European flag

Iris Oifigiúil
an Aontais Eorpaigh

GA

Sraith C


C/2024/4521

16.7.2024

CINNEADH Ó BHIÚRÓ PHARLAIMINT NA HEORPA

an 15 Iúil 2024

lena leasaítear na Bearta Cur Chun Feidhme do Reacht Fheisirí Pharlaimint na hEorpa

(C/2024/4521)

TÁ BIÚRÓ PHARLAIMINT NA hEORPA,

Ag féachaint don Chonradh ar Fheidhmiú an Aontais Eorpaigh, agus go háirithe Airteagal 223(2) de,

ag féachaint do Reacht Fheisirí Pharlaimint na hEorpa (1),

ag féachaint do Riail 25 de Rialacha Nós Imeachta Pharlaimint na hEorpa,

De bharr an mhéid seo a leanas:

(1)

I gcomhréir le hAirteagal 73(2) de na Bearta Cur Chun Feidhme do Reacht Fheisirí Pharlaimint na hEorpa (2) (‘na Bearta Cur Chun Feidhme’), tá an t-uasmhéid míosúil is iníoctha i leith na mball foirne pearsanta a sholáthraíonn cúnamh parlaiminteach dá dtagraítear in Airteagal 29(4) de na Bearta Cur Chun Feidhme, i gcás inarb iomchuí le bheith á innéacsnascadh go bliantúil ag an mBiúró ar bhonn an innéacs chomhpháirtigh arna bhunú ag Eurostat chun an t-athrú ar chostas maireachtála d’oifigigh AE (‘an tInnéacs Comhpháirteach’) a thomhas de bhun Airteagal 65 de Rialacháin Foirne Oifigigh an Aontais Eorpaigh agus Coinníollacha Fostaíochta Sheirbhísigh Eile, a leagtar síos i Rialachán (CEE, Euratom, CEGC) Uimh. 259/68 ón gComhairle (3) (‘na Rialacháin Foirne’) agus i gcomhréir le hIarscríbhinn XI a ghabhann leis na Rialacháin Foirne sin. Is gnách gurb é an Biúró a chinneann an t-innéacsnascadh sin i mí na Nollag, agus go dtagann sé i bhfeidhm go haisghníomhach amhail ó mhí Iúil na bliana i dtrácht. Mar gheall ar an mboilsciú urghnách le blianta beaga anuas, áfach, bhí gá le hoiriúnú idirmheánach.

(2)

De bhun na bhforálacha thuasluaite de na Rialacháin Foirne, is í an tairseach shonrach chun nuashonrú idirmheánach a spreagadh i luach saothair oifigigh an Aontais méadú boilscithe ± 3,0 % nó níos mó don tréimhse sé mhí ón 1 Iúil go dtí an 1 Eanáir. Don tréimhse ón 1 Iúil 2023 go dtí an 1 Eanáir 2024, socraíodh an tInnéacs Comhpháirteach arna bhunú ag Eurostat ag 103,0 (+ 3,0 %). Ós rud é gurbh ionann an t-athrú sin agus an tairseach 3 %, bhí gá le huasdátú idirmheánach ginearálta a dhéanamh ar luach saothair ainmniúil oifigigh an Aontais Eorpaigh, le héifeacht ón 1 Eanáir 2024.

(3)

Baineann an t-uasdátú sin freisin le tuarastail chúntóirí parlaiminteacha creidiúnaithe (APAnna) na bhFeisirí, a chumhdaítear leis na Rialacháin Foirne. Ós rud é go n-íoctar tuarastail APAnna ó imchlúdach na bhFeisirí le haghaidh speansais cúnaimh pharlaimintigh, ba ghá an t-imchlúdach sin a nuashonrú dá réir sin.

(4)

I dtaca leis sin, tá an ráta coigeartaithe socraithe ag an gCoimisiún don tréimhse ó mhí Eanáir go dtí mí an Mheithimh 2024 ag + 3,0 %. Dá bhrí sin, méadaíodh an t-uasmhéid míosúil is iníoctha i leith speansais cúnaimh pharlaimintigh go EUR 29 557, le héifeacht ón 1 Eanáir 2024 le Cinneadh ón mBiúró an 24 Meitheamh 2024 (4) agus leasaíodh an Cinneadh ó Bhiúró Pharlaimint na hEorpa an 19 Bealtaine agus an 9 Iúil 2008 maidir le bearta cur chun feidhme do Reacht Fheisirí Pharlaimint na hEorpa (5) (‘an Cinneadh roimhe seo ón mBiúró’) dá réir sin, ar cinneadh é a bhí i bhfeidhm ag an am.

(5)

Ós rud é go dtiocfaidh na Bearta Cur Chun Feidhme seo i bhfeidhm an 16 Iúil 2024 agus go n-aisghairfear an Cinneadh roimhe seo ón mBiúró leo, ba cheart, dá bhrí sin, iad a leasú dá réir sin, agus ba cheart an t-uasmhéid míosúil is iníoctha i leith speansais cúnaimh pharlaimintigh a mhéadú go EUR 29 557, le héifeacht ón 16 Iúil 2024.

(6)

Thairis sin, leis na cinntí uaithi an 13 Meán Fómhair 2023 (6), agus an 10 (7) agus an 24 Aibreán 2024 (8) faoi seach, rinne an Pharlaimint a Rialacha Nós Imeachta a leasú d’fhonn macántacht, neamhspleáchas agus cuntasacht a neartú agus an t-athchóiriú parlaiminteach ‘Parlaimint 2024’ a chur chun feidhme. Mar thoradh ar na cinntí thuasluaite, i measc nithe eile, rinneadh athuimhriú ar fhormhór na bhforálacha i Rialacha Nós Imeachta na Parlaiminte. Dá bhrí sin, ba cheart na Bearta Cur Chun Feidhme a leasú chun an t-athuimhriú sin a léiriú.

TAR ÉIS AN CINNEADH SEO A GHLACADH:

Airteagal 1

Leasaítear na Bearta Cur Chun Feidhme mar a leanas:

(1)

Leasaítear Airteagal 28 mar a leanas:

(a)

cuirtear an méid seo a leanas in ionad mhír 1:

‘1.   Feisirí a rinneadh a eisiamh ón Seomra Tionóil, faoi Riail 182 de Rialacha Nós Imeachta na Parlaiminte, forghéillfidh siad a dteidlíocht ar an liúntas cothaithe dá bhforáiltear in Airteagal 24 de na Bearta Cur Chun Feidhme ar feadh a n-eisiaimh.’

;

(b)

cuirtear an méid seo a leanas in ionad mhír 2:

‘2.   Forghéillfidh Feisirí a dteidlíocht ar an liúntas cothaithe dá bhforáiltear in Airteagal 24 de na Bearta Cur Chun Feidhme seo i gcás ina gcinneann an tUachtarán amhlaidh faoi Riail 183 de Rialacha Nós Imeachta na Parlaiminte.’

;

(2)

In Airteagal 29, cuirtear an méid seo a leanas in ionad mhír 4:

‘4.   Is é EUR 29 557 an t-uasmhéid míosúil is iníoctha i leith na foirne pearsanta uile dá dtagraítear in Airteagal 30 le héifeacht ón 1 Eanáir 2024.’

.

Airteagal 2

Tiocfaidh an Cinneadh seo i bhfeidhm an lá tar éis lá a fhoilsithe in Iris Oifigiúil an Aontais Eorpaigh.

Beidh feidhm ag an gCinneadh seo ón 16 Iúil 2024.


(1)  Cinneadh 2005/684/CE, Euratom ó Pharlaimint na hEorpa an 28 Meán Fómhair 2005 lena nglactar Reacht Fheisirí Pharlaimint na hEorpa (IO L 262, 7.10.2005, lch. 1, ELI: http://data.europa.eu/eli/dec/2005/684/oj).

(2)  Cinneadh ón mBiúró an 11 Meán Fómhair 2023 maidir le Bearta Cur Chun Feidhme do Reacht Fheisirí Pharlaimint na hEorpa agus lena n-aisghairtear Cinneadh ón mBiúró an 19 Bealtaine agus an 9 Iúil 2008 (IO C, C/2024/2814, 26.4.2024, ELI: https://eur-lex.europa.eu/legal-content/GA/TXT/?uri=CELEX:32024D02814).

(3)   IO L 56, 4.3.1968, lch. 1.

(4)   IO C, C/2024/4279, 1.7.2024, ELI: http://data.europa.eu/eli/C/2024/4279/oj.

(5)  Cinneadh ó Bhiúró Pharlaimint na hEorpa an 19 Bealtaine agus an 9 Iúil 2008 maidir le bearta cur chun feidhme do Reacht Fheisirí Pharlaimint na hEorpa (IO C 159, 13.7.2009, lch. 1).

(6)  Cinneadh ó Pharlaimint na hEorpa an 13 Meán Fómhair 2023 maidir le leasuithe ar Rialacha Nós Imeachta na Parlaiminte d’fhonn macántacht, neamhspleáchas agus cuntasacht a neartú (2023/2095(REG)) (IO C, C/2024/1770, 22.3.2024, ELI: http://data.europa.eu/eli/C/2024/1770/oj).

(7)  Cinneadh ó Pharlaimint na hEorpa an 10 Aibreán 2024 maidir le leasuithe ar Rialacha Nós Imeachta na Parlaiminte lena gcuirtear chun feidhme an t-athchóiriú parlaiminteach ‘Parlaimint 2024’ (2024/2000(REG)) (nár foilsíodh fós san Iris Oifigiúil).

(8)  Cinneadh ó Pharlaimint na hEorpa an 24 Aibreán 2024 maidir le leasuithe ar Rialacha Nós Imeachta na Parlaiminte a bhaineann le hoiliúint faoi choinbhleacht agus ciapadh a chosc san ionad oibre agus faoi dhea-bhainistiú oifige (2024/2006(REG)) (nár foilsíodh fós san Iris Oifigiúil).


ELI: http://data.europa.eu/eli/C/2024/4521/oj

ISSN 1977-107X (electronic edition)