|
17.11.2021 |
MT |
Il-Ġurnal Uffiċjali tal-Unjoni Ewropea |
L 407/27 |
REGOLAMENT TA’ IMPLIMENTAZZJONI TAL-KUMMISSJONI (UE) 2021/2007
tas-16 ta’ Novembru 2021
li jistabbilixxi regoli dettaljati għall-applikazzjoni tar-Regolament tal-Kunsill (UE) Nru 904/2010 fir-rigward tal-iskema speċjali għall-impriżi ż-żgħar
IL-KUMMISSJONI EWROPEA,
Wara li kkunsidrat it-Trattat dwar il-Funzjonament tal-Unjoni Ewropea,
Wara li kkunsidrat ir-Regolament tal-Kunsill (UE) Nru 904/2010 tas-7 ta’ Ottubru 2010 dwar il-kooperazzjoni amministrattiva u l-ġlieda kontra l-frodi fil-qasam tat-taxxa fuq il-valur miżjud (1), u b’mod partikolari l-Artikoli 17(2), 32(2), 37a(2) u 37b(4) tiegħu,
Billi:
|
(1) |
It-Titolu XII, il-Kapitolu 1, tad-Direttiva tal-Kunsill 2006/112/KE (2), li jipprevedi skema speċjali għall-impriżi ż-żgħar, ġie emendat permezz tad-Direttiva tal-Kunsill (UE) 2020/285 (3). |
|
(2) |
Id-Direttiva (UE) 2020/285 emendat ukoll ir-Regolament (UE) Nru 904/2010 li jistabbilixxi regoli għall-kooperazzjoni amministrattiva u l-ġlieda kontra l-frodi fil-qasam tat-taxxa fuq il-valur miżjud (VAT). L-Artikolu 17(1), il-punt (g), l-Artikolu 21(2b), l-Artikolu 32(1) u l-Artikoli 37a u 37b ta’ dak ir-Regolament jikkonċernaw speċifikament il-ħażna, it-tiftix awtomatizzat u t-trażmissjoni tal-informazzjoni relatata ma’ dik l-iskema speċjali. Il-miżuri meħtieġa għall-konformità ma’ dawk l-emendi għandhom japplikaw mill-1 ta’ Jannar 2025. |
|
(3) |
Sabiex jiġi ffaċilitat it-tiftix awtomatizzat, huwa meħtieġ li jiġu definiti speċifikazzjonijiet u dettalji prattiki rigward l-aċċess li Stat Membru għandu jagħti lill-awtorità kompetenti ta’ kwalunkwe Stat Membru ieħor għall-informazzjoni, bħad-dettalji tal-identifikazzjoni u l-valur tal-provvisti ta’ merkanzija jew servizzi mwettqa mill-persuna taxxabbli li tagħmel użu mill-iskema speċjali kif applikata mill-Istat Membru fejn tkun saret il-provvista. |
|
(4) |
Sabiex jiġi żgurat li jsir skambju b’mod uniformi tal-informazzjoni msemmija fl-Artikolu 37a(1) u l-Artikolu 37b(2) u (3) tar-Regolament (UE) Nru 904/2010, il-Kummissjoni għandha tadotta arranġamenti prattiċi għal tali skambju, inkluż messaġġ elettroniku komuni. Dan ikun jista’ jippermetti wkoll l-iżvilupp uniformi ta’ speċifikazzjonijiet tekniċi u funzjonali, għaliex ikunu qed isegwu qafas regolat. |
|
(5) |
B’mod partikolari, dawn l-arranġamenti prattiċi jenħtieġ li jiżguraw trażmissjoni effettiva u pproċessar b’mod effettiv tal-informazzjoni relatata mar-reġistrazzjoni ta’ impriżi żgħar, li hija meħtieġa għalihom biex ikunu jistgħu jagħmlu użu mill-iskema speċjali lil hinn mill-Istat Membru ta’ stabbiliment, billi l-Istati Membri jkun jeħtiġilhom jimmodifikaw l-interfaċċi elettroniċi tagħhom li attwalment huma mfassla sabiex l-iskema tippermetti li tiġi konċessa eżenzjoni biss lill-impriżi stabbiliti fl-Istat Membru fejn tkun dovuta l-VAT, b’tali mod li l-informazzjoni tkun tista’ tiġi skambjata b’mod uniformi. |
|
(6) |
Jenħtieġ ukoll li jsir skambju b’mod uniformi tal-informazzjoni b’rabta ma’ bidliet fid-dettalji tal-identifikazzjoni, bħall-esklużjoni mill-iskema speċjali, sabiex l-Istati Membri jkunu jistgħu jwettqu monitoraġġ tal-applikazzjoni korretta tal-iskema speċjali fit-territorju tagħhom u jiġġieldu l-frodi. Għal dan il-għan, jenħtieġ li jiġu previsti arranġamenti komuni għall-iskambju elettroniku ta’ tali informazzjoni. |
|
(7) |
Sabiex il-piż amministrattiv fuq il-persuni taxxabbli jkun kemm jista’ jkun mill-inqas, filwaqt li tiġi mmonitorjata l-applikazzjoni korretta tal-iskema speċjali, huwa meħtieġ li jiġu stabbiliti ċerti rekwiżiti minimi għall-interfaċċa elettronika f’każ ta’ sottomissjoni ta’ notifiki mill-persuni taxxabbli. Jenħtieġ madankollu li l-Istati Membri ma jkunux prevenuti milli jipprovdu funzjonalitajiet addizzjonali li jkomplu jnaqqsu l-piżijiet amministrattivi. |
|
(8) |
Jenħtieġ li jiġu ddeterminati wkoll l-arranġamenti prattiċi biex jiġi ffaċilitat l-għoti tad-dettalji dwar il-miżuri approvati minn kull Stat Membru fit-traspożizzjoni tal-Artikolu 167a, it-Titolu XI, il-Kapitolu 3, u t-Titolu XII, il-Kapitolu 1, tad-Direttiva 2006/112/KE. |
|
(9) |
Jenħtieġ li dan ir-Regolament japplika minn dakinhar li japplikaw l-Artikolu 17(1), il-punt (g), l-Artikolu 21(2b), l-Artikolu 32(1) u l-Artikoli 37a u 37b tar-Regolament (UE) Nru 904/2010. |
|
(10) |
Il-miżuri previsti f’dan ir-Regolament huma skont l-opinjoni tal-Kumitat Permanenti dwar il-Kooperazzjoni Amministrattiva, |
ADOTTAT DAN IR-REGOLAMENT:
Artikolu 1
Definizzjonijiet
Għall-finijiet ta’ dan ir-Regolament, japplikaw id-definizzjonijiet li ġejjin:
|
(1) |
“skema speċjali” tfisser l-iskema speċjali ta’ eżenzjonijiet għall-impriżi ż-żgħar prevista fit-Titolu XII, il-Kapitolu 1, it-Taqsima 2, tad-Direttiva 2006/112/KE; |
|
(2) |
“Stat Membru ta’ eżenzjoni” tfisser l-Istat Membru li jikkonċedi l-eżenzjoni mill-VAT għall-provvista ta’ merkanzija u servizzi li jsiru fit-territorju tiegħu minn persuni taxxabbli eliġibbli għall-eżenzjoni skont l-iskema speċjali; |
|
(3) |
“Stat Membru ta’ stabbiliment” tfisser l-Istat Membru li fih tkun stabbilita l-persuna taxxabbli li tagħmel użu mill-iskema speċjali. |
Artikolu 2
Funzjonalitajiet tal-interfaċċi elettroniċi
L-interfaċċa elettronika fl-Istat Membru ta’ stabbiliment, li biha persuna taxxabbli jaf ikollha l-obbligu li, skont l-Artikolu 284c(2) tad-Direttiva 2006/112/KE, tippreżenta notifika minn qabel, kwalunkwe aġġornament ta’ dik in-notifika u tirrapporta l-valur tal-provvisti għall-użu tal-iskema speċjali fi Stat Membru ieħor, għandha toffri l-faċilità li tiġi ssejvjata l-informazzjoni u kwalunkwe bidla f’dik l-informazzjoni, li għandha tiġi pprovduta skont l-Artikolu 284(3) u (4) u l-Artikoli 284a u 284b tad-Direttiva 2006/112/KE.
Artikolu 3
Skambju awtomatizzat ta’ informazzjoni
Skont l-Artikolu 21(2b) tar-Regolament (UE) Nru 904/2010, l-Istat Membru ta’ stabbiliment għandu jagħti lill-awtorità kompetenti ta’ Stati Membri oħra aċċess awtomatizzat għall-informazzjoni segwenti miġbura u maħżuna f’konformità mal-Artikolu 17(1), il-punt (g), ta’ dak ir-Regolament, permezz tan-network CCN/CSI jew permezz ta’ network jew sistema sigura ekwivalenti:
|
(a) |
in-numru individwali li bih persuna taxxabbli li tagħmel użu mill-eżenzjoni fi kwalunkwe wieħed minn dawk l-Istati Membri l-oħra hija identifikata skont l-Artikolu 284(3) tad-Direttiva 2006/112/KE; |
|
(b) |
l-isem, l-attività u s-settur tan-negozju jekk rilevanti skont l-Artikolu 284(1), it-tieni subparagrafu, tad-Direttiva 2006/112/KE, il-forma ġuridika u l-indirizz ta’ dik il-persuna taxxabbli; |
|
(c) |
fl-eventwalità ta’ bidla fil-post ta’ stabbiliment, id-data minn meta tali bidla tidħol fis-seħħ u, jekk disponibbli, l-Istat Membru li fih il-persuna taxxabbli tkun iddeċidiet li tistabbilixxi ruħha; |
|
(d) |
l-Istat Membru li fih il-persuna taxxabbli jkun beħsiebha tagħmel użu mill-eżenzjoni fir-rigward tan-notifika minn qabel jew l-aġġornament ta’ notifika minn qabel, kif imsemmija fl-Artikolu 284(3) jew (4) tad-Direttiva 2006/112/KE; |
|
(e) |
l-Istat Membri li fih il-persuna taxxabbli tagħmel użu mill-eżenzjoni skont l-Artikolu 284(2) tad-Direttiva 2006/112/KE; |
|
(f) |
id-data tal-bidu tal-eżenzjoni f’kull wieħed mill-Istati Membri li fih il-persuna taxxabbli tagħmel użu mill-eżenzjoni; |
|
(g) |
il-valur totali tal-provvisti ta’ merkanzija u/jew servizzi mwettqa fl-Istat Membru li fih tkun stabbilita l-persuna taxxabbli u f’kull wieħed mill-Istati Membri l-oħra, speċifikat skont is-settur tan-negozju jekk rilevanti skont l-Artikolu 284c(1), il-punt (c), tad-Direttiva 2006/112/KE, matul is-sena kalendarja tan-notifika u matul is-snin kalendarji ta’ qabel in-notifika, skont l-Artikolu 288a(1) tad-Direttiva 2006/112/KE; |
|
(h) |
il-valur totali tal-provvisti ta’ merkanzija u/jew servizzi, inkluża kwalunkwe emenda tiegħu, imwettqa skont kull trimestru kalendarju fl-Istat Membru li fih tkun stabbilita l-persuna taxxabbli u f’kull wieħed mill-Istati Membri l-oħra, speċifikat skont is-settur tan-negozju jekk rilevanti skont l-Artikolu 284c(1), il-punt (c), tad-Direttiva 2006/112/KE, jew “0” jekk ma tkun saret l-ebda provvista; |
|
(i) |
id-data li fiha l-fatturat annwali fl-Unjoni jkun qabeż l-ammont imsemmi fl-Artikolu 284(2), il-punt (a), tad-Direttiva 2006/112/KE u l-valur totali tal-provvisti mwettqa fl-Istat Membru li fih tkun stabbilita l-persuna taxxabbli u f’kull wieħed mill-Istati Membri l-oħra, speċifikat skont is-settur tan-negozju jekk rilevanti skont l-Artikolu 284c(1), il-punt (c), tad-Direttiva 2006/112/KE, jew “0” jekk ma tkun saret l-ebda provvista, mill-bidu tat-trimestru kalendarju sad-data li fiha kien inqabeż il-limitu tal-fatturat annwali fl-Unjoni; |
|
(j) |
id-data li fiha l-persuna taxxabbli ma tkunx aktar eliġibbli li tapplika l-eżenzjoni u l-Istat Membru jew l-Istati Membri li fih/fihom il-waqfien isir effettiv, wara notifika mill-Istati Membri ta’ eżenzjoni kif imsemmija fl-Artikolu 284e, il-punt (b), tad-Direttiva 2006/112/KE; |
|
(k) |
id-data li fiha ssir effettiva d-deċiżjoni tal-persuna taxxabbli li volontarjament tieqaf tapplika l-iskema ta’ eżenzjoni u l-Istat Membru jew l-Istati Membri fejn il-waqfien isir effettiv; |
|
(l) |
id-data li fiha l-attivitajiet tal-persuna taxxabbli jkunu waqfu u l-Istati Membri kkonċernati. |
Artikolu 4
Trażmissjoni ta’ informazzjoni
1. L-Istati Membri għandhom, mingħajr dewmien, jipprovdu d-dettalji elenkati fl-Anness I ta’ dan ir-Regolament u l-aġġornamenti tagħhom fir-rigward tad-dispożizzjonijiet li jittrasponu l-Artikolu 167a, it-Titolu XI, il-Kapitolu 3, u t-Titolu XII, il-Kapitolu 1, tad-Direttiva 2006/112/KE, f’konformità mal-Artikolu 32(1) tar-Regolament (UE) Nru 904/2010. Dik l-informazzjoni għandha tiġi ppreżentata permezz tal-portal web stabbilit mill-Kummissjoni.
2. L-Istat Membru ta’ stabbiliment għandu jittrażmetti l-informazzjoni li ġejja permezz tan-network CCN/CSI, jew permezz ta’ network jew sistema sigura ekwivalenti, bħala messaġġ elettroniku komuni stabbilit fl-Anness II ta’ dan ir-Regolament, lill-awtoritajiet kompetenti tal-Istat Membru ta’ eżenzjoni, fi żmien 15-il jum tax-xogħol mid-data li fiha l-informazzjoni ssir disponibbli, skont l-Artikolu 37a(1) tar-Regolament (UE) Nru 904/2010:
|
(a) |
fir-rigward tan-notifika minn qabel jew l-aġġornament ta’ notifika minn qabel, kif imsemmija fl-Artikolu 284(3) jew (4) tad-Direttiva 2006/112/KE, sabiex l-Istat Membru kkonċernat jiġi infurmat b’persuna taxxabbli li tkun qed tfittex l-eżenzjoni:
|
|
(b) |
fir-rigward tan-notifika minn qabel jew l-aġġornament ta’ notifika minn qabel imsemmija fl-Artikolu 284(3) jew (4) tad-Direttiva 2006/112/KE, wara li jinforma lill-persuna taxxabbli bin-numru ta’ identifikazzjoni individwali tagħha jew wara li jikkonferma n-numru lill-persuna taxxabbli kif imsemmi fl-Artikolu 284(5) tad-Direttiva 2006/112/KE:
|
|
(c) |
fir-rigward ta’ kwalunkwe persuna taxxabbli b’fatturat annwali fl-Unjoni li jkun qabeż l-ammont imsemmi fl-Artikolu 284(2), il-punt (a), tad-Direttiva 2006/112/KE:
|
|
(d) |
fir-rigward ta’ kwalunkwe persuna taxxabbli li tkun naqset milli tikkonforma mal-obbligi ta’ rappurtar stipulati fl-Artikolu 284b tad-Direttiva 2006/112/KE:
|
3. L-Istat Membru ta’ eżenzjoni għandu jittrażmetti l-informazzjoni li ġejja lill-awtoritajiet kompetenti tal-Istat Membru ta’ stabbiliment permezz tan-network CCN/CSI, jew permezz ta’ network jew sistema sigura ekwivalenti, bħala messaġġ elettroniku komuni stabbilit fl-Anness III ta’ dan ir-Regolament, skont l-Artikolu 37b(2) u (3) tar-Regolament (UE) Nru 904/2010:
|
(a) |
fi żmien 15-il jum tax-xogħol minn meta jirċievi l-informazzjoni msemmija fil-paragrafu 2, il-punt (a):
|
|
(b) |
mingħajr dewmien, in-numru ta’ identifikazzjoni individwali tal-persuna taxxabbli, imsemmi fl-Artikolu 21(2b), il-punt (a), tar-Regolament (UE) Nru 904/2010, u d-data li fiha ma baqgħetx eliġibbli għall-eżenzjoni skont l-Artikolu 288a(1) tad-Direttiva 2006/112/KE; |
|
(c) |
mingħajr dewmien, id-data li fiha l-iskema speċjali għall-impriżi ż-żgħar waqfet tapplika f’dak l-Istat Membru. |
Artikolu 5
Dħul fis-seħħ
Dan ir-Regolament għandu jidħol fis-seħħ fl-għoxrin jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.
Għandu japplika mill-1 ta’ Jannar 2025.
Dan ir-Regolament għandu jorbot fl-intier tiegħu u japplika direttament fl-Istati Membri kollha.
Magħmul fi Brussell, is-16 ta’ Novembru 2021.
Għall-Kummissjoni
Il-President
Ursula VON DER LEYEN
(1) ĠU L 268, 12.10.2010, p. 1.
(2) Id-Direttiva tal-Kunsill 2006/112/KE tat-28 ta’ Novembru 2006 dwar is-sistema komuni ta’ taxxa fuq il-valur miżjud (ĠU L 347, 11.12.2006, p. 1).
(3) Id-Direttiva tal-Kunsill (UE) 2020/285 tat-18 ta’ Frar 2020 li temenda d-Direttiva 2006/112/KE dwar is-sistema komuni ta’ taxxa fuq il-valur miżjud fir-rigward tal-iskema speċjali għall-impriżi ż-żgħar u r-Regolament (UE) Nru 904/2010 fir-rigward tal-kooperazzjoni amministrattiva u l-iskambju ta’ informazzjoni għall-finijiet tal-monitoraġġ tal-applikazzjoni korretta tal-iskema speċjali għall-impriżi ż-żgħar (ĠU L 62, 2.3.2020, p. 13).
ANNESS I
Informazzjoni li għandha tiġi pprovduta mill-Istati Membri skont l-Artikolu 32(1) tar-Regolament (UE) Nru 904/2010
1. Skema speċjali għall-kontabilità bbażata fuq il-ħlasijiet
L-Artikolu 167a tad-Direttiva 2006/112/KE — skema fakultattiva għall-kontabilità bbażata fuq il-ħlasijiet
Mistoqsija 1. Huwa possibbli li fl-Istat Membru tiegħek isir użu mill-iskema speċjali għall-kontabilità bbażata fuq il-ħlasijiet?
Mistoqsija 2. Jekk iva, liema huwa l-limitu fis-seħħ? Jekk jogħġbok indikah f’EUR u fil-munita nazzjonali tiegħek.
2. Skema speċjali għall-impriżi ż-żgħar
It-Titolu XII, il-Kapitolu 1, it-Taqsima 1, tad-Direttiva 2006/112/KE
L-Artikolu 281 – Proċeduri simplifikati għall-impożizzjoni u l-ġbir
Mistoqsija 3. Tapplika proċeduri simplifikati, bħall-iskemi b’rata fissa, għall-impożizzjoni u l-ġbir tal-VAT għall-impriżi ż-żgħar?
Mistoqsija 4a. Jekk iva, liema proċeduri simplifikati tapplika għall-impriżi ż-żgħar?
Mistoqsija 4b. Taħt liema kundizzjonijiet jew limiti tapplika proċeduri simplifikati bħal dawn?
It-Titolu XII, il-Kapitolu 1, it-Taqsima 2, tad-Direttiva 2006/112/KE
L-Artikoli 282-290 tad-Direttiva 2006/112/KE— Eżenzjonijiet
Mistoqsija 5. Tapplika l-iskema speċjali għall-impriżi ż-żgħar kif stabbilita fit-Titolu XII, il-Kapitolu 1, it-Taqsima 2, tad-Direttiva 2006/112/KE?
Mistoqsija 6a. Jekk iva, minn liema data?
Mistoqsija 6b. Jekk le, iżda applikajtha fil-passat, sa liema data?
L-Artikolu 283(2) tad-Direttiva 2006/112/KE – Esklużjonijiet
Mistoqsija 7. Liema tranżazzjonijiet huma esklużi mill-eżenzjoni skont l-iskema speċjali għall-impriżi ż-żgħar kif applikata mill-Istat Membru tiegħek?
L-Artikolu 284(1) tad-Direttiva 2006/112/KE – Limitu
Mistoqsija 8. Liema huwa/huma l-livell(i) tal-limitu/i tal-fatturat annwali fis-seħħ biex tibbenefika mill-eżenzjoni (limitu/i tal-eżenzjoni) fl-Istat Membru tiegħek? Jekk jogħġbok indikah f’EUR u fil-munita nazzjonali tiegħek.
Mistoqsija 9. Il-livell(i) attwali tal-limitu/i tal-eżenzjoni, minn liema data ilu/ilhom fis-seħħ?
Mistoqsija 10. Jekk tapplika aktar minn limitu wieħed, jekk jogħġbok indika l-kriterji għall-ikkwalifikar għall-kategoriji rispettivi ta’ provvisti li għalihom japplikaw il-limiti differenti u indika d-data minn meta dawk il-kriterji japplikaw
L-Artikolu 284(3) tad-Direttiva 2006/112/KE — Numru ta’ identifikazzjoni individwali
Mistoqsija 11. Għall-fini tal-identifikazzjoni msemmija fl-Artikolu 284(3), il-punt (b), tad-Direttiva 2006/112/KE, tuża n-numru ta’ identifikazzjoni tal-VAT individwali diġà allokat lill-persuna taxxabbli fir-rigward tal-obbligi ta’ dik il-persuna skont is-sistema interna jew tapplika l-istruttura ta’ numru tal-VAT jew ta’ kwalunkwe numru ieħor?
L-Artikolu 284c(1) tad-Direttiva 2006/112/KE — Munita
Mistoqsija 12. Għall-finijiet tal-Artikolu 284c(1), l-ewwel subparagrafu, il-punt (b), tad-Direttiva 2006/112/KE, tesiġi li l-valuri jiġu espressi fil-munita nazzjonali tiegħek?
L-Artikolu 284c(2) tad-Direttiva 2006/112/KE — Sottomissjoni tal-informazzjoni
Mistoqsija 13. Tesiġi li l-informazzjoni msemmija fl-Artikolu 284(3) u (4) u fl-Artikolu 284b(1) u (3) tad-Direttiva 2006/112/KE tiġi sottomessa mill-persuna taxxabbli permezz ta’ mezzi elettroniċi?
Mistoqsija 14. Jekk iva, soġġetta għal liema kundizzjonijiet?
L-Artikolu 284d(3) tad-Direttiva 2006/112/KE — Nuqqas ta’ konformità
Mistoqsija 15. Fil-każijiet li fihom persuna taxxabbli tonqos milli tikkonforma mal-obbligi previsti fl-Artikolu 284b tad-Direttiva 2006/112/KE, tesiġi li tali persuna taxxabbli tissodisfa l-obbligi tal-VAT fir-rigward tat-tranżazzjonijiet eżenti mwettqa fl-Istat Membru tiegħek?
Mistoqsija 16. Jekk iva, liema obbligi?
L-Artikolu 288a(1) tad-Direttiva 2006/112/KE — Perjodu tranżitorju
Mistoqsija 17. Fl-Istat Membru tiegħek, l-eżenzjoni prevista fl-Artikolu 284(1) tad-Direttiva 2006/112/KE tieqaf tapplika minn meta jinqabeż il-limitu stipulat f’konformità ma’ dak il-paragrafu, skont l-Artikolu 288a(1), ir-raba’ subparagrafu?
Mistoqsija 18. Jekk dan mhuwiex il-każ u inti tippermetti lill-persuna taxxabbli tkompli tibbenefika mill-eżenzjoni prevista fl-Artikolu 284(1) tad-Direttiva 2006/112/KE matul is-sena kalendarja meta jinqabeż il-limitu, tapplika limitu massimu?
Mistoqsija 19. Jekk iva, tapplika limitu massimu ta’ 10 % jew 25 %?
Mistoqsija 20. Għal kemm snin il-persuna taxxabbli tiġi eskluża mill-iskema speċjali għall-impriżi ż-żgħar wara li tkun qabżet il-limitu tal-eżenzjoni?
L-Artikolu 290 tad-Direttiva 2006/112/KE — Opzjoni għall-persuni taxxabbli li huma intitolati għal eżenzjoni
Mistoqsija 21. Għandek xi kundizzjonijiet jew regoli dettaljati fis-seħħ għall-applikazzjoni tal-opzjoni prevista fl-Artikolu 290 tad-Direttiva 2006/112/KE?
Mistoqsija 22. Jekk iva, liema regoli u kundizzjonijiet tapplika?
It-Titolu XII, il-Kapitolu 1, it-Taqsima 2a, tad-Direttiva 2006/112/KE
L-Artikoli 292a-292d tad-Direttiva 2006/112/KE – Simplifikazzjoni tal-obbligi għall-impriżi ż-żgħar eżenti
Mistoqsija 23. Lill-impriżi ż-żgħar stabbiliti fit-territorju tal-Istat Membru tiegħek, li jagħmlu użu mill-eżenzjoni fl-Istat Membru tiegħek, tneħħilhom kwalunkwe obbligu?
Mistoqsija 24. Jekk iva, liema obbligi?
Mistoqsija 25. Lill-impriżi ż-żgħar eżenti tneħħilhom kwalunkwe obbligu minn dawk imsemmija fl-Artikoli 217 sa 271 tad-Direttiva 2006/112/KE, skont l-Artikolu 292d tad-Direttiva 2006/112/KE?
Mistoqsija 26. Jekk iva, liema obbligi?
ANNESS II
Informazzjoni li għandha tiġi trażmessa mill-Istat Membru ta’ stabbiliment lill-Istat(i) Membru/i li jikkonċedi/u l-eżenzjoni skont l-Artikolu 37a(1) tar-Regolament (UE) Nru 904/2010
li għandha tiġi trażmessa permezz ta’ mezzi elettroniċi fi żmien 15-il jum tax-xogħol mid-data li fiha l-informazzjoni ssir disponibbli
|
1. |
Fir-rigward tan-notifika minn qabel jew l-aġġornament ta’ notifika minn qabel kif imsemmija fl-Artikolu 284(3) jew (4) tad-Direttiva 2006/112/KE:
|
|
2. |
Fir-rigward tal-persuni taxxabbli b’fatturat annwali fl-Unjoni li jaqbeż EUR 100 000 kif imsemmi fl-Artikolu 284(2), il-punt (a), tad-Direttiva 2006/112/KE:
|
|
3. |
Fir-rigward tal-persuni taxxabbli li jkunu naqsu milli jikkonformaw mal-obbligi ta’ rappurtar stipulati fl-Artikolu 284b tad-Direttiva 2006/112/KE:
|
ANNESS III
Informazzjoni li għandha tiġi trażmessa mill-Istat(i) Membru/i li jikkonċedi/u l-eżenzjoni lill-Istat Membru ta’ stabbiliment skont l-Artikolu 37b(2) u (3) tar-Regolament (UE) Nru 904/2010
li għandha tiġi trażmessa permezz ta’ mezzi elettroniċi fi żmien 15-il jum tax-xogħol wara li tiġi riċevuta l-informazzjoni msemmija fil-punt 1(a) tal-Anness II
|
1. |
Fir-rigward tan-notifika minn qabel jew aġġornament ta’ notifika minn qabel, kif imsemmija fl-Artikolu 284(3) jew (4) tad-Direttiva 2006/112/KE, sabiex l-Istat Membru ta’ stabbiliment jiġi infurmat bl-eliġibbiltà ta’ persuna taxxabbli għall-eżenzjoni f’dak l-Istat Membru:
|
li għandha tiġi trażmessa permezz ta’ mezzi elettroniċi mingħajr dewmien
|
2. |
Fir-rigward tal-persuni taxxabbli li ma baqgħux eliġibbli għall-eżenzjoni:
|
|
3. |
Fir-rigward tal-waqfien tal-applikazzjoni tal-iskema speċjali għall-impriżi ż-żgħar fl-Istat Membru li jikkonċedi l-eżenzjoni, imsemmi fl-Artikolu 284e(b) tad-Direttiva 2006/112/KE:
|