|
25.3.2015 |
MT |
Il-Ġurnal Uffiċjali tal-Unjoni Ewropea |
L 79/18 |
REGOLAMENT TA' IMPLIMENTAZZJONI TAL-KUMMISSJONI (UE) 2015/500
tal-24 ta' Marzu 2015
li jistabbilixxi standards tekniċi ta' implimentazzjoni fir-rigward tal-proċeduri li għandhom jiġu segwiti dwar l-approvazzjoni superviżorja tal-applikazzjoni ta' aġġustament skont id-Direttiva 2009/138/KE tal-Parlament Ewropew u tal-Kunsill
(Test b'rilevanza għaż-ŻEE)
IL-KUMMISSJONI EWROPEA,
Wara li kkunsidrat it-Trattat dwar il-Funzjonament tal-Unjoni Ewropea.
Wara li kkunsidrat id-Direttiva 2009/138/KE tal-Parlament Ewropew u tal-Kunsill tal-25 ta' Novembru 2009 dwar il-bidu u l-eżerċizzju tan-negozju tal-assigurazzjoni u tar-riassigurazzjoni (Solvibbiltà II) (1) u b'mod partikolari l-Artikolu 86(3) tagħha,
Billi:
|
(1) |
L-Artikolu 77b tad-Direttiva 2009/138/KE tippermetti li impriżi ta' assigurazzjoni u ta' riassigurazzjoni japplikaw għal aġġustament ta' korrispondenza għall-istruttura tat-terminu tar-rata tal-imgħax relevanti mingħajr riskju, suġġett għal approvazzjoni minn qabel mill-awtoritajiet superviżorji fejn jintlaħqu ċerti kundizzjonijiet. Għandhom jiġu stabbiliti regoli dwar il-proċeduri li għandhom jiġu segwiti għall-approvazzjoni tal-applikazzjoni ta' aġġustament ta' korrispondenza. |
|
(2) |
Sabiex applikazzjoni tiġi kkunsidrata bħala waħda kompluta, għandha tinkludi l-informazzjoni relevanti kollha neċessarja għall-valutazzjoni u deċiżjoni mill-awtoritajiet superviżorji. Biex tipprovdi bażi armonizzata għall-valutazzjoni u d-deċiżjoni mill-awtoritajiet superviżorji, applikazzjoni għandha tinkludi evidenza li turi li kull waħda mill-kundizzjonijiet stipulati fl-Artikolu 77b tad-Direttiva 2009/138/KE huma sodisfatti. |
|
(3) |
L-applikazzjoni għal aġġustament ta' korrispondenza hija deċiżjoni strateġika għall-ġestjoni tar-riskju u għal skopijiet ta' ppjanar tal-kapital. Abbażi tar-responsabbiltà aħħarija tal-korp amministrattiv, il-korp tal-ġestjoni jew tas-superviżjoni għall-konformità kif stabbilit fl-Artikolu 40 tad-Direttiva 2009/138/KE, l-involviment tiegħu fil-proċess tat-teħid tad-deċiżjonijiet dwar l-applikazzjoni għandu jiġi kkunsidrata bir-reqqa. |
|
(4) |
Barra minn hekk l-Artikolu 77b tad-Direttiva 2009/138/KE, dik id-Direttiva fiha rekwiżiti oħra fl-Artikolu 44, 45 u 77 c li japplikaw għal impriżi ta' assigurazzjoni jew riassigurazzjoni li jużaw aġġustament ta' korrispondenza. Applikazzjoni għandha, għalhekk, tinkludi evidenza li dawn ir-rekwiżiti kollha jiġu sodisfatti jekk tingħata l-approvazzjoni. |
|
(5) |
Il-proċeduri li għandhom jiġu segwiti għall-approvazzjoni tal-aġġustament ta' korrispondenza jipprevedu komunikazzjoni kontinwa bejn l-awtoritajiet superviżorji u l-impriżi tal-assigurazzjoni u tar-riassigurazzjoni. Dan jinkludi komunikazzjoni qabel ma titressaq applikazzjoni formali lill-awtoritajiet superviżorji u, wara li applikazzjoni tkun ġiet approvata, permezz ta' proċess ta' analiżi superviżorja. Komunikazzjoni attwali bħal din hija meħtieġa biex jiġi żgurat li d-deċiżjonijiet superviżorji jkunu bbażati fuq informazzjoni u evidenza rilevanti u aġġornata. |
|
(6) |
Sabiex jiġi żgurat proċess bla xkiel u effiċjenti, l-awtoritajiet superviżorji għandhom ikunu jistgħu jirrikjedu li l-impriżi tal-assigurazzjoni u tar-riassigurazzjoni jagħmlu modifiki għal applikazzjoni sabiex jindirizzaw oqsma fejn l-evidenza mogħtija mhix biżżejjed biex turi l-konformità mal-kundizzjonijiet rilevanti stabbiliti bl-Artikolu 77b tad-Direttiva 2009/138/KE, qabel jiddeċiedu jekk finalment jaċċettawx jew jirrifjutawx l-applikazzjoni. |
|
(7) |
Minbarra li jikkunsidraw l-evidenza inkluża f'applikazzjoni, l-awtoritajiet superviżorji għandhom jikkunsidraw ukoll fatturi oħra li huma rilevanti meta tintlaħaq deċiżjoni dwar jekk ir-rekwiżiti tad-Direttiva 2009/138/KE ġewx issodisfati. |
|
(8) |
Minħabba l-portafolli ta' korrispondenza jistgħu jiġu ġestiti fuq bażi ta' negozju avvjat, l-impriżi li rċevew l-approvazzjoni biex jużaw aġġustament ta' korrispondenza biex ivalwawl-obbligi korrispondenti għandhom ukoll jitħallew jużaw dak l-aġġustament biex ivalwaw l-obbligi ta' assigurazzjoni futuri, sal-limitu li dawk l-obbligi u l-assi li jikkorrispondi magħhom ikollhom l-istess karatteristiċi bħall-obbligi u l-assi inklużi fil-portafoll ta' korrispondenza inizjali u, konsegwentement, jinvolvu l-istess riskji għall-impriża kkonċernata. |
|
(9) |
Minħabba interdipendenzi bejn id-diversi applikazzjonijiet għall-approvazzjoni skont id-Direttiva 2009/138/KE, meta ssir applikazzjoni għal approvazzjoni ta' aġġustament ta' korrispondenza, l-impriża ta' assigurazzjoni jew riassigurazzjoni għandha tinforma lill-awtorità superviżorja dwar applikazzjonijiet oħra li jikkonċernaw il-punti fl-Artikolu 308a(1) tad-Direttiva 2009/138/KE, li attwalment jinsabu għaddejja jew previsti fis-sitt xhur li ġejjin. Tali rekwiżit huwa meħtieġ biex jiġi żgurat li l-valutazzjonijiet superviżorji jkunu bbażati fuq informazzjoni trasparenti u imparzjali. |
|
(10) |
Dan ir-Regolament huwa bbażat fuq l-abbozz tal-istandards tekniċi implementattivi ppreżentati mill-Awtorità Ewropea tal-Assigurazzjoni u l-Pensjonijiet tax-Xogħol lill-Kummissjoni Ewropea. |
|
(11) |
L-Awtorità Ewropea tal-Assigurazzjoni u l-Pensjonijiet tax-Xogħol wettqet konsultazzjonijiet pubbliċi miftuħa dwar l-abbozz tal-istandards tekniċi implementattivi li fuqhom huwa bbażat dan ir-Regolament, analizzat il-kostijiet u l-benefiċċji potenzjali relatati u talbet l-opinjoni tal-Grupp tal-Partijiet Bankarji Konċernati stabbilit skont l-Artikolu 37 tar-Regolament (UE) Nru 1094/2010 tal-Parlament Ewropew u tal-Kunsill (2), |
|
(12) |
Sabiex titjieb iċ-ċertezza legali dwar ir-reġim superviżorju matul il-perjodu ta' introduzzjoni progressiva previst fl-Artikolu 308a tad-Direttiva 2009/138/KE, li se jibda fl-1 ta' April 2015, huwa importanti li jiġi żgurat li dan ir-Regolament jidħol fis-seħħ malajr kemm jista' jkun, fil-jum wara dak tal-pubblikazzjoni tiegħu f'Il-Ġurnal Uffiċjali tal-Unjoni Ewropea. |
ADOTTAT DAN IR-REGOLAMENT:
Artikolu 1
Applikazzjoni għall-użu ta' aġġustament ta' korrispondenza
1. L-impriżi tal-assigurazzjoni u tar-riassigurazzjoni li japplikaw biex jużaw l-aġġustament ta' korrispondenza jissottomettu applikazzjoni għal approvazzjoni minn qabel bil-miktub lill-awtoritajiet superviżorji.
2. L-applikazzjoni tiġi ppreżentata f'waħda mil-lingwi uffiċjali tal-Istat Membru li fih l-impriża ta' assigurazzjoni jew riassigurazzjoni għandha l-uffiċċju prinċipali tagħha, jew f'lingwa miftiehma minn qabel mill-awtorità superviżorja, u jkun fiha mill-inqas l-informazzjoni meħtieġa skont l-Artikoli 3 sa 6 ta' dan ir-Regolament.
3. L-impriżi tal-assigurazzjoni u tar-riassigurazzjoni jiżguraw li l-applikazzjoni tinkludi kull tagħrif rilevanti ieħor li huma jqisu li jista' jkun meħtieġ għall-valutazzjoni u d-deċiżjoni tal-awtorità superviżorja. L-applikazzjoni għandha tinkludi evidenza dokumentata tal-proċess intern tat-teħid tad-deċiżjonijiet tal-impriża ta' assigurazzjoni jew riassigurazzjoni marbuta mal-applikazzjoni.
4. Fejn applikazzjoni tiġi sottomessa fir-rigward ta' aktar minn portafoll wieħed ta' obbligi tal-assigurazzjoni u tar-riassigurazzjoni, l-applikazzjoni tistabbilixxi l-provi meħtieġa skont l-Artikoli 3 sa 6 ta' dan ir-Regolament b'mod separat għal kull portafoll li huwa kopert bl-applikazzjoni.
Artikolu 2
Kontenut tal-applikazzjoni relatata mal-portafoll ta' assi assenjat
Fir-rigward tal-portafoll ta' assi assenjat meħtieġ mill-paragrafu 1(a) tal-Artikolu 77b tad-Direttiva 2009/138/KE, l-applikazzjoni tinkludi mill-inqas dan li ġej:
|
(a) |
evidenza li l-portafoll ta' assi assenjat jissodisfa l-kundizzjonijiet relevanti kollha speċifikati fl-Artikolu 77b(1) tad-Direttiva 2009/138/KE; |
|
(b) |
dettalji tal-assi fi ħdan il-portafoll assenjat, li jikkonsistu minn informazzjoni tal-assi linja b'linja flimkien mal-proċedura użata biex l-assi jitqiegħu fi gruppi skont il-klassi ta' assi, il-kwalità tal-kreditu u t-tul għad-determinazzjoni tal-firxa fundamentali msemmija fil-paragrafu 1(b) tal-Artikolu 77c tad-Direttiva 2009/138/KE; |
|
(c) |
deskrizzjoni tal-proċess użat biex il-portafoll ta' assi assenjat jinżamm skont il-paragrafu 1(a) tal-Artikolu 77b tad-Direttiva 2009/138/KE, inkluż il-proċess għaż-żamma tar-replikazzjoni ta' dawn il-flussi ta' flus mistennija meta dawn jinbidlu b'mod materjali. |
Artikolu 3
Kontenut tal-applikazzjoni relatata mal-obbligi tal-portafoll tal-assigurazzjoni jew tar-riassigurazzjoni
Fir-rigward tal-portafoll tal-obbligi tal-assigurazzjoni u tar-riassigurazzjoni li għalih huwa maħsub li jiġi applikat l-aġġustament ta' korrispondenza, l-applikazzjoni tkun fiha tal-anqas dan li ġej:
|
(a) |
evidenza li l-obbligi tal-assigurazzjoni jew tar-riassigurazzjoni jilħqu l-kriterji kollha speċifikati fil-punti (d), (e), (g) u (j) tal-paragrafu 1 tal-Artikolu 77b tad-Direttiva 2009/138/KE; |
|
(b) |
fejn riskju ta' mortalità huwa preżenti, evidenza kwantitattiva li l-aħjar stima tal-portafoll tal-obbligi tal-assigurazzjoni jew tar-riassigurazzjoni ma tiżdiedx b'aktar minn 5 % taħt l-istress tar-riskju tal-mortalità speċifikat fl-Artikolu 52 ta' Regolament ta' Delega tal-Kummissjoni (UE) 2015/35 (3). |
Artikolu 4
Kontenut tal-applikazzjoni bil-miktub relatata mal-korrispondenza tal-fluss tal-flus u l-ġestjoni tal-portafoll
Fir-rigward tal-korrispondenza tal-fluss tal-flus u l-ġestjoni tal-portafoll tal-obbligi eliġibbli u l-portafoll tal-assi assenjat, l-applikazzjoni jkun fiha tal-anqas dan li ġej:
|
(a) |
evidenza kwantitattiva li l-kriterji tal-paragrafu 1(c) tal- Artikolu 77b tad-Direttiva 2009/138/KE huma ssodisfati, inkluża valutazzjoni kwantitattiva u kwalitattiva dwar jekk kwalunkwe nuqqas ta' korrispondenza jagħtix lok għal riskji li huma materjali fir-rigward tar-riskji inerenti fin-negozju tal-assigurazzjoni li għalih huwa maħsub li jiġi applikat l-aġġustament ta' korrispondenza; |
|
(b) |
evidenza li proċessi adegwati se jkunu fis-seħħ biex jidentifikaw, jorganizzaw u jiġġestixxu sew il-portafoll tal-obbligi i u l-portafoll tal-assi assenjat separatament minn attivitajiet oħra tal-impriżi, u li jiżgura li l-assi assenjati mhux se jintużaw biex ikopru telf li jirriżulta minn attivitajiet oħra tal-impriżi, skont il-paragrafu 1(b) tal-Artikolu 77b tad-Direttiva 2009/138/KE; |
|
(c) |
evidenza ta' kif il-fondi proprji se jiġu aġġustati f'konformità mal-Artikolu 81 tad-Direttiva 2009/138/KE li tiġi riflessa kwalunkwe trasferibilità mnaqqsa; |
|
(d) |
evidenza dwar kif ir-Rekwiżit Kapitali tas-Solvibbilità (SCR) se jiġi aġġustat biex jirrifletti b'mod xieraq kwalunkwe possibilità mnaqqsa għad-diversifikazzjoni tar-riskju. Fejn rilevanti, dan jinkludi evidenza ta' konformità mal-Artikoli 216, 217 u 234 tar-Regolament ta' Delega (UE) 2015/35. Fejn l-impriżi tal-assigurazzjoni u tar-riassigurazzjoni biħsiebhom jikkalkolaw ir-Rekwiżit Kapitali tas-Solvibbiltà billi jużaw mudell intern iżda ma tkunx ġiet mogħtija l-approvazzjoni superviżorja meħtieġa, l-evidenza meħtieġa minn dan il-paragrafu tiġi ppreżentata fuq il-bażi tal-formula standard kif ukoll tal-mudell intern mhux approvat. |
Artikolu 5
Kontenut addizzjonali tal-applikazzjoni bil-miktub
Minbarra l-informazzjoni speċifikata fl-Artikoli 3 sa 4 ta' dan ir-Regolament, l-applikazzjoni għandha tinkludi wkoll dan li ġej:
|
(a) |
konferma li l-kundizzjonijiet tal-Artikolu 77b(3) tad-Direttiva 2009/138/KE se jintlaħqu jekk tingħata l-approvazzjoni superviżorja għall-applikazzjoni ta' aġġustament; |
|
(b) |
il-pjan ta' likwidità meħtieġ skont l-Artikolu 44(2) tad-Direttiva 2009/138/KE; |
|
(c) |
il-valutazzjonijiet meħtieġa skont l-Artikolu 44 (2a) (b) tad-Direttiva 2009/138/KE; |
|
(d) |
il-valutazzjonijiet meħtieġa skont l-Artikolu 45(2a) tad-Direttiva 2009/138/KE; |
|
(e) |
spjegazzjoni dettaljata u dimostrazzjoni tal-proċess ta' kalkolu użat biex jiġi determinat l-aġġustament ta' korrispondenza skont ir-rekwiżiti tal-Artikolu 77c tad-Direttiva 2009/138/KE; |
|
(f) |
lista ta' applikazzjonijiet oħra ppreżentati mill-impriża tal-assigurazzjoni jew tar-rijassigurazzjoni, jew attwalment previsti fis-sitt xhur li ġejjin, għall-approvazzjoni ta' xi waħda mill-partit tad-dħul gradwali elenkati fl-Artikolu 308a(1) tad-Direttiva 2009/138/KE. |
Artikolu 6
Valutazzjoni tal-applikazzjoni
1. L-awtorità superviżorja għandha tikkonferma li rċeviet l-applikazzjoni tal-impriża tal-assigurazzjoni jew riassigurazzjoni.
2. Applikazzjoni titqies kompluta mill-awtorità superviżorja jekk ikun fiha l-provi kollha meħtieġa mill-Artikoli 2 sa 5 ta' dan ir-Regolament.
3. L-awtorità superviżorja tikkonferma jekk l-applikazzjoni tkunx kompluta fi żmien 30 jum mid-data ta' meta tasal l-applikazzjoni.
4. Meta l-awtorità superviżorja tiddetermina li l-applikazzjoni ma tkunx kompluta, tinforma immedjatament lill-impriża tal-assigurazzjoni jew tar-riassigurazzjoni li l-perjodu ta' approvazzjoni ma jkunx beda u tispeċifika għaliex l-applikazzjoni ma tkunx ikkunsidrata bħala kompluta.
5. L-awtorità superviżorja għandha tiddeċiedi dwar l-applikazzjoni fi żmien sitt xhur minn meta tirċievi l-applikazzjoni kompluta.
6. Meta l-awtorità ta' superviżjoni tkun ikkonfermat li l-applikazzjoni hija kompluta, dan ma jipprevjenix lil dik l-awtorità superviżorja milli titlob informazzjoni addizzjonali meħtieġa biex twettaq il-valutazzjoni tagħha. It-talba tispeċifika l-informazzjoni addizzjonali meħtieġa u r-raġunijiet għat-talba.
7. Il-valutazzjoni tal-applikazzjoni tinvolvi komunikazzjoni kontinwa mal-impriża tal-assigurazzjoni jew tar-riassigurazzjoni u tista' tinkludi talbiet għal aġġustamenti mill-awtoritajiet superviżorji dwar il-mod kif l-impriża tipproponi li tapplika aġġustament ta' korrispondenza. Meta l-awtorità superviżorja tiddetermina li jista' jkun possibbli li tapprova l-applikazzjoni ta' aġġustament ta' korrispondenza bil-kundizzjoni li jsiru aġġustamenti, mingħajr dewmien tinnotifika lill-impriża tal-assigurazzjoni u tar-riassigurazzjoni bil-miktub dwar l-aġġustamenti meħtieġa.
8. Il-jiem bejn id-data li fiha l-awtorità superviżorja titlob informazzjoni addizzjonali jew aġġustamenti skont il-paragrafi 6 jew 7, u d-data li fiha l-awtorità superviżorja tirċievi tali informazzjoni jew aġġustamenti ma jiġux inkluż fil-perjodu ta' żmien ta' sitt xhur stabbilit fil-paragrafu 5.
9. L-impriżi tal-assigurazzjoni u tar-riassigurazzjoni jiżguraw li l-evidenza dokumentarja kollha tkun disponibbli, inkluż f'forma elettronika kull meta possibbli, għall-awtorità superviżorja, matul il-valutazzjoni tal-applikazzjoni.
10. L-impriża tal-assigurazzjoni jew riassigurazzjoni tavża lill-awtorità superviżorja b'kull bidla fid-dettalji tal-applikazzjoni tagħha. Fejn impriża tal-assigurazzjoni jew tar-riassigurazzjoni tinforma lill-awtorità superviżorja dwar bidla fl-applikazzjoni tagħha din tiġi ttrattata bħala applikazzjoni ġdida sakemm:
|
(a) |
il-bidla ma tkunx minħabba talba mill-awtorità superviżorja għal informazzjoni addizzjonali jew modifiki; jew |
|
(b) |
l-awtorità superviżorja ma tkunx issodisfata li t-tibdil ma jaffettwax b'mod sinifikanti l-valutazzjoni tagħha tal-applikazzjoni. |
11. Impriża tal-assigurazzjoni jew tar-riassigurazzjoni tista' tirtira applikazzjoni permezz ta' notifika bil-miktub fi kwalunkwe stadju qabel id-deċiżjoni tal-awtorità superviżorja. Jekk l-impriża tal-assigurazzjoni jew tar-riassigurazzjoni sussegwentement terġa' tissottometti l-applikazzjoni jew tissottometti applikazzjoni aġġornata, l-awtorità superviżorja għandha tikkunsidraha bħala applikazzjoni ġdida.
Artikolu 7
Deċiżjoni dwar it-talba
1. L-awtorità superviżorja tista' tikkunsidra evidenza oħra apparti dik elenkata fl-Artikolu 2 — 5 ta' dan ir-Regolament, fejn din l-evidenza tkun rilevanti għall-valutazzjoni tal-konformità mal-kundizzjonijiet stipulati fl-Artikolu 77b(1) u 77c tad-Direttiva 2009/138/KE meta tieħu deċiżjoni dwar l-approvazzjoni tal-applikazzjoni.
2. Deċiżjoni tal-awtorità superviżorja dwar l-approvazzjoni tal-applikazzjoni għandha tiġi kkomunikata bil-miktub bl-istess lingwa tal-applikazzjoni.
3. Fejn applikazzjoni waħda ġiet irċevuta fir-rigward ta' aktar minn portafoll wieħed ta' obbligi tal-assigurazzjoni u tar-riassigurazzjoni, l-awtorità superviżorja tista' tiddeċiedi li tapprova l-applikazzjoni fir-rigward ta' xi wħud biss mill-portafolli inklużi fl-applikazzjoni u mhux ta' kollha. F'dak il-każ, il-komunikazzjoni bil-miktub tad-deċiżjoni tispeċifika għal liema portafolli ta' obbligi tal-assigurazzjoni u tar-riassigurazzjoni jistgħu japplikaw aġġustament ta' korrispondenza.
4. Meta l-awtorità superviżorja tiddeċiedi li tirrifjuta applikazzjoni, għal xi wħud, jew għall-portafolli kollha inklużi f'applikazzjoni, tiddikjara b'mod ċar ir-raġunijiet għal dik id-deċiżjoni.
5. Meta l-impriżi tal-assigurazzjoni u tar-riassigurazzjoni jingħataw approvazzjoni biex japplikaw aġġustament ta' korrispondenza għal portafoll ta' obbligi tal-assigurazzjoni u tar-riassigurazzjoni, l-ambitu ta' din id-deċiżjoni ta' approvazzjoni jitqies li jkopri l-obbligi tal-assigurazzjoni u tar-riassigurazzjoni futuri u assi li huma miżjuda ma' dak il-portafoll ta' korrispondenza, bil-kundizzjoni li l-impriżi jistgħu juru dan li ġej:
|
(a) |
l-obbligi u l-assi futuri jkollhom l-istess karatteristiċi bħall-obbligi u l-assi inklużi f'portafoll ta' korrispondenza li għalih tkun ingħatat l-approvazzjoni; |
|
(b) |
il-portafoll ta' korrispondenza jibqa' jissodisfa l-kundizzjonijiet rilevanti tad-Direttiva 2009/138/KE. |
Artikolu 8
Tħassir tal-approvazzjoni mill-awtorità ta' superviżjoni
Meta l-awtorità superviżorja tqis li impriża tal-assigurazzjoni jew tar-riassigurazzjoni li ngħata l-approvazzjoni biex tuża aġġustament ta' korrispondenza m'għadhiex tikkonforma mal-kundizzjonijiet stabbiliti fl-Artikoli 77b(1) jew 77c tad-Direttiva 2009/138/KE, dik l-awtorità superviżorja tinforma lill-impriża tal-assigurazzjoni jew tar-riassigurazzjoni immedjatament u tispjega n-natura tan-nuqqas ta' konformità.
Artikolu 9
Dħul fis-seħħ
Dan ir-Regolament jidħol fis-seħħ l-għada tal-jum tal-pubblikazzjoni tiegħu f'Il-Ġurnal Uffiċjali tal-Unjoni Ewropea.
Dan ir-Regolament għandu jorbot fl-intier tiegħu u japplika direttament fl-Istati Membri kollha.
Magħmul fi Brussell, l-24 ta' Marzu 2015.
Għall-Kummissjoni
Il-President
Jean-Claude JUNCKER
(1) ĠU L 335, 17.12.2009, p. 1.
(2) Ir-Regolament (UE) Nru 1094/2010 tal-Parlament Ewropew u tal-Kunsill tal-24 ta' Novembru 2010 li jistabbilixxi Awtorità Superviżorja Ewropea (Awtorità Ewropea tal-Assigurazzjoni u l-Pensjonijiet tax-Xogħol), u li jemenda d-Deċiżjoni Nru 716/2009/KE u li jħassar id-Deċiżjoni tal-Kummissjoni 2009/79/KE (ĠU L 331, 15.12.2010, p. 48).
(3) Ir-Regolament ta' Delega tal-Kummissjoni (UE) 2015/35 tal-10 ta' Ottubru 2014 li jissupplimenta d-Direttiva 2009/138/KE tal-Parlament Ewropew u tal-Kunsill dwar il-bidu u l-eżerċizzju tan-negozju tal-Assigurazzjoni u tar-Riassigurazzjoni (Solvibbiltà II) (ĠU L 12, 17.1.2015, p. 1).