(1)

Leasaíodh Teideal XII, Caibidil 1, de Threoir 2006/112/CE ón gComhairle (2), lena bhforáiltear maidir le scéim speisialta le haghaidh fiontair bheaga le Treoir (AE) 2020/285 ón gComhairle (3).

(2)

Leasaíodh Rialachán (AE) Uimh. 904/2010 freisin le Treoir (AE) 2020/285, Rialachán lena leagtar síos rialacha maidir leis an gcomhar riaracháin agus calaois a chomhrac i réimse na cánach breisluacha (CBL). Airteagal 17(1), pointe (g), Airteagal 21(2b), Airteagal 32(1), Airteagal 37a agus Airteagal 37b den Rialachán sin, baineann siad go sonrach le stóráil, le ceadú uathoibrithe agus le tarchur na faisnéise a bhaineann leis an scéim speisialta sin. Na bearta is gá chun na leasuithe sin a chomhlíonadh, tá siad le feidhm a bheith acu ón 1 Eanáir 2025.

(3)

Chun an ceadú uathoibrithe a éascú, is gá sonraí praiticiúla agus sonraíochtaí a shainiú maidir leis an rochtain atá le tabhairt ag Ballstát d’údarás inniúil aon Bhallstáit eile ar fhaisnéis, amhail sonraí aitheantais agus luach soláthairtí earraí agus seirbhísí a dhéanann an duine inchánach a bhaineann leas as an scéim speisialta arna cur i bhfeidhm ag an mBallstát ina ndéantar an soláthar.

(4)

Chun a áirithiú go malartaítear an fhaisnéis dá dtagraítear in Airteagal 37a(1) agus Airteagal 37b(2) agus (3) de Rialachán (AE) Uimh. 904/2010 ar bhealach aonfhoirmeach, tá an Coimisiún le socruithe praiticiúla a ghlacadh le haghaidh malartú den sórt sin, lena n-áirítear teachtaireacht leictreonach choiteann. Mar thoradh air sin, d’fhéadfaí forbairt aonfhoirmeach a dhéanamh ar shonraíochtaí teicniúla agus feidhmiúla freisin, mar go leanfaidís creat rialáilte.

(5)

Leis na socruithe praiticiúla sin, ba cheart tarchur agus próiseáil éifeachtach na faisnéise a bhaineann le clárú fiontar beag a áirithiú go háirithe, clárú is gá chun gur féidir leo leas a bhaint as an scéim speisialta lasmuigh dá mBallstát bunaíochta, toisc go mbeadh ar na Ballstáit modhnú a dhéanamh ar a gcomhéadan leictreonach a dearadh don scéim nach gceadaítear léi ach díolúine a dheonú d’fhiontair a bunaíodh sa Bhallstát ina bhfuil CBL dlite, ionas gur féidir an fhaisnéis sin a mhalartú ar bhealach aonfhoirmeach.

(6)

Faisnéis a bhaineann le hathruithe ar shonraí aitheantais, amhail eisiamh ón scéim speisialta, ba cheart í a mhalartú ar bhealach aonfhoirmeach chun é a chur ar a gcumas do na Ballstáit faireachán a dhéanamh ar chur i bhfeidhm ceart na scéime speisialta ar a gcríoch agus calaois a chomhrac. Chuige sin, ba cheart socruithe coiteanna a sholáthar maidir le malartú na faisnéise sin go leictreonach.

(7)

Chun an t-ualach riaracháin ar dhaoine inchánacha a íoslaghdú, agus faireachán á dhéanamh ar chur i bhfeidhm ceart na scéime speisialta, is gá íoscheanglais áirithe a bhunú maidir leis an gcomhéadan leictreonach i gcás réamhfhógraí arna gcur isteach ag daoine inchánacha. Níor cheart, áfach, cosc a chur ar na Ballstáit feidhmiúlachtaí breise a sholáthar chun ualaí riaracháin a laghdú a thuilleadh.

(8)

Ba cheart socruithe praiticiúla a chinneadh freisin chun éascú a dhéanamh ar shonraí a sholáthar maidir leis na bearta a d’fhormheas gach Ballstát agus Airteagal 167a, Teideal XI, Caibidil 3, agus Teideal XII, Caibidil 1, de Threoir 2006/112/CE á dtrasuí.

(9)

Ba cheart feidhm a bheith ag an Rialachán seo ón lá a mbeidh feidhm ag Airteagal 17(1), pointe (g), Airteagal 21(2b), Airteagal 32(1), Airteagal 37a agus Airteagal 37b de Rialachán (AE) Uimh. 904/2010.

(10)

Tá na bearta dá bhforáiltear sa Rialachán seo i gcomhréir leis an tuairim ón mBuanchoiste um Chomhar Riaracháin,

(1)

ciallaíonn “scéim speisialta” an scéim speisialta díolúintí le haghaidh fiontair bheaga dá bhforáiltear i dTeideal XII, Caibidil 1, Roinn 2, de Threoir 2006/112/CE;

(2)

ciallaíonn “Ballstát díolúine” an Ballstát a dheonaíonn an díolúine ó CBL do sholáthar earraí agus seirbhísí laistigh dá chríoch arna dhéanamh ag daoine inchánacha atá incháilithe do dhíolúine faoin scéim speisialta;

(3)

ciallaíonn “Ballstát bunaíochta” an Ballstát ina bhfuil an duine inchánach atá ag baint leas as an scéim speisialta bunaithe.

(a)

an uimhir aonair lenar féidir duine inchánach a bhaineann leas as an díolúine in aon cheann de na Ballstáit eile sin a aithint de bhun Airteagal 284(3) de Threoir 2006/112/CE;

(b)

ainm, gníomhaíocht agus earnáil ghnó más ábhartha de bhun Airteagal 284(1), an dara fomhír, de Threoir 2006/112/CE, foirm dhlíthiúil agus seoladh an duine inchánaigh sin;

(c)

i gcás athrú ar an áit bhunaíochta, an dáta óna mbeidh feidhm ag an athrú sin agus, más féidir, an Ballstát ar chinn an duine inchánach é féin a bhunú ann;

(d)

an Ballstát ina bhfuil sé beartaithe ag an duine inchánach leas a bhaint as díolúine a mhéid a bhaineann le réamhfhógra nó le nuashonrú ar réamhfhógra, dá dtagraítear in Airteagal 284(3) nó (4) de Threoir 2006/112/CE;

(e)

na Ballstáit ina mbaineann an duine inchánach leas as díolúine faoi Airteagal 284(2) de Threoir 2006/112/CE;

(f)

dáta tosaithe na díolúine i ngach ceann de na Ballstáit ina mbaineann an duine inchánach leas as díolúine;

(g)

luach iomlán na soláthairtí earraí agus/nó seirbhísí a rinneadh sa Bhallstát ina bhfuil an duine inchánach bunaithe agus i ngach ceann de na Ballstáit eile, luach a shonraítear de réir earnáil ghnó más ábhartha de bhun Airteagal 284c(1), pointe (c), de Threoir 2006/112/CE, le linn bhliain féilire an réamhfhógra nó le linn na mblianta féilire roimh an réamhfhógra, de bhun Airteagal 288a(1) de Threoir 2006/112/CE;

(h)

luach iomlán na soláthairtí earraí agus/nó seirbhísí arna ndéanamh in aghaidh na ráithe féilire sa Bhallstát ina bhfuil an duine inchánach bunaithe agus i ngach ceann de na Ballstáit eile, lena n-áirítear aon leasú ar an luach sin, agus ar luach é a shonraítear de réir earnáil ghnó más ábhartha de bhun Airteagal 284c(1), pointe (c), de Threoir 2006/112/CE, nó “0” mura ndearnadh aon soláthar;

(i)

an dáta a sháraigh an láimhdeachas bliantúil san Aontas an méid dá dtagraítear in Airteagal 284(2), pointe (a), de Threoir 2006/112/CE agus luach iomlán na soláthairtí a rinneadh sa Bhallstát ina bhfuil an duine inchánach bunaithe agus i ngach ceann de na Ballstáit eile, luach a shonraítear de réir earnáil ghnó más ábhartha de bhun Airteagal 284c(1), pointe (c), de Threoir 2006/112/CE, nó “0” mura ndearnadh aon soláthar ó thús na ráithe féilire go dtí an dáta a sáraíodh tairseach láimhdeachais bhliantúil san Aontas;

(j)

an dáta nach bhfuil an duine inchánach incháilithe leis an díolúine a chur i bhfeidhm níos mó agus an Ballstát nó na Ballstáit ina mbeidh éifeacht ag an scor, tar éis réamhfhógra díolúine ón mBallstát, dá dtagraítear in Airteagal 284e, pointe (b), de Threoir 2006/112/CE;

(k)

an dáta a bheidh éifeacht ag cinneadh an duine inchánaigh scor go deonach den scéim díolúine a chur i bhfeidhm agus an Ballstát nó na Ballstáit ina mbeidh éifeacht ag an scor sin;

(l)

an dáta a scoireadh de ghníomhaíochtaí an duine inchánaigh agus na Ballstáit lena mbaineann.