(2)

Il-prodott soġġett għal reġistrazzjoni jikkonsisti f’kejbils tal-fibra ottika b’modalità unika, magħmulin minn fibra waħda miksija individwalment jew aktar, b’kisi protettiv, li fihom kondutturi elettriċi jew le (“OFC”), li joriġina miċ-Ċina (“il-prodott ikkonċernat”). Il-prodotti li ġejjin huma esklużi: (i) kejbils li fihom il-fibri ottiċi huma mgħammra individwalment b’konnetturi operazzjonali f’estremità waħda jew fiż-żewġ estremitajiet; kif ukoll (ii) kejbils għall-użu taħt il-baħar. Il-kejbils għall-użu taħt il-baħar huma kejbils tal-fibra ottika insulati bil-plastik, b’konduttur tar-ram jew tal-aluminju, li fihom il-fibri huma f’modulu/i tal-metall.

(3)

Il-prodott ikkonċernat bħalissa huwa kklassifikat taħt il-kodiċi NM ex 8544 70 00 (kodiċi TARIC 8544700010). Il-kodiċijiet NM u TARIC qed jingħataw għall-informazzjoni biss.

(4)

Fis-17 ta’ Diċembru 2020, l-ilmentatur ippreżenta talba għar-reġistrazzjoni f’konformità mal-Artikolu 14(5) tar-Regolament bażiku. L-ilmentatur talab li l-importazzjonijiet tal-prodott ikkonċernat isiru soġġetti għar-reġistrazzjoni sabiex sussegwentement ikunu jistgħu jiġu applikati miżuri kontra dawk l-importazzjonijiet mid-data ta’ tali reġistrazzjoni, dment li jkunu ssodisfati l-kundizzjonijiet kollha stabbiliti fir-Regolament bażiku.

(5)

Skont l-ilmentatur, ir-reġistrazzjoni kienet ġustifikata minħabba li l-kundizzjonijiet fl-Artikolu 10(4) tar-Regolament bażiku ġew issodisfati. B’mod partikolari, l-ilmentatur argumenta li l-prodott ikkonċernat kien qed ikun oġġett ta’ dumping fl-Unjoni f’volumi dejjem akbar wara l-bidu tal-proċediment li kkawża ħsara sinifikanti lill-industrija tal-Unjoni u jdgħajjef l-effett rimedjali tad-dazji definittivi potenzjali.

(6)

Il-Kummissjoni eżaminat it-talba fid-dawl tal-Artikolu 10(4) tar-Regolament bażiku. Il-Kummissjoni vverifikat jekk l-importaturi kinux akkonoxxenza, jew jekk kellhomx ikunu akkonoxxenza, tad-dumping fir-rigward tal-livell tad-dumping u d-dannu allegat jew misjub. Analizzat ukoll jekk kienx hemm żieda sostanzjali ulterjuri fl-importazzjonijiet li, fid-dawl ta’ meta seħħet u l-volum u ċirkostanzi oħra, x’aktarx imminat serjament l-effett ta’ rimedju tad-dazju anti-dumping definittiv li għandu jiġi applikat.

(7)

Il-Kummissjoni għandha għad-dispożizzjoni tagħha biżżejjed evidenza li l-importazzjonijiet tal-prodott ikkonċernat miċ-Ċina qed ikunu iddampjati. B’mod partikolari, l-ilmentatur ipprovda evidenza ta’ dumping abbażi ta’ paragun tal-valur normali maħdum abbażi tal-kostijiet tal-produzzjoni u l-bejgħ li jirriflettu prezzijiet jew parametri referenzjarji mingħajr distorsjoni, stabbilit f’konformità mal-Artikolu 2(6a)(a) tar-Regolament bażiku, mal-prezz tal-esportazzjoni (fil-livell ta’ kif joħroġ mill-fabbrika) tal-prodott ikkonċernat meta mibjugħ għall-esportazzjoni lejn l-Unjoni. Fuq dik il-bażi, il-marġni tad-dumping ta’ 123 % ikkalkulat fl-ilment huwa sinifikanti.

(8)

Dik l-informazzjoni kienet inkluża fin-notifika ta’ bidu u għalhekk il-Kummissjoni tqis li l-importaturi kienu konxji, jew kellhom ikunu jafu, dwar id-dumping.

(9)

Bi tweġiba għat-talba għar-reġistrazzjoni mressqa mill-Europacable, il-Kamra tal-Kummerċ taċ-Ċina għall-Importazzjoni u l-Esportazzjoni ta’ Makkinarju u Prodotti Elettroniċi (CCCME) sostniet li r-rekwiżiti legali għar-reġistrazzjoni ma ġewx issodisfati, minħabba li t-talba għar-reġistrazzjoni ma kkunsidratx l-għarfien tal-importatur dwar id-dumping flimkien mar-rekwiżit taż-żieda sostanzjali ulterjuri fl-importazzjonijiet. B’mod partikolari, skont il-parti, kwalunkwe żieda fl-importazzjonijiet li ma tkunx ikkawżata mill-għarfien ta’ miżuri potenzjali ma għandhiex tissodisfa r-rekwiżiti legali.

(10)

Fir-rigward ta’ din id-dikjarazzjoni, il-Kummissjoni tqis li dawn iż-żewġ rekwiżiti għandhom jiġu kkunsidrati separatament. Fil-fatt, is-CCCME ssostni l-allegazzjonijiet tagħha billi tirreferi għal konstatazzjoni tal-Qorti (3) magħmula meta tinterpreta 10(4)(d) u mhux 10(4)(c), li huwa rekwiżit distint (u kumulattiv) (4). Is-CCCME irriproduċiet is-sejbiet parzjalment u ħarġithom mill-kuntest. Sempliċi qari tal-paragrafu kollu jagħmilha ċara li s-sejba hija irrilevanti għall-interpretazzjoni ta’ “akkonoxxenza”. Fil-fatt, il-konstatazzjonijiet f’dak il-każ isostnu l-pożizzjoni tal-Kummissjoni meta tiddikjara li huwa mill-pubblikazzjoni tan-notifika tal-bidu tal-investigazzjoni li l-importaturi kienu jafu bil-possibbiltà li d-dazji jistgħu sussegwentement jiġu applikati retroattivament. Dan jissuġġerixxi li l-importaturi jkunu wkoll (jew kellhom ikunu) konxji mid-dumping.

(11)

Fir-rigward tal-għarfien tal-importaturi dwar id-dumping, il-Kummissjoni tqis li billi tat bidu għall-investigazzjoni u pprovdiet l-informazzjoni kollha meħtieġa lill-partijiet interessati, l-importaturi għandhom ikunu konxji tad-dumping. In-notifika ta’ bidu hija ppubblikata f’Il-Ġurnal Uffiċjali tal-Unjoni Ewropea u hija aċċessibbli għall-partijiet interessati kollha, inkluż għall-importaturi. Barra minn hekk, bħala partijiet interessati fl-investigazzjoni, l-importaturi għandhom aċċess għall-verżjoni mhux kunfidenzjali tal-ilment. Għaldaqstant, il-Kummissjoni kienet tal-fehma li, f’dak il-mument, l-importaturi kienu akkonoxxenza, jew kellhom ikunu akkonoxxenza, tal-prattiki allegati ta’ dumping, il-livell tagħhom u d-dannu allegat.

(12)

Rigward iż-żieda fl-importazzjonijiet, l-analiżi fil-premessi (19) u (20) turi li l-importazzjonijiet tabilħaqq żdiedu b’mod sinifikanti wara l-bidu ta’ din l-investigazzjoni, u li, minħabba ż-żmien meħtieġ bejn l-ordni u t-twassil, din ix-xejra dehret mhux immedjatament, iżda aktar minn xahar wara l-bidu tal-investigazzjoni. Dan juri li ż-żieda ulterjuri rrapportata hawn taħt hija kkawżata minn deċiżjonijiet konxji tal-importaturi fid-dawl tal-eżistenza tal-investigazzjoni u tal-possibbiltà ta’ dazji imposti fuq il-prodott ikkonċernat.

(13)

B’hekk il-Kummissjoni kkonkludiet li l-ewwel kriterju għar-reġistrazzjoni kien issodisfat.

(14)

Fit-talba tiegħu għar-reġistrazzjoni tal-importazzjonijiet, l-ilmentatur iddikjara żieda sostanzjali oħra fl-importazzjonijiet. Għal dak il-għan, l-ilmentatur uża l-Istatistika Doganali Ċiniża li turi li matul il-perjodu Jannar–Ottubru 2020, il-produtturi Ċiniżi tal-kejbils tal-fibrottika esportaw +9,5 % volumi ogħla tal-kodiċi Ċiniż tal-prodott 8544.70.00 lejn l-Unjoni (5) meta mqabbel mal-istess perjodu fl-2019.

(15)

Is-CCCME kkontestat iċ-ċifri pprovduti mill-ilmentatur, u ddikjarat li l-istatistika tal-esportazzjoni Ċiniża ma kinitx affidabbli u li ċ-ċifri tal-Eurostat ma wrewx żieda fl-importazzjonijiet.

(16)

Il-Kummissjoni wettqet il-valutazzjoni tagħha stess fuq il-bażi ta’ data kompluta u aġġornata disponibbli fil-bażi tad-data tas-Sorveljanza, mingħajr ma qieset l-istatistika tal-esportazzjoni Ċiniża.

(17)

Il-Kummissjoni qabblet il-livell tal-importazzjonijiet mill-ewwel xahar sħiħ wara li nbdiet l-investigazzjoni (Ottubru 2020) sal-aktar xahar sħiħ riċenti disponibbli (Jannar 2021) mal-volumi korrispondenti tal-importazzjonijiet fl-istess perjodu tas-sena preċedenti (Ottubru 2019–Jannar 2020).

(18)

Qabel il-bidu ta’ din l-investigazzjoni ma kien hemm l-ebda kodiċi TARIC speċifiku għall-prodott ikkonċernat. Il-Kummissjoni kkalkulat il-proporzjon għall-importazzjonijiet tal-prodott ikkonċernat (iddikjarat taħt il-kodiċi TARIC 8544700010) fil-perjodu Ottubru 2020–Jannar 2021 (32,85 %). Dan il-proporzjon kien ukoll konformi ma’ dak ipprovdut fl-ilment u kkunsidrat adegwat għall-perjodu minn Ottubru 2019 sa Jannar 2020. Dan tqies bħala approċċ konservattiv peress li l-bqija tal-prodotti inklużi taħt il-kodiċi NM 8544 70 00 mhumiex taħt investigazzjoni u l-Kummissjoni ma identifikat l-ebda raġuni li tissuġġerixxi żieda f’dawk l-importazzjonijiet. L-importazzjonijiet miċĊina żviluppaw kif ġej:

(19)

Il-Kummissjoni qabblet ukoll il-medja tal-importazzjonijiet fix-xahar matul il-perjodu ta’ investigazzjoni (Lulju 2019 sa Ġunju 2020) mal-medja tal-importazzjonijiet fix-xahar fl-erba’ xhur wara l-bidu (minn Ottubru 2020 sa Jannar 2021). It-tqabbil, kif spjegat fid-dettall fit-tabella ta’ hawn taħt, wera żieda ta’ 15,05 %.

(20)

Il-Kummissjoni vverifikat l-informazzjoni ta’ hawn fuq ma’ sorsi oħra ta’ informazzjoni disponibbli, inklużi l-formoli tal-kampjunar u t-tweġibiet għall-kwestjonarju tal-produtturi esportaturi kif ukoll il-Eurostat, li ssuġġerixxa li l-volumi ta’ importazzjoni ta’ hawn fuq li nkisbu mill-bażi tad-data tas-Sorveljanza Doganali tal-UE jistgħu jiġu sottovalutati. Il-Kummissjoni se tinvestiga r-raġuni għal dawn id-diskrepanzi, inkluża r-rata ta’ konverżjoni bejn l-unitajiet differenti ta’ kejl. Il-Kummissjoni qieset li dan il-punt ma poġġiex f’dubju l-fatt li l-volumi tal-importazzjoni rrappurtati hawn fuq għandhom jitqiesu affidabbli għal din l-analiżi. Barra minn hekk, korrezzjoni ta’ sottovalutazzjoni eventwali tal-volumi tal-importazzjoni tista’ tirriżulta biss fit-tisħiħ tal-konklużjonijiet milħuqa f’dan ir-Regolament.

(21)

Il-Kummissjoni għalhekk sabet li ż-żieda medja ta’ 27,5 % fix-xhur wara l-bidu tal-investigazzjoni kienet tikkostitwixxi żieda sostanzjali fl-importazzjonijiet skont it-tifsira tal-Artikolu 10(4) tar-Regolament bażiku. Bl-istess mod, iż-żieda ta’ 15,05 % fuq il-bażi tal-medja ta’ kull xahar ta’ l-erba’ xhur wara l-bidu bl-importazzjonijiet medji ta’ kull xahar matul l-IP ukoll instabet li kienet sostanzjali.

(22)

Għaldaqstant, il-Kummissjoni kkonkludiet li t-tieni kriterju għar-reġistrazzjoni kien issodisfat ukoll.

(23)

Il-Kummissjoni għandha biżżejjed evidenza għad-dispożizzjoni tagħha li żieda kontinwata fl-importazzjonijiet miċ-Ċina bi prezzijiet li jkomplu jonqsu tikkaġuna dannu addizzjonali.

(24)

Kif stabbilit fil-premessi (13) sa (18), hemm biżżejjed evidenza ta’ żieda sostanzjali fl-importazzjonijiet tal-prodott ikkonċernat. Dan x’aktarx jimmina serjament l-effett rimedjali tad-dazji li għandhom jiġu applikati. Huwa fil-fatt raġonevoli li wieħed jassumi li l-importazzjonijiet tal-prodott ikkonċernat jaf iżidu ulterjorment is-sehem mis-suq qabel l-adozzjoni ta’ miżuri proviżorji, jekk ikun hemm, billi din tal-aħħar iseħħ lejn it-tieni nofs ta’ Mejju 2021 l-aktar tard.

(25)

Tabilħaqq, is-suq tal-UE huwa attraenti għall-produtturi esportaturi Ċiniżi bħala suq kbir tal-OFC fejn ma hemm l-ebda miżura ta’ difiża kummerċjali fis-seħħ, għall-kuntrarju ta’ swieq oħra bħall-Istati Uniti (fejn japplikaw dazji ta’ 25 % (6)). Dan huwa aktar u aktar minħabba l-kapaċità żejda Ċiniża sinifikanti għal dan il-prodott stmata li tammonta għal aktar mid-doppju tas-suq kollu tal-UE fuq il-bażi ta’ intelliġenza tas-suq speċjalizzat ipprovduta mill-ilmentaturi. Barra minn hekk, iż-żmien huwa kritiku peress li sejħa għall-offerti ewlenija għall-prodott ikkonċernat bdiet f’Jannar 2021 għal kuntratt ta’ provvista pluriennali li jirrappreżenta proporzjon imdaqqas ta’ konsum fi Franza.

(26)

Barra minn hekk, meta wieħed iżomm f’moħħu li l-industrija tal-Unjoni għandha kostijiet fissi għoljin, huwa evidenti li tnaqqis fis-sehem mis-suq u fil-produzzjoni se jwassal għal tnaqqis fil-profittabbiltà matul il-perjodu bejn il-bidu u l-impożizzjoni eventwali tal-miżuri.

(27)

Barra minn hekk, il-prezzijiet tal-importazzjoni tal-prodott ikkonċernat fil-perjodu bejn Ottubru 2020 u Jannar 2021 huma baxxi. Il-bażi tad-data Surveillance 2 tindika li l-valur medju għal kull kg ta’ importazzjonijiet Ċiniżi taħt il-kodiċi NM 8544 70 00 kien madwar 24 % inqas f’Ottubru 2020 - Jannar 2021 milli f’Ottubru 2019- Jannar 2020. Dan huwa indikattiv tal-prezzijiet medji tal-prodott ikkonċernat, peress li l-proporzjon tal-importazzjonijiet tal-prodott ikkonċernat fiż-żewġ perjodi huwa komparabbli (id-data tas-sorveljanza doganali tal-UE għall-perjodu Ottubru 2020-Jannar 2021 tindika li l-prodott ikkonċernat jammonta għal madwar 33 % tal-importazzjonijiet totali taħt il-kodiċi NM 8544 70 00, l-istess proporzjon allegat fl-ilment). Dan ta’ hawn fuq jikkonferma l-imġiba tal-ipprezzar tal-produtturi esportaturi Ċiniżi deskritti fl-ilment.

(28)

Iż-żieda sostanzjali ulterjuri fl-importazzjonijiet osservata wara l-bidu (b’mod partikolari f’Diċembru u f’Jannar), iffaċilitata mill-kapaċità żejda eżistenti fiċ-Ċina u xprunata mill-attraenza tas-suq tal-UE, x’aktarx li timmina serjament l-effetti rimedjali tal-miżuri, mhux l-inqas fid-dawl tal-impatt ikkonċentrat f’perjodu qasir ta’ żmien, taż-żmien kritiku ta’ ċerti offerti, u tal-prezzijiet baxxi involuti. Ma hemm l-ebda informazzjoni fil-fajl dwar ċirkostanzi oħra li jistgħu jikkontradixxu din il-valutazzjoni.

(29)

Għaldaqstant, il-Kummissjoni kkonkludiet li t-tielet kriterju għar-reġistrazzjoni tal-importazzjonijiet kien issodisfat ukoll.

(30)

Fid-dawl ta’ dak li ntqal hawn fuq, il-Kummissjoni kkonkludiet li hemm biżżejjed evidenza biex tiġġustifika l-importazzjonijiet tal-prodott ikkonċernat suġġetti għar-reġistrazzjoni b’konformità mal-Artikolu 14(5) tar-Regolament bażiku.

(31)

Il-partijiet interessati kollha huma mistiedna jippreżentaw il-fehmiet tagħhom bil-miktub u jipprovdu evidenza ta’ sostenn. Barra minn hekk, il-Kummissjoni tista’ tisma’ lill-partijiet interessati, bil-kundizzjoni li jagħmlu talba bil-miktub u juru li hemm raġunijiet partikolari għalfejn dawn għandhom jinstemgħu.

(32)

Skont l-Artikolu 14(5) tar-Regolament bażiku l-importazzjonijiet tal-prodott ikkonċernat jenħtieġ li jkunu soġġetti għar-reġistrazzjoni bl-iskop li jiżguraw li, f’każ li l-investigazzjoni tirriżulta f’konklużjonijiet li jwasslu għall-impożizzjoni ta’ dazji anti-dumping, dawk id-dazji jistgħu, jekk il-kundizzjonijiet neċessarji jkunu ssodisfati, jiġu imposti b’mod retroattiv fuq l-importazzjonijiet irreġistrati skont id-dispożizzjonijiet legali applikabbli.

(33)

Kull obbligazzjoni fil-futur tiġi mill-konklużjonijiet tal-investigazzjoni antidumping.

(34)

L-allegazzjonijiet fl-ilment li jitlob li jingħata bidu għal investigazzjoni antidumping jagħtu stima ta’ marġni medju ta’ dumping sa massimu ta’ 123 % u livell medju ta’ eliminazzjoni tad-dannu ta’ ’l fuq minn 43 % għall-prodott ikkonċernat. Abbażi ta’ dan, l-ammont ta’ responsabbiltà possibbli fil-futur jista’ jiġi stabbilit fil-livell tal-marġini ta’ dumping allegat fl-ilment, jiġifieri sa massimu ta’ 43 % ad valorem fuq il-valur ta’ importazzjoni CIF tal-prodott ikkonċernat.

(35)

Filwaqt li tqis id-diffikultajiet fit-tqabbil tal-volumi f’unitajiet differenti ta’ kejl, kif irrappurtat hawn fuq fil-premessa (20), il-Kummissjoni tqis xieraq li jkollha d-data tal-importazzjoni inkluża l-informazzjoni dwar it-tul tal-kejbils f’kilometri għall-finijiet ta’ monitoraġġ. Għalhekk l-awtoritajiet doganali huma ordnati li jiġbruhom.

(36)

Kwalunkwe data personali li tinġabar f’din l-investigazzjoni se tiġi trattata skont ir-Regolament (UE) 2018/1725 tal-Parlament Ewropew u tal-Kunsill (7),