Deskrizzjoni tal-prodotti

Klassifikazzjoni

(Kodiċi-NM)

Raġunijiet

(1)

(2)

(3)

Il-prodott huwa magħmul minn kaxxa tal-injam miksija minn ġewwa u minn barra bid-drapp tessili. Il-kaxxa għandha fetħa fuq quddiem biex jidħol qattus u hija kbira biżżejjed biex jorqod qattus fiha.

Fuq il-wiċċ tal-kaxxa hemm tubu tal-kartun armat b'mod vertikali. It-tubu huwa miksi b'ħabel tas-sisal imwaħħal miegħu. Il-ħabel huwa magħmul minn fibri tas-sisal mibrumin u huwa twil aktar minn 20 000  decitex.

It-tubu qiegħed iżomm bażi tal-injam miksija bid-drapp tessili. Il-bażi hija kbira biżżejjed biex qattus jimtedd fuqha.

Tubu tal-injam miksi bid-drapp tessili minn ġewwa u minn barra huwa mwaħħal mal-qiegħ tal-bażi. It-tubu huwa wiesa' biżżejjed biex qattus jitkaxkar ġo fih.

Id-drapp tessili użat huwa drapp tal-pil minsuġ (filpa ta' poliester).

Il-wiċċ totali tad-drapp tessili huwa akbar mill-wiċċ tal-materjal tas-sisal.

(Ara r-ritratt) (*1)

6307 90 98

Il-klassifikazzjoni hija stabbilita bir-regoli ġenerali 1, 3(b) u 6 għall-interpretazzjoni tan-Nomenklatura Maqgħuda (GIR) bin-nota 7(f) tat-Taqsima XI u mill-kliem tal-kodiċijiet NM 6307 , 6307 90 u 6307 90 98 .

Minħabba l-karatteristiċi oġġettivi tiegħu, il-prodott huwa maħsub biex jattira l-qtates u biex iżommhom 'il bogħod mill-għamara li nkella jigirfu u jokkupaw.

Il-klassifikazzjoni bħala għamara taħt l-intestatura 9403 hija eskluża minħabba li din l-intestatura tkopri prodotti ta' natura differenti li jintużaw għal djar privati, lukandi, uffiċċji, skejjel, knejjes, ħwienet, laboratorji, eċċ. (ara wkoll in-Noti ta' Spjegazzjoni tas-Sistema Armonizzata (NSSA) għall-intestatura 9403 tan-SA).

Il-klassifikazzjoni bħala ġugarelli taħt l-intestatura 9503 hija wkoll eskluża minħabba li l-prodott huwa maħsub esklussivament għall-annimali u għalhekk mhuwiex kopert minn din l-intestatura skont in-nota 5 tal-Kapitolu 95.

Il-materjal tessili (id-drapp tessili minsuġ u l-ħabel tas-sisal) huwa essenzjali biex jippermetti li l-prodott jintuża kif maħsub minħabba li jattira qtates li jistgħu pereżempju jigirfu b'difrejhom, ipoġġu, jorqdu fuqu u jilagħbu bih. Għalhekk, huwa l-materjal tat-tessuti (mhux l-injam jew il-kartun) li jagħti lill-prodott il-karattru essenzjali tiegħu fit-tifsira tal-GIR 3(b).

Minħabba li ma jistax jiġi stabbilit huwiex is-sisal jew il-materjal tessili minsuġ l-aktar essenzjali biex jattira lill-qtates, il-kwantità akbar ta' drapp tessili minsuġ u l-varjetà usa' ta' attivitajiet li jipprovdi għall-qattus jitqiesu li jagħtu lill-prodott il-karattru essenzjali tiegħu fi ħdan it-tifsira tal-GIR 3(b) (ara wkoll in-NSSA ta' GIR 3(b), (VIII)).

Fi ħdan it-tifsira tan-nota 7(f) tat-Taqsima XI, id-drapp tessili minsuġ huwa impoġġi bil-ħjata u għalhekk huwa prodott tessili maħdum mid-drapp tessili.

Il-prodott għandu għalhekk jiġi kklassifikat taħt il-kodiċi tan-NM 6307 90 98 , bħala prodott ieħor magħmul mit-tessutti.