(1)

L-infezzjoni bil-virus tal-marda tal-infafet fil-ġilda hija marda infettiva li tinġarr minn vetturi u li taffettwa lill-annimali bovini. L-okkorrenza tagħha tista’ tħalli impatt gravi fuq il-popolazzjoni tal-annimali kkonċernati u fuq il-profittabbiltà tal-biedja, u tfixkel il-movimenti ta’ dawk l-annimali u tal-prodotti tagħhom fl-Unjoni u fl-esportazzjonijiet lejn pajjiżi terzi. Fil-każ ta’ tifqigħa ta’ infezzjoni bil-virus tal-marda tal-infafet fil-ġilda fl-annimali bovini, hemm riskju serju li dik il-marda tinxtered fi stabbilimenti oħra tal-annimali bovini, b’mod partikolari minħabba l-mod ewlieni ta’ trażmissjoni tagħha permezz tal-vetturi.

(2)

Ir-Regolament Delegat tal-Kummissjoni (UE) 2020/687 (2) jissupplimenta r-regoli għall-kontroll tal-mard elenkat imsemmi fl-Artikolu 9(1), il-punti (a), (b) u (c), tar-Regolament (UE) 2016/429, u definit bħala mard tal-kategoriji A, B u C fir-Regolament ta’ Implimentazzjoni tal-Kummissjoni (UE) 2018/1882 (3). B’mod partikolari, l-Artikoli 21 u 22 tar-Regolament Delegat (UE) 2020/687 jipprevedu l-istabbiliment ta’ żona ristretta f’każ ta’ tifqigħa ta’ marda tal-kategorija A, inkluż l-infezzjoni bil-virus tal-marda tal-infafet fil-ġilda, u ċerti miżuri li għandhom jiġu applikati f’tali żona. Barra minn hekk, l-Artikolu 21(1) ta’ dak ir-Regolament Delegat jipprevedi li ż-żona ristretta għandha tkun tinkludi mill-inqas żona ta’ protezzjoni, żona ta’ sorveljanza, u, jekk ikun meħtieġ, żoni ristretti ulterjuri madwar iż-żoni ta’ protezzjoni u ż-żoni ta’ sorveljanza jew maġenbhom.

(3)

Id-Deċiżjoni ta’ Implimentazzjoni tal-Kummissjoni (UE) 2025/1582 (4) tistipula ċerti miżuri ta’ emerġenza relatati mat-tifqigħat tal-infezzjoni bil-virus tal-marda tal-infafet fil-ġilda fl-Italja. L-Artikolu 1 tad-Deċiżjoni ta’ Implimentazzjoni (UE) 2025/1582 jipprevedi l-istabbiliment, fl-Italja, ta’ żoni ristretti, li jinkludu żoni ta’ protezzjoni, żoni ta’ sorveljanza u żoni ristretti ulterjuri, f’konformità mal-Artikolu 21 tar-Regolament Delegat (UE) 2020/687, kif ukoll l-istabbiliment ta’ żoni tat-tilqim, f’konformità mal-Parti 1 tal-Anness IX tar-Regolament Delegat tal-Kummissjoni (UE) 2023/361 (5). Barra minn hekk, l-Artikolu 1 tad-Deċiżjoni ta’ Implimentazzjoni (UE) 2025/1582 jipprevedi li dawn iż-żoni ta’ protezzjoni, iż-żoni ta’ sorveljanza u ż-żoni ristretti ulterjuri, kif ukoll iż-żoni ta’ tilqim, għandhom jinkludu mill-inqas iż-żoni elenkati fl-Annessi I u III tagħha, u l-miżuri li għandhom jiġu applikati f’dawk iż-żoni għandhom jiġu applikati mill-inqas sad-dati stabbiliti f’dawk l-Annessi.

(4)

Barra minn hekk, l-Artikolu 2 tad-Deċiżjoni ta’ Implimentazzjoni (UE) 2025/1582 jipprevedi li l-Italja għandha tiżgura li l-movimenti tal-annimali bovini miż-żoni ta’ protezzjoni, miż-żoni ta’ sorveljanza jew miż-żoni ristretti ulterjuri stabbiliti fl-Anness I ta’ dik id-Deċiżjoni ta’ Implimentazzjoni lejn destinazzjoni li tinsab barra mill-perimetru estern taż-żona ristretta ulterjuri fl-Italja jew barra minn dak l-Istat Membru huma pprojbiti sad-dati elenkati f’dak l-Anness.

(5)

Minbarra dan, l-Artikolu 3 tad-Deċiżjoni ta’ Implimentazzjoni (UE) 2025/1582 jipprevedi li fiż-żoni elenkati fl-Anness II ta’ dik id-Deċiżjoni ta’ Implimentazzjoni, u għall-perjodi speċifikati f’dak l-Anness, l-Italja għandha tapplika l-miżuri applikabbli għaż-żoni ristretti ulterjuri, f’konformità mar-Regolament Delegat (UE) 2020/687. Jipprojbixxi wkoll il-movimenti ta’ annimali bovini miż-żoni elenkati fl-Anness II ta’ dik id-Deċiżjoni ta’ Implimentazzjoni lejn destinazzjoni li tinsab barra minn dawk iż-żoni fl-Italja jew barra minn dak l-Istat Membru għall-perjodi speċifikati f’dak l-Anness.

(6)

Mill-aħħar emenda tad-Deċiżjoni ta’ Implimentazzjoni (UE) 2025/1582 bid-Deċiżjoni ta’ Implimentazzjoni tal-Kummissjoni (UE) 2025/2087 (6), l-Italja nnotifikat lill-Kummissjoni dwar 8 tifqigħat ġodda tal-infezzjoni bil-virus tal-marda tal-infafet fil-ġilda fi stabbilimenti li jżommu l-annimali bovini fil-provinċji ta’ Nuoro u Oristano, fir-reġjun ta’ Sardenja, li ġew irrapportati bejn il-15 ta’ Ottubru 2025 u l-5 ta’ Novembru 2025. B’reazzjoni għal dawk it-tifqigħat, l-Italja stabbiliet żoni ta’ protezzjoni u żoni ta’ sorveljanza, fil-provinċji ta’ Nuoro u ta’ Oristano, fir-reġjun ta’ Sardenja, fejn jiġu applikati l-miżuri ta’ kontroll tal-mard stabbiliti fir-Regolament Delegat (UE) 2020/687.

(7)

Fis-17 ta’ Novembru 2025, l-Italja rrapportat data addizzjonali biex tippermetti valutazzjoni tas-sitwazzjoni epidemjoloġika fit-territorju tagħha. Dik l-informazzjoni turi titjib sinifikanti fis-sitwazzjoni ġenerali, appoġġata minn valutazzjoni tar-riskju favorevoli dwar it-tixrid tal-infezzjoni bil-virus tal-marda tal-infafet fil-ġilda, l-implimentazzjoni effettiva tal-miżuri stabbiliti fir-Regolament Delegat (UE) 2020/687, u l-kisba tal-kopertura minima tat-tilqim meħtieġa f’konformità mal-Anness IX tar-Regolament Delegat (UE) 2023/361.

(8)

L-Italja infurmat ukoll lill-Kummissjoni dwar dewmien fl-implimentazzjoni tal-miżuri ta’ eradikazzjoni għal diversi tifqigħat fir-reġjun ta’ Sardenja, li rriżultaw f’ċerti tifqigħat li baqgħu ma ssolvewx. Konsegwentement, id-durata taż-żoni ta’ protezzjoni u taż-żoni ta’ sorveljanza stabbiliti madwar dawk it-tifqigħat trid tiġi estiża, u din id-Deċiżjoni testendi kif xieraq il-perjodu ta’ applikazzjoni tagħhom.

(9)

Fid-dawl tas-sitwazzjoni epidemjoloġika li qed tevolvi fir-reġjun ta’ Sardinja, jeħtieġ li jiġu vvalutati mill-ġdid iż-żoni ristretti elenkati fl-Anness I tad-Deċiżjoni ta’ Implimentazzjoni (UE) 2025/1582. B’mod partikolari, iż-żona ristretta ulterjuri jenħtieġ li titneħħa, filwaqt li ż-żoni ta’ protezzjoni u ż-żoni ta’ sorveljanza madwar dawk it-tifqigħat li għalihom il-miżuri ta’ eradikazzjoni ddewmu jenħtieġ li jiġu aġġustati spazjalment u d-durata tagħhom jenħtieġ li tiġi estiża. Barra minn hekk, jenħtieġ li jiġu stabbiliti żoni ta’ protezzjoni u żoni ta’ sorveljanza madwar it-8 tifqigħat ikkonfermati addizzjonali. Għalhekk, ir-referenzi għaż-żona ristretta ulterjuri fl-Artikoli 1 u 2 tad-Deċiżjoni ta’ Implimentazzjoni (UE) 2025/1582 jenħtieġ li jitneħħew, u l-Parti B tal-Anness I ta’ dik id-Deċiżjoni ta’ Implimentazzjoni, li telenka żona ristretta ulterjuri, jenħtieġ li titħassar.

(10)

Fid-dawl tat-tneħħija taż-żona ristretta ulterjuri prevista fid-Deċiżjoni ta’ Implimentazzjoni (UE) 2025/1582, il-miżuri addizzjonali stabbiliti fl-Artikolu 3 ta’ dik id-Deċiżjoni ta’ Implimentazzjoni, li kienu japplikaw speċifikament għaż-żona elenkata fl-Anness II ta’ dik id-Deċiżjoni, ma għadhomx meħtieġa. Konsegwentement, l-Artikolu 3 u l-Anness II attwali tad-Deċiżjoni ta’ Implimentazzjoni (UE) 2025/1582 jenħtieġ li jitħassru. Bħala riżultat ta’ dak it-tħassir, l-Anness III attwali, li jelenka ż-żoni tat-tilqim, jenħtieġ jiġi nnumerat mill-ġdid bħala l-Anness II.

(11)

Id-daqs taż-żoni indikati bħala żoni ta’ protezzjoni u żoni ta’ sorveljanza fl-Anness I tad-Deċiżjoni ta’ Implimentazzjoni (UE) 2025/1582, kif emendata b’din id-Deċiżjoni, kif ukoll id-durata tal-miżuri li għandhom jiġu applikati fihom, huma bbażati fuq il-kriterji stabbiliti fl-Artikolu 64(1) tar-Regolament (UE) 2016/429, kif ukoll fuq ir-regoli stabbiliti fir-Regolament Delegat (UE) 2020/687. Il-kriterji applikati għall-għażla tad-daqs taż-żoni ta’ protezzjoni u taż-żoni ta’ sorveljanza, kif ukoll tad-durata tal-miżuri li għandhom jiġu applikati fihom, ma jqisux biss is-sitwazzjoni epidemjoloġika fir-rigward tal-infezzjoni bil-virus tal-marda tal-infafet fil-ġilda fiż-żoni milquta minn dik il-marda, iżda anke fatturi epidemjoloġiċi oħra, fosthom il-parametri ġeografiċi u r-riskju li l-marda tkompli tinxtered fid-dawl tal-preżenza ta’ insetti vetturi. Anke meta ntgħażlet id-durata tal-miżuri previsti f’din id-Deċiżjoni tqiesu l-istandards internazzjonali tal-Kodiċi tas-Saħħa tal-Annimali Terrestri tal-Organizzazzjoni Dinjija għas-Saħħa tal-Annimali (7).

(12)

L-Artikoli 2 u 3 tad-Deċiżjoni ta’ Implimentazzjoni (UE) 2025/1582 jipprojbixxu l-moviment tal-annimali bovini minn żoni ta’ protezzjoni, minn żoni ta’ sorveljanza jew minn żoni ristretti ulterjuri lejn destinazzjonijiet barra mill-perimetru estern taż-żona ristretta ulterjuri fl-Italja jew barra minn dak l-Istat Membru, sad-dati elenkati fl-Annessi I u II tagħha. Fid-dawl tat-tifqigħat mhux solvuti fir-reġjun ta’ Sardinja, jenħtieġ li dik il-projbizzjoni tkompli tapplika fiż-żoni ta’ protezzjoni u fiż-żoni ta’ sorveljanza stabbiliti fid-Deċiżjoni ta’ Implimentazzjoni (UE) 2025/1582, kif emendata b’din id-Deċiżjoni.

(13)

Iż-żoni ta’ tilqim stabbiliti fid-Deċiżjoni ta’ Implimentazzjoni (UE) 2025/1582 jibqgħu meħtieġa, u t-tilqim jenħtieġ li jkompli f’konformità mal-pjan uffiċjali tat-tilqim tal-Italja datat l-1 ta’ Lulju 2025, li ġie ppreżentat skont l-Artikolu 6(4), il-punt (a), tar-Regolament Delegat (UE) 2023/361. Peress li l-Anness II attwali jitħassar, l-Anness li jelenka ż-żoni ta’ tilqim jenħtieġ li jibqa’ fis-seħħ u jiġi nnumerat mill-ġdid bħala l-Anness II biex tiġi żgurata l-kontinwazzjoni tal-attivitajiet tat-tilqim fiż-żoni ddeżinjati.

(14)

Għalhekk, jenħtieġ li l-Annessi tad-Deċiżjoni ta’ Implimentazzjoni (UE) 2025/1582 jiġu emendati kif xieraq.

(15)

Fid-dawl tas-sitwazzjoni epidemjoloġika fl-Italja, l-emendi li jridu jsiru fid-Deċiżjoni ta’ Implimentazzjoni (UE) 2025/1582 b’din id-Deċiżjoni jenħtieġ li japplikaw malajr kemm jista’ jkun biex jiġi evitat aktar tixrid tal-marda fl-Italja, lejn Stati Membri oħra, jew lejn pajjiżi terzi u biex jiġi evitat kwalunkwe tfixkil bla bżonn għall-kummerċ fl-Unjoni jew ostakli mhux ġustifikati għall-kummerċ ma’ pajjiżi terzi.

(16)

Il-miżuri previsti f’din id-Deċiżjoni huma skont l-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,

1.

L-Artikoli 1 u 2 huma sostitwiti b’dan li ġej:

2.

L-Artikolu 3 jitħassar;

3.

L-Annessi huma emendati f’konformità mal-Anness ta’ din id-Deċiżjoni.