—

wara li kkunsidra l-proposta għal regolament tal-Kunsill li jemenda l-Annessi II u V tar-Regolament (KE) Nru 396/2005 tal-Parlament Ewropew u tal-Kunsill fir-rigward tal-livelli massimi ta’ residwu għat-triċiklażol f’ċerti prodotti jew fuqhom (COM(2023)0499),

—

wara li kkunsidra r-Regolament (KE) Nru 396/2005 tal-Parlament Ewropew u tal-Kunsill tat-23 ta’ Frar 2005 dwar il-livelli massimi ta’ residwu ta’ pestiċidi fi jew fuq ikel u għalf li joriġina minn pjanti u annimali u jemenda d-Direttiva tal-Kunsill 91/414/KEE (1), u b’mod partikolari l-Artikolu 14(1), il-punt (a), tiegħu,

—

wara li kkunsidra l-votazzjoni tal-Kumitat Permanenti dwar il-Pjanti, l-Annimali, l-Ikel u l-Għalf, fil-11 ta’ Mejju 2023, li matulha ma ngħatat l-ebda opinjoni,

—

wara li kkunsidra l-opinjoni motivata adottata mill-Awtorità Ewropea dwar is-Sigurtà fl-Ikel fis-7 ta’ Diċembru 2022 u ppubblikata fit-18 ta’ Jannar 2023  (2),

—

wara li kkunsidra r-riżoluzzjoni tiegħu tas-16 ta’ Jannar 2019 dwar il-proċedura tal-Unjoni għall-awtorizzazzjoni tal-pestiċidi (3),

—

wara li kkunsidra l-Artikolu 5a(4), il-punt (e) u l-Artikolu 5a(5) tad-Deċiżjoni tal-Kunsill 1999/468/KE tat-28 ta’ Ġunju 1999 li tipprovdi l-proċeduri għall-eżerċizzju tas-setgħat tal-implimentazzjoni konferiti fuq il-Kummissjoni (4),

—

wara li kkunsidra l-Artikolu 112(2), (3) u (4)(c) tar-Regoli ta’ Proċedura tiegħu,

—

wara li kkunsidra l-mozzjoni għal riżoluzzjoni tal-Kumitat għall-Ambjent, is-Saħħa Pubblika u s-Sikurezza tal-Ikel,

A.

billi matul l-votazzjoni tiegħu fil-11 ta’ Mejju 2023, il-Kumitat Permanenti dwar il-Pjanti, l-Annimali, l-Ikel u l-Għalf ma ta l-ebda opinjoni, li jfisser li l-proposta għal regolament ma kinitx appoġġjata minn maġġoranza kwalifikata tal-Istati Membri; billi anki matul il-votazzjoni tat-20 ta’ Settembru 2023 tiegħu, il-Kunsill reġa’ ma ta ebda opinjoni;

B.

billi l-proposta għal regolament tal-Kunsill għandha l-għan li żżid il-livell massimu ta’ residwi (“MRL”) għat-triċiklażol fir-ross minn 0,01 għal 0,09 mg/kg;

C.

billi r-Regolament (KE) Nru 396/2005 għandu l-għan li jiżgura livell għoli ta’ protezzjoni għall-konsumatur u dispożizzjonijiet armonizzati tal-Unjoni dwar livelli massimi ta’ residwi ta’ pestiċida fi u fuq l-ikel u l-għalf li joriġinaw minn pjanti u annimali;

D.

billi l-Artikolu 1 tar-Regolament (KE) Nru 1107/2009 tal-Parlament Ewropew u tal-Kunsill (5) jipprevedi li l-għan ta’ dak ir-Regolament huwa li jiżgura livell għoli ta’ protezzjoni kemm tas-saħħa tal-bniedem kif ukoll tal-annimali u tal-ambjent u li jtejjeb it-tħaddim tas-suq intern permezz tal-armonizzazzjoni tar-regoli fuq it-tqegħid fis-suq ta’ prodotti għall-protezzjoni tal-pjanti, filwaqt li jtejjeb il-produzzjoni agrikola;

E.

billi l-komunikazzjoni tal-Kummissjoni tal-20 ta’ Mejju 2020 bit-titolu “Strateġija mill-Għalqa sal-Platt għal sistema tal-ikel ġusta, tajba għas-saħħa u favur l-ambjent” tirrikonoxxi li l-“ikel Ewropew diġà huwa standard dinji għal ikel li huwa sikur, abbundanti, nutrittiv u ta’ kwalità għolja”;

F.

billi t-triċiklażol huwa fungiċida sistemika u protettiva għall-kontroll effikaċi tal-blast tar-ross (Pyricularia grisea Sacc.) li jseħħ fl-istadji kollha tal-progressjoni (blast tal-weraq, taz-zokk u tal-panikula);

G.

billi t-triċiklażol ma ġiex inkluż fl-Anness I tad-Direttiva tal-Kunsill 91/414/KEE fl-2008, wara li l-Kumitat Permanenti dwar il-Katina Alimentari u s-Saħħa tal-Annimali kkonkluda li “li hemm indikazzjonijiet ċari li jista’ jiġi mistenni li għandu effetti ta’ ħsara fuq is-saħħa tal-bnedmin u b’mod partikolari id-data kruċjali nieqsa ma tippermettix li jiġu stipulati id-Doża Aċċettabbli ta’ Kuljum (id-DAK), id-Doża Akuta ta’ Referenza (id-DAR) u l-Livell(i) Aċċettabbli ta’ Espożizzjoni għall-Operaturi (il-LAEO) u valuri bħal dawn huma meħtieġa biex titwettaq l-istima tar-riskju” (6); billi mit-30 ta’ Marzu 2009, it-triċiklażol mhuwiex awtorizzat għall-użu fl-Unjoni ;

H.

billi fir-rieżami bejn il-pari tagħha, wara applikazzjoni għall-approvazzjoni għall-użu fl-Unjoni fl-2015, l-EFSA kkonkludiet (7) li kien hemm diversi oqsma kritiċi ta’ tħassib fir-rigward tat-tossikoloġija tat-triċiklażol; billi l-EFSA ma setgħetx tinjora l-potenzjal ta’ ġenotossiċità u karċinoġeniċità tat-triċiklażol, u għalhekk il-valuri ta’ referenza ((id-DAK, id-DAR u l-LAEO) għall-użu fil-valutazzjonijiet tar-riskju għas-saħħa tal-bniedem ma setgħux jiġu stabbiliti; billi, b’riżultat ta’ dan, il-valutazzjoni tar-riskju għall-operaturi, il-ħaddiema, il-persuni fil-qrib, ir-residenti u l-konsumaturi ma setgħetx titwettaq; billi, barra minn hekk, l-EFSA lanqas ma tista’ teskludi proprjetajiet potenzjali li jfixklu s-sistema endokrinali; billi l-applikazzjoni għall-approvazzjoni ġiet għalhekk miċħuda (8);

I.

billi, mill-2016, l-użu tat-triċiklażol ġie pprojbit fl-Unjoni kif ukoll l-importazzjonijiet ta’ prodotti b’residwi ogħla mil-livell ta’ kwantifikazzjoni analitika;

J.

billi, minħabba l-projbizzjoni fuq dak il-fungiċida, il-bdiewa Ewropej kellhom bil-fors jinvestu biex isibu prattiki agrikoli alternattivi;

K.

billi l-projbizzjoni ta’ dak il-fungiċida fl-Unjoni wasslet għal tnaqqis kbir fil-produzzjoni tar-ross fost il-produtturi Ewropej;

L.

billi, peress li l-MRL għat-triċiklażol fir-ross tnaqqas għal-limitu ta’ determinazzjoni u sar applikabbli fl-Unjoni kollha fl-2017, il-produtturi tar-ross mhux tal-UE rrikorrew għal tekniki agronomiċi u adattaw il-mudelli kummerċjali tagħhom biex jippermettulhom ikomplu jesportaw lejn l-Unjoni;

M.

billi l-katina Ewropea tal-produzzjoni tar-ross appoġġjat b’mod konsistenti l-ħtieġa ta’ reċiproċità tar-regoli fir-rigward tal-użu tal-pestiċidi;

N.

billi l-projbizzjoni fuq it-triċiklażol fl-Unjoni toħloq sitwazzjoni ta’ nuqqas totali ta’ reċiproċità għad-detriment tal-produtturi tar-ross li jużaw l-istandards tal-Unjoni;

O.

billi din is-sitwazzjoni tista’ fit-tul twassal għal kompetizzjoni inġusta għall-produtturi tar-ross li jissodisfaw l-istandards tal-Unjoni;

P.

billi l-politiki li jippermettu l-kummerċ jibqgħu prijorità għall-Parlament Ewropew;

Q.

billi, fis-sena ta’ kummerċjalizzazzjoni 2022 (01.09.2021 - 31.07.2022), l-importazzjonijiet tar-ross fl-Unjoni laħqu rekord ta’ 1,67 miljun tunnellata, fuq bażi mitħuna, u ġiet irreġistrata żieda ta’ 36 % minn sena għal sena (9);

R.

billi l-importazzjonijiet li ġejjin minn pajjiżi li jippermettu l-użu tat-triċiklażol ammontaw għal volum totali ta’ kważi 194 000 tunnellata metrika, li jikkorrispondi għal madwar 12 % tal-importazzjonijiet totali (10);

S.

billi, filwaqt li l-bdiewa tal-Unjoni jkunu soġġetti għall-ogħla rekwiżiti possibbli ta’ sikurezza tal-konsumatur, l-adozzjoni tal-proposta għal regolament tal-Kunsill tippermetti importazzjonijiet fl-Unjoni, li ma jikkonformawx mal-istandards tal-Unjoni;

T.

billi l-proposta għal regolament tal-Kunsill, skont is-Sistema ta’ Twissija Rapida għall-Ikel u l-Għalf (RASFF), kienet tnaqqas in-notifiki b’76 % fl-2021 u b’73 % fl-2022;

U.

billi l-adozzjoni tal-proposta għal regolament tal-Kunsill iddgħajjef is-sigurtà tal-ikel u, fin-nuqqas ta’ mezzi xierqa ta’ traċċabbiltà u informazzjoni, tista’ tiġġenera prattiki qarrieqa għall-konsumaturi;

V.

billi l-Artikolu 191(2) tat-Trattat dwar il-Funzjonament tal-Unjoni Ewropea jistabbilixxi l-prinċipju ta’ prekawzjoni bħala wieħed mill-prinċipji fundamentali tal-Unjoni;

W.

billi, sabiex jitnaqqsu r-riskji u l-impatti tal-użu tal-pestiċidi fuq is-saħħa tal-bniedem u tal-annimali u fuq l-ambjent, il-Kummissjoni u l-Istati Membri huma mħeġġa jindirizzaw il-kwistjoni tal-prodotti agrikoli importati ttrattati b’sustanzi kimiċi li jew huma pprojbiti jew ristretti fl-Unjoni;