(1)

De bhun Airteagal 51 de Rialachán (AE) Uimh. 1306/2013, ní mór don Choimisiún, ar bhonn na gcuntas bliantúil a chuireann an Ríocht Aontaithe isteach, mar aon leis an bhfaisnéis is gá chun na cuntais a imréiteach agus tuairim iniúchóireachta maidir le hiomláine, cruinneas agus fírinneacht na gcuntas agus na dtuarascálacha a leagann na comhlachtaí deimhniúcháin síos, ní mór dó cuntais na ngníomhaireachtaí íocaíochta dá dtagraítear in Airteagal 7 den Rialachán sin a imréiteach roimh an 31 Bealtaine den bhliain tar éis na bliana airgeadais atá i gceist.

(2)

De bhun Airteagal 138(1) den Chomhaontú um Tharraingt siar, tá sé d’oibleagáid ar an Ríocht Aontaithe leanúint d’fheidhmiú an chórais rialaithe agus bainistíochta a áirithiú chun fiacha a aithint, a chlárú agus a ghnóthú, ar fiacha iad a easraíonn ó chaiteachas arna mhaoiniú le CERT faoin gcreat airgeadais ilbhliantúil le haghaidh na mblianta 2014-2020 nó peirspictíochtaí airgeadais a bhí ann roimhe sin, i gcomhréir le hAirteagal 54, le hAirteagal 58(1), pointe (e) agus Airteagal 58(2) de Rialachán (AE) Uimh. 1306/2013.

(3)

I gcomhréir le hAirteagal 39 de Rialachán (AE) Uimh. 1306/2013, cuirtear tús leis an mbliain airgeadais ar an 16 Deireadh Fómhair den bhliain N-1 agus tagann deireadh léi an 15 Deireadh Fómhair den bhliain N. Agus cuntais á n-imréiteach le haghaidh na bliana airgeadais 2021, ba cheart aithint, clárú agus aisghabháil fiach a rinne an Ríocht Aontaithe idir an 16 Deireadh Fómhair 2020 agus an 15 Deireadh Fómhair 2021 a chur san áireamh, mar a fhoráiltear in Airteagal 11(1) de Rialachán Cur Chun Feidhme (AE) Uimh. 908/2014 (2) ón gCoimisiún.

(4)

Sheiceáil an Coimisiún an fhaisnéis a chuir an Ríocht Aontaithe faoina bhráid agus chuir sé torthaí na seiceálacha in iúl don Ríocht Aontaithe, mar aon leis na leasuithe atá molta aige.

(5)

Maidir le gníomhaireachtaí íocaíochta na Ríochta Aontaithe, ‘Department of Agriculture, Environment and Rural Affairs’ [An Roinn Talmhaíochta, Comhshaoil agus Gnóthaí Tuaithe], ‘The Scottish Government Rural Payments and Inspections Directorate’ [Stiúrthóireacht Rialtas na hAlban um Íocaíochtaí agus Iniúchóireachtaí Tuaithe], ‘Welsh Government’ [Rialtas na Breataine Bige] agus ‘Rural Payments Agency’ [An Ghníomhaireacht um Íocaíochtaí Tuaithe], cuireann na cuntais bhliantúla agus na doiciméid tionlacain ar a chumas don Choimisiún cinneadh a dhéanamh maidir le hiomláine, cruinneas agus fírinneacht na gcuntas bliantúil a chuirtear faoina bhráid.

(6)

De bhun Airteagal 54(2) de Rialachán (AE) Uimh. 1306/2013, ba cheart don Ríocht Aontaithe íoc as 50 % de na hiarmhairtí airgeadais a eascraíonn ó neamh-aisghabháil neamhrialtachtaí, mura n-aisghabhtar iad laistigh de 4 bliana ó dháta na hiarrata ar ghnóthú, nó laistigh de 8 mbliana i gcás ina dtugtar an aisghabháil os comhair na gcúirteanna náisiúnta. Le hAirteagal 54(4) de Rialachán (AE) Uimh. 1306/2013, ceanglaítear ar an Ríocht Aontaithe tábla a chur i gceangal leis na cuntais bhliantúla nach mór di a chur faoi bhráid an Choimisiúin, de bhun Airteagal 29 de Rialachán Cur Chun Feidhme (AE) Uimh. 908/2014, ar tábla deimhnithe é lena léirítear na méideanna atá le híoc ag an Ríocht Aontaithe faoi Airteagal 54(2) de Rialachán (AE) Uimh. 1306/2013. Rialacha maidir le cur i bhfeidhm oibleagáid na Ríochta Aontaithe chun na méideanna atá le haisghabháil a thuairisciú, leagtar síos i Rialachán Cur Chun Feidhme (AE) Uimh. 908/2014 iad. Le hIarscríbhinn II a ghabhann le Rialachán Cur Chun Feidhme (AE) Uimh. 908/2014, leagtar amach an tsamhail den tábla nach mór don Ríocht Aontaithe a úsáid chun faisnéis a sholáthar faoi na méideanna atá le haisghabháil. Ar bhonn na dtáblaí a líonann an Ríocht Aontaithe isteach, ba cheart don Choimisiún na hiarmhairtí airgeadais a eascraíonn ó neamh-aisghabháil neamhrialtachtaí atá níos sine ná 4 nó 8 mbliana faoi seach a chinneadh.

(7)

De bhun Airteagal 54(3) de Rialachán (AE) Uimh. 1306/2013, ar chúiseanna cuí-réasúnaithe, féadfaidh an Ríocht Aontaithe a chinneadh gan iarracht a dhéanamh aisghabháil a dhéanamh. Ní féidir cinneadh den sórt sin a dhéanamh ach amháin má tá na costais a tabhaíodh cheana, nó na costais is dócha a thabhófar, níos mó ná an méid atá le haisghabháil, nó má tá an aisghabháil dodhéanta mar gheall ar dhócmhainneacht an fhéichiúnaí nó na ndaoine a bhfuil freagracht dhlíthiúil orthu as an neamhrialtacht, ar dócmhainneacht í a chláraítear agus a aithnítear faoin dlí náisiúnta. Má dhéantar an cinneadh laistigh de 4 bliana ó dháta na hiarrata ar aisghabháil, nó laistigh de 8 mbliana i gcás ina dtugtar an aisghabháil os comhair na gcúirteanna náisiúnta, ba cheart 100 % d’iarmhairtí airgeadais an neamh-aisghabhála a íoc as buiséad an Aontais. Na méideanna ar chinn an Ríocht Aontaithe gan iad a ghnóthú agus na forais leis an gcinneadh sin, léirítear iad sa tuarascáil achomair dá dtagraítear in Airteagal 54(4) den Rialachán sin i gcomhar le hAirteagal 102(1), an chéad fhomhír, pointe (c)(iv) den Rialachán sin. Dá bhrí sin, níor cheart na méideanna sin a ghearradh ar an Ríocht Aontaithe agus mar gheall air sin, íoctar as buiséad an Aontais iad.

(8)

I gcomhréir le hAirteagal 51 de Rialachán (AE) Uimh. 1306/2013, ba cheart don Chinneadh seo a bheith gan dochar do na cinntí a bhféadfadh an Coimisiún a dhéanamh ina dhiaidh sin chun caiteachas nach ndéantar difear dó a eisiamh ó mhaoiniú ón Aontas i gcomhréir le rialacha an Aontais,