29.4.2022   

GA

Iris Oifigiúil an Aontais Eorpaigh

L 126/14

RIALACHÁN CUR CHUN FEIDHME (AE) 2022/685 ÓN gCOIMISIÚN

an 28 Aibreán 2022

lena leasaítear Rialachán (CE) Uimh. 333/2007 a mhéid a bhaineann leis na ceanglais samplála maidir le héisc agus ainmhithe talún

(Téacs atá ábhartha maidir le LEE)

TÁ AN COIMISIÚN EORPACH,

Ag féachaint don Chonradh ar Fheidhmiú an Aontais Eorpaigh,

Ag féachaint do Rialachán (AE) 2017/625 ó Pharlaimint na hEorpa agus ón gComhairle an 15 Márta 2017 maidir le rialuithe oifigiúla agus gníomhaíochtaí oifigiúla eile a dhéantar chun cur i bhfeidhm dhlí an bhia agus na beatha a áirithiú, rialacha maidir le sláinte agus leas ainmhithe, sláinte plandaí agus táirgí cosanta plandaí, lena leasaítear Rialacháin (CE) Uimh. 999/2001, (CE) Uimh. 396/2005, (CE) Uimh. 1069/2009, (CE) Uimh. 1107/2009, (AE) Uimh. 1151/2012, (AE) Uimh. 652/2014, (AE) Uimh. 2016/429 agus (AE) Uimh. 2016/2031 ó Pharlaimint na hEorpa agus ón gComhairle, Rialacháin (CE) Uimh. 1/2005 agus (CE) Uimh. 1099/2009 ón gComhairle agus Treoracha 98/58/CE, 1999/74/CE, 2007/43/CE, 2008/119/CE agus 2008/120/CE ón gComhairle, agus lena n-aisghairtear Rialacháin (CE) Uimh. 854/2004 agus (CE) Uimh. 882/2004 ó Pharlaimint na hEorpa agus ón gComhairle, Treoracha 89/608/CEE, 89/662/CEE, 90/425/CEE, 91/496/CEE, 96/23/CE, 96/93/CE agus 97/78/CE ón gComhairle agus Cinneadh 92/438/CEE ón gComhairle (an Rialachán maidir le Rialuithe Oifigiúla) (1), agus go háirithe Airteagal 34(6) de,

De bharr an mhéid seo a leanas:

(1)

Le Rialachán (CE) Uimh. 333/2007 (2) ón gCoimisiún leagtar síos na modhanna samplála agus anailíse atá le húsáid chun rialú a dhéanamh ar na leibhéil riandúl agus éilleán próiseála in earraí bia.

(2)

I gCuid B den Iarscríbhinn a ghabhann le Rialachán (CE) Uimh. 333/2007, leagtar síos forálacha sonracha maidir le sampláil iasc mór a thagann isteach i luchtóga móra agus de bhun na bhforálacha sin, tá an chuid láir d’éisc den sórt sin le sampláil. Ós rud é go bhféadfadh tionchar mór a bheith aige sin ar an táirge i gcásanna áirithe, ní mór foráil a dhéanamh maidir le ceanglais mhalartacha samplála, chun sampláil ar an gceann nó ar an eireaball a cheadú freisin. Thairis sin, ní mór ceanglais aonfhoirmeacha a shocrú maidir leis an gcuid de na héisc atá le sampláil, ag brath ar mhéid éagsúil na n-iasc, toisc go n-áirithítear le ceanglais den sórt sin go bhfuil torthaí na hanailíse níos inchomparáide ar fud an Aontais.

(3)

I ndáil leis na ceanglais leasaithe samplála maidir le héisc, ba cheart an sainmhíniú ar ‘luchtóg’ a leasú agus ba cheart sainmhíniú a sholáthar ar ‘méid nó meáchan inchomparáide’.

(4)

In Iarscríbhinn IV a ghabhann le Treoir 96/23/CE (3) ón gComhairle, leagtar amach ceanglais maidir le hainmhithe talún agus táirgí dobharshaothraithe a shampláil chun anailís a dhéanamh ar iarmhair agus ar éilleáin. Aisghaireadh Treoir 96/23/CE le Rialachán (AE) 2017/625, ach faoi Airteagal 150 den Rialachán sin, tá an Treoir sin fós infheidhme go dtí an 14 Nollaig 2022. Agus deireadh na mbeart idirthréimhseach sin maidir le cur i bhfeidhm Threoir 96/23/CE á chur san áireamh, ní mór ceanglais den sórt sin a leagan amach i Rialachán (CE) Uimh. 333/2007 chun feidhm a bheith acu ón 15 Nollaig 2022.

(5)

Dá bhrí sin, ba cheart Rialachán (CE) Uimh. 333/2007 a leasú dá réir sin.

(6)

Tá na bearta dá bhforáiltear sa Rialachán seo i gcomhréir le tuairim an Bhuanchoiste um Plandaí, Ainmhithe, Bia agus Beatha,

TAR ÉIS AN RIALACHÁN SEO A GHLACADH:

Airteagal 1

Leasaítear an Iarscríbhinn a ghabhann le Rialachán (CE) Uimh. 333/2007 i gcomhréir leis an Iarscríbhinn a ghabhann leis an Rialachán seo.

Airteagal 2

Tiocfaidh an Rialachán seo i bhfeidhm an fichiú lá tar éis lá a fhoilsithe in Iris Oifigiúil an Aontais Eorpaigh.

Beidh feidhm ag an Iarscríbhinn ón 15 Nollaig 2022.

Beidh an Rialachán seo ina cheangal go huile agus go hiomlán agus beidh sé infheidhme i ngach Ballstát.

Arna dhéanamh sa Bhruiséil, 28 Aibreán 2022.

Thar ceann an Choimisiúin

An tUachtarán

Ursula VON DER LEYEN

(1)   IO L 95, 7.4.2017, lch. 1.

(2)  Rialachán (CE) Uimh. 333/2007 ón gCoimisiún an 28 Márta 2007 lena leagtar síos na modhanna samplála agus anailíse chun rialú a dhéanamh ar na leibhéil riandúl agus éilleán próiseála in earraí bia (IO L 88, 29.3.2007, lch. 29).

(3)  Treoir 96/23/CE ón gComhairle an 29 Aibreán 1996 maidir le bearta chun faireachán a dhéanamh ar shubstaintí áirithe agus ar iarmhair na substaintí sin in ainmhithe beo agus i dtáirgí ainmhithe agus lena n-aisghairtear Treoir 85/358/CEE agus Treoir 86/469/CEE agus Cinneadh 89/187/CEE agus Cinneadh 91/664/CEE (IO L 125, 23.5.1996, lch. 10).

IARSCRÍBHINN

Leasaítear an Iarscríbhinn a ghabhann le Rialachán (CE) Uimh. 333/2007 mar a leanas:

(1)

Leasaítear Cuid A mar a leanas:

(a)

cuirtear an méid seo a leanas in ionad an tsainmhínithe ar “luchtóg”:

“luchtóg”: cainníocht inaitheanta bia a sholáthraítear ag aon am amháin agus a gcinneann an t-oifigeach go bhfuil saintréithe coiteanna aige (amhail tionscnamh, cineál, speiceas, dobharcheantar, cineál pacála, pacálaí, coinsíneoir nó marcanna);”;

(b)

cuirtear an sainmhíniú seo a leanas leis:

‘ “méid nó meáchan inchomparáide’: níl an difríocht sa mhéid nó sa mheáchan níos mó ná 50 %.”;

(2)

Leasaítear Cuid B mar a leanas:

(a)

cuirtear an méid seo a leanas in ionad phointe B.2.3.:

“B.2.3.   Forálacha sonracha maidir le luchtóga a shampláil ina bhfuil éisc iomlána atá ar méid nó ar meáchan inchomparáide

Leagtar amach líon na samplaí incriminteacha atá le tógáil ón luchtóg i dTábla 3. An sampla comhiomlán lena dtugtar le chéile na samplaí incriminteacha uile, beidh 1 chileagram amháin ar a laghad i gceist leis (féach pointe B.2.2).

—

I gcás ina bhfuil go leor éisc bheaga (éisc aonair ar meáchan < 1 chileagram), tógtar an t-iasc iomlán mar shampla incriminteach chun an sampla comhiomlán a chruthú. I gcás ina bhfuil meáchan níos mó ná 3 chileagram sa sampla comhiomlán atá ann mar thoradh air sin, is éard a d’fhéadfadh a bheith sna samplaí incriminteacha na codanna láir de na héisc, ina bhfuil meáchan 100 gram ar a laghad, chun an sampla comhiomlán a chruthú. An chuid iomlán a bhfuil an t-uasleibhéal infheidhme ina leith, úsáidtear í chun an sampla a homaiginiú.

Is éard atá sa chuid lár den iasc an áit a bhfuil an meáchanlár. I bhformhór na gcásanna, bíonn sé ann ag eite an droma (i gcás ina bhfuil eite droma ag an iasc) nó leath bhealaigh idir oscailt na ngeolbhach agus an t-anas.

—

I gcás ina bhfuil éisc níos mó sa luchtóg atá le sampláil (éisc aonair ar meáchan ≥ 1 chileagram), is éard atá sa sampla incriminteach an chuid láir den iasc. Bíonn meáchan 100 gram ar a laghad i ngach sampla.

Maidir le héisc ar meánmhéid (≥ 1 chileagram agus < 6 chileagram) is éard a bhíonn sa sampla a thógtar slis den iasc ón gcnámh droma go dtí an bolg sa chuid láir den iasc.

Maidir le héisc atá an-mhór (≥ 6 chileagram), tógtar an sampla incriminteach ón bhfeoil matáin dhroimthaobhach ón taobh deas (amharc tosaigh) sa chuid láir den iasc. I gcás ina mbeadh damáiste eacnamaíoch ann mar thoradh ar phíosa den sórt sin a thógáil ó chuid láir an éisc, féadfar trí shampla incriminteacha ina bhfuil 350 gram ar a laghad a mheas a bheith leordhóthanach, gan beann ar mhéid na luchtóige nó de rogha air sin, féadfar trí shampla incriminteacha ina bhfuil 350 gram ar a laghad arb éard atá iontu páirteanna comhionanna (175 gram) ón bhfeoil matáin atá gar don eireaball agus ón bhfeoil matáin atá gar do cheann gach éisc a mheas a bheith leordhóthanach gan beann ar mhéid na luchtóige.”;

(b)

cuirtear na pointí seo a leanas leis:

“B.2.4.   Forálacha sonracha maidir le luchtóga iasc a shampláil ar luchtóga iad ina bhfuil éisc iomlána atá ar méideanna agus/nó ar meáchain dhifriúla

Beidh feidhm ag forálacha phointe B.2.3. a mhéid a bhaineann le comhdhéanamh samplaí.

I gcás ina bhfuil aicme/catagóir méide nó meáchain amháin níos líonmhaire sa luchtóg (tuairim agus 80 % nó níos mó den luchtóg), tógtar an sampla ó éisc atá ar an méid nó ar an meáchan is líonmhaire. Meastar an sampla sin a bheith ionadaíoch don luchtóg uile.

I gcás nach mbaineann formhór na luchtóige le haon aicme/catagóir méide ná meáchain amháin, ansin áiritheofar go bhfuil na héisc a roghnaítear don sampla ionadaíoch don luchtóg. Soláthraítear treoir shonrach maidir le cásanna den sórt sin sa “Doiciméad treorach maidir le héisc iomlána ar méid agus/nó ar meáchan difriúil a shampláil”  (*1)

B.2.5.   Forálacha sonrach maidir le hainmhithe talún a shampláil

Maidir le feoil agus scairteach ainmhithe de chineál mucúil, buaibheach, caorach, gabhair agus eachaí, tógfar sampla 1 chileagram ó ainmhí amháin ar a laghad. Is féidir cainníochtaí comhionanna sampla a thógáil ó níos mó ná ainmhí amháin más gá chun cainníocht sampla de 1 chileagram a fháil.

Maidir le héineoil, samplálfar cainníochtaí comhionanna ó trí ainmhí ar a laghad chun sampla comhiomlán de 1 chileagram a fháil. Maidir le scairteach éineola, samplálfar cainníochtaí comhionanna ó trí ainmhí ar a laghad chun sampla comhiomlán de 300 gram a fháil.

Maidir le feoil agus scairteach ainmhithe de chineál géim shaothraithe agus ainmhithe fiáine talún, tógfar sampla 300 gram ó ainmhí amháin ar a laghad. Is féidir cainníochtaí comhionanna sampla a thógáil ó níos mó ná ainmhí amháin más gá chun cainníocht sampla de 300 gram a fháil.

(*1)  https://ec.europa.eu/food/safety/chemical-safety/contaminants/sampling-and-analysis”;"

(3)

cuirtear an méid seo a leanas in ionad phointe C.2.1.:

“C.2.1.   Réamhchúraimí agus breithnithe ginearálta

Is é an buncheanglas sampla saotharlainne ionadaíoch aonchineálach a fháil gan éilliú tánaisteach a bheith ann.

An chuid iomlán a bhfuil an t-uasleibhéal infheidhme ina leith, úsáidtear í chun an sampla a homaiginiú.

Maidir le táirgí seachas éisc, úsáidfear an t-ábhar sampla uile a fhaigheann an tsaotharlann chun an sampla saotharlainne a ullmhú.

Maidir le héisc, homaigineofar an t-ábhar sampla uile a fhaigheann an tsaotharlann. Ón sampla comhiomlán homaiginithe, úsáidfear cuid/cainníocht ionadaíoch chun an sampla saotharlainne a ullmhú.

Bunófar comhlíontacht leis na huasleibhéil a leagtar síos i Rialachán (CE) Uimh. 1881/2006 ar bhonn na leibhéal a chinntear sna samplaí saotharlainne.”

(*1)  https://ec.europa.eu/food/safety/chemical-safety/contaminants/sampling-and-analysis”;”