(1)

Le Rialachán (AE) 2017/625, bunaítear an creat le haghaidh rialuithe oifigiúla agus gníomhaíochtaí oifigiúla eile chun a fhíorú go bhfuil reachtaíocht an Aontais maidir leis an slabhra agraibhia á comhlíonadh.

(2)

Le hAirteagal 21 de Rialachán (AE) 2017/625 leagtar síos rialacha sonracha maidir le rialuithe oifigiúla agus le haghaidh gníomhaíocht atá le déanamh ag na húdaráis inniúla i ndáil le ceanglais maidir le leas ainmhithe lena n-áirítear iad siúd a leagtar síos i Rialachán (CE) Uimh. 1/2005 ón gComhairle (2).

(3)

Sa chomhthéacs sin, tá sraith iniúchtaí déanta ag an gCoimisiún ar chórais comhlíontachta na mBallstát chun leas ainmhithe a chosaint le linn a n-iompair chuig tríú tíortha, más rud é go mbaintear úsáid as soithí beostoic le linn cuid den turas. Ceann de na príomhchonclúidí ó iniúchtaí an Choimisiúin is ea nach leor de ghnáth an bealach a ndéanann na Ballstáit cigireachtaí ar luchtú agus ar dhíluchtú ainmhithe, i gcomhréir le hAirteagal 20 den Rialachán sin, chun an riosca a bhaineann leis an gcineál sin iompair do leas na n-ainmhithe a íoslaghdú.

(4)

Fuarthas amach in iniúchtaí an Choimisiúin go raibh laigí i gcórais chomhlíontachta na mBallstát ó thaobh pleananna teagmhasacha i gcás éigeandálaí de. Ar an gcúis sin, ba cheart do na húdaráis inniúla ag an áit imeachta a áirithiú go mbeidh plean teagmhasach ag an iompróir i gcás éigeandálaí agus go gcomhlíonfaidh an plean teagmhasach na ceanglais ábhartha.

(5)

De bhun Threoir 2009/16/CE ó Pharlaimint na hEorpa agus ón gComhairle (3), tá na Ballstáit uile a bhfuil calafoirt mhuirí acu chun cigireachtaí maidir le rialú Stáit ar chalafoirt a dhéanamh ar longa a thugann cuairt ar a gcalafoirt. D’fhéadfadh torthaí na gcigireachtaí maidir le rialú Stáit ar chalafoirt a bheith ábhartha do na cigireachtaí a cheanglaítear le hAirteagal 20(1) de Rialachán (CE) Uimh. 1/2005, amhail easnaimh a braitheadh a bhaineann le huiscedhíonacht, aeráil, snámhacht, nó trealamh comhraic dóiteáin. Dá bhrí sin, is gá don údarás inniúil torthaí na gcigireachtaí sin a chur san áireamh agus cigireacht á déanamh aige ar shoithí beostoic le linn an luchtaithe agus an díluchtaithe.

(6)

Is tréidlianna oifigiúla den chuid is mó iad na cigirí ó na húdaráis inniúla a dhéanann na cigireachtaí ar shoithí beostoic. Ní leor inniúlacht tréidliachta amháin chun seiceáil a dhéanamh ar fheidhmiú chórais mheicniúla agus bhainistíochta na soithí beostoic a bhféadfadh tionchar a bheith acu ar leas na n-ainmhithe atá á n-iompar. Mar a mholtar sa doiciméad Líonra (4), na foirne a dhéanann cigireachtaí ar luchtú coinsíneachtaí d’ainmhithe beo, dá bhforáiltear in Airteagal 20 de Rialachán (CE) Uimh. 1/2005, ba cheart do na foirne sin a bheith comhdhéanta de thréidlianna oifigiúla agus saineolaithe muirí ag a bhfuil an saineolas iomchuí ar na córais mheicniúla agus bhainistíochta sin agus taithí phraiticiúil ar oibriú soithí beostoic.

(7)

I gcás ina gcuirtear ainmhithe i láthair lena luchtú agus lena ndíluchtú ar shoithí beostoic ag pointí imeachta ag calafoirt, ba cheart am leordhóthanach a bheith ag na húdaráis inniúla measúnú a dhéanamh an gcomhlíonann soithí beostoic na coinníollacha a leagtar síos in Airteagal 20 de Rialachán (CE) Uimh. 1/2005 agus in Airteagal 21(2), pointe (c) de Rialachán (AE) 2017/625. Dá bhrí sin, ba cheart d’eagraí turais an doiciméadacht ábhartha a chur ar fáil do na húdaráis inniúla sin cúig lá oibre ar a laghad roimh dháta na cigireachta nó roimh dháta na rialuithe oifigiúla ar an soitheach beostoic.

(8)

Ba cheart do na húdaráis inniúla ag pointí imeachta sna calafoirt cigireacht fhisiceach a dhéanamh freisin tar éis na hainmhithe a luchtú ar an soitheach beostoic chun a fhíorú go bhfuil dáileadh na n-ainmhithe sna locaí i gcomhréir leis na lamháltais spáis a leagtar síos i gCaibidil VII d’Iarscríbhinn I a ghabhann le Rialachán (CE) Uimh. 1/2005.

(9)

Chun amharcthaifead a choinneáil ar staid an tsoithigh beostoic agus ar na hainmhithe a bhfuil sé beartaithe iad a luchtú, ba cheart do chigirí na n-údarás inniúil fianaise a bhailiú trí bhíthin grianghraif nó físeáin d’aon neamhchomhlíonadh ar bord agus d’aon ní eile ar dócha go mbeadh tionchar diúltach aige ar leas na n-ainmhithe. Ba cheart do na húdaráis inniúla na grianghraif nó na físeáin sin a choinneáil go ceann na tréimhse a bheidh deimhniú um fhormheas an tsoithigh beostoic bailí.