(3)

Il-prodott soġġett għar-reġistrazzjoni (“il-prodott ikkonċernat”) li huwa ċerti esteri akriliki (“AE”, acrylic esters) li huma l-akrilat tal-butil (“BA”, butyl acrylate), li bħalissa jaqa’ taħt in-numru 141-32-2 tal-Chemical Abstracts Service (“CAS”, Chemical Abstracts Service) u l-kodiċi 0012413-0 tal-Unjoni Doganali u l-Istatistika (“CUS”, Customs Union and Statistics), u l-akrilat ta’ 2-etileżil (“2EHA”), li bħalissa jaqa’ taħt in-numru 103-11-7 tal-CAS u l-kodiċi 0017228-1 tal-CUS li joriġinaw mir-Repubblika tal-Poplu taċ-Ċina, mir-Renju tal-Arabja Sawdija, mir-Repubblika tal-Afrika t’Isfel, u mill-Istati Uniti tal-Amerka.

(4)

Il-prodott ikkonċernat bħalissa huwa kklassifikat taħt il-kodiċi NM ex 2916 12 00 (il-kodiċi TARIC 2916 12 00 15).

(5)

Skont l-Artikolu 14(5) tar-Regolament bażiku, l-importazzjonijiet tal-prodott ikkonċernat jistgħu jsiru soġġetti għar-reġistrazzjoni.

(6)

L-iskop tar-reġistrazzjoni huwa li jiġi żgurat li d-dazji anti-dumping, jekk ikun hemm, ikunu jistgħu jiġu imposti b’mod retroattiv fuq l-importazzjonijiet soġġetti għar-reġistrazzjoni f’konformità mad-dispożizzjonijiet legali applikabbli jekk jiġu ssodisfati l-kundizzjonijiet meħtieġa.

(7)

Il-Kummissjoni ddeċidiet li tagħmel l-importazzjonijiet tal-prodott ikkonċernat soġġetti għar-reġistrazzjoni fuq inizjattiva tagħha stess skont l-Artikolu 14(5) tar-Regolament bażiku. Il-kundizzjonijiet għall-ġbir retroattiv tad-dazji se jiġu vvalutati fir-regolament li jimponi dazji definittivi, jekk ikun hemm.

(8)

Kwalunkwe obbligazzjoni futura tiġi mis-sejbiet tal-investigazzjoni anti-dumping.

(9)

Il-kalkoli pprovduti fl-ilment li jitlob il-bidu ta’ investigazzjoni anti-dumping jistmaw il-marġnijiet tad-dumping fil-livelli li ġejjin: (i) bejn 43,51 % u 48,22 % għaċ-Ċina; (ii) 37,35 % għall-Arabja Sawdija; (iii) 67,88 % għall-Afrika t’Isfel; u (iv) bejn 23,97 % u 30,49 % għall-Istati Uniti għall-prodott ikkonċernat għall-perjodu mill-1 ta’ Lulju 2024 sat-30 ta’ Ġunju 2025. Il-livelli korrispondenti ta’ eliminazzjoni tad-dannu ġew stmati kif ġej: (i) bejn 30 % u 40 % għaċ-Ċina; (ii) bejn 10 % u 20 % għall-Arabja Sawdija; (ii) bejn 30 % u 40 % għall-Afrika t’Isfel; u (iv) bejn 10 % u 20 % għall-Istati Uniti; L-ammont ta’ obbligazzjoni possibbli fil-futur normalment jiġi stabbilit fil-livell aktar baxx ta’ dumping jew ta’ dannu skont l-Artikolu 9(4) tar-Regolament bażiku.

(10)

Jekk, matul l-investigazzjoni, il-Kummissjoni ssib evidenza ta’ distorsjonijiet fil-materja prima skont l-Artikolu 7(2a) tar-Regolament bażiku, l-ammont ta’ obbligazzjoni futura possibbli jiġi stabbilit fil-livell tal-marġni tad-dumping kif previst fl-Artikolu 7(2b) tar-Regolament bażiku jekk jiġi konkluż li dazju aktar baxx mill-marġni tad-dumping ma jkunx biżżejjed biex jitneħħa d-dannu mġarrab mill-industrija tal-Unjoni.

(11)

Madankollu, f’dan l-istadju, il-Kummissjoni mhijiex f’pożizzjoni li tagħti stima tal-ammont ta’ obbligazzjoni futura possibbli. B’hekk, l-ammonti msemmija fl-ilment huma biss għal skopijiet ta’ informazzjoni u ma jistgħux joħolqu aspettattivi dwar il-livell attwali ta’ obbligazzjoni li se jiġi stabbilit b’riżultat tal-investigazzjoni.

(12)

Kwalunkwe data personali miġbura fil-kuntest ta’ din ir-reġistrazzjoni tiġi ttrattata f’konformità mar-Regolament (UE) 2018/1725 tal-Parlament Ewropew u tal-Kunsill (3) dwar il-protezzjoni ta’ persuni fiżiċi fir-rigward tal-ipproċessar ta’ data personali mill-istituzzjonijiet, korpi, uffiċċji u aġenziji tal-Unjoni u dwar il-moviment liberu ta’ tali data,