(1)

L-Artikolu 63 tar-Regolament (UE) 2021/23 jiddikjara li l-arranġamenti kuntrattwali li jippermettu lill-membri tal-ikklirjar jgħaddu lill-klijenti tagħhom il-konsegwenzi negattivi tal-għodod ta’ riżoluzzjoni għandhom jinkludu wkoll, fuq bażi ekwivalenti u proporzjonata, id-dritt tal-klijenti għal kwalunkwe rimborż jew kumpens li l-membri tal-ikklirjar jirċievu f’konformità mal-Artikolu 27(6) tar-Regolament 2021/23 jew kwalunkwe ekwivalenti ta’ flus ta’ tali rimborż jew kumpens jew kwalunkwe rikavat li jkunu rċevew wara pretensjoni magħmula f’konformità mal-Artikolu 62 tar-Regolament (UE) 2021/23 (“rimborż”), sal-punt li tali rikavat ikun relatat mal-pożizzjonijiet tal-klijenti u l-kontribuzzjonijiet tagħhom, u li dawk id-dispożizzjonijiet għandhom japplikaw ukoll għall-arranġamenti kuntrattwali minn klijenti u klijenti indiretti li jipprovdu servizzi tal-ikklirjar indiretti lill-klijenti tagħhom.

(2)

Sabiex tiġi żgurata distribuzzjoni ekwivalenti u proporzjonata tar-rimborż, il-fornituri tas-servizzi tal-ikklirjar jenħtieġ li jiddistribwixxu, b’mod ġust u nondiskriminatorju, il-forom differenti ta’ rimborż lill-utenti tas-servizzi tal-ikklirjar ikkonċernati. Il-parti tar-rimborż riċevuta minn kull utent tas-servizz tal-ikklirjar ikkonċernat jenħtieġ li tkun proporzjonata għall-kontribuzzjoni magħmula minn tali utent tas-servizzi tal-ikklirjar għar-riżoluzzjoni tas-CCP, li għaliha kellu aċċess indirett permezz tal-fornitur tas-servizzi tal-ikklirjar ikkonċernat u fejn tali kontribuzzjoni tirriżulta f’pagament skont l-Artikolu 27(6) jew l-Artikolu 62 tar-Regolament (UE) 2021/23 (“kontribuzzjoni kwalifikanti”). Għall-istess raġuni, l-utenti tas-servizzi tal-ikklirjar jenħtieġ li jirċievu r-rimborż tagħhom mingħajr ebda tpaċija, sakemm utent tas-servizz tal-ikklirjar ma jkollux obbligu li jkun dovut u pagabbli lil fornitur tas-servizzi tal-ikklirjar li fl-istess ħin ikun taħt l-obbligu li jgħaddi r-rimborż lil dak l-utent tas-servizz tal-ikklirjar. Madankollu, sabiex jiġi evitat li tali tpaċija jew netting jirriżultaw fi tnaqqis mhux dovut tal-ammonti dovuti lill-utenti tas-servizzi tal-ikklirjar aktar ’l isfel fil-katina tal-ikklirjar, fejn ir-riċevitur ikun ukoll fornitur tas-servizzi tal-ikklirjar, ir-rimborż li għandu jiġi mgħoddi lill-utenti tas-servizzi tal-ikklirjar tiegħu jenħtieġ li jiġi kkalkulat abbażi tar-rimborż riċevut mill-fornitur tas-servizzi tal-ikklirjar qabel ma jkun sar kwalunkwe tnaqqis jew tpaċija.

(3)

Ir-rimborżi jenħtieġ li jiġu allokati b’mod ġust u nondiskriminatorju lill-utenti kollha tas-servizzi tal-ikklirjar li jkunu għamlu kontribuzzjoni kwalifikanti u għall-kontijiet proprji tal-fornitur tas-servizzi tal-ikklirjar fejn tali fornitur tas-servizzi tal-ikklirjar ikun għamel ukoll kontribuzzjoni kwalifikanti. Sabiex ikomplu jiġu evitati d-diskriminazzjoni jew it-trattamenti inġusti, jenħtieġ li l-fornituri tas-servizzi tal-ikklirjar ma japplikaw l-ebda klawżola ta’ subordinazzjoni, u lanqas kwalunkwe klassifikazzjoni meta jiddistribwixxu tali rimborżi.

(4)

Il-kundizzjonijiet tas-suq matul fażi ta’ riżoluzzjoni x’aktarx li jkunu diffiċli ħafna. Huwa għalhekk meħtieġ li l-utenti tas-servizzi tal-ikklirjar jiġu pprovduti bi trasparenza u li jiġu assigurati li l-assi u l-istrumenti finanzjarji maħsuba għad-distribuzzjoni tar-rimborż huma protetti fil-każ ta’ inadempjenza tal-fornitur tas-servizzi tal-ikklirjar tagħhom. Għalhekk, jenħtieġ li l-fornituri tas-servizzi tal-ikklirjar, meta jirċievu rimborż f’isem utent ta’ servizz tal-ikklirjar, iżommu tali rimborż f’kont separat u segregat.

(5)

Il-firxa ta’ assi finanzjarji jew strumenti finanzjarji li jistgħu jintużaw biex jikkumpensaw lill-membri tal-ikklirjar, lill-klijenti u lill-klijenti indiretti hija wiesgħa ħafna u assi u strumenti differenti jġorru riskji differenti. Sabiex tiġi żgurata d-distribuzzjoni ġusta u ugwali tar-rimborż, il-fornituri tas-servizzi tal-ikklirjar jenħtieġ li jaqsmu t-tipi differenti ta’ assi finanzjarji u strumenti finanzjarji li jkunu rċevew bħala rimborż b’mod ugwali bejn kull wieħed mill-utenti tas-servizzi tal-ikklirjar u l-kontijiet tagħhom stess. Jenħtieġ li tali diviżjoni tkun proporzjonali għall-kontribuzzjoni kwalifikanti magħmula minn dawk l-utenti tas-servizzi tal-ikklirjar għar-riżoluzzjoni tas-CCP li għaliha għandhom aċċess indirett permezz ta’ dawk il-fornituri tas-servizzi tal-ikklirjar, jew mill-fornituri tas-servizzi tal-ikklirjar f’dik il-proċedura ta’ riżoluzzjoni.

(6)

Huwa meħtieġ li jitqiesu l-ispeċifiċitajiet u l-ostakli operazzjonali assoċjati ma’ xi tipi ta’ assi finanzjarji u strumenti finanzjarji. Huwa meħtieġ ukoll li jiġi żgurat sal-punt massimu li l-utent tas-servizz tal-ikklirjar jirċievi rimborż ġust meta l-utent tas-servizz tal-ikklirjar ma jkunx jista’ jirċievi ċertu tip ta’ assi finanzjarju jew strument finanzjarju jew jippreferi li ma jirċevix ċertu tip ta’ assi finanzjarju jew strument finanzjarju għal raġunijiet oħra. Il-fornitur tas-servizzi tal-ikklirjar għandu għalhekk, fuq talba tal-utent tas-servizz tal-ikklirjar u sa fejn ikun possibbli, jittrasferixxi l-assi jew l-istrument ikkonċernat lil riċevitur ieħor maħtur mill-utent tas-servizz tal-ikklirjar. Fejn dan ma jkunx possibbli, jenħtieġ li l-fornitur tas-servizzi tal-ikklirjar ibigħ l-assi jew l-istrumenti rilevanti fis-suq lil parti terza bil-prezz prevalenti tas-suq u sussegwentement jittrasferixxi r-rikavat mill-bejgħ lill-utent ta’ servizzi tal-ikklirjar.

(7)

Sabiex jiġu żgurati t-trasparenza u t-traċċabbiltà, il-fornituri tas-servizzi tal-ikklirjar jenħtieġ li jinfurmaw lill-utenti tas-servizzi tal-ikklirjar tagħhom, bl-aħjar mod possibbli tagħhom, dwar kwalunkwe deċiżjoni meħuda fil-proċess tar-riżoluzzjoni biex jikkumpensaw għall-kontribuzzjonijiet kwalifikanti li jkunu saru. Jenħtieġ li tali informazzjoni tipprovdi, sa fejn ikun possibbli, il-kamp ta’ applikazzjoni tad-deċiżjoni li tikkontribwixxi għar-riżoluzzjoni skont ir-Regolament (UE) 2021/23, il-kompożizzjoni tar-rimborż u l-kalkolu tar-rimborż inkluż kif il-fornitur tas-servizzi tal-ikklirjar ikun ikkalkula r-rimborż tal-utent tas-servizz tal-ikklirjar. Għall-istess raġuni u biex jiġi żgurat li l-utenti tas-servizzi tal-ikklirjar jifhmu r-relazzjoni bejn il-kontribuzzjoni li jkunu għamlu u r-rimborż li jkunu rċevew, il-fornituri tas-servizzi tal-ikklirjar jenħtieġ li jinfurmaw lill-utenti tas-servizzi tal-ikklirjar, fejn possibbli u mingħajr ma jiksru kwalunkwe restrizzjoni ta’ kunfidenzjalità, dwar id-distribuzzjoni u l-kompożizzjoni ġenerali tar-rimborż.

(8)

Dan ir-Regolament huwa bbażat fuq l-abbozz ta’ standards tekniċi regolatorji ppreżentat lill-Kummissjoni mill-Awtorità Ewropea tat-Titoli u s-Swieq (European Securities and Markets Authority, ESMA).

(9)

L-ESMA wettqet konsultazzjonijiet pubbliċi miftuħin dwar l-abbozz tal-istandards tekniċi regolatorji li dan ir-Regolament huwa bbażat fuqhom, analizzat il-kostijiet u l-benefiċċji potenzjali relatati u talbet l-opinjoni tal-Grupp tal-Partijiet Interessati tat-Titoli u s-Swieq stabbilit skont l-Artikolu 37 tar-Regolament (UE) Nru 1095/2010 tal-Parlament Ewropew u tal-Kunsill (2).

1.

“fornitur tas-servizzi tal-ikklirjar” tfisser membru tal-ikklirjar kif definit fl-Artikolu 2, il-punt (14) tar-Regolament (UE) Nru 648/2012 tal-Parlament Ewropew u tal-Kunsill (3), klijent kif definit fl-Artikolu 2, il-punt (15) tar-Regolament (UE) Nru 648/2012, klijent indirett, it-tieni klijent indirett jew it-tielet klijent indirett kif definit fl-Artikolu 1, il-punt (b), (d) jew (e) tar-Regolament Delegat tal-Kummissjoni (UE) 2017/2154 (4), li jipprovdi servizzi tal-ikklirjar, direttament jew indirettament, fl-Unjoni;

2.

“utent tas-servizz tal-ikklirjar” tfisser klijent kif definit fl-Artikolu 2, il-punt (15) tar-Regolament (UE) Nru 648/2012, jew klijent indirett, it-tieni klijent indirett jew it-tielet klijent indirett kif definit fl-Artikolu 1, il-punt (b), (d) jew (e) tar-Regolament Delegat (UE) 2017/2154, li juża servizzi tal-ikklirjar ipprovduti minn fornitur tas-servizzi tal-ikklirjar;

3.

“rimborż” tfisser ir-ripagament jew il-kumpens li l-membri tal-ikklirjar jirċievu f’konformità mal-Artikolu 27(6) tar-Regolament (UE) 2021/23, inklużi strumenti ta’ sjieda, strumenti ta’ dejn jew strumenti li jirrikonoxxu pretensjoni fuq il-profitti futuri tas-CCP, jew kwalunkwe ekwivalenti ta’ flus ta’ tali kumpens jew kumpens jew kwalunkwe rikavat li jirċievu wara pretensjoni magħmula f’konformità mal-Artikolu 62 tar-Regolament (UE) 2021/23 inkluż meta kwalunkwe wieħed minn dawn l-ammonti, imsemmija f’dawk l-Artikoli, jiġi mgħoddi lil utent ta’ servizzi tal-ikklirjar;

4.

“kontribuzzjoni kwalifikanti” tfisser il-kontribuzzjoni, magħmula permezz ta’ membru tal-ikklirjar tas-CCP, skont il-kundizzjonijiet stabbiliti fl-Artikolu 63 tar-Regolament (UE) 2021/23, minn utent tas-servizz tal-ikklirjar lis-CCP f’riżoluzzjoni li għaliha għandu aċċess indirett permezz ta’ fornitur tas-servizzi tal-ikklirjar u fejn il-kontribuzzjoni magħmula, permezz tal-membru tal-ikklirjar tas-CCP, fil-proċedura ta’ riżoluzzjoni, tkun irriżultat f’rimborż.