(1)

Ir-Regolament (KE) Nru 1831/2003 jipprevedi l-awtorizzazzjoni ta’ addittivi għall-użu fin-nutrizzjoni tal-annimali u għar-raġunijiet u l-proċeduri għall-għoti ta’ tali awtorizzazzjoni.

(2)

Tressqet applikazzjoni għall-modifika tat-termini ta’ awtorizzazzjoni ta’ preparat ta’ żingu-L-selenometijonina, li ġie awtorizzat bħala addittiv fin-nutrizzjoni tal-annimali bir-Regolament ta’ Implimentazzjoni tal-Kummissjoni (UE) 2019/49 (2). Dik il-modifika kienet tikkonċerna żieda fil-kontenut tas-selenju fil-preparat għal firxa ta’ bejn 2 u 46 g Se/kg

(3)

Madankollu, il-Kummissjoni tqis li din l-applikazzjoni fil-fatt tikkonċerna preparat ġdid ta’ żingu-L-selenometijonina, b’kontenut ta’ selenju fil-preparat bejn 2 u 46 g Se/kg. L-applikazzjoni kienet akkumpanjata mid-dettalji u d-dokumenti meħtieġa skont l-Artikolu 7(3) tar-Regolament (KE) Nru 1831/2003. L-applikazzjoni titlob biex il-preparat jiġi kklassifikat fil-kategorija tal-“addittivi nutrittivi” u fil-grupp funzjonali “komposti ta’ oligoelementi”.

(4)

Fl-opinjoni tagħha tal-15 ta’ Novembru 2023 (3), l-Awtorità Ewropea dwar is-Sigurtà fl-Ikel (“l-Awtorità”) ikkonkludiet li l-preparat ta’ żingu-L-selenometijonina b’kontenut minimu ta’ Se ta’ 40 g/kg huwa sikur għall-ispeċijiet kollha tal-annimali, għall-konsumaturi u għall-ambjent dment li jiġu rrispettati l-livelli massimi ta’ supplimentazzjoni tas-selenju awtorizzati fl-Unjoni (0,2 mg Se organiku/kg ta’ għalf komplet, 0,5 mg Se totali/kg ta’ għalf komplet). L-awtorità tinnota li d-data vvalutata tkopri biss firxa ta’ konċentrazzjoni limitata ta’ selenju fl-addittiv (40–46 g Se/kg). Peress li ma saret disponibbli ebda informazzjoni għal kwalunkwe preparat ieħor tal-addittiv fil-medda ta’ bejn 2 u 40 g Se/kg, l-Awtorità tirrakkomanda li jitqies preparat ġdid bl-ispeċifikazzjonijiet li ġejjin: minimu ta’ 40 g Se/kg u massimu ta’ 46 g Se/kg. L-awtorità kkonkludiet ukoll li l-preparat mhuwiex irritanti għall-għajnejn jew għall-ġilda, li joħloq riskju meta jittieħed man-nifs iżda ma setgħetx tintlaħaq konklużjoni fir-rigward tas-sensitizzazzjoni tal-ġilda. Billi l-kundizzjonijiet tal-użu tal-addittiv huma l-istess bħal dawk għall-preparat ta’ żingu-L-selenometijonina li diġà huwa awtorizzat skont ir-Regolament ta’ Implimentazzjoni (UE) 2019/49, l-Awtorità kkonkludiet ukoll li l-kompożizzjoni tal-preparat ma għandha l-ebda impatt fuq l-effikaċja tal-addittiv. Barra minn hekk, ma qisitx li hemm ħtieġa għal rekwiżiti speċifiċi ta’ sorveljanza wara t-tqegħid fis-suq.

(5)

Il-Laboratorju ta’ Referenza stabbilit bir-Regolament (KE) Nru 1831/2003 qies li l-konklużjonijiet u r-rakkomandazzjonijiet milħuqa fil-valutazzjoni preċedenti dwar il-preparat ta’ żingu-L-selenometijonina huma validi u applikabbli għall-applikazzjoni attwali. Għalhekk, f’konformità mal-Artikolu 5(4), il-punt (a), tar-Regolament tal-Kummissjoni (KE) Nru 378/2005 (4), mhuwiex meħtieġ rapport ta’ evalwazzjoni tal-Laboratorju ta’ Referenza.

(6)

Fid-dawl ta’ dan ta’ hawn fuq, il-Kummissjoni tqis li l-preparat ta’ żingu-L-selenometijonina b’minimu ta’ 40 g Se/kg ta’ addittiv u massimu ta’ 46 g Se/kg ta’ addittiv jissodisfa l-kundizzjonijiet previsti fl-Artikolu 5 tar-Regolament (KE) Nru 1831/2003. Għaldaqstant, jenħtieġ li jiġi awtorizzat l-użu ta’ dak il-preparat. Barra minn hekk, il-Kummissjoni hija tal-fehma li jenħtieġ li jittieħdu miżuri protettivi xierqa biex jiġu evitati effetti avversi fuq is-saħħa tal-utenti tal-addittiv.

(7)

Il-miżuri previsti f’dan ir-Regolament huma f’konformità mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,