(1)

F’April 2020, il-Kummissjoni Ewropea (“il-Kummissjoni”) imponiet dazju antidumping definittiv fuq l-importazzjonijiet ta’ ċerti materjali tal-fibra tal-ħġieġ minsuġa u/jew meħjuta (“GFF”) li joriġinaw mir-Repubblika tal-Poplu taċ-Ċina (“ir-RPĊ” jew “iċ-Ċina”) u mill-Eġittu bir-Regolament ta’ Implimentazzjoni tal-Kummissjoni (UE) 2020/492 (2), kif emendat bir-Regolament ta’ Implimentazzjoni (UE) 2020/776 (3). Id-dazji anti-dumping fis-seħħ ivarjaw bejn 34 % u 69 % għall-importazzjonijiet li joriġinaw mir-RPĊ, u 20 % għall-importazzjonijiet li joriġinaw mill-Eġittu. L-investigazzjoni li wasslet għal dawn id-dazji bdiet fi Frar 2019 (“l-investigazzjoni oriġinali”) (4).

(2)

Il-Kummissjoni rċeviet talba skont l-Artikoli 13(3) u 14(5) tar-Regolament bażiku biex tinvestiga ċ-ċirkomvenzjoni possibbli tal-miżuri anti-dumping imposti fuq l-importazzjonijiet ta’ GFF li joriġina miċ-Ċina u mill-Eġittu minn importazzjonijiet ta’ GFF ikkonsenjat mit-Turkija, sew jekk kinux iddikjarati li joriġinaw mit-Turkija jew le, u biex tagħmel tali importazzjonijiet soġġetti għar-reġistrazzjoni.

(3)

It-talba tressqet fit-3 ta’ Novembru 2021 minn TECH-FAB Europe e.V, assoċjazzjoni ta’ produtturi tal-Unjoni tal-GFF (“l-applikant”).

(4)

It-talba kien fiha biżżejjed evidenza ta’ bidla fix-xejra tal-kummerċ li tinvolvi esportazzjonijiet miċ-Ċina, mill-Eġittu u mit-Turkija lejn l-Unjoni li kienet seħħet wara li ġew imposti l-miżuri fuq il-GFF li joriġina miċ-Ċina u mill-Eġittu. Il-bidla fix-xejra tal-kummerċ dehret li ġejja mill-kunsinna ta’ GFF mit-Turkija lejn l-Unjoni wara li kienet għaddiet minn operazzjonijiet ta’ assemblaġġ/kompletazzjoni, b’mod partikolari minn kumpanija bl-isem ta’ Turkiz Composite Materials Technology Üretim Sanayi ve Ticaret Anonim Şirketi (minn hawn ’il quddiem “Turkiz Composite” (5)). L-evidenza indikat li tali operazzjonijiet ta’ assemblaġġ jikkostitwixxu ċirkomvenzjoni peress li l-operazzjonijiet bdew jew żdiedu sostanzjalment mill-bidu tal-investigazzjoni anti-dumping, jew eżatt qabilha, li fuqha huma bbażati d-dazji anti-dumping fuq l-importazzjonijiet tal-GFF miċ-Ċina u mill-Eġittu. Barra minn hekk, it-talba fiha biżżejjed evidenza li turi li l-partijiet miċ-Ċina u mill-Eġittu jikkostitwixxu 60 % jew aktar tal-valur totali tal-prodott assemblat, u l-valur miżjud miġjub fil-partijiet matul l-operazzjoni ta’ assemblaġġ jew ta’ kompletazzjoni huwa inqas minn 25 % tal-kost tal-manifattura.

(5)

Barra minn hekk, it-talba kien fiha biżżejjed evidenza li turi li l-prattika, il-proċess jew il-ħidma kienet qed timmina l-effetti ta’ rimedju tal-miżuri antidumping eżistenti f’termini tal-kwantità u l-prezzijiet. Jidher li daħlu volumi sinifikanti ta’ importazzjonijiet tal-prodott li qiegħed jiġi investigat fis-suq tal-UE. Barra minn hekk, kien hemm biżżejjed evidenza li saru importazzjonijiet ta’ GFF bi prezzijiet dannużi.

(6)

Fl-aħħar nett, it-talba kien fiha biżżejjed evidenza li l-GFF ikkonsenjat mit-Turkija kien esportat bi prezzijiet oġġett ta’ dumping fir-rigward tal-valur normali stabbilit qabel għall-GFF.

(7)

Il-prodott ikkonċernat huwa materjali ta’ faxex u/jew raden tal-fibra tal-ħġieġ b’filament kontinwu minsuġa u/jew meħjuta b’elementi oħrajn jew le, ħlief prodotti li huma impregnati jew impregnati minn qabel (prepreg), u minbarra materjali b’nisġa miftuħa b’ċelloli b’daqs ta’ aktar minn 1,8 mm kemm fit-tul kif ukoll fil-wisa’ u li jiżnu aktar minn 35 g/m2, ikklassifikati fid-data tad-dħul fis-seħħ tar-Regolament ta’ Implimentazzjoni (UE) 2020/492 taħt il-kodiċijiet NM ex 7019 39 00, ex 7019 40 00, ex 7019 59 00 u ex 7019 90 00 (il-kodiċijiet TARIC 7019390080, 7019400080, 7019590080 u 7019900080) u li joriġinaw mir-Repubblika tal-Poplu taċ-Ċina u mill-Eġittu (“il-prodott ikkonċernat”). Dan huwa l-prodott li l-miżuri fis-seħħ bħalissa japplikaw għalih.

(8)

Il-prodott li qiegħed jiġi investigat huwa l-istess bħal dak definit fil-premessa preċedenti, iżda kkonsenjat mit-Turkija, kemm jekk iddikjarat bħala li joriġina mit-Turkija kif ukoll jekk le (ikklassifikat fid-data tad-dħul fis-seħħ tar-Regolament ta’ Implimentazzjoni tal-Kummissjoni (UE) 2021/2230 (6) (“ir-Regolament tal-bidu”) taħt il-kodiċijiet TARIC 7019390083, 7019400083, 7019590083 u 7019900083) (“il-prodott li qed jiġi investigat”).

(9)

L-investigazzjoni wriet li l-GFF esportat miċ-Ċina u l-Eġittu lejn l-Unjoni u l-GFF ikkonsenjat mit-Turkija, sew jekk joriġina mit-Turkija kif ukoll jekk le, għandu l-istess karatteristiċi fiżiċi u kimiċi bażiċi u l-istess użi, u għaldaqstant jitqiesu bħala prodotti simili fis-sens tal-Artikolu 1(4) tar-Regolament bażiku.

(10)

Billi wara li infurmat lill-Istati Membri, iddeterminat li kienet teżisti biżżejjed evidenza għall-bidu ta’ investigazzjoni skont l-Artikolu 13(3) tar-Regolament bażiku, il-Kummissjoni bdiet investigazzjoni u għamlet l-importazzjonijiet ta’ GFF ikkonsenjat mit-Turkija, kemm jekk iddikjarat li joriġina mit-Turkija kif ukoll jekk le, soġġett għal reġistrazzjoni, bir-Regolament ta’ Implimentazzjoni (UE) 2021/2230.

(11)

LM Wind Power, manifattur tal-pali tar-riħ stabbilit fl-Unjoni, sostna li l-bidu tal-investigazzjoni ma kienx iġġustifikat minħabba nuqqas ta’ evidenza suffiċjenti, u għalhekk jenħtieġ li l-investigazzjoni tintemm minnufih.

(12)

Huwa sostna li ma seħħet l-ebda ċirkomvenzjoni peress li ma hemm l-ebda bidla fix-xejra tal-kummerċ bejn it-Turkija u l-Unjoni minn naħa, jew bejn iċ-Ċina u l-Eġittu, u l-Unjoni min-naħa l-oħra, li tkun indikattiva ta’ prattika ta’ ċirkomvenzjoni. Huwa sostna wkoll li l-prattika, il-proċess jew il-ħidma li qed iseħħu fit-Turkija ma kienu jaqgħu taħt l-ebda waħda mill-kategoriji tal-Artikolu 13(1), ir-raba’ subparagrafu, tar-Regolament bażiku. B’mod partikolari, fit-talba ma kien hemm l-ebda evidenza pożittiva li saret il-kunsinna tal-GFF li joriġina miċ-Ċina u mill-Eġittu mit-Turkija lejn l-Unjoni. Barra minn hekk, il-prattika, il-proċess jew il-ħidma ma jistgħux jiġu kkwalifikati bħala modifika żgħira, billi l-prodott li qiegħed jiġi investigat huwa prodott downstream u, bħala tali, prodott differenti mill-materjali ta’ input tiegħu (prinċipalment faxex tal-fibra tal-ħġieġ), jew operazzjoni ta’ assemblaġġ, b’mod partikolari billi l-prodott li qiegħed jiġi investigat u l-faxex tal-fibra tal-ħġieġ ma humiex ikklassifikati taħt l-istess intestaturi tariffarji.

(13)

Huwa sostna wkoll li kien hemm raġuni valida u ġustifikazzjoni ekonomika suffiċjenti skont it-tifsira tal-Artikolu 13(1) tar-Regolament bażiku għall-prattika, għall-proċess jew għall-ħidma li qed isseħħ fit-Turkija permezz tal-istabbiliment ta’ impjant tal-produzzjoni tal-GFF fit-Turkija. Kien hemm domanda sinifikanti għall-GFF fit-Turkija, xprunata l-aktar mis-settur tal-enerġija eolika fit-Turkija, bi ħtieġa ta’ madwar 20 000 – 25 000 tunnellata fl-2020. Id-domanda kienet qed tikber, u dan intwera mill-fatt li fl-2018, kumpanija Torka stabbiliet faċilità ġdida għall-produzzjoni tal-fibra tal-ħġieġ fit-Turkija b’kapaċità ta’ produzzjoni annwali addizzjonali ta’ 70 000 tunnellata. Fl-aħħar nett, huwa sostna li kien hemm ukoll domanda dejjem akbar għall-GFF fir-reġjuni ġirien, qrib it-Turkija, bħal-Lvant Nofsani u l-Afrika u li dawn il-fatti kienu jiġġustifikaw ukoll l-istabbiliment ta’ impjant tal-produzzjoni fit-Turkija.

(14)

Waslu kummenti simili mingħand manifattur Ewropew ieħor tal-pali tar-riħ stabbilit fl-Unjoni, jiġifieri Vestas Wind Systems A/S, u mingħand produttur esportatur Tork wieħed tal-GFF, jiġifieri Turkiz Composite, kumpanija li tinsab fiż-żona ħielsa Ewropea tal-ASB f’Marmara, it-Turkija.

(15)

Fir-rigward tal-ġustifikazzjoni ekonomika tal-istabbiliment tagħha fit-Turkija, Turkiz Composite sostniet ukoll li l-bord tad-diretturi tal-kumpanija omm Ċiniża tagħha ħa d-deċiżjoni li jistabbilixxi l-kumpanija fit-Turkija diġà fl-24 ta’ April 2018, jiġifieri qabel ma l-Kummissjoni bdiet l-investigazzjoni oriġinali (7), li wasslet għall-miżuri msemmija fil-premessa (1).

(16)

L-awtoritajiet Eġizzjani sostnew li l-Eġittu kien involut b’mod inġust fl-investigazzjoni attwali minħabba li ma kienet saret l-ebda prattika ta’ ċirkomvenzjoni li kienet tinvolvi lill-Eġittu. Huma sostnew ukoll, b’mod simili għal dak li qalet LM Wind Power, li kien hemm nuqqas ta’ evidenza biex tingħata prova taċ-ċirkomvenzjoni fil-forma ta’ operazzjonijiet ta’ assemblaġġ fit-Turkija li jinvolvu l-esportazzjonijiet ta’ faxex tal-fibra tal-ħġieġ mill-Eġittu jew it-trażbord bejn it-Turkija u l-Unjoni li jinvolvi l-GFF mill-Eġittu u miċ-Ċina. Barra minn hekk, l-awtoritajiet Eġizzjani sostnew li ma kien hemm l-ebda evidenza ta’ bidla fix-xejra tal-kummerċ.

(17)

L-awtoritajiet Torok enfasizzaw li hemm kapaċità installata u produzzjoni sinifikanti tal-GFF fit-Turkija u kienu tal-fehma li l-produtturi domestiċi Torok li jissodisfaw il-kundizzjonijiet rilevanti jenħtieġ li jiġu eżentati mill-estensjoni tal-miżuri.

(18)

Fl-aħħar nett, Amiblu Holding GmbH, fornitur ta’ sistemi u soluzzjonijiet tal-pajpijiet tal-plastik imsaħħa bil-fibra tal-ħġieġ fl-Unjoni sostna li huwa fl-interess tal-Unjoni li taġixxi kontra prattiki ta’ ċirkomvenzjoni li joħolqu distorsjoni fis-suq fir-rigward tal-importazzjonijiet tal-GFF minn pajjiżi terzi, inkluż it-Turkija. B’mod partikolari, huwa sostna li, peress li l-kompetituri Torok tiegħu ma humiex soġġetti għal miżuri anti-dumping u kumpensatorji fuq l-importazzjonijiet ta’ faxex tal-fibra tal-ħġieġ, il-pożizzjoni kompetittiva tal-industriji tal-Unjoni kienet affettwata. Huwa ħeġġeġ ukoll lill-Kummissjoni teżamina b’mod sistematiku l-mekkaniżmi ta’ ċirkomvenzjoni f’pajjiżi terzi, inkluża t-Turkija.

(19)

Fir-rigward tal-affermazzjonijiet li jikkonċernaw il-bidu tal-investigazzjoni, il-Kummissjoni fakkret li l-investigazzjoni nbdiet abbażi tal-evidenza pprovduta fit-talba li tikkonċerna l-kunsinna tal-GFF mit-Turkija lejn l-Unjoni wara li għadda minn operazzjonijiet ta’ assemblaġġ fit-Turkija, b’mod partikolari mill-kumpanija Turkiz Composite.

(20)

Barra minn hekk, it-talba pprovdiet biżżejjed evidenza dwar in-nuqqas ta’ ġustifikazzjoni ekonomika għajr l-impożizzjoni tad-dazji, bħar-referenza għar-rapport annwali tal-2018 ta’ China Hengshi Foundation Company Limited (12). Skont it-talba, ir-riskji operatorji identifikati mir-rapport annwali tal-2018 bl-espansjoni tal-operazzjonijiet tal-Grupp Nazzjonali taċ-Ċina dwar il-Materjali tal-Bini għat-Turkija kienu “riskji assoċjati mad-dazji anti-dumping imposti fuq il-prodotti tagħna mill-Unjoni Ewropea u l-frizzjoni kummerċjali Sino-U.S.”  (13).

(21)

Għalhekk, il-Kummissjoni ċaħdet l-affermazzjonijiet li t-talba ma kienx fiha biżżejjed evidenza biex tiġġustifika l-bidu tal-investigazzjoni. Il-Kummissjoni ħadet nota tad-dikjarazzjonijiet ta’ Amiblu Holding GmbH u tal-awtoritajiet Torok.

(22)

Il-perjodu ta’ investigazzjoni kopra l-perjodu mill-1 ta’ Jannar 2019 sat-30 ta’ Ġunju 2021 (“il-perjodu ta’ investigazzjoni” jew “PI”). Inġabret data biex il-perjodu ta’ investigazzjoni jinvestiga, fost l-oħrajn, l-allegata bidla fix-xejra tal-kummerċ wara l-impożizzjoni tal-miżuri fuq il-prodott ikkonċernat u l-eżistenza ta’ prattika, proċess jew ħidma li għalihom ma kienx hemm raġuni valida jew ġustifikazzjoni ekonomika suffiċjenti għajr l-impożizzjoni tad-dazju. Inġabret data aktar dettaljata għall-perjodu mill-1 ta’ Lulju 2020 sat-30 ta’ Ġunju 2021 (“il-perjodu ta’ rapportar” jew “PR”) sabiex jiġi eżaminat jekk l-importazzjonijiet kinux qed jimminaw l-effett ta’ rimedju tal-miżuri fis-seħħ f’termini ta’ prezzijiet u/jew kwantitajiet u l-eżistenza tad-dumping.

(23)

Il-Kummissjoni infurmat uffiċjalment lill-awtoritajiet taċ-Ċina, tal-Eġittu u tat-Turkija, lill-produtturi esportaturi magħrufa f’dawk il-pajjiżi, lill-industrija tal-Unjoni u lill-President tal-Kunsill ta’ Assoċjazzjoni UE-Turkija dwar il-bidu tal-investigazzjoni.

(24)

Barra minn hekk, il-Kummissjoni talbet lill-Missjoni tat-Turkija għall-Unjoni Ewropea tipprovdiha l-ismijiet u l-indirizzi tal-produtturi esportaturi u/jew tal-assoċjazzjonijiet rappreżentattivi li jistgħu jkunu interessati jipparteċipaw fl-investigazzjoni flimkien mal-produtturi esportaturi Torok, li kienu ġew identifikati fit-talba mill-applikant.

(25)

Formoli ta’ talba għal eżenzjoni għall-produtturi/esportaturi fit-Turkija, kwestjonarji għall-produtturi/esportaturi fiċ-Ċina u l-Eġittu, u għall-importaturi fl-Unjoni kienu saru disponibbli fuq is-sit web tad-DĠ KUMMERĊ.

(26)

Mis-sitt produtturi magħrufa fit-Turkija, erbgħa ssottomettew formoli ta’ talba għal eżenzjoni. Dawn kienu:

(27)

Barra minn hekk, sitt kumpaniji Ċiniżi u Eġizzjani, kollha relatati ma’ Turkiz Composite, issottomettew tweġibiet għall-kwestjonarju.

(28)

Barra minn hekk, il-kumpanija Ungeriża Metyx Hungary Korlátolt Felelősségű Társaság (importatur relatat tal-GFF prodott minn Telateks Tekstil Ürünleri Sanayi ve Ticaret Anonim Şirketi) u l-kumpanija Ġermaniża Saertex GmbH & Co. KG (il-kumpanija omm u l-importatur tal-GFF prodott minn Saertex Turkey Teksil Ltd. Şti.) issottomettew it-tweġibiet għall-kwestjonarju.

(29)

Il-partijiet interessati ngħataw l-opportunità li jesprimu l-fehmiet tagħhom bil-miktub u li jitolbu seduta ta’ smigħ fil-limitu ta’ żmien stipulat fir-Regolament tal-bidu. Il-partijiet kollha ġew infurmati li n-nuqqas ta’ sottomissjoni tal-informazzjoni rilevanti kollha jew is-sottomissjoni ta’ informazzjoni mhux kompluta, falza jew qarrieqa tista’ twassal għall-applikazzjoni tal-Artikolu 18 tar-Regolament bażiku u għal sejbiet li jkunu bbażati fuq il-fatti disponibbli.

(30)

Fl-4 ta’ Frar 2022 saret seduta ta’ smigħ ma’ LM Wind Power. Wara d-divulgazzjoni, fit-12 ta’ Lulju saret seduta ta’ smigħ ma’ Turkiz Composite.

(31)

F’konformità mal-Artikolu 13(1) tar-Regolament bażiku, l-elementi li ġejjin jenħtieġ li jiġu analizzati sabiex tiġi vvalutata ċ-ċirkomvenzjoni possibbli:

(32)

It-talba allegat trażbord, u b’mod partikolari l-kunsinna tal-prodott ikkonċernat mit-Turkija lejn l-Unjoni wara li jkun għadda minn operazzjonijiet ta’ assemblaġġ/kompletazzjoni fit-Turkija (ara l-premessa (4)).

(33)

Fir-rigward tat-trażbord, l-investigazzjoni ma żvelat l-ebda evidenza li wieħed mill-erba’ produtturi esportaturi li kkooperaw kien involut f’tali prattiki. Għalhekk, din l-allegazzjoni ma setgħetx tiġi kkonfermata minn din l-investigazzjoni.

(34)

Fir-rigward tal-operazzjonijiet ta’ assemblaġġ/kompletazzjoni, il-Kummissjoni analizzat speċifikament jekk il-kriterji stabbiliti fl-Artikolu 13(2) tar-Regolament bażiku ġewx issodisfati, b’mod partikolari:

(35)

Kif iddikjarat fil-premessa (26), erba’ produtturi esportaturi fit-Turkija talbu li jiġu eżentati mill-miżuri, jekk jiġu estiżi għat-Turkija. Huma kkooperaw matul il-proċediment kollu billi ppreżentaw formoli ta’ talba għal eżenzjoni u billi pprovdew tweġibiet għal ittri ta’ defiċjenza. Il-livell ta’ kooperazzjoni mill-produtturi esportaturi Torok kien għoli, peress li l-volumi tal-esportazzjoni rrapportati aggregati tagħhom tal-GFF lejn l-Unjoni fil-formoli ta’ talba għal eżenzjoni sottomessi tagħhom kienu jammontaw għall-volumi tal-importazzjoni totali Torok matul il-perjodu ta’ rapportar, kif irrapportat fl-istatistika tal-importazzjoni tal-EUROSTAT.

(36)

Il-Kummissjoni wettqet żjara ta’ verifika fil-bini tal-kompost ta’ Turkiz Composite, skont l-Artikolu 16 tar-Regolament bażiku. Għall-kuntrarju tat-tliet produtturi l-oħra li ppreżentaw ruħhom, din il-kumpanija importat kważi l-materjali ta’ input kollha tagħha u b’mod partikolari l-materjal ta’ input ewlieni kollu (100%) tagħha (faxex tal-fibra tal-ħġieġ) mill-kumpaniji relatati tagħha fiċ-Ċina u fl-Eġittu. Barra minn hekk, din il-kumpanija kienet bil-bosta l-akbar produttur esportatur Tork tal-GFF matul il-perjodu ta’ rapportar. Hija esportat aktar GFF lejn l-Unjoni mit-tliet produtturi esportaturi Torok l-oħra li kkooperaw flimkien matul il-perjodu ta’ rapportar.

(37)

It-Tabella 1 ta’ hawn taħt turi l-iżvilupp tal-importazzjonijiet tal-GFF miċ-Ċina, mill-Eġittu u mit-Turkija fil-perjodu ta’ investigazzjoni.

Tabella 1

Importazzjonijiet tal-GFF lejn l-Unjoni fil-perjodu ta’ investigazzjoni (f’tunnellati)

(38)

It-Tabella 1 turi li l-importazzjonijiet tal-GFF mit-Turkija żdiedu minn 2 334 tunnellata fl-2019 għal 8 367 tunnellata fil-perjodu ta’ rapportar. Iż-żieda sinifikanti fil-perjodu ta’ rapportar meta mqabbla mal-2019 seħħet fl-istess ħin maż-żieda fil-produzzjoni minn Turkiz Composite, li bdiet tipproduċi minn Marzu 2019 ’il quddiem.

(39)

L-importazzjonijiet ta’ GFF miċ-Ċina naqsu minn 43 460 tunnellata fl-2019 għal 33 263 tunnellata fil-perjodu ta’ rapportar, filwaqt li l-importazzjonijiet ta’ GFF mill-Eġittu naqsu minn 11 349 tunnellata fl-2019 għal 3 608 tunnellata.

(40)

It-tabella 2 hawn taħt turi l-iżvilupp tal-importazzjonijiet tal-faxex tal-fibra tal-ħġieġ miċ-Ċina u mill-Eġittu lejn it-Turkija abbażi tal-istatistika tal-importazzjoni Torka mill-bażi tad-data.

Tabella 2

Importazzjonijiet ta’ faxex tal-fibra tal-ħġieġ mill-Eġittu u ċ-Ċina lejn it-Turkija fil-perjodu ta’ investigazzjoni (f’tunnellati)

(41)

Il-materjal ewlieni tal-input għall-produzzjoni tal-GFF huwa l-faxex ta’ fibra tal-ħġieġ. Dan il-materjal ta’ input imbagħad jiġi pproċessat ulterjorment biex jiġi prodott il-GFF. L-evidenza disponibbli għall-Kummissjoni wriet li l-GFF esportat lejn l-Unjoni mit-Turkija kien prodott prinċipalment minn faxex tal-fibra tal-ħġieġ.

(42)

It-Tabella 2 turi li l-importazzjonijiet tal-faxex tal-fibra tal-ħġieġ miċ-Ċina lejn it-Turkija żdiedu sostanzjalment minn 6 996 tunnellata fl-2019 għal 19 201 tunnellata fil-perjodu ta’ rapportar. L-importazzjonijiet ta’ faxex tal-fibra tal-ħġieġ mill-Eġittu lejn it-Turkija wkoll żdiedu b’mod sinifikanti minn 9 142 tunnellata fl-2019 għal 30 149 tunnellata fil-perjodu ta’ rapportar. L-importazzjonijiet kemm miċ-Ċina kif ukoll mill-Eġittu jirrappreżentaw madwar 70 % tal-importazzjonijiet totali ta’ faxex tal-fibra tal-ħġieġ lejn it-Turkija kemm għas-sena 2020 kif ukoll għall-perjodu ta’ rapportar. Barra minn hekk, iż-żieda sinifikanti fl-importazzjonijiet tal-faxex tal-fibra tal-ħġieġ miċ-Ċina u mill-Eġittu lejn it-Turkija kkoinċidiet ukoll mal-fatt li kien biss minn Mejju 2020 li Turkiz Composite bdiet tissupplixxi lill-akbar klijent Ewropew tagħha, u dan wassal għal żieda fil-konsum tal-faxex tal-fibra tal-ħġieġ għall-produzzjoni tal-GFF.

(43)

Turkiz Composite ssottomettiet li l-faxex tal-fibra tal-ħġieġ li kienet użat biex tipproduċi l-GFF kienu nxtraw kollha miċ-Ċina u mill-Eġittu, b’mod partikolari mill-kumpaniji relatati tagħha fiċ-Ċina u fl-Eġittu. Hija importat dawn il-faxex taħt il-kodiċi SA 7019 12. L-importazzjonijiet taħt dan il-kodiċi wrew l-aktar żieda sinifikanti fl-importazzjonijiet miċ-Ċina u mill-Eġittu lejn it-Turkija.

(44)

Iż-żieda sinifikanti fil-volumi ta’ importazzjonijiet ta’ faxex tal-fibra tal-ħġieġ miċ-Ċina u mill-Eġittu lejn it-Turkija, indikat żieda fid-domanda għal tali materjali ta’ input fit-Turkija, li tista’, tal-inqas parzjalment, tiġi spjegata miż-żieda fil-produzzjoni u fl-esportazzjonijiet tal-GFF mit-Turkija matul il-perjodu ta’ rapportar. Dan kien ikkorroborat ukoll mill-informazzjoni pprovduta mingħand Turkiz Composite.

(45)

Iż-żieda fl-esportazzjonijiet tal-GFF mit-Turkija lejn l-Unjoni minn naħa, u t-tnaqqis fl-esportazzjonijiet tal-GFF miċ-Ċina u mill-Eġittu lejn l-Unjoni min-naħa l-oħra, jikkostitwixxi bidla fix-xejra tal-kummerċ bejn it-Turkija u l-Unjoni skont it-tifsira tal-Artikolu 13(1) tar-Regolament bażiku, flimkien maż-żieda sinifikanti matul il-perjodu ta’ rapportar meta mqabbel mal-2019 ta’ esportazzjonijiet Ċiniżi u Eġizzjani ta’ faxex tal-fibra tal-ħġieġ lejn it-Turkija kif muri fit-Tabella 2.

(46)

Turkiz Composite sostniet li kien hemm raġuni valida u ġustifikazzjoni ekonomika għall-istabbiliment tagħha. Hija sostniet li l-istabbiliment tagħha fit-Turkija kien dovut għad-domanda sinifikanti għall-GFF fit-Turkija u għad-domanda akbar għall-GFF fil-pajjiżi ġirien tat-Turkija, minbarra l-UE (prinċipalment l-Eġittu, il-Ġordan, l-Iran u sa ċertu punt l-Arabja Sawdija), kif ukoll minħabba d-domanda sinifikanti u dejjem akbar għall-faxex tal-fibra tal-ħġieġ fit-Turkija.

(47)

L-investigazzjoni żvelat li Turkiz Composite kienet iddeċidiet li tistabbilixxi kumpanija fit-Turkija qabel il-bidu tal-investigazzjoni oriġinali. Din ġiet stabbilita fl-1 ta’ Ġunju 2018, iżda bdiet tipproduċi biss f’Marzu 2019, peress li kienet għadha trid issib bini, u tixtri, iċċaqlaq, tinstalla u tittestja l-magni tal-GFF kollha tagħha. Id-data tal-bidu tal-produzzjoni ħabtet mad-data tal-bidu tal-investigazzjoni oriġinali dwar l-importazzjonijiet tal-GFF miċ-Ċina u mill-Eġittu.

(48)

Barra minn hekk, l-Artikolu 13(1) tar-Regolament bażiku jistabbilixxi rabta bejn il-prattika, il-proċess jew il-ħidma inkwistjoni u l-bidla fix-xejra tal-kummerċ peress li dan tal-aħħar irid “jirriżulta” minn tal-ewwel. Għalhekk hija l-prattika, il-proċess jew il-ħidma li twassal għall-bidla fix-xejra tal-kummerċ, li jeħtieġ li jkollha raġuni valida jew ġustifikazzjoni ekonomika suffiċjenti għajr l-impożizzjoni tad-dazju, sabiex ma titqiesx bħala ċirkomvenzjoni skont it-tifsira tal-Artikolu 13(1) tar-Regolament bażiku.

(49)

Fid-dawl ta’ dak li ntqal hawn fuq, l-argument li l-kumpanija ġiet stabbilita biex taqdi s-swieq domestiċi, Afrikani u tal-Lvant Nofsani huwa immaterjali, peress li ma huwiex l-istabbiliment tal-kumpanija li hija l-prattika, il-proċess jew il-ħidma li jwasslu għall-bidla fix-xejra tal-kummerċ. Il-prattika li minnha tirriżulta dik il-bidla hija l-operazzjonijiet ta’ assemblaġġ/kompletazzjoni fit-Turkija li wasslu għal żieda sinifikanti fl-esportazzjonijiet tal-GFF (il-prodott assemblat) lejn l-Unjoni. Il-bejgħ tal-esportazzjoni tal-GFF ta’ Turkiz Composite lejn l-Unjoni żdied sostanzjalment meta bdiet iżżid gradwalment il-provvista tagħha lill-akbar klijent Ewropew tagħha minn Mejju 2020 ’il quddiem (ara l-premessa (42)), li ħabat mad-data tal-impożizzjoni tal-miżuri oriġinali (ara l-premessa (1)).

(50)

Barra minn hekk, il-fatt li kumpanija li allegatament ġiet stabbilita biex taqdi s-swieq domestiċi u Afrikani u tal-Lvant Nofsani, wara l-bidu tal-każ anti-dumping fil-fatt taqdi s-suq domestiku u tal-Unjoni minflok (14) jissuġġerixxi ulterjorment li l-attivitajiet ta’ assemblaġġ tagħha ġew żviluppati b’reazzjoni għall-investigazzjoni u mbagħad żdiedu aktar b’reazzjoni għall-impożizzjoni tad-dazji.

(51)

Wara d-divulgazzjoni, Turkiz Composite u LM Wind Power sostnew li r-raġunament tal-Kummissjoni ma rrispettax pass fl-analiżi legali tagħha dwar il-ġustifikazzjoni ekonomika peress li naqset milli tivvaluta jekk kienx hemm ġustifikazzjoni ekonomika jew raġuni valida suffiċjenti għall-prattika, għall-proċess jew għall-ħidma. Huma sostnew ukoll li l-Kummissjoni applikat it-test temporali ħażin, peress li naqset milli tirrikonoxxi li l-“impożizzjoni tad-dazji” – u mhux il-ftuħ ta’ investigazzjoni – trid tkun ir-raġuni għall-prattika, il-proċess jew il-ħidma. Fl-aħħar nett, huma sostnew li, kieku l-Kummissjoni applikat it-testijiet legali korretti, hija kienet tikkonkludi li kien hemm raġuni valida suffiċjenti u ġustifikazzjoni ekonomika għall-istabbiliment ta’ Turkiz Composite. Huma sostnew li r-raġuni ewlenija għall-istabbiliment tal-impjant Tork kienet li jaqdi s-suq domestiku Tork.

(52)

Il-Kummissjoni ċaħdet dawn l-affermazzjonijiet. L-ewwel nett, il-Kummissjoni ma naqsitx milli tivvaluta jekk kienx hemm ġustifikazzjoni ekonomika jew raġuni valida suffiċjenti għall-prattika, għall-proċess jew għall-ħidma. Din il-valutazzjoni saret, kif spjegat b’mod espliċitu fil-premessi (48) u (49) hawn fuq. Il-Kummissjoni identifikat b’mod ċar il-prattika, il-proċess jew il-ħidma li wasslu għall-bidla fix-xejra tal-kummerċ u mbagħad analizzat il-ġustifikazzjonijiet potenzjali għal dik il-prattika. Għall-kuntrarju ta’ dak li sostnew il-partijiet interessati, u kif spjegat fil-premessa (49), ma huwiex l-istabbiliment ta’ Turkiz Composite, jew il-bejgħ domestiku tagħha, li huma l-prattika, il-proċess jew il-ħidma inkwistjoni, peress li l-bidla fix-xejra tal-kummerċ, diskussa fil-punt 2.3 hawn fuq, ma tirriżultax minnhom.

(53)

It-tieni, il-Kummissjoni ma applikatx it-test temporali ħażin. Fil-premessa (47) hija rreferiet għall-fatt li d-data tal-bidu tal-produzzjoni ħabtet mad-data tal-bidu tal-investigazzjoni oriġinali. Din is-sejba, li kienet ibbażata fuq informazzjoni vverifikata pprovduta mingħand Turkiz Composite, kienet legalment rilevanti, peress li waħda mill-kundizzjonijiet tal-Artikolu 13(2) tar-Regolament bażiku hija, kif imsemmi wkoll fil-premessa (34) hawn fuq, li “... l-operazzjoni bdiet jew żdiedet sostanzjalment mill-bidu tal-investigazzjoni kontra dumping, jew eżatt qabilha ...”. L-Artikolu 13(1) tar-Regolament bażiku jiddefinixxi ċ-ċirkomvenzjoni u għalhekk jiffoka fuq l-impożizzjoni tad-dazju, peress li mingħajr ma jiġi impost dazju ma jistax ikun hemm ċirkomvenzjoni. Dan ma jipprekludix li l-bidu ta’ prattika, proċess jew ħidma wara l-bidu ta’ investigazzjoni jitqies bħala evidenza li d-dazju impost sussegwentement (u raġonevolment mistenni) kien il-ġustifikazzjoni għall-prattika inkwistjoni. Il-qari tal-Artikolu 13(1) propost mill-parti interessata mhux biss ikun inkompatibbli mal-lingwaġġ tal-Artikolu 13(2), ikkwotat hawn fuq, iżda effettivament ineħħi l-prattiki ta’ ċirkomvenzjoni li jibdew bejn il-bidu ta’ investigazzjoni u l-impożizzjoni tad-dazji mill-kamp ta’ applikazzjoni tal-Artikolu 13(1). Dan imur kontra l-iskop proprju tal-Artikolu 13 tar-Regolament bażiku, kif definit mill-Qorti (15).

(54)

Fir-rigward tal-affermazzjoni li r-raġuni ewlenija għall-istabbiliment tal-impjant Tork kienet li jaqdi s-suq domestiku Tork, il-Kummissjoni nnotat li Turkiz Composite biddlet kemxejn ir-raġunament tagħha matul dan il-proċediment, peress li qabel id-divulgazzjoni, il-kumpanija sostniet li r-raġuni kienet li taqdi s-swieq domestiċi, Afrikani u tal-Lvant Nofsani. Kif imsemmi fil-premessa (50), Turkiz Composite serviet is-suq domestiku u tal-Unjoni matul il-perjodu ta’ investigazzjoni. Fi kwalunkwe każ, l-operazzjonijiet ta’ Turkiz Composite żdiedu sostanzjalment matul il-perjodu ta’ investigazzjoni kif muri mis-sejbiet li ġejjin:

(55)

Fid-dawl ta’ dan ta’ hawn fuq, l-investigazzjoni ma żvelat l-ebda raġuni valida jew ġustifikazzjoni ekonomika suffiċjenti għaż-żieda sinifikanti fl-esportazzjonijiet minn Turkiz Composite tal-prodott assemblat lejn l-Unjoni, għajr li jiġi evitat il-ħlas tad-dazji anti-dumping attwalment fis-seħħ.

(56)

L-Artikolu 13(2)(a) tar-Regolament bażiku jirrikjedi li l-operazzjoni ta’ assemblaġġ jew ta’ kompletazzjoni tkun bdiet jew żdiedet sostanzjalment mill-bidu tal-investigazzjoni anti-dumping, jew eżatt qabilha, filwaqt li l-partijiet ikkonċernati jkunu ġejjin prinċipalment mill-pajjiżi soġġetti għal miżuri anti-dumping.

(57)

L-investigazzjoni oriġinali bdiet fil-21 ta’ Frar 2019 u d-dazji anti-dumping definittivi ġew imposti fl-1 ta’ April 2020. Turkiz Composite ġiet stabbilita uffiċjalment fl-1 ta’ Ġunju 2018 u bdiet il-produzzjoni minn Marzu 2019 ’il quddiem. Għalhekk, id-data tal-bidu tal-produzzjoni taħbat mad-data tal-bidu tal-investigazzjoni oriġinali dwar l-importazzjonijiet tal-GFF miċ-Ċina u l-Eġittu (ara n-nota 7 f’qiegħ il-paġna).

(58)

Barra minn hekk, Turkiz Composite żiedet b’mod sostanzjali l-bejgħ tal-esportazzjoni tagħha matul il-perjodu ta’ investigazzjoni, u kważi l-materjali ta’ input kollha (100%) tagħha u b’mod partikolari l-materjal ta’ input ewlieni kollu tagħha (faxex tal-fibra tal-ħġieġ) inxtraw mill-kumpaniji relatati tagħha fiċ-Ċina u fl-Eġittu.

(59)

Għalhekk, il-Kummissjoni kkonkludiet li l-operazzjoni ta’ assemblaġġ jew ta’ kompletazzjoni bdiet mill-bidu tal-investigazzjoni oriġinali, kif meħtieġ mill-Artikolu 13(2)(a) tar-Regolament bażiku.

(60)

L-Artikolu 13(2)(b) tar-Regolament bażiku jiddikjara li, f’dak li għandu x’jaqsam mal-operazzjonijiet ta’ assemblaġġ, kundizzjoni oħra biex tiġi stabbilita ċ-ċirkomvenzjoni hija li l-partijiet mill-pajjiżi soġġetti għall-miżuri jikkostitwixxu 60 % jew aktar tal-valur totali tal-partijiet tal-prodott assemblat u li l-valur miżjud tal-partijiet miġjuba, matul l-operazzjoni ta’ assemblaġġ jew ta’ kompletazzjoni, ikun inqas minn 25 % tal-kost tal-manifattura.

(61)

Il-materjal ewlieni tal-input għall-produzzjoni tal-GFF huwa l-faxex ta’ fibra tal-ħġieġ. Turkiz Composite xtrat il-faxex tal-fibra tal-ħġieġ kollha (100%) li kienet tuża minn kumpaniji relatati fiċ-Ċina u fl-Eġittu. Permezz tal-proċess ta’ nsiġ li jsir, li hija operazzjoni ta’ kompletazzjoni fit-Turkija, dawn il-faxex tal-fibra tal-ħġieġ ġew trasformati f’GFF. Skont l-informazzjoni sottomessa u vverifikata minn Turkiz Composite, il-materjal ewlieni ta’ input, jiġifieri l-faxex tal-fibra tal-ħġieġ, jikkostitwixxu kważi 100 % tal-valur totali tal-partijiet tal-prodott assemblat/lest fis-sens tal-Artikolu 13(2)(b) tar-Regolament bażiku.

(62)

Wara d-divulgazzjoni, Turkiz Composite u LM Wind Power tennew l-affermazzjoni tagħhom li l-manifattura tal-GFF mill-faxex tal-fibra tal-ħġieġ ta’ materja prima ewlenija importati ma tikkostitwix “l-assemblaġġ ta’ partijiet minn operazzjoni tal-assemblaġġ” skont it-tifsira tal-Artikolu 13(2) tar-Regolament bażiku u li l-faxex tal-fibra tal-ħġieġ ma humiex partijiet iżda pjuttost materjali skont it-tifsira tan-Nota ta’ Spjegazzjoni (VII) tar-Regola Ġenerali 2(a), it-tieni parti, għall-interpretazzjoni tas-Sistema Armonizzata, sakemm il-partijiet li jkunu qed jiġu assemblati “ma jista’ jsirulhom ebda operazzjoni ta’ ħidma tali li tikkompleta l-manifattura tagħhom”. F’dan il-kuntest, huma affermaw li l-faxex tal-fibra tal-ħġieġ ma humiex “partijiet” tal-GFF u ma humiex “assemblati” fil-GFF, iżda jiġu pproċessati biex isiru GFF permezz tan-newl u l-ħjata ta’ diversi tipi ta’ faxex tal-fibra tal-ħġieġ kif ukoll materjali oħra, permezz ta’ makkinarju kumpless. Waslu wkoll kummenti simili mill-awtoritajiet Eġizzjani.

(63)

Il-Kummissjoni ċaħdet dawn l-affermazzjonijiet. Il-prattika deskritta fil-premessa (60) hawn fuq tista’ tiġi kkaratterizzata bħala operazzjoni ta’ kompletazzjoni li taqa’ taħt il-kunċett ta’ operazzjonijiet ta’ assemblaġġ skont l-Artikolu 13(2) tar-Regolament bażiku, kif spjegat fil-premessa (34) hawn fuq. Barra minn hekk, tqiesu elementi oħra, kif spjegat hawn taħt.

(64)

L-ewwel nett, ir-referenza għan-Nota ta’ Spjegazzjoni (VII) tat-tieni parti tar-Regola Ġenerali 2(a) għall-interpretazzjoni tas-Sistema Armonizzata hija irrilevanti peress li l-bażi ġuridika diretta hija l-Artikolu 13 tar-Regolament bażiku u mhux il-liġi doganali, kif iċċarat b’mod espliċitu mill-Qorti tal-Ġustizzja (16).

(65)

It-tieni, fl-interpretazzjoni tal-Artikolu 13(2) tar-Regolament bażiku, il-Qorti tal-Ġustizzja bdiet billi fakkret li “skont ġuriżprudenza stabbilita, fl-interpretazzjoni ta’ dispożizzjoni tad-dritt tal-Unjoni, jeħtieġ li ma titqiesx biss il-formulazzjoni tagħha, iżda wkoll il-kuntest li fih is seħħ u l-objettivi segwiti mir-regoli li hija parti minnhom” (17). Ir-Regolament bażiku ma jiddefinixxix it-termini “operazzjoni ta’ assemblaġġ” jew “operazzjoni ta’ kompletazzjoni”. Madankollu, il-mod kif inhu mfassal l-Artikolu 13(2) tar-Regolament bażiku jiffavorixxi interpretazzjoni tat-terminu “operazzjoni ta’ assemblaġġ” peress li, skont l-Artikolu 13(2)(b), dan huwa maħsub ukoll biex jinkorpora espliċitament “operazzjoni ta’ kompletazzjoni”. Minn dan isegwi li “operazzjoni ta’ assemblaġġ” skont it-tifsira tal-Artikolu 13(2) hija maħsuba biex tkopri mhux biss operazzjonijiet li jikkonsistu fl-assemblaġġ ta’ partijiet ta’ oġġett kompost, iżda tista’ tinvolvi wkoll ipproċessar ulterjuri, jiġifieri t-tlestija ta’ prodott.

(66)

Barra minn hekk, skont il-Qorti (18), l-għan tal-investigazzjonijiet imwettqa f’konformità mal-Artikolu 13 tar-Regolament bażiku huwa li tiġi żgurata l-effettività tad-dazji anti-dumping u li tiġi evitata ċ-ċirkomvenzjoni tagħhom. Konsegwentement, l-għan tal-Artikolu 13(2) tar-Regolament bażiku huwa li jiġu identifikati l-prattiki, il-proċessi jew il-ħidma li jużaw fil-biċċa l-kbira partijiet mill-pajjiż li huwa soġġett għall-miżuri u li jarmahom jew ilestihom billi jżid valur limitat għal dawn il-partijiet.

(67)

Wara d-divulgazzjoni, Turkiz Composite, LM Wind Power u l-awtoritajiet Eġizzjani ma qablux mal-approċċ tal-Kummissjoni li tikkumula l-valur tal-faxex tal-fibra tal-ħġieġ mill-Eġittu mal-valur tal-faxex tal-fibra tal-ħġieġ miċ-Ċina biex jiġi ddeterminat jekk il-valur tal-fibri tal-ħġieġ kienx jikkostitwixxi 60 % jew aktar tal-valur totali tal-“partijiet” allegati tal-GFF. Huma rrimarkaw l-użu tal-formulazzjoni “partijiet mill-pajjiż soġġett għall-miżuri” (fis-singular) fl-Artikolu 13(2)(b) tar-Regolament bażiku.

(68)

Il-Kummissjoni ma laqgħetx din l-affermazzjoni għar-raġunijiet li ġejjin. L-ewwel nett, kif imsemmi fil-premessa (1), fl-investigazzjoni oriġinali l-importazzjonijiet tal-GFF miċ-Ċina u mill-Eġittu ġew ivvalutati b’mod kumulattiv. Għalhekk, kien xieraq li tiġi applikata l-istess metodoloġija f’din l-investigazzjoni kontra ċ-ċirkomvenzjoni bil-għan li jiġu estiżi l-miżuri oriġinali.

(69)

It-tieni, l-Artikolu 13 tar-Regolament bażiku ma jipprekludix lill-Kummissjoni milli tagħmel tali analiżi kumulattiva biex tivverifika jekk il-kriterju ta’ 60 % stabbilit fl-Artikolu 13(2)(b) tar-Regolament bażiku ġiex issodisfat. Pjuttost il-kuntrarju, l-interpretazzjoni tal-formulazzjoni tal-Artikolu 13(2) tar-Regolament bażiku “pajjiż soġġett għal miżuri” b’mod li ma jippermettix l-akkumulazzjoni tal-valur tal-partijiet meta l-attivitajiet ta’ ċirkomvenzjoni jseħħu f’aktar minn pajjiż wieħed, huwa kkontestat mill-ġurisprudenza eżistenti tal-UE. F’Kolachi, il-Qorti tal-Ġustizzja indirizzat prattika speċjali ta’ attivitajiet ta’ ċirkomvenzjoni (f’każ fejn il-partijiet tar-roti ġew assemblati parzjalment għall-ewwel darba fis-Sri Lanka u mbagħad immuntati aktar fil-Pakistan) u kkonfermat li din il-prattika ta’ attivitajiet ta’ ċirkomvenzjoni kienet koperta mill-Artikolu 13(2) tar-Regolament bażiku, minkejja l-użu ta’ lingwaġġ fis-singular f’dik id-dispożizzjoni. Il-Qorti tal-Ġustizzja (19) enfasizzat ukoll li kwalunkwe interpretazzjoni oħra tippermetti lill-produtturi esportaturi jimminaw l-effettività tal-miżuri kontra ċ-ċirkomvenzjoni skont l-Artikolu 13 tar-Regolament bażiku. Għalhekk, l-istess raġunament japplika għat-tentattivi biex tiġi evitata l-applikazzjoni tar-regoli kontra ċ-ċirkomvenzjoni billi tinkiseb materja prima minn żewġ pajjiżi li t-tnejn huma soġġetti għal miżuri.

(70)

It-tielet, skont ir-raġunament ta’ Turkiz Composite, fil-każ li 50 % tal-materjali tal-input jiġu akkwistati miċ-Ċina u l-50 % l-oħra jiġu akkwistati mill-Eġittu, ma sseħħ l-ebda ċirkomvenzjoni f’sitwazzjoni fejn il-partijiet kollha (100%) jiġu akkwistati minn pajjiżi soġġetti għal miżuri. Tali eżitu jmur b’mod ċar kontra l-iskop tal-Artikolu 13(2), filwaqt li jitqies ukoll li l-GFF kollu esportat lejn l-Unjoni kien jikkonsisti jew minn partijiet miksuba kollha kemm huma (100%) fiċ-Ċina, jew minn partijiet miksuba kollha kemm huma (100%) fl-Eġittu.

(71)

Għalhekk, il-Kummissjoni kkonkludiet li l-kriterju ta’ 60 % stabbilit fl-Artikolu 13(2)(b) tar-Regolament bażiku ġie ssodisfat.

(72)

Turkiz Composite sostniet li l-kost tal-valur miżjud tagħha jkun ogħla mil-livell limitu ta’ 25 % tal-kost totali tal-manifattura. L-entrati ewlenin fil-kalkolu tal-valur miżjud kienu jinkludu l-kost tad-deprezzament, il-kost tal-kiri, il-kost tal-materjal tal-imballaġġ, il-kost tax-xogħol dirett u indirett, u kostijiet indiretti oħra tal-manifattura, li kienu parti mid-data finanzjarja tal-perjodu ta’ rapportar sottomessa minn Turkiz Composite fil-formola tat-talba għal eżenzjoni tagħha.

(73)

Il-Kummissjoni analizzat dawn l-entrati ta’ kostijiet kollha u vvalutat li xi spejjeż imġarrba ma setgħux jiġu kklassifikati bħala parti mill-kost tal-manifattura jew kienu ġew stmati żżejjed:

(74)

Fid-dawl ta’ dan ta’ hawn fuq, il-valur miżjud mal-partijiet miġjuba, kif ikkalkulat mill-Kummissjoni, kien ferm aktar baxx minn dak ikkalkolat minn Turkiz Composite.

(75)

Barra minn hekk, Turkiz Composite kisbet kważi l-materjali ta’ input kollha tagħha u b’mod partikolari l-materjal ta’ input ewlieni kollu tagħha (100%) (faxex tal-fibra tal-ħġieġ) mingħand kumpaniji relatati fiċ-Ċina u fl-Eġittu. Ma ġiet ippreżentata l-ebda evidenza pożittiva minn Turkiz Composite li turi li dawn il-prezzijiet kienu distakkati u li ma kinux affettwati mir-relazzjoni aktar milli mill-prezzijiet ta’ trasferiment bejn kumpaniji relatati. Il-Kummissjoni sabet, min-naħa l-oħra, li dawn il-prezzijiet kienu ferm aktar baxxi mill-prezzijiet imħallsa mit-tliet produtturi esportaturi Torok l-oħra li kkooperaw lil fornituri mhux relatati matul il-perjodu ta’ rapportar.

(76)

Għalhekk, sabiex wieħed jasal għal sejba raġonevolment akkurata, il-prezzijiet imħallsa minn Turkiz Composite tqiesu bħala prezzijiet ta’ trasferiment bejn il-kumpaniji u ġew issostitwiti bil-prezzijiet medji ponderati mħallsa mit-tliet produtturi esportaturi l-oħra li kkooperaw.

(77)

Wara d-divulgazzjoni, Turkiz Composite u LM Wind Power allegaw li l-Kummissjoni ma setgħetx tissostitwixxi l-prezzijiet ta’ trasferiment bil-prezzijiet medji ponderati mħallsa mit-tliet produtturi esportaturi Torok l-oħra lill-fornituri mhux relatati tagħhom matul il-perjodu ta’ rapportar. Huma allegaw li approċċ bħal dan ma kienx permess, u qiesu li ma kien hemm l-ebda bażi ġuridika biex jiġi applikat l-Artikolu 2(5) tar-Regolament bażiku b’analoġija. Iż-żewġ partijiet sostnew ukoll li l-Kummissjoni naqset milli twettaq b’mod korrett it-test ta’ distakkament, u li l-Kummissjoni ma żguratx li l-prezzijiet imqabbla kienu komparabbli f’termini ta’ kwantità u li ġew inklużi l-elementi kollha tal-prezz.

(78)

Il-Kummissjoni ma laqgħetx dawn l-affermazzjonijiet għar-raġunijiet li ġejjin. L-ewwel nett, fid-dokument ta’ divulgazzjoni ġenerali tagħha, il-Kummissjoni ma għamlitx referenza għall-Artikolu 2(5) tar-Regolament bażiku bħala l-bażi ġuridika għal dan l-aġġustament. Sabiex tiddetermina l-valur tal-partijiet miġjuba mill-pajjiżi soġġetti għall-miżuri, il-Kummissjoni qieset il-lingwaġġ u l-iskop tal-Artikolu 13(2)(b) tar-Regolament bażiku. Il-formulazzjoni tal-Artikolu 13(2)(b) ma timpedixxix lill-Kummissjoni b’xi mod milli twettaq ċerti aġġustamenti bil-għan li tiddetermina l-valur tal-partijiet, b’mod partikolari f’każ li l-kostijiet ta’ kumpanija ma jirriflettux neċessarjament il-valur tal-partijiet, li jista’ jkun il-każ meta l-partijiet jinxtraw minn kumpaniji relatati. Sabiex jiġi ddeterminat il-valur tal-partijiet, il-Kummissjoni, għalhekk, tħalliet tagħmel l-aġġustamenti meħtieġa, inkluża s-sostituzzjoni tal-prezzijiet ta’ trasferiment bejn il-kumpaniji relatati peress li nstab li dawn il-prezzijiet ma kinux f’termini distakkati. Approċċ bħal dan huwa konformi wkoll mal-iskop tal-Artikolu 13 u l-investigazzjonijiet li jirregola, diskussi fil-premessa (65), peress li jipprevjeni lill-kumpaniji involuti f’ċirkomvenzjoni milli jissottovalutaw il-partijiet miġjuba sabiex jistmaw aktar milli suppost il-valur miżjud ma’ dawn il-partijiet.

(79)

It-tieni, fir-rigward tal-allegazzjoni li l-Kummissjoni naqset milli twettaq b’mod korrett it-test ta’ distakkament, jenħtieġ li jiġi mfakkar li Turkiz Composite tagħmel parti mill-Grupp Nazzjonali taċ-Ċina dwar il-Materjali tal-Bini, li huwa Grupp tal-Istat Ċiniż. Il-kumpaniji relatati Ċiniżi u Eġizzjani tagħha huma soġġetti għal miżuri. L-investigazzjoni żvelat li l-prezzijiet tal-faxex tal-fibra tal-ħġieġ mixtrija minn Turkiz Composite mingħand i-kumpaniji relatati tagħha Eġizzjani u Ċiniżi kienu ferm aktar baxxi mill-prezzijiet imħallsa mit-tliet produtturi esportaturi Torok l-oħrajn. Għalhekk, hija qabblet u sussegwentement issostitwiet il-prezzijiet ta’ bejn il-kumpaniji bil-prezzijiet medji ponderati imħallsa mit-tliet produtturi esportaturi Torok l-oħra lill-fornituri mhux relatati tagħhom matul il-perjodu ta’ rapportar.

(80)

Il-Kummissjoni żgurat li l-prezzijiet imqabbla kienu komparabbli f’termini ta’ kwantità u li ġew inklużi l-elementi kollha tal-prezzijiet. L-ewwel nett, intuża l-istess perjodu biex isir it-tqabbil, jiġifieri l-perjodu ta’ rapportar. It-tieni, il-kwantità tal-faxex tal-fibra tal-ħġieġ mixtrija matul il-perjodu ta’ rapportar mit-tliet produtturi esportaturi Torok l-oħra minn fornituri mhux relatati kienet kbira biżżejjed (bejn 10 000 u 25 000 tunnellata) u, għaldaqstant, rappreżentattiva biex tintuża bħala prezzijiet affidabbli għas-sostituzzjoni tal-prezzijiet ta’ trasferiment ta’ Turkiz Composite sabiex jiġi ddeterminat il-valur miżjud b’mod korrett. It-tielet, it-tliet produtturi esportaturi Torok l-oħra li kkooperaw, ipproduċew il-GFF bl-istess mod bħal Turkiz Composite, billi bdew bil-faxex tal-fibra tal-ħġieġ. L-investigazzjoni ma żvelat l-ebda differenza fil-kwalità, peress li l-proċess tal-produzzjoni huwa simili għall-erba’ produtturi esportaturi Torok li kkooperaw. Ir-raba’, il-produtturi esportaturi Torok l-oħrajn xtraw kwantitajiet kbar ta’ faxex tal-fibra tal-ħġieġ domestikament, filwaqt li Turkiz Composite xtrat esklużivament faxex tal-fibra tal-ħġieġ mill-Eġittu u miċ-Ċina. Ix-xiri ta’ kwantitajiet rappreżentattivi domestikament normalment iwassal għal prezzijiet aktar baxxi milli prezzijiet ogħla. Il-ħames, it-tqabbil bejn l-erba’ produtturi esportaturi Torok sar fuq bażi konsistenti, jiġifieri fuq il-bażi tal-kost totali tax-xiri, kif ippreżentat fit-tabelli vverifikati tagħhom.

(81)

Wara d-divulgazzjoni, Turkiz Composite affermat li l-prezz tax-xiri tagħha mill-kumpaniji relatati Ċiniżi tagħha kien ogħla mill-prezzijiet tal-bejgħ tal-kumpaniji relatati tagħha lil klijenti mhux relatati fit-Turkija. Għalhekk, hija sostniet li x-xiri ta’ Turkiz Composite jenħtieġ li jitqies f’termini ta’ distakkament.

(82)

Il-Kummissjoni ċaħdet din l-affermazzjoni. Abbażi tat-tabelli sottomessi C.3 R u C.3.U tat-tweġiba għall-kwestjonarju ta’ Jushi Group Co., Ltd. (“Jushi Group (21)”), il-prezz medju tal-bejgħ ta’ unità tagħha ta’ faxex tal-fibra tal-ħġieġ matul il-perjodu ta’ rapportar lill-klijenti mhux relatati tagħha fit-Turkija kien ogħla b’mod sinifikanti milli għall-klijent relatat tagħha fit-Turkija, jiġifieri lil Turkiz Composite. Il-Kummissjoni analizzat ukoll il-prezzijiet ta’ kumpanija Ċiniża relatata oħra ta’ Turkiz Composite, jiġifieri Tongxiang Hengxian Trading Company Limited (“Tongxian” (22)). Matul il-perjodu ta’ rapportar, Tongxian biegħet esklużivament faxex tal-fibra tal-ħġieġ lil Turkiz Composite, fejn il-prezz medju tal-bejgħ ta’ unità tagħha kien ukoll inqas mill-prezz medju tal-bejgħ ta’ unità li Jushi Group iffatturat lill-klijenti mhux relatati tagħha fit-Turkija. Barra minn hekk, matul il-perjodu ta’ rapportar, Turkiz Composite xtrat aktar minn 90 % tat-total tal-faxex tal-fibra tal-ħġieġ tagħha mingħand Jushi Group u Tongxian. Fid-dawl ta’ dan ta’ hawn fuq, il-Kummissjoni kkonkludiet li l-prezz medju tax-xiri ta’ unità ta’ Turkiz Composite mill-kumpaniji Ċiniżi relatati tagħha Jushi Group u Tongxian kien konsistentement u b’mod sinifikanti aktar baxx mill-prezz medju tax-xiri ta’ unità mhux relatata mħallas lil Jushi Group minn kumpaniji Torok oħra (23) kif ukoll konsistentement u ferm aktar baxx mill-prezzijiet imħallsa mit-tliet produtturi esportaturi Torok l-oħra li kkooperaw, u għalhekk mhux fuq bażi distakkata.

(83)

Wara d-divulgazzjoni, Turkiz Composite affermat li l-Kummissjoni applikat il-formula żbaljata fl-iskeda tagħha “Test tal-valur miżjud” biex tikkalkula “% tal-kost tal-valur miżjud” (ir-ringiela 54), peress li l-Kummissjoni ddividiet b’mod żbaljat il-kost totali tal-manifattura (ir-ringiela 50) bil-“partijiet totali miġjuba (l-Eġittu, iċ-Ċina u sorsi oħra)” (ir-ringiela 49), iżda minflok kellha tuża b’mod korrett il-“partijiet totali miġjuba mill-Eġittu u miċ-Ċina” (ir-ringiela 48).

(84)

Il-Kummissjoni ċaħdet din l-affermazzjoni peress li Turkiz Composite ma pprovdietx l-impatt tal-kalkolu tal-Kummissjoni. Anke kieku l-Kummissjoni kellha tuża l-formula l-ħażina, quod non, u tuża l-metodu ssuġġerit ta’ Turkiz Composite biex tikkalkula l-“% tal-kost tal-valur miżjud”, dan kien iwassal biss għal differenza insinifikanti fil-“valur miżjud”, mingħajr l-ebda impatt fuq is-sejba tal-Kummissjoni li l-valur miżjud mal-partijiet miġjuba, matul l-operazzjoni ta’ assemblaġġ jew ta’ kompletazzjoni, kien inqas minn 25 % tal-kost tal-manifattura.

(85)

Wara d-divulgazzjoni, Turkiz Composite allegat li l-Kummissjoni ma setgħetx teskludi kits mill-kalkoli tagħha peress li l-kits huma parti mill-prodott li qiegħed jiġi investigat. Il-Kummissjoni ċaħdet din l-affermazzjoni għall-istess raġunijiet kif stabbilit fid-dokument ta’ divulgazzjoni speċifiku tagħha lil Turkiz Composite tal-5 ta’ Lulju 2022. L-ewwel nett, il-produzzjoni u l-bejgħ tal-kits kienu parti żgħira mill-produzzjoni u l-bejgħ totali ġenerali tal-kumpanija matul il-perjodu ta’ rapportar. Il-kwantitajiet tal-GFF esportati lejn l-Unjoni matul il-perjodu ta’ rapportar kienu aktar minn 170 darba l-kwantitajiet ta’ kits esportati lejn l-Unjoni. It-tieni, il-kumpanija ma għamlitx distinzjoni bejn il-kostijiet imġarrba għall-impjanti tal-GFF u l-impjant għall-kits fil-livell tar-reġistru ġenerali, ħlief li ġew stabbiliti kontijiet separati għall-kost lavorattiv fil-workshop tat-tqattigħ. It-tielet, il-kits inbiegħu l-aktar domestikament.

(86)

Barra minn hekk, abbażi tal-informazzjoni pprovduta minn Turkiz Composite, anki li kieku l-Kummissjoni kellha tiddeċiedi li ma teskludix il-kits mill-kalkoli tagħha, il-“% tal-kost tal-valur miżjud” ma kienx jibdel is-sejba tal-Kummissjoni li l-valur miżjud mal-partijiet miġjuba, matul l-operazzjoni ta’ assemblaġġ jew kompletazzjoni, kien inqas minn 25 % tal-kost tal-manifattura, prinċipalment bħala riżultat tal-produzzjoni limitata tal-kits.

(87)

Billi ġie aġġustat il-kost irrapportat tal-manifattura u billi ġew issostitwiti l-prezzijiet ta’ trasferiment irrapportati tal-faxex tal-fibra tal-ħġieġ, il-valur miżjud medju li b’hekk ġie stabbilit tul il-perjodu tar-rapportar instab li kien taħt il-livell limitu ta’ 25 % stabbilit bl-Artikolu 13(2)(b) tar-Regolament bażiku. Il-Kummissjoni għalhekk ikkonkludiet li l-valur miżjud mal-partijiet miġjuba, tul l-operazzjoni ta’ assemblaġġ jew kompletazzjoni, kien inqas minn 25 % tal-kost tal-manifattura, kif meħtieġ bl-Artikolu 13(2)(b) tar-Regolament bażiku biex dawn l-operazzjonijiet jikkostitwixxu ċirkomvenzjoni.

(88)

F’konformità mal-Artikolu 13(1) tar-Regolament bażiku, il-Kummissjoni eżaminat jekk l-importazzjonijiet tal-prodott taħt investigazzjoni, kemm f’termini ta’ kwantitajiet kif ukoll ta’ prezzijiet, imminawx l-effetti ta’ rimedju tal-miżuri attwalment fis-seħħ.

(89)

Abbażi tat-tabelli sottomessi u vverifikati minn Turkiz Composite, hija importat 0 - 300 tunnellata fl-2019 meta mqabbla mal-6 000 – 8 000 tunnellata matul il-perjodu ta’ rapportar. Fl-istess ħin, il-konsum tal-Unjoni għas-snin 2020 u 2021 ġie stmat mill-applikant li kien madwar 150 000 tunnellata, u madwar 170 000 tunnellata, rispettivament. Is-sehem mis-suq tal-importazzjonijiet mit-Turkija kien jirrappreżenta aktar minn 4 % matul il-perjodu ta’ rapportar.

(90)

Rigward il-prezzijiet, il-Kummissjoni qabblet il-prezz medju mhux dannuż kif stabbilit fl-investigazzjoni oriġinali mal-medja ponderata tal-prezzijiet tal-esportazzjoni CIF iddeterminata fuq il-bażi tal-informazzjoni pprovduta minn Turkiz Composite, aġġustata kif dovut biex tinkludi l-kostijiet ta’ wara l-iżdoganar. Dan it-tqabbil tal-prezzijiet wera li l-importazzjonijiet minn Turkiz Composite kienu inqas mill-prezzijiet tal-Unjoni b’aktar minn 10 %.

(91)

Il-Kummissjoni kkonkludiet li l-miżuri eżistenti kienu imminati f’termini ta’ kwantitajiet u prezzijiet mill-importazzjonijiet mit-Turkija soġġetti għal din l-investigazzjoni.

(92)

F’konformità mal-Artikolu 13(1) tar-Regolament bażiku, il-Kummissjoni eżaminat ukoll jekk kienx hemm evidenza ta’ dumping fir-rigward tal-valur normali stabbilit preċedentement għall-prodotti simili.

(93)

Għal dan il-għan, il-prezzijiet tal-esportazzjoni ta’ Turkiz Composite fuq bażi ta’ kif joħroġ mill-fabbrika tqabblu mal-valuri normali stabbiliti matul l-investigazzjoni anti-dumping oriġinali.

(94)

It-tqabbil tal-valuri normali u tal-prezzijiet tal-esportazzjoni wera li l-GFF kien importat bi prezzijiet oġġett ta’ dumping tul il-perjodu ta’ rapportar minn Turkiz Composite.

(95)

Abbażi tas-sejbiet ta’ hawn fuq, il-Kummissjoni kkonkludiet li kienet qed issir ċirkomvenzjoni tad-dazju anti-dumping imposti fuq l-importazzjonijiet ta’ GFF li joriġina mir-RPĊ u mill-Eġittu permezz ta’ importazzjonijiet tal-prodott investigat konsenjati mit-Turkija minn Turkiz Composite.

(96)

Minħabba li l-livell ta’ kooperazzjoni kien għoli u li l-bejgħ tal-esportazzjoni rrapportat ta’ Turkiz Composite kien ogħla mill-bejgħ tal-esportazzjoni rrapportat tat-tliet produtturi esportaturi Torok l-oħrajn li kkooperaw flimkien, u l-ebda kumpanija oħra fit-Turkija ma ppreżentat ruħha biex titlob eżenzjoni, il-Kummissjoni kkonkludiet li s-sejbiet dwar il-prattiki ta’ ċirkomvenzjoni fir-rigward ta’ Turkiz Composite jenħtieġ li jiġu estiżi għall-importazzjonijiet kollha mit-Turkija.

(97)

Għalhekk, f’konformità mal-Artikolu 13(1) tar-Regolament bażiku, il-miżuri anti-dumping fis-seħħ fuq l-importazzjonijiet ta’ GFF li joriġina miċ-Ċina jenħtieġ li jiġu estiżi għall-importazzjonijiet tal-prodott li qed jiġi investigat.

(98)

Skont l-Artikolu 13(1), it-tieni subparagrafu, tar-Regolament bażiku, il-miżura li għandha tiġi estiża jenħtieġ li tkun dik stabbilita fl-Artikolu 1(2) tar-Regolament ta’ Implimentazzjoni (UE) 2020/492, kif emendat bir-Regolament ta’ Implimentazzjoni (UE) 2020/776, għall-“kumpaniji l-oħrajn kollha”, li hija dazju anti-dumping definittiv ta’ 69 % applikabbli għall-prezz tas-CIF nett ħieles fil-fruntiera tal-Unjoni, qabel id-dazju doganali.

(99)

Turkiz Composite importat il-faxex tal-fibra tal-ħġieġ tagħha parzjalment mill-Eġittu u parzjalment mir-RPĊ matul il-perjodu ta’ rapportar. Il-faxex tal-fibra tal-ħġieġ mill-kumpaniji relatati tagħha fl-Eġittu u fir-RPĊ ġew immuntati minn Turkiz Composite f’GFF li ġie esportat lejn l-Unjoni, b’ċirkomvenzjoni taż-żewġ dazji imposti fuq l-importazzjonijiet tal-GFF mill-Eġittu (20 %) u l-importazzjonijiet tal-GFF mir-RPĊ (69 %). Għalhekk, sabiex tiġi ppreservata l-effettività tal-miżuri fis-seħħ, l-estensjoni tal-ogħla waħda miż-żewġ dazji, jiġifieri d-dazju għall-“kumpaniji l-oħra” kollha fir-RPĊ (69 %), kif stabbilit fl-Artikolu 1(2) tar-Regolament ta’ Implimentazzjoni (UE) 2020/492, hija ġġustifikata.

(100)

Wara d-divulgazzjoni, Turkiz Composite allegat li l-Kummissjoni ma setgħetx testendi d-dazji fuq l-importazzjonijiet tal-GFF miċ-Ċina, peress li l-valur tal-importazzjonijiet tal-faxex tal-fibra tal-ħġieġ jammonta għal proporzjon iżgħar tal-valur totali tal-faxex tal-fibra tal-ħġieġ użati minn Turkiz Composite għall-produzzjoni tal-GFF, u, għalhekk, ma ssodisfawx it-test ta’ 60 % tal-Artikolu 13(2)(b) tar-Regolament bażiku. Inkella, estensjoni bħal din tal-miżuri fuq l-importazzjonijiet tal-GFF miċ-Ċina tmur kontra l-prinċipju tal-proporzjonalità, kif imsemmi fil-punt 127 tal-Kawża T-278/20, Zhejang Hantong vs il-Kummissjoni.

(101)

Il-Kummissjoni ċaħdet l-affermazzjoni li ma setgħetx testendi d-dazji fuq l-importazzjonijiet tal-GFF miċ-Ċina abbażi tal-argumenti tagħha fir-rigward tal-akkumulazzjoni tal-importazzjonijiet kif deskritt fil-premessa (67). Barra minn hekk, il-Kummissjoni fakkret li l-objettiv tar-Regolament bażiku huwa li jipproteġi lill-industrija tal-UE kontra importazzjonijiet inġusti, u tal-Artikolu 13 tar-Regolament bażiku b’mod partikolari biex jipprevjeni ċ-ċirkomvenzjoni tal-miżuri ta’ difiża tal-kummerċ. L-estensjoni tad-dazji sal-livell tad-dazji kontra l-importazzjonijiet mill-Eġittu (20 %) tinjora li l-miżuri kontra ċ-Ċina ġew evitati wkoll, u timmina l-effettività tal-miżuri fis-seħħ.

(102)

Il-Kummissjoni ċaħdet ukoll l-affermazzjoni li tali estensjoni tal-miżuri fuq l-importazzjonijiet tal-GFF miċ-Ċina tmur kontra l-prinċipju tal-proporzjonalità. Fid-dawl tas-sejbiet li l-miżuri anti-dumping oriġinali, li ġew imposti kontra l-importazzjonijiet kemm miċ-Ċina kif ukoll mill-Eġittu, instab li kienu qed jiġu evitati, il-Kummissjoni naqset milli tara għaliex estensjoni tal-ogħla wieħed miż-żewġ dazji, li kien qed jiġi evitat, tkun sproporzjonata. Għalhekk, kif imsemmi fil-premessa (98) hawn fuq, sabiex tiġi ppreservata l-effettività tal-miżuri fis-seħħ, l-estensjoni tal-ogħla wieħed miż-żewġ dazji jiġifieri d-dazju għall-“kumpaniji l-oħrajn” kollha fir-RPĊ (69 %), kif stabbilit fl-Artikolu 1(2) tar-Regolament ta’ Implimentazzjoni (UE) 2020/492, hija ġġustifikata.

(103)

Wara d-divulgazzjoni, LM Wind Power iddikjarat li l-estensjoni tad-dazji anti-dumping fuq l-importazzjonijiet tal-GFF mit-Turkija jkollha impatt serju fuq in-negozji tal-importaturi tal-GFF, li min-naħa tiegħu jista’ jkollu impatt fuq il-kapaċità tal-Unjoni li tilħaq l-għanijiet ambjentali tagħha bħala riżultat taż-żieda fil-prezzijiet tal-GFF li l-produtturi tat-turbini eoliċi tal-Unjoni jkollhom iħallsu.

(104)

Il-Kummissjoni ħadet nota tad-dikjarazzjonijiet ta’ LM Wind Power, iżda tenniet li l-għan primarju tal-investigazzjonijiet imwettqa skont l-Artikolu 13 tar-Regolament bażiku huwa li tiġi żgurata l-effettività tad-dazju anti-dumping oriġinali u li tiġi evitata ċ-ċirkomvenzjoni tiegħu. F’din l-investigazzjoni, il-Kummissjoni sabet li l-kriterji stabbiliti fl-Artikolu 13 tar-Regolament bażiku ġew issodisfati, u għalhekk iddeċidiet li testendi l-miżuri anti-dumping għat-Turkija. Madankollu, tlieta mill-erba’ produtturi esportaturi li kkooperaw instabu li kienu produtturi Torok ġenwini u għalhekk eżentati mill-miżuri estiżi. Għalhekk, l-utenti tal-GFF jistgħu jixtru mingħand il-produtturi eżentati, kif ukoll mingħand produtturi tal-Unjoni u/jew produtturi oħra ta’ pajjiżi terzi.

(105)

Fl-aħħar nett, wara d-divulgazzjoni, l-applikant iddikjara li huwa laqa’ l-intenzjoni tal-Kummissjoni li testendi l-miżuri anti-dumping għall-importazzjonijiet tal-GFF mit-Turkija, u li ma kellux kummenti dwar id-divulgazzjoni tal-Kummissjoni.

(106)

Skont l-Artikolu 13(3) tar-Regolament bażiku, li jistipula li kwalunkwe miżura estiża jenħtieġ li tapplika għall-importazzjonijiet li daħlu fl-Unjoni taħt reġistrazzjoni imposta mir-Regolament tal-bidu, għandhom jinġabru dazji fuq dawk l-importazzjonijiet irreġistrati tal-prodott taħt investigazzjoni.

(107)

Kif deskritt hawn fuq, instab li Turkiz Composite kienet involuta fi prattiki ta’ ċirkomvenzjoni. Għalhekk, ma tistax tingħata eżenzjoni lil din il-kumpanija skont l-Artikolu 13(4) tar-Regolament bażiku.

(108)

Skont it-talba, żewġ produtturi esportaturi oħra li kkooperaw kienu produtturi ġenwini ewlenin tal-GFF fit-Turkija, jiġifieri l-kumpaniji tal-grupp “Metyx Composites” (ara l-premessa (26)) u Saertex Turkey Tekstil Ltd. Şirketi, u li ma kinux involuti fi prattiki ta’ ċirkomvenzjoni (24). Tabilħaqq, l-investigazzjoni kkonfermat li dawn iż-żewġ produtturi esportaturi ma importawx, jew bilkemm importaw, faxex tal-fibra tal-ħġieġ miċ-Ċina u/jew mill-Eġittu.

(109)

It-tielet produttur li kkoopera (Sonmez Asf Iplik Dokuma Ve Boya San Tic A. Ş) kien produttur żgħir tal-GFF. Dan kien jimpjega inqas minn għaxar persuni, kellu inqas minn ħames magni tal-GFF, u għamel biss żewġ bejgħ għall-esportazzjoni li jikkonċernaw kwantitajiet relattivament insinifikanti lejn l-Unjoni matul il-perjodu ta’ rapportar. Dan ġie stabbilit fl-1975, beda jipproduċi l-GFF fl-2011, u ma importa l-ebda faxxa tal-fibra tal-ħġieġ miċ-Ċina jew mill-Eġittu matul il-perjodu ta’ rapportar.

(110)

Għalhekk, minħabba li t-tliet produtturi esportaturi Torok imsemmija hawn fuq huma produtturi ġenwini li la kinu involuti fit-trażbord u lanqas fi prattiki oħra ta’ ċirkomvenzjoni, eż. operazzjonijiet ta’ assemblaġġ, dawn se jiġu eżentati mill-estensjoni tal-miżuri.

(111)

Fil-5 ta’ Lulju 2022, il-Kummissjoni ddivulgat lill-partijiet interessati kollha l-fatti u l-kunsiderazzjonijiet essenzjali li wasslu għall-konklużjonijiet ta’ hawn fuq u stidnithom jikkummentaw.

(112)

Il-miżuri previsti f’dan ir-Regolament huma skont l-opinjoni tal-Kumitat stabbilit bl-Artikolu 15(1) tar-Regolament (UE) 2016/1036.