L_202601846MT.000101.fmx.xml

REGOLAMENT TAL-KUNSILL (UE) 2026/1846

tat-23 ta’ Lulju 2026

li jemenda r-Regolament (KE) Nru 765/2006 dwar miżuri restrittivi fid-dawl tas-sitwazzjoni fil-Belarussja u l-involviment tal-Belarussja fl-aggressjoni Russa kontra l-Ukrajna

IL-KUNSILL TAL-UNJONI EWROPEA,

Wara li kkunsidra t-Trattat dwar il-Funzjonament tal-Unjoni Ewropea, u b’mod partikolari l-Artikolu 215 tiegħu,

Wara li kkunsidra d-Deċiżjoni tal-Kunsill (PESK) 2026/1847 tat-23 ta’ Lulju 2026 li temenda id-Deċiżjoni 2012/642/PESK dwar miżuri restrittivi fid-dawl tas-sitwazzjoni fil-Belarussja u l-involviment tal-Belarussja fl-aggressjoni Russa kontra l-Ukrajna (1),

Wara li kkunsidra l-proposta konġunta mir-Rappreżentant Għoli tal-Unjoni għall-Affarijiet Barranin u l-Politika ta’ Sigurtà u l-Kummissjoni Ewropea,

Billi:

(1)	Fit-18 ta’ Mejju 2006, il-Kunsill adotta r-Regolament (KE) Nru 765/2006 (2).

(2)	Ir-Regolament (KE) Nru 765/2006 jagħti effett lill-miżuri previsti fid-Deċiżjoni tal-Kunsill 2012/642/PESK (3).

(3)	Fit-23 ta’ Lulju 2026, il-Kunsill adotta d-Deċiżjoni (PESK) 2026/1487, li temenda d-Deċiżjoni 2012/642/PESK.

(4)

Id-Deċiżjoni ta’ Implimentazzjoni tal-Kunsill (PESK) 2026/1816 (4) iżżid erba’ entitajiet ġodda mal-lista ta’ persuni fiżiċi u ġuridiċi, entitajiet u korpi stabbilita fl-Anness II tad-Deċiżjoni 2012/642/PESK, li hija l-lista ta’ persuni, entitajiet u korpi soġġetti għal restrizzjonijiet fir-rigward tal-awtorizzazzjonijiet għall-bejgħ, il-forniment, it-trasferiment jew l-esportazzjoni ta’ oġġetti u teknoloġija b’użu doppju, u oġġetti u teknoloġija li jistgħu jikkontribwixxu għat-titjib militari u teknoloġiku tal-Belarussja jew tar-Russja, jew għall-iżvilupp tas-setturi tad-difiża u s-sigurtà tagħhom.

(5)

Id-Deċiżjoni (PESK) 2026/1487 tqis li jkun xieraq li tiġi estiża l-lista ta’ oġġetti li jistgħu jikkontribwixxu għall-avvanz militari u teknoloġiku tal-Belarussja jew għall-iżvilupp tas-settur tagħha ta’ difiża u sigurtà, billi telenka oġġetti li intużaw mir-Russja fil-gwerra ta' aggressjoni tagħha kontra l-Ukrajna u oġġetti li jikkontribwixxu għall-iżvilupp jew il-produzzjoni tas-sistemi militari tal-Belarussja, inkluż trabijiet tan-nikil, metall tan-nikil u ligi tan-nikil użati fil-kisi ta’ magni ġett li jiflaħ għall-korrużjoni; trabijiet tal-berillju użati fil-propellanti u f’ligi ta’ prestazzjoni għolja; rita li teħel minnha nnifisha, żigarelliu strixxi użati fis-setturi tal-ajruspazju u tad-difiża; oġġetti tal-avjazzjoni speċifiċi għall-vetturi tal-ajru mingħajr bdot abbord (UAVs) bħal ma huwa tagħmir ta’ appoġġ fuq l-art, sistemi ta’ disturbaturi/ta’ interċezzjoni, sistema tal-illanċjar u servomuturi; kif ukoll sistemi ta’ terminazzjoni tat-titjira għal UAVs jew missili.

(6)	Id-Deċiżjoni (PESK) 2026/1487 temenda d-derogi sabiex tiżgura l-provvista kontinwa ta’ oġġetti u servizzi meħtieġa għaż-żamma tal-infrastruttura tal-internet fil-Belarussja għall-pubbliku ġenerali.

(7)

Barra minn dan, id-Deċiżjoni (PESK) 2026/1487 tikkunsidra li jkun xieraq li jiġu introdotti aktar restrizzjonijiet fuq l-importazzjonijiet ta’ oġġetti li jippermettu li l-Belarussja tiddiversifika s-sorsi tagħha ta’ dħul, biex b’hekk tkun tista’ tinvolvi ruħha fil-gwerra ta’ aggressjoni tar-Russa kontra l-Ukrajna, inkluż restrizzjonijiet fejn jidħlu minerali tar-ram, minerali tan-nikil, minerali taċ-ċomb, minerali ta’ metalli prezzjużi, alkali taż-żingu mhux maħdum, metalli tal-materjali tal-art alkali, ċerti sustanzi kimiċi inorganiċi (ossidi taż-żingu u ossidi tal-kromju), żejt tar-raża, affarijiet tal-ħġieġ, u parts tal-karozzi.

(8)

Id-Deċiżjoni (PESK) 2026/1487 testendi l-projbizzjoni għaċ-ċittadini Belarussi jew għall-persuni fiżiċi li jirrisjedu fil-Belarussja milli jippossjedu jew jikkontrollaw, jew li jokkupaw kwalunkwe kariga fil-korpi governattivi ta’, persuni ġuridiċi, entitajiet jew korpi li huma inkorporati jew kostitwiti skont il-liġi ta’ Stat Membru, sabiex il-projbizzjoni tapplika għal kwalunkwe entità li qed tipprovdi servizzi tal-kriptoassi, kif definit fir-Regolament 2023/1114 tal-Parlament Ewropew u tal-Kunsill (5).

(9)

Ir-Regolament tal-Kunsill 2026/513 (6) estenda l-projbizzjoni fir-Regolament (KE) Nru 765/2006 dwar is-sodisfazzjoni ta’ dawk il-pretensjonijiet miġjuba minn persuni fiżiċi jew ġuridiċi, entitajiet jew korpi stabbiliti f’pajjiżi terzi għajr il-Belarussja kif ukoll pajjiżi sħab elenkati fl-Anness rilevanti għar-Regolament (KE) Nru 765/2006, fejn dawk il-persuni fiżiċi u ġuridiċi, entitajiet jew korpi stabbiliti jkunu qed ibigħu, ifornu, jittrasferixxu jew jesportaw oġġetti, teknoloġija jew servizzi, li l-bejgħ, il-forniment, it-trasferiment jew l-esportazzjoni tagħhom huma projbiti skont ir-Regolament (KE) Nru 765/2006, kemm jekk l-oġġetti, it-teknoloġija jew is-servizzi joriġinaw fl-Unjoni kif ukoll jekk le. Dawk il-persuni jistgħu, madankollu, iressqu pretensjonijiet f’ġurisdizzjonijiet ta’ pajjiżi terzi b’rabta ma’ kuntratti u tranżazzjonijiet affettwati minn dawn il-projbizzjonijiet, li jikkawżaw telf lil ċittadin ta’ Stat Membru jew lil persuni ġuridiċi inkorporati skont il-liġi ta’ Stat Membru. Għalhekk, huwa neċessarju li tiġi estiża l-possibbiltà li d-danni jiġu rkuprati quddiem il-qrati ta’ Stat Membru.

(10)	Dawn il-miżuri jaqgħu fil-kamp ta’ applikazzjoni tat-Trattat dwar il-Funzjonament tal-Unjoni Ewropea u għalhekk, b’mod partikolari bil-ħsieb li tiġi żgurata l-applikazzjoni uniformi tagħhom fl-Istati Membri kollha, hija meħtieġa azzjoni regolatorja fil-livell tal-Unjoni.

(11)	Għaldaqstant, jenħtieġ li r-Regolament (KE) Nru 765/2006 jiġi emendat kif xieraq,

ADOTTA DAN IR-REGOLAMENT:

Artikolu 1

Ir-Regolament (KE) Nru 765/2006 huwa emendat kif ġej:

(1)

L-Artikolu 1bb huwa emendat kif ġej:

(a)	jitħassar il-paragrafu 3d;

(b)

il-paragrafu 14 a huwa sostitwit b’dan li ġej:

“14a. B’deroga mill-paragrafi 1 u 3, l-awtoritajiet kompetenti jistgħu jawtorizzaw il-bejgħ, il-forniment, it-trasferiment jew l-esportazzjoni ta’ oġġetti li jaqgħu taħt il-kodiċijiet NM 8517 62 u 8523 52, jew il-provvista ta’ assistenza teknika jew finanzjarja relatata, għal użu mhux militari u għal utent aħħari mhux militari, wara li jkunu ddeterminaw li tali oġġetti jew assistenza teknika jew finanzjarja relatata jkunu intenzjonati għal networks ta’ komunikazzjoni elettronika ċivili,”

;

(2)

fl-Artikolu 1e(4), il-punt (e) huwa sostitwit b’dan li ġej:

“(e)	networks ċivili ta’ komunikazzjoni elettronika li mhumiex proprjetà ta’xi entità li tkun ikkontrollata pubblikament jew b’aktar minn 50 % sjieda pubblika;”

;

(3)

fl-Artikolu 1f(4), il-punt (e) huwa sostitwit b’dan li ġej:

“(e)	networks ċivili ta’ komunikazzjoni elettronika li mhumiex proprjetà ta’xi entità li tkun ikkontrollata pubblikament jew b’aktar minn 50 % sjieda pubblika;”

;

(4)

L-Artikolu 1ra huwa emendat kif ġej:

(a)	jitħassru l-paragrafi 9 a u 9b;

(b)

il-paragrafu 9c jinbidel b’dan li ġej:

“9c. Mis-26 ta’ Jannar 2026 sal-31 ta’ Diċembru 2026, il-projbizzjonijiet fil-paragrafi 1 u 2 ma għandhomx japplikaw għax-xiri jew l-importazzjoni lejn l-Ungerija ta' oġġetti li jaqgħu taħt il-kodiċi NM 2901 10 00 li joriġinaw mill-Belarussja jew li huma esportati mill-Belarussja, dment li l-oġġetti jkunu maħsuba għall-użu esklużiv fl-Ungerija.”

;

(c)

jiddaħħal il-paragrafu li gej:

“9f. Fir-rigward tal-oġġetti li jaqgħu taħt il-kodiċijiet NM 3803, 7006, 7008, 7009, 7011, 7013, 7014, 7017, 7018, 7020, 8707 u 8708, il-projbizzjonijiet fil-paragrafi 1 u 2 ma għandhomx japplikaw għall-eżekuzzjoni sal-25 ta’ Ottubru 2026 ta’ kuntratti konklużi qabel l-24 ta’ Lulju 2026, jew ta’ kuntratti anċillari meħtieġa għall-eżekuzzjoni ta’ tali kuntratti.”

;

(5)

fl-Artikolu 1s, il-paragrafu 4a huwa sostitwit b’dan li ġej:

“4a. B’deroga mill-paragrafu 1, u mingħajr preġudizzju għar-rekwiżiti tal-awtorizzazzjoni skont ir-Regolament (UE) 2021/821, l-awtoritajiet kompetenti jistgħu jawtorizzaw il-bejgħ, il-forniment, it-trasferiment jew l-esportazzjoni tal-makkinarju li jaqa’ taħt il-kodiċi NM 8471 80 jew il-provvista ta’ assistenza teknika jew finanzjarja relatata, għal użu mhux militari u għal utent aħħari mhux militari, wara li jkunu ddeterminaw li tali makkinarju jew assistenza teknika jew finanzjarja relatata jkunu intenzjonati għal networks ta’ komunikazzjoni elettronika ċivili.”

;

(6)

fl-Artikolu 1u, il-paragrafu 3 huwa sostitwit b’dan li ġej:

“3. Għandu jkun ipprojbit, mis-26 ta’ Marzu 2025, li ċittadini Belarussi jew persuni fiżiċi li jirrisjedu fil-Belarussja jitħallew direttament jew indirettament jippossjedu jew jikkontrollaw, jew ikollhom kwalunkwe kariga fil-korpi ta’ tmexxija ta’ xi persuna ġuridika, entità jew korp li tkun inkorporata jew kostitwita skont il-liġi ta’ Stat Membru u li tkun qed tipprovdi servizzi ta’ kartiera, kontijiet jew kustodja ta’ kriptoassi.. Mill-25 ta’ Awwissu 2026, dik il-projbizzjoni għandha tapplika wkoll fil-każ ta’ persuna ġuridika, entità jew korp li huma inkorporati jew kostitwiti skont il-liġi ta’ Stat Membru u li jipprovdu servizzi ta’ kriptoassi, kif definit fir-Regolament (UE) 2023/1114.”

;

(7)

fl-Artikolu 1y, il-paragrafu 2 huwa sostitwit b’dan li ġej:

“2. Il-paragrafu 1 ma għandux japplika għal ċittadini ta' Stat Membru, ta’ pajjiż membru taż-Żona Ekonomika Ewropea jew tal-Iżvizzera, jew għal persuni fiżiċi li għandhom permess ta’ residenza temporanju jew permanenti fi Stat Membru, f’pajjiż membru taż-Żona Ekonomika Ewropea jew fl-Iżvizzera.”

;

(8)

fl-Artikolu 8h, il-paragrafu 1 huwa sostitwit b’dan li ġej:

“1. Kwalunkwe persuna msemmija fit-tielet jew fir-raba’ inċiż tal-Artikolu 10 għandha tkun intitolata tirkupra, fi proċedimenti ġudizzjarji quddiem il-qrati kompetenti ta’ Stat Membru, kwalunkwe dannu dirett jew indirett, inkluż spejjeż legali, imġarrba minn dik il-persuna, jew minn persuna ġuridika, entità jew korp li l-persuna msemmija fir-raba’ inċiż tal-Artikolu 10 ikollha s-sjieda tagħhom jew tikkontrolla bħala konsegwenza ta’ pretensjonijiet mressqa ma’ qrati f’pajjiżi terzi minn persuni, entitajiet u korpi msemmija fl-Artikolu 8d(1), il-punt (a), (b), (c), (d) jew (e), b’rabta ma’ kwalunkwe kuntratt jew tranżazzjoni li t-twettiq tagħhom ġie affettwat, direttament jew indirettament, totalment jew parzjalment, mill-miżuri imposti skont dan ir-Regolament, dment li l-persuna kkonċernata ma jkollhiex aċċess effettiv għar-rimedji taħt il-ġuriżdizzjoni rilevanti. Tali danni jistgħu jiġu rkuprati mill-persuni, l-entitajiet jew il-korpi msemmija fl-Artikolu 8d(1), il-punt (a), (b), (c), (d) jew (e) li jkunu ppreżentaw il-pretensjonijiet fil-qrati fil-pajjiż terz, jew minn persuni, entitajiet jew korpi li jkollhom is-sjieda ta’ dawk l-entitajiet jew korpi jew li jikkontrollawhom.”

;

(9)	l-Annessi huma emendati f’konformità mal-Anness ta’ dan ir-Regolament.

Artikolu 2

Dan ir-Regolament għandu jidħol fis-seħħ fil-jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussell, it-23 ta’ Lulju 2026.

Għall-Kunsill

Il-President

T. BYRNE

(1) ĠU L, 2026/1847, 23.7.2026, ELI: http://data.europa.eu/eli/dec/2026/1847/oj.

(2) Ir-Regolament tal-Kunsill (KE) Nru 765/2006 tat-18 ta’ Mejju 2006 dwar miżuri restrittivi fid-dawl tas-sitwazzjoni fil-Belarussja u l-involviment tal-Belarussja fl-aggressjoni Russa kontra l-Ukrajna (ĠU L 134, 20.5.2006, p. 1, ELI: http://data.europa.eu/eli/reg/2006/765/oj).

(3) Id-Deċiżjoni tal-Kunsill 2012/642/PESK tal-15 ta’ Ottubru 2012 dwar miżuri restrittivi fid-dawl tas-sitwazzjoni fil-Belarussja u l-involviment tal-Belarussja fl-aggressjoni Russa kontra l-Ukrajna (ĠU L 285, 17.10.2012, p. 1, ELI: http://data.europa.eu/eli/dec/2012/642/oj).

(4) Id-Deċiżjoni ta’ Implimentazzjoni tal-Kunsill (PESK) 2026/1816 tat-23 ta’ Lulju 2026 li timplimenta d-Deċiżjoni 2012/642/PESK dwar miżuri restrittivi fid-dawl tas-sitwazzjoni fil-Belarussja u l-involviment tal-Belarussja fl-aggressjoni Russa kontra l-Ukrajna (ĠU L, 2026/1816, 23.7.2026, ELI: http://data.europa.eu/eli/dec_impl/2026/1816/oj).

(5) Ir-Regolament (UE) 2023/1114 tal-Parlament Ewropew u tal-Kunsill tal-31 ta’ Mejju 2023 dwar is-swieq fil-kriptoassi, u li jemenda r-Regolamenti (UE) Nru 1093/2010 u (UE) Nru 1095/2010 u d-Direttivi 2013/36/UE u (UE) 2019/1937 (ĠU L 150, 9.6.2023, p. 40, ELI: http://data.europa.eu/eli/reg/2023/1114/oj).

(6) Ir-Regolament tal-Kunsill (UE) 2026/513 tat-23 ta’ April 2026 li jemenda r-Regolament tal-Kunsill (KE) Nru 765/2006 dwar miżuri restrittivi fid-dawl tas-sitwazzjoni fil-Belarussja u l-involviment tal-Belarussja fl-aggressjoni Russa kontra l-Ukrajna (ĠU L, 2026/513, 23.4.2026, ELI: http://data.europa.eu/eli/reg/2026/513/oj).

ANNESS

L-Annessi tar-Regolament (KE) Nru 765/2006 huma emendati kif ġej:

(1)

fl-Anness V, jiddaħħlu l-entitajiet li ġejjin:

“CHIP AND DIP LLC

OJSC Rogachev Plant Diaprojector

DISPLAY DESIGN BUREAU JSC

CJSC ‘Hull Products Plant’”;

(2)

L-Anness Va jiġi emendat kif ġej:

(a)

fil-Parti A, Kategorija III, Parti 1 (Telekomunikazzjonijiet), taqsima X.A.III.101 (Tagħmir tat-telekomunikazzjoni), jiddaħħlu l-entraturi li ġejjin:

“j.

Sistemi u tagħmir tal-frekwenzi tar-radju mhux inklużi fir-Regolament (UE) 2021/821, komponenti u aċċessorji, iddisinjati apposta jew modifikati biex jiżviluppaw xi waħda mill-funzjonijiet li ġejjin:

a.	Teħid ta’ kontroll u kmand tal-inġenji tal-ajru mingħajr bdot abbord (UAVs);

b.	Deliberatament u selettivament, jinterferixxu ma’, jiċħdu, jinibixxu, jiddegradaw jew iqarrqu bis-sinjali tal-frekwenza tar-radju għall-kontroll u l-kmand tal-UAVs;

c.	Jużaw il-karatteristiċi speċifiċi tal-protokoll tal-frekwenza tar-radju użat mill-UAVs biex ifixklu it-tħaddim tagħhom.

Nota Teknika: Tali sistemi u tagħmir jistgħu jinkludu disturbaturi tal-frekwenza tar-radju, analizzaturi tal-protokoll, imitaturi tas-sinjali, sistemi ta’ ħtif, antenni direzzjonali, pjattaformi ta’ radju ddefinit minn software (SDR), moduli ta’ gwerra elettronika, kif ukoll software assoċjat jew firmware ta’ kontroll speċifikament adattat għal applikazzjonijiet kontra l-UAVs.”;

(b)

fil-Parti A, il-Kategorija IX (Materjali Speċjali u Tagħmir Relatat), jiddaħħlu t-taqsimiet li ġejjin:

“X.C.IX.018

Pjanċi, folji, riti, fojls, tapes, strixxi u forom ċatti oħrajn awtoadeżivi, mhux speċifikati fir-Regolament (UE) 2021/821, li jkollhom il-karatteristiċi kollha li ġejjin:

a.	Temperatura operattiva massima li taqbeż 413,15 K (140 °C) u temperatura operattiva minima ta’ anqas minn 233,15 K (-40 °C); u

Konformi ma’ dan kollu li ġej, imkejjel skont l-istandard ASTM E595 jew ‘standards ekwivalenti’:

1.	‘Telf Total tal-Massa’ (Total Mass Loss, TML) ta’ 1,0 % jew anqas; u

2.	‘Materjal miġbur volatili kondensabbli’ (Collected Volatile Condensable Material, CVCM) ta’ 0,10 % jew anqas.

Noti Tekniċi:

Għall-iskopijiet tal-kontroll X.C.IX.018, ‘Telf Totali tal-Mass’ (TML) hija t-tnaqqis f’perċentwali fil-massa tal-eżemplar ikkawżata mill-volatilizzazzjoni ta’ materjali taħt kundizzjonijiet speċifiċi ta’ vakwu u ta’ temperatura skont l-istandard ASTM E595 jew ta’ ‘standards ekwivlenti’.

Fejn:

Mi = massa inizjali tal-eżemplar

Mf = mass finali tal-eżemplar wara espożizzjoni għall-vakwu

Għall-finijiet tal-kontroll X.C.IX.018, ‘Materjal miġbur volatili kondensabbli’ (CVCM) huwa l-perċentwal ta’ materjal volatili li minnu jitneħħa l-gass minn eżemplar għall-ittestjar li jikkondensa fuq kollettur speċifiku li jinżamm f’temperatura kkontrollata.

fejn:

Mc= massa miġbura fuq il-pjanċa tal-kollettur

Mi = massa inizjali tal-eżemplar

X.C.IX.019

Trab tan-nikil, metall u ligi tal-nikil li jkollhom kontenut ta’ purità tal-nikil ta’ 50 % jew aktar bil-piż, ħlief dawk speċifikati fis-CML jew fir-Regolament (UE) 2021/821.

X.C.IX.020

Trab tal-berillju li jkollu kontenut ta’ purità tal-berillju ta’ 50 % jew aktar bil-piż, ħlief dak speċifikat fis-CML jew fir-Regolament (UE) 2021/821.”;

(c)

fil-Parti A, il-Kategorija VII (Ajruspazju u Propulsjoni), jiddaħħlu t-taqsimiet li ġejjin:

“X.A.VII.004

Servomuturi li jkollhom proporzjon ta’ torque għall-piż ta’ 0,16 jew aktar.

Nota Teknika:

Il-proporzjon ta’ torque għall-piż jinħadem billi t-torque jitkejjel f’kgf*cm u l-piż fi g.

X.A.VII.005

Tagħmir għal-lanċjar ta’ vetturi tal-ajru mingħajr ekwipaġġ (UAVs), u partijiet tagħhom ħlief dwar speċifikati fis-CML jew fir-Regolament (UE) 2021/821.

X.A.VII.006

Tagħmir għall-appoġġ fuq l-art għal vetturi tal-ajru mingħajr ekwipaġġ (UAVs).

X.A.VII.007

Sistemi ta’ ‘terminazzjoni tat-titjira’ u komponenti ddisinjati speċjalment għalihom.

Nota: Dan il-kontroll ikopri standards ta’ komunikazzjoni diġitali u analogi għal sistemi ta’ ‘Terminazzjoni tat-Titjira’, inklużi modalitajiet operazzjonali kriptati.

Noti Tekniċi:

1.	Għall-fini ta’ dan il-kontroll, ‘terminazzjoni tat-titjira’ tista’ tinvolvi nżul ikkontrollat, awtoqerda tal-UAVs jew missila, jew detonazzjoni tat-testata biex jiġi minimizzat ir-riskju ta’ ħsara kollaterali.

2.	Għall-fini ta’ dan il-kontroll, il-komponenti jinkludu tagħmir tal-art u abbord, eċċitaturi tal-kmand, encoders, kontrolluri amplifikaturi, riċevituri tal-verifika tal-kmand, amplifikaturi, trażmettituri, dekodifikaturi u riċevituri.

X.D.VII.003

‘Software’, għall-‘użu’ ta’ tagħmir ikkontrollat permezz ta’ X.A.VII.006, jew X.A.VII.007.”;

(3)

fl-Anness XXVII, jiddaħħlu l-entrati li ġejjin:

Kodiċi NM	Isem l-oġġett
“2603	Minerali u konċentrati tar-ram
2604	Minerali u konċentrati tan-nikil
2607	Minerali u konċentrati taċ-ċomb
2616	Minerali u konċentrati ta’ metalli prezzjużi
2817	Ossidu taż-żingu; perossidu taż-żingu
2819	Ossidi u idrossidi tal-kromu
3803	Żejt tar-raża, raffinat jew le
7001	Ħġieġ miksur u skart u ruttam ieħor tal-ħġieġ, ħlief ħġieġ minn tubi katodiċi jew xi ħġieġ ieħor attivat mill-intestatura 8549; ħġieġ bil-gozz
7002	Ħġieġ f’boċċi (għajr mikrosferi tal-intestatura 7018), vireg jew tubi, mhux maħdumin
7003	Ħġieġ magħmul bil-forma u ħġieġ mibrum, f’folji jew fi profili, b’saff assorbenti, riflettenti jew mhux-riflettenti jew mingħajru, iżda mhux maħdum mod ieħor
7004	Ħġieġ miġbud u ħġieġ minfuħ, f’folji, b’saff assorbenti, riflettenti jew mhux-riflettenti jew mingħajru, iżda mhux maħdum mod ieħor
7006	Ħġieġ tal-intestatura 7003, 7004 jew 7005, mgħawweġ, bix-xfar maħdumin, imnaqqax, imtaqqab, żmaltat jew maħdum mod ieħor, iżda mhux bi gwarniċ jew mgħammar b’materjali oħrajn
7008	Unitajiet tal-ħġieġ b’ħitan multipli iżolaturi
7009	Mirja tal-ħġieġ, bil-gwarniċ jew le, inklużi mirja biex tara wara
7011	Envelops tal-ħġieġ (inklużi bozoz u tubi), miftuħin, u l-partijiet tagħhom tal-ħġieġ, mingħajr tagħmir, għal lampi elettriċi u sorsi tad-dawl, tubi katodiċi jew bħalhom
7013	Oġġetti tal-ħġieġ tat-tip użat għall-mejda, kċina, twaletta, uffiċċju, tiżjin ta’ ġewwa jew għal għanijiet simili (ħlief dawk ta’ titlu 7010 jew 7018)
7014	Oġġetti tal-ħġieġ għas-sinjalar u elementi ottiċi tal-ħġieġ (ħlief dawk tal-intestatura 7015), mhux maħdumin ottikament
7015	Ħġieġ ta’ arloġġi jew ta’ arloġġi tal-idejn u ħġieġ bħalhom, ħġieġ għan-nuċċalijiet mhux-korrettivi jew korrettivi, ikkurvati, mgħawġin, imħaffrin jew bħalhom, mhux maħdumin ottikament; sferi tal-ħġieġ imħaffrin u segmenti tagħhom, għall-manifattura ta’ dal-ħġieġ
7016	Blokki, ċangaturi, briks, kwadri, madum u oġġetti oħrajn għal pavimentar tal-ħġieġ ippressat jew bil-forma, bil-wajer jew le, tal-tip użati għal għanijiet ta’ bini jew kostruzzjoni; kubi tal-ħġieġ u oġġetti żgħar oħrajn tal-ħġieġ, mirfudin b’dahar jew le, għal mużajki jew għanijiet dekorattivi simili; dwal biċ-ċomb jew bħalhom; ħġieġ multiċellulari jew fowm fi blokki, pannelli, pjanċi, qxur jew għamliet simili
7017	Oġġetti tal-ħġieġ għal laboratorju, iġjeniċi jew farmaċewtiċi, immarkati b’qisien jew kalibrati
7018	Żibeġ tal-ħġieġ, perli artifiċjali, ħaġar prezzjuż jew semi-prezzjuż artifiċjali u oġġetti żgħar tal-ħġieġ simili, u oġġetti tagħhom ħlief ġojjelli artifiċjali; għajnejn tal-ħġieġ ħlief oġġetti prostetiċi; statwetti u ornamenti oħrajn tal-ħġieġ maħdum bil-lampa, ħlief ġojjelli artifiċjali; mikrosferi tal-ħġieġ b’dijametru mhux ikbar minn 1 mm
7020	Oġġetti oħrajn tal-ħġieġ
7901	Żingu mhux maħdum
8707	Bodies (inkluż kabini), għall-vetturi bil-mutur tal-intestaturi 8701 sa 8705
8708	Parts u aċċessorji tal-vetturi bil-mutur tal-intestaturi 8701 sa 8705”.