28.6.2013   

MT

Il-Ġurnal Uffiċjali tal-Unjoni Ewropea

L 177/20


REGOLAMENT TA’ IMPLIMENTAZZJONI TAL-KUMMISSJONI (UE) Nru 623/2013

tas-27 ta’ Ġunju 2013

li jemenda r-Regolament (KE) Nru 1238/95 rigward il-piżijiet pagabbli lill-Uffiċċju Komunitarju tal-Varjetajiet tal-Pjanti

IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea,

Wara li kkunsidrat ir-Regolament tal-Kunsill (KE) Nru 2100/94 tas-27 ta’ Lulju 1994 dwar drittijiet ta’ varjetajiet ta’ pjanti fil-Komunità (1) (“ir-Regolament Bażiku”), u b’mod partikolari l-Artikolu 113 tiegħu,

Wara li kkonsultat mal-Kunsill Amministrattiv tal-Uffiċċju Komunitarju tal-Varjetajiet tal-Pjanti,

Billi:

(1)

L-Artikolu 9(1) tar-Regolament tal-Kummissjoni (KE) Nru 1238/95 tal-31 ta’ Mejju 1995 li jistabbilixxi r-regoli tal-implimentazzjoni sabiex jiġi applikat ir-Regolament tal-Kunsill (KE) Nru 2100/94 rigward il-piżijiet pagabbli lill-Uffiċċju Komunitarju tal-Varjetajiet tal-Pjanti (2), jistabbilixxi l-livell ta’ miżata pagabbli lill-Uffiċċju Komunitarju tal-Varjetajiet tal-Pjanti (“l-Uffiċċju”), għal kull sena li jdum id-dritt Komunitarju għall-varjetà tal-pjanta kif ipprovvdut fl-Artikolu 113(2)(d) tar-Regolament (KE) Nru 2100/94.

(2)

Ir-riserva finanzjarja tal-Uffiċċju qabżet il-livell meħtieġ biex jinżamm baġit bilanċjat u biex tiġi ssalvagwardjata l-kontinwità tal-operazzjonijiet tagħha. Għal din ir-raġuni l-miżata annwali għandha titnaqqas mis-sena 2014.

(3)

Ir-Regolament (KE) Nru 1238/95 għandu għalhekk jiġi emendat skont dan.

(4)

Il-miżuri pprovduti f’dan ir-Regolament huma skont l-opinjoni tal-Kumitat Permanenti dwar id-Drittijiet Komunitarji tal-Varjetajiet tal-Pjanti,

ADOTTAT DAN IR-REGOLAMENT:

Artikolu 1

Fl-Artikolu 9 tar-Regolament (KE) Nru 1238/95, il-paragrafu 1 jinbidel b’dan li ġej:

“1.   L-Uffiċċju għandu jimponi miżata ta’ EUR 250 fuq detentur ta’ dritt Komunitarju għall-varjetà tal-pjanta (“id-detentur”) għal kull sena tal-perjodu taż-żmien tad-dritt Komunitarju għall-varjetà tal-pjanta (“miżata annwali”), kif imsemmi fl-Artikolu 113(2)(d) tar-Regolament Bażiku.”

Artikolu 2

Dan ir-Regolament għandu jidħol fis-seħħ fl-għoxrin jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.

Għandu jibda japplika mill-1 ta’ Jannar 2014.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussell, is-27 ta’ Ġunju 2013.

Għall-Kummissjoni

Il-President

José Manuel BARROSO


(1)   ĠU L 227, 1.9.1994, p. 1.

(2)   ĠU L 121, 1.6.1995, p. 31.