|
21.2.2022 |
GA |
Iris Oifigiúil an Aontais Eorpaigh |
L 40/8 |
RIALACHÁN (AE) 2022/238 ÓN gCOMHAIRLE
an 21 Feabhra 2022
lena leasaítear Rialachán (AE) Uimh. 401/2013 a bhaineann le bearta sriantacha i bhfianaise na staide in Maenmar/Burma
TÁ COMHAIRLE AN AONTAIS EORPAIGH,
Ag féachaint don Chonradh ar Fheidhmiú an Aontais Eorpaigh, agus go háirithe Airteagal 215 de,
Ag féachaint do Chinneadh (CBES) 2022/243 ón gComhairle an 21 Feabhra 2022 lena leasaítear Cinneadh 2013/184/CBES a bhaineann le bearta sriantacha i bhfianaise na staide i Maenmar/Burma (1) ,
Ag féachaint don togra comhpháirteach ó Ardionadaí an Aontais do Ghnóthaí Eachtracha agus don Bheartas Slándála agus ón gCoimisiún Eorpach,
De bharr an mhéid seo a leanas:
|
(1) |
Le Rialachán (AE) Uimh. 401/2013 ón gComhairle (2), tugtar éifeacht do roinnt beart dá bhforáiltear le Cinneadh 2013/184/CBES ón gComhairle (3), lena n-áirítear cistí agus acmhainní eacnamaíocha daoine nádúrtha nó dlítheanacha, eintiteas agus comhlachtaí áirithe a reo. |
|
(2) |
I bhfianaise na staide tromchúisí atá ag leanúint ar aghaidh i Maenmar/Burma, an 21 Feabhra 2022 ghlac an Chomhairle Cinneadh (CBES) 2022/243 , lena gcuirtear 22 dhuine agus ceithre eintiteas le liosta na ndaoine agus na n-eintiteas atá faoi réir bearta sriantacha a leagtar amach san Iarscríbhinn a ghabhann le Cinneadh 2013/184/CBES. |
|
(3) |
Chun iarmhairtí neamhbheartaithe ó ainmniú ceann de na heintitis sin a sheachaint, le Cinneadh (CBES) 2022/243 tugtar isteach i gCinneadh 2013/184/CBES maolú nua i ndáil le sócmhainní a reo agus i ndáil le toirmeasc ar chistí nó acmhainní eacnamaíocha a chur ar fáil don eintitis sin. Leis an maolú sin, fágfaidh sé go mbeidh cead ag oibreoirí an Aontais toibreacha ola agus gáis a dhíchoimisiúnú i gcomhréir le caighdeáin idirnáisiúnta agus conarthaí a fhoirceannadh leis an eintiteas sin. |
|
(4) |
Ba cheart, dá bhrí sin, Rialachán (AE) Uimh. 401/2013 a leasú dá réir. |
|
(5) |
Chun a áirithiú go mbeidh na bearta dá bhforáiltear sa Rialachán seo éifeachtach, ba cheart an Rialachán seo a theacht i bhfeidhm láithreach, |
TAR ÉIS AN RIALACHÁN SEO A GHLACADH:
Airteagal 1
I Rialachán (AE) Uimh. 401/2013, cuirtear an t-airteagal seo a leanas isteach:
“Airteagal 4db
De mhaolú ar Airteagal 4a, féadfaidh údaráis inniúla Ballstáit a údarú go ndéanfar cistí reoite áirithe nó acmhainní eacnamaíocha áirithe a scaoileadh, cistí nó acmhainní ar leis an eintiteas atá liostaithe in iontráil 10 in Iarscríbhinn IV iad, nó cistí nó acmhainní eacnamaíocha áirithe a chur ar fáil don eintiteas sin, faoi choinníollacha a mheasfaidh na húdaráis inniúla is iomchuí, tar éis dóibh a chinneadh go bhfuil cistí nó acmhainní eacnamaíocha den sórt sin riachtanach don eintiteas sin le haghaidh an mhéid seo a leanas:
|
(a) |
cúraimí a bhaineann le díchoimisiúnú toibreacha ola agus gáis i gcomhréir le caighdeáin idirnáisiúnta, amhail diúscairt dramhaíola, gníomhaíochtaí feabhsúcháin láithreán atá ag teastáil le haghaidh sábháilteachta agus athchóiriú comhshaoil, cúnamh teicniúil gaolmhar a sholáthar, agus cánacha agus dleachtanna gaolmhara a íoc, chomh maith le tuarastail agus sochair shóisialta a íoc le fostaithe; nó |
|
(b) |
roimh an 31 Iúil 2022, maidir leis na scaireanna agus na leasanna, an t-aistriú is gá chun conarthaí a fhoirceannadh arna gcur i gcrích leis an eintiteas a liostaítear in iontráil 10 in Iarscríbhinn IV roimh an 21 Feabhra 2022.”. |
Airteagal 2
Tiocfaidh an Rialachán seo i bhfeidhm ar dháta a fhoilsithe in Iris Oifigiúil an Aontais Eorpaigh.
Beidh an Rialachán seo ina cheangal go huile agus go hiomlán agus beidh sé infheidhme go díreach i ngach Ballstát.
Arna dhéanamh sa Bhruiséil, 21 Feabhra 2022.
Thar ceann na Comhairle
An tUachtarán
J. BORRELL FONTELLES
(1) Féach leathanach 28 den Iris Oifigiúil seo.
(2) Rialachán (AE) Uimh. 401/2013 ón gComhairle an 2 Bealtaine 2013 a bhaineann le bearta sriantacha i ndáil le Maenmar/Burma agus lena n-aisghairtear Rialachán (CE) Uimh. 194/2008 (IO L 121, 3.5.2013, lch. 1).
(3) Cinneadh 2013/184/CBES ón gComhairle an 22 Aibreán 2013 a bhaineann le bearta sriantacha i gcoinne Mhaenmar/Burma agus lena n-aisghairtear Cinneadh 2010/232/CBES (IO L 111, 23.4.2013, lch. 75).