(1)

Abbażi ta’ valutazzjoni preliminari tar-riskju, ir-Regolament ta’ Implimentazzjoni tal-Kummissjoni (UE) 2018/2019 (2), jistabbilixxi lista ta’ pjanti, ta’ prodotti mill-pjanti u ta’ oġġetti oħra b’riskju għoli.

(2)

Ir-Regolament ta’ Implimentazzjoni tal-Kummissjoni (UE) 2018/2018 (3) jistabbilixxi regoli speċifiċi dwar il-proċedura li għandha tiġi segwita biex issir il-valutazzjoni tar-riskju msemmija fl-Artikolu 42(4) tar-Regolament (UE) 2016/2031 għal dawk il-pjanti, il-prodotti mill-pjanti u l-oġġetti l-oħra ta’ riskju għoli.

(3)

Wara valutazzjoni preliminari tar-riskju, fl-Anness tar-Regolament ta’ Implimentazzjoni (UE) 2018/2019 iddaħħlu 34 ġeneru u speċi waħda ta' pjanti għat-tħawwil li joriġinaw mill-pajjiżi terzi kollha, bħala pjanti ta’ riskju għoli, li fosthom hemm il-ġeneru Corylus L.

(4)

Fid-29 ta’ Mejju 2020, is-Serbja ressqet talba lill-Kummissjoni għall-esportazzjoni lejn l-Unjoni ta’ pjanti għat-tħawwil ta’ bejn sena u tliet snin bl-għeruq mikxufa ta’ Corylus avellana L. u Corylus avellana L. imlaqqma fuq Corylus colurna L., u pjanti għat-tħawwil ta’ sentejn ta’ Corylus avellana L. b’materjal għat-tkabbir, li huma reqdin u ħielsa mill-weraq. Dik it-talba kienet appoġġata mid-dossier tekniku rispettiv.

(5)

Fil-25 ta’ Marzu 2021, l-Awtorità Ewropea dwar is-Sigurtà fl-Ikel (“l-Awtorità”) adottat opinjoni xjentifika dwar il-valutazzjoni tar-riskju ta’ komodità tal-pjanti għat-tħawwil Corylus avellana u Corylus colurna mis-Serbja (4). L-Awtorità identifikat il-fitoplażma Flavescence dorée tad-dwieli bħala pest rilevanti għal dawk il-pjanti għat-tħawwil. Dan il-pest huwa elenkat fil-Parti B, it-Taqsima F, tal-Anness II tar-Regolament ta’ Implimentazzjoni tal-Kummissjoni (UE) 2019/2072 (5), bħala pest ta’ kwarantina fl-Unjoni magħruf li jseħħ fit-territorju tal-Unjoni.

(6)

Abbażi ta’ dik l-opinjoni, il-Kummissjoni tqis li r-riskju fitosanitarju tal-introduzzjoni fl-Unjoni ta’ pjanti għat-tħawwil ta’ Corylus avellana L. u Corylus colurna L. li joriġinaw mis-Serbja, huwa aċċettabbli, dment li jkun hemm konformità mar-rekwiżiti speċjali tal-importazzjoni rispettivi stabbiliti fl-Anness VII tar-Regolament ta’ Implimentazzjoni (UE) 2019/2072. Din il-konsiderazzjoni tapplika għall-pjanti kollha għat-tħawwil ta’ dawk l-ispeċijiet, irrispettivament mill-età tagħhom jew jekk għandhomx għeruq mikxufa, humiex rieqda, jew humiex ħielsa mill-weraq.

(7)

B’hekk, jenħtieġ li dawk il-pjanti għat-tħawwil ma jibqgħux jitqiesu bħala pjanti b’riskju għoli. Jenħtieġ li għalhekk l-Anness tar-Regolament ta’ Implimentazzjoni tal-Kummissjoni (UE) 2018/2019 jiġi emendat skont dan.

(8)

Jenħtieġ li sabiex ikun hemm konformità mal-obbligi tal-Unjoni li jirriżultaw mill-ftehim tal-Organizzazzjoni Dinjija tal-Kummerċ dwar l-applikazzjoni ta’ miżuri sanitarji u fitosanitarji (6), l-importazzjoni ta’ dawk il-komoditajiet bażiċi tkompli fl-iqsar żmien possibbli. Jenħtieġ li għalhekk dan ir-Regolament jidħol fis-seħħ fit-tielet jum wara dak tal-pubblikazzjoni tiegħu.

(9)

Il-miżuri previsti f’dan ir-Regolament huma konformi mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,