|
Iris Oifigiúil |
GA Sraith L |
|
2025/2350 |
17.11.2025 |
CINNEADH (AE) 2025/2350 ÓN gCOMHAIRLE
an 13 Samhain 2025
maidir leis an seasamh atá le glacadh thar ceann an Aontais Eorpaigh i gCoiste Airí Chomhairle na hEorpa i ndáil leis an Dréachtmholadh maidir le comhionannas agus an intleacht shaorga
TÁ COMHAIRLE AN AONTAIS EORPAIGH,
Ag féachaint don Chonradh ar Fheidhmiú an Aontais Eorpaigh, agus go háirithe Airteagal 114, i gcomhar le hAirteagal 218(9) de,
Ag féachaint don togra ón gCoimisiún Eorpach,
De bharr an mhéid seo a leanas:
|
(1) |
Tá sé d’aidhm ag Comhairle na hEorpa moladh a ghlacadh chun aghaidh a thabhairt ar thionchar na gcóras intleachta saorga (‘IS’), ar a n-acmhainneacht chun comhionannas a chur chun cinn, lena n-áirítear comhionannas inscne, agus ar na rioscaí a d’fhéadfaidís a chruthú i ndáil le neamh-idirdhealú (‘an Moladh’). Tá an Moladh le formheas ag an gCoimisiún um Chomhionannas Inscne (‘CCI’) de chuid Chomhairle na hEorpa agus ag an gCoiste Stiúrtha um Fhrith-Idirdhealú, Éagsúlacht agus Cuimsiú (‘CDADI’), le linn an tseisiúin iomlánaigh chomhpháirtigh a bheidh acu i mí na Samhna 2025 agus tá an Moladh le ghlacadh go foirmiúil ag Coiste Airí Chomhairle na hEorpa. |
|
(2) |
Is é is aidhm don Mholadh cúnamh a thabhairt do Bhallstáit Chomhairle na hEorpa comhionannas a chur chun cinn, lena n-áirítear comhionannas inscne, agus gach cineál idirdhealaithe a chosc agus a chomhrac, ina ngníomhaíochtaí uile agus i ngníomhaíochtaí gníomhaithe san earnáil phoiblí agus san earnáil phríobháideach laistigh de shaolré na gcóras IS. Dírítear sa Mholadh ar an gcomhionannas agus ar an intleacht shaorga agus, cé nach ionstraim cur chun feidhme é, féachann sé le comhleanúnachas a choinneáil le raon feidhme agus ábhar Creatchoinbhinsiún Chomhairle na hEorpa maidir leis an Intleacht Shaorga agus le Cearta an Duine, leis an Daonlathas agus leis an Smacht Reachta (‘an Creat-Choinbhinsiún’), a shínigh an tAontas de bhun Chinneadh (AE) 2024/2218 ón gComhairle (1). |
|
(3) |
Leis an gCreat-Choinbhinsiún, leagtar síos na prionsabail ghinearálta agus na hoibleagáidí ginearálta ba cheart do na páirtithe sa Chreat-Choinbhinsiún a urramú chun cosaint chearta an duine, an daonlathais agus an smachta reachta a áirithiú i ndáil leis na gníomhaíochtaí a dhéantar le linn saolré na gcóras IS. Mhol an Coimisiún go dtabharfadh an tAontas an Creat-Choinbhinsiún i gcrích. Tá an cinneadh ón gComhairle maidir leis an gCreat-Choinbhinsiún a thabhairt i gcrích á ghlacadh ag an gComhairle faoi láthair. |
|
(4) |
An 13 Meitheamh 2024, ghlac Parlaimint na hEorpa agus an Chomhairle Rialachán (AE) 2024/1689 ó Pharlaimint na hEorpa agus ón gComhairle (2), ar bhonn Airteagail 16 agus 114 den Chonradh ar Fheidhmiú an Aontais Eorpaigh (CFAE), Rialachán ina leagtar síos rialacha comhchuibhithe, atá bunaithe go ginearálta ar chomhchuibhiú iomlán, lena rialaítear córais IS a chur ar an margadh, a chur i mbun seirbhíse agus a úsáid san Aontas. Tá na rialacha sin infheidhme go díreach sna Ballstáit, mura bhforáiltear a mhalairt go sainráite. |
|
(5) |
Tá an Creat-Choinbhinsiún le cur chun feidhme san Aontas go heisiach trí Rialachán (AE) 2024/1689 agus trí acquis ábhartha eile de chuid an Aontais, i gcás inarb infheidhme. |
|
(6) |
Tá an Moladh neamhcheangailteach ó thaobh dlí de ar Bhallstáit Chomhairle na hEorpa. D’fhéadfadh sé éifeachtaí dlíthiúla a bheith aici, eadhon i gcomhthéacs chur chun feidhme Rialachán (AE) 2024/1689, i gcás ina bhféadfadh sé tionchar cinntitheach a imirt ar reachtaíocht an Aontais dá dtagraítear in Airteagail 40(3) agus 56(1) den Rialachán sin. Dá bhrí sin, is iomchuí an seasamh atá le glacadh thar ceann an Aontais maidir leis an Moladh a bhunú i seisiún iomlánach comhpháirteach CCI agus CDADI, agus i gCoiste na nAirí chomh maith. Tá an Cinneadh seo gan dochar d’aon mholadh nó d’ionstraim eile a d’fhéadfaí a ghlacadh amach anseo faoi choimirce Chomhairle na hEorpa nó i bhfóraim idirnáisiúnta eile. |
|
(7) |
Forluíonn raon feidhme pearsanta agus ábhartha an Mholta, den chuid is mó, le Rialachán (AE) 2024/1689, lena leagtar síos rialacha le haghaidh IS atá bunaithe go ginearálta ar chomhchuibhiú iomlán laistigh den Aontas. |
|
(8) |
Ba cheart don Aontas a áirithiú go bhfuil an Moladh comhsheasmhach le dlí an Aontais, go háirithe le Rialachán (AE) 2024/1689. Maidir le moltaí sonracha a bhaineann le forbairt agus úsáid córas IS atá comhchuibhithe go hiomlán san Aontas, ba cheart é a bheith d’aidhm ag an Aontas a áirithiú go bhfuil an Moladh comhsheasmhach le Rialachán (AE) 2024/1689 agus leis na prionsabail a leagtar amach sa Chreat-Choinbhinsiún. |
|
(9) |
Ar choinníoll go gcomhlíonfaí na coinníollacha sin, féadfar an Moladh a fhormheas thar ceann an Aontais ag seisiún iomlánach comhpháirteach CCI agus CDADI atá le bheith ar siúl i mí na Samhna 2025 agus féadfar é a ghlacadh ag cruinniú de Choiste na nAirí ina dhiaidh sin. |
|
(10) |
Ós rud é nach comhalta de Chomhairle na hEorpa é an tAontas ach gur comhaltaí iad na Ballstáit uile, tá seasamh an Aontais le cur in iúl ag a Bhallstáit, ag gníomhú dóibh go comhpháirteach, |
TAR ÉIS AN CINNEADH SEO A GHLACADH:
Airteagal 1
Is é an seasamh atá le glacadh thar ceann an Aontais i seisiún iomlánach comhpháirteach an Choimisiúin um Chomhionannas Inscne (‘CCI’) de chuid Chomhairle na hEorpa agus an Choiste Stiúrtha um Fhrith-Idirdhealú, Éagsúlacht agus Cuimsiú (‘CDADI’), agus ag cruinniú Choiste na nAirí, gan agóid a dhéanamh i gcoinne fhormheas agus ghlacadh an Mholta maidir le comhionannas agus intleacht shaorga ós rud é, cé gur moladh neamhcheangailteach é, go bhféadfadh éifeachtaí dlíthiúla a bheith aige i ndlíchóras an Aontais, ar choinníoll nach ndéanfar aon athrú lena moltar bearta a bheadh ar neamhréir leis na hoibleagáidí atá ar sholáthraithe agus ar úsáideoirí gairmiúla córas IS arna mbunú faoi Rialachán (AE) 2024/1689 nó a sháródh na hoibleagáidí sin ar théacs an Dréachtmholta (3).
Airteagal 2
Cuirfidh Ballstáit an Aontais an seasamh dá dtagraítear in Airteagal 1 in iúl, ag gníomhú dóibh go comhpháirteach.
Airteagal 3
Tiocfaidh an Cinneadh seo i bhfeidhm ar dháta a ghlactha.
Arna dhéanamh sa Bhruiséil, an 13 Samhain 2025.
Thar ceann na Comhairle
An tUachtarán
S. LOSE
(1) Cinneadh (AE) 2024/2218 ón gComhairle an 28 Lúnasa 2024 maidir le síniú, thar ceann an Aontais Eorpaigh, Chreat-Choinbhinsiún Chomhairle na hEorpa maidir leis an Intleacht Shaorga agus Cearta an Duine, an Daonlathas agus an Smacht reachta (IO L, 2024/2218, 4.9.2024, ELI: http://data.europa.eu/eli/dec/2024/2218/oj).
(2) Rialachán (AE) 2024/1689 ó Pharlaimint na hEorpa agus ón gComhairle an 13 Meitheamh 2024 lena leagtar síos rialacha comhchuibhithe maidir leis an intleacht shaorga agus lena leasaítear Rialacháin (CE) Uimh. 300/2008, (AE) Uimh. 167/2013, (AE) Uimh. 168/2013, (AE) 2018/858, (AE) 2018/1139 agus (AE) 2019/2144 agus Treoracha 2014/90/AE, (AE) 2016/797 agus (AE) 2020/1828 (Gníomh um an Intleacht Shaorga) (IO L, 2024/1689, 12.7.2024, ELI: http://data.europa.eu/eli/reg/2024/1689/oj).
(3) GEC/ADI-AI(2024)7rev6, Deireadh Fómhair 2025.
ELI: http://data.europa.eu/eli/dec/2025/2350/oj
ISSN 1977-0839 (electronic edition)