L_202402942MT.000101.fmx.xml

LINJA GWIDA (UE) 2024/2942 TAL-BANK ĊENTRALI EWROPEW

tal-14 ta’ Novembru 2024

dwar il-kompożizzjoni, il-valutazzjoni u l-modalitajiet għat-trasferiment inizjali ta’ assi ta’ riżervi barranin, u d-denominazzjoni u r-remunerazzjoni ta’ pretensjonijiet ekwivalenti mill-banek ċentrali nazzjonali ta’ dawk l-Istati Membri li adottaw il-munita unika fl-1 ta’ Jannar 1999 u li tħassar il-Linja Gwida BĊE/2000/15 (BĊE/2024/34)

IL-KUNSILL GOVERNATTIV TAL-BANK ĊENTRALI EWROPEW,

Wara li kkunsidra t-Trattat dwar il-Funzjonament tal-Unjoni Ewropea,

Wara li kkunsidra l-Istatut tas-Sistema Ewropea tal-Banek Ċentrali u tal-Bank Ċentrali Ewropew, u b’mod partikolari l-Artikolu 30 tiegħu,

Billi:

(1)

Skont l-Artikolu 30.1 tal-Istatut tas-Sistema Ewropea ta’ Banek Ċentrali u tal-Bank Ċentrali Ewropew (minn hawn ’il quddiem “l-Istatut”), il-banek ċentrali nazzjonali (BĊNi) tal-Istati Membri li l-munita tagħhom hija l-euro għandhom jipprovdu lill-Bank Ċentrali Ewropew (BĊE) b’assi ta’ riżervi barranin sa ammont ekwivalenti għal EUR 50 000 miljun. Il-Kunsill Governattiv tal-BĊE jiddeċiedi dwar il-proporzjon li l-BĊE għandu jsejjaħ wara li jiġi stabbilit u dwar l-ammonti msejħa f’dati ulterjuri. Fl-1 ta’ Jannar 1999, 11 Stat Membru adottaw l-euro, u l-BĊNi tagħhom sussegwentement kellhom jipprovdu l-kontribuzzjonijiet korrispondenti lill-BĊE. Tali kontribuzzjonijiet għandhom ikunu ffissati fi proporzjon mas-sehem fil-kapital sottoskritt tal-BĊE f’konformità mal-Artikolu 30.2 tal-Istatut.

(2)

Barra minn dan, skont l-Artikolu 30.3 tal-Istatut, il-BĊE għandu jakkredita lil kull BĊN ta’ Stat Membru li l-munita tiegħu hija l-euro bi pretensjoni ekwivalenti għall-assi ta’ riżervi barranin li hu ttrasferixxa lill-BĊE u l-Kunsill Governattiv jiddetermina d-denominazzjoni u r-remunerazzjoni ta’ dawn il-pretensjonijiet.

(3)

Il-Kunsill Governattiv adotta l-Linja Gwida BĊE/1998/NP8 li aktar tard ġiet emendata bil-Linja Gwida BĊE/2000/15 (1) bl-għan li jiġu stabbiliti l-ammonti ekwivalenti għall-euro ta’ assi ta’ riżervi barranin li għandhom jiġu ttrasferiti lill-BĊE u biex tiġi stabbilita r-remunerazzjoni ta’ pretensjoni korrispondenti kkreditata mill-BĊE lil kull BĊN parteċipant. Ir-remunerazzjoni ta’ dawn il-pretensjonijiet ġiet stabbilita b’rata ekwivalenti għal 85 % tar-rata ta’ interessi marġinali applikata mis-Sistema Ewropea ta’ Banek Ċentrali fl-operazzjonijiet prinċipali tagħha ta’ finanzjament mill-ġdid. Mill-1 ta’ Jannar 2025, tali pretensjonijiet jiġu rremunerati b’rata ekwivalenti għal 85 % tar-rata ta’ referenza kif stabbilita fid-Deċiżjoni (UE) 2016/2248 tal-Bank Ċentrali Ewropew (BĊE/2016/36) (2). Għaldaqstant huwa meħtieġ li titħassar il-Linja Gwida BĊE/2000/15 u li tiġi adottata din il-Linja Gwida ġdida minflokha,

ADOTTA DIN IL-LINJA GWIDA:

Artikolu 1

Definizzjonijiet

Għall-finijiet ta’ din il-Linja Gwida, id-definizzjonijiet li ġejjin japplikaw:

(a)	“flus kontanti” tfisser il-munita legali tal-Istati Uniti (dollaru Amerikan) jew tal-Ġappun (yen Ġappuniż);

(b)	“assi ta’ riżervi barranin” tfisser titoli, deheb jew flus kontanti;

(c)	“deheb” tfisser uqiji sħaħ ta’ deheb fin fil-forma ta’ London Good Delivery Bars, kif speċifikat mil-London Bullion Market Association;

(d)	“Stati Membri parteċipanti” tfisser dawk il-11-il Stat Membru li adottaw il-munita unika fl-1 ta’ Jannar 1999 skont it-Trattat;

(e)	“BĊNi parteċipanti” tfisser banek ċentrali nazzjonali ta’ Stati Membri parteċipanti;

(f)	“titoli” tfisser kull titolu jew strument finanzjarju eliġibbli kif speċifikat mill-BĊE.

Artikolu 2

Trasferimenti ta’ assi ta’ riżervi barranin minn BĊNi parteċipanti

1. Kull BĊN parteċipant għandu jittrasferixxi lill-BĊE assi ta’ riżervi barranin fi jew iddenominati f’dollari Amerikani, yen Ġappuniż u deheb ekwivalenti għall-ammonti tal-euro stabbiliti fl-Anness għal din il-Linja Gwida.

2. L-ammont tad-dollaru Amerikan, l-ammont tal-yen Ġappuniż u l-ammont tad-deheb (f’uqiji sħaħ ta’ deheb fin) ekwivalenti għall-ammonti tal-euro stabbiliti fl-Anness għal din il-Linja Gwida ġew ikkalkulati abbażi tar-rati tal-kambju bejn l-ecu u d-dollaru Amerikan jew il-yen Ġappuniż stabbiliti bħala riżultat tal-proċedura ta’ telekonferenza miftiehma fil-11.30 a.m., ħin ta’ Brussell, fil-31 ta’ Diċembru 1998 fost dawk il-banek ċentrali li pparteċipaw f’tali proċedura u, fil-każ tad-deheb, fuq il-bażi tal-prezz tad-deheb Amerikan għal kull uqija ta’ deheb fin stabbilit fl-iffissar tad-deheb f’Londra fl-10.30 a.m., ħin ta’ Londra, fil-31 ta’ Diċembru 1998. L-ammonti hekk ikkalkolati ġew ikkonfermati mill-BĊE lill-BĊNi parteċipanti fil-31 ta’ Diċembru 1998.

3. Skont il-Linja Gwida BĊE/2000/15, kull BĊN parteċipant ittrasferixxa lill-BĊE portafoll ta’ titoli u flus kontanti fi jew iddenominati f’dollari Amerikani jew yen Ġappuniż fi ħdan meded ta’ devjazzjoni madwar it-tul ta’ żminijiet modifikati tal-portafolli tattiċi ta’ referenza kif kienu speċifikati mill-BĊE, u f’konformità ma’ dawk il-limiti ta’ kreditu kif speċifikati mill-BĊE.

4. Id-dati tas-saldu għat-titoli u l-flus kontanti ttrasferiti lill-BĊE ġew speċifikati mill-BĊE. Kull BĊN parteċipant ta struzzjonijiet għat-trasferiment tas-sjieda tat-titoli u għat-trasferiment ta’ flus kontanti lill-BĊE fid-dati tas-saldu. Il-valur tat-titoli kollha ġie kkalkolat abbażi tal-prezzijiet indikati mill-BĊE, u kull BĊN parteċipant ittrasferixxa titoli u flus kontanti f’dawk il-kontijiet kif kienu speċifikati mill-BĊE.

5. Kull BĊN parteċipant ittrasferixxa deheb f’dawk id-dati, f’dawk il-kontijiet u f’dawk il-postijiet li kienu speċifikati mill-BĊE.

Artikolu 3

Denominazzjoni, remunerazzjoni u maturità tal-pretensjonijiet ekwivalenti għall-kontribuzzjonijiet tal-BĊNi parteċipanti

1. Il-BĊE kkredita lil kull BĊN parteċipant bi pretensjoni ddenominata f’euro ekwivalenti għall-ammont aggregat tal-euro tal-kontribuzzjoni ta’ kull BĊN parteċipant ta’ assi ta’ riżervi barranin.

2. Il-valuri aggregati ekwivalenti għall-euro tal-assi ta’ riżervi barranin ittrasferiti minn kull BĊN parteċipant huma stabbiliti fl-Anness.

3. Il-pretensjoni kkreditata mill-BĊE lil kull BĊN parteċipant għandha tiġi rremunerata mid-data li fiha ġiet akkreditata l-pretensjoni, iżda mhux qabel l-1 ta’ Jannar 2025. L-imgħax li jakkumula għandu jiġi kkalkulat fuq bażi ta’ kuljum, permezz tal-metodu ta’ kalkolu attwali fuq 360 jum, b’rata ekwivalenti għal 85 % tar-rata ta’ referenza kif stabbilit fl-Artikolu 1, il-punt (j) tad-Deċiżjoni (UE) 2016/2248 (BĊE/2016/36).

4. Il-pretensjoni għandha tiġi rremunerata fl-aħħar ta’ kull sena finanzjarja. Il-BĊE għandu jinforma lill-BĊN fuq bażi trimestrali abbażi tal-ammonti kumulattivi.

5. Il-pretensjonijiet ma jistgħux jiġu mifdija.

Artikolu 4

Revoka

Il-Linja Gwida BĊE/2000/15 hija mħassra b’effett mill-1 ta’ Jannar 2025.

Artikolu 5

Dħul fis-seħħ u implimentazzjoni

1. Din il-Linja Gwida għandha tidħol fis-seħħ fil-jum tan-notifika tagħha lill-banek ċentrali nazzjonali tal-Istati Membri li l-munita tagħhom hija l-euro.

2. Il-banek ċentrali nazzjonali tal-Istati Membri li l-munita tagħhom hija l-euro għandhom jikkonformaw ma’ din il-Linja Gwida mill-1 ta’ Jannar 2025.

Magħmul fi Frankfurt am Main, l-14 ta’ Novembru 2024.

Il-President tal-BĊE

Christine LAGARDE

(1) Linja Gwida BĊE/2000/15 tal-Bank Ċentrali Ewropew tat-3 ta’ Novembru 1998 kif emendata bil-Linja Gwida tas-16 ta’ Novembru 2000 dwar il-komposizzjoni, il-valutazzjoni u l-modalitajiet għat-trasferiment inizjali ta’ assi ta’ valuta estera, u d-denominazzjoni u r-remunerazzjoni ta’ pretensjonijiet ekwivalenti, ĠU L 336, 30.12.2000, p. 114).

(2) Deċiżjoni (UE) 2016/2248 tal-Bank Ċentrali Ewropew tat-3 ta’ Novembru 2016 dwar l-allokazzjoni tad-dħul monetarju tal-banek ċentrali nazzjonali ta’ Stati Membri li l-munita tagħhom hija l-euro (BĊE/2016/36) (ĠU L 347, 20.12.2016, p. 26).

ANNESS

Ammonti ekwivalenti għall-euro ta’ assi ta’ riżerva barranin trasferiti minn kull BĊN parteċipant li l-Istat Membru tiegħu adotta l-munita unika fl-1 ta’ Jannar 1999

Bank ċentrali nazzjonali	Ammonti ekwivalenti għall-euro ta’ titoli u flus kontanti ta’ dollaru Amerikan u yen Ġappuniż	Ammonti ta’ deheb ekwivalenti għall-euro	Ammonti aggregati ekwivalenti għall-euro ta’ assi ta’ riżerva barranija
Nationale Bank van België/Banque Nationale de Belgique	1 217 965 000	214 935 000	1 432 900 000
Deutsche Bundesbank	10 409 737 500	1 837 012 500	12 246 750 000
Banco de España	3 779 737 500	667 012 500	4 446 750 000
Banque de France	7 154 322 500	1 262 527 500	8 416 850 000
Banc Ceannais na hÉireann/Central Bank of Ireland	361 080 000	63 720 000	424 800 000
Banca d’Italia	6 330 375 000	1 117 125 000	7 447 500 000
Banque centrale du Lussemburgu	63 410 000	11 190 000	74 600 000
De Nederlandsche Bank	1 818 150 000	320 850 000	2 139 000 000
Österreichische Nationalbank	1 002 745 000	176 955 000	1 179 700 000
Banco de Portugal	817 360 000	144 240 000	961 600 000
Suomen Pankki	593 725 000	104 775 000	698 500 000
Total	33 548 607 500	5 920 342 500	39 468 950 000