(1)

L-Unjoni ffirmat il-Konvenzjoni tal-Kunsill tal-Ewropa dwar il-Ħasil tal-Flus, it-Tiftix, il-Qabda u l-Konfiska ta’ Profitti minn attività Kriminali u dwar l-Iffinanzjar tat-Terroriżmu (“il-Konvenzjoni”) fit-2 ta’ April 2009. Il-Konvenzjoni ġiet iffirmata minn 25 Stat Membru, u 23 minnhom rratifikawha.

(2)

Fit-23 ta’ Novembru 2023, il-Kumitat tal-Ministri tal-Kunsill tal-Ewropa adotta t-Termini ta’ Referenza li jistabbilixxu l-Kumitat ta’ Esperti dwar l-Irkupru tal-Assi Kriminali (“it-Termini ta’ Referenza”). Il-Kumitat ta’ Esperti dwar l-Irkupru tal-Assi Kriminali għandu l-kompitu, taħt l-awtorità tal-Kumitat tal-Ministri u l-Kumitat Ewropew dwar il-Problemi tal-Kriminalità, li jħejji protokoll addizzjonali li jissupplimenta l-Konvenzjoni (“protokoll addizzjonali”). Dak ix-xogħol beda fid-29 ta’ Mejju 2024 u għandu jitlesta sa tmiem l-2025.

(3)

Skont it-Termini ta’ Referenza, il-protokoll addizzjonali huwa maħsub li jkun fih dispożizzjonijiet biex tissaħħaħ iċ-ċertezza u l-konsistenza fil-qsim tal-assi kkonfiskati bejn l-Istati Parti f’każijiet transnazzjonali, dispożizzjonijiet biex tiġi żgurata l-ġestjoni effiċjenti u effettiva tal-assi sekwestrati, ikkonfiskati u ripatrijati, inkluż l-eżekuzzjoni ta’ deċiżjonijiet ta’ konfiska, dispożizzjonijiet biex tiġi ffaċilitata l-introduzzjoni ta’ proċeduri ta’ konfiska mhux ibbażati fuq kundanna u ta’ konfiska estiża f’materji kriminali, inkluż il-kooperazzjoni fir-rigward u l-eżekuzzjoni ta’ talbiet f’każijiet transnazzjonali, u kwalunkwe kwistjoni oħra li l-Kumitat ta’ Esperti dwar l-Irkupru tal-Assi Kriminali jqis li tkun ta’ konsegwenza biex tissaħħaħ il-kooperazzjoni bejn il-Partijiet fir-rigward tal-irkupru tal-assi.

(4)

L-Unjoni diġà adottat regoli komuni li fil-biċċa l-kbira jikkoinċidu ma’ ċerti elementi li qed jiġu kkunsidrati għall-kontenut tal-protokoll addizzjonali. Dawk ir-regoli komuni jinkludu b’mod partikolari r-Regolament (UE) 2018/1805 tal-Parlament Ewropew u tal-Kunsill (1) u d-Direttiva (UE) 2024/1260 tal-Parlament Ewropew u tal-Kunsill (2), li ssostitwixxiet id-Direttiva 2014/42/UE tal-Parlament Ewropew u tal-Kunsill (3). Barra minn hekk, id-Deċiżjonijiet Kwadru tal-Kunsill 2003/577/ĠAI (4) u 2006/783/ĠAI (5) għadhom applikabbli fir-relazzjonijiet bejn ċerti Stati Membri. Dawk ir-regoli komuni tal-liġi tal-Unjoni jistgħu jiġu affettwati jew il-kamp ta’ applikazzjoni tagħhom jinbidel minħabba aspetti speċifiċi tal-protokoll addizzjonali, skont it-tifsira tal-Artikolu 3(2) tat-Trattat dwar il-Funzjonament tal-Unjoni Ewropea (TFUE).

(5)

Sabiex tiġi protetta l-integrità tal-liġi tal-Unjoni u biex tiġi żgurata l-konsistenza bejn ir-regoli tad-dritt internazzjonali u dawk tal-liġi tal-Unjoni, huwa neċessarju li l-Kummissjoni tipparteċipa fin-negozjati dwar il-protokoll addizzjonali, rigward kwistjonijiet fil-kompetenza tal-Unjoni, kif definit mit-Trattati, u li fir-rigward tagħhom l-Unjoni adottat regoli jew mistennija li tadotta regoli fil-futur qarib.

(6)

Din id-Deċiżjoni hija mingħajr preġudizzju għad-diviżjoni tal-kompetenzi bejn l-Unjoni u l-Istati Membri tagħha kif definit mit-Trattati, għall-parteċipazzjoni tal-Istati Membri fin-negozjati għal kwistjonijiet barra mill-mandat mogħti lill-Kummissjoni, jew għal kwalunkwe deċiżjoni sussegwenti għall-konklużjoni tal-protokoll addizzjonali.

(7)

Id-direttivi ta’ negozjati li jinsabu fl-addendum għal din id-Deċiżjoni huma indirizzati lill-Kummissjoni u jistgħu jiġu riveduti u żviluppati aktar jekk xieraq skont l-evoluzzjoni tan-negozjati.

(8)

Minħabba l-fatt li l-Istati Membri kollha huma wkoll Membri tal-Kunsill tal-Ewropa, jenħtieġ li l-Istati Membri li jipparteċipaw fin-negozjati dwar il-protokoll addizzjonali, f’konformità mal-prinċipju tal-kooperazzjoni leali kif imsemmi fl-Artikolu 4(3) tat-Trattat dwar l-Unjoni Ewropea (TUE), b’rispett reċiproku sħiħ, jappoġġaw lin-negozjatur tal-Unjoni fit-twettiq tal-kompiti li joħorġu mit-Trattati.F’konformità mal-prinċipju ta’ kooperazzjoni leali, il-Kummissjoni u l-Istati Membri jenħtieġ li jikkooperaw mill-qrib matul il-proċess ta’ negozjar, inkluż permezz ta’ kuntatt regolari mal-esperti tal-Istati Membri u r-rappreżentanti tagħhom fi Strasburgu.

(9)

F’konformità mal-Artikoli 1 u 2 tal-Protokoll Nru 21 dwar il-pożizzjoni tar-Renju Unit u l-Irlanda fir-rigward tal-ispazju ta’ libertà, sigurtà u ġustizzja, anness mat-TUE u mat-TFUE, u mingħajr preġudizzju għall-Artikolu 4 ta’ dak il-Protokoll, l-Irlanda mhix qed tieħu sehem fl-adozzjoni ta’ din id-Deċiżjoni u mhix marbuta biha jew soġġetta għall-applikazzjoni tagħha.

(10)

F’konformità mal-Artikoli 1 u 2 tal-Protokoll Nru 22 dwar il-pożizzjoni tad-Danimarka, anness mat-TUE u mat-TFUE, id-Danimarka mhix qed tieħu sehem fl-adozzjoni ta’ din id-Deċiżjoni u mhix marbuta biha jew soġġetta għall-applikazzjoni tagħha,