(1)

Skont ir-Regolament (KE) Nru 1924/2006, l-indikazzjonijiet dwar is-saħħa li jsiru fuq l-ikel huma pprojbiti sakemm dawn ma jkunux awtorizzati mill-Kummissjoni f’konformità ma’ dak ir-Regolament u jkunu inklużi fil-lista tal-indikazzjonijiet permessi.

(2)

Fir-rigward tal-indikazzjonijiet dwar is-saħħa dwar it-tnaqqis tar-riskju tal-mard, l-Artikolu 15 tar-Regolament (KE) Nru 1924/2006 jipprevedi li l-applikazzjonijiet għall-awtorizzazzjonijiet tal-indikazzjonijiet dwar is-saħħa għandhom jiġu ppreżentati mill-operaturi tan-negozju tal-ikel lill-awtorità kompetenti nazzjonali ta’ Stat Membru. L-awtorità kompetenti nazzjonali trid tibgħat l-applikazzjonijiet li jkunu validi lill-Awtorità Ewropea dwar is-Sigurtà fl-Ikel (l-EFSA), minn hawn ’il quddiem imsejħa “l-Awtorità”.

(3)

Wara li tirċievi applikazzjoni, l-Awtorità trid tinforma bla dewmien lill-Istati Membri l-oħra u lill-Kummissjoni dwar dan, u trid tagħti l-opinjoni tagħha fir-rigward tal-indikazzjoni dwar is-saħħa kkonċernata.

(4)

Il-Kummissjoni għandha tiddeċiedi dwar l-awtorizzazzjoni tal-indikazzjonijiet dwar is-saħħa filwaqt li tqis l-opinjoni mogħtija mill-Awtorità.

(5)

Wara applikazzjoni minn Han-Biotech GmbH imressqa permezz tal-awtorità kompetenti tal-Ġermanja skont l-Artikolu 14(1)(a) tar-Regolament (KE) Nru 1924/2006, l-Awtorità ntalbet tagħti opinjoni dwar indikazzjoni dwar is-saħħa relatata ma’ Symbiosal® u t-tnaqqis tal-pressjoni tad-demm u riskju mnaqqas ta’ ipertensjoni (Mistoqsija Nru EFSA-Q-2018-00002). L-indikazzjoni proposta mill-applikant kienet tgħid dan li ġej: “‘Symbiosal®’ intwera li jbaxxi ż-żieda tal-pressjoni tad-demm meta jintuża bħala sostitut għall-melħ tal-mejda tradizzjonali. Iż-żieda tal-pressjoni tad-demm hija fattur ta’ riskju għall-pressjoni għolja (ipertensjoni)”.

(6)

Fil-25 ta’ Lulju 2018, il-Kummissjoni u l-Istati Membri rċevew l-opinjoni xjentifika tal-Awtorità (2) li kkonkludiet li, abbażi tad-data mressqa, ma ġietx stabbilita rabta ta’ kawża u effett bejn il-konsum ta’ “Symbiosal®” u t-tnaqqis tal-pressjoni tad-demm. Għaldaqstant, billi l-indikazzjoni dwar is-saħħa ma tikkonformax mar-rekwiżiti tar-Regolament (KE) Nru 1924/2006, jenħtieġ li din ma tiġix awtorizzata.

(7)

Il-kummenti li l-Kummissjoni rċeviet mill-applikant, skont l-Artikolu 16(6) tar-Regolament (KE) Nru 1924/2006 tqiesu meta tfasslu l-miżuri previsti f’dan ir-Regolament.

(8)

Il-miżuri previsti f’dan ir-Regolament huma f’konformità mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,