(1)

De bhun Airteagal 4(3) den Chomhaontú lena mbunaítear an Banc Eorpach Athfhoirgníochta agus Forbartha (2) (‘an Comhaontú lena mbunaítear BEAF’) agus chun a dhóthain caipitil a choinneáil ar bun chun leibhéal réasúnta gníomhaíochta a chothú, sa mheántéarma, sna tíortha ina bhfuil oibríochtaí ar bun ag BEAF laistigh de theorainneacha reachtúla, chinn Bord Gobharnóirí an Bhainc Eorpaigh Athfhoirgníochta agus Forbartha (BEAF) i Rún Uimh. 265 uaidh an 15 Nollaig 2023 (‘Rún Uimh. 265’), stoc caipitil údaraithe BEAF a mhéadú de EUR 4 000 000 000.

(2)

Roimh an méadú ar chaipiteal sin, tá 90 044 scair i seilbh an Aontais, a bhfuil parluach EUR 10 000 ag gach scair díobh.

(3)

De bhun Rún Uimh. 265, méadaítear stoc caipitil údaraithe BEAF de 400 000 scair íoctha, agus is féidir le comhaltaí BEAF a shuibscríobh, ar nó roimh an 30 Meitheamh 2025, nó ar nó roimh pé dáta ina dhiaidh sin nach déanaí ná an 31 Nollaig 2025 de réir mar a fhéadfaidh an Bord Stiúrthóirí a chinneadh ar nó roimh an 30 Meitheamh 2025, do líon scaireanna iomlána, pro rata don scairsheilbh atá acu cheana. Tá an méadú ar chaipiteal le híoc i 5 thráthchuid chothroma, a bhfuil an chéad cheann díobh le híoc ag gach comhalta de BEAF ar an dáta is déanaí de (i) an 30 Aibreán 2025; nó (ii) 60 lá tar éis theacht in éifeacht a ionstraime suibscríbhinne. Tá na 4 thráthchuid atá fágtha le híoc faoin 30 Aibreán 2026, faoin 30 Aibreán 2027, faoin 30 Aibreán 2028 agus faoin 30 Aibreán 2029, faoi seach. Dá réir sin, ceadófar don Aontas suibscríobh do 12 102 scaireanna nua, a bhfuil parluach EUR 10 000 ag gach ceann díobh dar luach EUR 121 020 000 san iomlán, ag méadú, ar an gcaoi sin, líon scaireanna íoctha an Aontais go dtí 102 146.

(4)

Is gá an méadú ar chaipiteal ionas gur féidir le BEAF leanúint de ghníomhaíochtaí agus infheistíochtaí san Úcráin le linn chogadh foghach na Rúise i gcoinne na hÚcráine agus go háirithe le linn tréimhse iarchogaidh atá le teacht chun tacú le hatógáil na hÚcráine. Trí thacú leis na gníomhaíochtaí agus infheistíochtaí sin, áirithítear leis an méadú ar chaipiteal freisin nach gcuirtear srian le tacaíocht den sórt sin ar acmhainneacht BEAF freastal ar a chuid riachtanas sna tíortha eile ina bhfuil oibríochtaí ar bun aige. Thairis sin, Tá an méadú ar chaipiteal i gcomhréir leis an gceanglas a leagtar amach in Airteagal 13, pointe (v), den Chomhaontú lena mbunaítear BEAF go bhfuil BEAF le féachaint le héagsúlú réasúnta a choinneáil ar bun ina chuid infheistíochtaí uile. Mar iarmhairt air sin, le méadú ar chaipiteal iníoctha, thacófaí le BEAF atá láidir ó thaobh airgeadais de agus atá in ann a shainordú a shaothrú agus cuspóirí scairshealbhóirí a chomhlíonadh i ngach tír ina bhfuil oibríochtaí ar bun aige.

(5)

Tá sé iomchuí go suibscríobhfadh an tAontas do na scaireanna breise sin chun cuspóirí an Aontais a bhaint amach i réimse an chaidrimh sheachtraigh eacnamaíochta agus chun a chumhacht choibhneasach vótála a chaomhnú laistigh de BEAF.

(6)

I Rún Uimh. 259 uaidh an 18 Bealtaine 2023 (‘Rún Uimh. 259’), chaith Bord Gobharnóirí BEAF vóta i bhfabhar leasuithe ar an gComhaontú lena mbunaítear BEAF, ar leasuithe iad a bhfuil gá leo chun cur ar chumas BEAF raon feidhme geografach a chuid oibríochtaí a leathnú ar bhealach teoranta agus incriminteach chuig an Afraic Fho-Shahárach agus an Iaráic agus a ghealltanais iomlána don Úcráin agus do na tíortha ina bhfuil oibríochtaí ar bun aige cheana á gcoinneáil ar bun an tráth céanna. Deimhníodh leis an Rún sin gur cheart leathnú shainordú BEAF a bhaint amach gan ranníocaíochtaí breise caipitil a éileamh ar a chuid scairshealbhóirí.

(7)

Ba cheart raon feidhme geografach oibríochtaí BEAF a leathnú ar bhealach teoranta agus incriminteach chuig an Afraic Fho-Shahárach agus an Iaráic agus ba cheart é a bheith go hiomlán i gcomhréir le luachanna BEAF is é sin tacaíocht a thabhairt do na tíortha sin atá tiomanta do phrionsabail an daonlathais ilpháirtí, an smachta reachta, urramú chearta an duine, an iolrachais agus na heacnamaíochta margaidh agus a bhfuil na prionsabail sin á gcur i bhfeidhm acu. Tá cur chuige céimnithe forbartha ag BEAF i leith tús a chur lena ghníomhaíochtaí sna réigiúin lena mbaineann, lena gcuirfear san áireamh na sainiúlachtaí réigiúnacha agus náisiúnta. Beartaítear go ndéanfar na chéad infheistíochtaí san Afraic Fho-Shahárach ó 2025 i leith i mBeinin, sa Chósta Eabhair, i nGána, sa Chéinia, sa Nigéir agus sa tSeineagáil, faoi réir iarratais a bheith curtha isteach acu agus iad a bheith formheasta mar thíortha is faighteoirí de chuid BEAF. Agus é a chur san áireamh go ndíríonn BEAF ar fhorbairt san earnáil phríobháideach agus ar a shainordú aistrithe, is substaintiúil an luach is féidir le BEAF a chur isteach san Afraic Fho-Shahárach agus san Iaráic agus baineann tábhacht gheostraitéiseach leis sin don Aontas.

(8)

Ba cheart d’ionadaithe an Aontais i gcomhlachtaí rialaithe BEAF BEAF a spreagadh chun leanúint dá rannpháirtíocht dhlúth leis an Aontas agus dá chomhar leis an tsochaí shibhialta agus chun a dhlúthchomhar le hinstitiúidí eile Eorpacha agus idirnáisiúnta maoiniúcháin phoiblí a fhorbairt tuilleadh, chun an úsáid iomlán a bhaint as na buntáistí comparáideacha a ghabhann le rannpháirtíocht agus comhar den sórt sin, nuair a bheidh a chuid oibríochtaí á leathnú aige chuig an Afraic Fho-Shahárach agus an Iaráic.

(9)

I gcomhréir leis an gcleachtas atá ann cheana, sula bhformheasann BEAF tír nua a mbeidh oibríochtaí ar bun aige inti, ba cheart dó measúnú teicniúil mionsonraithe a dhéanamh ar na dálaí eacnamaíocha agus polaitiúla atá sa tír lena mbaineann, lena n-áirítear: measúnú ar thiomantas na tíre sin i leith phrionsabail an daonlathais ilpháirtí, an iolrachais agus na heacnamaíochta margaidh, mar a chumhdaítear in Airteagal 1 den Chomhaontú lena mbunaítear BEAF, measúnú ar na bearnaí aistrithe, agus athbhreithniú ar ghníomhaíochtaí institiúidí idirnáisiúnta eile sa tír sin, agus ar na tosaíochtaí a bhféadfadh BEAF an úsáid is fearr a bhaint as a eolas uathúil agus a scileanna uathúla i ndáil leo. Ba cheart measúnú den sórt sin a dhéanamh faoi réir aon tír nua a bheith ag cur isteach ar bhallraíocht de BEAF agus ar stádas mar thír ina bhfuil oibríochtaí ar bun ag BEAF agus faoi réir formheas ina leith sin ina dhiaidh sin ag Bord Gobharnóirí BEAF.

(10)

Faoi láthair, le hAirteagal 12(1) den Chomhaontú lena mbunaítear BEAF, déantar méid iomlán na n-iasachtaí gan íoc, na n-infheistíochtaí cothromais agus na ráthaíochtaí arna ndéanamh ag BEAF mar chuid dá ghnáthoibríochtaí a theorannú do mhéid iomlán a chaipitil suibscríofa neamhlaghdaithe, a chúlchistí agus a bharrachas a áirítear ina ghnáthacmhainní caipitil. I Rún Uimh. 260 uaidh an 18 Bealtaine 2023 (‘Rún Uimh. 260), d’aithin Bord Gobharnóirí BEAF ról fíor-riachtanach BEAF maidir le haghaidh a thabhairt ar dhúshláin dhomhanda phráinneacha agus na moltaí in Athbhreithnithe Neamhspleách G20 ó 2020 ar Chreataí Leordhóthanachta Caipitil na mBanc Forbartha Iltaobhach. Bheartaigh Bord Gobharnóirí BEAF, chun úsáid optamach na hinniúlachta caipitil de chuid BEAF a chumasú chun an tionchar is fearr is féidir a bhaint amach sna tíortha is faighteoirí dá chuid, gur ghá leasú a dhéanamh ar Airteagal 12(1) den Chomhaontú lena mbunaítear BEAF chun an teorainn chaipitil reachtúil a bhaint.

(11)

De bhun Airteagal 56 den Chomhaontú lena mbunaítear BEAF, tá iarrtha ag Bord Gobharnóirí BEAF ar chomhaltaí uile BEAF an nglacann siad leis na leasuithe atá molta.

(12)

Ba cheart, dá bhrí sin, an méadú ar chaipiteal agus na leasuithe ar an gComhaontú lena mbunaítear BEAF a fhormheas thar ceann an Aontais,

(a)

30 Aibreán 2025; nó

(b)

60 lá tar éis theacht in éifeacht na hionstraime suibscríbhinne ón Aontas.