(1)

Il-Protokoll 2 għall-Ftehim bejn il-Komunità Ekonomika Ewropea u r-Renju tan-Norveġja tal-14 ta’ Mejju 1973 (3) (“il-Ftehim Bilaterali ta’ Kummerċ Ħieles bejn il-Komunità Ekonomika Ewropea u r-Renju tan-Norveġja”) u l-Protokoll 3 għall-Ftehim dwar iż-Żona Ekonomika Ewropea (“il-Ftehim ŻEE”) (4) kif emendati bid-Deċiżjoni tal-Kumitat Konġunt taż-ŻEE Nru 140/2001 tal-Kumitat Konġunt taż-ŻEE (5), jiddeterminaw l-arranġamenti kummerċjali bejn l-Unjoni u r-Renju tan-Norveġja għal ċerti prodotti agrikoli u prodotti agrikoli proċessati.

(2)

Il-Protokoll 3 tal-Ftehim taż-ŻEE jistipula dazju b’rata żero għall-ilmijiet li fihom iz-zokkor jew dolċifikant ieħor miżjud jew imħawrin, li jaqgħu taħt il-kodiċi NM 2202 10 00 , u għal xarbiet mhux alkoħoliċi oħra, li jaqgħu taħt il-kodiċi NM 2202 90 10 li ma fihomx prodotti li jaqgħu taħt l-intestaturi 0401 sa 0404 jew xaħam miksub minn prodotti li jaqgħu taħt l-intestaturi 0401 sa 0404 .

(3)

Mill-1 ta’ Jannar 2017, il-kodiċi NM 2202 90 ġie sostitwit bil-kodiċijiet NM 2202 91 00 u 2202 99 . Għalhekk, jenħtieġ li dan ir-Regolament ikopri l-prodotti tal-kodiċijiet NM 2202 10 00 , ex 2202 91 00 u ex 2202 99 .

(4)

Il-Ftehim fl-għamla ta’ Skambju ta’ ittri bejn il-Komunità Ewropea u r-Renju tan-Norveġja fuq il-Protokoll Nru 2 għall-Ftehim bilaterali dwar il-Kummerċ Ħieles bejn il-Komunità Ekonomika Ewropea u r-Renju tan-Norveġja (6) (“il-Ftehim fil-forma ta’ Skambju ta’ Ittri”) jissospendi temporanjament ir-reġim mingħajr dazju applikat skont il-Protokoll 2 għal oġġetti kklassifikati taħt il-kodiċi NM 2202 10 00 (ilmijiet minerali u ilmijiet aerati, biz-zokkor jew dolċifikant ieħor miżjud jew imħawrin) u ex 2202 90 10 (xorb ieħor mhux alkoħoliku biz-zokkor) sostitwiti bil-kodiċijiet NM ex 2202 10 00 , ex 2202 91 00 u ex 2202 99 . F’konformità mal-Ftehim fil-forma ta’ Skambju ta’ Ittri, l-importazzjonijiet ħielsa mid-dazju fuq dawk l-oġġetti, li joriġinaw min-Norveġja, jiġu permessi biss fil-limiti ta’ kwota tariffarja b’rata tad-dazju ta’ 0 %. Dazju ta’ 0,047 EUR/litru huwa applikabbli għall-kwantitajiet tal-importazzjoni li jaqbżu dik il-kwota tariffarja.

(5)

Fil-Ftehim fil-forma ta’ Skambju ta’ Ittri huwa stabbilit ukoll li jekk il-kwota tariffarja ma tkunx ġiet eżawrita sal-31 ta’ Ottubru ta’ sena partikolari, il-prodotti inkwistjoni għandhom jingħataw aċċess illimitat mingħajr dazju fl-Unjoni mill-1 ta’ Jannar sal-31 ta’ Diċembru tas-sena ta’ wara.

(6)

Il-kwota annwali għall-2024 għall-prodotti inkwistjoni miftuħa bir-Regolament ta’ Implimentazzjoni tal-Kummissjoni (UE) 2021/2169 (7) ma ġietx eżawrita sal-31 ta’ Ottubru 2024. Ir-Regolament ta’ Implimentazzjoni tal-Kummissjoni (UE) 2024/3001 (8) konsegwentement ippreveda li r-reġim tad-dazju stabbilit fil-Ftehim fil-forma ta’ Skambju ta’ Ittri ma kellux japplika għall-importazzjonijiet fl-Unjoni mill-1 ta’ Jannar sal-31 ta’ Diċembru 2025, u b’hekk l-oġġetti kkonċernati ngħataw aċċess illimitat mingħajr dazju fl-Unjoni.

(7)

Il-Ftehim fil-Forma ta’ Skambju ta’ Ittri jeħtieġ li l-kwota mingħajr dazju għall-prodotti inkwistjoni terġa’ tinfetaħ għall-2026. L-aħħar kwota annwali għal dawk il-prodotti nfetħet għall-2024 bir-Regolament ta’ Implimentazzjoni (UE) 2021/2169. Billi ma nfetħet l-ebda kwota annwali għall-2025, huwa xieraq li l-volum tal-kwota għall-2026 jiġi stabbilit fl-istess livell bħalma kien għall-2024.

(8)

Jenħtieġ li l-kwoti tariffarja tkun ġestita mill-Kummissjoni abbażi tal-ordni kronoloġika tad-dati ta’ aċċettazzjoni tad-dikjarazzjonijiet doganali għar-rilaxx għal ċirkolazzjoni libera f’konformità mar-regoli għall-ġestjoni tal-kwoti tariffarji stabbiliti fir-Regolament ta’ Implimentazzjoni tal-Kummissjoni (UE) 2015/2447 (9).

(9)

Il-miżuri previsti f’dan ir-Regolament huma konformi mal-opinjoni tal-Kumitat għall-kwistjonijiet orizzontali dwar il-kummerċ ta’ prodotti agrikoli pproċessati li mhumiex elenkati fl-Anness I tar-Regolament (UE) Nru 510/2014,