1.   Leis na Rialacháin Foirne seo (‘na Rialacháin’) rialaítear na coinníollacha fostaíochta agus sainítear cearta agus oibleagáidí na mball foirne atá ag obair d’Fhondúireacht Idirnáisiúnta AE-MLC (‘Fondúireacht AE-MLC’ nó ‘an Fhondúireacht’), a ndéanann an Stiúrthóir Feidhmiúcháin ionadaíocht dhlíthiúil uirthi. Leis na Rialacháin seo, bunaítear freisin na caighdeáin oibre ghinearálta lena rialaítear bainistiú riaracháin agus saothair idir Fondúireacht AE-MLC agus a foireann, chun a áirithiú go ndéanfar an obair laistigh de chreat trédhearcach éifeachtúil. Ní thiocfaidh na Rialacháin seo salach ar Chomhaontú Bunaidh Fhondúireacht AE-MLC (‘an Comhaontú’) ná ar an gComhaontú Ceanncheathrún a síníodh idir an Fhondúireacht agus Poblacht Chónaidhme na Gearmáine (an Comhaontú Ceanncheathrún); i gcás coinbhleachta, beidh forlámhas ag an gComhaontú agus ag an gComhaontú Ceanncheathrún, san ord sin.

2.   Mura bhforáiltear a mhalairt, cuirfear na Rialacháin seo i bhfeidhm maidir le gach ball foirne buan nó sealadach atá ag obair d’Fhondúireacht AE-MLC.

1.   Is iad daoine aonair a bheidh ar fhoireann Fhondúireacht AE-MLC, ar daoine iad a shíníonn conradh fostaíochta leis an bhFondúireacht chun na dualgais a bhaineann leis na poist shonracha laistigh den struchtúr eagraíochtúil a d’fhormheas an Bord Gobharnóirí a chomhlíonadh, ar bhonn togra ón Stiúrthóir Feidhmiúcháin.

2.   Daoine aonair arna gceapadh nó arna dtabhairt ar iasacht ag aon cheann de Chomhaltaí na Fondúireachta, ag comhpháirtithe straitéiseacha na Fondúireachta, nó ag eagraíochtaí nó eintitis eile a bhaineann leis an bhFondúireacht, i gcomhaontú léi, measfar gur cuid dá foireann iad. Sna cásanna sonracha sin, áfach, glacfaidh an tír, an comhpháirtí straitéiseach, an eagraíocht nó an t-eintiteas a cheapfaidh nó a thabharfaidh ar iasacht an duine i gceist leis na costais luacha saothair uile, lena n-áirítear sochair shóisialta, costais taistil agus aistrithe, liúntais earraí tí agus suiteála, agus aisdúichiú, más gá. Measfar na daoine aonair a bheith ina mbaill foirne den Fhondúireacht le linn na tréimhse ina gcomhlíonfaidh siad na dualgais ar sannadh dóibh iad, agus tiocfaidh deireadh leis an stádas sin nuair a bheidh na dualgais sin curtha i gcrích, gan aon dliteanas a bheith ar an bhFondúireacht dá bharr sin.

3.   Aon duine a théann isteach san Fhondúireacht mar intéirneach ar feadh tréimhse theoranta réamhbhunaithe mar chuid dá oiliúint/hoiliúint oideachais, nó chun críoch taighde, measfar é/í a bheith mar chuid dá foireann freisin. D’fhéadfadh intéirnigh a bheith i dteideal liúntas míosúil a fháil ón bhFondúireacht chun cabhrú leo a speansais taistil agus chothaithe a chlúdach.

4.   Beidh sé d’aidhm ag beartas earcaíochta Fhondúireacht AE-MLC baill foirne ard-inniúla éifeachtúla a chur ar conradh agus beidh sé bunaithe ar chur i bhfeidhm phrionsabail an chomhionannais deiseanna agus an neamh-idirdhealaithe.

5.   Déanfar foireann Fhondúireacht AE-MLC a earcú trí phróisis roghnúcháin atá oscailte, oibiachtúil, neamhchlaonta agus trédhearcach, bunaithe ar chritéir atá ceaptha go docht chun a chinneadh an bhfuil na hiarrthóirí oiriúnach agus an bhfuil taithí agus inniúlacht acu chun na dualgais a bhaineann leis an bpost a bhfuil siad ag cur isteach air a chomhlíonadh.

6.   D’ainneoin an mhéid sin thuas, déanfaidh an Stiúrthóir Feidhmiúcháin iarracht, a mhéid is féidir, cothromaíocht inscne agus dáileadh geografach dé-réigiúnach a choinneáil.

7.   Beidh cruthúnas ar na dintiúir acadúla agus/nó ar an taithí is gá maidir leis an bhfolúntas ag teastáil ó Fhondúireacht AE-MLC agus baill foirne á n-earcú.

8.   Déanfar an fhostaíocht ar fad a rialú trí chonradh fostaíochta i scríbhinn, a shíneoidh an Stiúrthóir Feidhmiúcháin agus an iarrthóir roghnaithe.

9.   Féadfar foireann Fhondúireacht AE-MLC a fháil ar conradh:

10.   Cinnfidh an Stiúrthóir Feidhmiúcháin tréimhsí agus téarmaí athnuachana na gconarthaí fostaíochta arna ndámhachtain do bhaill foirne Fhondúireacht AE-MLC. Beidh uastréimhse 2 bhliain ag an gcéad chonradh fostaíochta a shínítear, i ngach cás.

11.   Ó thaobh náisiúntachta de, earcófar baill foirne Fhondúireacht AE-MLC as saoránaigh Chomhaltaí na Fondúireachta.

12.   Bainfidh baill foirne atá ar conradh ag Fondúireacht AE-MLC leis an gcatagóir a chomhfhreagraíonn don eolas sonrach agus don taithí shonrach is gá le haghaidh na gcúraimí a bhfuil siad ar conradh ina leith. Dá réir sin, agus i gcomhréir leis na feidhmeanna a chuirtear de chúram orthu, agus a bhunófar sa struchtúr foirne arna fhormheas ag an mBord Gobharnóirí, beidh aon cheann de na cineálacha poist seo a leanas acu:

13.   Go ginearálta, beidh baill foirne feidhmiúcháin agus gairmiúla i dteideal ‘Liúntas Suiteála agus Speansais Fillte’ a dtugtar tuairisc orthu in Airteagal 4, ach amháin má chinneann an Bord Gobharnóirí a mhalairt ar bhonn moladh ón Stiúrthóir Feidhmiúcháin.

14.   Maidir le baill foirne feidhmiúcháin agus gairmiúla a bhfuil cónaí orthu, tráth a bhfostaithe, níos mó ná 150 ciliméadar ó Chathair Hamburg agus ar gá dóibh athlonnú ansin mar thoradh ar a bhfostaíocht ag an bhFondúireacht, beidh siad i dteideal cistiú a fháil chun costais aistrithe agus liúntais suiteála a chumhdach. Beidh siad i dteideal aisíocaíocht a fháil ar chostais fillte áirithe freisin, ar choinníoll go gcomhlíonfar na coinníollacha a dtugtar tuairisc orthu in ‘Airteagal 4 – Cearta agus Sochair’.

15.   Cuirrfidh baill foirne feidhmiúcháin agus gairmiúla tréimhse phromhaidh 6 mhí i gcrích, agus measfar an conradh fostaíochta a bheith deimhnithe ina dhiaidh sin mura dtugtar fógra i scríbhinn ina mhalairt de chás. Ní chuirfear an tréimhse phromhaidh i bhfeidhm i gcásanna athnuachana nó síntí leanúnacha a chur leis an gconradh fostaíochta.

16.   Go ginearálta, ní bheidh baill foirne teicniúla agus/nó riaracháin i dteideal ‘Liúntas Suiteála agus Speansais Fillte’ a dtugtar tuairisc orthu in Airteagal 4, ach amháin má chinneann an Bord Gobharnóirí a mhalairt ar bhonn moladh ón Stiúrthóir Feidhmiúcháin.

17.   Déanfar costais na liúntas aistrithe agus suiteála do bhaill foirne teicniúla agus/nó riaracháin a earcófar agus iad ina gcónaí in Hamburg nó laistigh de raon 150 ciliméadar uaidh a ailíniú le costais na liúntas aistrithe agus suiteála do bhaill foirne feidhmiúcháin agus gairmiúla.

18.   Cuirfidh baill foirne teicniúla agus riaracháin tréimhse phromhaidh 6 mhí i gcrích, agus measfar an conradh fostaíochta a bheith deimhnithe ina dhiaidh sin mura dtugtar fógra i scríbhinn ina mhalairt de chás. Ní chuirfear an tréimhse phromhaidh i bhfeidhm i gcásanna athnuachana nó síntí leanúnacha a chur leis an gconradh. Féadfar fad na tréimhse promhaidh a choigeartú dá réir i gcás conarthaí a bhfuil fad teoranta leo.

19.   Beidh na conarthaí fostaíochta uile i gcomhréir leis na forálacha arna mbunú sa reachtaíocht saothair is infheidhme de chuid na tíre óstaí faoi fhorálacha an Chomhaontaithe Ceanncheathrún.

20.   Tosóidh baill foirne ag fabhrú tuillimh ón lá a n-aontaíonn na páirtithe gurb é dáta tosaigh na fostaíochta é.

21.   Íocfar an méid a thuilltear maidir leis na seirbhísí a sholáthraíonn na baill foirne ar bhonn míosúil, sa tseachtain dheireanach de gach mí.

22.   Is i Hamburg na Gearmáine atá an áit fostaíochta, áit a bhfuil ceanncheathrú na Fondúireachta.

1.   Comhlíonfaidh foireann Fhondúireacht AE-MLC a bhfreagrachtaí agus a ndualgais go hoibiachtúil agus go neamhchlaonta, agus tús áite á tabhairt acu dá ndílseacht don Fhondúireacht agus aird á tabhairt acu ar leasanna na Fondúireachta amháin agus go heisiach. Beidh siad lánfhreagrach as a ngníomhaíochtaí agus a ndualgais a chomhlíonadh agus beidh siad faoi réir údarás agus bhainistíocht an Stiúrthóra Feidhmiúcháin.

Ní bheidh baint ag foireann Fhondúireacht AE-MLC le haon ghníomhaíocht a d’fhéadfadh a bheith ar neamhréir le comhlíonadh cuí a gcuid dualgas. Ní ceadmhach d’fhoireann Fhondúireacht AE-MLC an méid seo a leanas a dhéanamh:

2.   Cuirfidh foireann Fhondúireacht AE-MLC an t-eolas agus an taithí ar fad atá acu ar fáil d’Fhondúireacht AE-MLC. Ní dhéanfaidh siad aon fhostaíocht íoctha ghníomhach sa bhreis a d’fhéadfadh a bheith ar neamhréir le leasanna Fhondúireacht AE-MLC, nó a bhféadfadh tionchar diúltach a bheith aici uirthi. Níl feidhm aige sin maidir le poist ‘dhíomhaoine’ ná mionghníomhaíochtaí comhairleoireachta nó oiliúna mar chomhaltaí de rialtas náisiúnta nó mar bhaill foirne d’institiúid, comhlacht, oifig nó gníomhaireacht de chuid an Aontais, d’eagraíocht idir-rialtasach nó d’eagraíocht chomhchosúil. I gcásanna den sórt sin, is é an Stiúrthóir Feidhmiúcháin agus, i gcás an Stiúrthóra Feidhmiúcháin, an Bord Gobharnóirí a údaróidh na gníomhaíochtaí sin.

3.   Leis na pribhléidí agus na díolúintí a bhronnfar ar Fhondúireacht AE-MLC agus ar a foireann, ní dhíolmhófar baill foirne óna n-oibleagáidí príobháideacha ná ó na hoibleagáidí sin a bhaineann le dlíthe agus rialacháin Bhallstáit na Fondúireachta a chomhlíonadh, go háirithe oibleagáidí agus díolúintí thír óstach agus chathair óstach na Fondúireachta de réir an Chomhaontaithe Ceanncheathrún. Tabharfaidh baill foirne fógra don Stiúrthóir Feidhmiúcháin faoi aon chás atá ag teacht salach ar údaráis aon cheann de Bhallstáit na Fondúireachta, i ndáil leis na díolúintí agus na pribhléidí atá i gcomhréir lena stádas mar bhaill foirne Fhondúireacht AE-MLC.

4.   Measfar gur mí-iompar tromchúiseach é úsáid mhíchuí ceann amháin nó níos mó de na sainchumais sin agus d’fhéadfadh foirceannadh an chonartha fostaíochta faoi seach a bheith mar thoradh air, gan dochar d’aon dliteanas eile a d’fhéadfadh a bheith ann.

5.   Déanfaidh baill foirne iad féin a iompar go heiticiúil agus go gairmiúil agus a ndualgais á gcomhlíonadh acu, ina gcaidreamh le baill foirne eile, agus nuair a bheidh faisnéis agus sonraí á soláthar acu d’Fhondúireacht AE-MLC, agus dá geallsealbhóirí seachtracha. Ar an gcaoi chéanna, déileálfaidh siad le haon fhaisnéis institiúideach phribhléideach a d’fhéadfadh a bheith ina seilbh acu, nó a bhféadfadh rochtain a bheith acu uirthi, le rúndacht chuí, mar a léirítear sna hIarscríbhinní faoi seach a ghabhann le conarthaí fostaíochta.

1.   Tá sé de cheart ag gach ball foirne go gcaithfí leo go measúil agus de réir rialacha soiléire trédhearcacha. Ina theannta sin, beidh an spás oibre i gcomhréir le caighdeáin sábháilteachta agus chomhshaoil na tíre óstaí.

2.   Chun na cearta agus na sochair arna mbunú ag Fondúireacht AE-MLC a fheidhmiú agus a thairbhiú go hiomlán, measfar gur cleithiúnaithe foirne iad na daoine aonair seo a leanas:

3.   De ghnáth, déanfaidh Fondúireacht AE-MLC liúntas a dhámhachtain le haghaidh costais suiteála ag tús an chonartha fostaíochta do bhaill foirne feidhmiúcháin agus gairmiúla. Íocfar an liúntas suiteála ar mhéid é suas le haon tuarastal glan míosúil amháin ar a mhéad nuair a thíolacfar doiciméid tacaíochta.

4.   Cumhdóidh Fondúireacht AE-MLC na speansais taistil freisin, agus aisíocfaidh sí na costais aistrithe, lena n-áirítear árachas in aghaidh gnáthrioscaí san aer, ar tír nó ar muir le haghaidh troscáin agus earraí pearsanta, faoi réir thíolacadh na n-admhálacha, na ndeimhnithe, nó na ndoiciméad tacaíochta ábhartha eile. Ní rachaidh an méid a bheidh le haisíoc ag an bhFondúireacht as aistrithe idir-ilchríochacha thar EUR 10 000 agus féadfar é a aistriú chuig an mball foirne ar shonrasc deiridh agus deimhniú sástachta leis an tseirbhís a sholáthraítear a fháil uaidh nó uaithi. Ba cheart don bhall foirne i ngach cás ar a laghad trí thairiscint ó chuideachtaí éagsúla a chur i gceangal, chun a chruthú go raibh an chuideachta a roghnaíodh ar an gceann is áisiúla agus is éifeachtaí ó thaobh costais de. Cumhdófar na costais sin do bhaill foirne agus dá gcleithiúnaithe ag tús a gconartha fostaíochta agus nuair a thiocfaidh deireadh leis. D’fhéadfadh sé go bhfillfí ar láthair eile seachas an láthair bhunaidh inar earcaíodh an t-iarrthóir, ar choinníoll nach mó na costais ná na costais a bhaineann le filleadh ar an áit bhunaidh inar earcaíodh é. Beidh na costais aistrithe infheidhme freisin maidir le cleithiúnaithe an bhaill foirne sin. Seasfar le speansais ag deireadh an chonartha fostíochta faoin gcoinníoll sainráite go dtiocfaidh deireadh leis an gcomhaontú fostaíochta tráth nach luaithe ná dul in éag a théarma tosaigh.

5.   Beidh baill foirne i dteideal 30 lá oibre saoire le pá in aghaidh gach bliana iomláine a oibrítear agus pro rata le haghaidh codáin den bhliain a oibrítear. Glacfaidh baill foirne saoire nár úsáideadh in aon bhliain ar leith ina hiomláine go dtí an 31 Márta den bhliain ina dhiaidh sin, ar a dhéanaí.

6.   Féadfaidh an Stiúrthóir Feidhmiúcháin tréimhse bhliantúil sosa chomhchoitinn a shocrú ar feadh 10 lá ar a mhéad le haghaidh thréimhse na Nollag agus na hAthbhliana, ar lena linn a dhúnfar oifig na Fondúireachta agus a ligfear a foireann saor ó dhualgas.

7.   Ar choinníoll nach mbeidh na laethanta saoire ag teacht salach ar an ualach oibre, féadfaidh baill foirne a dteidlíocht a ghlacadh gan bhac, tar éis dóibh a bheith údaraithe ag an Stiúrthóir Feidhmiúcháin nó ag an duine a ainmneoidh sé/sí.

8.   Beidh baill foirne i dteideal saoire le pá mar a bhunaítear ag gach pointe ama ar leith leis an dlí is infheidhme sa tír óstach agus/nó faoi na himthosca seo a leanas:

9.   Saineoidh an Stiúrthóir Feidhmiúcháin na nósanna imeachta maidir le haon saoire den sórt sin a cheadú, saoire a bheidh, in aon chás, a formheasta ag an Stiúrthóir Feidhmiúcháin nó ag an duine ar tarmligeadh na freagrachtaí sin chuige go sainráite.

10.   Beidh baill foirne i dteideal saoire gan phá mar a bhunaítear ag gach pointe ama ar leith leis an dlí is infheidhme sa tír óstach agus/nó sna himthosca seo a leanas:

11.   Chun críoch na Rialachán seo, measfar éagumas a bheith ann nuair a chuirtear cosc iomlán nó páirteach ar an mball foirne a bheith ag obair, go sealadach nó go buan, de dheasca breitheacht choirp nó meabhairghalar nó timpiste.

12.   I gcásanna éagumais shealadaigh a mhairfidh níos faide ná 6 mhí as a chéile nó 6 mhí ar leith in 1 bhliain, nó i gcás éagumas buan, féadfaidh Fondúireacht AE-LAC a shonrú go ndeimhníonn gairmí sláinte arna ainmniú ag an bhFondúireacht an tréimhse éagumais, gan dochar don deimhniú a d’fhéadfadh a bheith curtha ar fáil ag dochtúir an bhaill foirne féin.

13.   Cuirfidh Fondúireacht AE-MLC árachas ar fáil dá foireann agus an cumhdach seo a leanas á chur ar fáil dóibh:

14.   Beidh cleithiúnaithe foirne i dteideal cumhdach speansas leighis i gcomhréir leis na coinníollacha a leagtar síos leis an dlí is infheidhme sa tír óstach.

15.   Nuair a fhaigheann ball foirne nach raibh cónaí air/uirthi sa tír óstach roimh a f(h)ostaíocht san Fhondúireacht bás agus é/í i bhfostaíocht ghníomhach, glacfaidh Fondúireacht AE-MLC chuici féin na speansais a bhaineann le corp an duine éagtha a aisdúichiú. Beidh na cleithiúnaithe marthanacha i dteideal a bheith aisdúichithe i gcomhréir leis na coinníollacha a leagtar síos sa roinn ‘Liúntas Suiteála agus Speansais Fillte’.

1.   Chun críoch na Rialachán seo, measfar gurb iad na sannacháin taistil na sannacháin sin a dhéanann foireann Fhondúireacht AE-MLC lasmuigh den áit oibre ina ndéanann siad a ndualgais de ghnáth, fad is a bheidh siad údaraithe go hiomlán agus go cuí ag an Stiúrthóir Feidhmiúcháin nó ag an duine ar tarmligeadh an fhreagracht sin chuige go sainráite.

2.   Coinneoidh baill foirne a bpas agus doiciméid taistil eile in ord agus in eagar chun go mbeidh siad ar fáil chun na turais a dhéanamh a shannann Fondúireacht AE-MLC dóibh chun ionadaíocht a dhéanamh uirthi. Aisíocfaidh an Fhondúireacht na speansais a bhaineann le heisiúint na víosaí comhfhreagracha ar na doiciméid tacaíochta ábhartha a fháil.

3.   Beidh an t-údarú taistil comhfhreagrach do gach sannachán sínithe go cuí ag an mball foirne i dtrácht agus ag an Stiúrthóir Feidhmiúcháin araon, nó ag an duine ar tarmligeadh an fhreagracht sin chuige go sainráite, chun tionscadal nó gníomhaíocht shonrach a chur i gcrích, agus beidh áit, cuspóir agus fad an tsannacháin, an cúrsa taistil, modhanna agus costais an iompair agus na speansais chóiríochta agus mhaireachtála, chomh maith leis an líne bhuiséid, an ghníomhaíocht nó an tionscadal ar a leithdháilfear na speansais, léirithe ann.

4.   Íocfaidh an Fhondúireacht speansais taistil na foirne ar shannacháin, lena n-áirítear costais iompair, chóiríochta agus mhaireachtála, i gcomhréir leis na rátaí per diem a luaitear in Iarscríbhinn 2, a fhéadfar a athbhreithniú le linn an scrúdaithe bhuiséadaigh bhliantúil.

1.   8 uair an chloig in aghaidh an lae nó 40 uair an chloig in aghaidh na seachtaine a bheidh sa ghnáth-am oibre. 5 lá a bheidh sa tseachtain oibre, ó Luan go hAoine agus an dá lá sin san áireamh. Ach amháin má thugann an Stiúrthóir Feidhmiúcháin údarú roimh ré, tá sé éigeantach freastal ar an obair i rith an lae oibre.

2.   Nuair nach féidir le ball foirne freastal ar an obair ar chúis ar bith, tabharfaidh sé nó sí fógra go tráthúil don Stiúrthóir Feidhmiúcháin, nó don duine ar tarmligeadh an fhreagracht sin chuige go sainráite. I gcás breoiteachta, tá sé d’oibleagáid ar an mball foirne deimhniú leighis a chur isteach roimh dheireadh an 3ú lá. Má thiteann an bhreoiteacht ar an Aoine nó ar an Luan nó roimh laethanta saoire nó ina ndiaidh, bíonn deimhniú leighis ag teastáil i gcónaí. Faoin lá deireanach is déanaí den bhreoiteacht dheimhnithe, ní mór don bhall foirne an Stiúrthóir Feidhmiúcháin, nó an duine atá tarmligthe go sainráite chun na críche sin, a chur ar an eolas faoi neamhláithreacht bhreise agus tá sé d’oibleagáid air/uirthi an fianú breise a chur isteach laistigh de 3 lá eile.

3.   Aon neamhláithreacht gan údar ón obair a mhaireann 2 lá oibre as a chéile nó 3 lá oibre nach dtagann i ndiaidh a chéile le linn 1 bhliain féilire, measfar gur tréigean an phoist í agus beidh sé le tuiscint mbeidh rabhadh i scríbhinn mar thoradh uirthi.

4.   Chomh maith leis an Satharn agus an Domhnach, measfar gurb iad na laethanta neamhoibre na laethanta sin a dhearbhaítear laethanta neamhoibre le reachtaíocht Stát Chathair Shaor agus Hainseatach Hamburg. Ina theannta sin, tabharfar 1 lá comhchoiteann saor ón obair don fhoireann mar chúiteamh as a laethanta Náisiúnta faoi seach.

1.   Is ar an mball foirne a bheidh an fhreagracht maidir leis na freagrachtaí agus na dualgais atá mar chuid den chonradh fostaíochta, de na Rialacháin seo, de na Rialacháin Inmheánacha nó d’aon fhoráil inmheánach eile de chuid Fhondúireacht AE-MLC a chomhlíonadh agus muna gcomhlíontar iad féadfar a mheas gur mion-mhí-iompar nó mí-iompar tromchúiseach é sin ag brath ar na himthosca.

2.   Measfar go ndearna an ball foirne mí-iompar tromchúiseach má sháraigh sé nó sí na hoibleagáidí fíor-riachtanacha arna mbunú ina chonradh nó ina conradh fostaíochta, sna Rialacháin seo, sna Rialacháin Inmheánacha, nó in aon fhoráil inmheánach eile de chuid Fhondúireacht AE-MLC nó má léirigh sé nó sí iompraíocht nach bhfuil ag luí leis na hoibleagáidí sin, ar bhealach a fhágann nach mbeadh sé inmharthana leanúint dá chonradh fostaíochta nó dá conradh fostaíochta. Measfar na nithe seo a leanas a bheith ina gcásanna de mhí-iompar tromchúiseach:

3.   Chun an t-airteagal seo a léirmhíniú agus a chur i bhfeidhm, measfar go bhfuil athshárú ann nuair a thugtar dhá rabhadh i scríbhinn don bhall foirne laistigh de thréimhse 1 bhliana, nó trí rabhadh i scríbhinn laistigh de 2 bhliain. Os a choinne sin, measfar sárú tromchúiseach dualgais a bheith ann nuair a bheidh an fostaí páirteach i gceann amháin nó níos mó de na cásanna eile de mhí-iompar tromchúiseach dá bhforáiltear san airteagal seo.

4.   Chun an t-airteagal seo a léirmhíniú agus a chur i bhfeidhm, measfar na gníomhaíochtaí seo a leanas a bheith ina mhí-iompar tromchúiseach de bharr iompair nach bhfuil ag luí le comhlíonadh dualgas:

5.   Chun an t-airteagal seo a léirmhíniú agus a chur i bhfeidhm, tuigfear gurb iad na gníomhartha seo a leanas atá in iompar mí-eiticiúil:

D’fhéadfadh sé go ndearnadh na gníomhaíochtaí sin laistigh nó lasmuigh den oifig óstach. Sa chás deireanach sin, beidh an chúis leis an iompar neamheiticiúil bainteach leis an obair.

6.   Beidh baill foirne a dhéanann mí-iompar faoi réir nósanna imeachta araíonachta ar cheart ráthaíocht maidir le próis chuí a bheith iontu. Ag brath ar dhéine an mhí-iompair, féadfar ceann amháin nó níos mó de na bearta seo a leanas a dhéanamh:

7.   Féadfar ball foirne a gcuirtear mí-iompar tromchúiseach ina leith a chur ar fionraí le pá fad a fhíoraítear na fíorais, i gcás ina bhfuil tásca ann a thugann le fios go bhfuil údar maith leis an mbeart sin, i dtuairim an Stiúrthóra Feidhmiúcháin agus sa chás sin go heisiach.

8.   In aon chás, ní bheidh líomhain mí-iompair thromchúisigh bailí ach amháin ar bhonn oibiachtúil infhíoraithe, agus, má chruthaítear é, d’fhéadfadh foirceannadh an chonartha fostaíochta faoi seach a bheith mar thoradh air, gan dochar d’aon dliteanas dlíthiúil nó coiriúil eile a d’fhéadfadh a bheith ann.

9.   Leis seo, cuirtear Sásra um Réiteach Díospóidí i bhfeidhm, agus is é is aidhm dó réiteach cairdiúil a fháil ar shaincheisteanna a d’fhéadfadh teacht chun cinn idir an Fhondúireacht agus a foireann. Tá an sásra sin agus a thorthaí ceangailteach ar an dá pháirtí agus tugtar tuairisc mhionsonraithe orthu in Iarscríbhinn 1.

1.   Beidh gach ball foirne faoi réir meastóireacht bhliantúil feidhmíochta, ar meastóireacht aonair rúnda í. Saineoidh an Stiúrthóir Feidhmiúcháin, i gcomhaontú leis an bhfoireann, na céimeanna sonracha chun an mheastóireacht sin a dhéanamh.

2.   Ba cheart toradh na meastóireachta a dhoiciméadú i gceart.

1.   Seachas i gcás an Stiúrthóra Feidhmiúcháin, a bhfuil coinníollacha an chonartha á rialú le forálacha an Chomhaontaithe, déanfar aon chonradh fostaíochta a fhoirceannadh mar thoradh ar na nithe seo a leanas:

2.   Maidir le foirceannadh an chonartha fostaíochta mar gheall ar dhífhostú de bharr mí-iompar tromchúiseach, díolmhaítear Fondúireacht AE-MLC ó aon chúiteamh a íoc, gan dochar d’íocaíocht damáistí le Fondúireacht AE-MLC mar thoradh ar mhí-iompar, a d’fhéadfadh a bheith cinntithe trí shocrú frithpháirteach, nó trí imeachtaí eadrána nó breithiúnacha.

3.   Is é 65 bliana d’aois an teorainn aoise le bheith ag obair mar bhall foirne d’Fhondúireacht AE-MLC. Baill foirne a bhfuil conradh fostaíochta ar théarma seasta i bhfeidhm acu agus a shroicheann an teorainn aoise a bhunaítear san airteagal seo, leanfaidh siad de bheith ag obair mar bhaill foirne don Fhondúireacht go dtí go bhfoirceannfar an conradh fostaíochta. Baill foirne a bhfuil conradh fostaíochta neamhiata acu, cuirfidh siad deireadh lena seirbhís nuair a shroichfidh siad an teorainn aoise atá leagtha síos.

4.   I gcásanna éagumais bhuain, bíodh sé iomlán nó páirteach, féadfaidh an Fhondúireacht an conradh fostaíochta a fhoirceannadh. Ar aon chuma, féadfaidh an ball foirne a bheith i dteideal an ceart éirí as oifig a fheidhmiú i gcónaí.

5.   Féadfaidh gach páirtí (baill foirne agus Fondúireacht AE-MLC) an conradh fostaíochta a fhoirceannadh le fógra 4 seachtaine go dtí deireadh míosa má tá fad na seirbhíse níos lú ná 5 bliana. Tar éis 5 bliana seirbhíse, sínfear an tréimhse fógra go dtí 2 mhí, agus tar éis 8 mbliana seirbhíse sínfear an tréimhse fógra go dtí 3 mhí.

6.   Féadfaidh Fondúireacht AE-MLC conarthaí fostaíochta a fhoirceannadh ar bhonn aonair nó comhchoiteann ar chúiseanna oibiachtúla, nó mar gheall ar fhoirceannadh seirbhísí.

7.   Tuigfear gurb iad na cúiseanna oibiachtúla le conradh fostaíochta le Fondúireacht AE-MLC a fhoirceannadh aon chúis a d’fhéadfadh a fhágáil go mbeadh sé dodhéanta na tuarastail atá dlite a íoc as na seirbhísí a sholáthraíonn na baill foirne.

1.   Tiocfaidh na Rialacháin seo i bhfeidhm, ar bhonn sealadach, an lá a fhormheasfaidh an Bord Gobharnóirí iad. Tagrófar dóibh mar ‘Rialacháin Foirne Fhondúireacht Idirnáisiúnta AE-MLC’. A luaithe a thiocfaidh an Comhaontú Ceanncheathrún idir Poblacht Chónaidhme na Gearmáine agus an Fhondúireacht chun bheith éifeachtach, déanfar na Rialacháin seo a choigeartú chun iad a ailíniú leis an gComhaontú Ceanncheathrún nó measfar iad a bheith cinntitheach mura bhfuil gá le coigeartuithe.

2.   Féadfaidh Fondúireacht AE-MLC comhairleoirí, saineolaithe, sainchomhairleoirí nó daoine eile a fháil ar conradh, i bhfoirm Comhaontú maidir le Seirbhísí, lena gcuirtear de chúram orthu tionscadail nó cúraimí sonracha a chur i gcrích le linn don chomhaontú a bheith i bhfeidhm. Aon chomhaontú a bhunófar faoin bhfoirm sin, ní thabharfar le tuiscint leis gurb ann do chonradh fostaíochta idir Fondúireacht AE-MLC agus an páirtí ar conradh, ná aon teidlíocht ar na cearta agus ar na sochair dá bhforáiltear sna Rialacháin seo.

3.   Chun críoch na Rialachán seo, tagraíonn an téarma ‘leanbh’ do leanbh a rugadh laistigh nó lasmuigh de phósadh, d’uchtleanbh agus do leasleanbh.

4.   Aon sochar nó aon cheart a dheonaítear d’fhoireann Fhondúireacht AE-MLC leis na Rialacháin seo, tiocfaidh sé i bhfeidhm ón dáta a chomhaontófar tús a gcuid freagrachtaí.

5.   Beidh gach ball foirne, lena n-áirítear an Stiúrthóir Feidhmiúcháin, i dteideal sochar agus beidh siad faoi réir na n-oibleagáidí a bhunaítear leis an gComhaontú, leis na Rialacháin Inmheánacha agus leis na Rialacháin seo, leis na téarmaí a bhaineann lena bpost faoi seach.

6.   Eiseoidh an Stiúrthóir Feidhmiúcháin na rialacha cur chun feidhme leordhóthanacha is gá ionas gur féidir na Rialacháin seo a chur i bhfeidhm go hiomlán.

7.   Maidir le gach gné ábhartha nach gcumhdaítear leis na Rialacháin seo, beidh forlámhas ag an dlí is infheidhme sa tír óstach.