(1)

F'konformità ma' l-Artikolu 17 tad-Direttiva 2002/53/KE, fis-17 ta' Settembru 2004, il-Kummissjoni ppubblikat fis-serje C tal-Ġurnal Uffiċjali ta' l-Unjoni Ewropea elenku ta' sbatax-il varjetà ġenetikament modifikata tal-qamħirrum li huma dderivati mill-organiżmu ġenetikament modifikat MON 810, fit-13-il suppliment għat-22 edizzjoni sħiħa tal-katalogu komuni tal-varjetajiet ta' l-ispeċijiet ta' pjanti agrikoli (2).

(2)

Skond l-Artikolu 16(1) tad-Direttiva msemmija, l-Istati Membri jeħtiġilhom jiżguraw li, b'effett mill-pubblikazzjoni msemmija fl-Artikolu 17, iż-żrieragħ ta' varjetajiet aċċettati f'konformità ma' dik id-Direttiva jew skond il-prinċipji li jikkorrispondu għal dawk ta' dik id-Direttiva, f'dak li jirrigwarda t-tqegħid fis-suq tagħhom, mhumiex suġġetti għal xi restrizzjonijiet li għandhom x'jaqsmu mal-varjetà.

(3)

Skond l-Artikolu 7(4) tad-Direttiva msemmija, varjetajiet ġenetikament immodifikati jiġu aċċettati għall-inklużjoni f'katalogu nazzjonali biss wara li jkunu ġew aċċettati għat-tqegħid fis-suq skond id-Direttiva 90/220/KEE (3), li postha issa ttieħed mid-Direttiva 2001/18/KE (4), li tipprovdi għall-evalwazzjoni tar-riskji li organiżmi ġenetikament modifikati jqajmu għas-saħħa umana u għall-ambjent.

(4)

Id-Deċiżjoni tal-Kummissjoni 98/294/KE tat-22 ta' April 1998 dwar it-tqegħid fis-suq tal-qamħirrum ġenetikament modifikat (Zea mays L. linja MON 810), skond id-Direttiva tal-Kunsill 90/220/KEE (5), iddeċidiet li jingħata l-kunsens għat-tqegħid fis-suq ta' dak il-prodott. Fil-3 ta' Awissu 1998, l-awtoritajiet Franċiżi effettivament ippermettew it-tqegħid fuq is-suq ta' dak il-prodott.

(5)

Fil-31 ta' Marzu 2005, il-Kummissjoni rċeviet mingħand ir-Repubblika tal-Polonja talba għall-projbizzjoni, fuq il-bażi ta' l-Artikolu 16(2) tad-Direttiva 2002/53/KE dwar l-użu u t-tqegħid fis-suq ta' materjal seminali minn sbatax-il varjetà ġenetikament modifikata tal-qamħirrum tal-linja MON 810. Talba modifikata ntbagħtet fl-24 ta' Ġunju 2005, bl-ispeċifikazzjoni li kienet ibbażata fuq l-Artikolu 16(2)(b). Fid-9 ta' Diċembru 2005, il-Polonja infurmat lill-Kummmissjoni li t-talba ma tapplikax għall-varjetà Novelis imsemmija fit-talba oriġinali. Il-Polonja speċifikat ukoll li t-talba għall-bqija tal-varjetajiet hija għall-perjodu ta' żmien bla limitu.

(6)

Mit-tagħrif disponibbli dwar is-sittax-il varjetà kkonċernati, huwa magħruf li mhumiex tajbin għall-kultivazzjoni fi kwalunkwe parti mill-Plonja, minħabba l-klassi għolja wisq tal-maturità tagħhom, li hija talanqas ta' 350 fl-indiċi ta' l-FAO jew ekwivalenti. Il-fatturi klimatiċi u agrikoli kkonċernati jipprovdu ostaklu permanenti għall-kultivazzjoni ta' dawn il-varjetajiet fil-Polonja.

(7)

F'dawn iċ-ċirkostanzi, l-applikazzjoni tar-Repubblika tal-Polonja għandha tiġi milqugħa fuq il-bażi ta' l-Artikolu 16(2)(b) fir-rigward tas-sittax-il varjetà ġenetikament modifikata tal-qamħirrum ikkonċernati.

(8)

Sabiex il-Kummissjoni tkun tista' tinforma lill-Istati Membri l-oħra u taġġorna l-katalogu komuni tal-varjetajiet ta' l-ispeċijiet tal-pjanti li dwaru tiddisponi d-Direttiva 2002/53/KE, il-Polonja għandha tiġi awtorizzata tinforma lill-Kummissjoni meta tutilizza l-awtorizzazzjoni mogħtija b'din id-Deċiżjoni.

(9)

Ir-Repubblika tal-Polonja għamlet talba simili għal varjetajiet ta' qamħirrum li mhumiex ġenetikament modifikati. Minħabba li talbiet bħal dawn huma rregolati minn proċedura oħra, dan sejjer ikun is-suġġett ta' Deċiżjoni separata.

(10)

Il-miżuri previsti f'din id-Deċiżjoni huma skond l-opinjoni tal-Kumitat Permanenti dwar iż-Żrieragħ u l-Materjal ta' Propagazzjoni għall-Agrikoltura, l-Ortikultura u l-Foresterija.