European flag

Il-Ġurnal Uffiċjali
ta'l-Unjoni Ewropea

MT

Is-serje L


2025/864

6.5.2025

REGOLAMENT TA’ IMPLIMENTAZZJONI TAL-KUMMISSJONI (UE) 2025/864

tat-30ta’ April 2025

li jopera tnaqqis mill-kwota tas-sajd għas-salamun tal-Atlantiku allokata lill-Finlandja fl-2025 minħabba s-sajd eċċessiv fl-2024

IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea,

Wara li kkunsidrat ir-Regolament tal-Kunsill (KE) Nru 1224/2009 tal- 20 ta’ Novembru 2009 li jistabbilixxi sistema tal-Unjoni ta’ kontroll għall-iżgurar tal-konformità mar-regoli tal-Politika Komuni tas-Sajd, li jemenda r-Regolamenti (KE) Nru 847/96, (KE) Nru 2371/2002, (KE) Nru 811/2004, (KE) Nru 768/2005, (KE) Nru 2115/2005, (KE) Nru 2166/2005, (KE) Nru 388/2006, (KE) Nru 509/2007, (KE) Nru 676/2007, (KE) Nru 1098/2007, (KE) Nru 1300/2008, (KE) Nru 1342/2008 u li jħassar ir-Regolamenti (KEE) Nru 2847/93, (KE) Nru 1627/94 u (KE) Nru 1966/2006 (1), u b’mod partikolari l-Artikoli 105(1) u (2) tiegħu,

Billi:

1.   Regolamenti tal-Kunsill li jallokaw lill-Finlandja kwoti tas-sajd, rispettivament, għas-snin 2023, 2024 u 2025

(1)

Għas-sena tas-sajd 2024, ir-Regolament tal-Kunsill (UE) 2023/2638 (2) alloka lill-Finlandja kwota tas-sajd ta’ 13 945 individwu tas-salamun tal-Atlantiku (salmo salar) fl-ilmijiet tal-Unjoni tas-suddiviżjonijiet 22 sa 31 tal-ICES (SAL/3BCD-F) (“is-salamun fil-baċir ewlieni”).

(2)

F’konformità mat-Tabella 8, in-nota 2 f’qiegħ il-paġna, l-ewwel paragrafu, tal-Anness tar-Regolament (UE) 2023/2638, il-kwoti tas-sajd tas-salamun fil-baċir ewlieni kienu esklużivament għall-qabdiet aċċessorji u ma kien permess l-ebda sajd dirett. Kien hemm żewġ derogi għal dik ir-regola.

(3)

L-ewwel deroga kienet prevista f’dik it-Tabella 8, mit-tieni paragrafu tal-istess nota 2 ta’ qiegħ il-paġna, li skontu l-operazzjonijiet tas-sajd imwettqa għall-fini esklużiv ta’ investigazzjonijiet xjentifiċi jistgħu jiġu diretti għas-salamun fil-baċir ewlieni, dment li dawk l-investigazzjonijiet jitwettqu f’konformità mal-kundizzjonijiet stabbiliti fl-Artikolu 25 tar-Regolament (UE) 2019/1241 tal-Parlament Ewropew u tal-Kunsill (3).

(4)

It-tieni deroga kienet prevista f’dik it-Tabella 8, mit-tielet paragrafu tal-istess nota 2 f’qiegħ il-paġna, li skontu s-sajd dirett kien permess għall-bastimenti tas-sajd tal-Unjoni fis-suddiviżjoni 31 tal-ICES f’żoni sa erba’ mili nawtiċi mkejla mil-linji bażi matul il-perjodu mill-1 ta’ Mejju sal-31 ta’ Awwissu 2024.

(5)

L-Artikolu 10(1) tar-Regolament (UE) 2023/2638 ipprojbixxa s-sajd rikreattiv tas-salamun fil-baċir ewlieni fis-suddiviżjonijiet 22 sa 31 tal-ICES. Kien hemm żewġ derogi għal dik ir-regola.

(6)

L-ewwel deroga kienet prevista fl-Artikolu 10(2) li ppermetta s-sajd rikreattiv ta’ salamuna waħda bil-pinna adipuża maqtugħa għal kull sajjied rikreattiv kuljum taħt ċerti kundizzjonijiet.

(7)

It-tieni deroga kienet prevista fl-Artikolu 10(3) li ppermetta s-sajd rikreattiv fis-suddiviżjoni 31 tal-ICES f’żoni sa erba’ mili nawtiċi mkejla mil-linji bażi matul il-perjodu mill-1 ta’ Mejju sal-31 ta’ Awwissu 2024.

(8)

Għas-sena tas-sajd 2023, huwa r-Regolament tal-Kunsill (UE) 2022/2090 (4) li ppreveda, fost l-oħrajn, l-opportunitajiet tas-sajd għas-salamun fil-baċir ewlieni. Għall-kuntrarju tas-sena tas-sajd 2024, fis-sena tas-sajd 2023, it-tielet paragrafu tan-nota 2 f’qiegħ il-paġna tat-Tabella 8 tal-Anness ta’ dak ir-Regolament ipprovda li s-sajd dirett tal-kwoti tas-salamun fil-baċir ewlieni kien permess għall-bastimenti tas-sajd tal-Unjoni fit-Tramuntana għal-latitudni 59° 30′ N (jiġifieri fis-suddiviżjonijiet 29 Tramuntana, 30 u 31 tal-ICES) f’żoni sa erba’ mili nawtiċi mkejla mil-linji bażi matul il-perjodu mill-1 ta’ Mejju sal-31 ta’ Awwissu 2023.

(9)

Għall-2023, il-Finlandja rrappurtat lill-Kummissjoni 4 394 individwu tas-salamun maqbud fis-suddiviżjonijiet 29 Tramuntana u 30 tal-ICES.

(10)

Għas-sena tas-sajd 2025, ir-Regolament tal-Kunsill (UE) 2024/2903 (5) jalloka lill-Finlandja kwota tas-sajd ta’ 8 989 individwu tas-salamun fil-baċir ewlieni.

2.   Skambji mal-Finlandja u valutazzjoni mill-Kumitat Xjentifiku, Tekniku u Ekonomiku għas-Sajd

2.1.   Informazzjoni mill-Finlandja

(11)

Fis-26 ta’ Frar 2024, il-Finlandja infurmat lill-Kummissjoni dwar riċerka ppjanata għall-operazzjonijiet tas-sajd għas-salamun li għandha titwettaq għall-fini ta’ investigazzjoni xjentifika fis-suddiviżjonijiet 29 Tramuntana u 30 tal-ICES. Ir-riċerka pprevediet l-involviment ta’ 45 bastiment kummerċjali li jtajru l-bandiera tal-Finlandja u għadd mhux definit ta’ sajjieda rikreattivi li kellhom ikejlu u jieħdu kampjuni tal-iskwami minn kull salamuna salvaġġa maqbuda. Ir-riċerka kellha tiġi implimentata fl-ilmijiet Finlandiżi sa erba’ mili nawtiċi mkejla mil-linji bażi mis-27 ta’ Mejju sal-31 ta’ Awwissu 2024. Il-Finlandja stenniet qabdiet ta’ madwar 4 300 individwu tas-salamun.

(12)

Peress li r-riċerka kellha tinvolvi aktar minn sitt bastimenti kummerċjali f’konformità mal-Artikolu 25(1)(e) tar-Regolament (UE) 2019/1241 il-Kummissjoni talbet il-parir tal-Kumitat Xjentifiku, Tekniku u Ekonomiku għas-Sajd (STECF) sabiex jiġi kkonfermat li tali livell ta’ parteċipazzjoni kien iġġustifikat fuq il-bażi ta’ raġunijiet xjentifiċi.

2.2.   Il-75 laqgħa plenarja tal-STECF ta’ Marzu 2024

(13)

Fil-75 laqgħa plenarja tiegħu li saret mill-11 sal-15 ta’ Marzu 2024 (6), l-STECF iddikjara fil-konklużjonijiet tiegħu li l-objettiv u l-valur miżjud tas-sajd xjentifiku propost ma kinux ċari u li l-livell ta’ parteċipazzjoni fir-riċerka kif ippjanat inizjalment ma kienx iġġustifikat fuq il-bażi tar-raġunijiet xjentifiċi li ġejjin.

(14)

L-ewwel, l-STECF innota li “l-għadd ta’ bastimenti u l-livell ipproġettat tal-isforz tas-sajd huwa kważi ekwivalenti għal-livelli fis-sajd kummerċjali fis-snin preċedenti. B’segwitu għall-evalwazzjonijiet preċedenti tat-talbiet xjentifiċi dwar is-sajd, l-STECF ifakkar li s-sajd xjentifiku ma jenħtieġx li jkollu l-mira li jissimula s-sajd sħiħ iżda li jiġbor kampjun rappreżentattiv tal-popolazzjoni li jkun adatt għall-iskop tal-provi xjentifiċi”.

(15)

It-tieni, l-STECF innota li “l-kopertura taż-żona kollha u tal-istaġun kollu tas-sajd mhijiex neċessarjament meħtieġa u jissuġġerixxi li l-għarfien preeżistenti dwar id-distribuzzjoni spazjali u temporali fil-baħar tas-salamun mix-Xmara Ljungan jista’ jintuża biex jiġi definit l-isforz tal-kampjunar”.

(16)

It-tielet, l-STECF innota li “l-valur miżjud tad-data li tirriżulta mill-istħarriġ xjentifiku x’aktarx li jkun limitat”.

(17)

Ir-raba’, l-STECF innota li filwaqt li “l-istima tal-proporzjon tas-salamun mix-Xmara Ljungan teħtieġ kampjunar fuq skala kbira (...) anki l-qabda ta’ għadd żgħir ta’ salamun minn din il-popolazzjoni jista’ jkollha impatt sinifikanti fuq l-istokk.”

(18)

Il-ħames, l-STECF innota li “l-varjazzjonijiet interannwali, intraannwali u spazjali fil-kompożizzjoni tal-istokk imħallat (...) ma jippermettux li jinġibdu konklużjonijiet ġenerali mill-kampjunar propost.”

(19)

Is-sitt, l-STECF innota li “fil-kuntest ta’ sajd xjentifiku, ir-rilaxx tas-salamun salvaġġ jista’ jkun opzjoni sabiex jinkisbu l-istess riżultati xjentifiċi filwaqt li jiġi limitat ir-riskju ta’ impatti detrimentali fuq il-popolazzjoni eżawrita”. Dan huwa ġġustifikat “minħabba li ntwera li s-sopravivenza tas-salamun mix-xbieki nases hija akbar minn 70 %”.

(20)

Fid-dawl tal-kunsiderazzjonijiet ta’ hawn fuq, l-STECF ikkonkluda li l-objettiv tas-sajd xjentifiku propost ma kienx ċar, kif kien il-valur miżjud tiegħu, fis-sens li l-għadd ta’ bastimenti ma kienx iġġustifikat fuq il-bażi ta’ raġunijiet xjentifiċi. Issuġġerixxa wkoll li jiġi kkunsidrat ir-rilaxx tas-salamun selvaġġ biex jitnaqqas l-impatt potenzjali tal-programm ta’ kampjunar. Fl-aħħar nett, l-STECF semma l-kunsiderazzjonijiet li ġejjin fis-sitwazzjoni ipotetika li s-sajd xjentifiku jkun iġġustifikat fuq il-bażi ta’ raġunijiet xjentifiċi: “jekk tali sajd ikun permess, ladarba l-objettiv ikun speċifikat b’mod ċar, l-STECF jissuġġerixxi li l-għadd ta’ salamun li għandu jinqabad u l-għadd ta’ bastimenti jistgħu jiġu ddeterminati mill-awtoritajiet Finlandiżi bl-użu ta’ għarfien preeżistenti dwar id-distribuzzjoni spazjali u temporali tas-salamun. L-STECF jikkonkludi li, jekk is-sajd xjentifiku jkun permess, ikun utli li jiġu speċifikati l-miżuri stabbiliti biex jiġi żgurat li s-sajjieda kummerċjali jikkonformaw mal-protokoll xjentifiku.”

2.3.   Skambji mal-Finlandja wara l-75 laqgħa plenarja tal-STECF ta’ Marzu 2024

(21)

Fit-30 ta’ April 2024, il-Finlandja infurmat lill-Kummissjoni li kienet emendat il-kundizzjonijiet tar-riċerka. Ir-riċerka emendata eskludiet is-sajd rikreattiv u naqqset l-għadd ta’ bastimenti kummerċjali parteċipanti li jtajru l-bandiera tal-Finlandja minn 45 għal 32 (li jikkonsistu mill-bastimenti kummerċjali kollha li jtajru l-bandiera tal-Finlandja li, individwalment, qabdu mill-inqas 64 salamuna fl-2022 jew fl-2023). Skont il-Finlandja, dan kien jikkorrispondi għal madwar 50 % tal-bastimenti kummerċjali li jtajru l-bandiera tal-Finlandja li stadu għas-salamun fil-baċir ewlieni fl-2022 jew fl-2023, b’qabda totali stmata ta’ 3 650 individwu. Il-Finlandja sostniet li 32 bastiment kummerċjali kienu meħtieġa biex jinkiseb kampjun rappreżentattiv tal-popolazzjonijiet tas-salamun fil-baċir ewlieni. Il-Finlandja sostniet ulterjorment li waħda mir-raġunijiet li tipprevjeni r-rilaxx tal-qabdiet tas-salamun fil-baċir ewlieni tkun li dan “mhuwiex alternattiva peress li t-teħid tal-kampjuni mill-iskwami tal-individwi tas-salamun salvaġġ huwa kruċjali għall-ġbir ta’ informazzjoni rilevanti dwar l-oriġini tal-individwi tas-salamun salvaġġ fix-xmara. Il-kampjuni tal-iskwami ma jistgħux jittieħdu mingħajr ma ssir ħsara lill-individwi tas-salamun salvaġġ u mingħajr ma jiżdied ir-riskju li tiġi kkawżata mortalità għolja tal-individwi meħlusa”.

(22)

Fl-14 ta’ Mejju 2024, il-Kummissjoni infurmat lill-Finlandja li, fid-dawl tal-parir tal-STECF ta’ Marzu 2024, hija kellha dubji dwar kemm il-livell ta’ parteċipazzjoni fir-riċerka emendata kien iġġustifikat fuq il-bażi ta’ raġunijiet xjentifiċi. Anki jekk l-għadd ta’ bastimenti li jipparteċipaw fir-riċerka emendata tnaqqas minn 45 għal 32 bastiment, ma kien hemm l-ebda tnaqqis simili previst f’termini tal-għadd mistenni ta’ salamun li kellu jinqabad. Il-Kummissjoni infurmat ukoll lill-Finlandja li kellha dubji dwar kemm r-rilaxx tas-salamun maqbud ma jenħtieġx li jitqies bħala alternattiva. Għalhekk, il-Kummissjoni talbet lill-Finlandja biex tipposponi t-twettiq ta’ riċerka “li tmur lil hinn minn dik li l-STECF jistma li għandha tiġi ġġustifikata fuq il-bażi ta’ raġunijiet xjentifiċi” sakemm jinkiseb parir dwar ir-riċerka emendata mill-STECF fil-laqgħa plenarja li jmiss tiegħu ta’ Lulju 2024.

(23)

Fl-24 ta’ Mejju 2024, il-Finlandja infurmat lill-Kummissjoni li kienet se tissostitwixxi tnejn mit-32 bastiment kummerċjali parteċipanti li jtajru l-bandiera tal-Finlandja b’żewġ bastimenti differenti. Il-Finlandja sostniet ulterjorment li: (i) “it-tieni valutazzjoni retroattiva mill-STECF mhix f’konformità mal-Artikolu 25(1)(e) [tar-Regolament (UE) 2019/1241] li jirrikjedi li l-Kummissjoni tiġi infurmata mill-inqas tliet xhur minn qabel. Barra minn hekk, ir-rapport tal-STECF 24-01 ma jirrikjedix tali valutazzjoni mġedda”; (ii) l-istennija għat-tieni parir mill-STECF f’Lulju “ma tkunx f’waqtha” minħabba li “s-salamun migratorju f’nofs Lulju diġà jkun għadda miż-żoni kostali fis-suddiviżjonijiet 29N u 30 u s-sajd xjentifiku għas-salamun huwa bejn wieħed u ieħor komplut.”; (iii) “fl-2019–2022 il-qabda tas-salamun fis-suddiviżjonijiet 29N u 30 kienet ta’ madwar 6 000–9 000 individwu, li minnhom madwar 70 % kienu salvaġġi (4 200–6 300). B’hekk qabda mbassra ta’ 2 550 salamuna salvaġġa fis-sajd xjentifiku hija ferm inqas minn sajd sħiħ normali” u (iv) “il-kejl tat-tul u l-piż u d-determinazzjoni tas-sess tas-salamun salvaġġ ħaj u speċjalment it-teħid ta’ ammont suffiċjenti ta’ skwami minnhom u wara dan ir-rilaxx tagħhom, jidhru li jiksru l-Artikolu 3(3) tar-Regolament Delegat tal-Kummissjoni (UE) 2024/1296 (7) li jirrikjedi r-rilaxx immedjat tas-salamun li jiġi skartat (rilaxxat) u li ma humiex konformi mal-leġiżlazzjoni tagħna dwar il-benesseri tal-annimali. (...) Barra minn hekk, ir-Regolament imsemmi ma jippermettix ir-rilaxx tas-salamun minn xbieki fissi”.

(24)

Fis-27 ta’ Mejju 2024, il-Finlandja bdiet twettaq ir-riċerka emendata bi 32 bastiment kummerċjali.

(25)

Fl-14 ta’ Ġunju 2024, il-Kummissjoni talbet lill-Finlandja tissospendi t-twettiq tar-riċerka emendata sakemm jinkiseb parir dwar dik ir-riċerka mill-STECF fil-laqgħa plenarja li jmiss tiegħu ta’ Lulju 2024.

(26)

Fl-20 ta’ Ġunju 2024, il-Finlandja infurmat lill-Kummissjoni li ma kinitx se tissospendi t-twettiq tar-riċerka emendata minħabba li, skont il-Finlandja: (i) “is-sajd xjentifiku tħejja f’konformità sħiħa mad-dispożizzjonijiet rilevanti tal-PKS”; u (ii) “hemm nuqqas ċar ta’ data dwar l-oriġini tas-salamun salvaġġ fil-qabda tas-sajd kostali tagħna. Id-data dwar l-oriġini tas-salamun hija meħtieġa kemm għal deċiżjonijiet futuri dwar il-ġestjoni tas-sajd għas-salamun kif ukoll għall-konsiderazzjoni ta’ miżuri ta’ konservazzjoni possibbli għal popolazzjonijiet aktar dgħajfa tas-salamun”.

2.4.   Is-76 laqgħa plenarja tal-STECF ta’ Lulju 2024

(27)

Fis-76 laqgħa plenarja tiegħu li saret mit-8 sat-12 ta’ Lulju 2024 (8), l-STECF ikkonferma li l-livell ta’ parteċipazzjoni fir-riċerka emendata ma kienx iġġustifikat fuq il-bażi tar-raġunijiet xjentifiċi li ġejjin.

(28)

L-ewwel, l-STECF innota li l-livell ta’ parteċipazzjoni kien “għadu madwar 50 % tal-bastimenti kollha użati fis-sajd kummerċjali tas-salamun fiż-żona fl-2022–2023” u li “l-qabda totali xorta tkun qrib is-70 % tal-qabda ta’ 5 300 salamuna rrapportata miż-żona matul l-istaġun tas-sajd tal-2022.”

(29)

It-tieni, l-STECF innota li “l-kampjunar xjentifiku għandu jkun f’ordnijiet ta’ kobor iżgħar mis-sajd kummerċjali” filwaqt li “l-qabdiet mistennija huma sa 70 % tal-qabdiet kummerċjali fis-snin preċedenti”.

(30)

It-tielet, il-Finlandja “ħadet kampjun ta’ 394 individwu biss f’AU 3 fl-2023 (99 fis-suddiviżjoni 29 u 295 fis-suddiviżjoni 30 - ICES 2024a)”.

(31)

Ir-raba’, “l-objettivi tas-sajd xjentifiku mitlub għadhom mhumiex ċari”.

(32)

Il-ħames, “il-mortalità possibbli ta’ wara r-rilaxx minħabba l-proċeduri tal-kampjunar hija essenzjalment inqas mill-mortalità ta’ 100 % tal-qabda miżmuma abbord u żbarkata”.

2.5.   Skambji mal-Finlandja wara s-76 laqgħa plenarja tal-STECF ta’ Lulju 2024

(33)

Fi stqarrija għall-istampa tal-4 ta’ Settembru 2024 (9) u permezz ta’ ittra lill-Kummissjoni tat-2 ta’ Ottubru 2024, il-Finlandja indikat li l-bastimenti parteċipanti fir-riċerka emendata kienu qabdu total ta’ 3 162 individwu tas-salamun. Din iċ-ċifra hija konsistenti mad-data uffiċjali dwar il-qabdiet li l-Finlandja rrapportat fis-sistema tar-Rappurtar tal-Isforz u tal-Qabdiet (ECR) tal-Kummissjoni.

(34)

Fit-18 ta’ Frar 2025, il-Kummissjoni infurmat lill-Finlandja permezz ta’ ittra bl-intenzjoni tagħha li tadotta tnaqqis ta’ 3 162 individwu tas-salamun fil-baċir ewlieni mill-kwota Finlandiża disponibbli fl-2025 għal dak l-istokk, skont l-Artikolu 105(1) u (2) tar-Regolament (KE) Nru 1224/2009.

(35)

Fit-3 u s-6 ta’ Marzu 2025, saru laqgħat bejn il-Kummissarju għas-Sajd u għall-Oċeani, il-Ministru Finlandiż għall-Agrikoltura u l-Forestrija u l-awtoritajiet Finlandiżi biex jiddiskutu l-kwistjoni.

(36)

Fis-7 ta’ Marzu 2025, il-Finlandja bagħtet il-kummenti tagħha dwar l-ittra tat-18 ta’ Frar 2025. L-ewwel, il-Finlandja esprimiet dubji dwar il-bażi legali għat-tnaqqis propost, billi sostniet li “l-bażi legali tal-Artikolu 105(1) u (2) tar-Regolament (KE) Nru 1224/2009 hija invalida peress li l-qabda tas-salamun tal-Finlandja kienet ta’ 11 519-il salamuna fl-2024 u għalhekk il-Finlandja ma qabżitx il-kwota tagħha tas-salamun ta’ 16 661 salamuna.” It-tieni, il-Finlandja sostniet li r-riċerka emendata kienet “konformi bis-sħiħ mal-parir tal-STECF mill-plenarja tiegħu ta’ Marzu 24-01 u mal-Artikolu 25 tar-Regolament (UE) 2019/1241, li jistabbilixxi r-regoli dettaljati għas-sajd xjentifiku, inkluż il-parir tal-STECF.” It-tielet, il-Finlandja esprimiet dubji dwar il-bażi legali għall-parir tal-STECF ta’ Lulju 2024, u sostniet li “l-formulazzjoni tar-Regolament (UE) 2019/1241 ma tinkludix il-possibbiltà li jintalab it-tieni parir tardiv mill-STECF.”

3.   Analiżi dettaljata

(37)

Għar-raġunijiet stabbiliti hawn taħt, il-Kummissjoni tikkonkludi li: (i) ir-riċerka emendata ma saritx f’konformità mal-kundizzjonijiet stabbiliti fl-Artikolu 25 tar-Regolament (UE) 2019/1241; u b’riżultat ta’ dan, (ii) il-kundizzjonijiet għall-applikazzjoni tad-deroga kif hemm stabbilit fit-Tabella 8, in-nota 2 f’qiegħ il-paġna, it-tieni paragrafu, tal-Anness tar-Regolament (UE) 2023/2638 ma ġewx issodisfati.

3.1.   Riċerka emendata tal-Finlandja fid-dawl tal-kundizzjonijiet stabbiliti fl-Artikolu 25 tar-Regolament (UE) 2019/1241

(38)

Ir-riċerka emendata tal-Finlandja ma saritx f’konformità mal-kundizzjonijiet stabbiliti fl-Artikolu 25 tar-Regolament (UE) 2019/1241 għar-raġunijiet li ġejjin.

(39)

L-ewwel, fil-parir tiegħu ta’ Marzu 2024 (ara l-premessa (13) ta’ hawn fuq), l-STECF qies li l-livell ta’ parteċipazzjoni fir-riċerka kif ippjanat inizjalment ma kienx iġġustifikat fuq il-bażi ta’ raġunijiet xjentifiċi.

(40)

It-tieni, filwaqt li fit-30 ta’ April u fl-24 ta’ Mejju 2024, il-Finlandja infurmat lill-Kummissjoni li kienet emendat il-kundizzjonijiet tar-riċerka u naqqset il-livell ta’ parteċipazzjoni għal 32 bastiment, il-livell imnaqqas ta’ parteċipazzjoni kien għadu mhux iġġustifikat fuq il-bażi ta’ raġunijiet xjentifiċi. Kif innotat fil-parir tal-STECF ta’ Marzu 2024, is-sajd xjentifiku ma jenħtieġx li jkollu il-mira li jissimula s-sajd sħiħ iżda li jiġbor kampjun rappreżentattiv tal-popolazzjoni li jkun adatt għall-iskop tal-provi xjentifiċi. Madankollu, kif innutat fil-parir tal-STECF ta’ Lulju 2024 u minn naħa waħda, 32 bastiment kummerċjali jirriżultaw f’qabda totali “qrib 70 % tal-qabda ta’ 5 300 salamuna irrapportata miż-żona matul l-istaġun tas-sajd tal-2022” filwaqt li “l-kampjunar xjentifiku għandu jkun f’ordnijiet ta’ kobor iżgħar mis-sajd kummerċjali”. Min-naħa l-oħra, it-3 650 individwu tas-salamun li l-Finlandja qed tistenna li jinqabdu fir-riċerka emendata kienu jikkorrispondu għal sehem li jinsab fil-firxa medja ta’ madwar terz tal-qabdiet totali Finlandiżi tas-salamun fil-baċir ewlieni li saru fis-suddiviżjonijiet 29 Tramuntana u 30 tal-ICES mill-inqas mill-2019.

(41)

Fl-ittri tagħha tat-30 ta’ April 2024, tal-24 ta’ Mejju 2024, tal-20 ta’ Ġunju 2024 u tas-7 ta’ Marzu 2025, il-Finlandja kkontestat il-konklużjoni tal-Kummissjoni li r-riċerka emendata ma twettqitx f’konformità mal-kundizzjonijiet stabbiliti fl-Artikolu 25 tar-Regolament (UE) 2019/1241. Madankollu, il-Kummissjoni ssostni l-konklużjoni tagħha għar-raġunijiet li ġejjin:

(42)

Fl-ewwel lok, ma kinux meħtieġa 32 bastiment kummerċjali biex jinkiseb kampjun rappreżentattiv tal-popolazzjoni tas-salamun fil-baċir ewlieni (ara l-premessa (40) ta’ hawn fuq).

(43)

Fit-tieni lok, ir-rilaxx ta’ qabdiet ta’ salamun fil-baċir ewlieni kien ikun alternattiva. Dan għaliex (i) kif innutat mill-STECF fil-parir tiegħu ta’ Marzu 2024, “intwera li s-sopravivenza tas-salamun mix-xbieki nases hija akbar minn 70 %”; (ii) kif innutat mill-STECF fil-parir tiegħu ta’ Lulju 2024, “il-mortalità possibbli ta’ wara r-rilaxx minħabba l-proċeduri tal-kampjunar hija essenzjalment inqas mill-mortalità ta’ 100 % tal-qabda miżmuma abbord u żbarkata”; u (iii) il-Kummissjoni ma kinitx infurmata dwar liema dispożizzjonijiet tal-“leġiżlazzjoni” Finlandiża “dwar il-benesseri tal-annimali” allegatament jipprevjenu r-rilaxx tas-salamun maqbud.

(44)

Fit-tielet lok, il-Kummissjoni kienet intitolata li titlob it-tieni parir tal-STECF, peress li: (i) l-Artikolu 25(1)(e) tar-Regolament (UE) 2019/1241 jirrikjedi li Stat Membru jemenda l-kundizzjonijiet ta’ kwalunkwe riċerka ppjanata skont il-parir tal-STECF; u (ii) il-Kummissjoni kellha dubji dwar kemm il-livell ta’ parteċipazzjoni fir-riċerka emendata kien iġġustifikat fid-dawl tal-parir tal-STECF ta’ Marzu 2024, u għalhekk dwar kemm il-Finlandja kienet emendat il-kundizzjonijiet tar-riċerka inizjali kif xieraq.

(45)

Fir-raba’ lok, il-Kummissjoni ma talbitx lill-Finlandja biex tipposponi r-riċerka kollha sakemm jinkiseb it-tieni parir mill-STECF. Pjuttost, fl-14 ta’ Mejju 2024, il-Kummissjoni talbet lill-Finlandja tipposponi t-twettiq ta’ kwalunkwe riċerka “li tmur lil hinn minn dak li l-STECF jistma ġustifikat fuq il-bażi ta’ raġunijiet xjentifiċi” fil-parir ta’ Marzu 2024.

3.2.   Ir-riċerka emendata tal-Finlandja fid-dawl tal-kundizzjonijiet għall-applikazzjoni tad-deroga kif hemm stabbilit fit-Tabella 8, in-nota 2 f’qiegħ il-paġna, it-tieni paragrafu, tal-Anness tar-Regolament (UE) 2023/2638

(46)

Għar-raġunijiet stabbiliti hawn taħt, il-Finlandja qabżet il-kwota tas-sajd li ġiet allokata lilha mit-Tabella 8 tal-Anness tar-Regolament (UE) 2023/2638 għas-salamun fil-baċir ewlieni għas-sena 2024.

(47)

L-ewwel, f’konformità mat-Tabella 8, in-nota 2 f’qiegħ il-paġna, l-ewwel paragrafu, tal-Anness tar-Regolament (UE) 2023/2638, il-kwota tal-Finlandja għas-salamun fil-baċir ewlieni kienet esklużivament għall-qabdiet aċċessorji u ma kien permess l-ebda sajd dirett, sakemm ma ġewx issodisfati xi waħda miż-żewġ derogi previsti fit-tieni jew fit-tielet paragrafi ta’ dik in-nota 2 f’qiegħ il-paġna.

(48)

It-tieni, ir-riċerka emendata ma setgħetx tibbenefika mid-deroga għas-sajd dirett ipprovduta fit-Tabella 8, in-nota 2 f’qiegħ il-paġna, it-tieni paragrafu, tal-Anness tar-Regolament (UE) 2023/2638. Tabilħaqq, kif spjegat fit-Taqsima 3.1 ta’ hawn fuq, ir-riċerka emendata ma saritx f’konformità mal-kundizzjonijiet stabbiliti fl-Artikolu 25 tar-Regolament (UE) 2019/1241.

(49)

It-tielet, ir-riċerka emendata ma setgħetx tibbenefika mid-deroga għas-sajd dirett ipprovduta fit-Tabella 8, in-nota 2 f’qiegħ il-paġna, it-tielet paragrafu, tal-Anness tar-Regolament (UE) 2023/2638. Dik id-deroga kienet applikabbli biss fis-suddiviżjoni 31 tal-ICES, filwaqt li r-riċerka emendata twettqet fis-suddiviżjonijiet 29 Tramuntana u 30 tal-ICES.

(50)

Konsegwentement, kwalunkwe sajd dirett tas-salamun fil-baċir ewlieni mill-Finlandja fis-suddiviżjonijiet 29 Tramuntana u 30 tal-ICES fis-sena 2024 qabeż il-kwota allokata lilha mit-Tabella 8 tal-Anness tar-Regolament (UE) 2023/2638. Madankollu, kif spjegat fit-Taqsima 2.5 ta’ hawn fuq, il-bastimenti parteċipanti fir-riċerka emendata qabdu direttament total ta’ 3 162 individwu tas-salamun.

3.3.   Tnaqqis mill-kwota tas-sajd allokata lill-Finlandja fl-2025 minħabba s-sajd eċċessiv fl-2024

(51)

Skont l-Artikolu 105(1) tar-Regolament (KE) Nru 1224/2009, meta l-Kummissjoni tkun stabbiliet li Stat Membru jkun qabeż il-kwoti tas-sajd li kienu allokati lilu, il-Kummissjoni trid topera tnaqqis minn kwoti tas-sajd futuri ta’ dak l-Istat Membru. L-Artikolu 105(2) ta’ dak ir-Regolament jipprevedi li, fil-każ ta’ sajd żejjed aktar mill-kwota, l-allokazzjoni jew is-sehem ta’ stokk jew grupp ta’ stokkijiet disponibbli għal Stat Membru f’sena speċifika, il-Kummissjoni trid topera tnaqqis fis-sena jew is-snin li jsegwu mill-kwota, l-allokazzjoni jew is-sehem annwali tal-Istat Membru li jkun stad iżżejjed.

(52)

Għas-sena tas-sajd 2025, ir-Regolament (UE) 2024/2903 jalloka lill-Finlandja kwota tas-sajd ta’ 8 989 individwu tas-salamun fil-baċir ewlieni. Dan huwa l-istess stokk li għalih il-Finlandja qabżet il-kwota tagħha għas-sena 2024.

(53)

F’konformità mal-punt 1, l-ewwel subparagrafu, tal-Linji Gwida tal-Kummissjoni għat-tnaqqis tal-kwoti skont l-Artikolu 105(1), (2) u (5) tar-Regolament (KE) Nru 1224/2009 (10), jenħtieġ li t-totalità tat-tnaqqis tkun dovuta fis-sena ta’ wara s-sajd eċċessiv. Għalhekk huwa xieraq li jitwettaq it-tnaqqis mill-kwota għal dan l-istokk allokata lil Finlandja għas-sena 2025.

(54)

F’konformità mal-Artikolu 105(2) tar-Regolament (KE) Nru 1224/2009, tali tnaqqis irid jitwettaq billi jiġu applikati l-fatturi ta’ multiplikazzjoni kif stabbiliti fih. F’konformità mal-Artikolu 105(2), it-tieni sentenza, jenħtieġ li jiġi applikat fattur ta’ multiplikazzjoni ugwali għal 1,00 peress li 3 162 individwu tas-salamun fil-baċir ewlieni jiżnu inqas minn 100 tunnellata.

4.   Konklużjoni

(55)

Għalhekk huwa xieraq li jitnaqqsu 3 162 individwu ta’ salamun mill-kwota għas-salamun fil-baċir ewlieni allokata lill-Finlandja mir-Regolament (UE) 2024/2903 għas-sena 2025,

ADOTTAT DAN IR-REGOLAMENT:

Artikolu 1

Il-kwota tas-sajd għas-salamun tal-Atlantiku (salmo salar) fl-ilmijiet tal-Unjoni tas-suddiviżjonijiet 22 sa 31 tal-ICES allokata lill-Finlandja għas-sena 2025 bir-Regolament (UE) 2024/2903 għandha titnaqqas kif stabbilit fl-Anness ta’ dan ir-Regolament.

Artikolu 2

Dan ir-Regolament għandu jidħol fis-seħħ fis-seba’ jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussell, it-30 ta’ April 2025.

Għall-Kummissjoni

Il-President

Ursula VON DER LEYEN


(1)   ĠU L 343, 22.12.2009, p. 1, ELI: http://data.europa.eu/eli/reg/2009/1224/oj.

(2)  Ir-Regolament tal-Kunsill (UE) 2023/2638 tal-20 ta’ Novembru 2023 li jiffissa l-opportunitajiet tas-sajd għal ċerti stokkijiet tal-ħut u gruppi ta’ stokkijiet tal-ħut applikabbli fil-Baħar Baltiku għall-2024 u li jemenda r-Regolament (UE) 2023/194 fir-rigward ta’ ċerti opportunitajiet tas-sajd f’ilmijiet oħra (ĠU L, 2023/2638, 22.11.2023, ELI: http://data.europa.eu/eli/reg/2023/2638/oj).

(3)  Ir-Regolament (UE) 2019/1241 tal-Parlament Ewropew u tal-Kunsill tal-20 ta’ Ġunju 2019 dwar il-konservazzjoni ta’ riżorsi tas-sajd u l-protezzjoni ta’ ekosistemi tal-baħar permezz ta’ miżuri tekniċi, li jemenda r-Regolamenti tal-Kunsill (KE) Nru 1967/2006, (KE) Nru 1224/2009 u r-Regolamenti (UE) Nru 1380/2013, (UE) 2016/1139, (UE) 2018/973, (UE) 2019/472 u (UE) Nru 2019/1022 tal-Parlament Ewropew u tal-Kunsill, u li jħassar ir-Regolamenti tal-Kunsill (KE) Nru 894/97, (KE) Nru 850/98, (KE) Nru 2549/2000, (KE) Nru 254/2002, (KE) Nru 812/2004 u (KE) Nru 2187/2005 (ĠU L 198, 25.7.2019, p. 105, ELI: http://data.europa.eu/eli/reg/2019/1241/oj).

(4)  Ir-Regolament tal-Kunsill (UE) 2022/2090 tas-27 ta’ Ottubru 2022 li jiffissa l-opportunitajiet tas-sajd għall-2023 għal ċerti stokkijiet tal-ħut u gruppi ta’ stokkijiet tal-ħut applikabbli fil-Baħar Baltiku, u li jemenda r-Regolament (UE) 2022/109 fir-rigward ta’ ċerti opportunitajiet tas-sajd f’ibħra oħrajn (ĠU L 281, 31.10.2022, p. 1, ELI: http://data.europa.eu/eli/reg/2022/2090/oj).

(5)  Ir-Regolament tal-Kunsill (UE) 2024/2903 tat-18 ta’ Novembru 2024 li jiffissa l-opportunitajiet tas-sajd għal ċerti stokkijiet tal-ħut u gruppi ta’ stokkijiet tal-ħut applikabbli fil-Baħar Baltiku għall-2025 u li jemenda r-Regolament (UE) 2024/257 fir-rigward ta’ ċerti opportunitajiet tas-sajd f’ilmijiet oħra (ĠU L, 2024/2903, 19.11.2024, ELI: http://data.europa.eu/eli/reg/2024/2903/oj).

(6)  Il-Kumitat Xjentifiku, Tekniku u Ekonomiku għas-Sajd (STECF) – Il-75 Rapport Plenarju (STECF-PLEN-2024-01), l-Uffiċċju tal-Pubblikazzjonijiet tal-Unjoni Ewropea, il-Lussemburgu, 2024, p. 101.

(7)  Ir-Regolament Delegat tal-Kummissjoni (UE) 2024/1296 tat-28 ta’ Frar 2024 li jissupplimenta r-Regolament (UE) 2016/1139 tal-Parlament Ewropew u tal-Kunsill f’dak li jikkonċerna eżenzjoni mill-applikazzjoni tal-obbligu ta’ ħatt l-art fir-rigward tas-salamun fil-Baħar Baltiku għall-perjodu 2024-2026 (ĠU L, 2024/1296, 7.5.2024, ELI: http://data.europa.eu/eli/reg_del/2024/1296/oj).

(8)  STECF – Is-76 Rapport Plenarju (STECF-PLEN-2024-02), l-Uffiċċju tal-Pubblikazzjonijiet tal-Unjoni Ewropea, il-Lussemburgu, 2024, p. 133.

(9)   Ensimmäiset tulokset lohen tieteellisestä kalastuksesta tukevat Suomen rannikkokalastuksen sallimista - ePressi.

(10)  Il-Komunikazzjoni tal-Kummissjoni dwar linji gwida għat-tnaqqis tal-kwoti skont l-Artikolu 105(1), (2) u (5) tar-Regolament (KE) Nru 1224/2009, u li tissostitwixxi l-Komunikazzjoni 2012/C 72/07 2022/C 369/03 (ĠU C 369, 27.9.2022, p. 3).


ANNESS

Stat Membru

Kodiċi tal-ispeċi

Kodiċi taż-żona

Isem l-ispeċi

Isem iż-żona

Kwota inizjali għall-2024 (f’għadd ta’ ħut individwali) għall-qabdiet aċċessorji biss, minbarra s-sajd imwettaq

(i)

esklużivament għal investigazzjonijiet xjentifiċi f’konformità mal-Artikolu 25 tar-Regolament (UE) 2019/1241;

(ii)

fl-ilmijiet kostali tas-suddiviżjoni 31 tal-ICES sa erba’ mili nawtiċi mil-linji bażi u mill-1 ta’ Mejju sal-31 ta’ Awwissu 2024

Kwota inizjali għall-2024 (f’għadd ta’ ħut individwali) (1) għall-qabdiet aċċessorji biss, minbarra s-sajd imwettaq

(i)

esklużivament għal investigazzjonijiet xjentifiċi f’konformità mal-Artikolu 25 tar-Regolament (UE) 2019/1241;

(ii)

fl-ilmijiet kostali tas-suddiviżjoni 31 tal-ICES sa erba’ mili nawtiċi mil-linji bażi u mill-1 ta’ Mejju sal-31 ta’ Awwissu 2024

Qabdiet totali fl-2024 (f’għadd ta’ ħut individwali)

Sajd eċċessiv li jirriżulta minn qabdiet mhux permessi (f’għadd ta’ ħut individwali)

Fattur ta’ multiplikazzjoni (2)

Fattur ta’ multiplikazzjoni addizzjonali (3)

Tnaqqis li għandu jiġi applikat mill-kwota għall-2025 (f’għadd ta’ individwi)

FI

SAL

3BCD-F

Salamun tal-Atlantiku

L-ilmijiet tal-Unjoni tas-suddiviżjonijiet 22-31 tal-ICES

13 945

16 661

11 519

3 162

1,00

/

3 162


(1)  Il-kwoti disponibbli għal Stat Membru skont ir-Regolamenti rilevanti dwar l-opportunitajiet tas-sajd wara li jitqiesu l-iskambji tal-opportunitajiet tas-sajd f’konformità mal-Artikolu 16(8) tar-Regolament (UE) Nru 1380/2013 tal-Parlament Ewropew u tal-Kunsill tal- 11 ta' Diċembru 2013 dwar il-Politika Komuni tas-Sajd, li jemenda r-Regolamenti tal-Kunsill (KE) Nru 1954/2003 u (KE) Nru 1224/2009 u li jħassar ir-Regolamenti tal-Kunsill (KE) Nru 2371/2002 u (KE) Nru 639/2004 u d-Deċiżjoni tal-Kunsill 2004/585/KE (ĠU L 354, 28.12.2013, p. 22, ELI: http://data.europa.eu/eli/reg/2013/1380/oj), it-trasferimenti tal-kwoti mill-2023 għal-2024 f’konformità mal-Artikolu 4(2) tar-Ir-Regolament tal-Kunsill (KE) Nru 847/96 tas-6 ta' Mejju 1996 li jintroduċi kondizzjonijiet addizzjonali għal tmexxija minn sena għal sena tal-TAC u l-kwoti (ĠU L 115, 9.5.1996, p. 3, ELI: http://data.europa.eu/eli/reg/1996/847/oj) u mal-Artikolu 15(9) tar-Regolament (UE) Nru 1380/2013 jew ir-riallokazzjoni u t-tnaqqis tal-opportunitajiet tas-sajd f’konformità mal-Artikoli 37 u 105 tar-Regolament (KE) Nru 1224/2009.

(2)  Kif stabbilit fl-Artikolu 105(2) tar-Regolament (KE) Nru 1224/2009. Għandu japplika tnaqqis ekwivalenti għas-sajd eċċessiv * 1,00 fil-każijiet kollha tas-sajd eċċessiv ta’ 100 tunnellata jew inqas.

(3)  Kif stabbilit fl-Artikolu 105(3) tar-Regolament (KE) Nru 1224/2009 u dment li s-sajd eċċessiv ikun jaqbeż l-10 %.


ELI: http://data.europa.eu/eli/reg_impl/2025/864/oj

ISSN 1977-074X (electronic edition)