L_2017092MT.01003601.xml

REGOLAMENT TA' IMPLIMENTAZZJONI TAL-KUMMISSJONI (UE) 2017/646

tal-5 ta' April 2017

li jemenda r-Regolament ta' Implimentazzjoni (UE) 2015/378 li jistabbilixxi r-regoli għall-applikazzjoni tar-Regolament (UE) Nru 514/2014 tal-Parlament Ewropew u tal-Kunsill fir-rigward tal-implimentazzjoni għall-ikklerjar tal-proċedura ta' kontijiet u fir-rigward tal-implimentazzjoni tar-regoli dwar l-ikklerjar tal-konformità

IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea,

Wara li kkunsidrat ir-Regolament (UE) Nru 514/2014 tal-Parlament Ewropew u tal-Kunsill tas-16 ta' April 2014 li jistabbilixxi dispożizzjonijiet ġenerali dwar il-Fond għall-Asil, il-Migrazzjoni u l-Integrazzjoni u dwar l-istrument għal appoġġ finanzjarju għall-kooperazzjoni tal-pulizija, il-prevenzjoni u l-ġlieda kontra l-kriminalità, u l-ġestjoni tal-kriżijiet (1), u b'mod partikolari l-Artikolu 47(6) tiegħu,

Billi:

(1)

L-ewwel eżerċizzju ta' kklerjar tal-kontijiet annwali mwettqa skont l-Artikolu 1 tar-Regolament ta' Implimentazzjoni tal-Kummissjoni (UE) 2015/378 (2) enfasizza l-ħtieġa li tiġi ċċarata s-sitwazzjoni ta' ammonti ta' prefinanzjament annwali li mhumiex totalment ikklerjati mill-kontijiet annwali ppreżentati.

(2)

Hemm bżonn li jiġu stabbiliti arranġamenti għall-implimentazzjoni tal-approvazzjoni tal-konformità u b'mod partikolari r-regoli dettaljati dwar il-kriterji għad-determinazzjoni tal-livell ta' korrezzjoni finanzjarja li l-Kummissjoni tista' tapplika skont l-Artikolu 47 tar-Regolament (UE) Nru 514/2014 wara li tintemm din il-proċedura.

(3)

Sabiex tiġi żgurata ċ-ċertezza tad-dritt u t-trattament indaqs tal-Istati Membri, huwa essenzjali li jiġu ċċarati l-kriterji għad-determinazzjoni tan-nuqqasijiet serji fil-funzjonament effettiv tas-sistemi ta' ġestjoni u ta' kontroll, li jiġu ddefiniti t-tipi ewlenin ta' dawn in-nuqqasijiet u li jiġu stabbiliti l-kriterji għad-determinazzjoni tal-livell ta' korrezzjoni finanzjarja.

(4)	Għaldaqstant ir-Regolament ta' Implimentazzjoni (UE) 2015/378 għandu jiġi emendat skont dan.

(5)	Il-miżuri previsti f'dan ir-Regolament huma skont l-opinjoni tal-Kumitat “għall-Fondi għall-Ażil, il-Migrazzjoni u l-Integrazzjoni u s-Sigurtà Interna”,

ADOTTAT DAN IR-REGOLAMENT:

Artikolu 1

Ir-Regolament ta' Implimentazzjoni (UE) 2015/378 jiġi emendat kif ġej:

(1)

L-Artikolu 1 huwa emendat kif ġej:

(a)

Il-paragrafu 6 huwa sostitwit b'dan li ġej:

“6. Meta l-ammont aċċettat mill-Kummissjoni fid-deċiżjoni dwar l-approvazzjoni tal-kontijiet annwali għas-sena finanzjarja N ikun inqas mill-ammont ta' prefinanzjament annwali għas-sena finanzjarja N, dan l-ammont għandu jiġi approvat billi jitnaqqas mill-ewwel ammont. Kull ammont pendenti ta' prefinanzjament għandu jiġi approvat matul eżerċizzji tal-approvazzjoni sussegwenti.

L-ewwel subparagrafu għandu japplika wkoll f'każijiet fejn Stat Membru jippreżenta l-kontijiet annwali li jiddikjaraw pagament żero.”

(b)	Jitħassar il-paragrafu 7.

(2)

Jiddaħħlu l-Artikoli li ġejjin:

“Artikolu 3a

Kriterji biex jiġu stabbiliti nuqqasijiet serji fil-funzjonament effettiv tas-sistemi ta' ġestjoni u kontroll

1. Il-Kummissjoni għandha tibbaża l-valutazzjoni tagħha tal-funzjonament effettiv tas-sistemi ta' ġestjoni u ta' kontroll fuq ir-riżultati tal-verifiki u kontrolli disponibbli kollha mwettqa mill-Istati Membri, is-servizzi tal-Kummissjoni u mill-Qorti tal-Awdituri, ir-riżultati tal-investigazzjonijiet imwettqa mill-Uffiċċju Ewropew ta' Kontra l-Frodi jew kwalunkwe informazzjoni oħra dwar il-konformità mal-kriterji tal-ħatra msemmija fl-Artikolu 2(1) ir-Regolament (UE) Nru 1042/2014 (*1).

Il-valutazzjoni tal-Kummissjoni għandha tkopri l-ambjent ta' kontroll intern tal-programm nazzjonali, l-attivitajiet ta' ġestjoni u kontroll tal-Awtorità Responsabbli, u l-attivitajiet ta' kontroll u awditjar tal-Awtorità tal-Awditjar u għandha tkun ibbażata fuq il-verifika tal-konformità mar-rekwiżiti ewlenin stabbiliti fit-Tabella 1 tal-Anness.

2. Il-konformità mar-rekwiżiti ewlenin imsemmija fil-paragrafu 1 skont il-kategoriji stabbiliti fit-Tabella 2 tal-Anness għandha tintuża biex jiġi vvalutat il-funzjonament effettiv ta' kull awtorità kompetenti u biex tintlaħaq konklużjoni ġenerali dwar is-sistema ta' ġestjoni u ta' kontroll. Għandu jitqies kull fattur mitiganti jew aggravanti fil-konklużjoni ġenerali dwar is-sistema ta' ġestjoni u kontroll.

3. Fejn jiġi vvalutat li xi wieħed mir-rekwiżiti prinċipali 2, 4, 5, 8, 11, 12 jew14 fit-Tabella 1 tal-Anness, jew tnejn jew aktar mir-rekwiżiti prinċipali l-oħra f'dik it-Tabella jaqgħu fil-kategoriji 3 jew 4 stabbiliti fit-Tabella 2 tal-Anness, dan għandu jitqies bħala tip ta' nuqqas serju fil-funzjonament effettiv tas-sistema ta' ġestjoni u kontroll.

Artikolu 3b

Kriterji għall-applikazzjoni u għad-determinazzjoni tal-livell ta' korrezzjonijiet finanzjarji

1. Il-Kummissjoni għandha tapplika korrezzjonijiet finanzjarji fejn tidentifika irregolarità individwali jew sistemika jew aktar minn waħda jew defiċjenza waħda jew aktar fil-funzjonament effettiv tas-sistema ta' ġestjoni u kontroll (‘defiċjenzi sistemiċi'’.

Għall-finijiet ta' dan ir-Regolament, irregolarità tfisser kwalunkwe ksur tal-liġi tal-Unjoni jew nazzjonali jew kwalunkwe ksur tar-regoli nazzjonali li jirriżulta minn att jew minn ommissjoni min-naħa ta' benefiċjarju jew benefiċjarji li għandu, jew li jista' jkollu, l-effett li jippreġudika l-baġit ġenerali tal-Unjoni Ewropea billi jitlob mingħandha ħlas għal element ta' nefqa mhux iġġustifikat.

L-ammont tal-korrezzjoni finanzjarja għandu jiġi ddeterminat fuq bażi ta' każ b'każ fejn ikun possibbli u għandu jkun ekwivalenti għall-ammont eżatt tan-nefqa mitluba inġustament mill-baġit ġenerali tal-Unjoni.

Fejn il-Kummissjoni tidentifika irregolaritajiet f'kampjun rappreżentattiv tal-infiq fi programm nazzjonali jew f'parti minnu, iżda ma jkunx kosteffikaċi li wieħed jivverifika r-regolarità tal- infiq l-ieħor, il-korrezzjoni tista' tiġi ddeterminata billi jiġu estrapolati r-riżultati tal-eżami tal-kampjun għall-bqija tal-popolazzjoni minn fejn ikun ittieħed.

Meta l-Kummissjoni tidentifika irregolaritajiet sistemiċi jew nuqqasijiet fis-sistema iżda fejn mhux possibbli, anki permezz tal-estrapolazzjoni, li tikkwantifika l-korrezzjoni b'mod preċiż, korrezzjoni finanzjarja b'rata fissa għandha tiġi applikata għan-nefqa ddikjarata għal dik il-parti tas-sistema li tkun ġiet affettwata skont il-kriterji indikattivi u l-iskali stabbiliti fil-paragrafi 2 u 3.

Korrezzjonijiet b'rata fissa jistgħu jkunu applikati wkoll fuq irregolaritajiet individwali.

2. Il-livell ta' korrezzjoni b'rata fissa għandu jiġi stabbilit filwaqt li jitqiesu l-elementi li ġejjin:

(a)	il-grad tal-gravità tal-irregolarità jew in-nuqqas tas-sistema fil-kuntest tas-sistema ġenerali jew parti minnha, jew li t-tipi ta' nefqa ddikjarata;

(b)	tal-grad tar-riskju tat-telf li għalih kien espost il-baġit tal-UE b'riżultat tal-irregolarità jew in-nuqqas tas-sistema;

(c)	il-vulnerabbiltà għal frodi fl-infiq minħabba l-irregolarità jew in-nuqqas tas-sistema;

(d)	kull fattur mitiganti jew aggravanti.

3. Il-livell ta' korrezzjoni għandu jiġi determinat kif ġej:

(a)

fejn l-irregolarità jew l-irregolaritajiet jew id-defiċjenza jew id-defiċjenzi fis-sistema hija jew huma tant fundamentali, frekwenti jew mifruxin li jirrappreżentaw falliment totali tas-sistema, liema falliment ipoġġi f'riskju l-legalità u r-regolarità tan-nefqa kollha kkonċernata, għandha tiġi applikata rata fissa ta' 100 %.

(b)

fejn l-irregolarità jew l-irregolaritajiet jew id-defiċjenza jew id-defiċjenzi fis-sistema hija jew huma tant frekwenti jew mifruxin li jirrappreżentaw falliment serju tas-sistema, liema falliment ipoġġi f'riskju l-legalità u r-regolarità ta' proporzjon għoli ħafna min-nefqa kkonċernata, għandha tiġi applikata rata fissa ta' 25 %;

(c)

fejn l-irregolarità jew l-irregolaritajiet jew id-defiċjenza jew id-defiċjenzi fis-sistema hija jew huma dovuti għall-fatt li s-sistema qed tiffunzjona parzjalment, b'mod tant ħażin jew b'mod tant mhux frekwenti li tpoġġi f'riskju l-legalità u r-regolarità ta' proporzjon għoli mill-infiq ikkonċernat, għandha tiġi applikata rata fissa ta' 10 %;

(d)

fejn l-irregolarità jew l-irregolaritajiet jew id-defiċjenza jew id-defiċjenzi fis-sistema hija jew huma dovuti għall-fatt li s-sistema qed tiffunzjona b'mod inkonsistenti u b'hekk tpoġġi f'riskju l-legalità u r-regolarità ta' proporzjon sinifikanti min-nefqa kkonċernata, għandha tiġi applikata rata fissa ta' 5 %.

Skont il-prinċipju tal-proporzjonalità, ir-rata tista' tiġi mnaqqsa għal 2 % fejn in-natura u l-gravità tal-irregolarità jew in-nuqqas tas-sistema ma jkunux ikkunsidrati bħala li jiġġustifikaw rata ta' korrezzjoni ta' 5 %.

4. Fejn, minħabba nuqqas tal-awtorità kompetenti li tieħu miżuri korrettivi adegwati wara l-applikazzjoni ta' korrezzjoni finanzjarja f'sena tal-kontabbiltà, l-istess irregolarità jew irregolaritajiet jew defiċjenza jew defiċjenzi jiġu identifikati f'sena tal-kontabbiltà sussegwenti, ir-rata ta' korrezzjoni tista', minħabba l-persistenza tal-irregolarità jew irregolaritajiet, tiżdied għal livell li ma jaqbiżx dak tal-kategorija ogħla li jmiss fl-iskala stabbilita fil-paragrafu 3.

(*1) Ir-Regolament ta' Delega tal-Kummissjoni (UE) Nru 1042/2014 tal-25 ta' Lulju 2014 li jissupplimenta r-Regolament (UE) Nru 514/2014 fir-rigward tar-responsabbiltajiet tan-nomina u tal-ġestjoni u tal-kontroll ta' Awtoritajiet Responsabbli u fir-rigward tal-istatus u tal-obbligi tal-Awtoritajiet tal-Awditjar (ĠU L 289, 3.10.2014, p. 3).” "

(3)	Qed jiżdied anness ġdid kif stipulat fl-Anness ta' dan ir-Regolament.

Artikolu 2

Dan ir-Regolament għandu jidħol fis-seħħ fl-għoxrin jum wara l-pubblikazzjoni tiegħu f'Il-Ġurnal Uffiċjali tal-Unjoni Ewropea.

Dan ir-Regolament jorbot fl-intier tiegħu u japplika direttament fl-Istati Membri skont it-Trattati.

Magħmul fi Brussell, il-5 ta' April 2017.

Għall-Kummissjoni

Il-President

Jean-Claude JUNCKER

(1) ĠU L 150, 20.5.2014, p. 112.

(2) Ir-Regolament ta' Implimentazzjoni tal-Kummissjoni (UE) 2015/378 tat-2 ta' Marzu 2015 li jistabbilixxi r-regoli għall-applikazzjoni tar-Regolament (UE) Nru 514/2014 tal-Parlament Ewropew u tal-Kunsill fir-rigward tal-implimentazzjoni għall-ikklerjar tal-proċedura ta' kontijiet u fir-rigward tal-implimentazzjoni tar-regoli dwar l-ikklerjar tal-konformità (ĠU L 64, 7.3.2015, p. 30).

ANNESS

“ANNESS

Rekwiżiti ewlenin tas-sistemi ta' ġestjoni u kontroll u l-klassifikazzjoni tagħhom rigward it-tħaddim effettiv tagħhom

(kif imsemmi fl-Artikolu 3a tar-Regolament ta' Implimentazzjoni (UE) 2015/378)

Tabella 1

Rekwiżiti ewlenin

	Rekwiżiti ewlenin tas-sistemi ta' ġestjoni u kontroll	Korpi/awtoritajiet ikkonċernati	Kamp ta' applikazzjoni
1	Deskrizzjoni adegwata u separazzjoni tal-funzjonijiet u sistemi adegwati għar-rapportar u l-monitoraġġ f'każijiet fejn l-Awtorità Responsabbli tinkariga t-twettiq tal-kompiti lil korp ieħor	Awtorità Responsabbli/Awtorità Delegata	Ambjent intern
2	Għażla xierqa tal-proġetti	Awtorità Responsabbli/Awtorità Delegata	Attivitajiet ta' kontroll
3	Informazzjoni adegwata lill-benefiċjarji, benefiċjarji potenzjali u l-pubbliku	Awtorità Responsabbli/Awtorità Delegata	Informazzjoni u komunikazzjoni interna
4	Kontrolli adegwati	Awtorità Responsabbli/Awtorità Delegata	Attivitajiet ta' kontroll
5	Sistemi u proċeduri effettivi biex jiġi żgurat li jinżammu d-dokumenti kollha dwar l-infiq u l-awditjar sabiex ikun żgurat rekord adegwat tal-awditjar	Awtorità Responsabbli/Awtorità Delegata	Attivitajiet ta' kontroll
6	Sistemi kompjuterizzati affidabbli għall-kontabbiltà, għall-ħżin u t-trasmissjoni ta' data finanzjarja u data dwar indikaturi, għall-monitoraġġ u għar-rappurtar	Awtorità Responsabbli/Awtorità Delegata	Attivitajiet ta' kontroll/Informazzjoni u komunikazzjoni interna
7	Implimentazzjoni effettiva ta' proċeduri għall-prevenzjoni, l-individwazzjoni u l-korrezzjoni ta' irregolaritajiet, inklużi miżuri proporzjonati kontra l-frodi	Awtorità Responsabbli/Awtorità Delegata	Attivitajiet ta' kontroll
8	Proċeduri xierqa għat-tfassil tal-kontijiet annwali, tad-dikjarazzjoni tal-maniġment u tas-sommarju annwali tar-rapporti finali tal-awditjar u tal-kontrolli mwettqa	Awtorità Responsabbli/Awtorità Delegata	Attivitajiet ta' kontroll
9	Rendikont xieraq u komplut tal-ammonti rekuperabbli, dawk irkuprati u dawk ikkanċellati	Awtorità Responsabbli/Awtorità Delegata	Attivitajiet ta' kontroll
10	Deskrizzjoni adegwata u separazzjoni tal-funzjonijiet, l-indipendenza funzjonali mill-Awtorità Responsabbli u sistemi adegwati biex jiżguraw li kwalunkwe entità oħra li twettaq awditjar ikollha l-indipendenza funzjonali meħtieġa u tqis l-istandards tal-awditjar tal-kontijiet aċċettati internazzjonalment	Awtorità tal-Awditjar	Ambjent intern
11	Awditi adegwati tas-sistemi	Awtorità tal-Awditjar	Attivitajiet ta' kontroll
12	Awditi adegwati tan-nefqa	Awtorità tal-Awditjar	Attivitajiet ta' kontroll
13	Awditi adegwati tal-kontijiet	Awtorità tal-Awditjar	Attivitajiet ta' kontroll
14	Proċeduri adegwati sabiex tingħata opinjoni affidabbli tal-awditi u għat-tħejjija tar-rapporti	Awtorità tal-Awditjar	Attivitajiet ta' kontroll

Tabella 2

Klassifikazzjoni tar-rekwiżiti ewlenin għas-sistemi tal-ġestjoni u l-kontroll fir-rigward tal-funzjonament effettiv tagħhom

Kategorija 1	Taħdem sew. Le jew hemm bżonn biss ta' xi titjib minuri.
Kategorija 2	Taħdem. Huwa meħtieġ xi titjib
Kategorija 3	Taħdem parzjalment. Hemm bżonn ta' titjib sostanzjali
Kategorija 4	Essenzjalment ma taħdimx

”