IL-KUMMISSJONI EWROPEA
Brussell, 10.11.2022
COM(2022) 577 final
2022/0362(NLE)
Proposta għal
DEĊIŻJONI TAL-KUNSILL
dwar il-konklużjoni ta’ Ftehim bejn l-Unjoni Ewropea u r-Repubblika tas-Seychelles dwar l-aċċess għall-bastimenti tas-sajd tas-Seychelles għall-ilmijiet ta’ Mayotte
MEMORANDUM TA’ SPJEGAZZJONI
1.KUNTEST TAL-PROPOSTA
•Raġunijiet u objettivi tal-proposta
Il-Ftehim bejn l-Unjoni Ewropea u r-Repubblika tas-Seychelles dwar l-aċċess għall-bastimenti tas-sajd tas-Seychelles għall-ilmijiet ta’ Mayotte (il-“Ftehim tal-2015”) ġie ffirmat u daħal f’applikazzjoni provviżorja fl-20 ta’ Mejju 2014 għal perjodu ta’ 6 snin. Il-Ftehim tal-2015 ġie mġedded b’mod taċitu fl-20 ta’ Mejju 2020.
Abbażi tad-direttivi ta’ negozjati rilevanti, il-Kummissjoni wettqet negozjati mal-Gvern tas-Seychelles bl-għan li jiġi konkluż ftehim bejn l-Unjoni Ewropea u r-Repubblika tas-Seychelles. Wara dawn in-negozjati, ġie inizjalat ftehim ġdid (il-“Ftehim”) fl-10 ta’ Ġunju 2022.
Il-Ftehim il-ġdid ikopri perjodu ta’ sitt snin mid-data tal-applikazzjoni provviżorja stabbilita fl-Artikolu 18 tiegħu, jiġifieri mid-data tal-iffirmar tiegħu miż-żewġ Partijiet.
L-għan ta’ din il-proposta hu li tawtorizza l-konklużjoni tal-Ftehim f’konformità mal-Artikolu 218(6) tat-Trattat dwar il-Funzjonament tal-Unjoni Ewropea (it-TFUE).
•Konsistenza mad-dispożizzjonijiet eżistenti fil-qasam ta’ politika
L-għan ewlieni tal-Ftehim il-ġdid huwa li jippermetti aktar tisħiħ ta’ sħubija strateġika mas-Seychelles u li jallinja l-kondizzjonijiet tekniċi u finanzjarji mal-Ftehim ta’ Sħubija dwar is-Sajd Sostenibbli (SFPA) mas-Seychelles u mal-Protokoll ta’ Implimentazzjoni tiegħu ffirmat fl-2020. Il-Ftehim jikkontribwixxi wkoll għal sajd responsabbli fl-ilmijiet tal-UE u għall-iżvilupp ta’ politika tas-sajd f’Mayotte.
Il-Ftehim jipprovdi opportunitajiet tas-sajd għall-bastimenti tas-Seychelles fl-ilmijiet tal-Unjoni ta’ Mayotte. Dawn l-opportunitajiet tas-sajd huma bbażati fuq l-aqwa pariri xjentifiċi disponibbli, u jirrispettaw ir-rakkomandazzjonijiet tal-organizzazzjoni reġjonali tas-sajd, li tiġġestixxi l-istokkijiet tal-ħut li jpassi ħafna, u tal-Kummissjoni dwar it-Tonn tal-Oċean Indjan (IOTC), fejn japplika fil-limiti tal-eċċess disponibbli.
Il-Ftehim jipprevedi opportunitajiet tas-sajd għal tmien bastimenti tas-sajd bit-tartarun tal-borża tas-Seychelles
•Konsistenza ma’ politiki oħra tal-Unjoni
In-negozjar ta’ ftehim ġdid jifforma parti mill-azzjoni esterna tal-Unjoni Ewropea fir-rigward tal-pajjiżi Afrikani, tal-Karibew u tal-Paċifiku (AKP).
2.BAŻI ĠURIDIKA, SUSSIDJARJETÀ U PROPORZJONALITÀ
•Bażi ġuridika
Il-bażi ġuridika hija l-Artikolu 43(2) tat-Trattat dwar il-Funzjonament tal-Unjoni Ewropea (TFUE), li jistabbilixxi l-politika komuni tas-sajd, kif ukoll l-Artikolu 218(6) TFUE li jipprevedi li l-Kunsill, fuq proposta tan-negozjatur, irid jadotta deċiżjoni li tikkonkludi l-Ftehim.
L-Artikolu 17(1) tat-Trattat dwar l-Unjoni Ewropea jistabbilixxi li bl-eċċezzjoni tal-politika estera u ta’ sigurtà komuni, il-Kummissjoni għandha tiżgura r-rappreżentanza esterna tal-UE. Għaldaqstant, l-uffiċjali maħturin mill-Kummissjoni huma l-uniċi li għandhom il-kompetenza jinnotifikaw lis-Seychelles li l-proċess tar-ratifika tlesta.
•Sussidjarjetà (għall-kompetenza mhux esklużiva)
Il-proposta taqa’ taħt il-kompetenza esklużiva tal-Unjoni Ewropea.
•Proporzjonalità
Il-proposta hija proporzjonata mal-objettiv li jiġi stabbilit qafas ta’ governanza ġuridika, ambjentali, ekonomika u soċjali għall-attivitajiet tas-sajd li jwettqu l-bastimenti tas-Seychelles fl-ilmijiet tal-Unjoni, kif stipulat fl-Artikolu 32 tar-Regolament (UE) 2017/2403 tal-Parlament Ewropew u tal-Kunsill tat-12 ta’ Diċembru 2017 dwar il-ġestjoni sostenibbli ta’ flotot tas-sajd esterni.
3.RIŻULTATI TAL-EVALWAZZJONIJIET EX POST, TAL-KONSULTAZZJONIJIET MAL-PARTIJIET IKKONĊERNATI U TAL-VALUTAZZJONIJIET TAL-IMPATT
•Evalwazzjonijiet ex post/kontrolli tal-idoneità tal-leġiżlazzjoni eżistenti
Fl-2019, il-Kummissjoni wettqet evalwazzjoni ex post tal-Protokoll għall-Ftehim ta’ Sħubija dwar is-Sajd bejn l-UE u r-Repubblika tas-Seychelles, u evalwazzjoni ex ante ta’ SFPA u Protokoll possibbli fil-futur, li jipprovdu wkoll rieżami tal-Ftehim.
Il-Ftehim jippermetti r-reċiproċità bejn iż-żewġ partijiet f’termini ta’ aċċess għall-ilmijiet għall-bastimenti tas-sajd tal-istess tip u li jistadu għall-istess speċi. Dan ġie mġedded filwaqt li tqies li l-Protokoll tal-SFPA bejn l-UE u s-Seychelles ġie mġedded ukoll, filwaqt li nżamm l-istess allinjament bejn iż-żewġ testi fir-rigward tal-kondizzjonijiet tekniċi u finanzjarji.
•Konsultazzjonijiet mal-partijiet ikkonċernati
L-istudju ta’ evalwazzjoni kkonsulta mal-Istati Membri, mar-rappreżentanti tal-industrija, u mal-organizzazzjonijiet tas-soċjetà ċivili, kif ukoll mal-amministrazzjoni tas-sajd u mas-soċjetà ċivili tas-Seychelles. Dawn il-konsultazzjonijiet wasslu għall-konklużjoni li jkun ta’ benefiċċju għall-Unjoni Ewropea u għar-Repubblika tas-Seychelles li jiġi konkluż ftehim ġdid.
•Ġbir u użu tal-għarfien espert
Il-Kummissjoni użat konsulent indipendenti għar-rieżami tal-Ftehim bħala parti mill-evalwazzjonijiet ex post u ex ante tal-FPA bejn l-UE u s-Seychelles f’konformità mal-Artikolu 31(10) tar-Regolament li jistabbilixxi l-politika komuni tas-sajd.
4.IMPLIKAZZJONIJIET BAĠITARJI
Billi dan jikkonċerna l-aċċess tal-bastimenti tas-sajd li jtajru l-bandiera tas-Seychelles għall-ilmijiet li jaqgħu taħt il-ġurisdizzjoni tal-UE, ma hemm l-ebda implikazzjoni finanzjarja mil-lat ta’ nefqa jew introjtu fuq il-baġit tal-UE.
5.ELEMENTI OĦRA
•Pjanijiet ta’ implimentazzjoni u arranġamenti dwar il-monitoraġġ, l-evalwazzjoni u r-rapportar
L-arranġamenti dwar il-monitoraġġ huma previsti fil-Ftehim.
2022/0362 (NLE)
Proposta għal
DEĊIŻJONI TAL-KUNSILL
dwar il-konklużjoni ta’ Ftehim bejn l-Unjoni Ewropea u r-Repubblika tas-Seychelles dwar l-aċċess għall-bastimenti tas-sajd tas-Seychelles għall-ilmijiet ta’ Mayotte
IL-KUNSILL TAL-UNJONI EWROPEA,
Wara li kkunsidra t-Trattat dwar il-Funzjonament tal-Unjoni Ewropea, u b’mod partikolari l-Artikolu 43(2) flimkien mal-Artikolu 218(6)(a)(v) u (7) tiegħu,
Wara li kkunsidra l-proposta tal-Kummissjoni Ewropea,
Wara li kkunsidra l-kunsens tal-Parlament Ewropew,
Billi:
(1)F’konformità mad-Deċiżjoni tal-Kunsill [XXX] ta’ [...], il-Ftehim bejn l-Unjoni Ewropea u r-Repubblika tas-Seychelles dwar l-aċċess għall-bastimenti tas-sajd tas-Seychelles għall-ilmijiet ta’ Mayotte (minn hawn ’il quddiem “il-Ftehim”) ġie ffirmat fi [...], soġġett għall-konklużjoni tiegħu f’data aktar tard.
(2)L-objettiv tal-Ftehim il-ġdid huwa li jippermetti aktar tisħiħ ta’ sħubija strateġika mas-Seychelles u li jallinja l-kondizzjonijiet tekniċi u finanzjarji tal-Ftehim ta’ Aċċess għas-Sajd mal-Ftehim ta’ Sħubija dwar is-Sajd Sostenibbli (SFPA) mas-Seychelles u mal-Protokoll ta’ Implimentazzjoni tiegħu ffirmat fl-2020, u li jikkontribwixxi għas-sajd responsabbli fl-ilmijiet tal-UE u għall-iżvilupp ta’ politika tas-sajd f’Mayotte.
(3)Il-Ftehim jenħtieġ li jiġi approvat f’isem l-Unjoni.
(4)L-Artikolu 8 tal-Ftehim jistabbilixxi Kumitat Konġunt inkarigat mill-monitoraġġ tal-applikazzjoni tal-Ftehim. Skont il-Ftehim, il-Kumitat Konġunt jista’ japprova ċerti emendi fih. Jenħtieġ li jkun il-Kunsill li jistabbilixxi l-pożizzjoni tal-Unjoni meta jiġu proposti l-emendi għall-Ftehim. Jenħtieġ li tkun il-Kummissjoni li f’isem l-Unjoni tapprova l-emendi proposti, dment li, f’konformità mal-Artikolu 16(4) tat-Trattat dwar l-Unjoni Ewropea, ma jkunx hemm għadd ta’ Stati Membri li jikkostitwixxu minoranza li timblokka, li joġġezzjonaw għalihom.
(5)Il-Kontrollur Ewropew għall-Protezzjoni tad-Data ġie kkonsultat f’konformità mal-Artikolu 42 tar-Regolament (UE) 2018/1725 tal-Parlament Ewropew u tal-Kunsill, u bagħat opinjoni fil-[daħħal id-data].
ADOTTA DIN ID-DEĊIŻJONI:
Artikolu 1
Il-Ftehim bejn l-Unjoni Ewropea u r-Repubblika tas-Seychelles dwar l-aċċess għall-bastimenti tas-sajd tas-Seychelles għall-ilmijiet ta’ Mayotte huwa b’dan approvat f’isem l-Unjoni.
It-test tal-Ftehim huwa mehmuż ma' din id-Deċiżjoni bħala l-Anness I.
Artikolu 2
F’isem l-Unjoni, il-Kummissjoni għandha twassal in-notifika prevista fl-Artikolu 20 tal-Ftehim, biex tesprimi l-kunsens tal-Unjoni li tintrabat bil-Ftehim.
Artikolu 3
Soġġett għad-dispożizzjonijiet u l-kondizzjonijiet stipulati fl-Anness II ta’ din id-Deċiżjoni, il-Kummissjoni għandha tingħata s-setgħa li f’isem l-Unjoni tapprova l-emendi għall-Ftehim adottati mill-Kumitat Konġunt stabbilit skont l-Artikolu 8 tal-Ftehim.
Artikolu 4
Din id-Deċiżjoni għandha tidħol fis-seħħ l-għada tal-jum tal-pubblikazzjoni tagħha f’Il-Ġurnal Uffiċjali tal-Unjoni Ewropea.