(1)

Le Cinneadh Cur Chun Feidhme (AE) 2015/701 ón gCoimisiún (2) údaraíodh bia ina bhfuil ráib olashíl ghéinmhodhnaithe GT73, atá comhdhéanta di nó a tháirgtear aisti, cé is moite de phróitéin aonraithe síl, agus beatha a tháirgtear as ráib olashíl ghéinmhodhnaithe GT73 a chur ar an margadh.

(2)

An 19 Feabhra 2021 chuir Bayer Agriculture BV, atá lonnaithe sa Bheilg, iarratas faoi bhráid an Choimisiúin thar ceann Bayer CropScience LP, atá lonnaithe sna Stáit Aontaithe, maidir leis an údarú sin a athnuachan, i gcomhréir le hAirteagal 11(3) agus Airteagal 23(3) de Rialachán (CE) Uimh. 1829/2003.

(3)

An 19 Feabhra 2021 chuir Bayer Agriculture BV, atá lonnaithe sa Bheilg, iarratas faoi bhráid an Choimisiúin thar ceann Bayer CropScience LP, atá lonnaithe sna Stáit Aontaithe, i gcomhréir le hAirteagal 9(2) de Rialachán (CE) Uimh. 1829/2003, ar iarratas é ar mhodhnú ar théarmaí an údaraithe arna dheonú le Cinneadh Cur Chun Feidhme (AE) 2015/701, a mhéid a bhaineann le próitéin aonraithe síl a tháirgtear as ráib olashíl ghéinmhodhnaithe GT73 le haghaidh bia a chur ar an margadh.

(4)

Le Cinneadh Cur Chun Feidhme (AE) 2021/1385 ón gCoimisiún (3) rinneadh athnuachan ar an údarú maidir le beatha ina bhfuil ráib olashíl ghéinmhodhnaithe GT73 nó atá comhdhéanta di agus táirgí ina bhfuil ráib olashíl ghéinmhodhnaithe GT73 nó atá comhdhéanta di le haghaidh úsáidí seachas bia agus beatha, cé is moite de shaothrú, a chur ar an margadh.

(5)

An 6 Deireadh Fómhair 2022 d’eisigh an tÚdarás Eorpach um Shábháilteacht Bia (‘an tÚdarás’) tuairim fhabhrach uaidh (4) maidir leis an measúnú ar ráib olashíl ghéinmhodhnaithe GT73 i ndáil lena húdarú a athnuachan i gcomhréir le hAirteagal 6 de Rialachán (CE) Uimh. 1829/2003. Tháinig an tÚdarás ar an gconclúid nach raibh aon ghuais nua, aon teagmháil mhodhnaithe nua ná aon éiginnteacht eolaíoch nua san iarratas ar athnuachan a d’athródh conclúidí an mheasúnaithe riosca bunaidh ar ráib olashíl ghéinmhodhnaithe GT73, measúnú a ghlac an tÚdarás in 2004 (5).

(6)

An plean faireacháin a chuir an t-iarratasóir isteach maidir leis na héifeachtaí comhshaoil, arb é atá ann plean faireachais ginearálta, tháinig an tÚdarás ar an gconclúid freisin go bhfuil an plean sin i gcomhréir le húsáidí beartaithe na dtáirgí.

(7)

An 4 Samhain 2022 d’eisigh an tÚdarás Eorpach um Shábháilteacht Bia (‘an tÚdarás’) tuairim fhabhrach uaidh (6) maidir leis an measúnú ar ráib olashíl ghéinmhodhnaithe GT73 i ndáil le próitéin aonraithe síl le haghaidh bia a chur ar an margadh i gcomhréir le hAirteagal 6 de Rialachán (CE) Uimh. 1829/2003. Tháinig an tÚdarás ar an gconclúid go bhfuil ráib olashíl ghéinmhodhnaithe GT73 chomh sábháilte céanna lena macasamhail thraidisiúnta i ndáil leis na héifeachtaí féideartha ar shláinte an duine, ar shláinte ainmhithe agus ar an gcomhshaol, agus go bhfuil feidhm ag na conclúidí sin freisin maidir le próitéin aonraithe síl a tháirgtear as ráib olashíl ghéinmhodhnaithe GT73 a chur ar an margadh.

(8)

Sa dá thuairim, rinne an tÚdarás breithniú ar gach ceist agus cúis imní a tharraing na Ballstáit anuas i gcomhthéacs an chomhairliúcháin leis na húdaráis inniúla náisiúnta dá bhforáiltear in Airteagal 6(4) agus Airteagal 18(4) de Rialachán (CE) Uimh. 1829/2003.

(9)

Agus na gnéithe sin á gcur san áireamh, maidir leis an údarú ar na táirgí a chumhdaítear le Cinneadh Cur Chun Feidhme (AE) 2015/701 a chur ar an margadh, ba cheart an t-údarú sin a athnuachan, agus maidir le próitéin aonraithe síl ó ráib olashíl ghéinmhodhnaithe GT73 le haghaidh bia, ba cheart údarú a thabhairt í a chur ar an margadh.

(10)

An 4 Samhain 2022 d’iarr an t-iarratasóir Bayer Agriculture BV ar an gCoimisiún aon údarú cumaisc amháin a dhéanamh as úsáidí ráib olashíl ghéinmhodhnaithe GT73 arna gcumhdach leis an iarratas ar athnuachan le haghaidh bia ina bhfuil ráib olashíl ghéinmhodhnaithe GT73 nó atá comhdhéanta di nó a tháirgtear aisti, cé is moite de phróitéin aonraithe síl, agus beatha a tháirgtear as ráib olashíl ghéinmhodhnaithe GT73, an t-iarratas maidir le próitéin aonraithe síl ó ráib olashíl ghéinmhodhnaithe GT73 a chur ar an margadh, agus úsáidí na ráibe olashíl géinmhodhnaithe sin arna gcumhdach le Cinneadh Cur Chun Feidhme (AE) 2021/1385. Le litir dar dáta an 31 Eanáir 2023, chuir an Coimisiún an t-iarratasóir ar an eolas go dtiocfadh an cumasc i bhfeidhm an 19 Feabhra 2021 trí raon feidhme Chinneadh Cur Chun Feidhme (AE) 2021/1385 a leathnú chun na táirgí lena mbaineann an t-iarratas ar athnuachan agus an t-iarratas maidir le cur ar an margadh próitéine aonraithe síl ón ráib olashíl ghéinmhodhnaithe sin a chumhdach.

(11)

Ós rud é go bhfuil údar maith le hiarraidh an iarratasóra ar mhaithe le simpliú, ba cheart Cinneadh Cur Chun Feidhme (AE) 2021/1385 a leasú chun na táirgí a chumhdaítear le Cinneadh Cur Chun Feidhme (AE) 2015/701 agus próitéin aonraithe síl ó ráib olashíl ghéinmhodhnaithe GT73 le haghaidh bia a ionchorprú ina raon feidhme.

(12)

I gcomhthéacs a húdaraithe tosaigh le Cinneadh Cur Chun Feidhme 2005/635/CE ón gCoimisiún (7), sannadh aitheantóir uathúil do ráib olashíl ghéinmhodhnaithe GT73, i gcomhréir le Rialachán (CE) Uimh. 65/2004 ón gCoimisiún (8). Ba cheart leanúint den aitheantóir uathúil sin a úsáid.

(13)

De réir na dtuairimí ón Údarás, is cosúil nach gá aon cheanglas sonrach lipéadaithe maidir leis na táirgí a chumhdaítear leis an gCinneadh seo, seachas na ceanglais dá bhforáiltear in Airteagal 13(1) agus in Airteagal 25(2) de Rialachán (CE)Uimh. 1829/2003 agus in Airteagal 4(6) de Rialachán (CE) Uimh. 1830/2003 ó Pharlaimint na hEorpa agus ón gComhairle (9). Mar sin féin, chun a áirithiú go bhfanfaidh úsáid na dtáirgí sin laistigh de theorainneacha an údaraithe a dheonaítear leis an gCinneadh seo, ba cheart a léiriú go soiléir ar lipéadú na dtáirgí ina bhfuil ráib olashíl ghéinmhodhnaithe GT73 nó atá comhdhéanta di, cé is moite de bhianna agus comhábhair bhia, nach bhfuil siad ceaptha lena saothrú.

(14)

Gach faisnéis ábhartha maidir leis na táirgí a údaraítear, ba cheart í a iontráil i gclár an Chomhphobail de bhia géinmhodhnaithe agus de bheatha ghéinmhodhnaithe dá dtagraítear in Airteagal 28(1) de Rialachán (CE) Uimh. 1829/2003.

(15)

Ba cheart Cinneadh Cur Chun Feidhme (AE) 2015/701 a aisghairm.

(16)

Tá fógra le tabhairt faoin gCinneadh seo trí Theach Imréitigh na Bithshábháilteachta do na Páirtithe i bPrótacal Cartagena ar an mBithshábháilteacht a ghabhann leis an gCoinbhinsiún maidir leis an Éagsúlacht Bhitheolaíoch, de bhun Airteagal 9(1) agus Airteagal 15(2), pointe (c), de Rialachán (CE) Uimh. 1946/2003 ó Pharlaimint na hEorpa agus ón gComhairle (10).

(17)

Níor thug an Buanchoiste um Plandaí, Ainmhithe, Bia agus Beatha tuairim uaidh laistigh den teorainn ama a leag Cathaoirleach an Choiste síos. Measadh an gníomh cur chun feidhme seo a bheith riachtanach agus chuir an Cathaoirleach faoi bhráid an choiste achomhairc é le go ndéanfar tuilleadh plé ina leith. Níor thug an coiste achomhairc tuairim uaidh,

(1)

cuirtear an méid seo a leanas in ionad an teidil:

‘Cinneadh Cur Chun Feidhme (AE) 2021/1385 ón gCoimisiún an 17 Lúnasa 2021 lena n-údaraítear bia agus beatha ina bhfuil ráib olashíl ghéinmhodhnaithe GT73 (MON-ØØØ73-7), atá comhdhéanta di nó a thairgtear aisti a chur ar an margadh de bhun Rialachán (CE) Uimh. 1829/2003 ó Pharlaimint na hEorpa agus ón gComhairle’;

(2)

cuirtear an méid seo a leanas in ionad Airteagal 2:

(3)

in Airteagal 3, cuirtear an méid seo a leanas in ionad an dara mír:

‘Beidh na focail ‘níltear le saothrú’ ar an lipéad agus sna doiciméid a ghabhann leis na táirgí ina bhfuil ráib olashíl ghéinmhodhnaithe nó atá comhdhéanta di dá dtagraítear in Airteagal 1, cé is moite de tháirgí dá dtagraítear in Airteagal 2, pointe (a).’;

(4)

cuirtear an méid seo a leanas in ionad Airteagal 9:

(5)

leasaítear an Iarscríbhinn i gcomhréir leis an Iarscríbhinn a ghabhann leis an gCinneadh seo.