Isem

Informazzjoni ta’ identifikazzjoni

Raġunijiet

Data tal-elenkar

“7.

Salah Abdallah Mohamed SALAH

magħruf ukoll bħala

SALAH GOSH

Data tat-twelid: 1957

Post tat-twelid: Nuri, is-Sudan

Nazzjonalità: Sudaniża

Passaport: YSJCYKRYG1U5

Sess: raġel

Funzjoni: eks konsulent tas-sigurtà nazzjonali tar-Repubblika tas-Sudan; eks Direttur tas-Servizz Nazzjonali tal-Intelligence u s-Sigurtà Sudaniż

Individwi assoċjati: l-eks President tar-Repubblika tas-Sudan, Omar Al-Bashir; Il-Ġeneral Abdelfattah Al-Burhan

Entitajiet assoċjati: Is-Servizz Nazzjonali tal-Intelligence u s-Sigurtà (NISS)

Salah Abdallah Mohamed Salah huwa l-eks konsulent tas-sigurtà nazzjonali tar-Repubblika tas-Sudan u l-eks Direttur tas-Servizz Nazzjonali tal-Intelligence u s-Sigurtà (NISS) Sudaniż.

Salah Abdallah Mohamed Salah huwa responsabbli għal diversi kolpi ta’ stat fis-Sudan – b’mod partikolari dawk fl-2012 u l-2019 – u għen fl-eżekuzzjoni ta’ kolp ta’ stat fl-2021. Huwa ġeneralment meqjus bħala l-‘kap tal-ispiji’ tas-Sudan. Minħabba l-għarfien espert tiegħu bħala eks uffiċjal tas-sigurtà, huwa kellu rwol biex jgħin lill-elementi preċedenti tar-reġim jerġgħu lura għall-poter u mmina l-isforzi biex jiġi stabbilit gvern ċivili fis-Sudan.

Wara l-waqgħa tar-reġim ta’ Al-Bashir, Salah Abdallah Mohamed Salah baqa’ involut f’attivitajiet li jiddestabbilizzaw il-paċi u l-istabbiltà fil-pajjiż. Għalkemm illum rari jidher fil-pubbliku, huwa għadu attiv u huwa meqjus bħala l-‘moħħ’ wara ħafna mill-azzjonijiet imwettqa mill-Forzi Armati Sudaniżi (SAF) u d-dipartiment tal-operazzjonijiet tal-intelligence bħala parti mill-kriżi li ilha għaddejja.

Għalhekk, Salah Abdallah Mohamed Salah huwa meqjus bħala mexxej fost l-elementi iebsa tar-reġim preċedenti ta’ Al-Bashir, li huwa responsabbli għas-sigurtà u l-isforzi relatati mal-militar, u huwa inkorporat fl-istrutturi tal-SAF. Ir-rabtiet ideoloġiċi tiegħu mal-eks reġim ta’ Al-Bashir, u b’mod partikolari l-Partit tal-Kungress Nazzjonali (NCP) huma xprun qawwi tan-narrattiva li tinstiga l-gwerra kontra l-front oppost, jiġifieri l-Forzi ta’ Appoġġ Rapidu (RSF).

Salah Abdallah Mohamed Salah għalhekk kien u għadu involut f’azzjonijiet li jheddu l-paċi, l-istabbiltà jew is-sigurtà tas-Sudan u f’azzjonijiet li jimminaw l-isforzi biex tkompli t-tranżizzjoni politika fis-Sudan.

16.12.2024

8.

Tijani KARSHOM

magħruf ukoll bħala

KHARSHOM;

KARSHOUM;

KHARSHOUM;

AL-TIJANI AL-TAHIR KARSHOUM

Nazzjonalità: Sudaniża

Sess: raġel

Funzjoni: eks Viċi Gvernatur (jew ‘Wali’ fil-lingwaġġ lokali) tad-Darfur tal-Punent. Gvernatur de facto tad-Darfur tal-Punent;

Individwi assoċjati: Abdulrahman JUMA BARAKALLAH; Masar Abdurahman ASEEL,

Entitajiet assoċjati: Gathering of Sudan Liberation Forces (GSLF)

Tijani Karshom huwa membru ewlieni tat-tribù Mahamid u kien Viċi Gvernatur tad-Darfur tal-Punent fiż-żmien tal-massakru tat-tribù ta’ Massalit f’El Geneina, il-belt kapitali tad-Darfur tal-Punent, f’Ġunju 2023. Huwa wkoll membru tal-Gathering of Sudan Liberation Forces (GSLF) li ffaċilitaw ir-reklutaġġ ta’ milizzja biex jiġġieldu flimkien mal-Rapid Support Forces (RSF).

Tijani Karshom huwa responsabbli fl-attakk fatali fuq il-Gvernatur tad-Darfur tal-Punent f’El Geneina f’Ġunju 2023, talli ta struzzjonijiet lill-RSF biex jipprevjenu liċ-ċivili maqbuda f’El Geneina milli jħallu l-belt, u talli mexxa żewġ attakki fuq kampijiet għal persuni spostati f’pajjiżhom. Wara l-massakru ta’ El Geneina, huwa stabbilixxa kumitat għall-ġbir u d-difna ta’ iġsma fl-oqbra tal-massa. Kien involut ukoll fi sforzi biex jinħbew l-iġsma wara t-tieni massakru f’Ardamatta, fid-Darfur tal-Punent, f’Novembru 2023.

Tijani Karshom huwa responsabbli wkoll talli mexxa attakk f’El Geneina flimkien mal-RSF u talli ordna l-isparar tal-artillerija fuq l-uffiċċju tal-Gvernatur tad-Darfur tal-Punent f’Mejju 2023, xahar qabel il-qtil tal-Gvernatur.

Tijani Karshom għalhekk kien u għadu involut f’azzjonijiet li jheddu l-paċi, l-istabbiltà u s-sigurtà tas-Sudan u kien involut fl-ippjanar, id-direzzjoni jew it-twettiq ta’ atti fid-Darfur tal-Punent li jikkostitwixxu abbużi serji tad-drittijiet tal-bniedem u ksur tad-dritt umanitarju internazzjonali, inkluż qtil, stupru u forom serji oħra ta’ vjolenza sesswali u abbażi tal-ġeneru, u ħtif.

16.12.2024

9.

Mohamed Ali Ahmed SUBIR

Nazzjonalità: Sudaniża

Sess: raġel

Funzjoni: Logutenent Ġenerali, Direttur tad-Direttorat tal-Intelligence Militari (DMI) tal-Forzi Armati Sudaniżi (SAF);

Entitajiet assoċjati: Il-Forzi Armati Sudaniżi (SAF); Id-Direttorat tal-Intelligence Militari (DMI)

Mohamed Ali Ahmed Subir huwa Logutenent Ġeneral fil-Forzi Armati Sudaniżi (SAF) u d-Direttur tad-Direttorat tal-Intelligence Militari (DMI) tal-SAF. F’din il-kapaċità, huwa kien inkarigat mill-operazzjonijiet imwettqa mid-DMI mindu faqqa’ l-kunflitt, fil-15 ta’ April 2023, bejn l-SAF, il-Forzi ta’ Appoġġ Rapidu (RSF) u l-gruppi armati alleati tagħhom. Dan huwa enfasizzat mill-parteċipazzjoni tiegħu f’laqgħat ta’ livell għoli żvelati pubblikament ta’ kmandanti anzjani tal-SAF, immexxija mill-Kap Kmandant Abdelfattah Al-Burhan fil-Kmand Ġenerali tal-SAF f’Khartoum f’Mejju u Lulju 2023.

Għalhekk, Mohamed Ali Ahmed Subir għandu responsabbiltà ta’ kmand fil-fastidju, l-arrest arbitrarju u d-detenzjoni ta’ difensuri tad-drittijiet tal-bniedem, attivisti tal-komunità lokali, inklużi attivisti kontra l-gwerra, avukati, professjonisti mediċi, voluntiera li jappoġġaw is-servizzi ta’ emerġenza, membri ta’ partiti politiċi u ta’ kumitati ta’ reżistenza u persuni perċepiti bħala sostenituri tal-RSF.

Mohamed Ali Ahmed Subir kien involut ukoll f’diversi każijiet ta’ vjolenza sesswali, inkluż theddid ta’ stupru u theddid ta’ stupru, attribwit lid-DMI, u fit-twettiq ta’ atti, mid-DMI, li jammontaw għal tortura u forom oħra ta’ trattament ħażin.

Mohamed Ali Ahmed Subir huwa responsabbli wkoll għall-impożizzjoni ta’ restrizzjonijiet sinifikanti mid-DMI fuq l-aċċess għall-għajnuna u l-konsenja tagħha.

Għalhekk, Mohamed Ali Ahmed Subir kien u għadu involut direttament fit-twettiq ta’ atti, mid-DMI, li jikkostitwixxu ksur serju tad-drittijiet tal-bniedem u ksur tad-dritt umanitarju internazzjonali, u għalhekk huwa responsabbli għal azzjonijiet li jimminaw direttament l-isforzi biex titkompla t-tranżizzjoni politika fis-Sudan.

16.12.2024

10.

Osman Mohamed HAMID

magħruf ukoll bħala

Osman AMALIYAT

Nazzjonalità: Sudaniża

Sess: raġel

Funzjoni: Maġġur Ġeneral tal-RSF; Kap tal-Operazzjonijiet tal-RSF;

Entitajiet assoċjati: Forzi ta’ Appoġġ Rapidu

Osman Mohamed Hamid huwa Maġġur Ġeneral fil-Forzi ta’ Appoġġ Rapidu (RSF) u l-Kap tal-Operazzjonijiet tal-RSF. Għalhekk ġie inkarigat mill-operazzjonijiet imwettqa mill-RSF minn mindu faqqa’ l-kunflitt bejn il-Forzi Armati Sudaniżi (SAF), l-RSF u l-gruppi armati alleati tagħhom, fil-15 ta’ April 2023, kif enfasizzat b’mod partikolari mill-preżenza tiegħu fil-kamp tal-battalja f’Jebel Aulia f’Novembru 2023.

Għalhekk, Osman Mohamed Hamid għandu responsabbiltà ta’ kmand fit-tkomplija tal-ġlied mill-RSF u fil-ksur tad-dritt internazzjonali dwar id-drittijiet tal-bniedem u tad-dritt umanitarju internazzjonali mwettaq mill-RSF. Huwa responsabbli għal attakki fuq skala kbira bbażati fuq etniċità intersezzjonali u abbażi ta’ ġeneru, qtil, tortura, vjolenza sesswali u abbażi tal-ġeneru mifruxa, stupru, skjavitù sesswali, ħtif, reklutaġġ u l-użu ta’ tfal f’ostilitajiet u l-ostakolar tal-aċċess għall-għajnuna umanitarja għal persuni ċivili fil-bżonn.

Għalhekk, Osman Mohamed Hamid għalhekk kien involut direttament fit-twettiq ta’ atti, mill-RSF, li jheddu l-paċi, l-istabbiltà u s-sigurtà tas-Sudan. Huwa responsabbli wkoll għal azzjonijiet li jikkostitwixxu ksur serju tad-drittijiet tal-bniedem u ksur tad-dritt umanitarju internazzjonali, u azzjonijiet li jimminaw direttament l-isforzi biex titkompla t-tranżizzjoni politika fis-Sudan.

16.12.2024”.