagail 32 agus 56 de Threoir 2012/34 a léiriú sa chaoi nach gcuirtear cosc ar Bhallstát formhuirir a ghearradh ar tháillí ar úsáid bonneagair iarnróid, arna gcinneadh ag bainisteoir an bhonneagair sin, faoi réir nós imeachta um údarú, ar choinníoll, mar sin féin, go n‑urramaítear le nós imeachta den sórt sin an rogha nach mór a bheith ag bainisteoir an bhonneagair sin chun méid na dtáillí a chinneadh ar bhealach a chuirfidh ar a chumas iad a úsáid mar uirlis bhainistíochta, nach gcuireann sé isteach ar shainchumais na ngníomhaithe lena mbaineann agus nach gcuireann sé cosc ar an gcomhlacht rialála a chúraimí a fheidhmiú i gcomhréir le hAirteagal 56.
An dara agus an tríú ceist
56 Baineann an dara agus an tríú ceist a tharchuirtear le raon feidhme na hoibleagáide ráiteas gréasáin a fhoilsiú, a leagtar síos in Airteagal 27 de Threoir 2012/34, i gcomhthéacs méaduithe ar tháillí arna gcinneadh ar bhonn Airteagal 32 den Treoir sin. Ba cheart déileáil leo le chéile.
57 Leis na ceisteanna sin, fiafraíonn an chúirt a rinne an tarchur, go bunúsach, an bhfuil Airteagal 27(2) agus Airteagal 32(1) agus (6) de Threoir 2012/34 le léiriú sa chaoi, ar an gcéad dul síos, nach mór méaduithe margaidh a fhoilsiú sa ráiteas gréasáin sula n‑údaróidh an comhlacht rialála iad, ar an dara dul síos, nach mór a shonrú sa doiciméad sin, i gcás gach deighleoige den mhargadh lena mbaineann, an fhaisnéis a bhaineann le méaduithe margaidh sa bhreis ar na táillí a bhaineann leis na costais arna dtabhú go díreach mar thoradh ar an tseirbhís traenach a oibriú agus, ar an tríú dul síos, gurb ionann aon athrú ar mhéid na méaduithe margaidh sin agus leasú ar bhuntréith den chóras gearrtha, de réir bhrí Airteagal 32(6) den Treoir sin.
58 Tá amhras ar an gcúirt a rinne an tarchur, ar an gcéad dul síos, maidir leis an ngaol idir an oibleagáid an ráiteas gréasáin a fhoilsiú agus an nós imeachta chun an méadú ar tháillí a údarú, dá bhforáiltear sa dlí náisiúnta.
59 I ndáil leis sin, is léir ón bhfreagra ar an gcéad cheist nach rialaítear le Treoir 2012/34, ós rud é nach bhforáiltear léi aon nós imeachta um údarú, na rialacha mionsonraithe nach mór do nós imeachta den sórt sin a chomhlíonadh.
60 É sin ráite, tá na forchoimeádais a leagtar amach sa fhreagra ar an gcéad cheist ábhartha freisin sa chomhthéacs sin. Dá bhrí sin, níor cheart go gcuirfeadh na rialacha mionsonraithe a cheanglaítear faoin dlí náisiúnta le haghaidh nós imeachta um údarú den sórt sin isteach ar shainchumais na ngníomhaithe lena mbaineann agus, go háirithe, go bhfágann siad nach féidir leis an mbainisteoir bonneagair iarnróid an teorainn ama a leagtar síos in Airteagal 27(4) de Threoir 2012/34 a chomhlíonadh chun an ráiteas gréasáin a fhoilsiú.
61 Dá bhrí sin, ní féidir leis an rogha a rinne Ballstát méaduithe margaidh a chur faoi réir nós imeachta um údarú cosc a chur ar an mbainisteoir bonneagair an fhaisnéis a bhaineann le méaduithe margaidh a chinn sé a fhoilsiú sa ráiteas gréasáin, gan fanacht le toradh an nós imeachta sin, agus a léiriú, i gcás inarb iomchuí, go bhfuil nós imeachta den sórt sin ar siúl.
62 Iarrann an chúirt a rinne an tarchur, ar an dara dul síos, an leor, i bhfianaise Airteagal 27(2) de Threoir 2012/34, táille foriomlán in aghaidh an chiliméadair thraenaigh a thaistealaítear a léiriú sa ráiteas gréasáin, lena gcumhdaítear na costais atá inchurtha go díreach i leith oibriú na seirbhíse iarnróid, i gcomhréir le hAirteagal 31(3) den Treoir sin, agus na méaduithe margaidh a chinntear faoi Airteagal 32 den Treoir sin, nó an gá a shonrú sa doiciméad sin, i gcás gach deighleoige den mhargadh lena mbaineann, méideanna na méaduithe margaidh a chuirtear leis na táillí a bhaineann leis na costais atá inchurtha go díreach i leith oibriú na seirbhíse iarnróid.
63 I ndáil leis sin, ní mór a thabhairt faoi deara go sainmhínítear le pointe 26 d’Airteagal 3 de Threoir 2012/34, ina shainmhínítear an ‘ráiteas gréasáin’ mar ‘ráiteas ina mionsonraítear na rialacha ginearálta, na spriocanna ama, na nósanna imeachta agus na critéir maidir le córais um táillí a ghearradh agus córais leithdháilte toillte, lena n‑áirítear gach faisnéis eile is gá chun iarratais ar thoilleadh bonneagair a thionscnamh’.
64 Sonraítear le hAirteagal 27(2) den Treoir sin nach mór faisnéis a bheith sa ráiteas gréasáin lena sonraítear na coinníollacha maidir le rochtain ar an mbonneagar iarnróid lena mbaineann agus ar shaoráidí seirbhíse atá nasctha le gréasán an bhainisteora bonneagair agus le soláthar seirbhísí sna saoráidí sin, agus ábhar an doiciméid sin á shainmhíniú in Iarscríbhinn IV a ghabhann leis an Treoir sin.
65 De réir phointe 2 d’Iarscríbhinn IV, ní mór caibidil maidir le prionsabail ghearrtha agus taraifí a bheith sa ráiteas gréasáin ina bhfuil sonraí iomchuí a bhaineann, inter alia, leis an gcóras gearrtha agus faisnéis leordhóthanach maidir leis na táillí. I ndáil leis sin, ní mór dó tuairisc mhionsonraithe a thabhairt ar an modh, ar na rialacha agus, i gcás inarb iomchuí, ar na scálaí a úsáidtear chun Airteagail 31 go 36 de Threoir 2012/34 a chur i bhfeidhm maidir le costais agus táillí.
66 Thairis sin, is léir ó aithris 34 den Treoir sin gurb é cuspóir an ráitis gréasáin an fhaisnéis go léir is gá a sholáthar do ghnóthais iarnróid chun a chur ar a gcumas a gceart rochtana ar bhonneagar iarnróid agus ar sheirbhísí i saoráidí seirbhíse a fheidhmiú ar bhealach neamh-idirdhealaitheach agus trédhearcach.
67 Leanann sé ó aithris 34 agus ó fhoclaíocht Airteagal 3(26), Airteagal 27(2) agus pointe 2 d’Iarscríbhinn IV a ghabhann le Treoir 2012/34, d’fhonn na ceanglais a leagtar amach sna forálacha sin a chomhlíonadh agus an cuspóir atá á shaothrú acu a bhaint amach, nach leor don bhainisteoir bonneagair iarnróid táille foriomlán in aghaidh an chiliméadair thraenaigh a áireamh sa ráiteas gréasáin lena gcumhdaítear na costais atá inchurtha go díreach i leith oibriú na seirbhíse iarnróid agus aon mhéadú.
68 Thairis sin, mar is léir ó mhíreanna 37 agus 38 den bhreithiúnas seo, tá gnóthais iarnróid i dteideal táillí mar a shonraítear iad sa ráiteas gréasáin a chonspóid os comhair an chomhlachta rialála ós rud é go sáraíonn siad na rialacha agus prionsabail arna ndearbhú i dTreoir 2012/34. Ós rud é, mar a thug an tAbhcóide Ginearálta faoi deara, go bunúsach, i mír 97 dá Tuairim, go rialaítear méaduithe margaidh le rialacha lena maolaítear ó na prionsabail ghearrtha is infheidhme maidir le táillí ar úsáid bonneagair agus saoráidí seirbhíse, chuirfí an ceart atá ag gnóthais iarnróid athbhreithniú a iarraidh i mbaol mura gcuirfí an fhaisnéis a bhaineann leis na costais atá inchurtha go díreach i leith oibriú na seirbhíse iarnróid agus na méaduithe margaidh sin ar fáil ar leithligh sa doiciméad sin.
69 Dá bhrí sin, i gcás ina gcinneann bainisteoir an ghréasáin bonneagair méaduithe margaidh ar bhonn Airteagal 32 de Threoir 2012/34, ní mór a shonrú sa ráiteas gréasáin, le haghaidh gach deighleoige den mhargadh lena mbaineann, faisnéis maidir leis na méaduithe margaidh chomh maith le táillí a bhaineann le costais atá inchurtha go díreach i leith oibriú na seirbhíse iarnróid.
70 Tá amhras ar an gcúirt a rinne an tarchur, ar an tríú dul síos, maidir le léiriú Airteagal 32(6) de Threoir 2012/34 lena bhforáiltear don méid seo a leanas: ‘[m]á tá sé ar intinn ag bainisteoir bonneagair na buntréithe den chóras gearrtha dá dtagraítear i mír 1 den Airteagal [32] a athrú, déanfaidh sé poiblí iad ar a laghad 3 mhí roimh an spriocdháta d’fhoilsiú an ráitis gréasáin de réir Airteagal 27(4) [den Treoir sin].’
71 Foráiltear leis an bhforáil deireanach sin go bhfoilseofar an ráiteas gréasáin ar a laghad 4 mhí roimh an spriocdháta le haghaidh iarrataí ar toilleadh bonneagair.
72 Dá bhrí sin, i gcás ina leasaítear ‘buntréith’ den chóras gearrtha, cuirtear na 3 mhí dá bhforáiltear in Airteagal 32(6) de Threoir 2012/34 leis na 4 mhí dá bhforáiltear in Airteagal 27(4) den Treoir sin, agus ar an gcaoi sin tugtar am breise do na hoibreoirí lena mbaineann a gcinneadh tráchtála a ullmhú, agus eolas acu ar na costais intuartha a bheidh le híoc acu, chun toilleadh bonneagair iarnróid a iarraidh.
73 Cé nach sainmhínítear le Treoir 2012/34 cad atá le meas mar ‘bhuntréith’ den chóras gearrtha, is féidir a thuiscint, mar sin féin, ón gcuspóir a shaothraítear leis an oibleagáid ráiteas gréasáin a fhoilsiú, ó shainmhíniú an ráitis sin agus ón tuairisc ar an bhfaisnéis nach mór a áireamh sa doiciméad sin, mar a mheabhraítear i míreanna 63 go 66 den bhreithiúnas seo, go n‑áirítear le ‘buntréithe den chóras gearrtha’, de réir bhrí Airteagal 32(6) den Treoir sin, na tréithe a chomhdhéanann ríomh na méaduithe margaidh agus an mhodheolaíocht a leanadh, ach ní gá go n‑áirítear toradh an ríomha sin leo.
74 Dá bhrí sin, agus mar a d’áitigh rialtas na Polainne agus an Coimisiún ina mbarúlacha i scríbhinn, más rud é nár athraíodh ach méid na méaduithe margaidh i gcomparáid leis an tréimhse thráthchláir oibre roimhe, agus go bhfanann, go háirithe, na prionsabail lena ríalaítear ríomh na méaduithe sin mar an gcéanna, ní cheart athrú amhail a mheas mar athrú ar bhuntréithe an chórais gearrtha.
75 Dá bhrí sin, is é an freagra ar an dara agus ar an tríú ceist nach mór Airteagal 27(2) agus Airteagal 32(1) agus (6) de Threoir 2012/34 a léiriú sa chaoi, ar an gcéad dul síos, nach gá faisnéis a bhaineann le méaduithe margaidh a fhoilsiú sa ráiteas gréasáin sula n‑údaróidh an comhlacht rialála iad, ar an dara dul síos, nach mór a shonrú sa doiciméad sin, i gcás gach deighleoige den mhargadh lena mbaineann, an fhaisnéis a bhaineann le méaduithe margaidh sa bhreis ar na táillí a bhaineann le costais atá inchurtha go díreach i leith oibriú na seirbhíse iarnróid agus, ar an tríú dul síos, nach ionann aon athrú ar mhéid na méaduithe margaidh sin agus leasú ar bhuntréith den chóras gearrtha, de réir bhrí Airteagal 32(6) den Treoir sin.
An ceathrú ceist
76 Lena ceathrú ceist, fiafraíonn an chúirt a rinne an tarchur, go bunúsach, an bhfuil Treoir 2012/34 le léiriú sa chaoi go bhfuil an fhaisnéis a bhaineann le méaduithe margaidh a fhoilsítear sa ráiteas gréasáin do thréimhse bhailíochta an tráthchláir oibre lena mbaineann ina ceangal ar an gcomhlacht rialála agus an chumhacht údaraithe a thugann Ballstát dó á feidhmiú aige.
77 Mar is léir ón bhfreagra ar an gcéad cheist, i leithdháileadh na gcumhachtaí dá bhforáiltear i dTreoir 2012/34, is faoin mbainisteoir bonneagair iarnróid atá sé táillí ar úsáid an bhonneagair sin a chinneadh agus a thobhach, lena n‑áirítear aon méaduithe margaidh, i gcomhréir leis an gcreat gearrtha agus leis na rialacha gearrtha a leagtar síos. Thairis sin, cé go bhféadfadh tobhach na méaduithe sin a bheith faoi réir nós imeachta um údarú, ní mór don nós imeachta sin cúraimí an chomhlachta rialála mar a ráthaítear le hAirteagal 56 den Treoir sin a chomhlíonadh.
78 Is faoin gcomhlacht rialála sin atá sé ansin, de bhun Airteagal 56, a fhíorú, arna iarraidh sin d’iarratasóir nó ar a thionscnamh féin, an gcomhlíonann na táillí sin an Treoir sin agus na forálacha náisiúnta arna nglacadh chun í a chur chun feidhme. Maidir le méaduithe margaidh go sonrach, is faoin gcomhlacht sin atá sé a fhíorú an gcomhlíonann an fhaisnéis a bhaineann le méaduithe margaidh a foilsíodh sa ráiteas gréasáin an creat gearrtha, arna bhunú ag an mBallstát de bhun Airteagal 29(1) den Treoir chéanna, agus an córas gearrtha, arna bunú ag an mbainisteoir bonneagair iarnróid, i gcomhréir le hAirteagal 32(1) agus (6) den Treoir sin.
79 Dá bhrí sin, mar chuid den fhíorú sin, tugtar de chumhacht don chomhlacht rialála na leasuithe nach mór a dhéanamh ar an gcóras gearrtha a chur in iúl don bhainisteoir bonneagair iarnróid lena mbaineann chun neamh-chomhoiriúnachtaí an chórais sin leis na ceanglais a leagtar síos i dTreoir 2012/34 a leigheas (féach, chuige sin, breithiúnas an 9 Meán Fómhair 2021, LatRailNet agus Latvijas dzelzceļš, C‑144/20, EU:C:2021:717, míreanna 38 agus 45).
80 Cé go bhféadfadh sé go mbeadh sé d’éifeacht ag leasuithe den sórt sin, de réir mar a bheidh, na méaduithe margaidh a mhéadú nó a laghdú, is amhlaidh fós nach mór iad a theorannú do chásanna neamh-chomhoiriúnachta den sórt sin a leigheas. Níl an comhlacht rialála i dteideal iallach a chur ar an mbainisteoir bonneagair iarnróid géilleadh dá mheasúnú ar oiriúnacht, ós rud é, más amhlaidh, go mbainfeadh an comhlacht rialála an bonn den rogha nach mór a bheith ag an mbainisteoir sin, mar a thugtar faoi deara i mír 49 den bhreithiúnas seo.
81 Dá bhrí sin, is é an freagra ar an gceathrú ceist nach mór Airteagal 29(1) agus Airteagail 32 agus 56 de Threoir 2012/34 a léiriú sa chaoi go bhfuil an fhaisnéis a bhaineann le méaduithe margaidh a fhoilsítear sa ráiteas gréasáin do thréimhse bhailíochta an tráthchláir oibre lena mbaineann ina cheangal ar an gcomhlacht rialála agus an chumhacht údaraithe a thugann Ballstát dó á feidhmiú aige, a mhéid is nach mór na leasuithe a iarrann sé ar an mbainisteoir bonneagair a dhéanamh ar na méaduithe sin a theorannú do chásanna neamh-chomhoiriúnachta leis an Treoir sin a leigheas agus nach féidir measúnuithe ar oiriúnacht an chomhlachta sin a áireamh iontu.
An cúigiú ceist
82 Lena cúigiú ceist, fiafraíonn an chúirt a rinne an tarchur, go bunúsach, an bhfuil Airteagal 32(1) de Threoir 2012/34 le léiriú sa chaoi go gcuirtear cosc leis, chun méaduithe margaidh a chinneadh, méid iomlán ioncaim a cheanglaíonn an Ballstát ar an mbainisteoir bonneagair a dhéanamh a chur san áireamh agus, chun críocha an costas iomlán arna thabhú ag an mbainisteoir bonneagair a ríomh, nach mór ioncam eile a fhaigheann an bainisteoir sin a chur san áireamh, go háirithe fóirdheontais phoiblí.
83 I ndáil leis sin, ba cheart a mheabhrú, mar a thugtar faoi deara i mír 48 den bhreithiúnas seo, chun cuspóir neamhspleáchas bainistíochta an bhainisteora bonneagair a ráthú, dá bhforáiltear in Airteagal 4 de Threoir 2012/34, nach mór rogha a bheith ag an mbainisteoir bonneagair maidir le méid na dtáillí a chinneadh.
84 Gan beann ar cé acu atá nó nach bhfuil an margadh oscailte do mhéaduithe, mar a cheanglaítear le hAirteagal 32(1) de Threoir 2012/34, má shocraíonn Ballstát méid iomlán ioncaim a cheanglaítear ar an mbainisteoir bonneagair a bhaint amach, tá sé d’éifeacht aige sin an rogha sin de chuid an bhainisteora bonneagair a shrianadh a mhéid nach luíonn sé leis an gcuspóir sin (féach, de réir analaí, breithiúnas an 11 Iúil 2013, an Coimisiún v Poblacht na Seice, C‑545/10, EU:C:2013:509, mír 36).
85 D’fhéadfadh an oibleagáid méid den sórt sin a bhaint amach an bainisteoir bonneagair iarnróid a spreagadh chun tosaíocht a thabhairt do bhailiú ioncaim ach, i bhfianaise aithris 43 de Threoir 2012/34, ní mór do chórais ghearrtha bainisteoirí bonneagair iarnróid a spreagadh chun an úsáid is fearr is féidir a bhaint as bonneagar.
86 Maidir le méid na méaduithe margaidh a ríomh, ba cheart a mheabhrú, faoin gcéad fhomhír d’Airteagal 31(3) de Threoir 2012/34, go gcumhdófar an costas atá inchurtha go díreach i leith oibriú na seirbhíse iarnróid leis na táillí a thoibhítear don phacáiste íosrochtana agus do rochtain ar shaoráidí seirbhísí nasctha bonneagair. Faoin gcóras gearrtha arna bhunú ag an mBallstát, féadfar an difríocht idir an costas sin agus an costas iomlán i dtaca leis an oibríocht sin arna thabhú ag an mbainisteoir bonneagair, i gcomhréir le hAirteagal 32(1) den Treoir sin, a dhúnadh trí bhíthin méaduithe.
87 I bhfianaise na bprionsabal gearrtha a bhunaítear ar an gcaoi sin le Treoir 2012/34, ní bhaineann aon ioncam de chuid an bhainisteora bonneagair nach bhfuil nasctha le soláthar bonneagair iarnróid le hábhar chun an costas iomlán arna thabhú ag an mbainisteoir bonneagair a chinneadh.
88 Os a choinne sin, mar a thug an tAbhcóide Ginearálta faoi deara, go bunúsach, i míreanna 115 go 118 dá Tuairim, ní mór na fóirdheontais phoiblí a fuair an bainisteoir bonneagair iarnróid chun costais a bhaineann le soláthar bonneagair iarnróid a chumhdach a asbhaint ó mhéid an chostais iomláin a d’fhéadfadh a bheith mar bhonn chun na méaduithe margaidh a ríomh. Tá sé beartaithe leis na fóirdheontais sin go gcumhdófar na costais chéanna leo siúd a d’fhéadfadh a bheith ina n‑ábhar do na méaduithe sin, ós rud é nach féidir iad a úsáid chun brabúis a ghiniúint.
89 I bhfianaise an mhéid sin roimhe seo, is é an freagra ar an gcúigiú ceist nach mór Airteagal 4 agus Airteagal 32(1) de Threoir 2012/34 a léiriú sa chaoi go gcuirtear cosc leo, chun críocha méaduithe margaidh a chinneadh, ar mhéid iomlán ioncaim a chur san áireamh a gceanglaíonn an Ballstát ar an mbainisteoir bonneagair a dhéanamh. Chun an costas iomlán arna thabhú ag an mbainisteoir sin a chinneadh, ba cheart, i gcás inarb iomchuí, fóirdheontais phoiblí a fhaigheann sé a chur san áireamh chun costais a bhaineann le soláthar an bhonneagair sin a chumhdach.
Costais
90 Ós rud é, a mhéid a bhaineann sé leis na páirtithe sna príomhimeachtaí, go bhfuil na himeachtaí mar chéim sa chás os comhair na cúirte a rinne an tarchur, baineann ceist na gcostas leis an gcúirt sin. Níl na costais a tabhaíodh trí bharúlacha a cuireadh faoi bhráid na Cúirte, seachas costais na bpáirtithe sin, inghnóthaithe.
Ar na forais sin, rialaíonn an Chúirt (an Dara Dlísheomra) mar seo a leanas:
1. Maidir le hAirteagal 29(1) agus le hAirteagail 32 agus 56 de Threoir 2012/34/AE ó Pharlaimint na hEorpa agus ón gComhairle an 21 Samhain 2012 lena mbunaítear limistéar Eorpach aonair iarnróid, arna leasú le Treoir (AE) 2016/2370 ó Pharlaimint na hEorpa agus ón gComhairle an 14 Nollaig 2016,
ní mór léiriú a dhéanamh mar seo a leanas:
ní chuirtear cosc ar Bhallstát formhuirir a ghearradh ar tháillí ar úsáid bonneagair iarnróid, arna gcinneadh ag bainisteoir an bhonneagair sin, faoi réir nós imeachta um údarú, ar choinníoll, mar sin féin, go n‑urramaítear le nós imeachta den sórt sin an rogha nach mór a bheith ag bainisteoir an bhonneagair sin chun méid na dtáillí a chinneadh ar bhealach a chuirfidh ar a chumas iad a úsáid mar uirlis bhainistíochta, nach gcuireann sé isteach ar shainchumais na ngníomhaithe lena mbaineann agus nach gcuireann sé cosc ar an gcomhlacht rialála a chúraimí a fheidhmiú i gcomhréir le hAirteagal 56.
2. Maidir le hAirteagal 27(2) agus Airteagal 32(1) agus (6) de Threoir 2012/34, arna leasú le Treoir 2016/2370,
ní mór léiriú a dhéanamh mar seo a leanas:
ar an gcéad dul síos, ní gá faisnéis a bhaineann le méaduithe margaidh a fhoilsiú sa ráiteas gréasáin sula n‑údaróidh an comhlacht rialála iad, ar an dara dul síos, ní mór a shonrú sa doiciméad sin, i gcás gach deighleoige den mhargadh lena mbaineann, an fhaisnéis a bhaineann le méaduithe margaidh sa bhreis ar na táillí a bhaineann le costais atá inchurtha go díreach i leith oibriú na seirbhíse iarnróid agus, ar an tríú dul síos, ní hionann aon athrú ar mhéid na méaduithe margaidh sin agus leasú ar bhuntréith den chóras gearrtha, de réir bhrí Airteagal 32(6) de Threoir 2012/34, arna leasú.
3. Maidir le hAirteagal 29(1) agus Airteagail 32 agus 56 de Threoir 2012/34, arna leasú le Treoir 2016/2370,
ní mór léiriú a dhéanamh mar seo a leanas:
tá an fhaisnéis a bhaineann le méaduithe margaidh a fhoilsítear sa ráiteas gréasáin do thréimhse bhailíochta an tráthchláir oibre lena mbaineann ina cheangal ar an gcomhlacht rialála agus an chumhacht údaraithe a thugann Ballstát dó á feidhmiú aige, a mhéid is nach mór na leasuithe a iarrann sé ar an mbainisteoir bonneagair a dhéanamh ar na méaduithe sin a theorannú do chásanna neamh-chomhoiriúnachta le Treoir 2012/34, arna leasú, a leigheas agus nach féidir measúnuithe ar oiriúnacht an chomhlachta sin a áireamh iontu.
4. Maidir le hAirteagal 4 agus Airteagal 32(1) de Threoir 2012/34, arna leasú le Treoir 2016/2370,
ní mór léiriú a dhéanamh mar seo a leanas:
cuirtear cosc leo, chun críocha méaduithe margaidh a chinneadh, ar mhéid iomlán ioncaim a chur san áireamh a gceanglaíonn an Ballstát ar an mbainisteoir bonneagair a dhéanamh. Chun an costas iomlán arna thabhú ag an mbainisteoir sin a chinneadh, ba cheart, i gcás inarb iomchuí, fóirdheontais phoiblí a fhaigheann sé a chur san áireamh chun costais a bhaineann le soláthar an bhonneagair sin a chumhdach.
Sínithe
* Teanga an cháis: an Ghearmáinis.