(1)

Kif rikonoxxut fil-Preambolu għall-Protokoll tal-2014 għall-Konvenzjoni Nru 29 dwar ix-xogħol furzat (il-Konvenzjoni Nru 29 tal-ILO) tal-Organizzazzjoni Internazzjonali tax-Xogħol (ILO), ix-xogħol furzat jikkostitwixxi ksur serju tad-dinjità tal-bniedem u tad-drittijiet fundamentali tal-bniedem, jikkontribwixxi għat-tkomplija tal-faqar u jxekkel lil kulħadd milli jkollu xogħol deċenti. L-ILO ddikjarat l-eliminazzjoni ta’ kull forma ta’ xogħol furzat jew obbligatorju bħala prinċipju tad-drittijiet fundamentali. L-ILO tikklassifika l-Konvenzjoni Nru 29 tal-ILO, inkluż l-issupplimentar tal-Protokoll tal-2014 għall-Konvenzjoni Nru 29 u l-Konvenzjoni Nru 105 tal-ILO dwar l-abolizzjoni tax-xogħol furzat (il-Konvenzjoni Nru 105 tal-ILO) bħala konvenzjonijiet fundamentali tal-ILO u toħroġ rakkomandazzjonijiet biex ix-xogħol furzat jinżamm milli jseħħ, jiġi eliminat u jiġi rimedjat, bħar-Rakkomandazzjoni dwar ix-Xogħol Furzat (Miżuri Supplimentari) Nru 203. L-ILO żviluppat diversi indikaturi użati biex tidentifika u tindika każijiet ta’ xogħol furzat, bħat-theddid u l-ħsara fiżika u sesswali reali, l-abbuż ta’ vulnerabbiltà, l-abbuż ta’ kundizzjonijiet tax-xogħol u tal-għajxien u s-sahra eċċessiva, il-qerq, ir-restrizzjoni tal-moviment jew il-konfinament għall-post tax-xogħol jew żona limitata, l-iżolament, il-jasar tad-dejn, iż-żamma tal-pagi jew it-tnaqqis eċċessiv fil-pagi, iż-żamma ta’ passaporti u ta’ dokumenti tal-identità jew it-theddida ta’ denunzja lill-awtoritajiet meta l-ħaddiem ikollu status ta’ immigrazzjoni irregolari. Ix-xogħol furzat huwa ħafna drabi marbut mal-faqar u d-diskriminazzjoni. Il-manipulazzjoni tal-kreditu u tad-dejn, jew mill-impjegaturi jew inkella mill-aġenti ta’ reklutaġġ, għadha fattur ewlieni li jżomm lil ħaddiema vulnerabbli “ostaġġi” f’sitwazzjonijiet ta’ xogħol furzat. Skont il-korpi superviżorji tal-ILO, ix-xogħol fil-ħabsijiet, inkluż meta jitwettaq għal kumpaniji privati, ma jikkostitwixxix fih innifsu xogħol furzat, dment li dan isir fuq bażi volontarja, għall-benefiċċju tal-priġunier u huwa komparabbli mal-kundizzjonijiet ta’ relazzjoni tax-xogħol ħielsa. Ix-xogħol komunitarju bħala sanzjoni penali alternattiva għall-priġunerija jenħtieġ li dejjem ikun fl-interess pubbliku u jenħtieġ li, fl-ebda ċirkostanza, ma jiġi abbużat mill-istati bħala mezz biex jiddegradaw il-persuna kkundannata jew biex iċaħħdu dik il-persuna mid-dinjità tagħha. F’każijiet li fihom ix-xogħol jew is-servizz jiġi impost billi tiġi sfruttata l-vulnerabbiltà tal-ħaddiem, b’theddida ta’ penali, dik it-theddida ma għandhiex bżonn tieħu l-forma ta’ sanzjoni penali iżda tista’ tieħu l-forma ta’ telf ta’ drittijiet jew benefiċċji.

(2)

L-użu tax-xogħol furzat huwa mifrux madwar id-dinja. Huwa stmat li madwar 27,6 miljun persuna kienu f’sitwazzjonijiet ta’ xogħol furzat fl-2021. Gruppi vulnerabbli u marġinalizzati f’soċjetà huma partikolarment suxxettibli li jiġu mġegħlin iwettqu xogħol furzat. Tali gruppi jinkludu n-nisa, it-tfal, il-minoranzi etniċi, il-persuni b’diżabilità, il-persuni minn kasti aktar baxxi, il-persuni indiġeni u tribali u l-migranti, speċjalment migranti mingħajr dokumenti, li għandhom status prekarju u li joperaw fl-ekonomija informali. Anke meta ma jkunx impost mill-Istat, ix-xogħol furzat spiss ikun konsegwenza tal-assenza jew in-nuqqas ta’ governanza tajba fir-rigward ta’ ċerti operaturi ekonomiċi u wirja tal-falliment tal-istat li jinforza d-drittijiet soċjali u tal-ħaddiema, b’mod partikolari għal gruppi vulnerabbli u marġinalizzati. Ix-xogħol furzat jista’ jseħħ ukoll bħala riżultat tal-kunsens taċitu tal-awtoritajiet. 86 % tal-każijiet kollha ta’ xogħol furzat iseħħ fis-settur privat, b’mod partikolari permezz tal-isfruttament tax-xogħol furzat ta’ 17,3-il miljun persuna. L-obbligi tal-operaturi ekonomiċi stabbiliti f’dan ir-Regolament jenħtieġ li jkunu prevedibbli u ċari sabiex tiġi żgurata konformità sħiħa u effettiva u jingħata kontribut biex jintemm ix-xogħol furzat.

(3)

L-eradikazzjoni tax-xogħol furzat fil-forom kollha tiegħu, inkluż ix-xogħol furzat impost mill-Istat, hija prijorità għall-Unjoni. Ir-rispett għad-dinjità tal-bniedem u l-universalità u l-indiviżibbiltà tad-drittijiet tal-bniedem huma stabbiliti bis-sħiħ fl-Artikolu 21 tat-Trattat dwar l-Unjoni Ewropea (TUE). Sabiex tintlaħaq il-Mira 8.7 tal-Għanijiet ta’ Żvilupp Sostenibbli tan-Nazzjonijiet Uniti, l-Unjoni jenħtieġ li tirrispetta u tippromwovi l-valuri tagħha u tikkontribwixxi għall-protezzjoni tad-drittijiet tal-bniedem, b’mod partikolari d-drittijiet tat-tfal. L-Artikolu 5 tal-Karta tad-Drittijiet Fundamentali tal-Unjoni Ewropea (il-“Karta”) jipprojbixxi b’mod espliċitu l-iskjavitù, is-servitù, ix-xogħol furzat jew obbligatorju u t-traffikar ta’ bnedmin, u l-Artikolu 4 tal-Konvenzjoni Ewropea għall-Protezzjoni tad-Drittijiet tal-Bniedem u tal-Libertajiet Fundamentali jipprevedi li ħadd ma għandu jkun meħtieġ iwettaq xogħol furzat jew obbligatorju. Il-Qorti Ewropea tad-Drittijiet tal-Bniedem interpretat ripetutament l-Artikolu 4 tal-Konvenzjoni Ewropea għall-Protezzjoni tad-Drittijiet tal-Bniedem u tal-Libertajiet Fundamentali bħala li jirrikjedi li l-Istati Membri jippenalizzaw u jipprosegwixxu b’mod effettiv kwalunkwe att li jżomm persuna fis-sitwazzjonijiet stabbiliti f’dak l-Artikolu. Id-dritt għal rimedji effettivi għall-ksur tad-drittijiet fundamentali huwa dritt tal-bniedem, u element fundamentali fil-proċess ta’ prosekuzzjoni effettiva tar-reati. Il-liġi eżistenti tal-Unjoni, il-Prinċipji Gwida tan-Nazzjonijiet Uniti dwar in-Negozju u d-Drittijiet tal-Bniedem (UNGP), ir-rakkomandazzjoni tal-Kunsill tal-Ewropa dwar id-drittijiet tal-bniedem u n-negozju u l-linji gwida tal-Organizzazzjoni għall-Kooperazzjoni u l-Iżvilupp Ekonomiċi (“OECD”), bħall-Linji gwida għall-Impriżi Multinazzjonali dwar Imġiba Responsabbli fin-Negozju, jaffermaw li l-vittmi għandhom id-dritt għal rimedju effettiv għall-ksur jew għall-abbużi tad-drittijiet tal-bniedem relatati man-negozju, inkluż ix-xogħol furzat.

(4)

L-Istati Membri kollha rratifikaw il-konvenzjonijiet fundamentali tal-ILO fil-qasam tax-xogħol furzat, jiġifieri l-Konvenzjoni Nru 29 tal-ILO u l-Konvenzjoni Nru 105 tal-ILO, u l-Konvenzjoni Nru 182 tal-ILO dwar l-Agħar Forom ta’ Xogħol Furzat tat-Tfal (“Konvenzjoni Nru 182 tal-ILO”). Għalhekk, huma legalment obbligati jipprevjenu u jeliminaw l-użu tax-xogħol furzat u li jirrapportaw regolarment lill-ILO.

(5)

Permezz tal-politiki u l-inizjattivi leġiżlattivi tagħha, l-Unjoni tfittex li teqred l-użu tax-xogħol furzat u tippromwovi x-xogħol deċenti u d-drittijiet tal-ħaddiema mad-dinja kollha. L-Unjoni tippromwovi d-diliġenza dovuta f’konformità mal-linji gwida u mal-prinċipji internazzjonali stabbiliti minn organizzazzjonijiet internazzjonali, inklużi l-ILO, l-OECD u n-Nazzjonijiet Uniti, sabiex jiġi żgurat li x-xogħol furzat ma jkollux post fil-ktajjen tal-provvista tal-impriżi stabbiliti fl-Unjoni.

(6)

Il-politika kummerċjali tal-Unjoni tappoġġa l-ġlieda kontra x-xogħol furzat f’relazzjonijiet kummerċjali kemm unilaterali kif ukoll bilaterali. Il-kapitoli dwar il-kummerċ u l-iżvilupp sostenibbli tal-ftehimiet kummerċjali tal-Unjoni jinkludu impenn sabiex jiġu ratifikati u implimentati b’mod effettiv il-konvenzjonijiet fundamentali tal-ILO, li jinkludu l-Konvenzjoni Nru 29 tal-ILO u l-Konvenzjoni Nru 105 tal-ILO, filwaqt li d-dispożizzjonijiet tal-kummerċ u tal-ġeneri jistabbilixxu lenti tal-ġeneru li tkun essenzjali għat-tisħiħ ekonomiku tal-pożizzjoni tan-nisa sabiex jiġi miġġieled ix-xogħol furzat skont il-ġeneri. Barra minn hekk, il-preferenzi tariffarji unilaterali skont l-Iskema Ġeneralizzata ta’ Preferenzi tal-Unjoni jistgħu jiġu rtirati għal ksur serju u sistematiku tal-Konvenzjoni Nru 29 tal-ILO u tal-Konvenzjoni Nru 105 tal-ILO.

(7)

Ix-xogħol furzat għandu impatt distint fuq il-gruppi vulnerabbli u emarġinati, bħat-tfal, in-nisa, il-migranti, ir-rifuġjati jew il-popli indiġeni, u għalhekk approċċ intersezzjonali u sensittiv għall-ġeneru huwa essenzjali biex jiġi miġġieled ix-xogħol furzat b’mod effettiv. Għalhekk, dan ir-Regolament huwa mistenni li jikkontribwixxi għall-objettivi tal-ftehimiet u l-konvenzjonijiet internazzjonali rilevanti, bħall-Konvenzjoni Nru 182 tal-ILO, il-Konvenzjoni tal-Kunsill tal-Ewropa dwar il-Prevenzjoni u l-Ġlieda Kontra l-Vjolenza fuq in-Nisa u l-Vjolenza Domestika, id-Dikjarazzjoni ta’ Beijing ta’ Settembru 1995, il-Patt Globali għal Migrazzjoni Sikura, Ordnata u Regolari u l-Konvenzjoni ta’ Ġinevra dwar l-Istatus tar-Rifuġjati, id-Dikjarazzjoni tan-Nazzjonijiet Uniti dwar id-Drittijiet tal-Popli Indiġeni u l-Konvenzjoni Nru 169 tal-ILO dwar il-popli indiġeni u tribali.

(8)

Id-Direttiva 2011/36/UE tal-Parlament Ewropew u tal-Kunsill (3) tarmonizza d-definizzjoni tat-traffikar tal-bnedmin, inkluż ix-xogħol jew is-servizzi furzati, u tistabbilixxi regoli dwar penali minimi. Kwalunkwe regola stabbilita li tikkonċerna l-projbizzjoni tat-tqegħid u t-tqegħid għad-dispożizzjoni fis-suq tal-Unjoni ta’ prodotti domestiċi jew importati magħmulin b’xogħol furzat, jew l-esportazzjoni ta’ tali prodotti, u l-obbligu li jiġi żgurat li tali prodotti jiġu rtirati mis-suq tal-Unjoni (“il-projbizzjoni ta’ prodotti magħmula permezz ta’ xogħol furzat”), jenħtieġ li jkun mingħajr preġudizzju għal dik id-Direttiva, u b’mod partikolari għall-kompetenza tal-awtoritajiet tal-infurzar tal-liġi u ġudizzjarji sabiex jinvestigaw u jipproċessaw reati relatati mat-traffikar ta’ bnedmin, inkluż l-isfruttament ta’ ħaddiema.

(9)

Ir-Regolament (UE) 2017/821 tal-Parlament Ewropew u tal-Kunsill (4) jirrikjedi li l-importaturi tal-Unjoni ta’ minerali jew metalli li jaqgħu fil-kamp ta’ applikazzjoni ta’ dak ir-Regolament iwettqu obbligi ta’ diliġenza dovuta konsistenti mal-Anness II tal-Gwida tal-OECD dwar id-Diliġenza Dovuta għal Ktajjen ta’ Provvista Responsabbli tal-Minerali minn Żoni Affettwati mill-Kunflitti u Żoni ta’ Riskju Għoli, u r-rakkomandazzjonijiet dwar id-diliġenza dovuta stabbiliti fih. Ir-Regolament (UE) 2023/1542 tal-Parlament Ewropew u tal-Kunsill (5) fih obbligi għall-operaturi ekonomiċi sabiex iwettqu d-diliġenza dovuta fil-ktajjen tal-provvista tagħhom, inkluż fir-rigward tad-drittijiet tal-ħaddiema. Ir-Regolament (UE) 2023/1115 tal-Parlament Ewropew u tal-Kunsill (6) jirrikjedi diliġenza dovuta rigward ċerti komoditajiet u prodotti assoċjati mad-deforestazzjoni u d-degradazzjoni tal-foresti, inkluż fir-rigward tad-drittijiet tal-bniedem.

(10)

Id-Direttiva 2013/34/UE tal-Parlament Ewropew u tal-Kunsill (7) tirrikjedi li l-Istati Membri jiżguraw li ċerti operaturi ekonomiċi kull sena jippubblikaw dikjarazzjonijiet mhux finanzjarji li fihom jirrapportaw dwar l-impatt tal-attività tagħhom fuq kwistjonijiet ambjentali, soċjali u tal-impjegati u fuq ir-rispett għad-drittijiet tal-bniedem, inkluż fuq ix-xogħol furzat, u fuq kwistjonijiet relatati mal-ġlieda kontra l-korruzzjoni u t-tixħim. Barra minn hekk, id-Direttiva (UE) 2022/2464 tal-Parlament Ewropew u tal-Kunsill (8) dwar ir-rapportar tas-sostenibbiltà korporattiva emendat dak ir-rekwiżit billi introduċiet obbligi ta’ rapportar dettaljati għall-kumpaniji li jaqgħu fil-kamp ta’ applikazzjoni ta’ dik id-Direttiva fir-rigward tar-rispett għad-drittijiet tal-bniedem, inkluż fil-ktajjen tal-provvista globali. L-informazzjoni li l-impriżi jiżvelaw dwar id-drittijiet tal-bniedem jenħtieġ li tinkludi, fejn rilevanti, informazzjoni dwar ix-xogħol furzat fil-ktajjen tal-valur tagħhom.

(11)

Bħala membru tal-Organizzazzjoni Dinjija tal-Kummerċ (WTO), l-Unjoni hija impenjata li tippromwovi sistema ta’ negozjar ibbażata fuq ir-regoli, miftuħa, multilaterali. Kwalunkwe miżura introdotta mill-Unjoni li taffettwa l-kummerċ jenħtieġ li tkun konformi mad-WTO.

(12)

F’Lulju 2021, il-Kummissjoni u s-Servizz Ewropew għall-Azzjoni Esterna ppubblikaw gwida dwar id-diliġenza dovuta għan-negozji tal-UEbiex jiġi indirizzat ir-riskju ta’ xogħol furzat fl-operazzjonijiet u fil-ktajjen tal-provvista tagħhom.

(13)

Kif rikonoxxut fil-komunikazzjoni tal-Kummissjoni tat-23 ta’ Frar 2022 dwar ix-xogħol deċenti madwar id-dinja għal tranżizzjoni ġusta globali u rkupru sostenibbli, minkejja l-politiki attwali u l-qafas leġiżlattiv, hija meħtieġa aktar azzjoni sabiex jintlaħqu l-objettivi tal-eliminazzjoni tal-prodotti mix-xogħol furzat mis-suq tal-Unjoni u, għalhekk, bħala kontribut ulterjuri għall-ġlieda kontra x-xogħol furzat madwar id-dinja.

(14)

Il-prijoritajiet ewlenin tal-Unjoni, kif minquxa fil-Pjan ta’ Azzjoni tal-UE dwar id-Drittijiet tal-Bniedem u d-Demokrazija 2020-2024, jinkludu l-promozzjoni ta’ xogħol deċenti u futur tax-xogħol iċċentrat fuq il-bniedem li jiżgura r-rispett għall-prinċipji fundamentali u d-drittijiet tal-bniedem, il-promozzjoni tad-djalogu soċjali kif ukoll ir-ratifika u l-implimentazzjoni effettiva tal-konvenzjonijiet u l-protokolli rilevanti tal-ILO, it-tisħiħ tal-ġestjoni responsabbli fil-ktajjen tal-provvista globali u l-aċċess għall-protezzjoni soċjali.

(15)

Fir-riżoluzzjonijiet tiegħu tad-9 ta’ Ġunju 2022 dwar strument kummerċjali ġdid biex jiġu pprojbiti l-prodotti magħmulin b’xogħol furzat (9), tas-17 ta’ Diċembru 2020 dwar ix-xogħol furzat u s-sitwazzjoni tal-Ujguri fir-Reġjun Awtonomu Ujgur tax-Xinjiang (10) u tas-16 ta’ Diċembru 2021 dwar ix-xogħol furzat fil-fabbrika Linglong u l-protesti ambjentali fis-Serbja (11) il-Parlament Ewropew ikkundanna bil-qawwa x-xogħol furzat u sejjaħ għal projbizzjoni fuq prodotti magħmulin b’xogħol furzat. Għalhekk, hija kwistjoni ta’ tħassib morali pubbliku li prodotti magħmulin b’xogħol furzat jistgħu jkunu disponibbli fis-suq tal-Unjoni jew li jiġuesportati lejn pajjiżi terzi mingħajr mekkaniżmu effettiv sabiex jiġu pprojbiti jew irtirati prodotti bħal dawn.

(16)

Sabiex jitlesta l-qafas leġiżlattiv u ta’ politika tal-Unjoni dwar ix-xogħol furzat, it-tqegħid u t-tqegħid għad-dispożizzjoni fis-suq tal-Unjoni ta’ prodotti magħmulin b’xogħol furzat jew l-esportazzjoni ta’ prodotti mmanifatturati domestikament jew importati magħmulin b’xogħol furzat jenħtieġ li jkunu pprojbiti u jenħtieġ li jiġi żgurat li dawk il-prodotti jiġu rtirati mis-suq tal-Unjoni.

(17)

Bħalissa ma hemm l-ebda liġi tal-Unjoni li tagħti s-setgħa lill-awtoritajiet tal-Istati Membri li jżommu u jissekwestraw direttament, jew jordnaw l-irtirar ta’ prodott fuq il-bażi ta’ sejba li jkun sar, kemm jekk kompletament kif ukoll parzjalment, b’xogħol furzat.

(18)

Sabiex tiġi żgurata l-effettività ta’ dan ir-Regolament, jenħtieġ li l-projbizzjoni ta’ prodotti magħmulin b’xogħol furzat tapplika għal prodotti li għalihom intuża xogħol furzat fi kwalunkwe stadju tal-produzzjoni, tal-manifattura, tal-ħsad jew tal-estrazzjoni ta’ dawk il-prodotti, inkluż fil-ħidma jew fl-iproċessar relatat ma’ tali prodotti. Jenħtieġ li l-projbizzjoni ta’ prodotti magħmulin b’xogħol furzat tapplika għall-prodotti kollha, ta’ kwalunkwe tip, inklużi l-komponenti tagħhom, u jenħtieġ li tapplika għall-prodotti irrispettivament mis-settur, mill-oriġini, kemm jekk ikunu domestiċi jew importati, jew jitqiegħdu jew jitqiegħdu għad-dispożizzjoni fis-suq tal-Unjoni jew jiġu esportati. Dan ir-Regolament ma japplikax għall-għoti ta’ servizzi tat-trasport.

(19)

Jenħtieġ li l-projbizzjoni ta’ prodotti magħmulin b’xogħol furzat tikkontribwixxi għall-isforzi internazzjonali sabiex jiġi abolit ix-xogħol furzat. Għalhekk, jenħtieġ li d-definizzjoni ta’ “xogħol furzat” tiġi allinjata mad-definizzjoni stabbilita fil-Konvenzjoni Nru 29 tal-ILO li tiddikjara li x-xogħol furzat jew obbligatorju jfisser kull xogħol jew servizz li jsir minn kwalunkwe persuna taħt it-theddida ta’ xi penali u li għalih il-persuna msemmija ma tkunx offriet li tagħmlu b’mod volontarju, bl-esklużjoni ta’ kwalunkwe xogħol jew servizz imwettaq bil-liġijiet dwar is-servizz militari obbligatorju għal xogħol ta’ natura purament militari; kwalunkwe xogħol jew servizz li jifforma parti mill-obbligi ċiviċi normali taċ-ċittadini ta’ pajjiż kompletament awtonomu; kwalunkwe xogħol jew servizz imwettaq minn kwalunkwe persuna bħala konsegwenza ta’ kundanna f’qorti tal-ġustizzja, dment li x-xogħol jew is-servizz imsemmi jitwettaq taħt is-superviżjoni u l-kontroll ta’ awtorità pubblika u li l-imsemmija persuna ma tkunx impjegata jew imqiegħda għad-dispożizzjoni ta’ individwi, kumpaniji jew assoċjazzjonijiet privati; kwalunkwe xogħol jew servizz imwettaq f’każijiet ta’ emerġenza, jiġifieri, fil-każ ta’ gwerra jew ta’ diżastru jew theddida ta’ diżastru, bħal nirien, għargħar, karestija, terremoti, epidemiji vjolenti jew mard epiżootiku, invażjoni minn annimali, insetti jew organiżmi ta’ ħsara veġetali, u b’mod ġenerali kwalunkwe ċirkostanza li tipperikola l-eżistenza jew il-benesseri tal-popolazzjoni kollha jew parti minnha; u servizzi komunali minuri ta’ tip li, billi jitwettqu mill-membri tal-komunità fl-interess dirett tal-imsemmija komunità, jistgħu għalhekk jitqiesu bħala obbligi ċiviċi normali li jaqgħu fuq il-membri tal-komunità, dment li l-membri tal-komunità jew ir-rappreżentanti diretti tagħhom ikollhom id-dritt li jiġu kkonsultati fir-rigward tal-ħtieġa għal tali servizzi.

(20)

Abbażi tad-definizzjoni ta’ xogħol furzat speċifikata fil-Konvenzjoni Nru 29 tal-ILO u użata f’dan ir-Regolament, l-“indikaturi tax-xogħol furzat tal-ILO” u l-linji gwida tal-ILO bit-titolu “Hard to See, Harder to Count” (Diffiċli biex Tarahom, Aktar Diffiċli biex Tgħoddhom) jistabbilixxu l-aktar sinjali komuni li jindikaw l-eżistenza possibbli ta’ xogħol furzat u jenħtieġ li jitqiesu meta jiġi implimentat dan ir-Regolament. Madankollu, dawk l-indikaturi jistgħu ma jkunux biżżejjed għall-identifikazzjoni ta’ xogħol furzat impost minn awtoritajiet tal-Istat, li hija bbażata fuq politiki koerċittivi sistemiċi u globali li jirrikjedu indikaturi addizzjonali u mfassla speċifikament.

(21)

Id-definizzjoni ta’ “xogħol furzat impost mill-awtoritajiet tal-Istat” jenħtieġ li tiġi allinjata mal-Konvenzjoni Nru 105 tal-ILO, li speċifikament tipprojbixxi l-użu ta’ xogħol furzat jew xogħol obbligatorju bħala mezz ta’ koerċizzjoni jew edukazzjoni politika jew bħala kastig għall-espressjoni ta’ fehmiet politiċi jew fehmiet ideoloġikament opposti għas-sistema politika, soċjali jew ekonomika stabbilita. Tipprojbixxi wkoll l-użu ta’ xogħol furzat bħala metodu ta’ mobilizzazzjoni u li jintuża għall-finijiet tal-iżvilupp ekonomiku, bħala mezz ta’ dixxiplina tal-ħaddiema, bħala kastig għall-parteċipazzjoni fi strajks, jew bħala mezz ta’ diskriminazzjoni razzjali, soċjali, nazzjonali jew reliġjuża.

(22)

Il-bejgħ mill-bogħod, inkluż il-bejgħ online, jenħtieġ li jaqa’ wkoll fil-kamp ta’ applikazzjoni ta’ dan ir-Regolament. Fil-każ ta’ prodott offrut li jinbiegħ online jew b’mezzi oħra ta’ bejgħ mill-bogħod, il-prodott jenħtieġ li jitqies li huwa disponibbli fis-suq jekk l-offerta għall-bejgħ tkun immirata għall-utenti finali fl-Unjoni. F’konformità mal-liġi applikabbli tal-Unjoni dwar id-dritt internazzjonali privat, jenħtieġ li titwettaq analiżi każ b’każ sabiex jiġi stabbilit jekk offerta hijiex immirata għall-utenti finali fl-Unjoni. Jenħtieġ li offerta għall-bejgħ titqies bħala mmirata għall-utenti finali fl-Unjoni jekk l-operatur ekonomiku rilevanti jiddirezzjona, bi kwalunkwe mezz, l-attivitajiet tiegħu lejn Stat Membru. Għall-analiżijiet każ b’każ, jenħtieġ li f’dan ir-rigward jitqiesu l-fatturi rilevanti, bħaż-żoni ġeografiċi li lejhom ikun possibbli d-dispaċċ, il-lingwi disponibbli u użati għall-offerta jew għall-ordni, il-mezzi ta’ pagament, l-użu tal-munita tal-Istat Membru jew isem tad-dominju rreġistrat f’wieħed mill-Istati Membri. Fil-każ ta’ bejgħ online, is-sempliċi fatt li l-interfaċċa tal-operaturi ekonomiċi jew l-interfaċċa tal-fornituri tas-swieq online tkun aċċessibbli fl-Istat Membru li fih ikunu stabbiliti jew domiċiljati l-utenti finali ma huwiex biżżejjed. Il-fatt li l-prodotti offruti għall-bejgħ online jew permezz ta’ mezzi oħra ta’ bejgħ mill-bogħod jitqiesu li jkunu disponibbli fis-suq tal-Unjoni jekk l-offerta għall-bejgħ tkun immirata lejn utenti finali fl-Unjoni jagħti s-setgħa lill-awtoritajiet kompetenti li jivverifikaw u jieħdu l-azzjonijiet meħtieġa fir-rigward ta’ tali prodotti skont dan ir-Regolament, anki jekk ikunu għadhom ma humiex fil-fatt imqiegħda fis-suq tal-Unjoni fil-mument tal-offerta għall-bejgħ online jew b’mezzi oħra ta’ bejgħ mill-bogħod. Tali prodotti jridu jkunu konformi mal-liġi rilevanti tal-Unjoni fis-seħħ fil-mument meta fil-fatt jitqiegħdu fis-suq tal-Unjoni u, fil-każ ta’ prodotti li jidħlu fl-Unjoni, meta jitqiegħdu taħt il-proċedura doganali “rilaxx għal ċirkolazzjoni libera”. Il-fatt li prodott, offrut li jinbiegħ online jew b’mezzi oħra ta’ bejgħ mill-bogħod, jitqies li jkun disponibbli fis-suq jekk l-offerta għall-bejgħ tkun immirata għall-utenti finali fl-Unjoni, jenħtieġ li jkun mingħajr preġudizzju għar-regoli rigward il-prodotti li jidħlu jew joħorġu mis-suq tal-Unjoni.

(23)

Kien hemm żieda fl-użu ta’ servizzi intermedjarji, b’mod partikolari s-swieq online, għall-bejgħ ta’ prodotti. F’dan ir-rigward, kwalunkwe informazzjoni relatata mal-bejgħ ta’ prodotti li jiksru l-projbizzjoni ta’ prodotti magħmulin b’xogħol furzat stabbilita f’dan ir-Regolament jenħtieġ li titqies bħala kontenut illegali skont it-tifsira tal-Artikolu 3, il-punt (h), tar-Regolament (UE) 2022/2065 tal-Parlament Ewropew u tal-Kunsill (12) u jenħtieġ li tkun soġġetta għall-obbligi u l-miżuri stabbiliti f’dak ir-Regolament.

(24)

Jenħtieġ li l-Kummissjoni u l-awtoritajiet kompetenti tal-Istati Membri jidentifikaw ksur tal-projbizzjoni ta’ prodotti magħmulin b’xogħol furzat. Meta jaħtru l-awtoritajiet kompetenti, jenħtieġ li l-Istati Membri jiżguraw li dawk l-awtoritajiet ikollhom biżżejjed riżorsi umani u finanzjarji u li l-persunal tagħhom ikollu l-kompetenzi u l-għarfien neċessarji, speċjalment fir-rigward tad-drittijiet tal-bniedem, tad-drittijiet tal-ħaddiema, tal-ugwaljanza bejn il-ġeneri, tal-ġestjoni tal-katina tal-provvista u tal-proċessi ta’ diliġenza dovuta. Jenħtieġ li l-awtoritajiet kompetenti jikkoordinaw mill-qrib mal-awtoritajiet tal-ispezzjonijiet tax-xogħol nazzjonali u mal-awtoritajiet ġudizzjarji u tal-infurzar tal-liġi, inklużi dawk responsabbli għall-ġlieda kontra t-traffikar ta’ bnedmin b’tali mod li jevita milli jipperikola l-investigazzjonijiet minn tali awtoritajiet.

(25)

Sabiex tiżgura l-implimentazzjoni effettiva tal-kompiti tagħha skont dan ir-Regolament, b’mod partikolari fir-rigward ta’ twettiq ta’ investigazzjonijiet, jenħtieġ li l-Kummissjoni tkun tista’ titlob l-assistenza ta’ korpi, uffiċċji jew aġenziji oħra tal-Unjoni b’mandat xieraq. Dawk il-kompiti jistgħu jinkludu: li jiġu pproċessati sottomissjonijiet ta’ informazzjoni, tiġi appoġġata l-allokazzjoni ta’ investigazzjonijiet, jitwettqu l-investigazzjonijiet preliminari u l-investigazzjonijiet, tiġi ffaċilitata l-kooperazzjoni mal-awtoritajiet tal-Istati Membri u bejniethom, tiġi ffaċilitata l-kooperazzjoni internazzjonali, jiġi appoġġat l-iżvilupp ta’ għodod ta’ appoġġ u, jekk xieraq, tiġi appoġġata l-implimentazzjoni mill-awtoritajiet doganali u tiġi appoġġata l-Kummissjoni fit-tħejjija ta’ deċiżjonijiet biex jiġu pprojbiti l-prodotti magħmulin b’xogħol furzat. Dan huwa mingħajr preġudizzju għall-kompitu tal-Kummissjoni, fir-rwol tagħha bħala awtorità kompetenti ewlenija, li tieħu deċiżjonijiet biex tipprojbixxi t-tqegħid fis-suq ta’ prodotti magħmulin b’xogħol furzat. Il-Kummissjoni, fir-rwol tagħha bħala awtorità kompetenti ewlenija, jenħtieġ li teżerċita s-setgħat tagħha b’mod imparzjali, trasparenti u bir-rispett dovut għall-obbligi tas-segretezza professjonali u jenħtieġ li jkollha l-għarfien espert meħtieġ. Jenħtieġ li l-Kummissjoni jkollha l-mezzi biex tiffinanzja l-persunal meħtieġ u l-kostijiet relatati biex twettaq il-kompiti fdati lilha skont dan ir-Regolament u tibni l-għarfien espert meħtieġ.

(26)

L-awtoritajiet kompetenti u l-Kummissjoni jenħtieġ li jkunu ggwidati mill-prinċipju tal-proporzjonalità meta jimplimentaw dan ir-Regolament. L-awtoritajiet kompetenti u l-Kummissjoni jenħtieġ li jiżguraw, b’mod partikolari, li l-miżuri u l-azzjonijiet kollha mwettqa matul il-fażi preliminari tal-investigazzjoni u matul l-investigazzjoni u dawk stabbiliti fid-deċiżjoni jkunu xierqa u meħtieġa biex jintlaħaq l-għan mixtieq u ma jimponux piż eċċessiv fuq l-operaturi ekonomiċi.

(27)

Sabiex tiġi żgurata l-kooperazzjoni bejn il-Kummissjoni u l-awtoritajiet kompetenti maħturin skont dan ir-Regolament u l-awtoritajiet maħturin skont liġi rilevanti oħra tal-Unjoni u nazzjonali u sabiex tiġi żgurata l-konsistenza fl-azzjonijiet u fid-deċiżjonijiet tagħhom, jenħtieġ li l-Kummissjoni u l-awtoritajiet kompetenti maħturin skont dan ir-Regolament jitolbu informazzjoni minn awtoritajiet rilevanti oħra, fejn neċessarju, dwar jekk l-operaturi ekonomiċi li jkunu qegħdin jiġu vvalutati jkunux soġġetti għal diliġenza dovuta u jwettquhiex fir-rigward tax-xogħol furzat f’konformità mal-liġi applikabbli tal-Unjoni jew nazzjonali li tistabbilixxi rekwiżiti dwar id-diliġenza dovuta u t-trasparenza fir-rigward tax-xogħol furzat. Meta jitolbu informazzjoni mingħand l-operaturi ekonomiċi, l-awtoritajiet kompetenti jenħtieġ li, fejn possibbli, isegwu l-prinċipju ta’ darba biss tal-Kummissjoni, permezz ta’ kooperazzjoni u djalogu akbar bejn l-awtoritajiet li huma involuti fis-sorveljanza tar-regolamentazzjoni tal-prodott. Għall-istess finijiet, u fejn xieraq, l-awtoritajiet kompetenti maħturin skont dan ir-Regolament jenħtieġ li jinfurmaw lil awtoritajiet rilevanti oħra, bħall-awtoritajiet tas-sorveljanza tas-suq, dwar l-azzjonijiet u d-deċiżjonijiet tagħhom.

(28)

L-infurzar uniformi tal-projbizzjoni ta’ prodotti magħmulin b’xogħol furzat li jidħlu fis-suq tal-Unjoni jew li joħorġu minnu jista’ jinkiseb biss permezz ta’ skambju sistematiku ta’ informazzjoni u kooperazzjoni fost l-awtoritajiet kompetenti, l-awtoritajiet doganali u l-Kummissjoni. Tali skambju ta’ informazzjoni u kooperazzjoni jenħtieġ li jkunu appoġġati mill-Kummissjoni.

(29)

Għall-ġbir, għall-ipproċessar u għall-ħżin tal-informazzjoni, f’forma strutturata, dwar kwistjonijiet relatati mal-investigazzjonijiet, il-proċess tat-teħid tad-deċiżjonijiet, u mal-infurzar tal-projbizzjoni ta’ prodotti magħmulin b’xogħol furzat, jenħtieġ li l-awtoritajiet kompetenti jużaw is-sistema ta’ informazzjoni u komunikazzjoni għas-sorveljanza tas-suq imsemmija fl-Artikolu 34 tar-Regolament (UE) 2019/1020 tal-Parlament Ewropew u tal-Kunsill (13), f’konformita’ mal-att ta’ implimentazzjoni li l-Kummissjoni jenħtieġ li jkollha s-setgħa li tadotta skont dan ir-Regolament (“l-ICSMS”). Jenħtieġ li l-Kummissjoni, l-awtoritajiet kompetenti u l-awtoritajiet doganali jkollhom aċċess għal dik is-sistema sabiex iwettqu d-dmirijiet rispettivi tagħhom skont dan ir-Regolament. Huwa possibbli wkoll li l-awtoritajiet kompetenti jużaw sistemi ta’ komunikazzjoni eżistenti oħra biex jikkomunikaw ma’ awtoritajiet oħra fl-Istat Membru tagħhom stess, sakemm dan ma jaffettwax l-obbligu tal-użu tal-ICSMS għall-finijiet ta’ implimentazzjoni ta’ dan ir-Regolament.

(30)

Sabiex jiġi ottimizzat u jitħaffef il-proċess ta’ kontroll tal-prodotti li jidħlu fis-suq tal-Unjoni jew li joħorġu minnu, huwa neċessarju li jkun permess trasferiment awtomatizzat tad-data bejn l-ICSMS u s-sistemi doganali. Jenħtieġ li ssir distinzjoni bejn tliet trasferimenti differenti ta’ data fid-dawl tal-finijiet rispettivi tagħhom. L-ewwel nett, id-deċiżjonijiet li jistabbilixxu ksur tal-projbizzjoni ta’ prodotti magħmulin b’xogħol furzat jenħtieġ li jiġu kkomunikati mill-ICSMS lis-Sistema elettronika ta’ Ġestjoni tar-Riskji Doganali imsemmija fl-Artikolu 36 tar-Regolament ta’ Implimentazzjoni tal-Kummissjoni (UE) 2015/2447 (14), mingħajr preġudizzju għal kwalunkwe evoluzzjoni futura tal-ambjent ta’ ġestjoni tar-riskju doganali, għall-użu mill-awtoritajiet doganali sabiex jidentifikaw prodotti li jistgħu jikkorrispondu għal deċiżjoni bħal din. Jenħtieġ li l-interfaċċi disponibbli tal-ambjent doganali jintużaw għal dawk l-ewwel trasferimenti ta’ data. It-tieni, fejn l-awtoritajiet doganali jidentifikaw prodott bħal dan, il-ġestjoni tal-każijiet tkun neċessarja sabiex, fost l-oħrajn, jittrasferixxu n-notifika tas-sospensjoni, il-konklużjoni tal-awtoritajiet kompetenti u l-eżitu tal-azzjonijiet meħudin mill-awtoritajiet tad-dwana. L-Ambjent ta’ Tieqa Unika tal-UE għad-Dwana jenħtieġ li jappoġġa dawk it-tieni trasferimenti ta’ data bejn l-ICSMS u s-sistemi doganali nazzjonali. It-tielet, is-sistemi doganali fihom informazzjoni dwar prodotti li jidħlu fis-suq tal-Unjoni u li jitilqu minnu li tkun rilevanti għall-awtoritajiet kompetenti sabiex iwettqu dmirijiethom iżda li ma tkunx aċċessibbli għalihom. Għalhekk, jenħtieġ li l-informazzjoni rilevanti tiġi estratta u trażmessa lill-ICSMS. Jenħtieġ li t-tliet interkonnessjonijiet ikunu awtomatizzati ħafna u faċli sabiex jintużaw, sabiex jiġi limitat kwalunkwe piż addizzjonali għall-awtoritajiet doganali. Jenħtieġ li l-Kummissjoni tingħata s-setgħa li tadotta, f’kooperazzjoni mal-awtoritajiet doganali u mal-awtoritajiet kompetenti, l-atti ta’ implimentazzjoni neċessarji sabiex tiddetermina r-regoli proċedurali, l-arranġamenti prattiċi u l-elementi tad-data li għandhom jiġu ttrasferiti bejn l-ICSMS u s-sistemi doganali u kwalunkwe rekwiżit anċillari ieħor.

(31)

Jenħtieġ li l-Kummissjoni tistabbilixxi bażi tad-data indikattiva u mhux eżawrjenti tar-riskji tax-xogħol furzat biex tappoġġa l-ħidma tal-awtoritajiet kompetenti fil-valutazzjoni tal-ksur potenzjali tal-projbizzjoni ta’ prodotti magħmulin b’xogħol furzat u tgħin lill-operaturi ekonomiċi jidentifikaw riskji possibbli ta’ xogħol furzat fil-ktajjen tal-provvista tagħhom. Jenħtieġ li l-Kummissjoni tkun tista’ tirrikorri għal għarfien espert estern biex tiżviluppa l-bażi tad-data. Jenħtieġ li l-bażi tad-data tidentifika r-riskji tax-xogħol furzat f’żoni ġeografiċi speċifiċi jew fir-rigward ta’ prodotti jew gruppi ta’ prodotti speċifiċi, b’enfasi partikolari fuq riskji mifruxa u severi ta’ xogħol furzat, abbażi ta’ informazzjoni affidabbli u verifikabbli minn istituzzjonijiet internazzjonali, bħall-ILO u n-NU, u istituzzjonijiet ta’ riċerka jew akkademiċi. Dik il-bażi tad-data jenħtieġ li ssir disponibbli għall-pubbliku permezz tal-Portal Uniku dwar ix-Xogħol Furzat. Meta jkun hemm evidenza affidabbli u verifikabbli li l-prodotti magħmula f’setturi ekonomiċi speċifiċi f’żoni ġeografiċi speċifiċi jippreżentaw riskju għoli li jkunu saru b’xogħol furzat impost mill-awtoritajiet tal-Istat, dawk is-setturi f’dawk iż-żoni jenħtieġ li jkunu identifikati fil-bażi tad-data stabbilita skont dan ir-Regolament.

(32)

L-intrapriżi mikro, żgħar u ta’ daqs medju (“SMEs”) jista’ jkollhom riżorsi u kapaċità limitati sabiex jiżguraw li l-prodotti li jqiegħdu jew iqiegħdu disponibbli fis-suq tal-Unjoni jkunu ħielsa minn xogħol furzat. Għalhekk, jenħtieġ li l-Kummissjoni toħroġ linji gwida dwar id-diliġenza dovuta fir-rigward tax-xogħol furzat, li jenħtieġ li jqisu wkoll id-daqs u r-riżorsi ekonomiċi tal-operaturi ekonomiċi. Barra minn hekk, jenħtieġ li l-Kummissjoni toħroġ linji gwida dwar l-indikaturi tar-riskju tax-xogħol furzat, inkluż kif jiġu identifikati, li jenħtieġ li jkunu bbażati fuq informazzjoni indipendenti u verifikabbli, inklużi rapporti minn organizzazzjonijiet internazzjonali, b’mod partikolari l-ILO.

(33)

Il-Kummissjoni jenħtieġ li tipprevjeni piż amministrattiv bla bżonn għall-SMEs. Barra minn hekk, jenħtieġ li l-Kummissjoni tiżviluppa miżuri ta’ akkumpanjament biex tappoġġa l-isforzi tal-operaturi ekonomiċi u s-sħab kummerċjali tagħhom fl-istess katina tal-provvista, b’mod partikolari l-SMEs. Jenħtieġ li l-Istati Membri jaħtru punti ta’ kuntatt għall-SMEs għall-finijiet ta’ dan ir-Regolament li jistgħu jkunu il-helpdesks eżistenti tan-negozji u tad-drittijiet tal-bniedem jew il-punti ta’ kuntatt tad-diliġenza dovuta. L-SMEs jenħtieġ li jkunu jistgħu jikkuntattjaw lill-awtorità kompetenti tal-Istat Membru li fih ikunu stabbiliti, billi jużaw l-informazzjoni pprovduta fil-Portal Uniku dwar ix-Xogħol Furzat. B’mod partikolari, jenħtieġ li jkunu jistgħu jikkoordinaw ma’ awtorità kompetenti biex tappoġġahom matul l-investigazzjoni. Riżorsi ta’ appoġġ suffiċjenti jenħtieġ li jkunu wkoll disponibbli online b’mod ċar u li jinftiehem għall-SMEs.

(34)

Jenħtieġ li l-Kummissjoni toħroġ linji gwida dwar kif jiddjalogaw mal-awtoritajiet kompetenti sabiex tgħin lill-operaturi ekonomiċi, u b’mod partikolari lill-SMEs, kif ukoll lil partijiet ikkonċernati oħrajn, jikkonformaw mal-projbizzjoni ta’ prodotti magħmulin b’xogħol furzat. Barra minn hekk, jenħtieġ li l-Kummissjoni toħroġ ukoll linji gwida biex tgħin lil kwalunkwe persuna jew assoċjazzjoni fis-sottomissjoni tal-informazzjoni.

(35)

Filwaqt li tqis il-varjetà tal-liġi tal-Unjoni li tittratta kwistjonijiet ta’ xogħol furzat, jenħtieġ li l-Kummissjoni tipprovdi gwida għall-operaturi ekonomiċi, b’mod partikolari l-SMEs, dwar kif għandhom japplikaw l-obbligi differenti li jirriżultaw mil-liġi tal-Unjoni.

(36)

Jenħtieġ li l-Kummissjoni toħroġ linji gwida sabiex tiffaċilita l-implimentazzjoni ta’ dan ir-Regolament mill-operaturi ekonomiċi u mill-awtoritajiet kompetenti. Il-linji gwida għall-operaturi ekonomiċi jenħtieġ li jinkludu gwida dwar id-diliġenza dovuta fir-rigward tax-xogħol furzat, inkluż għal tipi differenti ta’ fornituri u setturi ta’ attività, dwar l-aħjar prattiki biex jintemm u jiġi rrimedjat ix-xogħol furzat u dwar id-diżimpenn responsabbli. Rimedju għandu jinftiehem li huwa restituzzjoni tal-persuna jew persuni jew il-komunitajiet affettwati għal sitwazzjoni ekwivalenti jew qrib kemm jista’ jkun tas-sitwazzjoni li kienu jkunu fiha li kieku x-xogħol furzat ma seħħx, proporzjonat għall-involviment tal-kumpanija fix-xogħol furzat, inkluż kumpens finanzjarju jew mhux finanzjarju pprovdut mill-kumpanija lil persuna jew persuni affettwati mix-xogħol furzat u, fejn applikabbli, ir-rimborż tal-kostijiet imġarrba mill-awtoritajiet pubbliċi għal kwalunkwe miżura ta’ rimedju meħtieġa. Gwida għall-awtoritajiet kompetenti jenħtieġ li tiffoka fuq informazzjoni rilevanti għall-implimentazzjoni prattika ta’ dan ir-Regolament. Jenħtieġ li l-gwida dwar id-diliġenza dovuta fir-rigward tax-xogħol furzat tibni fuq il-Gwida dwar id-diliġenza dovuta għan-negozji tal-Unjoni biex jiġi indirizzat ir-riskju ta’ xogħol furzat fl-operazzjonijiet u fil-ktajjen tal-provvista tagħhom, ippubblikata mill-Kummissjoni u mis-Servizz Ewropew għall-Azzjoni Esterna f’Lulju 2021. Jenħtieġ li l-linji gwida jkunu konsistenti ma’ linji gwida oħrajn tal-Kummissjoni f’dan ir-rigward u mal-linji gwida rilevanti tal-organizzazzjonijiet internazzjonali. Il-linji gwida jenħtieġ li jiġu żviluppati f’konsultazzjoni mal-partijiet ikkonċernati rilevanti u jiddependu mill-esperjenza u l-aħjar prattiki tal-awtoritajiet rilevanti tal-Istati Membri. Jenħtieġ li r-rapporti minn organizzazzjonijiet internazzjonali, b’mod partikolari mill-ILO, kif ukoll sorsi ta’ informazzjoni indipendenti u verifikabbli oħrajn jiġu kkunsidrati għall-identifikazzjoni tal-indikaturi tar-riskju.

(37)

Peress li x-xogħol furzat huwa problema globali u minħabba n-nisġiet ta’ ktajjen tal-provvista globali, huwa neċessarju li tiġi promossa l-kooperazzjoni internazzjonali kontra x-xogħol furzat, li tkun ittejjeb ukoll l-effiċjenza tal-implimentazzjoni ta’ dan ir-Regolament. Jenħtieġ li l-Kummissjoni, kif xieraq, tikkoopera mal-awtoritajiet ta’ pajjiżi terzi, ma’ organizzazzjonijiet internazzjonali u ma’ partijiet ikkonċernati rilevanti oħrajn u tiskambja informazzjoni magħhom sabiex ittejjeb l-implimentazzjoni effettiva ta’ dan ir-Regolament. Jenħtieġ li l-kooperazzjoni internazzjonali mal-awtoritajiet ta’ pajjiżi terzi, inkluż ma’ pajjiżi b’leġiżlazzjoni simili fis-seħħ, isseħħ b’mod strutturat bħala parti mill-istrutturi ta’ djalogu eżistenti ma’ dawk il-pajjiżi, jew, jekk ikun neċessarju, strutturi ta’ djalogu speċifiċi li jinħolqu fuq bażi ad hoc. Jenħtieġ li din il-kooperazzjoni tkun tista’ tinkludi skambji ta’ informazzjoni dwar ir-riskji tax-xogħol furzat, bħal dawk identifikati fil-bażi tad-data, u dwar deċiżjonijiet biex jiġu pprojbiti l-prodotti, iżda jenħtieġ li ma tinkludix informazzjoni dwar investigazzjonijiet li jkunu għaddejjin. Id-delegazzjonijiet tal-Unjoni jistgħu jikkontribwixxu biex ixerrdu informazzjoni dwar dan ir-Regolament u jiffaċilitaw is-sottomissjoni ta’ informazzjoni dwar ir-riskji tax-xogħol furzat mill-partijiet ikkonċernati rilevanti. Il-kooperazzjoni internazzjonali tista’ tinkludi wkoll l-iżvilupp ta’ inizjattivi ta’ kooperazzjoni u miżuri ta’ akkumpanjament biex jappoġġaw lill-partijiet ikkonċernati rilevanti fl-isforzi tagħhom biex jeliminaw ix-xogħol furzat mill-ktajjen tal-provvista globali, kif ukoll il-ħolqien ta’ ambjenti abilitanti f’pajjiżi terzi biex jippromwovu u jipproteġu d-drittijiet tal-bniedem.

(38)

Kwalunkwe persuna fiżika jew ġuridika, jew kwalunkwe assoċjazzjoni li ma jkollhiex personalità ġuridika, jenħtieġ li titħalla tissottometti informazzjoni lill-awtoritajiet kompetenti meta tqis li l-prodotti magħmulin b’xogħol furzat jitqiegħdu u jitqiegħdu għad-dispożizzjoni fis-suq tal-Unjoni u jenħtieġ li tiġi informata bl-eżitu tal-valutazzjoni tas-sottomissjoni ta’ informazzjoni tagħhom. Is-sottomissjonijiet ta’ informazzjoni dwar allegat ksur jenħtieġ li jsiru permezz ta’ punt uniku għas-sottomissjoni tal-informazzjoni stabbilit mill-Kummissjoni u jsir disponibbli fuq il-Portal Uniku dwar ix-Xogħol Furzat. Sabiex jiġi żgurat l-użu faċli għas-sottomissjonijiet ta’ informazzjoni u l-istandardizzazzjoni tal-informazzjoni pprovduta, jenħtieġ li l-Kummissjoni toħroġ gwida dwar l-użu tal-punt uniku għas-sottomissjoni tal-informazzjoni u jenħtieġ li tkun tista’ tadotta atti ta’ implimentazzjoni biex tispeċifika r-regoli proċedurali, il-mudelli u d-dettalji tas-sottomissjonijiet ta’ informazzjoni. Sottomissjonijiet ta’ informazzjoni li huma manifestament mhux kompluti, infondati jew magħmula in mala fede jenħtieġ li jitwarrbu. Jenħtieġ li jkun hemm fis-seħħ miżuri adegwati biex tiġi żgurata il-protezzjoni ta’ kwalunkwe persuna assoċjata mas-sottomissjoni jew mal-informazzjoni li tkun tinsab fiha, inkluż minn ritaljazzjoni.

(39)

L-informaturi jistgħu jiġbdu l-attenzjoni tal-awtoritajiet kompetenti lejn informazzjoni ġdida biex jassistuhom fl-identifikazzjoni ta’ ksur ta’ dan ir-Regolament u jippermettuhom jieħdu azzjoni. Sabiex jiġi żgurat li jkun hemm fis-seħħ arranġamenti adegwati li jippermettu lill-informaturi jwissu lill-awtoritajiet kompetenti dwar ksur reali jew potenzjali ta’ dan ir-Regolament u li l-informaturi jiġu protetti mir-ritaljazzjoni, jenħtieġ li dan ir-Regolament jipprevedi li d-Direttiva (UE) 2019/1937 tal-Parlament Ewropew u tal-Kunsill (15) tkun applikabbli għar-rapportar tal-ksur ta’ dan ir-Regolament u għall-protezzjoni tal-persuni li jirrapportaw ksur bħal dan, sakemm jaqgħu fil-kamp ta’ applikazzjoni personali ta’ dik id-Direttiva.

(40)

Sabiex tissaħħaħ iċ-ċertezza legali, jenħtieġ li, skont dan ir-Regolament, l-applikabbiltà tad-Direttiva (UE) 2019/1937 fir-rigward ta’ rapporti ta’ ksur ta’ dan ir-Regolament u l-protezzjoni ta’ persuni li jirrapportaw tali ksur tiġi riflessa f’dik id-Direttiva. Għalhekk, jenħtieġ li l-Anness tad-Direttiva (UE) 2019/1937 jiġi emendat skont dan. Huwa f’idejn l-Istati Membri li jiżguraw li, mid-data tal-applikazzjoni ta’ dan ir-Regolament, dik l-emenda tkun riflessa fil-miżuri ta’ traspożizzjoni adottati f’konformità ma’ dik id-Direttiva. Madankollu, l-adozzjoni ta’ miżuri ta’ traspożizzjoni nazzjonali mhijiex kondizzjoni għall-applikabbiltà ta’ dik id-Direttiva fir-rigward tar-rapportar ta’ ksur ta’ dan ir-Regolament jew il-protezzjoni tal-persuni li jirrapportaw.

(41)

Sabiex jiġi żgurat aċċess faċli għall-informazzjoni rilevanti fir-rigward ta’ dan ir-Regolament, jenħtieġ li l-Kummissjoni tistabbilixxi portal web uniku fil-livell tal-Unjoni, disponibbli għall-pubbliku bil-lingwi uffiċjali kollha tal-istituzzjonijiet tal-Unjoni.

(42)

Meta jidentifikaw ksur potenzjali tal-projbizzjoni ta’ prodotti magħmulin b’xogħol furzat, jenħtieġ li l-Kummissjoni jew l-awtoritajiet kompetenti jsegwu approċċ ibbażat fuq ir-riskju u jivvalutaw l-informazzjoni kollha disponibbli għalihom. Sabiex jiġi implimentat l-approċċ ibbażat fuq ir-riskju fil-prijoritizzazzjoni tal-investigazzjonijiet tagħhom, il-Kummissjoni u l-awtoritajiet kompetenti jenħtieġ li jqisu s-sehem tal-parti tal-prodott suspettat li jkun sar b’xogħol furzat fil-prodott finali, il-kwantità u l-volum tal-prodotti kkonċernati, u l-iskala u s-severità tax-xogħol furzat suspettat, inkluż jekk ix-xogħol furzat impost mill-awtoritajiet tal-Istat jistax ikun ta’ tħassib. Il-Kummissjoni u l-awtoritajiet kompetenti jenħtieġ li jqisu wkoll id-daqs u r-riżorsi ekonomiċi tal-operaturi ekonomiċi u l-kumplessità tal-katina tal-provvista, u jiffukaw sa fejn ikun possibbli fuq l-operaturi ekonomiċi u, fejn rilevanti, il-fornituri tal-prodotti li jkunu eqreb lejn ir-riskju ta’ xogħol furzat u li jkollhom l-akbar influwenza biex jipprevjenu, jimmitigaw u jtemmu l-użu tax-xogħol furzat.

(43)

Qabel ma tibda investigazzjoni, l-awtorità kompetenti ewlenija jenħtieġ li tkun tista’ titlob informazzjoni mingħand l-operaturi ekonomiċi li jkunu qed jiġu vvalutati u wkoll mingħand partijiet ikkonċernati rilevanti oħra, inklużi l-persuni jew l-assoċjazzjonijiet li jkunu ppreżentaw l-informazzjoni rilevanti lill-awtoritajiet kompetenti. L-awtorità kompetenti ewlenija jenħtieġ li tkun tista’ tagħżel li ma titlobx informazzjoni addizzjonali mingħand l-operaturi ekonomiċi jekk tivvaluta li dan jista’ jwassal għal tentattiv minn dawk l-operaturi ekonomiċi li jaħbu sitwazzjoni ta’ xogħol furzat u b’hekk jipperikolaw l-investigazzjoni. Jenħtieġ li l-awtorità kompetenti ewlenija tibda investigazzjoni fejn, fuq il-bażi tal-valutazzjoni tagħha tal-informazzjoni kollha disponibbli jew fuq il-bażi ta’ kwalunkwe fatt ieħor disponibbli fejn ma kienx possibbli li jinġabru l-informazzjoni u l-evidenza matul il-fażi preliminari tal-investigazzjoni, tistabbilixxi li jkun hemm tħassib sostanzjat li kien hemm ksur tal-projbizzjoni ta’ prodotti magħmulin b’xogħol furzat.

(44)

Sabiex tiżdied l-effettività tal-projbizzjoni ta’ prodotti magħmulin b’xoghol furzat, jenħtieġ li l-awtoritajiet kompetenti jagħtu żmien raġonevoli lill-operaturi ekonomiċi sabiex jidentifikaw, jimmitigaw, jipprevjenu u jġibu fi tmiemu r-riskju ta’ xogħol furzat, filwaqt li jqisu, fost l-oħrajn, il-kumplessità tal-proċess u l-għadd ta’ partijiet ikkonċernati involuti.

(45)

Qabel ma jibdew investigazzjoni, jenħtieġ li l-awtorità kompetenti ewlenija titlob mingħand l-operaturi ekonomiċi li jkunu qegħdin jiġu vvalutati li jipprovdu informazzjoni dwar l-azzjonijiet meħudin sabiex jimmitigaw, jipprevjenu, iġibu fi tmiemhom ir-riskji ta’ xogħol furzat jew jirrimedjaw il-każijiet ta’ xogħol furzat fl-operazzjonijiet u fil-ktajjen tal-provvista tagħhom fir-rigward tal-prodotti li jkunu qegħdin jiġu vvalutati. Jenħtieġ li t-twettiq ta’ diliġenza dovuta fir-rigward tax-xogħol furzat jikkontribwixxi biex jgħin lill-operatur ekonomiku jkun f’riskju aktar baxx li jkollu xogħol furzat fl-operazzjonijiet u fil-ktajjen tal-provvista tiegħu. Diliġenza dovuta xierqa f’konformita’ mal-liġi tal-Unjoni rilevanti u ma’ standards internazzjonali tista’ tgħin biex jiġi identifikat u indirizzat ix-xogħol furzat fil-katina tal-provvista. Dak jimplika li jenħtieġ li ma tinbeda l-ebda investigazzjoni meta l-awtorità kompetenti ewlenija tqis li ma jkun hemm l-ebda tħassib sostanzjat ta’ ksur tal-projbizzjoni ta’ prodotti magħmulin b’xogħol furzat, jew li r-raġunijiet għal tħassib sostanzjat ġew eliminati, pereżempju minħabba, iżda mhux biss, il-leġiżlazzjoni, il-linji gwida, ir-rakkomandazzjonijiet jew kwalunkwe diliġenza dovuta oħra applikabbli fir-rigward tax-xogħol furzat li tiġi applikata b’mod li jimmitiga, jipprevjeni u jtemm ir-riskju ta’ xogħol furzat.

(46)

Meta titlob informazzjoni matul l-investigazzjoni, l-awtorità kompetenti ewlenija jenħtieġ li tipprijoritizza, sa fejn ikun possibbli u konsistenti mat-twettiq effettiv tal-investigazzjoni, lill-operaturi ekonomiċi li qegħdin jiġu investigati u li jkunu involuti fil-passi tal-katina tal-provvista kemm jista’ jkun qrib ta’ fejn x’aktarx iseħħ ir-riskju ta’ xogħol furzat u tqis id-daqs u r-riżorsi ekonomiċi tal-operaturi ekonomiċi u l-kwantità tal-prodotti kkonċernati, kif ukoll l-iskala tax-xogħol furzat suspettat.

(47)

Jenħtieġ li l-awtoritajiet kompetenti ewlenin iġorru l-piż li jistabbilixxu jekk ix-xogħol furzat intużax fi kwalunkwe stadju tal-produzzjoni, tal-manifattura, tal-ħsad jew tal-estrazzjoni ta’ prodott imqiegħed jew imqiegħed għad-dispożizzjoni fis-suq jew għall-esportazzjoni, inkluż fil-ħdim jew fl-ipproċessar relatat mal-prodott fuq il-bażi tal-informazzjoni u tal-evidenza kollha miġbura matul l-investigazzjoni, inkluża l-fażi preliminari tagħha. Sabiex jiġi żgurat id-dritt tagħhom għal proċess xieraq, jenħtieġ li l-operaturi ekonomiċi jkollhom l-opportunità li jipprovdu informazzjoni fid-difiża tagħhom lill-awtoritajiet kompetenti matul l-investigazzjoni. Meta, bi tweġiba għal talba għal informazzjoni minn awtorità kompetenti ewlenija, operatur ekonomiku jew awtorità pubblika jirrifjutaw jew jonqsu, mingħajr ġustifikazzjoni valida, milli jipprovdu l-informazzjoni mitluba, jipprovdu informazzjoni mhux kompluta jew skorretta bl-objettiv li jimblokkaw l-investigazzjoni, jipprovdu informazzjoni qarrieqa jew inkella jimpedixxu l-investigazzjoni, inkluż meta jiġi identifikat riskju ta’ xogħol furzat impost mill-awtoritajiet tal-Istat, jenħtieġ li l-awtorità kompetenti ewlenija tkun tista’ tistabbilixxi li l-projbizzjoni ta’ prodotti magħmulin b’xogħol furzat tkun inkisret abbażi ta’ kwalunkwe informazzjoni rilevanti u verifikabbli oħra miġbura matul il-fażi preliminari tal-investigazzjoni jew matul l-investigazzjoni. Jenħtieġ li l-awtorità kompetenti ewlenija tqis ukoll dawk il-fatturi meta tirrevedi deċiżjoni meħuda fuq dik il-bażi.

(48)

Meta l-awtorità kompetenti ewlenija tistabbilixxi li l-operaturi ekonomiċi jkunu kisru l-projbizzjoni ta’ prodotti magħmulin b’xogħol furzat, jenħtieġ li hija tipprojbixxi mingħajr dewmien l-introduzzjoni u t-tqegħid għad-dispożizzjoni ta’ tali prodotti fis-suq tal-Unjoni u l-esportazzjoni tagħhom mill-Unjoni, u tirrikjedi li l-operaturi ekonomiċi li jkunu ġew investigati jirtiraw il-prodotti kkonċernati li jkunu diġà saru disponibbli fis-suq tal-Unjoni u jagħtu bħala donazzjoni prodotti li jitħassru għall-finijiet ta’ kawżi ta’ karità jew ta’ interess pubbliku. F’każijiet ta’ prodotti li ma jkunux jitħassru, jenħtieġ li l-operaturi ekonomiċi jirriċiklaw tali prodotti, u jekk dan ma jkunx possibbli, jenħtieġ li jaraw li l-prodotti jinqerdu, isiru inoperabbli, jew jiddisponu minnhom b’xi mod ieħor skont il-liġi nazzjonali f’konformità mal-liġi tal-Unjoni, inkluża l-liġi tal-Unjoni dwar l-immaniġġjar tal-iskart. Madankollu, jenħtieġ li tingħata attenzjoni partikolari għall-prevenzjoni ta’ tfixkil fil-ktajjen tal-provvista ta’ importanza strateġika jew kritika għall-Unjoni u, f’dan ir-rigward, għall-prodotti, li r-rimi tagħhom ibiddel il-funzjonament xieraq tas-suq intern u ta’ tali ktajjen tal-provvista. F’dawk il-każijiet, bħala deroga mill-obbligu li tiġi imposta ordni biex il-prodott ikkonċernat jintrema, jenħtieġ li l-awtorità kompetenti ewlenija, fejn xieraq, tkun tista’ tordna li l-prodott ikkonċernat jinżamm għal perjodu definit, a spejjeż tal-operaturi ekonomiċi. Meta tivvaluta l-importanza strateġika jew kritika ta’ prodott għall-Unjoni, jenħtieġ li l-awtorità kompetenti ewlenija, b’mod partikolari, tqis il-lista ta’ setturi stabbiliti fir-Regolament (UE) 2024/1735 tal-Parlament Ewropew u tal-Kunsill (16) u fir-Rakkomandazzjoni tal-Kummissjoni (UE) 2023/2113 (17) kif ukoll il-prodotti elenkati fir-Regolament (UE) 2024/1252 tal-Parlament Ewropew u tal-Kunsill (18). Meta jivvalutaw jekk ikunx xieraq li jkun hemm deroga mill-obbligu li tiġi imposta ordni ta’ rimi, l-awtorità kompetenti ewlenija jenħtieġ li żżomm f’moħħha l-probabbiltà li l-operaturi ekonomiċi konċernatijikkonformaw mal-kundizzjonijiet għar-rieżami tad-deċiżjoni li tistabbilixxi ksur ta’ projbizzjoni ta’ prodotti magħmulin permezz ta’xogħol furzat fil-perjodu definit mill-awtorità kompetenti ewlenija. Il-perjodu stabbilit mill-awtorità kompetenti ewlenija jippermetti lill-operaturi ekonomiċi kkonċernati juru li jkunu eliminaw ix-xogħol furzat fir-rigward tal-prodott ikkonċernat, billi jkunu temmuh fil-katina tal-provvista tagħhom. Il-fatt li wieħed ibiddel katina tal-provvista, fis-sens li jiddependi minn fornituri differenti, ma jistax jitqies bħala metodu ta’ eliminazzjoni ta’ xogħol furzat fir-rigward tal-prodott ikkonċernat minn dik id-deċiżjoni, peress li jirriżulta fi prodott differenti. Jekk l-operaturi ekonomiċi kkonċernati jipprovdu l-evidenza li turi li jkunu eliminaw ix-xogħol furzat fir-rigward tal-prodott kkonċernat, l-awtorità kompetenti ewlenija jenħtieġ li tirrieżamina d-deċiżjoni tagħha li tipprojbixxi t-tqegħid u t-tqegħid għad-dispożizzjoni ta’ tali prodotti fis-suq tal-Unjoni, u dan iwassal għall-irtirar tagħha, u għalhekk il-prodotti kkonċernati ma jibqgħux jinżammu milli jidħlu fis-suq. Jekk l-operaturi ekonomiċi kkonċernati ma jipprovdux tali evidenza, huma jenħtieġ li jikkonformaw mal-ordni li jarmu l-prodotti kkonċernati wara l-iskadenza tal-perjodu inkluż fid-deċiżjoni li tipprojbixxi t-tqegħid u t-tqegħid għad-dispożizzjoni ta’ tali prodotti fis-suq tal-Unjoni, li jkun fiha l-ordni li l-prodotti jinżammu għal perjodu definit.

(49)

F’deċiżjoni li tistabbilixxi ksur tal-projbizzjoni ta’ prodottti magħmulin b’xogħol furzat, jenħtieġ li l-awtorità kompetenti ewlenija tiddikjara s-sejbiet tal-investigazzjoni, u l-informazzjoni li tirfed is-sejbiet, u tistabbilixxi żmien raġonevoli li fih l-operaturi ekonomiċi jenħtieġ li jikkonformaw ma’ dik id-deċiżjoni, kif ukoll informazzjoni li tidentifika l-prodott li għalih tapplika d-deċiżjoni. Jenħtieġ li l-Kummissjoni tingħata s-setgħa li tadotta l-atti ta’ implimentazzjoni neċessarji sabiex tispeċifika d-dettalji tal-informazzjoni li għandha tkun inkluża f’tali deċiżjonijiet. Id-deċiżjonijiet tal-awtorità kompetenti ewlenija jenħtieġ li jsiru disponibbli għall-pubbliku.

(50)

Fl-istabbiliment ta’ żmien raġonevoli li fiħ tikkonforma ma’ ordnijiet stabbiliti f’deċiżjoni li tistabbilixxi ksur tal-projbizzjoni ta’ prodotti magħmulin b’xogħol furzat, jenħtieġ li l-awtorità kompetenti ewlenija tqis d-daqs u r-riżorsi ekonomiċi tal-operaturi ekonomiċi kkonċernati.

(51)

Sabiex jiġi infurzar effettiv, id-deċiżjonijiet meħudin minn awtorità kompetenti ewlenija fi Stat Membru wieħed jenħtieġ li jiġu rrikonoxxuti u infurzati mill-awtoritajiet kompetenti fl-Istati Membri l-oħrajn fir-rigward ta’ prodotti bl-istess informazzjoni ta’ identifikazzjoni mill-istess katina tal-provvista li għalihom instab xogħol furzat.

(52)

Jenħtieġ li l-operaturi ekonomiċi jkunu jistgħu jitolbu rieżami tad-deċiżjonijiet ta’ awtoritajiet kompetenti ewlenin skont dan ir-Regolament, wara li jkunu pprovdew informazzjoni sostanzjali ġdida li turi li l-prodotti mqiegħda jew imqiegħda għad-dispożizzjoni fis-suq tal-Unjoni jew maħsubin sabiex jiġu esportati mis-suq tal-Unjoni huma f’konformità mal-projbizzjoni ta’ prodotti magħmulin b’xogħol furzat. Jenħtieġ li l-awtoritaà kompetenti ewlenija tirtira d-deċiżjoni tagħha għall-futur meta l-operaturi ekonomiċi juru li jkunu kkonformaw ma’ dik id-deċiżjoni u eliminaw ix-xogħol furzat mill-operazzjonijiet jew mill-ktajjen tal-provvista għall-prodotti kkonċernati. Id-deċiżjonijiet tal-awtoritajiet kompetenti ewlenin skont dan ir-Regolament jenħtieġ li jkunu soġġetti għal rieżami ġudizzjarju f’konformità mal-liġi tal-Unjoni u dik nazzjonali applikabbli.

(53)

Jekk l-operaturi ekonomiċi jonqsu milli jikkonformaw mad-deċiżjoni tal-awtorità kompetenti ewlenija sa tmiem il-perjodu ta’ żmien stabbilit, jenħtieġ li l-awtoritajiet kompetenti jiżguraw li l-prodotti kkonċernati jkunu pprojbiti milli jitqiegħdu jew jitqiegħdu għad-dispożizzjoni fis-suq tal-Unjoni, jew milli jiġu esportati jew jiġu irtirati mis-suq tal-Unjoni u li kwalunkwe prodotti li jitħassru li jibqgħu għand l-operaturi ekonomiċi rilevanti jingħataw bħala donazzjoni għall-finijiet ta’ kawżi ta’ karità jew ta’ interess pubbliku. Jenħtieġ li l-awtoritajiet kompetenti jiżguraw li prodotti li ma jitħassrux jiġu riċiklati, jew, jekk dan ma jkunx possibbli, li dawn jinqerdu, isiru inoperabbli, jew jiddisponu minnhom b’xi mod ieħor f’konformità mal-liġi nazzjonali b’mod konsistenti mal-liġi tal-Unjoni, inkluża l-liġi tal-Unjoni dwar l-immaniġġjar tal-iskart u dwar l-ekodisinn għall-prodotti sostenibbli a spejjeż tal-operaturi ekonomiċi. Fejn possibbli, jenħtieġ li l-awtoritajiet kompetenti jiżguraw li l-metodu ta’ rimi jew qerda magħżul mill-għażliet kollha disponibbli jkollu l-iżgħar impatt ambjentali possibbli. L-awtoritajiet kompetenti tal-Istati Membri jenħtieġ li jkunu responsabbli għall-infurzar tad-deċiżjonijiet fit-territorju tagħhom stess, inkluż deċiżjonijiet adottati mill-Kummissjoni. Wara li deċiżjoni tiġi kkomunikata permezz tal-ICSMS, l-awtoritajiet kompetenti kollha kkonċernati b’dik id-deċiżjoni jenħtieġ li jipproċedu bl-azzjonijiet ta’ infurzar rilevanti previsti f’dan ir-Regolament.

(54)

L-effett fuq it-trattament xieraq tal-annimali jenħtieġ li jitqies meta tiġi infurzata l-projbizzjoni tat-tqegħid u t-tqegħid għad-dispożizzjoni fis-suq jew jiġu esportati prodotti magħmulin bl-użu ta’ xogħol furzat sabiex l-annimali kkonċernati jinħelsu minn kwalunkwe uġigħ, dwejjaq jew tbatija li jistgħu jiġu evitati. Barra minn hekk, dan ir-Regolament jenħtieġ li jkun mingħajr preġudizzju għal-liġi tal-Unjoni rigward il-benessri tal-annimali, bħar-Regolamenti tal-Kunsill (KE) Nru 1/2005 (19) u (KE) Nru 1099/2009 (20).

(55)

Id-deċiżjonijiet tal-awtoritajiet kompetenti ewlenin li jistabbilixxu ksur tal-projbizzjoni ta’ prodotti magħmulin b’xogħol furzat jenħtieġ li jiġu kkomunikati lill-awtoritajiet doganali, li jenħtieġ li jimmiraw li jidentifikaw il-prodott ikkonċernat minn prodotti ddikjarati għar-rilaxx għaċ-ċirkolazzjoni libera jew għall-esportazzjoni. Jenħtieġ li l-awtoritajiet kompetenti tal-Istati Membri jkunu responsabbli mill-infurzar ġenerali tal-projbizzjoni ta’ prodotti magħmulin b’xogħol furzat fis-suq tal-Unjoni kif ukoll tal-prodotti li jidħlu jew li joħorġu minn dak is-suq. Peress li x-xogħol furzat huwa parti mill-proċess tal-manifattura u ma jħalli l-ebda traċċa fuq il-prodott, u billi r-Regolament (UE) 2019/1020 ikopri biss prodotti mmanifatturati u l-kamp ta’ applikazzjoni tiegħu huwa limitat għar-rilaxx għaċ-ċirkolazzjoni libera, l-awtoritajiet doganali ma jkunux jistgħu jaġixxu b’mod awtonomu skont ir-Regolament (UE) 2019/1020 fl-applikazzjoni u fl-infurzar tal-projbizzjoni ta’ prodotti magħmulin b’xogħol furzat. Jenħtieġ li l-organizzazzjoni speċifika tal-kontrolli ta’ kull Stat Membru tkun mingħajr preġudizzju għar-Regolament (UE) Nru 952/2013 tal-Parlament Ewropew u tal-Kunsill (21) u għad-dispożizzjonijiet ġenerali tiegħu dwar is-setgħat ta’ kontroll u ta’ superviżjoni tal-awtoritajiet doganali.

(56)

L-informazzjoni li bħalissa hija pprovduta jew disponibbli għall-awtoritajiet doganali mill-operaturi ekonomiċi tinkludi biss informazzjoni ġenerali dwar il-prodotti iżda ma tinkludix informazzjoni dwar il-manifattur jew il-produttur u l-fornituri tal-prodotti kif ukoll informazzjoni speċifika dwar il-prodotti. Sabiex l-awtoritajiet doganali jkunu jistgħu jidentifikaw prodotti li jidħlu fis-suq tal-Unjoni jew li joħorġu minnu li jiksru dan ir-Regolament u li, għalhekk, jenħtieġ li jitwaqqfu fil-fruntieri esterni tal-Unjoni, jenħtieġ li l-operaturi ekonomiċi jippreżentaw lill-awtoritajiet doganali informazzjoni li tippermetti l-identifikazzjoni ta’ prodotti li għalihom tirrelata deċiżjoni tal-awtorità kompetenti ewlenija. Jenħtieġ li din tinkludi informazzjoni dwar il-manifattur jew il-produttur u l-fornituri tal-prodotti kif ukoll kwalunkwe informazzjoni oħra dwar il-prodott innifsu. Għal dan l-għan, jenħtieġ li l-Kummissjoni tingħata s-setgħa li tadotta atti delegati li jidentifikaw il-prodotti li għalihom tali informazzjoni jenħtieġ li tiġi pprovduta bl-użu, fost l-oħrajn, tal-bażi tad-data stabbilita skont dan ir-Regolament kif ukoll l-informazzjoni u d-deċiżjonijiet tal-awtoritajiet kompetenti ewlenin kodifikati fis-ICSMS. Barra minn hekk, jenħtieġ li l-Kummissjoni tingħata s-setgħa li tadotta, atti ta’ implimentazzjoni neċessarji sabiex tispeċifika d-dettalji tal-informazzjoni li għandha tiġi pprovduta jew titqiegħed għad-dispożizzjoni tal-awtoritajiet doganali mill-operaturi ekonomiċi. Tali informazzjoni jenħtieġ li tinkludi d-deskrizzjoni, l-isem jew il-marka tal-prodott, ir-rekwiżiti speċifiċi skont il-liġi tal-Unjoni għall-identifikazzjoni tal-prodott, bħal tip, referenza, mudell, numru tal-lott jew tas-serje mwaħħal fuq il-prodott, jew ipprovdut fuq l-imballaġġ jew f’dokument li jakkumpanja l-prodott, jew l-identifikatur uniku tal-passaport tal-prodott diġitali kif ukoll dettalji dwar il-manifattur jew il-produttur u l-fornituri tal-prodott, inklużi, għal kull wieħed minnhom, l-isem, l-isem kummerċjali jew it-trademark reġistrata tagħhom, id-dettalji ta’ kuntatt tagħhom, in-numru ta’ identifikazzjoni uniku tagħhom fil-pajjiż li huma stabbiliti fih u, fejn disponibbli, in-numru tar-Reġistrazzjoni u tal-Identifikazzjoni tal-Operaturi Ekonomiċi tagħhom. Ir-rieżami tal-Kodiċi Doganali tal-Unjoni se jqis l-introduzzjoni fil-leġiżlazzjoni doganali tal-informazzjoni meħtieġa li tiġi pprovduta jew titqiegħed għad-dispożizzjoni tal-awtoritajiet doganali minn operaturi ekonomiċi għall-infurzar ta’ dan ir-Regolament u, b’mod aktar wiesa’, sabiex tissaħħaħ it-trasparenza tal-katina tal-provvista. Il-Kummissjoni jenħtieġ li toħroġ gwida u appoġġ għall-operaturi ekonomiċi, speċjalment l-SMEs, dwar kif jiġbru l-informazzjoni meħtieġa.

(57)

L-awtoritajiet doganali li jidentifikaw prodott li jista’ jkun kopert minn deċiżjoni kkomunikata mill-awtorità kompetenti ewlenija li tistabbilixxi ksur tal-projbizzjoni ta’ prodotti magħmulin b’xogħol furzat jenħtieġ li jissospendu r-rilaxx ta’ dak il-prodott u jinnotifikaw lill-awtoritajiet kompetenti minnufih. Jenħtieġ li l-awtoritajiet kompetenti jilħqu konklużjoni f’perjodu ta’ żmien raġonevoli dwar il-każ innotifikat lilhom mill-awtoritajiet doganali, jew billi jikkonfermaw jew jiċħdu li l-prodott ikkonċernat ikun kopert minn deċiżjoni. Fejn neċessarju u debitament ġustifikat, jenħtieġ li l-awtoritajiet kompetenti jkunu awtorizzati jirrikjedu ż-żamma tas-sospensjoni tar-rilaxx tal-prodott ikkonċernat, filwaqt li jitqies id-dannu potenzjali għall-operatur ekonomiku. Fin-nuqqas ta’ konklużjoni mill-awtoritajiet kompetenti fil-limitu ta’ żmien speċifikat, jenħtieġ li l-awtoritajiet doganali jirrilaxxaw il-prodotti jekk jiġu ssodisfati r-rekwiżiti u l-formalitajiet applikabbli l-oħrajn kollha. Ġeneralment, jenħtieġ li r-rilaxx ta’ prodott għaċ-ċirkolazzjoni libera jew għall-esportazzjoni ma jitqiesx bħala prova ta’ konformità mal-liġi tal-Unjoni, peress li tali rilaxx mhux neċessarjament jinkludi valutazzjoni sħiħa ta’ tali konformità.

(58)

Meta l-awtoritajiet kompetenti jikkonkludu li prodott jikkorrispondi għal deċiżjoni li tistabbilixxi ksur tal-projbizzjoni ta’ prodotti magħmulin b’xoġħol furzat, jenħtieġ li jinformaw minnufih lill-awtoritajiet doganali li jenħtieġ li jirrifjutaw ir-rilaxx tiegħu għaċ-ċirkolazzjoni libera jew għall-esportazzjoni. Jenħtieġ li l-awtoritajiet doganali jkunu jistgħu, meta awtorità kompetenti titlob dan u f’isem u taħt ir-responsabbiltà ta’ dik l-awtorità kompetenti, alternattivament jikkonfiskaw dak il-prodott u jpoġġuh għad-dispożizzjoni ta’ dik l-awtorità kompetenti u taħt l-awtorità tagħha. F’każijiet bħal dawn, jenħtieġ li l-awtorità kompetenti rilevanti tieħu l-miżuri meħtieġa kollha biex tiżgura li l-prodott ikkonċernat jintrema b’mod xieraq, inkluż permezz tad-donazzjoni tiegħu lill-kawżi ta’ karità jew ta’ interess pubbliku, ir-riċiklar tiegħu jew ir-rimi tiegħu f’konformità mal-liġi nazzjonali b’mod konsistenti mal-liġi tal-Unjoni a spejjeż tal-operatur ekonomiku rilevanti.

(59)

Jenħtieġ li l-awtorità kompetenti ewlenija tqis b’mod debitu r-riskju ta’ diżimpenn minn operaturi ekonomiċi li jew huma relatati ma’ prodotti jew reġjuni fil-bażi tad-data, jew li l-prodott tagħhom tneħħa mis-suq tal-Unjoni, kif ukoll il-konsegwenzi fuq il-ħaddiema affettwati. Għalhekk, jenħtieġ li l-awtorità kompetenti ewlenija, fejn xieraq, tappoġġja lill-operaturi ekonomiċi biex jadottaw u jwettqu miżuri xierqa u effettivi ħalli jtemmu x-xogħol furzat. Id-diżimpenn responsabbli jinkludi l-konformità mal-ftehimiet kollettivi u l-artikolazzjoni tal-miżuri ta’ eskalazzjoni.

(60)

Il-kundizzjonijiet applikabbli għall-prodotti matul is-sospensjoni tar-rilaxx tagħhom għaċ-ċirkolazzjoni libera jew għall-esportazzjoni, inklużi l-ħżin jew il-qerda u r-rimi tagħhom f’każ ta’ rifjut tar-rilaxx ta’ tali prodotti għaċ-ċirkolazzjoni libera, jenħtieġ li jiġu ddeterminati mill-awtoritajiet doganali, fejn applikabbli, skont ir-Regolament (UE) Nru 952/2013. Jekk il-prodotti li jidħlu fis-suq tal-Unjoni jkunu jirrikjedu proċessar ulterjuri, dawn iridu jitqiegħdu taħt il-proċedura doganali xierqa li tippermetti tali proċessar f’konformità mal-Artikoli 220, 254, 256, 257 u 258 tar-Regolament (UE) Nru 952/2013.

(61)

Meta, sabiex jingħata effett lill-projbizzjoni ta’ prodotti magħmulin b’xogħol furzat, ikun neċessarju li tiġi pproċessata data personali skont dan ir-Regolament, tali proċessar jenħtieġ li jitwettaq skont il-liġi tal-Unjoni dwar il-protezzjoni ta’ data personali. Jenħtieġ li kwalunkwe proċessar ta’ data personali skont il-projbizzjoni ta’ prodotti magħmulin b’xogħol furzat ikun soġġett għar-Regolamenti (UE) 2016/679 (22) u (UE) 2018/1725 (23) tal-Parlament Ewropew u tal-Kunsill.

(62)

Sabiex ikunu żgurati kondizzjonijiet uniformi għall-implimentazzjoni ta’ dan ir-Regolament, jenħtieġ li jingħataw setgħat ta’ implimentazzjoni lill-Kummissjoni rigward ir-regoli proċedurali u d-dettalji tal-arranġamenti għall-użu tal-ICSMS; ir-regoli proċedurali, il-mudelli u d-dettalji għas-sottomissjoni ta’ informazzjoni dwar l-allegat ksur tal-projbizzjoni fuq it-tqegħid jew it-tqegħid għad-dispożizzjoni ta’ prodotti magħmulin b’xogħol furzat fis-suq tal-Unjoni jew l-esportazzjoni tagħhom; id-deċiżjonijiet adottati mill-Kummissjoni li jistabbilixxu li jkun sar ksur tal-projbizzjoni fuq it-tqegħid jew it-tqegħid għad-dispożizzjoni ta’ prodotti magħmulin b’xogħol furzat fis-suq tal-Unjoni jew l-esportazzjoni tagħhom; l-irtirar ta’ dawk id-deċiżjonijiet; id-dettalji tal-kontenut ta’ dawk id-deċiżjonijiet u tad-deċiżjonijiet ekwivalenti adottati mill-awtoritajiet kompetenti ewlenin; u l-arranġamenti u d-dettalji għall-għoti jew għat-tqegħid għad-dispożizzjoni ta’ ċerta informazzjoni dwar prodotti speċifiċi jew gruppi ta’ prodotti lill-awtoritajiet doganali. Jenħtieġ li dawk is-setgħat ikunu eżerċitati f’konformità mar-Regolament (UE) Nru 182/2011 tal-Parlament Ewropew u tal-Kunsill (24).

(63)

Jenħtieġ li l-Kummissjoni tadotta atti ta’ implimentazzjoni applikabbli minnufih fejn, f’każijiet debitament ġustifikati marbuta mal-irtirar tad-deċiżjonijiet li jistabbilixxu li jkun sar ksur tal-projbizzjoni fuq it-tqegħid jew it-tqegħid għad-dispożizzjoni jew l-esportazzjoni ta’ prodotti magħmulin b’xogħol furzat, dan ikun meħtieġ għal raġunijiet imperattivi ta’ urġenza.

(64)

Sabiex ċerti elementi mhux essenzjali ta’ dan ir-Regolament jiġu ssupplimentati jew emendati, jenħtieġ li tiġi delegata lill-Kummissjoni s-setgħa li tadotta atti skont l-Artikolu 290 tat-Trattat dwar il-Funzjonament tal-Unjoni Ewropea (TFUE). Huwa partikolarment importanti li l-Kummissjoni twettaq konsultazzjonijiet xierqa matul ix-xogħol tagħha ta’ tħejjija, ukoll fil-livell ta’ esperti u li dawk il-konsultazzjonijiet jiġu mwettqa f’konformità mal-prinċipji stipulati fil-Ftehim Interistituzzjonali tat-13 ta’ April 2016 dwar it-Tfassil Aħjar tal-Liġijiet (25). B’mod partikolari, biex tiġi żgurata parteċipazzjoni ugwali fit-tħejjija ta’ atti delegati, il-Parlament Ewropew u l-Kunsill jirċievu d-dokumenti kollha fl-istess ħin li jirċevuhom l-esperti tal-Istati Membri, u l-esperti tagħhom ikollhom aċċess sistematiku għal-laqgħat tal-gruppi tal-esperti tal-Kummissjoni li jittrattaw it-tħejjija ta’ atti delegati.

(65)

Sabiex jiġi żgurat li l-awtoritajiet doganali jkunu jistgħu jaġixxu b’mod effettiv, jenħtieġ li tiġi delegata lill-Kummissjoni s-setgħa li tadotta atti skont l-Artikolu 290 tat-TFUE fir-rigward tal-ispeċifikazzjoni ulterjuri tal-informazzjoni addizzjonali li tidentifika l-prodott ikkonċernat li l-operaturi ekonomiċi jenħtieġ li jagħmlu disponibbli għall-awtoritajiet doganali jew jipprovdulhom fir-rigward tal-prodotti li jidħlu jew joħorġu mis-suq tal-Unjoni. Jenħtieġ li dik l-informazzjoni tkun informazzjoni li tidentifika l-prodott ikkonċernat, informazzjoni dwar il-manifattur jew il-produttur u informazzjoni dwar il-fornituri tal-prodott. L-awtoritajiet doganali jeħtieġ li jkunu jistgħu jiksbu informazzjoni malajr dwar prodotti speċifiċi identifikati fid-deċiżjonijiet tal-awtoritajiet kompetenti ewlenin sabiex jieħdu azzjonijiet u miżuri b’mod effettiv u rapidu. F’każijiet bħal dawn, jenħtieġ li l-atti delegati jiġu adottati skont proċedura ta’ urġenza.

(66)

Jenħtieġ li l-Istati Membri jagħtu lill-awtoritajiet kompetenti tagħhom is-setgħa li jimponu u jimplimentaw penali effettivi, proporzjonati u dissważivi f’każijiet fejn l-operatur ekonomiku jkun naqas milli jikkonforma ma’ deċiżjoni li tipprojbixxi t-tqegħid fis-suq ta’ prodotti magħmula permezz ta’ xogħol furzat. Ir-regoli dwar il-penali, applikabbli f’każ ta’ nuqqas ta’ konformità ma’ deċiżjoni jenħtieġ li jiġu stabbiliti mill-Istati Membri, filwaqt li jitqiesu kif xieraq elementi bħall-gravità u t-tul ta’ żmien tal-ksur, ksur preċedenti mill-operatur ekonomiku, il-grad ta’ kooperazzjoni mal-awtoritajiet kompetenti u kwalunkwe fattur mitiganti jew aggravanti ieħor applikabbli għaċ-ċirkostanzi tal-każ partikolari. Jenħtieġ li l-Kummissjoni toħroġ gwida għall-Istati Membri dwar il-metodu għall-kalkolu tal-penali finanzjarji u l-limiti applikabbli, u n-Network tal-Unjoni Kontra Prodotti mix-Xogħol Furzat jenħtieġ li jippromwovi l-aħjar prattiki fl-applikazzjoni ta’ tali penali.

(67)

Jenħtieġ li l-Kummissjoni twettaq evalwazzjoni tal-implimentazzjoni u l-infurzar ta’ dan ir-Regolament u tissottometti rapport dwar dan lill-Parlament Ewropew, lill-Kunsill u lill-Kumitat Ekonomiku u Soċjali Ewropew. Jenħtieġ li r-rapport jivvaluta l-kontribut ta’ dan ir-Regolament għall-eliminazzjoni ta’ prodotti magħmulin b’xogħol furzat mis-suq tal-Unjoni u għall-ġlieda kontra x-xogħol furzat kif ukoll għall-kooperazzjoni bejn l-awtoritajiet kompetenti u l-kooperazzjoni internazzjonali biex jiġi eliminat ix-xogħol furzat. Ir-rapport jenħtieġ li jivvaluta wkoll l-impatt ta’ dan ir-Regolament, fuq in-negozji, b’mod partikolari l-SMEs, u fuq il-vittmi, kif ukoll il-kostijiet u l-benefiċċji ġenerali tal-projbizzjoni ta’ prodotti magħmulin b’xogħol furzat. Ir-rapport jenħtieġ li jivvaluta aktar l-allinjament ta’ dan ir-Regolament ma’ liġi rilevanti oħra tal-Unjoni.

(68)

Dan ir-Regolament jirrispetta d-dritt għal amministrazzjoni tajba, minqux fl-Artikolu 41 tal-Karta, li jinkludi, fost l-oħrajn, id-dritt ta’ kull persuna li tinstema’, qabel ma tittieħed kwalunkwe miżura individwali li taffettwaha b’mod negattiv. F’dan ir-rigward, l-awtorità kompetenti ewlenija li twettaq l-investigazzjoni jenħtieġ li tinforma lill-operaturi ekonomiċi kkonċernati dwar il-bidu tal-investigazzjoni u l-konsegwenzi possibbli tagħha. Sabiex jiġi żgurat id-dritt tagħhom għal proċess xieraq, jenħtieġ li l-operaturi ekonomiċi jkollhom l-opportunità li jipprovdu informazzjoni fid-difiża tagħhom lill-awtoritajiet kompetenti fuq talba tagħhom matul l-investigazzjoni. L-operaturi ekonomiċi jenħtieġ li jkollhom il-possibbiltà li jitolbu lill-awtorità kompetenti ewlenija tirrieżamina d-deċiżjoni li taffettwahom, billi jipprovdu informazzjoni sostanzjali ġdida. Id-deċiżjonijiet adottati mill-awtoritajiet kompetenti tal-Istati Membri jenħtieġ li jkunu soġġetti għal rieżami ġudizzjarju previst fil-liġi nazzjonali applikabbli. Id-deċiżjonijiet adottati mill-Kummissjoni skont dan ir-Regolament huma soġġetti għal rieżami mill-Qorti tal-Ġustizzja tal-Unjoni Ewropea f’konformità mal-Artikolu 263 tat-TFUE.

(69)

Minħabba li l-objettiv ta’ dan ir-Regolament, jiġifieri, li l-operaturi ekonomiċi jiġu pprojbiti milli jqiegħdu u jqiegħdu disponibbli fis-suq tal-Unjoni jew jesportaw prodotti mis-suq tal-Unjoni magħmulin b’xogħol furzat sabiex jittejjeb il-funzjonament tas-suq intern, filwaqt li jingħata kontribut għall-ġlieda kontra x-xogħol furzat, ma jistax jinkiseb b’mod suffiċjenti mill-Istati Membri iżda jista’ pjuttost, minħabba l-iskala jew l-effetti tiegħu, jinkiseb aħjar fil-livell tal-Unjoni, l-Unjoni tista’ tadotta miżuri, f’konformità mal-prinċipju ta’ sussidjarjetà kif stabbilit fl-Artikolu 5 tat-TUE. F’konformità mal-prinċipju ta’ proporzjonalità, kif stabbilit f’dak l-Artikolu, dan ir-Regolament ma jmurx lil hinn minn dak li huwa meħtieġ sabiex jinkiseb dak l-objettiv.

(70)

Sabiex jingħata lok għall-applikazzjoni immedjata tal-miżuri stipulati f’dan ir-Regolament, jenħtieġ li dan ir-Regolament jidħol fis-seħħ fil-jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea,