European flag

Il-Ġurnal Uffiċjali
ta'l-Unjoni Ewropea

MT

Is-serje L


2025/1945

30.9.2025

REGOLAMENT TA’ IMPLIMENTAZZJONI TAL-KUMMISSJONI (UE) 2025/1945

tad-29 ta’ Settembru 2025

li jistabbilixxi r-regoli għall-applikazzjoni tar-Regolament (UE) Nru 910/2014 tal-Parlament Ewropew u tal-Kunsill fir-rigward tal-validazzjoni ta’ firem elettroniċi kwalifikati u ta’ siġilli elettroniċi kwalifikati u l-validazzjoni ta’ firem elettroniċi avvanzati bbażati fuq ċertifikati kwalifikati u ta’ siġilli elettroniċi avvanzati bbażati fuq ċertifikati kwalifikati

IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea,

Wara li kkunsidrat ir-Regolament (UE) Nru 910/2014 tal-Parlament Ewropew u tal-Kunsill tat-23 ta’ Lulju 2014 dwar l-identifikazzjoni elettronika u s-servizzi fiduċjarji għal tranżazzjonijiet elettroniċi fis-suq intern u li jħassar id-Direttiva 1999/93/KE (1), u b’mod partikolari l-Artikolu 32(3), l-Artikolu 32a(3), l-Artikolu 40 u l-Artikolu 40a tiegħu,

Billi:

(1)

Il-firem elettroniċi kwalifikati, is-siġilli elettroniċi kwalifikati, il-firem elettroniċi avvanzati bbażati fuq ċertifikati kwalifikati għal firem elettroniċi, u s-siġilli elettroniċi avvanzati bbażati fuq ċertifikati kwalifikati għal siġilli elettroniċi, diment li l-validità tagħhom tkun tista’ tiġi kkonfermata, jiżguraw lill-partijiet dipendenti l-integrità u l-awtentiċità tad-data ffirmata jew issiġillata, u jtejbu ċ-ċertezza fir-rigward tal-identità tal-firmatarju jew tal-kreatur tas-siġill. Dawk il-firem u s-siġilli elettroniċi jaqdu rwol kruċjali fl-ambjent tan-negozju diġitali billi jippromwovu t-tranżizzjoni minn proċessi tradizzjonali bbażati fuq il-karti lejn proċessi elettroniċi ekwivalenti.

(2)

Il-preżunzjoni tal-konformità stabbilita fl-Artikolu 32(1), fl-Artikolu 40, fl-Artikolu 32a(3) u fl-Artikolu 40a tar-Regolament (UE) Nru 910/2014 jenħtieġ li tapplika meta l-proċessi għall-validazzjoni tal-firem elettroniċi kwalifikati, tas-siġilli elettroniċi kwalifikati, tal-firem elettroniċi avvanzati bbażati fuq ċertifikati kwalifikati għall-firem elettroniċi, u tas-siġilli elettroniċi avvanzati bbażati fuq ċertifikati kwalifikati għas-siġilli elettroniċi jkunu jikkonformaw mal-istandards tekniċi stabbiliti f’dan ir-Regolament. Dawn l-istandards jenħtieġ li jkunu jirriflettu prattiki stabbiliti u jiġu rikonoxxuti b’mod wiesa’ fis-setturi rilevanti. Jenħtieġ li dawn jiġu adattati biex ikunu jinkludu kontrolli addizzjonali li jiżguraw l-abbiltà ta’verifika tal-validità teknika ta’ dawk il-firem u s-siġilli u, meta applikabbli, l-istatus kwalifikat tagħhom.

(3)

Il-Kummissjoni tivvaluta regolarment teknoloġiji, prattiki, standards jew speċifikazzjonijiet tekniċi ġodda. F’konformità mal-Premessa 75 tar-Regolament (UE) 2024/1183 tal-Parlament Ewropew u tal-Kunsill (2), il-Kummissjoni jenħtieġ li tirrieżamina u taġġorna dan ir-Regolament, jekk ikun meħtieġ, biex iżżommu konformi mal-iżviluppi globali, teknoloġiji, standards jew speċifikazzjonijiet tekniċi ġodda, u biex issegwi l-aqwa prattiki fis-suq intern.

(4)

Ir-Regolament (UE) 2016/679 tal-Parlament Ewropew u tal-Kunsill (3) u, meta rilevanti, id-Direttiva 2002/58/KE tal-Parlament Ewropew u tal-Kunsill (4) japplikaw għall-attivitajiet kollha tal-ipproċessar tad-data personali skont dan ir-Regolament.

(5)

Il-Kontrollur Ewropew għall-Protezzjoni tad-Data ġie kkonsultat f’konformità mal-Artikolu 42(1) tar-Regolament (UE) 2018/1725 tal-Parlament Ewropew u tal-Kunsill (5) u ta l-opinjoni tiegħu fis-6 ta’ Ġunju 2025.

(6)

Il-miżuri previsti f’dan ir-Regolament huma f’konformità mal-opinjoni tal-kumitat stabbilit bl-Artikolu 48 tar-Regolament (UE) Nru 910/2014,

ADOTTAT DAN IR-REGOLAMENT:

Artikolu 1

Standards ta’ referenza u speċifikazzjonijiet

1.   L-istandards ta’ referenza u l-ispeċifikazzjonijiet imsemmija fl-Artikolu 32(3) u fl-Artikolu 40 tar-Regolament (UE) Nru 910/2014 huma stabbiliti fl-Anness I ta’ dan ir-Regolament.

2.   L-istandards ta’ referenza u l-ispeċifikazzjonijiet imsemmija fl-Artikolu 32a(3) u fl-Artikolu 40a tar-Regolament (UE) Nru 910/2014 huma stabbiliti fl-Anness Ii ta’ dan ir-Regolament.

Artikolu 2

Dħul fis-seħħ

Dan ir-Regolament għandu jidħol fis-seħħ fl-għoxrin jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussell, id-29 ta’ Settembru 2025.

Għall-Kummissjoni

Il-President

Ursula VON DER LEYEN


(1)   ĠU L 257, 28.8.2014, p. 73, ELI: http://data.europa.eu/eli/reg/2014/910/oj.

(2)  Ir-Regolament (UE) 2024/1183 tal-Parlament Ewropew u tal-Kunsill tal-11 ta’ April 2024 li jemenda r-Regolament (UE) Nru 910/2014 fir-rigward tal-istabbiliment tal-Qafas Ewropew għall-Identità Diġitali (ĠU L, 2024/1183, 30.4.2024, ELI: http://data.europa.eu/eli/reg/2024/1183/oj).

(3)  Ir-Regolament (EU) 2016/679 tal-Parlament Ewropew u tal-Kunsill tas-27 ta’ April 2016 dwar il-protezzjoni tal-persuni fiżiċi fir-rigward tal-ipproċessar ta’ data personali u dwar il-moviment liberu ta’ tali data, u li jħassar id-Direttiva 95/46/KE (Regolament Ġenerali dwar il-Protezzjoni tad-Data) (ĠU L 119, 4.5.2016, p. 1, ELI: http://data.europa.eu/eli/reg/2016/679/oj).

(4)  Id-Direttiva 2002/58/KE tal-Parlament Ewropew u tal-Kunsill tat-12 ta’ Lulju 2002 dwar l-ipproċessar tad-data personali u l-protezzjoni tal-privatezza fis-settur tal-komunikazzjoni elettronika (Direttiva dwar il-privatezza u l-komunikazzjoni elettronika) (ĠU L 201, 31.7.2002, p. 37, ELI: http://data.europa.eu/eli/dir/2002/58/oj).

(5)  Ir-Regolament (UE) 2018/1725 tal-Parlament Ewropew u tal-Kunsill tat-23 ta’ Ottubru 2018 dwar il-protezzjoni ta’ persuni fiżiċi fir-rigward tal-ipproċessar ta’ data personali mill-istituzzjonijiet, korpi, uffiċċji u aġenziji tal-Unjoni u dwar il-moviment liberu ta’ tali data, u li jħassar ir-Regolament (KE) Nru 45/2001 u d-Deċiżjoni Nru 1247/2002/KE (ĠU L 295, 21.11.2018, p. 39, ELI: http://data.europa.eu/eli/reg/2018/1725/oj).


ANNESS I

Lista tal-istandards ta’ referenza u l-ispeċifikazzjonijiet għall-validazzjoni tal-firem elettroniċi kwalifikati u tas-siġilli elettroniċi kwalifikati

L-istandards ETSI TS 119 172-4 V1.1.1 (2021-05) (1) (“ETSI TS 119 172-4”), u ETSI TS 119 102-2 V1.4.1 (2023-06) (2) (“ETSI TS 119 102-2”) japplikaw bl-adattamenti li ġejjin:

1.

Għal ETSI TS 119 172-4

(1)

2.1 Referenzi normattivi:

—

[1] ETSI EN 319 102-1 V1.4.1 (2024-06) “Firem u Infrastrutturi Elettroniċi (ESI); Proċeduri għall-Ħolqien u l-Validazzjoni tal-Firem Diġitali AdES; Parti 1: Ħolqien u Validazzjoni”.

—

Ir-referenzi kollha għal “ETSI TS 119 102-1 [1]” għandhom jinftiehmu bħala referenzi għal “ETSI EN 319 102-1 [1]”.

—

[2] ETSI TS 119 612 V2.3.1 (2024-11) “Firem u Infrastrutturi Elettroniċi (ESI); Listi ta’ Fiduċja”.

—

[13] ETSI TS 119 101 V1.1.1 (2016-03) “Firem u Infrastrutturi Elettroniċi (ESI); Rekwiżiti ta’ politika u tas-sigurtà għal applikazzjonijiet għall-ħolqien tal-firem u għall-validazzjoni tal-firem”.

(2)

4.2 Limitazzjonijiet tal-validazzjoni u proċeduri tal-validazzjoni, ir-rekwiżiti tal-validazzjoni ta’ RED-4.2-03, it-taqsima “limitazzjonijiet tal-validazzjoni ta’ X 509”, il-punt c):

—

(i) Jekk ċertifikat ta’ entità finali jirrappreżenta ankra ta’ fiduċja, RevocationCheckingConstraints ma għandhiex tintuża.

—

(ii) Jekk ċertifikat ta’ entità finali ma jkunx jirrappreżenta ankra ta’ fiduċja, RevocationCheckingConstraints għandha tiġi ssettjata għal “eitherCheck” kif definit f’ETSI TS 119 172-1 [3], il-klawżola A.4.2.1, it-tabella A.2, ir-ringieli (m)2.1.

—

(iii) Jekk ċertifikat ta’ entità finali jirrappreżenta ankra ta’ fiduċja, RevocationFreshnessConstraints definita f’ETSI TS 119 172-1 [3], il-klawżola A.4.2.1, it-tabella A.2, ir-ringieli (m)2.2 ma għandhiex tintuża.

—

(iv) Jekk ċertifikat ta’ entità finali ma jirrappreżentax ankra ta’ fiduċja, RevocationFreshnessConstraints definita f’ETSI TS 119 172-1 [3], il-klawżola A.4.2.1, it-tabella A.2, ir-ringieli (m)2.2 għandha tintuża b’valur massimu ta’ 24 siegħa għaċ-ċertifikat tal-iffirmar. Ma għandu jiġi stabbilit l-ebda valur għal RevocationFreshnessConstraints għal ċertifikati li mhumiex iċ-ċertifikat tal-iffirmar, inkluż iċ-ċertifikati li jappoġġaw it-timbri tal-ħin.

(3)

4.3 Rekwiżiti dwar il-validazzjoni tal-firma u l-prattiki ta’ verifika tar-regoli dwar l-applikabbiltà

—

REQ-4.3-02 L-applikazzjonijiet tal-validazzjoni tal-firem għandhom ikunu konformi ma’ ETSI TS 119 101 [13].

(4)

4.4 Proċess ta’ verifika tal-applikabbiltà teknika (jew ir-regoli tagħha)

—

REQ-4.4.2-03 Jekk xi kontroll speċifikat f’REQ-4.4.2-01 ma jaħdimx,:

(a)

il-proċess jieqaf;

(b)

il-firma għandha tiġi ddeterminata teknikament bħala indeterminata, jiġifieri la bħala firma elettronika kwalifikata tal-UE, u lanqas bħala siġill elettroniku kwalifikat tal-UE; u

(c)

ir-riżultat ta’ hawn fuq u r-riżultati tal-proċessi intermedji kollha għandhom jiġu riflessi fir-rapport ta’ verifika tar-regoli dwar l-applikabbiltà tal-firma.


(1)  ETSI TS 119 172-4 - Firem u Infrastrutturi Elettroniċi (ESI); Politiki dwar il-Firem; Parti 4: Regoli dwar l-applikabbiltà tal-firem (politika tal-validazzjoni) għall-firem/s-siġilli elettroniċi kwalifikati Ewropej bl-użu ta’ listi ta’ fiduċja, V1.1.1 (2021-05).

(2)  ETSI TS 119 102-2 - Firem u Infrastrutturi Elettroniċi (ESI); Proċeduri għall-Ħolqien u l-Validazzjoni tal-Firem Diġitali AdES; Parti 2: Rapport dwar il-Validazzjoni tal-Firma, V1.4.1 (2023-06).


ANNESS II

Lista tal-istandards ta’ referenza u l-ispeċifikazzjonijiet għall-validazzjoni ta’ firem elettroniċi avvanzati bbażati fuq ċertifikati kwalifikati u ta’ siġilli elettroniċi avvanzati bbażati fuq ċertifikati kwalifikati

L-istandards ETSI TS 119 172-4 V1.1.1 (2021-05) (1) (“ETSI TS 119 172-4”), u ETSI TS 119 102-2 V1.4.1 (2023-06) (2) (“ETSI TS 119 102-2”) japplikaw bl-adattamenti li ġejjin:

1.

Għal ETSI TS 119 172-4

(1)

2.1 Referenzi normattivi:

—

[1] ETSI EN 319 102-1 V1.4.1 (2024-06) “Firem u Infrastrutturi Elettroniċi (ESI); Proċeduri għall-Ħolqien u l-Validazzjoni tal-Firem Diġitali AdES; Parti 1: Ħolqien u Validazzjoni”.

—

Ir-referenzi kollha għal “ETSI TS 119 102-1 [1]” għandhom jinftiehmu bħala referenzi għal “ETSI EN 319 102-1 [1]”.

—

[2] ETSI TS 119 612 V2.3.1 (2024-11) “Firem u Infrastrutturi Elettroniċi (ESI); Listi ta’ Fiduċja”.

—

[13] ETSI TS 119 101 V1.1.1 (2016-03) “Firem u Infrastrutturi Elettroniċi (ESI); Rekwiżiti ta’ politika u tas-sigurtà għal applikazzjonijiet għall-ħolqien tal-firem u għall-validazzjoni tal-firem”.

(2)

4.2 Limitazzjonijiet tal-validazzjoni u proċeduri tal-validazzjoni, ir-rekwiżiti tal-validazzjoni ta’ RED-4.2-03, it-taqsima “limitazzjonijiet tal-validazzjoni ta’ X 509”, il-punt c):

—

(i) Jekk ċertifikat ta’ entità finali jirrappreżenta ankra ta’ fiduċja, RevocationCheckingConstraints ma għandhiex tintuża.

—

(ii) Jekk ċertifikat ta’ entità finali ma jkunx jirrappreżenta ankra ta’ fiduċja, RevocationCheckingConstraints għandha tiġi ssettjata għal “eitherCheck” kif definit f’ETSI TS 119 172-1 [3], il-klawżola A.4.2.1, it-tabella A.2, ir-ringieli (m)2.1.

—

(iii) Jekk ċertifikat ta’ entità finali jirrappreżenta ankra ta’ fiduċja, RevocationFreshnessConstraints definita f’ETSI TS 119 172-1 [3], il-klawżola A.4.2.1, it-tabella A.2, ir-ringieli (m)2.2 ma għandhiex tintuża.

—

(iv) Jekk ċertifikat ta’ entità finali ma jirrappreżentax ankra ta’ fiduċja, RevocationFreshnessConstraints definita f’ETSI TS 119 172-1 [3], il-klawżola A.4.2.1, it-tabella A.2, ir-ringieli (m)2.2 għandha tintuża b’valur massimu ta’ 24 siegħa għaċ-ċertifikat tal-iffirmar. Ma għandu jiġi stabbilit l-ebda valur għal RevocationFreshnessConstraints għal ċertifikati li mhumiex iċ-ċertifikat tal-iffirmar, inkluż iċ-ċertifikati li jappoġġaw it-timbri tal-ħin.

(3)

4.3 Rekwiżiti dwar il-validazzjoni tal-firma u l-prattiki ta’ verifika tar-regoli dwar l-applikabbiltà

—

REQ-4.3-02 L-applikazzjonijiet tal-validazzjoni tal-firem għandhom ikunu konformi ma’ ETSI TS 119 101 [13].

(4)

4.4 Proċess ta’ verifika tal-applikabbiltà teknika (jew ir-regoli tagħha)

—

REQ-4.4.2-03 Jekk xi kontroll speċifikat f’REQ-4.4.2-01 ma jaħdimx,:

(a)

il-proċess jieqaf;

(b)

il-firma għandha tiġi ddeterminata teknikament bħala indeterminata, jiġifieri la bħala firma elettronika avvanzata bbażata fuq ċertifikat kwalifikat tal-UE, u lanqas bħala siġill elettroniku avvanzat ibbażat fuq ċertifikat kwalifikat tal-UE; u

(c)

ir-riżultat ta’ hawn fuq u r-riżultati tal-proċessi intermedji kollha għandhom jiġu riflessi fir-rapport ta’ verifika tar-regoli dwar l-applikabbiltà tal-firma.

—

REQ-4.4.2-04 null.

—

REQ-4.4.2-05 null.

—

REQ-4.4.2-06 F’dak il-punt tal-proċess tat-TARC, jekk jiġu ssodisfati l-kundizzjonijiet li ġejjin:

(a)

iċ-ċertifikat tal-iffirmar jiġi ddeterminat, fl-aħjar ħin tal-firma, bħala ċertifikat kwalifikat tal-UE għall-firem elettroniċi (rispettivament għas-siġilli elettroniċi), kif speċifikat f’REQ-4.4.2-02 a); u

(b)

ir-riżultat tal-proċess imwettaq kif speċifikat fil-klawżola 4.2 ta’ dan id-dokument ikun TOTAL-PASSED,

il-firma diġitali għandha tiġi ddeterminata bħala teknikament xierqa biex timplimenta firma elettronika avvanzata tal-UE bbażata fuq ċertifikat kwalifikat (rispettivament, siġill elettroniku avvanzat tal-UE bbażat fuq ċertifikat kwalifikat), inkella l-firma ma għandhiex tiġi ddeterminata teknikament bħala firma elettronika avvanzata tal-UE bbażata fuq ċertifikat kwalifikat jew bħala siġill elettroniku avvanzat tal-UE bbażat fuq ċertifikat kwalifikat.


(1)  ETSI TS 119 172-4 - Firem u Infrastrutturi Elettroniċi (ESI); Politiki dwar il-Firem; Parti 4: Regoli dwar l-applikabbiltà tal-firem (politika tal-validazzjoni) għall-firem/s-siġilli elettroniċi kwalifikati Ewropej bl-użu ta’ listi ta’ fiduċja, V1.1.1 (2021-05).

(2)  ETSI TS 119 102-2 - Firem u Infrastrutturi Elettroniċi (ESI); Proċeduri għall-Ħolqien u l-Validazzjoni tal-Firem Diġitali AdES; Parti 2: Rapport dwar il-Validazzjoni tal-Firma, V1.4.1 (2023-06).


ELI: http://data.europa.eu/eli/reg_impl/2025/1945/oj

ISSN 1977-074X (electronic edition)