European flag

Iris Oifigiúil
an Aontais Eorpaigh

GA

Sraith L


2025/442

3.3.2025

CINNEADH (CBES) 2025/442 ÓN gCOMHAIRLE

an 28 Feabhra 2025

maidir le gníomhaíochtaí for-rochtana de chuid an Aontais lena dtacaítear le cur chun feidhme an Chonartha Trádála Arm

TÁ COMHAIRLE AN AONTAIS EORPAIGH,

Ag féachaint don Chonradh ar an Aontas Eorpach, agus go háirithe Airteagal 28(1) agus Airteagal 31(1) de,

Ag féachaint don togra ó Ardionadaí an Aontais do Ghnóthaí Eachtracha agus don Bheartas Slándála,

De bharr an mhéid seo a leanas:

(1)

Ghlac Comhthionól Ginearálta na Náisiún Aontaithe an Conradh Trádála Arm (CTA) an 2 Aibreán 2013 agus tháinig sé i bhfeidhm an 24 Nollaig 2014. Is Stáit is Páirtithe in CTA (‘Stáit is Páirtithe’) iad Ballstáit uile an Aontais.

(2)

Is é is aidhm do CTA na comhchaighdeáin idirnáisiúnta is airde is féidir a bhunú maidir le rialú a dhéanamh ar thrádáil dlíthiúil gnáth-arm agus trádáil aindleathach gnáth-arm a chosc agus a dhíothú agus cosc a chur ar atreorú na n-arm sin. CTA a chur chun feidhme go héifeachtach ag na Stáit is Páirtithe agus go ndéanfaí é a uiliú, sin iad na príomhdhúshláin atá ann agus é á chur san áireamh gur dianiarracht dhomhanda é an trádáil idirnáisiúnta arm a rialú. Chun rannchuidiú le haghaidh a thabhairt ar na dúshláin sin, ghlac an Chomhairle Cinneadh 2013/768/CBES (1), rud a mhéadaigh punann chúnaimh an Aontais maidir le rialú onnmhairiúcháin le gníomhaíochtaí a bhaineann go sonrach le CTA. Tháinig Cinntí (CBES) 2017/915 (2) agus (CBES) 2021/2309 (3) ón gComhairle maidir le gníomhaíochtaí for-rochtana an Aontais mar thaca le cur chun feidhme CTA tar éis an Chinnidh sin.

(3)

Chuidigh gníomhaíochtaí a rinneadh faoi Chinntí 2013/768/CBES, (CBES) 2017/915 agus (CBES) 2021/2309 le tíortha comhpháirtíochta raon leathan réimsí a chumhdach a bhaineann le córais náisiúnta rialaithe aistrithe arm a bhunú agus a fhorbairt, faoi mar a cheanglaítear le CTA. Rinneadh comhar a fhorbairt le roinnt tíortha is tairbhithe nár tugadh aghaidh orthu cheana faoi ghníomhaíochta cúnaimh eile de chuid an Aontais a bhaineann le rialú onnmhairiúcháin, rud a léiríonn cineál domhanda CTA. Is gá obair leantach a dhéanamh le tíortha is tairbhithe sin chun a áirithiú go leanfar den dul chun cinn agus chun for-rochtain réigiúnach ag na tíortha sin a spreagadh.

(4)

Chomh maith le leanúint de na gníomhaíochtaí leis na tíortha comhpháirtíochta reatha, tá sé inmholta an comhpháirtíocht a leathnú, ar bhonn eisceachtúil, chuig tíortha eile a bhfuil riachtanais sainaitheanta acu maidir le haontachas le CTA nó lena chur chun feidhme i bhforéigiúin ina bhfuil comhpháirtíochtaí ag na gníomhaireachtaí cur chun feidhme cheana féin, arna iarraidh sin do na tíortha sin, mar aitheantas ar luach chur chuige réigiúnaigh maidir le cur chun feidhme agus le huiliú CTA.

(5)

Is gá comhlántacht agus sineirge a áirithiú idir na gníomhaíochtaí for-rochtana agus cúnaimh dá bhforáiltear sa Chinneadh seo agus gníomhaíochtaí comhchosúla eile, lena n-áirítear iad siúd dá bhforáiltear i gCinntí (CBES) 2023/2296 (4) agus (CBES) 2025/208 (5) ón gComhairle, agus na gníomhaíochtaí sin de chuid an Aontais a bhaineann le cúnamh rialaithe ar onnmhairiú earraí dé-úsáide. Dá bhrí sin, tá sé tábhachtach malartuithe faisnéise rialta a dhéanamh idir gníomhaireachtaí cur chun feidhme le haghaidh ghníomhaíochtaí for-rochtana an Aontais i réimse an rialaithe ar onnmhairiú arm, chomh maith le idir na gníomhaireachtaí cur chun feidhme sin agus an tSeirbhís Eorpach Gníomhaíochta Seachtraí. Le malartuithe den sórt sin, spreagfar saineolaithe ó Bhallstáit eile a bheith rannpháirteach, i gcás inarb ábhartha.

(6)

Chuir an Chomhairle de chúram roimhe seo ar Oifig Cónaidhme na Gearmáine um Ghnóthaí Eacnamaíocha agus Rialú ar Onnmhairiú, (Bundesamt für Wirtschaft und Ausfuhrkontrolle - BAFA) agus Expertise France cur chun feidhme teicniúil a dhéanamh ar thionscadail mar thaca le CTA,

TAR ÉIS AN CINNEADH SEO A GHLACADH:

Airteagal 1

1.   Chun tacú le cur chun feidhme éifeachtach agus uiliú an Chonartha Trádála Arm (CTA), tabharfaidh an tAontas faoi ghníomhaíochtaí tionscadail a bhfuil na cuspóirí seo a leanas acu:

(a)

acmhainneachtaí rialaithe aistrithe arm agus saineolas maidir le cur chun feidhme CTA a threisiú nó a fhorbairt i dtíortha is tairbhithe;

(b)

for-rochtain chuig tíortha eile, lena n-áirítear Stáit nach Páirtithe in CTA iad, d’fhonn tacú le huiliú CTA ar an leibhéal náisiúnta, réigiúnach agus iltaobhach.

2.   Chun na cuspóirí a leagtar amach i mír 1 a bhaint amach, tabharfaidh an tAontas faoi na gníomhaíochtaí tionscadail seo a leanas:

(a)

ceardlanna náisiúnta;

(b)

cúnamh ad hoc;

(c)

gníomhaíochtaí a bhaineann le hoiliúint a chur ar an oiliúnóir;

(d)

gníomhaíochtaí réigiúnacha agus iltaobhacha, mar shampla comhdhálacha, ceardlanna agus cuairteanna staidéir;

(e)

imeachtaí eile.

Déantar cur síos mionsonraithe ar ghníomhaíochtaí an tionscadail san Iarscríbhinn.

3.   Cuirfear na gníomhaíochtaí tionscadail dá dtagraítear sa Chinneadh seo chun feidhme i gcomhlántacht agus i sineirge le tionscadail chúnaimh de chuid an Aontais i réimse an rialaithe onnmhairiúcháin maidir le gnáth-airm agus earraí dé-úsáide agus, i gcás inarb iomchuí, le tionscadail chúnaimh deontóirí eile i réimse an rialaithe ar thrádáil arm.

Airteagal 2

1.   Beidh Ardionadaí an Aontais do Ghnóthaí Eachtracha agus don Bheartas Slándála (‘an tArdionadaí’) freagrach as an gCinneadh seo a chur chun feidhme.

2.   Is iad Oifig Cónaidhme na Gearmáine um Ghnóthaí Eacnamaíocha agus Rialú ar Onnmhairiú (Bundesamt für Wirtschaft und Ausfuhrkontrolle - BAFA) agus Expertise France a dhéanfaidh cur chun feidhme teicniúil na ngníomhaíochtaí tionscadail dá dtagraítear in Airteagal 1(2).

3.   Déanfaidh BAFA agus Expertise France a gcuid cúraimí faoi fhreagracht an Ardionadaí. Chun na críche sin, déanfaidh an tArdionadaí na socruithe is gá le BAFA agus Expertise France.

Airteagal 3

1.   Is é EUR 3 100 000,00 a bheidh sa mhéid tagartha airgeadais le haghaidh chur chun feidhme na ngníomhaíochtaí tionscadail dá dtagraítear in Airteagal 1(2).

2.   Déanfar an caiteachas a mhaoineofar leis an méid tagartha a leagtar amach i mír 1 a bhainistiú i gcomhréir leis na nósanna imeachta agus na rialacha is infheidhme maidir le buiséad an Aontais.

3.   Déanfaidh an Coimisiún faireachán ar dhea-bhainistiú an mhéid tagartha airgeadais dá dtagraítear i mír 1. Chun na críche sin, tabharfaidh sé na comhaontuithe riachtanacha i gcrích le BAFA agus le Expertise France. Sonrófar sna comhaontuithe go n-áiritheofar le BAFA agus Expertise France infheictheacht ranníocaíocht an Aontais, ar bhealach a bheidh iomchuí lena méid.

4.   Déanfaidh an Coimisiún iarracht an comhaontú dá dtagraítear i mír 3 a thabhairt i gcrích a luaithe is féidir tar éis theacht i bhfeidhm an Chinnidh seo. Cuirfidh sé an Chomhairle ar an eolas maidir le haon deacrachtaí sa phróiseas sin agus maidir leis an dáta a thabharfar na comhaontuithe sin chun críche.

Airteagal 4

1.   Tuairisceoidh an tArdionadaí don Chomhairle maidir le cur chun feidhme an Chinnidh seo ar bhonn tuarascálacha bliantúla arna n-ullmhú ag BAFA agus Expertise France.

2.   Cuirfidh an Coimisiún faisnéis ar fáil faoi ghnéithe airgeadais chur chun feidhme na ngníomhaíochtaí tionscadail dá dtagraítear in Airteagal 1(2).

Airteagal 5

1.   Tiocfaidh an Cinneadh seo i bhfeidhm ar dháta a ghlactha.

2.   Rachaidh an Cinneadh seo in éag 36 mhí tar éis an dáta a thabharfar na comhaontuithe dá dtagraítear in Airteagal 3(3) i gcrích nó 6 mhí tar éis dháta a theacht i bhfeidhm mura dtabharfar na comhaontuithe sin i gcrích laistigh den tréimhse sin.

Arna dhéanamh sa Bhruiséil, an 28 Feabhra 2025.

Thar ceann na Comhairle

An tUachtarán

A. SZŁAPKA


(1)  Cinneadh 2013/768/CBES ón gComhairle an 16 Nollaig 2013 maidir le gníomhaíochtaí de chuid an Aontais lena dtacaítear le cur chun feidhme an Chonartha Trádála Arm, faoi chuimsiú Straitéis Shlándála na hEorpa (IO L 341, 18.12.2013, lch. 56, ELI: http://data.europa.eu/eli/dec/2013/768/oj).

(2)  Cinneadh (CBES) 2017/915 ón gComhairle an 29 Bealtaine 2017 maidir le gníomhaíochtaí for-rochtana an Aontais lena dtacaítear le cur chun feidhme an Chonartha Trádála Arm (IO L 139, 30.5.2017, lch. 38, ELI: http://data.europa.eu/eli/dec/2017/915/oj).

(3)  Cinneadh (CBES) 2021/2309 ón gComhairle an 22 Nollaig 2021 maidir le gníomhaíochtaí for-rochtana an Aontais lena dtacaítear le cur chun feidhme an Chonartha Trádála Arm (IO L 461, 27.12.2021, lch. 78, ELI: http://data.europa.eu/eli/dec/2021/2309/oj).

(4)  Cinneadh (CBES) 2023/2296 ón gComhairle an 23 Deireadh Fómhair 2023 maidir le tacaíocht ón Aontas do ghníomhaíochtaí Rúnaíocht an Chonartha Trádála Arm mar thaca le cur chun feidhme an Chonartha Trádála Arm (IO L, 24.10.2023, ELI: http://data.europa.eu/eli/dec/2023/2296/oj).

(5)  Cinneadh (CBES) 2025/208 ón gComhairle an 30 Eanáir 2025 chun tacú le tionscadal maidir le rialuithe éifeachtacha ar onnmhairiú arm a chur chun cinn (IO L, 31.1.2025, ELI: http://data.europa.eu/eli/dec/2025/208/oj).


IARSCRÍBHINN

TIONSCADAL MAIDIR LE RIALUITHE ÉIFEACHTACHA AR ONNMHAIRIÚ ARM A CHUR CHUN CINN

1.   Cúlra agus cuspóir na tacaíochta ón Aontas

Cuireann an Cinneadh seo le Cinntí ón gComhairle a bhí ann roimhe seo lenar dtacaíodh le próiseas na Náisiún Aontaithe as a dtagann an Conradh Trádála Arm (‘CTA’) agus le cur chun feidhme éifeachtach agus uiliú an phróisis sin a chur chun cinn. Ghlac Comhthionól Ginearálta na Náisiún Aontaithe CTA an 2 Aibreán 2013 agus tháinig sé i bhfeidhm an 24 Nollaig 2014.

Is é cuspóir dearbhaithe CTA ‘na caighdeáin idirnáisiúnta is airde is féidir a bhunú maidir le rialú a dhéanamh ar thrádáil idirnáisiúnta gnáth-arm, nó feabhas a chur ar an rialú sin, agus trádáil aindleathach gnáth-arm a chosc agus a dhíothú agus cosc a chur ar atreorú na n-arm sin’. Is é an cuspóir dearbhaithe atá aige ‘rannchuidiú leis an tsíocháin, leis an tslándáil agus leis an gcobhsaíocht idirnáisiúnta agus réigiúnach; fulaingt dhaonna a laghdú agus comhar, trédhearcacht agus gníomhaíocht fhreagrach na Stát is Páirtithe sa trádáil idirnáisiúnta i ngnáth-airm a chur chun cinn agus, ar an gcaoi sin, muinín a chothú i measc na Stát is Páirtithe’  (1). Dá bhrí sin, tá sprioc agus cuspóir CTA comhoiriúnach le huaillmhian fhoriomlán an Aontais maidir leis an mbeartas eachtrach agus slándála mar a chumhdaítear in Airteagal 21 den Chonradh ar an Aontas Eorpach.

Deich mbliana tar éis theacht i bhfeidhm CTA, is iad cur chun feidhme éifeachtach agus uiliú an Chonartha fós na dúshláin is mó atá ann.

Cé gur leathnaíodh an Conradh ó 113 Stát is Páirtithe go 116 Stát is Páirtithe ó bhí an Deichiú Comhdháil de na Stáit is Páirtithe (CSP10) ann i mí Lúnasa 2024, ní mór leanúint den uiliú. Chun uiliú a chur chun cinn, leag Meitheal CTA um Uiliú na gConarthaí béim ar a thábhachtaí atá sé cur leis na hiarrachtaí atá ar bun cheana maidir le huiliú, ceachtanna maidir le cleachtais daingniúcháin agus intíre a chomhroinnt, agus fanacht oscailte agus i dteagmháil le stáit ó na réigiúin uile ar spéis leo a bheith páirteach sa Chonradh.

Chomh maith le huiliú, is príomhdhúshlán i gcónaí é CTA a chur chun feidhme go héifeachtach. Tá dúshláin fós ann maidir le córais rialaithe náisiúnta (ceann de na chéad téamaí sa phlean oibre ilbhliantúil), trédhearcacht agus tuairisciú a fheabhsú, agus aghaidh a thabhairt ar rioscaí faoi Airteagail 6 agus 7. Measadh go raibh téama tosaíochta CSP10 – comhar idirghníomhaireachta – ríthábhachtach chun na constaicí sin a shárú. Bunaithe ar an bPáipéar Oibre The Role of Interagency Cooperation in the Effective Implementation of Arms Trade Treaty Provisions [Ról an Chomhair Idirghníomhaireachta i gCur Chun Feidhme Éifeachtach Fhorálacha an Chonartha Trádála Arm] (ATT/CSP10/2024/PRES/798/Conf.WP.IAC), mhol an Chomhdháil comhar idirghníomhaireachta a chomhtháthú i dtreoirdhoiciméid agus cláir oiliúna shaincheaptha a chruthú. Athdhearbhaíodh gur tosaíocht agus dúshlán araon é comhlíonadh na n-oibleagáidí tuairiscithe, agus moladh do stáit an cúnamh atá ar fáil a lorg chun na ceanglais sin a chomhlíonadh. Sa chomhthéacs sin, ba cheart obair agus ról na gcuradh tuairiscithe réigiúnacha a choinneáil ar bun agus gníomhaíochtaí breise a dhéanamh chun feasacht a mhúscailt maidir le ceanglais tuairiscithe CTA agus chun cumas tuairiscithe na Stát is Páirtithe ina réigiúin faoi seach a fheabhsú.

Leagadh béim i dtorthaí CSP10 ar an ngá leanúnach atá le cloí uilechoiteann, comhroinnt faisnéise mhéadaithe, comhar idirghníomhaireachta agus fothú acmhainneachta chun cur chun feidhme agus uiliú éifeachtach an Chonartha a áirithiú. Dá bhrí sin, beidh ról ríthábhachtach i gcónaí ag tionscnaimh fothaithe acmhainneachta agus ag tionscadail chúnaimh maidir le cuspóirí CTA a chur chun feidhme agus a chur chun cinn.

Sa chomhthéacs sin, is é is cuspóir don Chinneadh seo cistiú a chur ar fáil le haghaidh sraith chuimsitheach gníomhaíochtaí cúnaimh agus for-rochtana chun cabhrú le haghaidh a thabhairt ar na dúshláin sin. Cuireann sé leis na torthaí agus leis na ceachtanna a foghlaimíodh ón trí chéim níos luaithe a maoiníodh le Cinneadh 2013/768/CBES, Cinneadh (CBES) 2017/915 agus le Cinneadh (CBES) 2021/2309 agus léiríonn sé go bhfuil an tAontas agus na Ballstáit tiomanta agus iad ag tacú go leanúnach le CTA.

2.   Cuspóirí

Is é príomhchuspóir an Chinnidh seo i gcónaí, mar a bhí i dtrí chéim den tionscadal roimhe seo, tacú le roinnt stát a gcórais rialaithe aistrithe arm a thógáil agus/nó a neartú chun CTA a chur chun feidhme go héifeachtach d’fhonn úinéireacht agus cumhachtú a bhaint amach, agus leanúint d’uiliú CTA a chur chun cinn. Chuige sin, spreagtar leis an tionscadal rialacha agus struchtúir náisiúnta atá éifeachtach, éifeachtúil agus soiléir a ghlacadh chun an trádáil arm a rialú (dea-rialachas), ar rialacha agus struchtúir iad atá bunaithe ar ionstraimí agus prionsabail dlí iltaobhacha agus a aithnítear go hidirnáisiúnta. Féachann an tionscadal freisin le feasacht, idirphlé agus comhar réigiúnach agus idirnáisiúnta a chur chun cinn sa réimse seo. I ndeireadh na dála, tá sé mar aidhm ag an tionscadal cabhrú le sábháilteacht agus slándáil dhomhanda a mhéadú agus síocháin idirnáisiúnta a chur chun cinn.

Déanfar an comhar a mhéadú agus a oiriúnú do na riachtanais atá ag gach tír thairbhíoch agus don dul chun cinn atá déanta inti, agus leibhéal aibíochta agus uathriail chóras náisiúnta rialaithe aistrithe arm na tíre á gcur san áireamh. Beidh sé d’aidhm leis na gníomhaíochtaí eile na stáit nach bhfuil ina bpáirtithe in CTA go fóill a spreagadh chun an Conradh a ghlacadh agus tús a chur lena chur chun feidhme ar an leibhéal náisiúnta.

Seo a leanas cuspóirí sonracha na gníomhaíochta:

(a)

tacaíocht d’athneartú agus/nó d’fhorbairt acmhainneachtaí rialaithe aistrithe arm chun cur chun feidhme teicniúil CTA a éascú i dtíortha tairbhíocha atá ann cheana trí ionstraimí mar shampla, i measc ionstraimí eile, cúnamh dlí agus oiliúint oifigeach ceadúnúcháin agus forfheidhmiúcháin;

(b)

uiliú an Chonartha ar an leibhéal náisiúnta, réigiúnach agus iltaobhach, trí fhor-rochtain chuig Stáit Chomhpháirtíochta, lena n-áirítear chuig stáit nach bhfuil ina bpáirtithe in CTA go fóill.

3.   Tíortha comhpháirtíochta

Féach an foscríbhinn don liosta de thíortha comhpháirtíochta faoin gcinneadh seo. Leanfaidh roinnt tíortha comhpháirtíochta a fuair cúnamh faoi Chinneadh 2013/768/CBES ón gComhairle agus/nó faoi Chinneadh (CBES) 2017/915 ón gComhairle agus/nó Cinneadh 2021/2309 ón gComhairle de chúnamh a fháil faoin gCinneadh seo bunaithe ar an moladh ó na heintitis cur chun feidhme.

Tíortha nua a léiríonn gur spéis leo a bheith rannpháirteach sa tionscadal, ní ligfear isteach sa chlár iad ach ar bhonn eisceachtúil le toiliú sainráite Mheitheal na Comhairle um Onnmhairiú Gnáth-Arm (COARM). Ba cheart aon tír chomhpháirtíochta ionchasach nua a aimsiú ó na foréigiúin sin ina bhfuil comhpháirtíocht(aí) bunaithe cheana féin ag na gníomhaireachtaí cur chun feidhme faoi seach, mar chuid de straitéis a glacadh le déanaí chun ‘uiliú trí réigiúnú’ a chur chun cinn amach anseo.

Iarrfar ar thíortha comhpháirtíochta nua ionchasacha iarraidh ar chúnamh a ullmhú chun CTA a chur chun feidhme, a bheidh dírithe ar an ngníomhaireacht cur chun feidhme a d’fhéadfadh a bheith acu, agus cuirfidh an ghníomhaireacht sin an iarraidh ar aghaidh chuig Cathaoirleach COARM lena breithniú ag COARM. Ba cheart an bunús is fearr is féidir a bheith lena n-iarraidh, lena saineofaí, go hidéalach, na sonraíochtaí cúnaimh uile a bheadh ag teastáil, na spriocanna atá beartaithe agus an amlíne chun iad a bhaint amach. I gcás inarb ábhartha, ba cheart don tír iarrthach tagairt a dhéanamh freisin do chomhar san am a chuaigh thart nó do chomhar leanúnach le soláthraithe cúnaimh eile agus faisnéis a nochtadh maidir lena straitéis náisiúnta cur chun feidhme CTA.

Déanfar measúnú ar na hiarrataí ar bhonn, inter alia, na gcritéar seo a leanas:

—

méid an ghealltanais pholaitiúil agus dhlíthiúil maidir le cloí leis an gConradh agus stádas chur chun feidhme na n-ionstraimí idirnáisiúnta is ábhartha maidir le rialú ar thrádáil arm agus ar aistriú arm agus is infheidhme maidir leis an tír,

—

an dóchúlacht go n-éireodh leis na gníomhaíochtaí cúnaimh,

—

measúnú ar aon chúnamh féideartha a fuarthas nó atá beartaithe cheana i réimse an rialaithe dé-úsáide agus aistrithe arm,

—

a ábhartha atá an tír don trádáil dhomhanda arm,

—

a ábhartha atá an tír do leasanna slándála an Aontais,

—

incháilitheacht chun tairbhe a bhaint as an Oifig um Ghnóthaí Dí-armála.

I gcás ina bhformheastar an iarraidh ar chúnamh, déanfar measúnú tosaigh ar riachtanais agus ar thosaíochtaí na tíre atá ag lorg cúnaimh, mar shampla trí cheistneoirí a úsáid agus trí fhaisnéis atá ann cheana a bhailiú. Bunaithe ar thorthaí an mheasúnaithe sin, pléifidh an t-eintiteas cur chun feidhme faoi seach agus an tír thairbhíoch, i gcomhpháirt, ábhar an chúnaimh atá le soláthar faoin ngníomhaíocht seo lena gcuirfear san áireamh, i gcás inarb infheidhme, aon chúnamh a bhaineann le CTA a chuirtear ar fáil trí Chiste Iontaobhais Deonach CTA, trí Shaoráid Iontaobhais na Náisiún Aontaithe chun Tacú le Comhar maidir le Rialáil Arm (UNSCAR), trí Rúnaíocht CTA, nó trí eagraíochtaí eile. I gcás ina bhfuil straitéis cur chun feidhme náisiúnta do CTA forbartha cheana féin ag an tír atá ag lorg cúnaimh, áiritheoidh an ghníomhaireacht cur chun feidhme freisin go mbeidh an treochlár cúnaimh comhsheasmhach leis an straitéis náisiúnta cur chun feidhme sin.

4.   Cur síos ar ghníomhaíochtaí tionscadail

Tabharfaidh gníomhaíochtaí tionscadail aghaidh ar ábhair éagsúla atá ábhartha do ghlacadh agus cur chun feidhme náisiúnta CTA, go háirithe maidir le rialuithe éifeachtacha náisiúnta ar thrádáil arm. Áirítear orthu sin, i measc nithe eile, prionsabail agus ábhar CTA, chomh maith leis an ngá atá le comhrialacha idirnáisiúnta maidir le trádáil arm; gnéithe le haghaidh reachtaíocht fhónta stóinsithe maidir le rialuithe ar thrádáil arm; an próiseas ceadúnúcháin (lena n-áirítear ríomhcheadúnais, i gcás inarb infheidhme agus inarb iomchuí); na rialuithe sin a fhorfheidhmiú; critéir measúnaithe riosca, lena n-áirítear dea-chleachtais ghaolmhara chun atreorú agus gáinneáil aindleathach a chomhrac; comhar idirghníomhaireachta; agus a bheith ag obair leis an tionscal agus leis an saol acadúil.

Ba cheart na gníomhaíochtaí cúnaimh a cheapadh, i gcás inarb infheidhme, chun freagairt ar bhealach solúbtha frithghníomhach chun freastal ar riachtanais athraitheacha aonair gach tíre tairbhíche, ionas gur féidir cur lena gcumas CTA a chur chun feidhme ar bhealach cuimsitheach inbhuanaithe.

I gcás tíortha tairbhíocha a bhain tairbhe shuntasach cheana féin as cláir chúnaimh an Aontais a bhí ann roimhe seo agus a bhfuil dul chun cinn suntasach déanta acu maidir le cur chun feidhme CTA, díreofar sa chomhar freisin ar fhéintuilleamaí a bhaint amach agus ar chumais tacaíochta idir-réigiúnacha a fhorbairt, i.e. cuidiú leis na tíortha comhpháirtíochta sin ról (curadh) iolraitheora a ghlacadh maidir le huiliú agus cur chun feidhme na gConarthaí ina réigiún faoi seach, i gcás inarb iomchuí agus inarb infheidhme. I gcás na dtairbhithe sin, ní fhéadfadh baint a bheith ag roinnt ceardlanna cúnaimh – i gcás inarb iomchuí – ach le comhpháirteanna meantóireachta seachas na bearta cúnaimh theicniúil a soláthraíodh roimhe seo a dhéanamh arís is arís eile.

Leis na gníomhaíochtaí, tabharfar aghaidh ar thír thairbhíoch amháin ina haonar (ceardlanna náisiúnta), nó ar roinnt díobh a bhfuil riachtanais chomhchosúla acu (ceardlanna ilnáisiúnta nó réigiúnacha). Is de réir formáidí éagsúla (ar an láthair, ar líne, hibrideach, ríomhfhoghlaim) a bheidh siad ar siúl.

Is iad na saineolaithe a roghnófar ón díorma saineolaithe arna mbainistiú ag na gníomhaireachtaí cur chun feidhme a thabharfaidh an saineolas. Déanfar an díorma saineolaithe a athbhreithniú agus a nuashonrú ar bhonn rialta agus leathnófar é, mar is iomchuí, chun saineolaithe nua a chur san áireamh. I measc nithe eile, sainaithneofar na saineolaithe nua go háirithe ó thíortha tairbhíocha fadtéarmacha agus iarthíortha tairbhíocha a bhfuil ardchórais aistrithe arm níos forbartha acu (go háirithe iad siúd a ghlac páirt sa mhodúl a bhaineann le hoiliúint a chur ar an oiliúnóir).

An t-ardán ar líne a forbraíodh den chéad uair faoin gCinneadh roimhe seo, d’fhéadfadh ról tábhachtach a bheith aige freisin chun comhar leis na saineolaithe a neartú agus chun comhphobal saineolaithe a fhorbairt. Go sonrach, d’fhéadfadh sé deis a thabhairt do shaineolaithe:

—

clárú, a bpróifíl a chruthú agus a réimsí saineolais a mhionsonrú, chun an díorma a úsáid ar bhealach éagsúil éifeachtach le haghaidh ghníomhaíochtaí an tionscadail,

—

rochtain a fháil ar leabharlann faisnéise agus doiciméad ábhartha a bhaineann leis an tionscadal agus le cur chun feidhme CTA, lena n-áirítear nuachtlitreacha démhíosúla, chun a áirithiú go mbeidh rochtain ag na saineolaithe uile ar chorpas coiteann eolais CTA,

—

nascadh le fóram inar féidir leo aon saincheisteanna, aon cheisteanna nó aon taithí a d’fhéadfadh a bheith acu maidir le CTA agus for-rochtain a chomhroinnt agus a phlé le chéile.

Coinneofar ar bun sraith straitéisí na ngníomhaíochtaí for-rochtana arna bhforbairt agus arna mionsaothrú i gCinntí ón gComhairle a bhí ann roimhe seo, mar a thuairiscítear sa roinn seo. Féadfar í a fhorlíonadh, i gcás inarb infheidhme, le gníomhaíochtaí for-rochtana polaitiúla de chuid an Aontais a bhfuil toscairí an Aontais i gceannas orthu chun go mbeidh móiminteam polaitiúil breise ag próiseas daingniúcháin nó cur chun feidhme CTA i dtír chomhpháirtíochta.

4.1.   Gníomhaíochtaí náisiúnta

Maidir le gach tír thairbhíoch a fhaigheann cúnamh náisiúnta aonair, comhaontóidh an t-eintiteas cur chun feidhme agus an tír thairbhíoch faoi seach an cúnamh tiomnaithe, agus staid reatha bhearta cur chun feidhme agus ghnóthachtálacha CTA na tíre tairbhíche sin á gcur san áireamh. Is é an t-eintiteas cur chun feidhme a dhéanfaidh é sin le tacaíocht ó shaineolaithe ábhartha, i gcás inar gá.

4.1.1.   Ceardlanna náisiúnta

Cuspóir na gníomhaíochta

Beidh an tionscadal i bhfoirm ceardlann lena gcuirfear cúnamh ar fáil do thíortha aonair tairbhíocha i réimsí ar ábhar imní náisiúnta ar leith iad, arna iarraidh sin dóibh. Is oifigigh stáit ó na tíortha tairbhíocha, lena n-áirítear oifigigh rialtais, cheadúnúcháin agus forfheidhmiúcháin a bheidh rannpháirteach sna ceardlanna. Ag brath ar riachtanais bheachta shaineolaithe na dtíortha tairbhíocha agus na mBallstát agus ar infhaighteacht na saineolaithe sin, beidh formáid 2 lá ag na himeachtaí de ghnáth. Féadfar gníomhaíochtaí a eagrú ar líne freisin, de réir mar is gá.

Tuairisc ar an ngníomhaíocht

Den chuid is mó, is mar cheardlann agus seimineár a bheidh na gníomhaíochtaí agus leithdháilfear iad ar bhonn solúbtha agus faoi thionchar an éilimh de réir riachtanais, leasanna agus acmhainní ionsúcháin na dtíortha tairbhíocha. Idir dhá lá agus trí lá a mhairfidh an tréimhse ama atá beartaithe do gach gníomhaíocht.

I gcás inarb iomchuí, féadfaidh tíortha tairbhíocha a iarraidh go dtabharfaí cuireadh chun gníomhaíocht náisiúnta d’ionadaithe ó thíortha tairbhíocha eile nó ó thríú tíortha. Léirítear san aiseolas a bailíodh faoi na Cinntí roimhe seo gur díol mór sásaimh do thíortha comhpháirtíochta an deis chun eolas, smaointe agus dea-chleachtais a chomhroinnt ar bhonn déthaobhach nó foréigiúnach agus, ar an gcaoi sin, comhar níos dlúithe a chothú idir tíortha comharsanacha, agus go mbaineann siad tairbhe freisin as an deis sin.

Faoi Chinneadh (CBES) 2017/915 ón gComhairle, b’éigean roinnt gníomhaíochtaí a eagrú i bhformáid fhíorúil de bharr srianta taistil agus teagmhála a bhain le ráig COVID-19. Cé nach bhfuil na gníomhaíochtaí uile oiriúnach d’fhormáid fhíorúil, tugtar le tuiscint leis an rath a bhí ar a lán gníomhaíochtaí ar líne faoi Chinneadh (CBES) 2021/2309 roimhe seo gur féidir úsáid éifeachtach a bhaint as meascán d’fhormáidí fíorúla, pearsanta agus hibrideacha (i gcás inar fhreastalaíonn cuid de na rannpháirtithe ar an láthair, agus go nascann na rannpháirtithe eile leis an imeacht go cianda) sa Chinneadh reatha.

Cuireadh roinnt tíortha san áireamh i gCinntí roimhe seo. I bhfianaise an chúnaimh a fuair na tíortha sin cheana féin, cuirfear san áireamh sa chúnamh do na tíortha tairbhíocha fadtéarmacha sin an leibhéal dul chun cinn atá déanta go dtí seo.

4.1.2.   Cúnamh ad hoc

Cuspóir na gníomhaíochta

Ina theannta sin, cuirfear tacaíocht aonair ar fáil, i gcás inarb iomchuí agus oiriúnach, trí chianchúnamh (lena n-áirítear: athbhreithnithe dlíthiúla; comhairliúchán maidir le cásanna sonracha, lena n-áirítear tacaíocht do rátáil theicniúil i gcás earra ar leith, tacaíocht le hábhar treorach; etc.).

Tuairisc ar an ngníomhaíocht

Féadfar cúnamh ad hoc a dhéanamh:

(a)

go cianda, arna dhéanamh ag saineolaithe mar obair deisce nó trí leas a bhaint as uirlisí/roghanna ar líne;

(b)

ar an láthair, mar shampla i bhfoirm seisiún faisnéise go díreach agus ar an láthair nó i bhfoirm sannachán níos faide, (a mhairfidh suas le coicís), arna ndéanamh ag grúpa beag saineolaithe (duine nó beirt, go hiondúil) a chuireann comhairliúchán cuimsitheach agus comhairle phraiticiúil ar fáil d’údarás ábhartha sa tír thairbhíoch; nó

(c)

meascán den dá rogha thuas (‘cur chuige cumaisc’, mar a thugtar air, ina ndéantar cuid de na gníomhaíochtaí go fíorúil, ag brath ar an ábhar, fad is gur ar an láthair a dhéantar cinn eile).

Cuirfear an cineál sin cúnaimh ar fáil do na tíortha tairbhíocha uile. Leis an mbuiséad, leagfar amach uasmhéid laethanta saineolais a chionroinnfear ar na gníomhaíochtaí cúnaimh sin. Clúdóidh cuid den bhuiséad freisin aon uirlisí teicniúla agus aon trealamh is gá chun na gníomhaíochtaí sin a chur i gcrích, mar shampla táillí síntiúis d’ardáin ar líne le haghaidh doiciméid a chomhroinnt.

4.2.   Cur chuige maidir le hoiliúint a chur ar an oiliúnóir

Cuspóir na gníomhaíochta

Chun úinéireacht a chur chun cinn i dtaobh CTA a chur chun feidhme ar bhonn náisiúnta chomh maith le tionscnaimh réigiúnacha maidir le huiliú an Chonartha agus chun inbhuanaitheacht bhearta cúnaimh an Aontais faoin gCinneadh seo agus faoi Chinntí roimhe seo a áirithiú, go háirithe i measc tíortha comhpháirtíochta fadtéarmacha, tá sé ríthábhachtach go bhforbródh na tíortha tairbhíocha cumais agus uirlisí le go bhféadfaidh siad leanúint le próiseas cur chun feidhme agus uiliú CTA go neamhspleách ar an Aontas nó ar chúnamh seachtrach eile. Chun chuidiú leis an méid sin a bhaint amach, beidh sé tábhachtach tacaíocht a thairiscint do na tíortha tairbhíocha chun acmhainneachtaí náisiúnta a fhorbairt maidir le (a) oiliúint a chur ar a bhfoireann féin; agus (b) corpas faisnéise agus acmhainní a bhaineann le cur chun feidhme CTA a chur le chéile lena dtacófar le cuimhne institiúideach agus le hacmhainneachtaí tacaíochta idir-réigiúnacha a fhorbairt.

Chun dúbláil neamhriachtanach a sheachaint, áiritheoidh na heintitis cur chun feidhme, i gcás inarb infheidhme agus inarb iomchuí, go ndéanfar comhordú le gníomhaíochtaí eile a fhaigheann maoiniú ón Aontas sa réimse seo, lena n-áirítear na gníomhaíochtaí sin arna gcur chun feidhme ag Rúnaíocht CTA.

Tairbhe bhreise a bhaineann leis an ngníomhaíocht sin is ea cur le díorma saineolaithe an tionscadail, le saineolaithe ó thíortha tairbhíocha a fheidhmeoidh mar iolraitheoirí a mhéid a bhaineann le huiliú an Chonartha, i gcás inarb iomchuí.

Tuairisc ar an ngníomhaíocht

Beidh dhá chomhpháirt chomhlántacha sa chur chuige maidir le hoiliúint a chur ar an oiliúnóir, comhpháirteanna a chuirfear in oiriúint do na leibhéil éagsúla dul chun cinn agus aibíochta i gcórais rialaithe trádála na dtíortha tairbhíocha.

Mar chuid den mhodúl seo, beidh ceardlanna oiliúna a reáchtáil do shaineolaithe ó thíortha tairbhíocha éagsúla chun go mbeidh siad in ann oiliúint a chur ar a gcomhghleacaithe féin amach anseo agus an leibhéal saineolais atá acu á chur san áireamh. Feidhmeoidh saineolaithe nua-oilte mar iolraitheoirí saineolais CTA ina dtíortha féin, agus cuideoidh siad le hacmhainneachtaí féintacaithe institiúideacha a neartú.

Is é sprioc na ngníomhaíochtaí sin féachaint chuige go ngnóthóidh na daoine sin a bheidh ina n-oiliúnóirí amach anseo na scileanna teagaisc agus oiliúna a theastóidh chun oiliúint a chur ar bhaill foirne ina dtír féin, agus, ag an am céanna, cur le cumas na dtíortha tairbhíocha a mhéid a bhaineann le bainistiú eolais agus cuimhne institiúideach. I gcás inarb iomchuí, féadfar tíortha comhpháirtíochta a spreagadh chun clár maidir le ‘Oiliúint a chur ar na hOiliúnóirí’ dá gcuid féin a fhorbairt bunaithe ar an gcur chuige oiliúna agus ar na hábhair oiliúna a forbraíodh faoin gcéim seo agus faoi na céimeanna a bhí sa chlár roimhe seo. Is é is aidhm do na gníomhaíochtaí sin, dá bhrí sin, a chur ar chumas na dtíortha tairbhíocha, a bheith níos neamhspleáiche agus in ann brath orthu féin maidir le heolas a bhaineann le CTA a chruthú, a scaipeadh agus a chothabháil i dtionól údarás rialtais ábhartha. Ós rud é gur gníomhaíochtaí teagmhálacha praiticiúla iad na gníomhaíochtaí sin, is é is oiriúnaí go rachfaí i mbun formáid ‘ar an láthair’; bíodh sin mar atá, d’fhéadfadh cur chuige cumaisc, ina bhfuil gníomhaíochtaí ar an láthair agus gníomhaíochtaí fíorúla, a bheith éifeachtach freisin.

Bainfidh an dara cuid le hardán ar líne a thacóidh, nuair is ábhartha agus nuair is féidir go teicniúil i dtíortha comhpháirtíochta, leo siúd a bheidh ina n-oiliúnóirí amach anseo a n-ábhair oiliúna féin a fhorbairt trí chnuasach ábhar agus doiciméad a bhaineann le cur chun feidhme CTA a choimeád, mar ar cuireadh i dtoll a chéile é agus/nó, más gá, arna fhorbairt ag na heintitis cur chun feidhme agus arna gcur ar fáil do na tíortha tairbhíocha. Chomh maith leis sin, cuirfidh an t-ardán ar a gcumas siúd a bheidh ina n-oiliúnóirí amach anseo comhairle a lorg ó phobal na saineolaithe agus plé a dhéanamh ar aon deacrachtaí a d’fhéadfadh a bheith rompu agus a gcuid seisiúin oiliúna náisiúnta á gcur chun feidhme acu. Bainfear leas as an ardán freisin chun obair leantach a dhéanamh ar ghníomhaíochtaí agus chun táirgí insoláthartha a táirgeadh faoin gCinneadh seo agus faoi Chinntí roimhe seo a chartlannú.

Ag tógáil ar an obair a rinneadh faoin gCinneadh roimhe seo, beidh sé de rogha ag na heintitis cur chun feidhme forbairt, coimeádaíocht agus táirgeadh an ábhair sin a tharmligean chuig saineolaithe seachtracha, arna roghnú freisin ón díorma saineolaithe, de réir mar is iomchuí. D’fhonn acmhainneacht institiúideach a neartú in údaráis ábhartha na dtíortha tairbhíocha, ba cheart do na gníomhaíochtaí oiliúna díriú freisin ar thíortha tairbhíocha a spreagadh chun a gcnuasach féin d’fhaisnéis agus de dhoiciméid a bhaineann le cur chun feidhme CTA a fhorbairt agus a choimeád.

Cuirfidh an t-ardán tionscadail le hinfheictheacht an chláir, éascóidh sé teagmhálacha idir páirtithe leasmhara, cothóidh sé idirphlé idir lucht cur chun feidhme agus comhpháirtithe, agus cothóidh sé an comhar leis na tíortha tairbhíocha. Ábhair a fhorbrófar faoin tionscadal, cuirfear ar fáil iad, nuair is féidir sin, agus féadfaidh na rannpháirtithe, a bhuí le teicneolaíocht ar mhacasamhail líonra sóisialta, cumarsáid ghníomhach a dhéanamh ar líne agus faisnéis a mhalartú le chéile i dtimpeallacht a bhfuil cleachtadh acu uirthi. Bainfidh institiúidí an Aontais agus na Ballstáit tairbhe as an ardán tiomnaithe sin freisin mar a ndéanfaidh eintitis cur chun feidhme faisnéis a mhalartú maidir le cur i gcrích na ngníomhaíochtaí.

I gcás inar féidir, fógróidh na heintitis cur chun feidhme na ceardlanna agus na hábhair oiliúna don oiliúnóir agus sainaithneoidh siad daoine a bheidh ina n-oiliúnóirí amach anseo agus iad i mbun gníomhaíochtaí cúnaimh i dtíortha tairbhíocha faoin gCinneadh seo (an cinneadh críochnaitheach maidir le daoine a ainmniú a bheidh ina n-oiliúnóirí amach anseo, is faoin tír thairbhíoch a bheidh sé i gcónaí, áfach). Ag brath ar a oiriúnaí atá siad, féadfar na hoifigigh sin a chlárú ina dhiaidh sin sa díorma saineolaithe agus tabharfar cuireadh dóibh a bheith páirteach, i gcáil saineolaí, i ngníomhaíochtaí eile ar a dtráchtar sa Chinneadh seo. Tacóidh sé sin a thuilleadh leis an sprioc maidir le tíortha tairbhíocha fadtéarmacha a spreagadh chun ról na gcuraidh réigiúnacha maidir le cur chun feidhme CTA agus iolraitheoirí a mhéid a bhaineann le huiliú an Chonartha a ghlacadh.

4.3.   Gníomhaíochtaí réigiúnacha agus idirnáisiúnta

4.3.1.   Gníomhaíochtaí iltaobhacha

Cuspóir na gníomhaíochta

Beidh an tionscadal i bhfoirm gníomhaíochtaí iltaobhacha ina mbeidh ar a laghad dhá thír thairbhíocha páirteach a bhfuil suim acu i saincheist ar údar imní coiteann í, agus é mar chuspóir aige eolas, taithí agus cuir chuige náisiúnta maidir leis an tsaincheist áirithe sin a mhalartú. Is féidir na gníomhaíochtaí sin a eagrú i gceann de na tíortha tairbhíocha den Chinneadh seo, i stát tairbhíoch nó ar líne. Áirítear ar ghníomhaíochtaí iltaobhacha malartaithe eolais ceardlanna ilnáisiúnta agus cuairteanna staidéir araon.

Déanfar gníomhaíochtaí iltaobhacha chun comhar idirnáisiúnta agus comhar theas-theas a chur chun cinn lasmuigh de chomhdhálacha réigiúnacha. D’fhéadfadh na tíortha comhpháirtíochta fadtéarmacha go háirithe (i.e. tairbhithe faoi Chinntí ón gComhairle roimhe seo) tairbhe a bhaint as an bhformáid sin, toisc go bhféadfar faisnéis a mhalartú agus eolas maidir le saincheist ar leith a aistriú le piaraí eile agus le saineolaithe idirnáisiúnta.

Le cuairteanna staidéir, bíonn deis ag tíortha tairbhíocha teagmháil a dhéanamh le húdaráis agus le hoifigigh rialtais i dtíortha eile a chuireann CTA i bhfeidhm. Ar an gcaoi sin, is comhlánú tábhachtach iad ar ghníomhaíochtaí náisiúnta sna tíortha tairbhíocha mar go gcuireann siad creat tagartha níos leithne ar fáil do na tíortha sin a mhéid a bhaineann le cur chun feidhme praiticiúil an Chonartha. Ina theannta sin, a bhuí leis an dlúth-idirghníomhaíocht a bhíonn idir ionadaithe na dtíortha óstacha agus oifigigh ar cuairt, is iontach an deis oiliúna a ghabhann leis na cuairteanna sin freisin, go háirithe do dhaoine ar mhian leo a bheith ina saineolaithe agus ina n-oiliúnóirí amach anseo. Cuirfear, dá bhrí sin, cuairteanna staidéir ar fáil d’oifigigh rialtais, lena n-áirítear iad siúd atá freagrach as beartas, ceadúnú agus forfheidhmiú, ó gach ceann de na tíortha tairbhíocha ar a dtráchtar faoi phointe 3.1.2.3.

Tuairisc ar an ngníomhaíocht

Suas le 3 lá a mhairfidh gach cuairt staidéir agus is do thír thairbhíoch amháin a bhíonn siad ceaptha go hiondúil, ach, i gcás ina meastar gurb iomchuí sin agus/nó má iarrann na tíortha féin é, d’fhéadfaí cuireadh a thabhairt do thíortha tairbhíocha éagsúla a bheith páirteach sa chuairt staidéir chéanna.

Baineann sé le nádúr go mbeadh daoine i láthair go pearsanta ag na cuairteanna staidéir, agus gur ar an gcaoi sin amháin a reáchtálfaí iad. Féadfar iad a reáchtáil i mBallstát nó i dtríú tír (ní gá gur tíortha tairbhíocha faoin gCinneadh seo ón gComhairle a bheadh sna tríú tíortha sin). Is faoin eintiteas cur chun feidhme a bheidh i gceannas ar an tír chomhpháirtíochta, agus a mbeidh tairbhe á bhaint as an gcuairt staidéir aici, a bheidh sé an chuairt staidéir a eagrú.

Is féidir ceardlanna iltaobhacha a eagrú ar feadh suas le 2 lá agus iad a reáchtáil i gceann de na tíortha tairbhíocha a bhfuil baint acu leis an ngníomhaíocht, i mBallstát nó ar líne.

4.3.2.   Comhdhálacha réigiúnacha agus trasréigiúnacha

Cuspóir na gníomhaíochta

Is formáid iad gníomhaíochtaí réigiúnacha atá ag éirí níos tábhachtaí ó thaobh uiliú an Chonartha a chur chun cinn. Ar cheann de na nithe is tábhachtaí a tugadh faoi deara sna céimeanna tionscadail roimhe seo, chonacthas go mbraitheann tíortha comhpháirtíochta níos compordaí agus níos spreagtha chun dul chun cinn a dhéanamh maidir le cur chun feidhme an Chonartha nuair a chuirtear i gcomhthéacs an réigiúin máguaird iad (i.e. nuair a dhéantar iad a thomhas i gcoinne stáit chomharsanacha), a bhfuil tréithe coiteanna polaitiúla, eacnamaíocha agus cultúrtha acu. Dá bhrí sin, úsáidfear dinimic réigiúnach chun timthriall féin-neartaithe malartaithe réigiúnaigh agus tacaíochta frithpháirtí a chothú. Leis na gníomhaíochtaí atá dírithe ar na réigiúin, tabharfar le chéile roinnt tíortha, ó réigiún amháin nó ó réigiúin éagsúla (gníomhaíochtaí trasréigiúnacha agus idirnáisiúnta), chun taithí a chomhroinnt agus chun saincheisteanna ar údar imní coiteann iad a bhaineann le cur chun feidhme CTA agus le rialuithe ar thrádáil arm, a phlé. Na tíortha tairbhíocha a fuair cúnamh roimhe sin faoi Chinneadh (CBES) 2013/768 ón gComhairle agus/nó faoi Chinneadh (CBES) 2017/915 ón gComhairle agus Cinneadh (CBES) 2021/2309 ón gComhairle agus a bhfuil dul chun cinn agus tiomantas suntasach i ndáil le cur chun feidhme CTA léirithe acu, beidh ról an-tábhachtach acu sna gníomhaíochtaí sin mar eiseamláirí dá réigiúin faoi seach. Cuideoidh acmhainneacht fhadtéarmach na dtíortha comhpháirtíochta, i gcás inarb iomchuí, leo a bheith ina n-iolraitheoirí agus ina ‘curaidh réigiúnacha’ maidir le huiliú an Chonartha ina réigiúin faoi seach. A bhuí leis sin, d’fhéadfaí úinéireacht ar chur chun feidhme CTA ar an leibhéal réigiúnach a spreagadh agus an comhar theas-theas a chur chun cinn san fhadtéarma.

Áiríodh gníomhaíochtaí trasréigiúnacha agus idirnáisiúnta sa Chinneadh sin mar fhreagairt ar iarrataí ó thíortha tairbhíocha ar mian leo foghlaim ón taithí atá ag tíortha eile in áiteanna eile ar fud an domhain. Ar an gcaoi sin, le gníomhaíochtaí trasréigiúnacha agus idirnáisiúnta, is féidir malartú cur chuige agus cleachtas a bhaineann le CTA a chothú ar bhealach níos leithne.

Tuairisc ar an ngníomhaíocht

Eagrófar gníomhaíochtaí réigiúnacha mar imeacht 2 lá nó 3 lá agus leithdháilfear iad de réir an réigiúin. Ba cheart trí thír rannpháirteacha ar a laghad a bheith san áireamh sna gníomhaíochtaí sin. De bhreis ar na tíortha tairbhíocha a liostaítear faoi roinn 3, beidh sé tábhachtach gur féidir le tríú tíortha nach n-áirítear ar shlí eile sa Chinneadh seo a bheith rannpháirteach sna gníomhaíochtaí sin, i gcás inarb ábhartha, go háirithe na Stáit sin nach Páirtithe iad. Thairis sin, i gcár inar féidir, is inmholta go mbeadh ceann amháin ar a laghad de na tíortha tairbhíocha is seanbhunaithe atá céim chun tosaigh rannpháirteach (i.e. tíortha a fuair cúnamh faoi Chinneadh 2013/768/CBES ón gComhairle agus/nó Cinneadh (CBES) 2017/915 ón gComhairle agus Cinneadh 2021/2309 ón gComhairle mar a thuairiscítear i roinn 3 agus a bhfuil leibhéal áirithe aibíochta bainte amach ag a chóras um rialú ar thrádáil arm) chun gníomhú mar iolraitheoir agus/nó a iarraidh ar shaineolaithe ó na tíortha sin a bheith rannpháirteach mar bhealach chun saineolas réigiúnach agus comhar theas-theas a chothú.

Eagrófar na gníomhaíochtaí réigiúnacha de réir éilimh agus infhaighteachta ó thaobh na dtíortha óstacha. Is í an rannpháirtíocht ar an láthair an fhormáid is fearr le haghaidh na ngníomhaíochtaí sin toisc go n-áiritheofar léi an tionchar is mó; mar sin féin, féadfar formáidí ar líne nó formáidí hibrideacha a úsáid freisin de réir chúinsí agus roghanna na rannpháirtithe.

Ní bheidh gníomhaíochtaí réigiúnacha teoranta do réigiúin aonair ach, ina ionad sin, tabharfar an deis do thíortha tairbhíocha ó réigiúin éagsúla freastal ar ghníomhaíochtaí trasréigiúnacha. Agus céimeanna den tionscadal á gcur chun feidhme roimhe seo, ba léir ní hamháin go bhfuil éileamh ard ann i measc tíortha comhpháirtíochta foghlaim ó chéile agus faisnéis a mhalartú le chéile laistigh dá réigiúin faoi seach ach gur mian leo an méid sin a dhéanamh lasmuigh díobh chomh maith.

4.4.   Imeachtaí idirnáisiúnta ar an imeall

Cuspóir na gníomhaíochta

Chun an oiread daoine agus is féidir a chur ar an eolas agus chun go gcuirfear chun cinn ní hamháin uiliú CTA ach go gcuirfear chun cinn iarrachtaí an Aontais i dtreo na sprice sin freisin, eagróidh BAFA agus Expertise France go comhpháirteach imeacht idirnáisiúnta ar imeall comhdháil iltaobhach a eagrófar ar leibhéal na Náisiún Aontaithe e.g. le linn an tseisiúin bhliantúil de Chéad Choiste Chomhthionól Ginearálta na Náisiún Aontaithe i Nua Eabhrac.

Tuairisc ar an ngníomhaíocht

Is éard a bheidh san imeacht idirnáisiúnta ar an imeall imeacht lae ina mbeidh líon áirithe ionadaithe ó thíortha comhpháirtíochta, saineolaithe idirnáisiúnta (go háirithe ó thíortha tairbhíocha nó iarthíortha tairbhíocha, iad siúd a ghlac páirt sa mhodúl ‘Oiliúint a chur ar an Oiliúnóir’, más féidir) agus ionadaithe ó eagraíochtaí idirnáisiúnta agus réigiúnacha chomh maith le gníomhaithe na sochaí sibhialta atá ag gabháil do chur chun feidhme agus uiliú CTA a chur chun cinn.

4.4.1.   Imeachtaí ar imeall chomhdhálacha na Stát is Páirtithe in CTA

Cuspóir na gníomhaíochta

Ag Comhdhálacha Bliantúla na Stát is Páirtithe in CTA, tugtar deis ar leith teagmháil a dhéanamh leis na hoifigigh agus na páirtithe leasmhara ábhartha atá i gceannas ar chúrsaí CTA. Le himeachtaí ar an imeall a fhaigheann maoiniú ón Aontas, beifear in ann feasacht a ardú faoi ghníomhaíochtaí tacaíochta cur chun feidhme an Aontais, éascófar teagmháil le tíortha a d’fhéadfadh cúnamh a lorg ina dhiaidh sin, agus cuirfear dea-chleachtais chun cinn, go háirithe ó thaobh na dtíortha tairbhíocha.

Tuairisc ar an ngníomhaíocht

Beidh trí imeacht ar an imeall ar siúl le linn thréimhse an chláir, i.e. imeacht amháin i gcás gach ceann de Chomhdhálacha bliantúla na Stát is Páirtithe in CTA agus eagróidh na heintitis cur chun feidhme iad go comhpháirteach. Go háirithe, féadfar na costais taistil do líon sainithe saineolaithe nó oifigeach ó thíortha tairbhíocha a chumhdach le cistí an Aontais.

4.5.   Comhdháil chlabhsúir

Cuspóir na gníomhaíochta

Is é cuspóir na comhdhála clabhsúir feasacht i leith CTA agus úinéireacht CTA a mhéadú ní hamháin i measc na dtíortha comhpháirtíochta ach i measc páirtithe leasmhara ábhartha mar shampla parlaimintí náisiúnta, eagraíochtaí réigiúnacha agus idirnáisiúnta agus ionadaithe ón tsochaí shibhialta ar spéis leo an tionchar is leithne ba cheart a bheith ag an gConradh. Trí ionadaithe ó go leor áiteanna éagsúla ar domhan a thabhairt le chéile, beidh an chomhdháil ina fóram freisin chun an líonra idirnáisiúnta agus an pobal idirnáisiúnta de ghníomhaithe atá rannpháirteach i gcur chun feidhme an Chonartha a neartú agus chun leanúint dá uiliú.

Tuairisc ar an ngníomhaíocht

Comhdháil hibrideach (nó ar líne amháin má chomhaontaíonn SEGS agus na heintitis cur chun feidhme é sin) 2 lá a bheidh sa ghníomhaíocht a eagrófar gar do dheireadh chur chun feidhme an Chinnidh seo agus d’fhéadfaí í a thionól díreach i ndiaidh chruinniú COARM. Beidh na heintitis cur chun feidhme i gceannas go comhpháirteach ar chur chun feidhme na gníomhaíochta. Ag an gcomhdháil sin, tabharfar le chéile ionadaithe ábhartha thíortha tairbhíocha na ngníomhaíochtaí dá sonraítear i roinn 4 chomh maith le páirtithe leasmhara eile a bhfuil baint acu le cur chun cinn an Chonartha agus a chuspóirí.

Ag an gComhdháil, beidh na tíortha tairbhíocha in ann an taithí atá acu a roinnt, cuirfear faisnéis ar fáil maidir lena seasaimh vis-à-vis CTA agus stádas daingniúcháin agus cur chun feidhme CTA agus beifear in ann an fhaisnéis ábhartha a chomhroinnt le hionadaithe na bparlaimintí náisiúnta, na n-eagraíochtaí réigiúnacha agus na sochaí sibhialta.

Chomh maith leis na hionadaithe ó thíortha comhpháirtíochta, féadfar saineolaithe a raibh baint acu le gníomhaíochtaí tionscadail a bheith ag an gComhdháil Chlabhsúir chomh maith le hionadaithe ó eagraíochtaí ábhartha eile agus gníomhaithe eile de chuid na sochaí sibhialta á bhfuil cur chun feidhme agus uiliú CTA á gcur chun cinn acu.

5.   Dul i gcomhar leis an gcomhphobal saineolaithe

5.1.   Cruinnithe saineolaithe

Cuspóir na gníomhaíochta

Díreofar sna cruinnithe a bheidh ag na saineolaithe ar chomhar a threisiú le díorma saineolaithe an tionscadail a bunaíodh faoi Chinntí 2013/768/CBES, (CBES) 2017/915 agus (CBES) 2021/2309 ón gComhairle, agus le saineolaithe nua, go háirithe leo siúd ó thíortha tairbhíocha agus iarthíortha tairbhíocha a bhí rannpháirteach sa mhodúl maidir le oiliúint a chur ar an oiliúnóir a léirítear i roinn 4.1.3. Cuirfidh siad malartuithe chuiditheacha chun cinn maidir le cur chun feidhme agus torthaí an tionscadail agus, ar an gcaoi sin, spreagfar rannpháirtíocht fhadtéarmach sa tionscadal agus bainfear leas as saineolas i mórphobal CTA. Rannchuideoidh na gníomhaíochtaí freisin le comhar theas-theas trí ról a thabhairt do shaineolaithe ó thíortha tairbhíocha agus iarthíortha tairbhíocha, i gcás inarb iomchuí.

Tuairisc ar an ngníomhaíocht

Is iad na heintitis cur chun feidhme a thionólfaidh cruinnithe saineolaithe (eagróidh gach eintiteas cruinniú amháin), go háirithe trí dhíriú go príomha, cé nach go heisiach, ar shaineolaithe a bhí páirteach sna céimeanna roimhe seo den tionscadal agus/nó a ghlac páirt i ngníomhaíochtaí tionscadail go minic. Beidh sé d’aidhm leis na cruinnithe an méid seo a leanas a dhéanamh go háirithe:

—

comhthuiscint a fhorbairt i measc saineolaithe ar na dúshláin agus ar na freagairtí a bhaineann le tacaíocht chur chun feidhme CTA; príomhtheachtaireachtaí a bheidh le cur in iúl le linn gníomhaíochtaí for-rochtana a chomhchuibhiú agus a chuíchóiriú,

—

faisnéis a chur ar fáil do shaineolaithe faoin dul chun cinn atá déanta ag na tíortha comhpháirtíochta a mhéid a bhaineann le cur chun feidhme CTA agus leis an gcúnamh a sholáthraítear faoin tionscadal,

—

cineálacha cur chuige coiteanna a fhorbairt agus/nó a mhodhnú, de réir mar is iomchuí, a bheidh le húsáid sa chúnamh a thabharfaidh na saineolaithe le go mbeidh chomhairle uathu comhsheasmhach agus oiriúnaithe do riachtanais na dtíortha tairbhíocha.

Úsáidfear cur chuige dhá ghné chun dul i gcomhar le saineolaithe, cur chuige ina mbeidh na nithe a leanas:

—

dhá chruinniú ar líne ina mbeidh saineolaithe ón díorma saineolaithe páirteach chun spriocanna agus cineálacha cur chuige coiteanna a fhorbairt chun teagmháil a dhéanamh le tíortha tairbhíocha

—

an t-ardán ar líne (a forbraíodh ar dtús faoin dara céim den tionscadal), i gcás inarb infheidhme, agus a uirlisí a úsáid chun cumarsáid a chothú i measc saineolaithe, agus chun tacú le malartú faisnéise maidir le CTA agus cur chun feidhme tionscadal (gníomhaíochtaí, saineolaithe, etc.).

6.   Tacaíocht don uiliú

Chomh maith le cúnamh teicniúil a thabhairt do na tíortha tairbhíocha chun tacú leo CTA a chur chun feidhme, tá sé mar aidhm leis an gCinneadh seo uiliú an Chonartha a chur chun cinn agus a chur chun tosaigh freisin, rud a chuirfidh le hiarrachtaí iltaobhacha i gcoitinne atreorú gnátharm agus gáinneáil aindleathach ar ghnáthairm a chosc agus a chuirfidh slándáil fheabhsaithe chun cinn do chách.

Chuige sin, gníomhaíochtaí a dhéanfar faoi chuimsiú an Chinnidh seo, beidh siad dírithe freisin ar chomhar a bhunú le páirtithe nach páirtithe stáit iad agus ar aontachas le CTA a spreagadh. Treiseoidh na gníomhaíochtaí gaolmhara infheictheacht an Chonartha, músclóidh siad feasacht an phobail ar na rioscaí agus ar na bagairtí a bhaineann le hatreorú gnátharm agus le gáinneáil aindleathach ar ghnáthairm, agus ag an am céanna, cuirfidh siad idirphlé chun cinn idir stáit agus páirtithe nach páirtithe stáit iad chun cuidiú le muinín agus trédhearcacht a chothú.

I gcás inarb ábhartha, faoin gCinneadh seo tabharfar tacaíocht, i gcás inarb iomchuí, i bhfoirm gníomhaíochtaí cúnaimh theicniúil do stáit nach bhfuil ina bpáirtithe de CTA go fóill, mar a thuairiscítear i roinn 4. Eagrófar na gníomhaíochtaí sin arna iarraidh ag an stát sin agus de réir éilimh agus infhaighteachta acmhainní.

Ina theannta sin, agus chun uiliú an Chonartha a spreagadh a thuilleadh, eagrófar gníomhaíochtaí réigiúnacha agus idirnáisiúnta, mar a thuairiscítear thíos, agus é mar aidhm leo an méid seo a leanas a bhaint amach:

—

cur leis an bhfeasacht maidir leis na rioscaí agus na dúshláin a bhaineann le hatreorú gnátharm agus le gáinneáil aindleathach ar ghnáthairm,

—

ardán a chur ar fáil do shaineolaithe agus d’oifigigh ó na húdaráis ábhartha i dtíortha éagsúla le go bhféadfaidh siad saincheisteanna i dtaobh trádáil straitéiseach a phlé,

—

cuspóirí i dtaobh uilíochas, cur chun feidhme iomlán agus feabhsú CTA a chur chun cinn.

Déanfar na gníomhaíochtaí i ndlúthchomhar le húdaráis na rialtas náisiúnta faoi seach agus, de réir mar is iomchuí, le hacadóirí, eagraíochtaí neamhrialtasacha agus/nó eagraíochtaí réigiúnacha ábhartha. Tacóidh toscairí an Aontais leis na gníomhaíochtaí, i gcás inarb iomchuí agus inarb infheidhme, chun móiminteam polaitiúil breise a thabhairt dóibh.

7.   Eintitis cur chun feidhme

Is inmholta dhá eintiteas chur chun feidhme inniúla a úsáid de bharr an ualaigh oibre a eascraíonn as gníomhaíochtaí faoin gCinneadh seo: BAFA agus Expertise France. I gcás inarb iomchuí, oibreoidh siad i gcomhpháirt le gníomhaireachtaí rialaithe onnmhairí na mBallstát, le heagraíochtaí réigiúnacha agus idirnáisiúnta ábhartha, le meithleacha machnaimh, le hinstitiúidí taighde agus le heagraíochtaí neamhrialtasacha.

Bhí BAFA agus Expertise France freagrach as cur chun feidhme Chinneadh (CBES) 2017/915 agus Cinneadh 2021/2309 agus as cur chun feidhme na gclár for-rochtana eile de chuid an Aontais a bhí ann roimhe seo agus atá ann faoi láthair. I dteannta a chéile, tá an taithí, na cáilíochtaí agus an saineolas is gá ag an dá eintiteas cur chun feidhme maidir le réimse iomlán ghníomhaíochtaí an Aontais um rialú ar onnmhairiú arm, sna réimsí a bhaineann le dé-úsáid agus le rialú ar onnmhairiú arm.

8.   Comhordú le gníomhaíochtaí cúnaimh ábhartha eile

Áiritheoidh na heintitis cur chun feidhme go ndéanfar an comhordú cuí ar ionstraimí éagsúla an Aontais, chun an méid seo a leanas a dhéanamh:

—

cur chuige comhtháite i leith gníomhaíochtaí for-rochtana an Aontais a áirithiú maidir le tríú tíortha,

—

forluí a sheachaint a mhéid a bhaineann le huainiú agus le hábhar na ngníomhaíochtaí,

—

taithí a chomhroinnt maidir le cur chun feidhme na dtionscadal agus sineirgí féideartha a shainaithint i measc na dtionscadal cúnaimh éagsúil i réimse an rialaithe ar onnmhairiú.

—

sineirge agus comhlántacht a éileamh ó thionscadail chúnaimh deontóirí eile, i gcás inarb iomchuí

Chuige sin, déanfar faisnéis a mhalartú ar bhonn bliantúil ar líne idir gníomhaireachtaí cur chun feidhme ghníomhaíochtaí for-rochtana an Aontais i réimse an rialaithe onnmhairiúcháin, agus leis an tSeirbhís Eorpach Gníomhaíochta Seachtraí tríd an sásra comhordúcháin atá bunaithe cheana féin ar bhonn foirmiúil. Ba cheart na saineolaithe ó Bhallstáit eile an Aontais a spreagadh lena bheith rannpháirteach, nuair is ábhartha. Beidh na heintitis cur chun feidhme i gceannas go comhpháirteach ar a chur chun feidhme na gníomhaíochta.

Ina theannta sin, ba cheart do na heintitis cur chun feidhme aird a thabhairt ar na gníomhaíochtaí sin is ábhartha do CTA a dhéantar faoi chuimsiú Chlár Gníomhaíochta na Náisiún Aontaithe chun gach gné den trádáil aindleathach i mionairm agus in airm éadroma a chosc, a chomhrac agus a dhíothú, lena n-áirítear a Chóras Tacaíochta Cur Chun Feidhme, Rún 1540 (2004) ó Chomhairle Slándála na Náisiún Aontaithe, Chiste Iontaobhais Deonach CTA, Saoráid Iontaobhais na Náisiún Aontaithe maidir le Comhar Tacaíochta Arm (UNSCAR), agus gníomhaíochtaí cúnaimh dhéthaobhaigh. Ba cheart do na heintitis cur chun feidhme idirchaidreamh a dhéanamh le soláthraithe eile cúnaimh de réir mar is iomchuí chun faisnéis a chomhroinnt, dúbailt mhíchuí a sheachaint agus comhsheasmhacht agus comhlántacht a áirithiú.

Beidh sé mar aidhm freisin ag an tionscadal feasacht a mhéadú i measc na dtíortha tairbhíocha maidir le hionstraimí an Aontais a bheith in ann tacú leis an gcomhar theas-theas maidir le rialuithe ar onnmhairiú. I ndáil leis an méid sin, ba cheart faisnéis a chur ar fáil agus a chur chun cinn, i gcás inarb iomchuí, i ngeall ar na gníomhaíochtaí cúnaimh faoi na hionstraimí atá ar fáil, cuir i gcás an Tionscnamh maidir le hIonaid Barr Feabhais AE chun riosca Ceimiceach, Bitheolaíoch, Raideolaíoch agus Núicléach a mhaolú agus Cláir idir piaraí eile de chuid an Aontais.

9.   Infheictheacht an Aontais agus infhaighteacht an ábhair cúnaimh

Leis na hábhair agus na huirlisí arna dtáirgeadh ag an tionscadal, lena n-áirítear an t-ardán ar líne a bhfuil tuairisc air faoi phointe 3.1.2.2, déanfar infheictheacht an Aontais a áirithiú agus a fheabhsú. Beidh na haschuir sin i gcomhréir leis an lógó agus cairt ghrafach i Lámhleabhair um Ghníomhaíochtaí Cumarsáide agus Infheictheachta le haghaidh Ghníomhaíochtaí Seachtracha an Aontais agus áireofar iontu lógó Chlár P2P an Aontais um rialú ar onnmhairiú. Ba cheart do Thoscaireachtaí an Aontais a bheith rannpháirteach in imeachtaí i dtríú tíortha chun feabhas a chur ar an obair leantach pholaitiúil agus ar infheictheacht.

Déanfar nuachtlitir chlár cúnaimh an Aontais a tháirgeadh le linn chéim III den tionscadal agus leanfar dá dáileadh go leictreonach chun lucht spéise níos leithne a bhaint amach sna tíortha comhpháirtíochta, sna Ballstáit agus i bpobal saineolais idirnáisiúnta CTA.

10.   Measúnú tionchair

Ar chur i gcrích na ngníomhaíochtaí sin dá bhforáiltear sa Chinneadh seo, ba cheart measúnú teicniúil a dhéanamh ar an tionchar atá acu. Is iad na heintitis cur chun feidhme, i gcomhair leis an tSeirbhís Eorpach Gníomhaíochta Seachtraí, lena n-áirítear, mar is iomchuí, le Toscaireachtaí an Aontais sna tíortha tairbhíocha chomh maith le páirtithe leasmhara ábhartha eile, a dhéanfaidh an measúnú tionchair. Sa mheasúnú tionchair, ba cheart aird ar leith a thabhairt ar líon na dtíortha tairbhíocha a bhfuil CTA daingnithe acu agus ar fhorbairt a n-acmhainneachtaí maidir le rialú ar aistriú arm. Sa mheasúnú sin ar acmhainneachtaí na dtíortha tairbhíocha maidir le rialú ar aistriú arm, ba cheart a chumhdach go háirithe, ullmhú agus eisiúint na rialachán ábhartha náisiúnta, comhlíonadh oibleagáidí tuairiscithe CTA agus cumhachtú comhlachta ábhartha atá i gceannas ar rialú ar aistriú arm.

11.   Tuairisciú

Cuirfidh na heintitis cur chun feidhme tuarascálacha rialta, lena n-áirítear tuarascálacha a chuirfear i dtoll a chéile tar éis gach ceann de na gníomhaíochtaí a chur i gcrích. Ba cheart na tuarascálacha a chur faoi bhráid an Ardionadaí tráth nach déanaí ná 6 seachtaine tar éis na gníomhaíochtaí ábhartha a chur i gcrích.

Tabharfar isteach tuarascálacha tírshonracha ar dhul chun cinn agus cuirfear faoi bhráid COARM iad ar bhonn bliantúil faoi dheireadh gach bliana. Forbróidh na gníomhaireachtaí cur chun feidhme teimpléad tuairiscithe agus cuirfear faoi bhráid Chathaoirleach COARM é lena bhreithniú tráth nach déanaí ná 3 mhí tar éis theacht i bhfeidhm an Chinnidh seo.

12.   Fad ama

Meastar gur 36 mhí a bheidh i ré iomlán na gníomhaíochta.


(1)  An Conradh Trádála Arm, Airteagal 1.

Foscríbhinn

Mar seo a leanas a thabharfaidh na heintitis cur chun feidhme aghaidh ar na tíortha comhpháirtíochta:

 

Tíortha comhpháirtíochta BAFA (TC) i gClár For-rochtana IV de chuid AE CTA:

 

an Bhotsuáin

 

an tSile

 

an Cholóim

 

Cósta Ríce

 

Eacuadór

 

an Chasacstáin

 

an Mhalaeisia

 

Peiriú

 

an Téalainn

 

an tSaimbia

 

Tíortha comhpháirtíochta Expertise France i gClár For-rochtana IV de chuid AE CTA:

 

Beinin

 

Camarún

 

an Cósta Eabhair

 

an Ghuáin

 

an Libéir

 

Madagascar

 

Meicsiceo

 

na hOileáin Fhilipíneacha

 

an tSeineagáil

 

Siarra Leon

 

Tóga

 

Aontas Oileáin Chomóra


ELI: http://data.europa.eu/eli/dec/2025/442/oj

ISSN 1977-0839 (electronic edition)