(1)

F'konformità mal-Artikolu 80(1)(a) tar-Regolament (KE) Nru 1107/2009, għandha tapplika d-Direttiva tal-Kunsill 91/414/KEE (2) fir-rigward tal-proċedura u l-kundizzjonijiet għall-approvazzjoni tas-sustanzi attivi li għalihom ġiet adottata deċiżjoni f'konformità mal-Artikolu 6(3) ta' dik id-Direttiva qabel l-14 ta' Ġunju 2011. Għall-Pseudozyma flocculosa tar-razza ATTC 64874 il-kundizzjonijiet tal-Artikolu 80(1)(a) tar-Regolament (KE) Nru 1107/2009 huma sodisfatti bid-Deċiżjoni tal-Kummissjoni 2002/305/KE (3).

(2)

F'konformità mal-Artikolu 6(2) tad-Direttiva 91/414/KEE, in-Netherlands (minn issa 'l quddiem “l-Istat Membru relatur”), fis-6 ta' Marzu 2001, irċieva applikazzjoni mingħand Maasmond-Westland għall-inklużjoni tas-sustanza attiva Pseudozyma flocculosa tar-razza ATCC 64874 fl-Anness I tad-Direttiva 91/414/KEE. Id-Deċiżjoni 2002/305/KE kkonfermat li d-dossier kien “komplut” fis-sens li seta' jitqies bħala wieħed li fil-prinċipju jissodisfa r-rekwiżiti tad-dejta u tal-informazzjoni tal-Annessi II u III tad-Direttiva 91/414/KEE.

(3)

Għal dik is-sustanza attiva, ġew ivvalutati l-effetti fuq is-saħħa tal-bniedem u tal-annimali u fuq l-ambjent, f'konformità mad-dispożizzjonijiet tal-Artikolu 6(2) u (4) tad-Direttiva 91/414/KEE, għall-użi proposti mill-applikant. Ir-relatur maħtur mill-Istat Membru ssottometta abbozz ta' rapport ta' valutazzjoni fil-11 ta' Marzu 2004.

(4)

Artechno S.A. ħadet f'idejha r-responsabbiltà ta' Maasmond-Westland fl-4 ta' Ġunju 2012 u f'konformità mal-Artikolu 11(6) tar-Regolament tal-Kummissjoni (UE) Nru 188/2011 (4) l-applikant talab informazzjoni addizzjonali.

(5)

L-abbozz tar-rapport ta' valutazzjoni ġie analizzat mill-Istati Membri u mill-Awtorità Ewropea dwar is-Sigurtà fl-Ikel (minn hawn 'il quddiem “l-Awtorità”). L-Awtorità ppreżentat lill-Kummissjoni l-konklużjoni tagħha dwar il-valutazzjoni tar-riskju tas-sustanza attiva Pseudozyma flocculosa tar-razza ATCC 64874 (5) bħala pestiċida fit-22 ta' Settembru 2015. L-Awtorità identifikat bosta lakuni fid-dejta. B'mod partikolari, ma kienx possibbli li tintlaħaq konklużjoni dwar il-valutazzjoni tar-riskju għas-saħħa tal-bniedem u l-organiżmi akkwatiċi li ġejjin mill-użu tal-Pseudozyma flocculosa tar-razza ATCC 64874.

(6)

Konsegwentement, ma kienx possibbli li tintlaħaq konklużjoni abbażi tal-informazzjoni disponibbli li l-Pseudozyma flocculosa tar-razza ATCC 64874 laħqet il-kriterji għall-inklużjoni fl-Anness I tad-Direttiva 91/414/KEE.

(7)

Il-Kummissjoni stiednet lill-applikant biex iressaq il-kummenti tiegħu dwar il-konklużjoni tal-Awtorità. Barra minn hekk, f'konformità mal-Artikolu 9 tar-Regolament tal-Kummissjoni (UE) Nru 188/2011, il-Kummissjoni stiednet lill-applikant biex iressaq kummenti dwar l-abbozz tar-rapport ta' reviżjoni. L-applikant ressaq il-kummenti tiegħu, u dawn ġew eżaminati bir-reqqa.

(8)

Madankollu, minkejja l-argumenti mressqa mill-applikant, it-tħassib imsemmi fil-premessa 5 ma setax jiġi eliminat. Għaldaqstant, ma ġiex ippruvat li wieħed jista' jistenna li, skont il-kundizzjonijiet proposti tal-użu, il-prodotti għall-protezzjoni tal-pjanti li fihom il-Pseudozyma flocculosa tar-razza ATCC 64874 jissodisfaw b'mod ġenerali r-rekwiżiti stabbiliti fl-Artikolu 5(1)(a) u (b) tad-Direttiva 91/414/KEE.

(9)

Għaldaqstant, il-Pseudozyma flocculosa tar-razza ATCC 64874 ma għandhiex tiġi approvata skont l-Artikolu 13(2) tar-Regolament (KE) Nru 1107/2009.

(10)

F'konformità mal-Artikolu 8(1)(b) tad-Direttiva 91/414/KEE, l-Istati Membri ngħataw il-possibbiltà li jagħtu awtorizzazzjonijiet proviżorji għall-prodotti għall-protezzjoni tal-pjanti li jkun fihom il-Pseudozyma flocculosa tar-razza ATCC 64874 għal perjodu inizjali ta' tliet snin.

(11)

Awtorizzazzjonijiet eżistenti għandhom konsegwentement jiġu rtirati.

(12)

L-Istati Membri għandhom jingħataw żmien biex jirtiraw l-awtorizzazzjonijiet għall-prodotti għall-protezzjoni tal-pjanti li fihom il-Pseudozyma flocculosa tar-razza ATCC 64874.

(13)

Rigward il-prodotti għall-protezzjoni tal-pjanti li fihom il-Pseudozyma flocculosa tar-razza ATCC 64874, meta l-Istati Membri jagħtu xi perjodu ta' grazzja f'konformità mal-Artikolu 46 tar-Regolament (KE) Nru 1107/2009, dak il-perjodu għandu jiskadi sa mhux aktar tard mill-24 ta' Ġunju 2018.

(14)

Dan ir-Regolament ma jippreġudikax is-sottomissjoni ta' applikazzjoni oħra għall-Pseudozyma flocculosa tar-razza ATCC 64874 f'konformità mal-Artikolu 7 tar-Regolament (KE) Nru 1107/2009.

(15)

Il-miżuri previsti f'dan ir-Regolament huma konformi mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,